ಬೆಂಗಳೂರು: ಮಾಜಿ ಮುಖ್ಯಮಂತ್ರಿ, ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ (Siddaramaiah) ಅವರ ಖಾಸಗಿ ಸಂಗತಿಗಳ ಬಗ್ಗೆ ಅವಾಚ್ಯವಾಗಿ ಮತ್ತು ಹಗುರವಾಗಿ ಮಾತನಾಡಿದ್ದ ಕುರುಬ ಸಮಾಜದ ಹಿರಿಯ ಮುಖಂಡ, “ಹಿಂದ” ಅಧ್ಯಕ್ಷ ಕೆ. ಮುಕುಡಪ್ಪ ಕ್ಷಮೆ ಕೋರಿದ್ದಾರೆ.
ಸುದ್ದಿಗೋಷ್ಠಿ ವೇಳೆ ಸಿದ್ದರಾಮಯ್ಯ ಅವರ ಬಗ್ಗೆ ನಾನು ಏನನ್ನೂ ಹೇಳಿಲ್ಲ ಎಂದೇ ಸಮರ್ಥನೆ ಮಾಡಿಕೊಂಡಿರುವ ಮುಕುಡಪ್ಪ, “ಸುದ್ದಿಗೋಷ್ಠಿಗೆ ಮುಂಚಿತವಾಗಿ ನಾನು ಮತ್ತು ಪುಟ್ಟಸ್ವಾಮಿ ಕುರಿ ಹಾಗೂ ಟಗರು ಬಗ್ಗೆ ಮಾತನಾಡುತ್ತಿದ್ದೆವು. ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಘೋಷಿಸಿರುವ 20 ಕುರಿ ಹಾಗೂ ಒಂದು ಟಗರು ನೀಡುವ ಯೋಜನೆ ಬಗ್ಗೆ ಚರ್ಚೆ ಮಾಡುತ್ತಿದ್ದೆವು. ಆ ವೇಳೆ ಒಂದೇ ಟಗರು 20 ಕುರಿಗಳನ್ನು ನೋಡಿಕೊಳ್ಳುತ್ತದೆ. ಟಗರು ಸೂ..ಮಗಂದು ಬಲು ಗಟ್ಟಿ ಅಂದಿದ್ದು ನಿಜ. ಹಾಗಂತ ಸಿದ್ದರಾಮಯ್ಯ ಅವರ ಬಗ್ಗೆ ನಾನು ಏನನ್ನೂ ಹೇಳಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
ನಾನು ನೀಡಿದ ಈ ಹೇಳಿಕೆಯನ್ನು ಸಿದ್ದರಾಮಯ್ಯ ಅವರ ಬಗ್ಗೆ ಹೇಳಲಾಗಿದೆ ಎಂದು ಬಿಂಬಿಸಲಾಗಿದೆ. ಇದರಿಂದ ಯಾರಿಗಾದರೂ ನೋವಾಗಿದ್ದರೆ ಕ್ಷಮೆ ಕೇಳುವೆ. ಸಿದ್ದರಾಮಯ್ಯ ಅವರು ಕುರುಬರ ಸಂಘ ಹಾಗೂ ಮಠವನ್ನು ಕಟ್ಟಿದ್ದಾರೆ. ಕುರುಬ ಸಮುದಾಯಕ್ಕೆ ಕೊಡುಗೆ ನೀಡಿದ್ದಾರೆ. ನಾನೂ ಆ ಸಂದರ್ಭದಲ್ಲಿ ಅವರ ಜತೆಗಿದ್ದೆ ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.
ಇದನ್ನೂ ಓದಿ | Siddaramaiah | ಹತ್ತು ಕುರಿಗಳ ಹಿಂದೆ ಟಗರು ಹೋಗುತ್ತೆ ಎಂಬ ಹೇಳಿಕೆಗೆ ಆಕ್ರೋಶ; ಸಿದ್ದು ಬೆಂಬಲಿಗರಿಂದ ಮುಕುಡಪ್ಪ ಮನೆಗೆ ಮಸಿ
ಮುಕುಡಪ್ಪ ಹೇಳಿಕೆಯನ್ನು ನಾನು ಮೊದಲೇ ಹೇಳಿರ್ಲಿಲ್ವಾ?: ಸಿ.ಟಿ. ರವಿ
ಮಾಜಿ ಸಿಎಂ ಸಿದ್ದರಾಮಯ್ಯ ವಿರುದ್ಧ ಮುಕುಡಪ್ಪ ನೀಡಿರುವ ಹೇಳಿಕೆ ವಿಚಾರವಾಗಿ ಪ್ರತಿಕ್ರಿಯೆ ನೀಡಿರುವ ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ.ಟಿ. ರವಿ, ಅವರು ಹೇಳಿದರೆ ನಡೆಯುತ್ತದೆ. ನಾನು ಸತ್ಯ ಹೇಳಿದರೆ ಕೆಲವರಿಗೆ ಸಹಿಸಿಕೊಳ್ಳಲು ಆಗುವುದಿಲ್ಲ. ನಾನು ಈ ವಿಷಯವನ್ನು ಮೊದಲೇ ಹೇಳಿರಲಿಲ್ಲವೇ? ಆ ವಿಷಯವನ್ನು ನಾನು ಹೇಳಿದ್ದಕ್ಕೆ ನನ್ನ ವಿರುದ್ಧ ಪ್ರತಿಭಟನೆ ಮಾಡುತ್ತಾರೆ ಎಂದು ಸುದ್ದಿಗಾರರಿಗೆ ತಿಳಿಸಿದರು.
