ಇಂದು ಪಿತ್ತಜನಕಾಂಗದ ಕುರಿತು ವಿಶ್ವದೆಲ್ಲೆಡೆ ಜಾಗೃತಿ ಹರಡುವ ದಿನ. ಸದ್ದಿಲ್ಲದೆ ಹರಡುವ ಯಕೃತ್ತಿನ ತೊಂದರೆಗಳ ಬಗ್ಗೆ ಜಾಗೃತಿ ಮೂಡಿಸಿ, ಈ ಬಗ್ಗೆ ಕಾಳಜಿ ತೆಗೆದುಕೊಳ್ಳುವಂತೆ ಜನರನ್ನು ಪ್ರಚೋದಿಸುವ ಉದ್ದೇಶದಿಂದ ಎಪ್ರಿಲ್‌ ತಿಂಗಳ ೧೯ನೇ ದಿನವನ್ನು ವಿಶ್ವ ಯಕೃತ್‌ ದಿನ (World Liver Day) ಎಂದು ಗುರುತಿಸಲಾಗಿದೆ.
ಆಹಾರ ಮತ್ತು ಜೀವನಶೈಲಿಯ ಬಗ್ಗೆ ವಿಪರೀತ ಎನ್ನುವಂಥ ಅಡ್ಡದಾರಿಗಳಿರುವ ಇಂದಿನ ಜಗತ್ತಿನಲ್ಲಿ, ಮಾನವ ದೇಹದ ಒಂದೊಂದೇ ಅಂಗಾಂಗಗಳು ಜಖಂಗೊಳ್ಳುತ್ತಿರುವ ವರ್ತಮಾನಗಳು ಹೆಚ್ಚುತ್ತಿವೆ. ಅದರಲ್ಲೂ ನಾವು ತಿಂದಿದ್ದನ್ನೆಲ್ಲಾ ಚೂರ್ಣಿಸುವ ಹೊಣೆಯನ್ನು ಹೊತ್ತಿರುವ ಪಿತ್ತಜನಕಾಂಗ ಸದ್ದಿಲ್ಲದೆ ಅನಾರೋಗ್ಯದತ್ತ ಸಾಗುತ್ತಿದೆ. ಹೆಪಟೈಟಿಸ್‌ ಎ, ಹೆಪಟೈಟಿಸ್‌ ಬಿ, ಲಿವರ್‌ ಸಿರೋಸಿಸ್‌, ಲಿವರ್‌ ಕ್ಯಾನ್ಸರ್‌, ಅಲ್ಕೋಹಾಲ್‌ ಮೂಲದಿಂದಲ್ಲದ ಫ್ಯಾಟಿ ಲಿವರ್‌ ಮುಂತಾದ ಯಕೃತ್‌ ತೊಂದರೆ ವಿಪರೀತ ಎನ್ನುವಂತೆ ಬಾಧಿಸುತ್ತಿವೆ. 1990ನೇ ಸಾಲಿಗೆ ಹೋಲಿಸಿದಲ್ಲಿ, 2017ರ ಹೊತ್ತಿಗೆ ಲಿವರ್‌ ಕ್ಯಾನ್ಸರ್‌ ಪ್ರಕರಣಗಳಲ್ಲಿ ನೂರು ಪ್ರತಿಶತ ಹೆಚ್ಚಳ ಕಂಡುಬಂದಿರುವುದು ಕಳವಳಕಾರಿ ಎನಿಸಿದ್ದು, ಯಕೃತ್‌ ಕುರಿತ ಜಾಗೃತಿ ದಿನದ (World Liver Day) ಮಹತ್ವವನ್ನು ಹೆಚ್ಚಿಸಿದೆ. ಈ ಬಾರಿಯ ಘೋಷ ವಾಕ್ಯ: “ಜಾಗೃತರಾಗಿರಿ, ನಿಯಮಿತವಾಗಿ ಯಕೃತ್‌ ತಪಾಸಣೆ ಮಾಡಿಸಿಕೊಳ್ಳಿ, ಫ್ಯಾಟಿ ಲಿವರ್‌ ಯಾರನ್ನೂ ಕಾಡಬಹುದು”
