ʻಕೊಲಾಜೆನ್‌ʼ ಎಂಬ ಹೆಸರನ್ನು ನೀವು ಇತ್ತೀಚೆಗೆ ಹೆಚ್ಚು ಕೇಳಿರಬಹುದು. ಕೊಲಾಜೆನ್‌ ಸಪ್ಲಿಮೆಂಟ್‌ಗಳನ್ನೂ ಮಾರು ಕಟ್ಟೆಯಲ್ಲಿ ನೋಡಿರಬಹುದು. ನಿಮ್ಮ ಓರಗೆಯವರು, ಗೆಳೆಯ ಗೆಳತಿಯರು ಕೊಲಾಜೆನ್‌ ಸಪ್ಲಿಮೆಂಟ್‌ಗಳನ್ನು ತಿನ್ನುವುದನ್ನೂ ಕಂಡಿರಬಹುದು. ಹಾಗಾದರೆ ಈ ಕೊಲಾಜೆನ್‌ ಎಂದರೆ ಏನು, ಯಾಕಿದು ಬೇಕು ಎಂಬ ಸಂಶಯ ನಿಮಗೆ ಬಂದಿರಲೂಬಹುದು, ಅಥವಾ ಗೊತ್ತಿರಲೂಬಹುದು. ಕೊಲಾಜೆನ್‌ ಎಂಬುದು ಚರ್ಮದ ರಚನೆ ಹಾಗೂ ಎಲಾಸ್ಟಿಸಿಟುಗೆ ಬೇಕಾಗಿರುವ ನಮ್ಮ ದೇಹದಲ್ಲಿರುವ ಒಂದು ಪ್ರೊಟೀನ್‌. ನಮ್ಮ ದೇಹದಲ್ಲಿ ಹಲವು ಬಗೆಯ ಕೊಲಾಜೆನ್‌ಗಳಿವೆ. ನಮಗೆ ವಯಸ್ಸಾಗುತ್ತಾ ಬಂದಂತೆ, ನಮ್ಮ ದೇಹ ಕೊಲಾಜೆನ್‌ ಉತ್ಪತ್ತಿಯನ್ನು ಕಡಿಮೆ ಮಾಡುತ್ತಾ ಬರುತ್ತದೆ. ಆಗ, ನಮ್ಮ ಚರ್ಮದಲ್ಲಿ ಸುಕ್ಕು, ನಿರಿಗೆಗಳು ಆರಂಭವಾಗುತ್ತವೆ. ಚರ್ಮದ ಪದರ ತೆಳುವಾಗಲು ಆರಂಭವಾಗುತ್ತದೆ. ಹೀಗಾಗಿ ಬಹುಮುಖ್ಯವಾಗಿ ಸುಂದರವಾಗಿ ಕಾಣಲು, ವಯಸ್ಸಾಗದಂತೆ ಚರ್ಮ ನುಣುಪಾಗಿ ಹೊಳೆಯಲು, ವಯಸ್ಸು 35-40 ದಾಟುತ್ತಿದ್ದಂತೆ ಕೊಲಾಜೆನ್‌ ಬೂಸ್ಟ್‌ ಸಪ್ಲಿಮೆಂಟ್‌ಗಳ ಸೇವನೆಯನ್ನು ಬಹುತೇಕರು ಆರಂಭಿಸುತ್ತಾರೆ. ಜಾಹಿರಾತುಗಳಲ್ಲಿ ಕಂಡ ಹಾಗೂ ಹೊರಗೆ ಸುಲಭವಾಗಿ ಸಿಗುವ ಸಪ್ಲಿಮೆಂಟ್‌ಗಳನ್ನು ತಂದು ನಿರಾಯಾಸವಾಗಿ ತಿಂದು ಚರ್ಮಕ್ಕೆ ಮತ್ತೆ ಹೊಳಪನ್ನು ಕೊಡುವ ಪ್ರಯತ್ನ, ಆಸೆ ಎಲ್ಲರದ್ದು. ಆದರೆ, ಕೊಲಾಜೆನ್‌ ಉತ್ಪತ್ತಿಯನ್ನು ಹೆಚ್ಚಿಸಲು ಇಂತಹ ಸಪ್ಲಿಮೆಂಟ್‌ಗಳ ಅಗತ್ಯವೇ ಇದೆಯೇ? ಕೊಲಾಜೆನ್‌ ಪ್ರೊಟೀನ್‌ ಉತ್ಪತ್ತಿಯನ್ನು ನಮ್ಮ ದೇಹದಲ್ಲಿ ನೈಸರ್ಗಿಕವಾಗಿ ಹೇಗೆ ಹೆಚ್ಚಿಸಿಕೊಳ್ಳಬಹುದು. ಯಾವೆಲ್ಲ ಆಹಾರ ಸೇವನೆಯ ಮೂಲಕ ನಾವು ನಮ್ಮ ದೇಹದಲ್ಲಿ ಕೊಲಾಜೆನ್‌ ಉತ್ಪತ್ತಿಯನ್ನು ಪ್ರಚೋದಿಸಬಹುದು ಎಂಬುದನ್ನು ನೋಡೋಣ. ಇತ್ತೀಚೆಗೆ ನಡೆದ ಸಂಶೋಧನೆಗಳ ಪ್ರಕಾರ ಕೊಲಾಜೆನ್‌ ಉತ್ಪತ್ತಿಯನ್ನು ಪ್ರಚೋದಿಸಲು ಅತ್ಯಂತ ಸಹಜವಾದ, ನೈಸರ್ಗಿಕವಾದ ಹಾಗೂ ಯಾವುದೇ ಬಾಧಕಗಳಿಲ್ಲದ ಆಹಾರ ಸೇವನೆಯಿಂದಲೂ ಮಾಡಬಹುದು. ಯಾವೆಲ್ಲ ಆಹಾರಗಳಲ್ಲಿ ಕೊಲಾಜೆನ್‌ ಪ್ರಮಾಣ ಹೆಚ್ಚಿದೆ ಎಂಬುದನ್ನು ತಿಳಿದರೆ, ಅಂತಹ ಆಹಾರ ಸೇವನೆಯಿಂದಲೂ ಕೊಲಾಜೆನ್‌ ವೃದ್ಧಿ ಮಾಡಿಕೊಂಡು ಆರೋಗ್ಯಯುತ ಚರ್ಮವನ್ನು (Foods For Glowing Skin) ಪಡೆಯಬಹುದು.

ಬೋನ್‌ ಬ್ರೋತ್

ಪ್ರಾಣಿಗಳ ಎಲುಬಿನ ಬ್ರೋತ್‌ ಅಂದರೆ ನೀರು ತಯಾರಿಸಿ ಕುಡಿಯುವುದು ಕೂಡಾ ಅತ್ಯಂತ ಪ್ರಸಿದ್ಧಿ ಪಡೆದಿರುವ ಕೊಲಾಜೆನ್‌ ಪ್ರಚೋದನಕಾರಿ ಪೇಯ.

