ನವದೆಹಲಿ: ಚುನಾವಣಾ ಸಂಬಂಧಿ ಜಾಹೀರಾತುಗಳಲ್ಲಿ (Election Adverstisers) ಪಾರದರ್ಶಕತೆಯನ್ನು ಕಾಪಾಡಿಕೊಳ್ಳಲು ಗೂಗಲ್ (Google) ಮುಂದಾಗಿದೆ. ಚುನಾವಣಾ ಸಂಬಂಧಿ ಜಾಹೀರಾತದಾರರು ಕೃತಕ ಬುದ್ದಿಮತ್ತೆಯಿಂದ (artificial intelligence) ಸೃಜಿತವಾದಿ ಕಂಟೆಂಟ್ ಇರುವ ಬಗ್ಗೆ ಸ್ಪಷ್ಟವಾಗಿ ಮತ್ತು ಪ್ರಜ್ಞಾಪೂರ್ವಕವಾಗಿ ಬಹಿರಂಗಗೊಳಿಸಬೇಕಾಗುತ್ತದೆ ಎಂದು ಗೂಗಲ್ ಹೇಳಿದೆ. ಈ ಪ್ರಕ್ರಿಯೆ ನವೆಂಬರ್ ಮಧ್ಯಂತರದಿಂದ ಆರಂಭವಾಗಲಿದೆ. ಎಐ ಆಧಾರಿತ ಕಂಟೆಂಟ್ ಬಹಿರಂಗಪಡಿಸುವ ನೀತಿಯು, ಚಿತ್ರಗಳು, ವಿಡಿಯೋ ಮತ್ತು ಆಡಿಯೋ ಕಂಟೆಂಟ್‌ಗೆ ಅನ್ವಯವಾಗುತ್ತದೆ.
ಜನರೇಟಿವ್ ಕೃತಕ ಬುದ್ಧಿಮತ್ತೆಯ (AI)ಯನ್ನು ಬಳಸಿಕೊಳ್ಳುವ ಬೂಮ್ ಈಗ ಹೆಚ್ಚಾಗಿದೆ. ಎಐ ಟೂಲ್‌ಗಳನ್ನು ಚಲನಚಿತ್ರಗಳಿಗೆ ಸ್ಕ್ರಿಪ್ಟ್‌ಗಳಂತಹ ವಿಷಯವನ್ನು ವೀಡಿಯೊ, ಚಿತ್ರಗಳು ಮತ್ತು ಜಾಹೀರಾತುಗಳಿಗೆ ಧ್ವನಿಯನ್ನು ರಚಿಸಲು ಬಳಸಿಕೊಳ್ಳಲಾಗುತ್ತಿದೆ. ಇದರಲ್ಲಿ ಯಾವುದೇ ಒರಿಜಿನಲ್ ಇರುವುದಿಲ್ಲ. ಎಐ ಟೂಲ್‌ಗಳು ಸಾಕಷ್ಟು ಕ್ರಾಂತಿಗೆ ಕಾರಣವಾಗಿವೆ.
ಎಐ ಅಲ್ಗಾರಿದಮ್‌ಗಳಿಂದ ರಚಿಸಲಾದ ಡೀಪ್‌ಫೇಕ್‌ಗಳು ಸತ್ಯ ಮತ್ತು ಕಾಲ್ಪನಿಕ ಕಥೆಗಳ ನಡುವಿನ ಗೆರೆಗಳನ್ನು ಮಸುಕುಗೊಳಿಸುವಂತೆ ಬೆದರಿಕೆ ಹಾಕುತ್ತವೆ. ಇದರಿಂದಾಗಿ ಮತದಾರರಿಗೆ ನೈಜತೆಯನ್ನು ನಕಲಿಯಿಂದ ಪ್ರತ್ಯೇಕಿಸಲು ಕಷ್ಟವಾಗುತ್ತದೆ ಎಂದು ಗೂಗಲ್ ಹೇಳಿದೆ.
ಗೂಗಲ್ ಒಡೆತನದ ಸೈಬರ್ ಸೆಕ್ಯುರಿಟಿ ಸಂಸ್ಥೆ ಮ್ಯಾಂಡಿಯಾಂಟ್ ಕಳೆದ ತಿಂಗಳು ಈ ಕುರಿತು ಎಚ್ಚರಿಕೆ ನೀಡಿದೆ. ಇತ್ತೀಚಿನ ವರ್ಷಗಳಲ್ಲಿ ಆನ್‌ಲೈನ್‌ನಲ್ಲಿ ಕುಶಲ ಮಾಹಿತಿ ಅಭಿಯಾನಗಳನ್ನು ನಡೆಸಲು ಕೃತಕ ಬುದ್ಧಿಮತ್ತೆಯ ಬಳಕೆ ಹೆಚ್ಚುತ್ತಿದೆ. ಹೀಗಿದ್ದಾಗ್ಯೂ, ಇತರ ಡಿಜಿಟಲ್‍ ವೇದಿಕೆಗಳಲ್ಲಿ ಈ ತಂತ್ರಜ್ಞಾನದ ಬಳಕೆಯು ಇದುವರೆಗೆ ಸೀಮಿತವಾಗಿದೆ. ಮ್ಯಾಂಡಿಯಾಂಟ್ ಪ್ರಕಾರ, ಜನರೇಟಿವ್ ಕೃತಕ ಬುದ್ಧಿಮತ್ತೆ ಸೀಮಿತ ಸಂಪನ್ಮೂಲಗಳೊಂದಿಗೆ ಗುಂಪುಗಳನ್ನು ಹೆಚ್ಚಿನ ಗುಣಮಟ್ಟದ ವಿಷಯವನ್ನು ಉತ್ಪಾದಿಸಲು ಸಕ್ರಿಯಗೊಳಿಸುತ್ತದೆ.
ಈ ಸುದ್ದಿಯನ್ನೂ ಓದಿ: Google Chrome: ಗೂಗಲ್ ಕ್ರೋಮ್‌ ಬಳಕೆದಾರರಿಗೆ ಸರ್ಕಾರ ನೀಡಿದೆ ಎಚ್ಚರ, ಈಗಲೇ ಅಪ್‌ಡೇಟ್‌ ಮಾಡಿ
ಗೂಗಲ್ ತನ್ನ ಪ್ಲಾಟ್‌ಫಾರ್ಮ್‌ಗಳಲ್ಲಿ ತಪ್ಪು ಮಾಹಿತಿಗಳನ್ನು ಹರಡುವ ಮೂಲಕ ಅನೇಕ ಬಾರಿ ಟೀಕೆಗಳಿಗೆ ಒಳಗಾಗಿದೆ. ಮುಂದಿನ ವರ್ಷ ನವೆಂಬರ್‌ನಲ್ಲಿ ಅಮೆರಿಕವು ತನ್ನ ಮುಂದಿನ ಅಧ್ಯಕ್ಷರನ್ನು ಆಯ್ಕೆ ಮಾಡುವುದರಿಂದ ಅದರ ಪಾರದರ್ಶಕತೆ ಕ್ರಮಗಳಿಗೆ ಹೊಸ ನವೀಕರಣಗಳನ್ನು ಹೊರತರುತ್ತಿದೆ ಎಂದು ಹೇಳಲಾಗುತ್ತಿದೆ.