ಅಯ್ಯೋ ಆ ವ್ಯಕ್ತಿ ಕುಳಿತಲ್ಲೇ ತೀವ್ರ ಅಸ್ವಸ್ಥನಾಗಿದ್ದಾನೆ ಚೆಕ್ ಮಾಡಿ ಎಂದ ಮಹಿಳೆ; ಆಮೇಲಷ್ಟೇ ಆಕೆಗೆ ಗೊತ್ತಾಯ್ತು ತಾನು ಮೂರ್ಖಳಾದೆನೆಂದು!

ಇಂಗ್ಲೆಂಡ್​ನ ದಕ್ಷಿಣ ಭಾಗದ ಸರ್ರೆಯಲ್ಲಿರುವ ರೈಲ್ವೆ ಪ್ಲಾಟ್​ಫಾರ್ಮ್​​ನಲ್ಲಿ ತನಗಾದ ಒಂದು ವಿಚಿತ್ರ ಅನುಭವವನ್ನು ಎಮ್ಮಾ ಒಬಾಂಕ್​ ಎಂಬ ಮಹಿಳೆ ಟ್ವೀಟ್ ಮೂಲಕ ಹೇಳಿಕೊಂಡಿದ್ದಾರೆ. ಅದು ಹಳೇ ಟ್ವೀಟ್ ಆಗಿದ್ದು, ಮತ್ತೀಗ ವೈರಲ್ ಆಗುತ್ತಿದೆ. ಅಷ್ಟಕ್ಕೂ ಆಗಿದ್ದೇನು ಎಂಬುದರ ವಿವರ ಇಲ್ಲಿದೆ ನೋಡಿ.

2018ರಲ್ಲಿ ಒಮ್ಮೆ ಎಮ್ಮಾ ಒಬಾಂಕ್ ಅವರು ರೈಲಿನಲ್ಲಿ ಪ್ರಯಾಣ ಮಾಡುತ್ತಿದ್ದರು. ಸರ್ರೆಯಲ್ಲಿರುವ ವೋಕಿಂಗ್ ರೈಲ್ವೆ ಸ್ಟೇಶನ್​ನಲ್ಲಿ ಆ ರೈಲು ನಿಂತಿತ್ತು. ರೈಲಿನಲ್ಲಿ ಕುಳಿತಿದ್ದ ಎಮ್ಮಾ ಕಣ್ಣಿಗೆ ಅಲ್ಲಿಯೇ ಪ್ಲಾಟ್​ಫಾರ್ಮ್​​ನ ಬೆಂಚ್​ ಮೇಲೆ ಒಬ್ಬ ವ್ಯಕ್ತಿ ಕುಳಿತಿದ್ದಂತೆ ಕಂಡಿತು. ಆತ ತಟಸ್ಥವಾಗಿ ಕುಳಿತುಕೊಂಡಿದ್ದಾನೆ, ಮೈಮೇಲೆಲ್ಲ ಅಲ್ಲಲ್ಲಿ ಹಿಮ ಬಿದ್ದಂತೆ ಕಾಣುತ್ತಿತ್ತು. ಅದನ್ನ ನೋಡಿದ ಎಮ್ಮಾ ಒಬಾಂಕ್​ ಅವರು, ಕೂಡಲೇ ಅದೇ ರೈಲ್ವೆ ನಿಲ್ದಾಣದ ಸಿಬ್ಬಂದಿಯನ್ನು ಟ್ಯಾಗ್​ ಮಾಡಿ ಟ್ವೀಟ್ ಮಾಡಿದ್ದರಂತೆ. ‘ಆ ವ್ಯಕ್ತಿಯನ್ನು ನೋಡಿ, ತೀವ್ರ ಅಸ್ವಸ್ಥನಾದಂತೆ ಕಾಣಿಸುತ್ತಾನೆ. ಇದ್ದಾನೋ, ಜೀವ ಹೋಗಿದೆಯೋ ಗೊತ್ತಾಗುತ್ತಿಲ್ಲ. ಚಳಿಗೆ ಅವನ ದೇಹ ಹೆಪ್ಪುಗಟ್ಟಿದಂತೆ ಕಾಣಿಸುತ್ತಿದೆ. ಯಾರಾದರೂ ಚೆಕ್ ಮಾಡುತ್ತೀರಾ’ ಎಂದು ಬರೆದಿದ್ದಾರೆ.

ಇದನ್ನೂ ಓದಿ: ರೈಲ್ವೆ ಸ್ಟೇಶನ್​​ ಟಿವಿ ಪರದೆ ಮೇಲೆ ಪ್ರಸಾರವಾದ ಅಶ್ಲೀಲ ವಿಡಿಯೊ; ಪ್ರಯಾಣಿಕರಿಗೆ ಮುಜುಗರ, ಅದನ್ನೂ ಚಿತ್ರೀಕರಿಸಿ ವೈರಲ್ ಮಾಡಿದ ಮಂದಿ!

ಅದಕ್ಕೆ ವೋಕಿಂಗ್ ರೈಲ್ವೆ ಸ್ಟೇಶನ್​​ನ ಸಿಬ್ಬಂದಿ ತಕ್ಷಣವೇ ಉತ್ತರ ಕೊಟ್ಟಿದ್ದಾರೆ ಮತ್ತು ಆ ಉತ್ತರ ಕೇಳಿ ಎಮ್ಮಾ ಒಂದು ಕ್ಷಣ ಬೆಪ್ಪಾದರಂತೆ. ‘ಎಮ್ಮಾ ಅವರೇ, ಏನೂ ಗಾಬರಿಯಾಗಬೇಡಿ. ಅದೊಂದು ಪ್ರತಿಮೆಯಷ್ಟೇ. ಈ ಪಟ್ಟಣದಲ್ಲಿ ಇಂಥ ಸ್ಟ್ಯಾಚ್ಯೂಗಳು ಹಲವು ಇವೆ. ಹಾಗೇ, ರೈಲ್ವೆ ಸ್ಟೇಶನ್​​ನಲ್ಲೂ ಇಂಥ ವಿವಿಧ ಪ್ರತಿಮೆಗಳಿವೆ ಎಂದು ಆ ರೈಲ್ವೆ ಸ್ಟೇಶನ್​ ಸಿಬ್ಬಂದಿ ಹೇಳಿದ್ದಾರೆ. ಅಂದರೆ, ಆ ಮನುಷ್ಯನ ಪ್ರತಿಮೆಯಲ್ಲಿ ಅಷ್ಟು ಜೀವತುಂಬಿದ ಕಳೆಯಿತ್ತು. ಥೇಟ್ ಮನುಷ್ಯನಂತೆ ಕಾಣುತ್ತಿತ್ತು. ಅದನ್ನು ನೋಡಿ ನಾನು ಮೂರ್ಖಳಾಗಿದ್ದೆ ಎಂದು ಎಮ್ಮಾ ತಿಳಿಸಿದ್ದಾರೆ.

ಟಿವಿ ಮತ್ತು ಸಿನಿಮಾ ಏಜೆಂಟ್ ಆಗಿರುವ ಎಮ್ಮಾ ಒಬಾಂಕಾ ಅವರ ಈ ಟ್ವೀಟ್​ಗೆ ನೆಟ್ಟಿಗರು ವಿವಿಧ ರೀತಿಯ ಕಮೆಂಟ್ ಮಾಡಿದ್ದಾರೆ. ಕೆಲವರು ಎಮ್ಮಾ ಕಾಲೆಳೆದಿದ್ದರೆ, ಇನ್ನೂ ಕೆಲವರು ನಿಮ್ಮ ಹೃದಯವಂತಿಕೆಗೆ ನಮ್ಮದೊಂದು ನಮನ ಎಂದಿದ್ದಾರೆ. ಇಂಥ ಮುಜುಗರದ ಸನ್ನಿವೇಶ ನಡೆದಾಗ ಅದೆಷ್ಟೋ ಜನರು ಹೇಳಿಕೊಳ್ಳುವುದೇ ಇಲ್ಲ, ಆದರೆ ನೀವು ಹೇಳಿಕೊಂಡಿರುವುದೇ ಖುಷಿ ಎಂದು ತಿಳಿಸಿದ್ದಾರೆ.