ಚಿಕನ್

ಚಿಕನ್‌ನಿಂದ ತಯಾರಿಸಲ್ಪಟ್ಟ ಕೊಲಾಜೆನ್‌ ಸಪ್ಲಿಮೆಂಟ್‌ಗಳೂ ಇಂದು ಮಾರುಕಟ್ಟೆಯಲ್ಲಿ ಲಭ್ಯವಿವೆ. ಹಾಗಾಗಿ ಚಿಕನ್‌ ಸೇವನೆಯಿಂದಲೂ ಕೊಲಾಜೆನ್‌ ಪಡೆಯಬಹುದು.

ಮೀನು

ಬೇರೆ ಪ್ರಾಣಿಗಳಂತೆ ಮೀನಿನಲ್ಲಿಯೂ ಕೊಲಾಜೆನ್‌ ಅಧಿಕವಾಗಿದೆ. ಮೀನಿನ ಮೂಳೆಯ ಲಿಗಮೆಂಟ್‌ಗಳಲ್ಲಿ ಕೊಲಾಜೆನ್‌ ಸಾಕಷ್ಟು ಪ್ರಮಾಣದಲ್ಲಿದ್ದು, ಸಮುದ್ರ ಜೀವಿಗಳ ಮೂಲಕ ಬಂದ ಕೊಲಾಜೆನ್‌ ಅನ್ನು ನಮ್ಮ ದೇಹ ಬಹುಬೇಗನೆ ಹೀರಿಕೊಳ್ಳುತ್ತದೆ ಕೂಡಾ.

ಮೊಟ್ಟೆ

ಮೊಟ್ಟೆಯ ಬಿಳಿ ಲೋಳೆಯಲ್ಲಿ ಪ್ರೊಲೈನ್‌ ಎಂಬ ಒಂದು ಬಗೆಯ ಅಮೈನೋ ಆಸಿಡ್‌ ಇದ್ದು ಇದು ಕೊಲಾಜೆನ್‌ ಉತ್ಪತ್ತಿಗೆ ಸಹಾಯ ಮಾಡುತ್ತದೆ.

ಸಿಟ್ರಸ್‌ ಹಣ್ಣುಗಳು

ವಿಟಮಿನ್‌ ಸಿ ಹೇರಳವಾಗಿರುವ ಹಣ್ಣುಗಳೆಲ್ಲವೂ ಕೂಡಾ ಕೊಲಾಜೆನ್‌ ಉತ್ಪತ್ತಿಯನ್ನು ಪ್ರಚೋದಿಸುತ್ತವೆ. ಕಿತ್ತಳೆ, ಮುಸಂಬಿ, ನಿಂಬೆ ಮತ್ತಿತರ ಹಣ್ಣುಗಳಲ್ಲಿ ವಿಟಮಿನ್‌ ಸಿ ಹೇರಳವಾಗಿದ್ದು, ನಿತ್ಯ ಜೀವನದಲ್ಲಿ ಈ ಹಣ್ಣುಗಳನ್ನು ನಿಯಮಿತವಾಗಿ ಬಳಸುವುದರಿಂದ ಉತ್ತಮ ಪರಿಣಾಮ ಕಾಣಬಹುದು.

ಬೆರ್ರಿಗಳು

ಸಿಟ್ರಸ್‌ ಹಣ್ಣುಗಳಂತೆಯೇ, ಬೆರ್ರಿ ಜಾತಿಗೆ ಸೇರಿದ ಹಣ್ಣುಗಳಲ್ಲೂ ವಿಟಮಿನ್‌ ಸಿ ಹೇರಳವಾಗಿದೆ. ಉದಾಹರಣೆಗೆ ರಸಬೆರ್ರಿ, ಸ್ಟ್ರಾಬೆರಿ, ಬ್ಲೂಬೆರ್ರಿ ಇತ್ಯಾದಿ.

ಇದನ್ನೂ ಓದಿ: Health Tips Kannada: ಕುಂಬಳಕಾಯಿ ಬೀಜದಲ್ಲಿದೆ ನಮ್ಮ ಆರೋಗ್ಯದ ಗುಟ್ಟು!

ಸೀಸನಲ್‌ ಹಣ್ಣುಗಳು

ಆಯಾ ಋತುಮಾನಗಳಲ್ಲಿ ಸಿಗುವ ಹಣ್ಣುಗಳನ್ನು ಕಾಲಕಾಲಕ್ಕೆ ತಿನ್ನಿ. ಮಾವಿನಹಣ್ಣು, ಪೇರಳೆ, ಕಿವಿ, ಅನನಾಸು ಇತ್ಯಾದಿಗಳ ಸೇವನೆ ಒಳ್ಳೆಯದು. ಪೇರಳೆಯಲ್ಲಿ ಝಿಂಕ್‌ ಇದ್ದು, ಇದೂ ಕೂಡಾ ಕೊಲಾಜೆನ್‌ ಉತ್ಪಾದನೆಗೆ ಪ್ರಚೋದಿಸುತ್ತದೆ.

ಬೆಳ್ಳುಳ್ಳಿ

ಬೆಳ್ಳುಳ್ಳಿಯಲ್ಲಿ ಸಲ್ಫರ್‌ ಹೇರಳವಾಗಿದ್ದು, ಇದು ಕೊಲಾಜೆನ್‌ ಕಡಿಮೆಯಾಗದಂತೆ ನೋಡಿಕೊಳ್ಳುತ್ತದೆ.

ತರಕಾರಿ

ವಿಟಮಿನ್‌ ಸಿ ಯುಕ್ತ ತರಕಾರಿಗಳಾದ, ಕ್ಯಾಪ್ಸಿಕಂ, ಟೊಮೇಟೋ ಇತ್ಯಾದಿಗಳೂ ಕೂಡಾ ಕೊಲಾಜೆನ್‌ ಉತ್ಪತ್ತಿಯನ್ನು ಪ್ರಚೋದಿಸುತ್ತದೆ.

ಗೋಡಂಬಿ

ಗೋಡಂಬಿಯಲ್ಲಿ ಝಿಂಕ್‌ ಹಾಗೂ ತಾಮ್ರವಿದ್ದು ಇದು ಕೊಲಾಜೆನ್‌ ಹೆಚ್ಚಳಕ್ಕೆ ಸಹಾಯ ಮಾಡುತ್ತದೆ. ಇವಿಷ್ಟೇ ಅಲ್ಲದೆ, ಸೊಪ್ಪು ತರಕಾರಿಗಳು, ಹಸಿರು ಬಣ್ಣದ ಸೊಪ್ಪುಗಳು ಹಾಗೂ ಕಾಳುಗಳು ಕೂಡಾ, ಈ ನಿಟ್ಟಿನಲ್ಲಿ ಸಹಾಯ ಮಾಡುತ್ತವೆ.

