ಕೋಲ್ಕತಾ: ʼಕೇವಲ ಎರಡು ನಿಮಿಷದ ಲೈಂಗಿಕ ಸುಖಕ್ಕಾಗಿ ಕಾತರಿಸಿ ಸಮಾಜದ ಕಣ್ಣಿನಲ್ಲಿ ಸಣ್ಣವರೆನಿಸಿಕೊಳ್ಳಬೇಡಿʼ ಎಂದು ಕೋಲ್ಕೊತಾ ಹೈಕೋರ್ಟ್‌ (Calcutta High Court) ಹದಿಹರೆಯದ ಹುಡುಗಿಯರಿಗೆ ಕಿವಿಮಾತು ಹೇಳಿದೆ.
ಅಪ್ರಾಪ್ತ ವಯಸ್ಕಳೊಬ್ಬಳ ಅತ್ಯಾಚಾರ ಪ್ರಕರಣವೊಂದರಲ್ಲಿ ತೀರ್ಪು ನೀಡುವ ಸಂದರ್ಭದಲ್ಲಿ ಹೈಕೋರ್ಟ್‌ ಈ ಬಗ್ಗೆ ಅಭಿಪ್ರಾಯ ನೀಡಿದೆ. ಹದಿಹರೆಯದ ಹುಡುಗ ಮತ್ತು ಹುಡುಗಿಯಿಬ್ಬರ ಲೈಂಗಿಕ ಸಂಬಂಧದ ಪ್ರಕರಣದಲ್ಲಿ, ಇನ್ನೂ 18 ವರ್ಷ ದಾಟದ ಹುಡುಗಿಯ ಜತೆ ದೈಹಿಕ ಸಂಪರ್ಕ ಸಾಧಿಸಿದ ಯುವಕನಿಗೆ 20 ವರ್ಷದ ಜೈಲು ಶಿಕ್ಷೆಯನ್ನು ಸೆಷನ್ಸ್‌ ಕೋರ್ಟ್‌ ವಿಧಿಸಿತ್ತು.
ತಾನು ಸ್ವಇಚ್ಛೆಯಿಂದ ಯುವಕನ ಜತೆಗೆ ದೈಹಿಕ ಸಂಪರ್ಕ ಹೊಂದಿದ್ದುದಾಗಿ ಯುವತಿ ಹೇಳಿದ್ದಳು. ಆದರೆ, 18 ವರ್ಷ ದಾಟದ ಹುಡುಗಿ ಸಮ್ಮತಿಪೂರ್ವಕವಾಗಿಯೇ ದೈಹಿಕ ಮಿಲನಕ್ಕೆ ತೊಡಗಿದರೂ ಅದು ಕಾನೂನಿನ ದೃಷ್ಟಿಯಲ್ಲಿ ಅತ್ಯಾಚಾರ ಎನಿಸಿಕೊಳ್ಳುತ್ತದೆ. ಪುರುಷ ಪೋಕ್ಸೋ (Pocso case) ಕಾಯಿದೆಯಡಿಯಲ್ಲಿ ಜೈಲು ಸೇರುತ್ತಾನೆ.
ಯುವಕ ಈ ತೀರ್ಪನ್ನು ಹೈಕೋರ್ಟ್‌ನಲ್ಲಿ ಪ್ರಶ್ನಿಸಿದ್ದು, ಸದ್ಯ ಈ ಶಿಕ್ಷೆಯನ್ನು ಹೈಕೋರ್ಟ್‌ ತಡೆಹಿಡಿದಿದೆ. ಈ ಸಂದರ್ಭದಲ್ಲಿ ನ್ಯಾಯಮೂರ್ತಿಗಳಾದ ಚಿತ್ತರಂಜನ್‌ ದಾಸ್‌ ಹಾಗೂ ಪಾರ್ಥಸಾರಥಿ ಸೇನ್‌ ಹದಿಹರೆಯದ ಯುವಜನತೆಗೆ ಕೆಲವು ʼಮಾರ್ಗದರ್ಶನದ ನುಡಿʼಗಳನ್ನು ಆಡಿದರು.
ಹದಿಹರೆಯದವರಲ್ಲಿ ಇಂದು ಸೆಕ್ಸ್‌ ಸಾಮಾನ್ಯವಾಗುತ್ತಿದೆ. ಆದರೆ ಇದು ಆಯಾ ವ್ಯಕ್ತಿಯ ಇಚ್ಛೆಯನ್ನು ಅವಲಂಬಿಸಿದೆ. ಕೇವಲ ಎರಡು ನಿಮಿಷದ ದೈಹಿಕ ಸುಖಕ್ಕಾಗಿ ಸಮಾಜದ ಕಣ್ಣಿನಲ್ಲಿ ಸಣ್ಣವರೆನಿಸಿಕೊಳ್ಳಬೇಡಿ. ನಿಮ್ಮ ಲೈಂಗಿಕ ಕಾತರವನ್ನು ನಿಯಂತ್ರಿಸಿಕೊಳ್ಳಿ ಎಂದು ನ್ಯಾಯಮೂರ್ತಿಗಳು ಹಿತವಚನ ಹೇಳಿದರು.
ತಮ್ಮ ದೇಹದ ಘನತೆ, ಸ್ವಾಭಿಮಾನದ ಮೌಲ್ಯ, ಐಕ್ಯತೆಗಳನ್ನು ಉಳಿಸಿಕೊಳ್ಳುವುದು ಯುವತಿಯರ ಕರ್ತವ್ಯ. ಹಾಗೆಯೇ ಯುವಕರು ಯುವತಿಯರ ಘನತೆಯನ್ನು ಗೌರವಿಸಬೇಕು; ಮಹಿಳೆಯರನ್ನು ಗೌರವಪೂರ್ವಕವಾಗಿ ಕಾಣುವಂತೆ ತಮ್ಮ ಮನಸ್ಸನ್ನು ಪಳಗಿಸಬೇಕು. ಅವಳ ಸ್ವಾಭಿಮಾನ, ಘನತೆ, ಖಾಸಗಿತನ ಮತ್ತು ಅವಳ ದೇಹದ ಸ್ವಾಯತ್ತತೆಯ ಹಕ್ಕನ್ನು ಗೌರವಿಸಬೇಕು ಎಂದೂ ನ್ಯಾಯಾಲಯ ಹೇಳಿದೆ.
ಇದನ್ನೂ ಓದಿ: Pocso Case : ಮಗಳ ಮೇಲೆಯೇ ಅತ್ಯಾಚಾರ ಮಾಡಿದ್ದ ಪಾಪಿ ತಂದೆಗೆ 20 ವರ್ಷ ಜೈಲು ಶಿಕ್ಷೆ