ಬೆಂಗಳೂರು: ಕನ್ನಡದ ಖ್ಯಾತ ರಿಯಾಲಿಟಿ ಶೋ ಬಿಗ್‌ ಬಾಸ್‌ ಒಂಬತ್ತನೇ (Bigg Boss Kannada) ಸೀಸನ್‌ನ ವಿನ್ನರ್‌ ಆಗಿ ರೂಪೇಶ್‌ ಶೆಟ್ಟಿ ಆಯ್ಕೆಯಾಗಿದ್ದಾರೆ. ರಿಯಾಲಿಟಿ ಶೋನಲ್ಲಿ ಉತ್ತಮ ಪ್ರದರ್ಶನ ತೋರಿದ್ದ, ಜನರಿಂದ ಮೆಚ್ಚುಗೆ ಗಳಿಸಿದ್ದ ರಾಕೇಶ್‌ ಅಡಿಗ ರನ್ನರ್ ಅಪ್ ಎನಿಸಿದ್ದಾರೆ.
ಬಿಗ್‌ಬಾಸ್‌ ಫಿನಾಲೆ ತಲುಪಿದ್ದ ರೂಪೇಶ್‌ ಶೆಟ್ಟಿ ಹಾಗೂ ರಾಕೇಶ್‌ ಅಡಿಗ ಅವರ ಮಧ್ಯೆ ತೀವ್ರ ಪೈಪೋಟಿ ಇತ್ತು. ಆದರೆ, ಕೊನೆಗೆ ರೂಪೇಶ್‌ ಶೆಟ್ಟಿ ಅವರೇ ವಿನ್ನರ್‌ ಎಂದು ಘೋಷಿಸಲಾಯಿತು. ರೂಪೇಶ್‌ ಶೆಟ್ಟಿ ಅವರಿಗೆ ಬಿಗ್‌ಬಾಸ್‌ನ 50 ಲಕ್ಷ ರೂ. ನಗದು ಬಹುಮಾನ ಹಾಗೂ ಇಂಡಸ್‌ 555ನಿಂದ 10 ಲಕ್ಷ ರೂ. ಸೇರಿ ಒಟ್ಟು 60 ಲಕ್ಷ ರೂ. ಸಿಗಲಿದೆ. ರನ್ನರ್ ಅಪ್ ಆದ ರಾಕೇಶ್‌ ಅಡಿಗ ಅವರಿಗೆ 12 ಲಕ್ಷ ರೂ. ಸಿಗಲಿದೆ.
ಒಟಿಟಿಯಿಂದಲೂ ರೂಪೇಶ್‌ ಶೆಟ್ಟಿ ಬಲ ಸ್ಪರ್ಧಿ
ಒಟಿಟಿ ಮಾದರಿಯ ಶೋ ಹಾಗೂ ಬಿಗ್‌ ಬಾಸ್‌ ಶೋನಲ್ಲಿ ರೂಪೇಶ್‌ ಶೆಟ್ಟಿ ಪ್ರಬಲ ಸ್ಪರ್ಧಿಯಾಗಿದ್ದರು. ಹಾಗಾಗಿಯೇ, ಅವರು ಮೊದಲಿನಿಂದಲೂ ಎಲ್ಲರ ಫೇವರಿಟ್‌ ಎನಿಸಿದ್ದರು. ಫಿನಾಲೆ ತಲುಪಿದ ಐವರಲ್ಲಿ ಇವರು ನೆಚ್ಚಿನ ಸ್ಪರ್ಧಿ ಆಗಿದ್ದರು. ಕನ್ನಡ ಹಾಗೂ ತುಳು ಸಿನಿಮಾಗಳಲ್ಲಿ ನಟಿಸಿರುವ ರೂಪೇಶ್‌ ಶೆಟ್ಟಿ ಅವರಿಗೆ ‘ಗಿರಿಗಿಟ್’ ಹೆಸರು ತಂದುಕೊಟ್ಟ ಸಿನಿಮಾ ಆಗಿದೆ.
ಜನರ ಮನಸ್ಸು ಗೆದ್ದ ರಾಕೇಶ್‌ ಅಡಿಗ
ಒಟಿಟಿಯಿಂದ ಬಿಗ್‌ಬಾಸ್‌ ಮನೆ ಪ್ರವೇಶಿಸಿದ ರಾಕೇಶ್‌ ಅಡಿಗ ಫಿನಾಲೆಯಲ್ಲಿ ಗೆಲುವು ಸಾಧಿಸದಿದ್ದರೂ ಜನರ ಮನಸ್ಸು ಗೆದ್ದಿದ್ದಾರೆ. ಜೋಶ್‌, ಕೋಟಿಗೊಂದ್‌ ಲವ್‌ ಸ್ಟೋರಿ, ಪ್ರೀತಿಯಿಂದ ಸೇರಿ ಹಲವು ಸಿನಿಮಾಗಳಲ್ಲಿ ನಟಿಸಿರುವ ರಾಕೇಶ್‌ ಅಡಿಗ, ಬಿಗ್‌ ಬಾಸ್‌ ಮನೆಯಲ್ಲಿ ಕೂಲ್‌ ಆಗಿ ಆಟವಾಡಿಕೊಂಡಿದ್ದರು. ಯಾರಿಂದಿಗೂ ಹೆಚ್ಚು ಜಗಳವಾಡದೆ, ಮನಸ್ತಾಪ ಮಾಡಿಕೊಳ್ಳದೆ ಇದ್ದರು. ಇದೇ ಇವರ ಪ್ಲಸ್‌ ಪಾಯಿಂಟ್‌ ಆಗಿತ್ತು.
ಇದನ್ನೂ ಓದಿ | Bigg Boss Kannada | ದೀಪಿಕಾ ದಾಸ್‌ ಔಟ್‌: ಮೂರನೇ ರನ್ನರ್ ಅಪ್!