ಮುಖದ ಮೇಲಿನ ಮೊಡವೆಗಳು ಅನೇಕರನ್ನು ಸಮಸ್ಯೆಗಳಾಗಿ ಕಾಡಿದಂತೆ ಬೆನ್ನಿನ ಮೇಲಿನ ಮೊಡವೆಗಳೂ ಕೂಡಾ ಅಷ್ಟೇ ಗಾಢವಾಗಿ ಕಾಡುವುದುಂಟು. ಬೆನ್ನಿನ ಮೇಲಿನ ಮೊಡವೆಯೇ ಎಂದು ಆಶ್ಚರ್ಯ ಪಡಬೇಡಿ. ನಿಮ್ಮಲ್ಲಿ ಅನೇಕರಿಗೆ ಬೆನ್ನಿನ ಮೇಲೆ ಕೆಂಪನೆಯ ಗುಳ್ಳೆಗಳು ಸಹಜವಾಗಿಬಿಟ್ಟಿರುತ್ತದೆ. ಮುಖ್ಯವಾಗಿ ಮಹಿಳೆಯರನ್ನು ಮುಜುಗರಕ್ಕೆ ಈಡು ಮಾಡುವ ಬೆನ್ನಿನ ಮೊಡವೆಗಳು ಬಹಳ ಸಾರಿ ನಿರ್ಲಕ್ಷ್ಯಕ್ಕೊಳಗಾಗುವುದೇ ಹೆಚ್ಚು. ಮುಖದ ಮೊಡವೆಗಳಿಗೆ ಹಲವಾರು ಲೇಪನಗಳು, ಕ್ರೀಮುಗಳು, ಸೀರಂಗಳೆಂದು ದುಡ್ಡು ಸುರಿಯುವ ಎಲ್ಲರೂ ಬೆನ್ನಿನ ವಿಚಾರಕ್ಕೆ ಬಂದಾಗ ಅಷ್ಟು ತಲೆ ಕೆಡಿಸುವುದಿಲ್ಲ ನಿಜವಾದರೂ, ಬೆನ್ನು ಕಾಣುವಂಥ ದಿರಿಸು ಧರಿಸಿದಾಗ, ಸೀರೆ ಉಟ್ಟಾಗ ಇವು ಹಲವರನ್ನು ಬಾಧಿಸುತ್ತದೆ. ಆದರೆ ಇದರಿಂದ ಮುಕ್ತಿ ಹೇಗೆ ಎಂದು ತಿಳಿಯುವುದಿಲ್ಲ. ಮುಖದ ಚರ್ಮದ ಕಾಳಜಿಯಂತೆಯೇ ನೀವು ಬೆನ್ನಿನ ಚರ್ಮದ ಕಾಳಜಿಯನ್ನೂ ಸರಿಯಾಗಿ ಮಾಡಿದಲ್ಲಿ ಇದರಿಂದ ಮುಕ್ತಿ ಹೊಂದಬಹುದು. ಬನ್ನಿ, ಬೆನ್ನಿನ ಮೊಡವೆಯ ಸಮಸ್ಯೆಗೆ ಹೇಗೆ ಪರಿಹಾರ ಕಂಡುಕೊಳ್ಳಬಹುದು ಎಂಬುದನ್ನು (Back acne problem) ನೋಡೋಣ.

1. ವಾಕಿಂಗ್‌, ವ್ಯಾಯಾಮ, ಅಥವಾ ಯಾವುದೇ ಚಟುವಟಿಕೆ ಮಾಡಿ ಮನೆಗೆ ಬಂದ ತಕ್ಷಣ ಬೆವರಿದ್ದರೆ ಕೂಡಲೇ ಸ್ನಾನ ಮಾಡಿ. ಬೆವರನ್ನು ಹಾಗೆಯೇ ಒಣಗಲು ಬಿಡುವುದು, ಬೆವರಿದ್ದಾಗಲೇ ಹಾಗೆಯೇ ಮಲಗುವುದು, ಸುಸ್ತು, ಉದಾಸೀನತೆಯಿಂದ ಹಾಗೆಯೇ ಒಂದೆಡೆ ಕೂತಿರುವುದು ಇತ್ಯಾದಿ ಮಾಡಬೇಡಿ. ಕೂಡಲೇ ಸ್ನಾನ ಮಾಡಿ. ಹೆಚ್ಚು ರಾಸಾಯನಿಕಯುಕ್ತ ಸೋಪಿನಿಂದ ತೊಳೆಯದೆ, ಮಂದವಾದ ಯಾವುದಾದರೂ ಸೋಪಿನಿಂದ ಬೆನ್ನು ಸ್ವಚ್ಛಗೊಳಿಸಿ.
2. ಚರ್ಮದಲ್ಲಿ ಅಲ್ಲಲ್ಲಿ ಸತ್ತ ಪದರಗಳನ್ನು ಸ್ವಚ್ಛಗೊಳಿಸುತ್ತಿರಿ. ಮುಖಕ್ಕೆ ಹೇಗೆ ನೀವು ಎಕ್ಸ್‌ಫಾಲಿಯೇಟ್‌ ಮಾಡುತ್ತೀರೋ ಅದೇ ರೀತಿಯಲ್ಲಿ ಬೆನ್ನಿನ ಚರ್ಮಕ್ಕೂ ಮಾಡಿ. ಆಗ ಸತ್ತ ಚರ್ಮದ ಪೊರೆಗಳು ಕಳಚಿ ಅದು ಸ್ವಚ್ಛವಾಗುತ್ತದೆ. ಇದು ಚರ್ಮದ ರಂಧ್ರಗಳನ್ನು ಮುಚ್ಚುವುದಿಲ್ಲ. ಸ್ಯಾಲಿಸಿಲಿಕ್‌ ಆಸಿಡ್‌ ಅಥವಾ ಗ್ಲೈಕಾಲಿಕ್‌ ಆಸಿಡ್‌ ಇರುವ ಎಕ್ಸ್‌ಫಾಲಿಯೇಟರ್‌ ಅಥವಾ ಸ್ಕ್ರಬ್‌ನಿಂದ ಚರ್ಮವನ್ನು ಮೆದುವಾಗಿ ಉಜ್ಜಿ ತೊಳೆಯಿರಿ. ವಾರಕ್ಕೆ ಎರಡು ಬಾರಿಯಾದರೂ ಹೀಗೆ ಮಾಡಿ.
3. ಯಾವಾಗಲೂ ಬಿಗಿಯಾದ ಬಟ್ಟೆಗಳನ್ನು ಧರಿಸಬೇಡಿ. ಗಾಳಿಯಾಡಬಲ್ಲ ಹಾಗೂ ನೈಸರ್ಗಿಕ ಮೂಲಗಳಿಂದ ತಯಾರಿಸಿದ ಹತ್ತಿಯಂಥ ಬಟ್ಟೆಗಳನ್ನು ಧರಿಸಿ.
4. ಬೆನ್ನಿನ ಮೇಲೆ ಮೊಡವೆಗಳಾದಾಗ ಅದನ್ನು ಉಗುರಿನಿಂದ ಚಿವುಟುವುದು ಇತ್ಯಾದಿ ಮಾಡಬೇಡಿ. ಮೊಡವೆಗಳಿಗೆ ಹಚ್ಚುವ ಮುಲಾಮನ್ನು ಅಗತ್ಯವಿದ್ದರೆ ಹಚ್ಚಿ.
5. ಯಾವಾಗಲೂ ಸ್ವಚ್ಛವಾಗಿರಿ. ಆರೋಗ್ಯಕರ ಜೀವನಶೈಲಿ ರೂಢಿಸಿಕೊಳ್ಳಿ. ವ್ಯಾಯಾಮ ಮಾಡಿ. ಕ್ರಿಯಾಶೀಲರಾಗಿರಿ. ನಿಮ್ಮನ್ನು ನೀವು ಸ್ವಚ್ಛವಾಗಿಟ್ಟುಕೊಳ್ಳಿ.
6. ಆಗಾಗ ನೀವು ಬಳಸುವ ಬೆಡ್‌ಶೀಟ್‌, ತಲೆದಿಂಬಿನ ಕವರ್‌ ಇತ್ಯಾದಿಗಳನ್ನು ಬದಲಾಯಿಸಿ ಸ್ವಚ್ಛವಾಗಿಟ್ಟುಕೊಳ್ಳಿ.
7. ಹೆಚ್ಚು ನೀರು ಕುಡಿಯಿರಿ. ನೀರು ಕುಡಿಯುವುದು ಮೊಡವೆಯುಕ್ತ ಚರ್ಮ ಹೊಂದಿರುವ ಮಂದಿಗೆ ಅತ್ಯಂತ ಅಗತ್ಯ. ದಿನಕ್ಕೆ ಕನಿಷ್ಟವೆಂದರೆ ಎಂಟು ಲೋಟಗಳಷ್ಟಾದರೂ ನೀರು ಕುಡಿಯಿರಿ. ಸಕ್ಕರೆ ಹಾಗೂ ಕೆಫೀನ್‌ಗಳಿಂದ ದೂರವಿರಿ.
8. ಯಾವಾಗಲೂ ಉತ್ತಮ ಆಹಾರ ಅಭ್ಯಾಸಗಳನ್ನು ರೂಢಿಸಿಕೊಳ್ಳಿ. ಹಸಿರು ತರಕಾರಿ, ಹಣ್ಣುಗಳು, ಧಾನ್ಯ, ಬೇಳೆ ಕಾಳುಗಳ ಉತ್ತಮ ಪೋಷಕಾಂಶಯುಕ್ತ ಆಹಾರವನ್ನು ಸೇವಿಸಿ. ಎಣ್ಣೆಯುಕ್ತ ಆಹಾರಗಳಿಂದ ಆದಷ್ಟೂ ದೂರವಿರಿ.