ಮೆದುಳಿನ ನಂತರ, ದೇಹದ ಎರಡನೇ ದೊಡ್ಡ ಅಂಗವೆಂದರೆ ಯಕೃತ್ತು. ದೇಹದಲ್ಲಿ ಒಂದಿಷ್ಟು ಮಹತ್ವದ ಹೊಣೆಗಾರಿಕೆಯ ನಿರ್ವಹಣೆ ಪಿತ್ತಜನಕಾಂಗದ ಪಾಲಿಗಿದೆ. ದೇಹದ ಡಿಟಾಕ್ಸ್‌, ಅಂದರೆ ದೇಹವನ್ನು ವಿಷಮುಕ್ತ ಮಾಡುವುದರಿಂದ ಹಿಡಿದು, ದೇಹದ ಚಯಾಪಚಯ ನಿಭಾಯಿಸಿ, ಪೋಷಕಾಂಶಗಳನ್ನು ದಾಸ್ತಾನು ಮಾಡಿ, ರೋಗನಿರೋಧಕ ಶಕ್ತಿ ಹೆಚ್ಚಿಸಿ, ಆಹಾರ ಪಚನ ಮಾಡುವ ಪಿತ್ತರಸ (bile juice) ಉತ್ಪಾದನೆಯವರೆಗೆ ದಿನವಿಡೀ ಕೆಲಸ ಮಾಡುತ್ತಿರುತ್ತದೆ ಯಕೃತ್ತು. ಯಕೃತ್ತನ್ನು ಕ್ಷೇಮವಾಗಿ ಇರಿಸಿಕೊಳ್ಳುವುದರಿಂದ ಬೊಜ್ಜು, ಕೊಲೆಸ್ಟ್ರಾಲ್, ಮಧುಮೇಹ ಮುಂತಾದ ಹಲವಾರು ಸಮಸ್ಯೆಗಳನ್ನು ದೂರ ಇರಿಸಲು ಸಾಧ್ಯ.
ಇದನ್ನೂ ಓದಿ: Fatty Liver Disease: ಯಕೃತ್ತಿನ ಕೊಬ್ಬು, ಏನೀ ಸಮಸ್ಯೆ? ಪರಿಹಾರಗಳೇನು?
ತೊಂದರೆಗಳು ಹಲವು
ಕೆಲವು ರೀತಿಯ ವೈರಸ್‌ ಸೋಂಕುಗಳು ಯಕೃತ್ತಿಗೆ ಹಾನಿ ಮಾಡಬಲ್ಲವು. ಉದಾ, ಹೆಪಟೈಟಿಸ್‌ ಎ, ಬಿ, ಸಿಯಂಥ ರೋಗಾಣುಗಳು. ಇದಲ್ಲದೆ, ಅಲ್ಕೋಹಾಲ್‌ನಿಂದಾಗುವ ಫ್ಯಾಟಿ ಲಿವರ್‌ (ಅಲ್ಕೋಹಾಲ್‌ ಜನ್ಯವಲ್ಲದ ಫ್ಯಾಟಿಲಿವರ್‌ ಸಮಸ್ಯೆಯೂ ಇತ್ತೀಚೆಗೆ ಸಿಕ್ಕಾಪಟ್ಟೆ ಹೆಚ್ಚಿದೆ), ಆಟೋಇಮ್ಯೂನ್‌ ಸಮಸ್ಯೆಯಿಂದಾಗಿ ಅಮರಿಕೊಳ್ಳುವ ಲಿವರ್‌ ತೊಂದರೆಗಳು- ಹೀಗೆ ಹಲವು ಸಮಸ್ಯೆಗಳು ಪಿತ್ತಜನಕಾಂಗವನ್ನು ಕಾಡಬಹುದು. ಕಣ್ಣು, ಚರ್ಮ ಹಳದಿಯಾಗುವುದು, ಕಣ್ಣಿನಲ್ಲಿ ಬಿಳಿಯ ಕಲೆಗಳು, ಅಕಾರಣವಾಗಿ ತೂಕ ಇಳಿಯುವುದು, ಅತೀತ ಸುಸ್ತು ಇಂಥ ಲಕ್ಷಣಗಳು ಕಂಡುಬಂದಲ್ಲಿ ವೈದ್ಯರಲ್ಲಿ ಯಕೃತ್‌ ತಪಾಸಣೆ ಮಾಡಿಸುವುದು ಅಗತ್ಯ.