ಈಗ ಇದನ್ನು ಕಂಡವರು ಹೇಳಿದ್ದಾರೆ. ನಾನು ಹೇಳಿದ್ದಕ್ಕೆ ಎದ್ದು ಬಂದು ಎದೆ ಮೇಲೆ ಒದ್ದವರ ತರಹ ಆಡಿದ್ದರು. ಹಾಗಾಗಿ ನಾನೇನು ಅದರ ಬಗ್ಗೆ ಏನನ್ನೂ ಹೇಳಲ್ಲ. ಮೈಸೂರಿನವರನ್ನು ಕೇಳಿದರೆ ನಿಮಗೆ ಗೊತ್ತಾಗುತ್ತದೆ. ಕೆಲವೊಂದು ಸಂಗತಿಯನ್ನು ನನ್ನ ಹತ್ತಿರ ಕೇಳಬೇಡಿ. ಋಷಿ ಮೂಲ, ನದಿ ಮೂಲ, ಡ್ಯಾಶ್ ಡ್ಯಾಶ್ ಮೂಲ ಕೇಳಬಾರದು. ಮತ್ತೀ ಡ್ಯಾಶ್ ಡ್ಯಾಶ್ ಮೂಲ ಕೆದಕಲೂಬಾರದು ಎಂದು ಸಿ.ಟಿ. ರವಿ ಹೇಳಿದರು.
ಮುಕುಡಪ್ಪ ಹೇಳಿದ್ದೇನು?
“ಈ ಟಗರು ಇದೆಯಲ್ಲ ೧೦ ಕುರಿ ಮೇಲೆ ಹೋಗುತ್ತೆ. ಮುರುಘಾಸ್ವಾಮಿ ತರಹ ಇವನೂ ಕಳ್ಳ. ಕೆಲವು ಹೊರಗೆ ಬರುತ್ತದೆ. ಇನ್ನೂ ಕೆಲವು ಹೊರಗೆ ಬರುವುದಿಲ್ಲ. ಅವರು ಸಿದ್ದರಾಮಯ್ಯ… ಹುಷಾರು ಮಗ… ನಾನು ಅಷ್ಟೇ ನೀವೂ ಅಷ್ಟೇ… ಕೆಲವು ಹೊರಗೆ ಬರುತ್ತದೆ ಮತ್ತೆ ಕೆಲವು ಹೊರಗೆ ಬರುವುದಿಲ್ಲ. ಸಿದ್ದರಾಮಯ್ಯ ಹೊರಗೆ ಬರಲ್ಲ, ಮನೆಗೆ ಸೇರಿಕೊಳ್ಳುತ್ತಾನೆ” ಎಂದು ಮುಕುಡಪ್ಪ ಸುದ್ದಿಗೋಷ್ಠಿಗೂ ಮುನ್ನ ಪಕ್ಕದಲ್ಲಿ ಕುಳಿತಿದ್ದ ಇನ್ನೊಬ್ಬ ಮುಖಂಡ ಪುಟ್ಟಸ್ವಾಮಿ ಬಳಿ ಪಿಸುಮಾತಿನಲ್ಲಿ ಹೇಳಿದ್ದರು. ಇದು ಮಾಧ್ಯಮಗಳ ಮೈಕ್‌ನಲ್ಲಿ ರೆಕಾರ್ಡ್‌ ಆಗಿದ್ದವು. ಈ ಹೇಳಿಕೆಗೆ ಈಗ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ.
ಇದನ್ನೂ ಓದಿ | Siddaramaiah | ಈ ಟಗರು 10 ಕುರಿಗಳ ಹಿಂದೆ ಹೋಗುತ್ತೆ, ಮುರುಘಾಶ್ರೀಯಂತೆ ಇವನೂ ಕಳ್ಳ: ಸಿದ್ದರಾಮಯ್ಯ ಬಗ್ಗೆ ಮುಕುಡಪ್ಪ ಪಿಸುಮಾತು!
ಪ್ರತಿಭಟನೆ ನಡೆಸಿದ್ದ ಸಿದ್ದರಾಮಯ್ಯ ಬೆಂಬಲಿಗರು
“ಹಿಂದ” ಅಧ್ಯಕ್ಷ ಕೆ. ಮುಕುಡಪ್ಪ ಹಗುರವಾಗಿ ಮಾತನಾಡಿ ಖಾಸಗಿ ಸಂಗತಿಗಳ ಬಗ್ಗೆ ಪ್ರಸ್ತಾಪ ಮಾಡಿದ್ದಕ್ಕೆ ಸಿದ್ದರಾಮಯ್ಯ ಅಭಿಮಾನಿಗಳು ಗುರುವಾರ (ನ.೧೦) ಬೆಳಗ್ಗೆ ಮುಕುಡಪ್ಪ ಮನೆ ಮುಂದೆ ಪ್ರತಿಭಟನೆ ನಡೆಸಿ ಬಾಗಿಲಿಗೆ ಮಸಿ ಬಳಿದು ಆಕ್ರೋಶ ಹೊರಹಾಕಿದ್ದರು. ಅಲ್ಲದೆ, ತಮಟೆ ಬಾರಿಸಿ ಧಿಕ್ಕಾರ ಕೂಗಿ ಕೂಡಲೇ ಕ್ಷಮೆಯಾಚಿಸುವಂತೆ ಕೋರಿದ್ದರು.