ಇದನ್ನೂ ಓದಿ: Smoking Effects: ಮಹಿಳೆಯರೇ, ಧೂಮಪಾನದಿಂದ ನಿಮ್ಮ ಆರೋಗ್ಯದ ಮೇಲಾಗುವ ಪರಿಣಾಮದ ಅರಿವಿದೆಯೇ?

ಇತ್ತೀಚಿನ ವರ್ಷಗಳಲ್ಲಿ ಹನಿಮೂನ್‌ನಂತೆ (Honeymoon) ಬೇಬಿಮೂನ್ (Baby Moon) ಕೂಡ ಹೆಚ್ಚು ಪ್ರಚಲಿತದಲ್ಲಿದೆ. ಹೊಸದಾಗಿ ಮದುವೆಯಾದ ದಂಪತಿ ಹನಿಮೂನ್‌ಗೆ ತೆರಳಿದರೆ ಮಗುವಿನ ನಿರೀಕ್ಷೆಯಲ್ಲಿರುವ ಪೋಷಕರು (parents) ಬೇಬಿಮೂನ್‌ಗೆ ತೆರಳುತ್ತಾರೆ. ಗರ್ಭಧಾರಣೆಯ (pregnancy) ಬಳಿಕ ಅಲ್ಲಿ ಇಲ್ಲಿ ಸುತ್ತಾಡುವುದಕ್ಕೆ ನಿರ್ಬಂಧವಿದ್ದರೂ ಸುರಕ್ಷಿತ ಪ್ರಯಾಣದ ಸದುಪಯೋಗ ಪಡೆದುಕೊಂಡು ಹೆಚ್ಚಿನವರು ಬೇಬಿ ಮೂನ್‌ಗಾಗಿ ತೆರಳುತ್ತಿದ್ದಾರೆ.

ಬೇಬಿಮೂನ್ ಎಂದರೇನು?

ಮಗುವಿನ ನಿರೀಕ್ಷೆಯಲ್ಲಿರುವ ಪೋಷಕರು ಸಂಭ್ರಮ ಮತ್ತು ವಿಶ್ರಾಂತಿಗಾಗಿ ಪ್ರವಾಸ ಹೋಗುವುದನ್ನು ಬೇಬಿ ಮೂನ್ ಎಂದು ಕರೆಯಲಾಗುತ್ತದೆ. ಇದು ಇತ್ತೀಚಿನ ಟ್ರೆಂಡ್. ಮಗು ಹುಟ್ಟುವ ಮೊದಲು ಪ್ರವಾಸದ ಕಲ್ಪನೆಯು ವಿವಿಧ ಸಂಸ್ಕೃತಿಗಳಲ್ಲಿ ಬಹಳ ಹಿಂದಿನಿಂದಲೇ ಆಚರಣೆ ಮಾಡಲಾಗುತ್ತದೆ. ಈಗ ಇದನ್ನು ಪ್ರಪಂಚದಾದ್ಯಂತ ಪಾಲಿಸಲಾಗುತ್ತಿದೆ. ಬೇಬಿ ಮೂನ್ ಗಾಗಿ ಕೆಲವು ರೆಸಾರ್ಟ್‌ಗಳು ವಿಶೇಷ ಪ್ಯಾಕೇಜ್‌ಗಳನ್ನು ನೀಡುತ್ತಿದೆ. ಸ್ವಯಂ-ಆರೈಕೆಗೆ ಹೆಚ್ಚು ಒತ್ತು ನೀಡುವುದು ಇದರ ಆದ್ಯತೆಯಾಗಿದೆ. ಪೋಷಕರಿಗೆ ತಮ್ಮ ಸಂಬಂಧಗಳನ್ನು ಬಲಪಡಿಸಲು ಇದು ಅಮೂಲ್ಯ ಕ್ಷಣಗಳನ್ನು ಒದಗಿಸುತ್ತದೆ.

ಬೇಬಿ ಮೂನ್ ಪ್ರಾಮುಖ್ಯತೆ ಏನು?