ನಿಯಮಿತವಾದ ವ್ಯಾಯಾಮ, ಸಂತುಲಿತ ಆಹಾರ, ಅಲ್ಕೋಹಾಲ್‌ ಮತ್ತು ಸಂಸ್ಕರಿತ ಆಹಾರಗಳ ಸೇವನೆಯಿಂದ ದೂರ ಇರುವುದು ಮುಂತಾದ ಕೆಲವು ಸರಳ ಬದಲಾವಣೆಗಳಿಂದ ನಮ್ಮ ಯಕೃತ್ತನ್ನು ಕ್ಷೇಮವಾಗಿ ಕಾಪಾಡಿಕೊಂಡು, ರೋಗಮುಕ್ತರಾಗಿ ಬದುಕುವುದಕ್ಕೆ ಸಾಧ್ಯವಿದೆ. ಆಹಾರದಲ್ಲಿ ಕೆಲವು ಮಾರ್ಪಾಡುಗಳನ್ನು ಮಾಡಿಕೊಳ್ಳುವುದರಿಂದ ಯಕೃತ್ತಿನ ಆರೋಗ್ಯ ಗಣನೀಯ ಪ್ರಮಾಣದಲ್ಲಿ ಸುಧಾರಿಸಬಲ್ಲದು.
ಗ್ರೀನ್‌ ಟೀ: ಹಲವು ರೀತಿಯ ಉತ್ಕರ್ಷಣ ನಿರೋಧಕಗಳಿಂದ ಸಮೃದ್ಧವಾಗಿರುವ ಈ ಪೇಯ, ದೇಹದಲ್ಲಿ ಉರಿಯೂತ ಶಮನ ಮಾಡಬಲ್ಲದು. ಇದರಿಂದ ಯಕೃತ್ತಿನ ಆರೋಗ್ಯವೂ ಸುಧಾರಿಸುತ್ತದೆ.
ಹಸಿರು ತರಕಾರಿಗಳು: ಎಲೆಕೋಸು, ಹೂಕೋಸು, ಬ್ರೊಕೊಲಿಯಂಥ ತರಕಾರಿಗಳು ಸಹ ಪಿತ್ತಜನಕಾಂಗದ ಆರೋಗ್ಯ ರಕ್ಷಣೆಗೆ ನೆರವಾಗಬಲ್ಲವು.
ಬೀಜಗಳು: ಆರೋಗ್ಯಕರ ಕೊಬ್ಬು ಮತ್ತು ಉತ್ಕರ್ಷಣ ನಿರೋಧಕಗಳಿಂದ ತುಂಬಿರುವ ಬಾದಾಮಿ, ವಾಲ್‌ನಟ್‌ ಮುಂತಾದ ಬೀಜಗಳು ಲಿವರ್‌ನ ಕ್ಷಮತೆಯನ್ನು ಹೆಚ್ಚಿಸಬಲ್ಲವು
ಬೆಳ್ಳುಳ್ಳಿ: ಪಿತ್ತಜನಕಾಂಗದ ಉರಿಯೂತವನ್ನು ಕಡಿಮೆ ಮಾಡಿ, ಉತ್ಕರ್ಷಣ ನಿರೋಧಕವಾಗಿಯೂ ಬೆಳ್ಳುಳ್ಳಿ ಕೆಲಸ ಮಾಡಬಲ್ಲದು.
ಬೆರ್ರಿಗಳು: ಬ್ಲೂಬೆರ್ರಿ, ಸ್ಟ್ರಾಬೆರ್ರಿಯಂಥವು ದೇಹಕ್ಕೆ ಹೆಚ್ಚಿನ ನಾರಿನಂಶದೊಂದಿಗೆ ಪಿತ್ತಜನಕಾಂಗದ ರಕ್ಷಣೆಗೆ ಅಗತ್ಯ ಸತ್ವಗಳನ್ನು ನೀಡಬಲ್ಲವು.