ಗರ್ಭಾವಸ್ಥೆಯ ದೈಹಿಕ ಮತ್ತು ಭಾವನಾತ್ಮಕ ಸವಾಲುಗಳ ನಡುವೆ ವಿಶ್ರಾಂತಿ ಮತ್ತು ಪುನರ್ಯೌವನಗೊಳಿಸುವಿಕೆಗೆ ನಿರ್ಣಾಯಕ ಅವಕಾಶವನ್ನು ಒದಗಿಸುವ ಮೂಲಕ ಬೇಬಿಮೂನ್ ಮಗುವಿನ ನಿರೀಕ್ಷೆಯಲ್ಲಿರುವ ನಿರೀಕ್ಷಿತ ದಂಪತಿಗೆ ಅಪಾರ ಪ್ರಾಮುಖ್ಯತೆಯನ್ನು ಹೊಂದಿದೆ. ಪೋಷಕರಾಗಲು ಸಿದ್ಧತೆ ಮಾಡಿಕೊಳ್ಳಲು ಇದು ಅವಕಾಶ ನೀಡುತ್ತದೆ. ಮಗುವಿನ ಜನನ ಯೋಜನೆಗಳು ಮತ್ತು ಶಿಶುಪಾಲನಾ ವ್ಯವಸ್ಥೆಗಳ ಕುರಿತು ಚರ್ಚೆ, ಸನ್ನದ್ಧತೆ ಮತ್ತು ಏಕತೆಯ ಪ್ರಜ್ಞೆಯನ್ನು ಇದು ಬೆಳೆಸುತ್ತವೆ. ಅಲ್ಲದೇ ಇದು ತಮ್ಮ ಜೀವನದ ಮುಂದಿನ ಅಧ್ಯಾಯವನ್ನು ಪ್ರಾರಂಭಿಸುವ ಮೊದಲು ಅವರ ಬಂಧವನ್ನು ಬಲಪಡಿಸಲು ಮತ್ತು ಅವರ ಹುಟ್ಟಲಿರುವ ಮಗುವಿನೊಂದಿಗೆ ಪ್ರೀತಿ ಮತ್ತು ಸಂಪರ್ಕದ ಅಡಿಪಾಯವನ್ನು ಹಾಕಲು, ಪಾಲಿಸಬೇಕಾದ ಕರ್ತವ್ಯಗಳ ಬಗ್ಗೆ ತಮ್ಮ ಸಂಗಾತಿಯೊಂದಿಗೆ ಮುಕ್ತವಾಗಿ ಚರ್ಚಿಸಲು ಅಮೂಲ್ಯವಾದ ಅವಕಾಶವನ್ನು ನೀಡುತ್ತದೆ.

ಮಾನಸಿಕ ಪ್ರಯೋಜನಗಳು

ಬೇಬಿಮೂನ್ ಮಗುವಿನ ನಿರೀಕ್ಷೆಯಲ್ಲಿರುವ ಪೋಷಕರಿಗೆ ಮಾನಸಿಕ ಪ್ರಯೋಜನಗಳನ್ನು ನೀಡುತ್ತದೆ. ಒತ್ತಡದಿಂದ ವಿರಾಮವನ್ನು ಒದಗಿಸುತ್ತದೆ. ದಂಪತಿ ತಮ್ಮ ಮಗುವಿನ ಮೇಲೆ ಹೆಚ್ಚಿನ ಗಮನ ಕೇಂದ್ರೀಕರಿಸಲು ಅನುವು ಮಾಡಿಕೊಡುತ್ತದೆ. ತಾಯಿಯ ಯೋಗಕ್ಷೇಮವನ್ನು ಉತ್ತೇಜಿಸುತ್ತದೆ ಮತ್ತು ಮಗುವಿಗೆ ಶಾಂತ ವಾತಾವರಣವನ್ನು ನೀಡುತ್ತದೆ. ಆತಂಕಗಳನ್ನು ಪರಿಹರಿಸಲು ಮತ್ತು ಭಾವನೆಗಳನ್ನು ಹಂಚಿಕೊಳ್ಳಲು ಪೋಷಕರಿಗೆ ಭರವಸೆ ಮತ್ತು ವಿಶ್ವಾಸವನ್ನು ತುಂಬಲು ಇದು ಸಹಕರಿಸುತ್ತದೆ. ಬೇಬಿ ಮೂನ್ ಸಮಯದಲ್ಲಿ ಪೇರೆಂಟ್ ಹುಡ್ ಅನ್ನು ನಿರೀಕ್ಷಿಸುವುದು ದಂಪತಿಯ ಉತ್ಸಾಹವನ್ನು ಸಕಾರಾತ್ಮಕ ಅನುಭವಗಳಾಗಿ ಪರಿವರ್ತಿಸಲು ಅನುವು ಮಾಡಿಕೊಡುತ್ತದೆ. ಇದರಿಂದ ತಾಯಿಯ ಸಂಪೂರ್ಣ ಯೋಗಕ್ಷೇಮವನ್ನು ಹೆಚ್ಚಿಸುತ್ತದೆ. ಒತ್ತಡವನ್ನು ಕಡಿಮೆ ಮಾಡುತ್ತದೆ ಮತ್ತು ನಿರೀಕ್ಷೆಯನ್ನು ಉತ್ತೇಜಿಸುತ್ತದೆ.

ಸಂಬಂಧಗಳನ್ನು ಬಲಪಡಿಸುವುದು

ಬೇಬಿಮೂನ್ ಸಮಯದಲ್ಲಿ ಕುಟುಂಬದ ಬಂಧ ಬಲವಾಗುತ್ತದೆ. ನಿರೀಕ್ಷಿತ ಪೋಷಕರಿಗೆ ಸಹಾಯ, ಮಾರ್ಗದರ್ಶನ ಮತ್ತು ಭಾವನಾತ್ಮಕ ಬೆಂಬಲವನ್ನು ನೀಡಲು ಇದು ಸಹಾಯ ಮಾಡುತ್ತದೆ. ಈ ವಿಶೇಷ ಸಂದರ್ಭದಲ್ಲಿ ಒಟ್ಟಿಗೆ ಸಮಯ ಕಳೆಯುವುದು, ಮುಕ್ತ ಸಂವಹನ ಮತ್ತು ಕುಟುಂಬಕ್ಕೆ ಮುಂಬರುವ ಮಗುವಿನ ಸೇರ್ಪಡೆಗಾಗಿ ಉತ್ಸಾಹ ಮತ್ತು ನಿರೀಕ್ಷೆಯನ್ನು ಹೆಚ್ಚಿಸಲು ಅನುವು ಮಾಡಿಕೊಡುತ್ತದೆ. ಮಗುವಿನ ನಿರೀಕ್ಷೆಯಲ್ಲಿರುವ ದಂಪತಿಗೆ ತಮ್ಮ ಬೆಂಬಲ ಮತ್ತು ಬದ್ಧತೆಯನ್ನು ಪುನರುಚ್ಚರಿಸುವ ಸಮಯವಾಗಿ ಇದು ಕಾರ್ಯನಿರ್ವಹಿಸುತ್ತದೆ. ದಂಪತಿಯ ಸಂಬಂಧವನ್ನು ಬಲಪಡಿಸುತ್ತದೆ.

ಬೇಬಿ ಮೂನ್ ಯೋಜನೆ

ಬೇಬಿಮೂನ್ ಅನ್ನು ಯೋಜಿಸಲು ಪ್ರಯಾಣವನ್ನು ಪ್ರಾರಂಭಿಸುವಾಗ ಪ್ರತಿ ತಿರುವಿನಲ್ಲಿ ವಿಶ್ರಾಂತಿ ಮತ್ತು ಸೌಕರ್ಯಗಳಿಗೆ ಆದ್ಯತೆ ನೀಡುವುದು ಅತ್ಯಗತ್ಯ. ನಿರೀಕ್ಷಿತ ಪೋಷಕರ ಅಗತ್ಯತೆಗಳನ್ನು ಪೂರೈಸುವ ಗಮ್ಯಸ್ಥಾನ ಮತ್ತು ವಸತಿಗಳನ್ನು ಆಯ್ಕೆ ಮಾಡುವುದರೊಂದಿಗೆ ಇದು ಪ್ರಾರಂಭವಾಗುತ್ತದೆ. ವಿಶ್ರಾಂತಿಗೆ ಅನುಕೂಲಕರವಾದ ಪ್ರಶಾಂತ ಪರಿಸರವನ್ನು ಒದಗಿಸುವ ಸ್ಥಳಗಳನ್ನು ಆರಿಸಿಕೊಳ್ಳಿ. ಅದು ಶಾಂತವಾದ ಬೀಚ್‌ಸೈಡ್ ರಿಟ್ರೀಟ್, ಸ್ನೇಹಶೀಲ ಪರ್ವತ ಕ್ಯಾಬಿನ್ ಅಥವಾ ಐಷಾರಾಮಿ ಸ್ಪಾ ರೆಸಾರ್ಟ್ ಹೀಗೆ.. ಯಾವುದಾದರೊಂದನ್ನು ಆಯ್ಕೆ ಮಾಡಬಹುದು. ಪ್ರಯಾಣದ ಅಪಾಯ ಮತ್ತು ಗರ್ಭಧಾರಣೆಯ ಹಂತವನ್ನು ಆಧರಿಸಿ ಮುನ್ನೆಚ್ಚರಿಕೆಗಳ ಬಗ್ಗೆ ಆರೋಗ್ಯ ವೃತ್ತಿಪರರನ್ನು ಸಂಪರ್ಕಿಸಿ. ದೂರದ ಪ್ರಯಾಣ ಮಾಡಲು ಸಾಧ್ಯವಾಗದವರಿಗೆ ಅಥವಾ ಮನೆಯ ಹತ್ತಿರ ಇರಲು ಇಷ್ಟಪಡುವವರಿಗೆ ಸ್ಮರಣೀಯ ಬೇಬಿಮೂನ್ ಅನುಭವವನ್ನು ರಚಿಸಲು ಇನ್ನೂ ಸಾಕಷ್ಟು ಆಯ್ಕೆಗಳಿವೆ. ಬಜೆಟ್ ಸ್ನೇಹಿ ಸ್ಥಳೀಯ ವಿಹಾರಗಳನ್ನು ಅನ್ವೇಷಿಸಿ.

ಬೇಬಿಮೂನ್‌ಗೆ ನವೀನ ಯೋಜನೆ

ಬೇಬಿಮೂನ್ ಪ್ರಯಾಣದಲ್ಲಿನ ಅನುಭವ ಹೆಚ್ಚಿಸಲು ಕೆಲವು ಟ್ರಾವೆಲ್ ಕಂಪೆನಿಗಳು ಈಗ ನವೀನ ಸೇವೆಗಳು ಮತ್ತು ಪ್ಯಾಕೇಜ್‌ಗಳನ್ನು ನಿರೀಕ್ಷಿತ ಪೋಷಕರ ಅಗತ್ಯಗಳಿಗೆ ಅನುಗುಣವಾಗಿ ನೀಡುತ್ತವೆ. ವಿಶೇಷ ಸೌಕರ್ಯ, ಪ್ರಸವಪೂರ್ವ ಆರೈಕೆ ಆಯ್ಕೆ ಮತ್ತು ವಿಶ್ರಾಂತಿ-ಕೇಂದ್ರಿತ ಚಟುವಟಿಕೆಗಳನ್ನು ಒದಗಿಸುತ್ತವೆ.

ಇದನ್ನೂ ಓದಿ: Solo Trip: ಒಂಟಿಯಾಗಿ ಪ್ರವಾಸ ಹೊರಡುವ ಯೋಚನೆಯೇ? ಹಾಗಿದ್ದರೆ ಇಲ್ಲಿಗೊಮ್ಮೆ ಭೇಟಿ ನೀಡಿ!

ಸ್ವಯಂ ಕಾಳಜಿ ಆದ್ಯತೆಯಾಗಿರಲಿ

ನಿರೀಕ್ಷಿತ ತಾಯಂದಿರ ಯೋಗಕ್ಷೇಮವನ್ನು ಉತ್ತೇಜಿಸಲು ಬೇಬಿ ಮೂನ್ ಅನುಭವದಲ್ಲಿ ಸ್ವಯಂ-ಆರೈಕೆಯನ್ನು ಸೇರಿಸುವುದು ನಿರ್ಣಾಯಕವಾಗಿದೆ. ಗರ್ಭಾವಸ್ಥೆಯು ದೈಹಿಕ ಅಸ್ವಸ್ಥತೆ, ಹಾರ್ಮೋನುಗಳ ಬದಲಾವಣೆಗಳು ಮತ್ತು ಹೆಚ್ಚಿನ ಒತ್ತಡದ ಮಟ್ಟವನ್ನು ಉಂಟು ಮಾಡಬಹುದು. ಈ ವಿಶೇಷ ಸಮಯದಲ್ಲಿ ತಾಯಿ ಮತ್ತು ಮಗುವಿನ ಯೋಗಕ್ಷೇಮಕ್ಕೆ ಆದ್ಯತೆ ನೀಡುವುದು ಅತ್ಯಗತ್ಯ. ಪ್ರಸವಪೂರ್ವ ಮಸಾಜ್‌ಗಳು ಮತ್ತು ಧ್ಯಾನದಂತಹ ವಿಶ್ರಾಂತಿ ತಂತ್ರಗಳಿಗೆ ಆದ್ಯತೆ ನೀಡುವುದರಿಂದ ಒತ್ತಡವನ್ನು ನಿವಾರಿಸಬಹುದು ಮತ್ತು ಗರ್ಭಾವಸ್ಥೆಯಲ್ಲಿ ಒಟ್ಟಾರೆ ಆರೋಗ್ಯವನ್ನು ಉತ್ತಮಗೊಳಿಸುತ್ತದೆ. ಪ್ರಸವಪೂರ್ವ ಮಸಾಜ್‌ಗಳು ಗರ್ಭಿಣಿಯರಿಗೆ ಹಲವಾರು ಪ್ರಯೋಜನಗಳನ್ನು ನೀಡುತ್ತವೆ. ಅವರು ಸ್ನಾಯುವಿನ ಒತ್ತಡವನ್ನು ನಿವಾರಿಸಲು, ಕಾಲು ಮತ್ತು ಪಾದಗಳಲ್ಲಿ ಊತವನ್ನು ಕಡಿಮೆ ಮಾಡಲು, ಬೆನ್ನುನೋವು ಮತ್ತು ಕೀಲು ನೋವನ್ನು ನಿವಾರಿಸಲು ಮತ್ತು ರಕ್ತಪರಿಚಲನೆಯನ್ನು ಸುಧಾರಿಸಲು ಇದು ಸಹಾಯ ಮಾಡಬಹುದು. ಗರ್ಭಾವಸ್ಥೆಯಲ್ಲಿ ಮತ್ತು ಬೇಬಿಮೂನ್ ಸಮಯದಲ್ಲಿ ಸ್ವಯಂ-ಆರೈಕೆಯನ್ನು ಉತ್ತೇಜಿಸಲು ಧ್ಯಾನವು ಮತ್ತೊಂದು ಪ್ರಬಲ ಸಾಧನವಾಗಿದೆ. ಇದು ನಿರೀಕ್ಷಿತ ತಾಯಂದಿರಿಗೆ ತಮ್ಮ ಮನಸ್ಸನ್ನು ಶಾಂತಗೊಳಿಸಲು, ಆತಂಕವನ್ನು ಕಡಿಮೆ ಮಾಡಲು ಮತ್ತು ಆಂತರಿಕ ಶಾಂತಿಯ ಭಾವವನ್ನು ಬೆಳೆಸಲು ಅನುವು ಮಾಡಿಕೊಡುತ್ತದೆ.

ಧೂಮಪಾನ, ಮದ್ಯಪಾನಗಳೆಂಬ ಚಟವು ಆರೋಗ್ಯಕ್ಕೆ ಹಾನಿಕರ ಎಂಬ ಸತ್ಯ ಎಲ್ಲರಿಗೂ ತಿಳಿದಿದೆ. ಆದರೂ, ಚಟದಿಂದ ಹೊರಕ್ಕೆ ಬರುವುದು ಸಾಧ್ಯವಾಗುವುದು ಕೆಲವರಿಗೆ ಮಾತ್ರ. ಹೊರಕ್ಕೆ ಬರಬೇಕು ಅಂದುಕೊಳ್ಳುವಷ್ಟರಲ್ಲಿ, ಆರೋಗ್ಯವು ಸರಿಪಡಿಸಲಾಗದ ಹಂತಕ್ಕೆ ತಲುಪಿರುತ್ತದೆ. ಪುರುಷರು ಮಹಿಳೆಯರೆಂಬ ಬೇಧವಿಲ್ಲದೆ ಇತ್ತೀಚೆಗಿನ ದಿನಗಳಲ್ಲಿ ಧೂಮಪಾನದ ಚಟಕ್ಕೆ ದಾಸರಾಗುತ್ತಿದ್ದಾರೆ. ಪುರುಷರ ಆರೋಗ್ಯವನ್ನು ಕಾಡುವಂತೆಯೇ ಸಹಜವಾಗಿಯೇ ಮಹಿಳೆಯರ ಆರೋಗ್ಯಕ್ಕೂ ಇದು ಮಾರಕ. ಆದರೆ ಮಹಿಳೆಯ ವಿಚಾರಕ್ಕೆ ಬಂದರೆ, ಈ ಚಟದ ಪರಿಣಾಮ ಮಹಿಳೆಯರನ್ನು ಸ್ವಲ್ಪ ಹೆಚ್ಚೇ ಕಾಡುತ್ತದೆ. ಕಾರಣ ಮಹಿಳೆಯರ ಹಾರ್ಮೋನು, ಆಕೆಗೆ ಪ್ರಕೃತಿದತ್ತವಾಗಿ ಬಂದಿರುವ ತಾಯಿಯಾಗುವ ಹೊಣೆ ಇತ್ಯಾದಿ. ಬನ್ನಿ, ಮಹಿಳೆಯರು ಧೂಮಪಾನಿಗಳಾದರೆ, ಯಾವೆಲ್ಲ ಆರೋಗ್ಯ ಸಮಸ್ಯೆಗಳು ಆಕೆಯನ್ನು ಕಾಡುವ ಅಪಾಯ ಹೆಚ್ಚು ಎಂಬುದನ್ನು (smoking effects) ವಿವರವಾಗಿ ನೋಡೋಣ.

ಕ್ಯಾನ್ಸರ್‌

ಧೂಮಪಾನದಿಂದ ಕಾರ್ಸಿನೋಜೆನ್‌ಗಳು ಡಿಎನ್‌ಎ ಮಟ್ಟದಲ್ಲಿ ದೇಹಕ್ಕೆ ಹಾನಿ ಮಾಡುವುದಲ್ಲದೆ, ಕ್ಯಾನ್ಸರ್‌ನ ಜೀವಕೋಶಗಳು ಬೆಳೆಯುವುದನ್ನು ಪ್ರೋತ್ಸಾಹಿಸುತ್ತದೆ. ಮುಖ್ಯವಾಗಿ, ಶ್ವಾಸಕೋಶಗಳು, ಸ್ತನ, ಕಿಡ್ನಿ ಹಾಗೂ ಗರ್ಭಕಂಠದ ಕ್ಯಾನ್ಸರ್‌ ಧೂಮಪಾನದಿಂದಲೂ ಬರುವ ಸಾಧ್ಯತೆಗಳು ಹೆಚ್ಚು. ಧೂಮಪಾನವನ್ನು ತ್ಯಜಿಸುವುದರಿಂದ ಕ್ಯಾನ್ಸರ್‌ನ ಭಯದಿಂದ ಖಂಡಿತವಾಗಿಯೂ ದೂರವಿರಬಹುದು. ಆಗಾಗ ಪರೀಕ್ಷೆ, ವ್ಯಾಯಾಮ, ಸರಿಯಾದ ಆಹಾರ ಹಾಗೂ ಆರೋಗ್ಯಕರ ಜೀವನಶೈಲಿಯಿಂದ ಆರೋಗ್ಯ ಸಾಧ್ಯ.

ಹೃದಯದ ಕಾಯಿಲೆ

ಸಿಗರೇಟಿನಲ್ಲಿರುವ ನಿಕೋಟಿನ್‌ ಹಾಗೂ ಇತರ ರಾಸಾಯಿಕಗಳಿಂದ ರಕ್ತನಾಳಗಳು ಸಂಕುಚಿತವಾಗುವುದಲ್ಲದೆ, ಅಧಿಕ ರಕ್ತದೊತ್ತಡದಂಥ ಸಮಸ್ಯೆಗಳೂ ಆಗಬಹುದು. ಇದರಿಂದ ಹೃದಯಾಘಾತ, ಪಾರ್ಶ್ವವಾಯು ಮತ್ತಿತರ ಸಮಸ್ಯೆಗಳು ಬರುವ ಅಪಾಯ ಹೆಚ್ಚು.

ಉಸಿರಾಟದ ಕಾಯಿಲೆಗಳು

ಧೂಮಪಾನದಿಂದ ಶ್ವಾಸಕೋಶದ ಕಾಯಿಲೆಗಳು ಬರುವ ಸಂಭವ ಅತ್ಯಂತ ಹೆಚ್ಚು. ಕ್ರೋನಿಕ್‌ ಅಬ್‌ಸ್ಟ್ರಕ್ಟಿವ್‌ ಪಲ್ಮನರಿ ಡಿಸೀಸ್‌ ಎಂಬ ಅಪಾಯಕಾರಿ ಶ್ವಾಸಕೋಶದ ಕಾಯಿಲೆ, ಶ್ವಾಸಕೋಶದ ಕ್ಯಾನ್ಸರ್‌ ಬರಬಹುದು. ಸಿಗರೇಟು ಬಿಟ್ಟು, ಉತ್ತಮ ಆಹಾರ ಶೈಲಿ ಹಾಗೂ ಆರೋಗ್ಯಕರ ಜೀವನಶೈಲಿಯಿಂದ ಈ ಅಪಾಯವನ್ನು ತಪ್ಪಿಸಬಹುದು.

ಸಂತಾನೋತ್ಪತ್ತಿಯ ಸಮಸ್ಯೆ

ಧೂಮಪಾನದ ಅಭ್ಯಾಸವು ನೇರವಾಗಿ ನಿಮ್ಮ ಹಾರ್ಮೋನುಗಳ ಮೇಲೆ ಪರಿಣಾಮ ಬೀರುವುದರಿಂದ ಸಂತಾನೋತ್ಪತ್ತಿಯ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಬಹುಬೇಗನೆ ಮೆನೋಪಾಸ್‌ ಆಗುವುದು, ಮಕ್ಕಳನ್ನು ಮಾಡಿಕೊಳ್ಳಲು ತೊಂದರೆಯಾಗುವುದು, ಗರ್ಭದಲ್ಲಿರುವ ಮಗುವಿಗೆ ಸಮಸ್ಯೆಗಳಾಗುವುದು ಇತ್ಯಾದಿ ಸಮಸ್ಯೆಗಳು ಮಹಿಳೆಯರನ್ನು ತೀವ್ರವಾಗಿ ಕಾಡಬಹುದು.

ಸಂಧಿವಾತ

ಧೂಮಪಾನವು ನಮ್ಮ ದೇಹದಲ್ಲಿ ಕ್ಯಾಲ್ಶಿಯಂ ಹೀರಿಕೆಗೆ ಅಡ್ಡಿ ಉಂಟು ಮಾಡುತ್ತದೆ. ಇದು ಎಲುಬಿನ ಸಾಂದ್ರತೆಯ ಮೇಲೆ ಪರಿಣಾಮ ಬೀರುವುದರಿಂದ ಕ್ಯಾಲ್ಶಿಯಂ ಕೊರತೆಯಿಂದಾಗಿ ಸಂಧಿವಾತ, ಮೂಳೆ ಸವೆತದಂತಹ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.

ಬಹುಬೇಗನೆ ಮುಪ್ಪಿನ ಲಕ್ಷಣಗಳು

ಧೂಮಪಾನ ಮಾಡುವುದರಿಂದ ಚರ್ಮದಲ್ಲಿ ರಕ್ತಪರಿಚಲನೆಗೆ ಅಡ್ಡಿಯುಂಟಾಗುತ್ತದೆ. ಇದರಿಂದ ಚರ್ಮ ಸುಕ್ಕಾಗುವುದು, ನಿರಿಗೆಗಳು ಉಂಟಾಗಿ ಬಹುಬೇಗನೆ ನಿಜವಾದ ವಯಸ್ಸಿಗಿಂತ ಹೆಚ್ಚು ವಯಸ್ಸಾದಂತೆ ಕಾಣಿಸಬಹುದು. ಮಹಿಳೆಯರ ಸೌಂದರ್ಯದ ಮೇಲೆ ಇದು ಬೀರುವ ಪರಿಣಾಮ ಹೆಚ್ಚು.

ರೋಗನಿರೋಧಕ ಶಕ್ತಿಯ ಕೊರತೆ

ಧೂಮಪಾನದಿಂದ ರೋಗನಿರೋಧಕತೆಯ ಮೇಲೆ ಪರಿಣಾಮ ಬೀರಬಹುದು. ರೋಗ ನಿರೋಧಕ ಶಕ್ತಿ ಕುಂಠಿತವಾಗಿ ಸುಲಭವಾಗಿ ರೋಗಗಳಿಗೆ ತುತ್ತಾಗಬಹುದು. ಸರಿಯಾದ ನಿದ್ದೆ, ಆರೋಗ್ಯಕರ ಆಹಾರ ಮತ್ತು ಜೀವನಶೈಲಿಯ ಜೊತೆಗೆ ಧೂಮಪಾನವನ್ನು ತ್ಯಜಿಸಿದರೆ, ಮತ್ತೆ ಮೊದಲಿನಂತಾಗಬಹುದು.

ಗರ್ಭಧಾರಣೆ ಸಮಸ್ಯೆಗಳು

ಮಹಿಳೆಯರಲ್ಲಿ ಮುಖ್ಯವಾಗಿ ಕಾಣುವ ಸಮಸ್ಯೆ ಎಂದರೆ ಅದು ಗರ್ಭಧಾರಣೆಗೆ ಸಂಬಂಧಿಸಿದ್ದು. ಧೂಮಪಾನದ ಚಟವಿರುವ ಮಹಿಳೆಯರಲ್ಲಿ, ಗರ್ಭಸ್ರಾವ, ಗರ್ಭಪಾತ, ಮಗುವಿನ ಬೆಳವಣಿಗೆಯಲ್ಲಿ ಕುಂಠಿತ ಮತ್ತಿತರ ಸಮಸ್ಯೆಗಳು ಕಾಡಬಹುದು.

ಋತುಚಕ್ರದ ಸಮಸ್ಯೆಗಳು

ಧೂಮಪಾನದಿಂದಾಗಿ ಹಾರ್ಮೋನಿನ ಸಮಸ್ಯೆಗಳು ಸಹಜವಾಗಿರುವ ಕಾರಣ ಋತುಚಕ್ರದ ಸಮಸ್ಯೆಗಳೂ ಕೂಡಾ ಕಾಣಿಸಬಹುದು. ಬಹುಬೇಗನೆ ಮೆನೋಪಾಸ್‌ ಕೂಡಾ ಆಗಬಹುದು.

Weight Loss Tips: ನಲವತ್ತರ ನಂತರ ತೂಕ ಇಳಿಸುವುದು ಹೇಗೆ?ಇದನ್ನೂ ಓದಿ:

ದೈಹಿಕ ಫಿಟ್‌ನೆಸ್‌ ಕೊರತೆ

ಎಲ್ಲಕ್ಕಿಂತ ಮುಖ್ಯವಾಗಿ ಧೂಮಪಾನ ಮಾಡುವುದರಿಂದ ಫಿಟ್‌ನೆಸ್‌ನ ಸಮಸ್ಯೆಯೂ ಕಾಡಬಹುದು. ಶ್ವಾಸಕೋಶದ ಶಕ್ತಿ ಸಾಮರ್ಥ್ಯದಲ್ಲಿ ಇಳಿಮುಖವಾಗುವುದರಿಂದ ಇವು ನೇರವಾಗಿ ಇಡೀ ದೇಹದ ಮಾಂಸಖಂಡ ಹಾಗೂ ದೈಹಿಕ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತದೆ.