ನೈಋತ್ಯ ಭಾಗದಲ್ಲಿ ಮುಂಗಾರು ಮಾರುತಗಳು ಬಂದರೂ, ಸೆಕೆ ಕಡಿಮೆಯಾಗಿಲ್ಲ. ಹಾಗಾಗಿ ದೇಹ ತಂಪಾಗಿಸುವುದಕ್ಕೆ ಹಲವು ಉಪಾಯಗಳು ಬೇಕಾಗುತ್ತವೆ. ಅವುಗಳಲ್ಲಿ ಗಸಗಸೆಯೂ ಒಂದು. ಅದರ ಹೆಸರು ಕೇಳುತ್ತಿದ್ದಂತೆ ಗಸಗಸೆ ಪಾಯಸ, ಖೀರಿನದ್ದೇ ನೆನಪಾಗಬಹುದು. ಆದರೆ ಗಸಗಸೆಯ ಬಳಕೆ ಅದಷ್ಟಕ್ಕೇ ಸೀಮಿತವಲ್ಲ. ಅಂಟಿನುಂಡೆ, ಡ್ರೈಫ್ರೂಟ್ಸ್‌ ಲಡ್ಡುಗಳಲ್ಲಿ ಇದನ್ನು ಸೇರಿಸುವವರಿದ್ದಾರೆ. ಹಲವರು ರೀತಿಯ ಪಕ್ವಾನ್ನಗಳಲ್ಲಿ ಇದನ್ನು ಮಸಾಲೆಯಾಗಿ ಸೇರಿಸಲಾಗುತ್ತದೆ. ಇದರಿಂದ ರುಚಿ ಹೆಚ್ಚಿಸುವುದು ಮಾತ್ರವಲ್ಲ, ಪೌಷ್ಟಿಕಾಂಶವನ್ನೂ ಹೆಚ್ಚಿಸಬಹುದು. ಏನು ಸತ್ವಗಳಿವೆ (Benefits of Poppy Seeds) ಗಸಗಸೆಯಲ್ಲಿ?

ಸತ್ವಗಳು ಬಹಳಷ್ಟು

ಕ್ಯಾಲ್ಸಿಯಂ, ಮೆಗ್ನೀಶಿಯಂ, ಫಾಸ್ಫರಸ್‌, ಕಬ್ಬಿಣ ಸೇರಿದಂತೆ ಹಲವು ರೀತಿಯ ಖನಿಜಗಳು ಗಸೆಗಸೆಯಲ್ಲಿವೆ. ಈ ಪುಟ್ಟ ಬೀಜಗಳಲ್ಲಿ ಥಿಯಾಮಿನ್‌, ರೈಬೊಫ್ಲೆವಿನ್‌, ನಯಾಸಿನ್‌ ಸೇರಿದಂತೆ ವಿವಿಧ ರೀತಿಯ ಬಿ ಜೀವಸತ್ವಗಳಿವೆ. ಇವೆಲ್ಲ ಆಹಾರವನ್ನು ಶಕ್ತಿಯಾಗಿ ಸಂಚಯಿಸುವಲ್ಲಿ ಮತ್ತು ನರಗಳ ಕ್ಷಮತೆ ಹೆಚ್ಚಿಸುವಲ್ಲಿ ಪ್ರಮುಖವಾಗಿ ಕೆಲಸ ಮಾಡುತ್ತವೆ. ಜೊತೆಗೆ, ಪಾಲಿಫೆನಾಲ್‌ಗಳು ಮತ್ತು ಫ್ಲೆವನಾಯ್ಡ್‌ಗಳಂಥ ಉತ್ಕರ್ಷಣ ನಿರೋಧಕಗಳಿಂದ ಸಮೃದ್ಧವಾಗಿವೆ ಈ ಕಿರುಬೀಜಗಳು. ಆರೋಗ್ಯಕರ ಕೊಬ್ಬು ಸಹ ಇದರ ಭಾಗ. ಈ ಎಲ್ಲ ಸತ್ವಗಳಿಂದ ದೇಹಕ್ಕೆ ಬಹಳಷ್ಟು ರೀತಿಯಲ್ಲಿ ಪ್ರಯೋಜನಗಳಿವೆ.

ನಿದ್ದೆಗೆ ಪೂರಕ

ಶರೀರಕ್ಕೆ ಆರಾಮ ನೀಡಿ, ನಿದ್ದೆ ಬರಿಸುವಂಥ ಸಾಮರ್ಥ್ಯ ಗಸಗಸೆಗೆ ಇದೆಯೆನ್ನುವುದು ಭಾರತೀಯರ ಪರಂಪರಾಗತ ತಿಳುವಳಿಕೆ. ಇದರಲ್ಲಿರುವ ಆಲ್ಕಲಾಯ್ಡ್‌ ಮತ್ತು ಪೆಪ್ಟೈಡ್‌ಗಳಿಗೆ ನೋವು ನಿವಾರಿಸುವ ಮತ್ತು ನಿದ್ದೆ ಬರಿಸುವಂಥ ಗುಣಗಳಿವೆ. ಇವು ನರಗಳನ್ನು ಶಾಂತಗೊಳಿಸುತ್ತವೆ. ಹಾಗಾಗಿ ತೀವ್ರ ಆಯಾಸವಾಗಿದ್ದರೆ, ಶ್ರಮದ ಕೆಲಸದಿಂದ ಮೈ-ಕೈ ನೋವಾಗಿದ್ದರೆ, ನಿದ್ದೆಯಿಲ್ಲದೆ ಒದ್ದಾಡುತ್ತಿದ್ದರೆ, ಸಂಜೆಯ ಹೊತ್ತಿಗೆ ಗಸಗಸೆ ಖೀರು ಕುಡಿದು ನಿದ್ದೆ ಹೊಡೆಯುವುದು ಒಳ್ಳೆಯ ಉಪಾಯ.

ಜೀರ್ಣಾಂಗಗಳ ಕ್ಷಮತೆ ಹೆಚ್ಚಳ

ಈ ಪುಟ್ಟ ಬೀಜಗಳಲ್ಲಿ ನಾರಿನಂಶ ಹೇರಳವಾಗಿದೆ. ಇವುಗಳ ಸೇವನೆಯಿಂದ ಮಲಬದ್ಧತೆಯಂಥ ತೊಂದರೆಯನ್ನು ದೂರ ಮಾಡಲು ಅನುಕೂಲವಾಗುತ್ತದೆ. ನಾರು ಹೆಚ್ಚಿರುವ ಆಹಾರಗಳು ಹೊಟ್ಟೆಯನ್ನು ನಿಯಮಿತವಾಗಿ ಖಾಲಿ ಮಾಡಿಸಿ, ಮಲಬದ್ಧತೆಯನ್ನು ನಿವಾರಿಸಿ, ಕರುಳಿನಲ್ಲಿರುವ ಉತ್ತಮ ಬ್ಯಾಕ್ಟೀರಿಯಗಳ ಸಂಖ್ಯೆಯನ್ನು ಹೆಚ್ಚಿಸುತ್ತವೆ. ಇದರಲ್ಲಿರುವ ಜೆಲ್‌ನಂಥ ವಸ್ತುಗಳು, ಜೀರ್ಣಾಂಗಗಳಲ್ಲಿರುವ ಉರಿಯೂತ ನಿವಾರಣೆಗೆ ನೆರವಾಗುತ್ತವೆ.

ಪ್ರತಿರೋಧಕ ಶಕ್ತಿ ಸುಧಾರಣೆ

ಇದರಲ್ಲಿರುವ ಉತ್ಕರ್ಷಣ ನಿರೋಧಕಗಳು ದೇಹದ ರೋಗನಿರೋಧಕ ಶಕ್ತಿಯನ್ನು ಉತ್ತೇಜಿಸುತ್ತವೆ. ಇದರಿಂದ ಸೋಂಕುಗಳ ವಿರುದ್ಧ ಹೋರಾಡುವ ಸಾಮರ್ಥ್ಯ ಹೆಚ್ಚುತ್ತದೆ. ಇದರಲ್ಲಿರುವ ಸತು ಮತ್ತು ಮ್ಯಾಂಗನೀಸ್‌ನಂಥ ಸತ್ವಗಳು ಪ್ರತಿರೋಧಕ ಸಾಮರ್ಥ್ಯ ಹೆಚ್ಚಿಸುವಲ್ಲಿ ನೆರವಾಗುತ್ತವೆ. ಬೇಸಿಗೆ ಮುಗಿಯುತ್ತಾ ಬಂದು, ಮಳೆಗಾಲದ ಹೊಸಿಲಲ್ಲಿರುವಾಗ ದೇಹಕ್ಕೆ ಬೇಕಾದ ರೋಗ ನಿರೋಧಕತೆಯ ರಕ್ಷಣೆ ನೀಡುವಲ್ಲಿ ಇದು ಸಹಾಯ ಮಾಡಬಲ್ಲದು.

ಚರ್ಮ, ಕೂದಲಿನ ಆರೋಗ್ಯ

ಇದರಲ್ಲಿರುವ ಒಮೇಗಾ 6 ಮತ್ತು ಒಮೇಗಾ 3 ಕೊಬ್ಬಿನಾಮ್ಲಗಳು ದೇಹಕ್ಕೆ ಆರೋಗ್ಯಕರ ಕೊಬ್ಬನ್ನು ನೀಡಬಲ್ಲವು. ಇವು ಚರ್ಮ ಮತ್ತು ಕೂದಲಿನ ಆರೋಗ್ಯ ರಕ್ಷಣೆಯಲ್ಲಿ ಹಲವು ರೀತಿಯ ಅನುಕೂಲಗಳನ್ನು ಒದಗಿಸುತ್ತವೆ. ಚರ್ಮದ ಹಿಗ್ಗುವಿಕೆಯನ್ನು ವೃದ್ಧಿಸಿ, ಕೊಲಾಜಿನ್‌ ಹೆಚ್ಚಿಸಿ, ಈ ಮೂಲಕ ಸುಕ್ಕುಗಳನ್ನು ಕಡಿಮೆ ಮಾಡಿ ತ್ವಚೆಗೆ ತಾರುಣ್ಯ ಮರಳಿಸುವ ಸಾಮರ್ಥ್ಯ ಹೊಂದಿವೆ. ಇದರಲ್ಲಿರುವ ಜಿಂಕ್‌ ಅಂಶದಿಂದ ಕೊಲಾಜಿನ್‌ ವೃದ್ಧಿಯಾಗಿ, ಕೂದಲಿನ ಆರೋಗ್ಯ ಸುಧಾರಿಸುತ್ತದೆ. ಕೂದಲು ಬಲಕಳೆದುಕೊಂಡು ತುಂಡಾಗುತ್ತಿದ್ದರೆ, ಅದನ್ನು ತಡೆಯುವುದಕ್ಕೆ ಕೊಲಾಜಿನ್‌ ನೆರವಾಗುತ್ತದೆ. ಹಾಗಾಗಿ ಗಸೆಗಸೆಯನ್ನು ಅಲ್ಪ ಪ್ರಮಾಣದಲಾದರೂ ಬಳಕೆ ಮಾಡುವುದು ದೇಹಾರೋಗ್ಯಕ್ಕೆ ಒಳ್ಳೆಯದು.

ಇದನ್ನೂ ಓದಿ: Benefits Of Litchi: ಸಿಹಿಯಾದ, ರುಚಿಯಾದ ಲಿಚಿ ಹಣ್ಣನ್ನು ತಿಂದರೆ ಆರೋಗ್ಯ ಲಾಭ ಹಲವಾರು

ನಾವು ನಿತ್ಯವೂ ತಿನ್ನುವ ಆಹಾರದಲ್ಲಿ ಪ್ಲಾಸ್ಟಿಕ್‌ (Microplastics) ಇದೆ ಎಂದರೆ ನಂಬುತ್ತೀರಾ? ಹೌದು. ಮೈಕ್ರೋ ಪ್ಲಾಸ್ಟಿಕ್‌ ಎಂಬ ಕಣ್ಣಿಗೆ ಕಾಣದ ಪ್ಲಾಸ್ಟಿಕ್‌ ಕಣಗಳು ಎಷ್ಟೋ ಬಾರಿ ಆಹಾರದ ಜೊತೆಗೆ ನಮಗೆ ಗೊತ್ತೇ ಆಗದಂತೆ ನಮ್ಮ ಹೊಟ್ಟೆ ಸೇರುತ್ತದೆ. ಮೈಕ್ರೋ ಪ್ಲಾಸ್ಟಿಕ್‌ ಎಂದರೆ ಐದು ಎಂಎಂಗೂ ಸಣ್ಣದಾದ ಪ್ಲಾಸ್ಟಿಕ್‌ನ ಕಣಗಳು. ಬಹಳ ಸೂಕ್ಷ್ಮವಾದ ಈ ಪ್ಲಾಸ್ಟಿಕ್‌ ಕಣಗಳು ನಾವು ಉಸಿರಾಡುವ ಗಾಳಿಯಲ್ಲಿ ತೇಲಾಡುತ್ತಾ ವಾತಾವರಣದಲ್ಲಿ ಇರುತ್ತವೆ. ವಾತಾವರಣದಲ್ಲಿರುವ ಇವು ಅನೇಕ ಬಾರಿ ತೆರೆದ ಆಹಾರದ ಮೇಲೆಯೂ ಸಂಗ್ರಹವಾಗುತ್ತವೆ. ಬಹಳ ಸಾರಿ, ಕಾರ್ಖಾನೆಗಳಲ್ಲಿ ಸಂಸ್ಕರಿಸಿದ ಆಹಾರ ತಯಾರಿಸುವಾಗಲೇ ಪ್ಯಾಕೇಜಿನ ಜೊತೆಗೂ ಇವು ಸೇರಿಕೊಂಡು ಬಿಟ್ಟಿರುತ್ತವೆ. ನಾವು ಕುಡಿಯುವ ನೀರಿನಲ್ಲಿ, ಕುಡಿಯುವ ಪೇಯಗಳಲ್ಲಿ ಅಥವಾ ಯಾವುದೇ ತೆರೆದ, ತೆರೆಯದ ಆಹಾರಗಳ ಮೇಲೆ ಇಂತಹ ಕಣಗಳು ನಮಗೆ ತಿಳಿಯದೆ ಸೇರಿರುತ್ತವೆ. ಹೀಗಾಗಿ ಮುಚ್ಚಿಟ್ಟ ಆಹಾರದಲ್ಲಿಯೂ, ಮೊದಲೇ ಪ್ಯಾಕಟ್ಟಿನಲ್ಲಿರುವ ಆಹಾರದಲ್ಲಿಯೂ ಇಂತಹ ಮೈಕ್ರೋ ಪ್ಲಾಸ್ಟಿಕ್‌ ಕಣಗಳು ಬಂದಿರುವ ಸಾಧ್ಯತೆ ಇರುವುದರಿಂದ ನಾವು ಎಷ್ಟೇ ಜಾಗರೂಕತೆಯಿಂದ ಆಹಾರಗಳನ್ನು ಕಾಪಿಟ್ಟರೂ, ಇವು ಮೊದಲೇ ಸೇರಿರುವ ಸಾಧ್ಯತೆಯನ್ನೂ ಅಲ್ಲಗಳೆಯಲಾಗುವುದಿಲ್ಲ. ಅಷ್ಟೇ ಅಲ್ಲ, ನಾವು ಓಡಾಡುವ ಪರಿಸರದ ವಾತಾವರಣದಲ್ಲಿಯೂ ಇರುವುದರಿಂದ ಇದು ಈಚೆಗೆ ಸಹಜವೇ ಆಗಿದೆ. ಒಂದು ಅಧಯಯನದ ಪ್ರಕಾರ, ಉಪ್ಪು, ಮೀನು ಮತ್ತಿತರ ಸಮುದ್ರ ಜೀವಿಗಳು, ಮಾಂಸ, ಪೇಯಗಳು ಸೇರಿದಂತೆ ಹಲು ಪ್ಯಾಕೇಜ್ಡ್‌ ಆಹಾರಗಳಲ್ಲಿ ಮೈಕ್ರೋಪ್ಲಾಸ್ಟಿಕ್‌ ಇರುವ ಸಾಧ್ಯತೆಗಳು ಹೆಚ್ಚಿವೆಯಂತೆ.

ಮೈಕ್ರೋ ಪ್ಲಾಸ್ಟಿಕ್‌ ಹಾವಳಿ

ಒಂದು ಅಧ್ಯಯನದ ಪ್ರಕಾರ 1990ರಿಂದ 2018ರವರೆಗೆ 109 ದೇಶಗಳ ಪೈಕಿ ಸಮುದ್ರ ತೀರದಲ್ಲಿರುವ ದೇಶಗಳ ಮೇಲೆ ಈ ಮೈಕ್ರೋ ಪ್ಲಾಸ್ಟಿಕ್‌ ಹಾವಳಿ ಹೆಚ್ಚಿದೆಯಂತೆ. ಅದರಲ್ಲೂ ಇಂಡೋನೇಷ್ಯಾ ಈ ಸಮಸ್ಯೆಯಲ್ಲಿ ಮೊದಲ ಸ್ಥಾನದಲ್ಲಿದೆಯಂತೆ. ತಿಂಗಳಿಗೆ ಇಲ್ಲಿ 15 ಗ್ರಾಂಗಳಷ್ಟು ಮೈಕ್ರೋ ಪ್ಲಾಸ್ಟಿಕ್‌ ಇಲ್ಲಿನ ಮಂದಿಯ ಹೊಟ್ಟೆ ಸೇರುತ್ತದಂತೆ. ಇನ್ನುಳಿದಂತೆ ಏಷ್ಯಾ, ಅಮೆರಿಕಾ, ಆಫ್ರಿಕಾ ಖಂಡದ ದೇಶಗಳಲ್ಲಿ (ಚೈನಾ ಹಾಗೂ ಯುಎಸ್‌ ಸೇರಿದಂತೆ) ಈ ಮೈಕ್ರೋ ಪ್ಲಾಸ್ಟಿಕ್‌ ದೇಹ ಸೇರುವ ಪ್ರಮಾಣ ಇತ್ತೀಚೆಗಿನ ವರ್ಷಗಳಲ್ಲಿ ಆರು ಪಟ್ಟು ಹೆಚ್ಚಿದೆಯಂತೆ.

ಹಾರ್ಮೋನುಗಳನ್ನೇ ನಕಲು ಮಾಡುತ್ತವೆ

ಸಂಶೋಧನೆಗಳ ಪ್ರಕಾರ, ಪ್ಲಾಸ್ಟಿಕ್‌ನಲ್ಲಿರುವ ರಾಸಾಯನಿಕಗಳಾದ ಬಿಪಿಎ, ಪ್ಥಲೇಟ್ಸ್‌ ಹಾಗೂ ಪಿಎಫ್‌ಎಎಸ್‌ ನಂತಹುಗಳು ಮಾನವನ ದೇಹದ ಹಾರ್ಮೋನುಗಳನ್ನೇ ನಕಲು ಮಾಡುತ್ತವೆ. ಇದರಿಂದ ಸಂತಾನಹೀನತೆಯೂ ಸೇರಿದಂತೆ ಕ್ಯಾನ್ಸರ್‌ವರೆಗೂ ಹಲವು ಆರೋಗ್ಯ ಸಮಸ್ಯೆಗಳು ಬರುವ ಲಕ್ಷಣಗಳಿವೆ.
ಹಾಗಾದರೆ ಇದರಿಂದ ದೂರವಿರಲು ಏನು ಮಾಡಬಹುದು ಎಂಬ ಪ್ರಶ್ನೆ ನಿಮ್ಮದಾಗಿದ್ದರೆ, ಈ ಕೆಲವು ಜಾಗರೂಕತೆಗಳನ್ನು ನೀವು ವಹಿಸಬಹುದು.

ಇದನ್ನೂ ಓದಿ: Benefits Of Cherries: ಚೆರ್ರಿ ಹಣ್ಣು ರುಚಿಗಷ್ಟೇ ಅಲ್ಲ, ಉತ್ತಮ ಆರೋಗ್ಯಕ್ಕೂ ಹಿತಕರ!

ಅವು ಯಾವುವೆಂದರೆ

1. ಪ್ಲಾಸ್ಟಿಕ್‌ನ ಪಾತ್ರೆಗಳನ್ನು, ಬೌಲ್‌ಗಳನ್ನು ಮೈಕ್ರೋವೇವ್‌ನಲ್ಲಿಡಬೇಡಿ. ಅದರ ಅತಿಯಾದ ಉಷ್ಣತೆ ಪ್ಲಾಸ್ಟಿಕ್‌ನಿಂದ ಕೆಟ್ಟ ರಾಸಾಯನಿಕಗಳನ್ನು ಬಿಡುಗಡೆ ಮಾಡುವಂತೆ ಮಾಡುತ್ತವೆ. ಹೀಗಾಗಿ ಮೈಕ್ರೋವೇವ್‌ಗೆ ಸೆರಾಮಿಕ್‌ ಅಥವಾ ಗ್ಲಾಸ್‌ ಬೌಲ್‌ಗಳನ್ನೇ ಇಡಿ.
2. ಗ್ಲಾಸ್‌ ಅಥವಾ ಸ್ಟೀಲ್‌ ನೀರಿನ ಬಾಟಲ್‌ಗಳನ್ನೇ ಬಳಸಿ. ಪ್ಲಾಸ್ಟಿಕ್‌ ಬಾಟಲಿಗಳನ್ನು ಬಳಸಬೇಡಿ.
3. ಆದಷ್ಟೂ ಸಾವಯುವ ವಸ್ತುಗಳನ್ನೇ ಬಳಸಿ. ಕ್ರಿಮಿನಾಶಕಗಳನ್ನು ಬಳಸಿದ ತರಕಾರಿಗಳನ್ನು ಕಡಿಮೆ ಮಾಡಿ.
4. ಮಾಂಸವನ್ನು ತಿನ್ನುವುದನ್ನು ಕಡಿಮೆ ಮಾಡಿ. ಇವು ಅತಿಯಾದ ಕೊಬ್ಬಿನ ಆಹಾರಗಳಾಗಿರುವುದರಿಂದ ಹಾಗೂ ಪ್ರಾಣಿ ಮೂಲಮೂಲವಾಗಿರುವುದರಿಂದ ಇವುಗಳಲ್ಲಿ ರಾಸಾಯನಿಕಗಳು ಹೆಚ್ಚು ಸಂಗ್ರಹವಾಗುತ್ತವೆ.

ಯಾವುದೇ ಕೇಕ್‌ ಮೇಲೆ ಅಥವಾ ಸೋಡಾದಲ್ಲಿ ಕೂತು ಕರೆಯುವ ಚೆರ್ರಿಯನ್ನು ನೋಡಿ ತಿನ್ನಲು ಆಸೆ ಪಡುವವರು ಎಷ್ಟೋ ಮಂದಿ. ಕೆಲವೊಮ್ಮೆ ಸಕ್ಕರೆಭರಿತ ಕೃತಕ ಚೆರ್ರಿಗಳು ಕೇಕ್‌ಗಳನ್ನು ಅಲಂಕರಿಸಿದರೆ, ಹಲವು ಬಾರಿ ನಿಜವಾದ ಚೆರ್ರಿ ಹಣ್ಣುಗಳೇ ಕೂತು, ತಿನ್ನುವವರ ನಡುವೆ ಜಗಳ ಸೃಷ್ಟಿಸುತ್ತವೆ. ವಿಶ್ವದೆಲ್ಲೆಡೆ ದೊರೆಯುವ ಚೆರ್ರಿಗಳನ್ನು ಗಮನಿಸಿದರೆ ನೂರಾರು ಬಗೆಗಳಿವೆ. ಆದರೆ ಮಾರುಕಟ್ಟೆಯಲ್ಲಿ ಹೆಚ್ಚಾಗಿ ದೊರೆಯುವುದು ಬಿಂಗ್‌ ಚೆರ್ರಿ. ಕಡುಕೆಂಪು ಬಣ್ಣದ ಸಿಹಿಯಾದ ಚೆರ್ರಿಗಳಿವು. ಇದೊಂದೇ ಅಲ್ಲ, ಹುಳಿಯಾದ ಟಾರ್ಟ್‌ ಚೆರ್ರಿ, ರೇನರ್‌ ಚೆರ್ರಿ, ಕಪ್ಪು ಚೆರ್ರಿ, ತುಸು ಕೆಂಪು ಬಣ್ಣದ್ದು, ಅಚ್ಚ ಕೆಂಪು ಬಣ್ಣದ್ದು- ಹೀಗೆ ನಾನಾ ರೀತಿಯ ಚೆರ್ರಿಗಳು ಪ್ರಾಂತ್ಯಾವಾರ ಭಿನ್ನತೆಯೊಂದಿಗೆ ಲಭ್ಯವಿವೆ. ಇದನ್ನು ತಿನ್ನುವುದರಿಂದ ಆರೋಗ್ಯಕ್ಕೇನು ಲಾಭಗಳಿವೆ (Benefits Of Cherries) ಎಂಬುದನ್ನು ನೋಡೋಣ.

ಸತ್ವಗಳೇನು?

ನೂರು ಗ್ರಾಂ ಚೆರ್ರಿಯಲ್ಲಿ ಇರುವಂಥ ಸತ್ವಗಳನ್ನು ಗಮನಿಸಿದರೆ- ಇದರಿಂದ ಸುಮಾರು 97 ಕ್ಯಾಲರಿ ಶಕ್ತಿ ದೊರೆಯುತ್ತದೆ. ಪ್ರೊಟೀನ್-‌ 2 ಗ್ರಾಂ, ಪಿಷ್ಟ- 26 ಗ್ರಾಂ, ಸಕ್ಕರೆ- 20 ಗ್ರಾಂ, ನಾರು- 3 ಗ್ರಾಂ, ವಿಟಮಿನ್‌ ಸಿ- 18%, ಪೊಟಾಶಿಯಂ- 10%, ತಾಮ್ರ ಮತ್ತು ಮೆಗ್ನೀಶಿಯಂ- 5% ಮುಂತಾದವು. ಕಪ್ಪು ಮತ್ತು ಕಡುಕೆಂಪು ಬಣ್ಣದಿಂದ ಹಿಡಿದು ಹಳದಿ ಬಣ್ಣದವರೆಗೆ ಚೆರ್ರಿಯ ವರ್ಣಗಳು ಭಿನ್ನವಾಗಿವೆ. ಎಲ್ಲವೂ ಆರೋಗ್ಯಕ್ಕೆ ಒಳ್ಳೆಯವೇ ಆದರೂ ವರ್ಣ ಗಾಢವಾದಷ್ಟೂ ಅದರಲ್ಲಿರುವ ಉತ್ಕರ್ಷಣ ನಿರೋಧಕಗಳ ಸಾಂದ್ರತೆ ಹೆಚ್ಚು ಎಂದು ಹೇಳಬಹುದು.

ಉರಿಯೂತ ಶಾಮಕ

ಬಣ್ಣ ಯಾವುದೇ ಆದರೂ, ಚೆರ್ರಿಯಲ್ಲಿ ಉತ್ಕರ್ಷಣ ನಿರೋಧಕಗಳು ಸಾಂದ್ರವಾಗಿವೆ. ಇದರಲ್ಲಿ ಪಾಲಿಫೆನಾಲ್‌ಗಳು ಹೇರಳವಾಗಿವೆ. ಮುಕ್ತ ಕಣಗಳಿಂದ ದೇಹದ ಕೋಶಗಳಿಗೆ ಹಾನಿಯಾಗುವುದನ್ನು ತಪ್ಪಿಸಬಲ್ಲಂಥ ಸಸ್ಯಜನ್ಯ ರಾಸಾಯನಿಕಗಳಿವು. ಕೆಲವು ರೀತಿಯ ಕ್ಯಾನ್ಸರ್‌ಗಳಿಂದ ಹಿಡಿದು, ಹೃದಯದ ತೊಂದರೆಗಳು, ಮಧುಮೇಹದವರೆಗೆ ಮಾರಕ ರೋಗಗಳ ದಾಳಿಯಿಂದ ಶರೀರವನ್ನು ಕಾಪಾಡುವಂಥವು. ಜೊತೆಗೆ ಇದರಲ್ಲಿರುವ ಕೆರೊಟಿನಾಯ್ಡ್‌ಗಳು ಸಹ ಉರಿಯೂತ ನಿವಾರಣೆ ಮಾಡುವಂಥ ಸಾಮರ್ಥ್ಯವನ್ನು ಹೊಂದಿವೆ.

ಶೀಘ್ರ ಚೇತರಿಕೆ

ಕಠಿಣವಾದ ದೇಹಶ್ರಮ ಇಲ್ಲವೇ ವ್ಯಾಯಾಮದ ನಂತರ ಕಾಣಿಸಿಕೊಳ್ಳುವ ಸ್ನಾಯುಗಳ ನೋವಿನಿಂದ ಚೆರ್ರಿಗಳು ಶೀಘ್ರ ಚೇತರಿಕೆ ನೀಡುತ್ತವೆ. ಸ್ನಾಯುಗಳ ನೋವು, ಊತದಿಂದ ಬೇಗ ಉಪಶಮನ ಒದಗಿಸುತ್ತವೆ. ಈ ಕೆಲಸಕ್ಕೆ ಟಾರ್ಟ್‌ ಚೆರ್ರಿಯನ್ನು ವಿಶೇಷವಾಗಿ ಉಪಯೋಗಿಸಲಾಗುತ್ತದೆ. ಸಿಹಿ ಚೆರ್ರಿಗಳಿಗಿಂತ ಕೊಂಚ ಹುಳಿಯಾದ ಚೆರ್ರಿಯಲ್ಲಿ ಈ ಸಾಮರ್ಥ್ಯ ಹೆಚ್ಚು ಎನ್ನಲಾಗುತ್ತದೆ. ಇದನ್ನು ಮ್ಯಾರಥಾನ್‌ ಓಡುವವರು, ಸೈಕ್ಲಿಸ್ಟ್‌ಗಳಂಥ ಕ್ರೀಡಾಳುಗಳು ಇದನ್ನು ಹೆಚ್ಚಾಗಿ ಬಳಸುತ್ತಾರೆ. ಅವರು ಮಾತ್ರವೇ ಅಲ್ಲ, ಸಾಮಾನ್ಯರು ಸಹ ಹುಳಿ ಚೆರ್ರಿಯನ್ನು ಚೇತರಿಕೆಗಾಗಿ ಬಳಸಬಹುದು.

ಹೃದಯದ ಸ್ನೇಹಿತ

ಪೊಟಾಶಿಯಂ ಭರಪೂರ ಇರುವಂಥ ಹಣ್ಣಿದು. ರಕ್ತದೊತ್ತಡ ನಿರ್ವಹಣೆಯಲ್ಲಿ ಪೊಟಾಶಿಯಂ ಪಾತ್ರ ಹಿರಿದು. ದೇಹಕ್ಕೆ ಹೊರೆಯಾಗಿರುವ ಸೋಡಿಯಂ ಅಂಶವನ್ನು ಹೊರಹಾಕಲು ಪೊಟಾಶಿಯಂ ಅಗತ್ಯ. ದಿನವೊಂದಕ್ಕೆ ದೇಹಕ್ಕೆ ಬೇಕಾದ ಶೇ. ೧೦ ಪೊಟಾಶಿಯಂ ಒಂದು ಕಪ್‌ ಚೆರ್ರಿಯಿಂದ ದೊರೆಯುತ್ತದೆ. ಜೊತೆಗೆ, ಇದರಲ್ಲಿರುವ ಪಾಲಿಫೆನಾಲ್‌ಗಳು, ಆಂಥೋಸಯನಿನ್‌ಗಳು ಮತ್ತು ಫ್ಲೆನಾಲ್‌ಗಳು ಹೃದಯದ ಆರೋಗ್ಯ ಕಾಪಾಡುವಲ್ಲಿ ಮಹತ್ತರ ಕೆಲಸ ಮಾಡುತ್ತವೆ.

ಆರ್ಥರೈಟಿಸ್‌ ನೋವು ಶಮನ

ದೇಹದಲ್ಲಿ ಉರಿಯೂತ ಹೆಚ್ಚಿದಾಗ ಕಾಡುವ ರೋಗಗಳಲ್ಲಿ ಆರ್ಥರೈಟಿಸ್‌ ಸಹ ಒಂದು. ಶರೀರದಲ್ಲಿ ಯೂರಿಕ್‌ ಆಮ್ಲದ ಜಮಾವಣೆ ಹೆಚ್ಚಿ ಕಾಡುವಂಥದ್ದು ಗೌಟ್‌ ಆರ್ಥರೈಟಿಸ್‌. ಇವುಗಳ ನೋವು ಶಮನಕ್ಕೆ ಚೆರ್ರಿ ಸೇವನೆಯು ನೆರವು ನೀಡುತ್ತದೆ. ದೇಹದಲ್ಲಿ ಯೂರಿಕ್‌ ಆಮ್ಲ ಜಮೆಯಾಗುವುದನ್ನು ಚೆರ್ರಿ ಕಡಿಮೆ ಮಾಡುತ್ತದೆ. ಇದಲ್ಲದೆ, ಉಳಿದ ನೋವುಗಳ ಶಮನಕ್ಕೂ ಚೆರ್ರಿ ಸಹಕಾರಿ ಎನ್ನುತ್ತದೆ ಹಲವು ಅಧ್ಯಯನಗಳು.

ನಿದ್ದೆಗೆ ಪೂರಕ

ಚೆರ್ರಿಯಲ್ಲಿ ಮೆಲಟೋನಿನ ಅಂಶವಿದೆ. ಇದು ನಿದ್ರೆಯನ್ನು ಗಾಢವಾಗಿಸುತ್ತದೆ. ಜೊತೆಗೆ ನಿದ್ದೆಗೊಂದು ಸಮಯವನ್ನು ನಿಗದಿ ಮಾಡುವ ಸನ್ನಾಹದಲ್ಲಿದ್ದರೆ, ಚೆರ್ರಿ ತಿನ್ನುವುದು ಸೂಕ್ತವಾದದ್ದು. ಇದರಿಂದ ನಿದ್ದೆಯಲ್ಲಿ ಆಗಾಗ ಎಚ್ಚರಾಗುವುದು, ಕಡಿಮೆ ನಿದ್ದೆ, ಸೂಕ್ಷ್ಮ ನಿದ್ದೆಯಂಥ ತೊಂದರೆಗಳು ಮಾಯವಾಗಿ, ಗಡದ್ದಾಗಿ ರಾತ್ರಿ ಮಲಗಿ ಬೆಳಗ್ಗೆ ಎಚ್ಚರಾಗುವಂತೆ ಮಾಡುತ್ತದೆ.

ಬಳ್ಳಾರಿ: ವಿಮ್ಸ್‌ ಆಸ್ಪತ್ರೆಯಲ್ಲಿ (Bellary VIMS Hospital) ಚಿಕಿತ್ಸೆ ಪಡೆಯುತ್ತಿದ್ದ ತಂದೆ ವೈದ್ಯರ ನಿರ್ಲಕ್ಷ್ಯದಿಂದಲೇ (Medical Negligence) ಸಾವನ್ನಪ್ಪಿದ್ದಾರೆ ಎಂದು ಸಿಟ್ಟಾದ ಮಗನೊಬ್ಬ ವಿಮ್ಸ್‌ನ ಮಹಿಳಾ (VIMS Hospital ) ವೈದ್ಯೆ ಮೇಲೆ ಹಲ್ಲೆ (Assault Case) ನಡೆಸಿದ್ದಾನೆ. ವೈದ್ಯೆಯ ತಲೆ ಜುಟ್ಟು ಹಿಡಿದು ಎಳೆದಾಡಿ ಹಲ್ಲೆ ಮಾಡಿದ್ದಾರೆ ಎಂಬ ಆರೋಪ ಕೇಳಿ ಬಂದಿದೆ. ವೈದ್ಯೆ ಮೇಲಿನ ಹಲ್ಲೆ ಖಂಡಿಸಿ ಬಳ್ಳಾರಿಯ ವಿಮ್ಸ್ ತುರ್ತು ಚಿಕಿತ್ಸಾ ಘಟಕದ ಮುಂದೆ ವೈದ್ಯಕೀಯ ವಿದ್ಯಾರ್ಥಿಗಳು ಸೋಮವಾರ ತಡರಾತ್ರಿ ದಿಢೀರ್ ಪ್ರತಿಭಟಿಸಿದರು. ವೈದ್ಯರ ರಕ್ಷಣೆ ಕೋರಿ ವಿದ್ಯಾರ್ಥಿಗಳು ಪ್ರತಿಭಟಿಸಿದರು.

ಗೂಡಾರ್‌ನಗರ ನಾಗೇಶ್ ಎಂಬಾತ ಕರ್ತವ್ಯ ನಿರತ ವೈದ್ಯೆ ಮೇಲೆ ಹಲ್ಲೆ ನಡೆಸಿದ್ದಾನೆ. ನಾಗೇಶ್‌ನ ತಂದೆ ಅನಾರೋಗ್ಯದಿಂದ ವಿಮ್ಸ್‌ಗೆ ದಾಖಲಾಗಿದ್ದರು. ಆದರೆ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಕ್ಕೆ ಆಕ್ರೋಶಗೊಂಡ ನಾಗೇಶ್‌ ಕರ್ತವ್ಯದಲ್ಲಿದ್ದ ವೈದ್ಯೆ ಮೇಲೆ ಏಕಾಏಕಿ ಹಲ್ಲೆ ನಡೆಸಿದ್ದಾರೆ.

ಸೆಕ್ಯುರಿಟಿ ಸಮಸ್ಯೆಯಿಂದಲೇ ಹೀಗೆ ವೈದ್ಯರ ಮೇಲೆ ಹಲ್ಲೆ ನಡೆಯುತ್ತಿದೆ. ವಿಮ್ಸ್‌ನಲ್ಲಿ ಭದ್ರತಾ ಸಿಬ್ಬಂದಿ ಹೆಚ್ಚಳ ಮಾಡಬೇಕೆಂದು ಆಗ್ರಹಿಸಿದರು. ವಿಷಯ ತಿಳಿಯುತ್ತಿದ್ದಂತೆ ತಡರಾತ್ರಿ ಘಟನಾ ಸ್ಥಳಕ್ಕೆ ಆಗಮಿಸಿದ ವಿಮ್ಸ್ ನಿರ್ದೇಶಕ ಡಾ.ಗಂಗಾಧರ‌ಗೌಡ್ ಹಾಗೂ ಕೌಲ್‌ಬಜಾರ್ ಪೊಲೀಸರು ಪರಿಸ್ಥಿತಿಯನ್ನು ತಿಳಿಗೊಳಿಸಿದರು.

ಹಲ್ಲೆ ನಡೆಸಿದವರ ವಿರುದ್ಧ ಕ್ರಮವಹಿಸಲಾಗುವುದು. ಜತೆಗೆ ವಿಮ್ಸ್‌ ಆಸ್ಪತ್ರೆಯಲ್ಲಿ ಕೆಲಸ ಮಾಡುವವರಿಗೆ ಸೂಕ್ತ ರೀತಿಯ ಭದ್ರತೆಯನ್ನು ವಹಿಸಲಾಗುವುದು ಎಂದು ಭರವಸೆ ನೀಡಿದರು. ಹೀಗಾಗಿ ದಿಢೀರ್‌ ಕೈಗೊಂಡ ಪ್ರತಿಭಟನೆಯನ್ನು ಕೈಬಿಟ್ಟಿದ್ದಾರೆ.

ಇದನ್ನೂ ಓದಿ: Election Results 2024: ಜಯನಗರ ಮತ ಎಣಿಕೆ ಕೇಂದ್ರದಲ್ಲಿ ಟಿ ಶರ್ಟ್‌ ಕಿರಿಕ್‌; ಕೆಆರ್‌ಎಸ್ ಪಾರ್ಟಿಯ ಅಭ್ಯರ್ಥಿ ಔಟ್‌

ಪ್ರತ್ಯೇಕ ಕಡೆ‌ ಕರೆಂಟ್‌ ಶಾಕ್‌ಗೆ ಲೈನ್‌ಮ್ಯಾನ್‌ ಸೇರಿ ಹಸು ಬಲಿ

ಉಡುಪಿ/ ಆನೇಕಲ್‌: ವಿದ್ಯುತ್ ಟ್ರಾನ್ಸ್‌ಫಾರ್ಮರ್ ರಿಪೇರಿ ಮಾಡುವ ವೇಳೆ ವಿದ್ಯುತ್ ಪ್ರವಹಿಸಿ (Electric shock) ಲೈನ್‌ಮ್ಯಾನ್ ಮೃತಪಟ್ಟಿರುವ ದಾರುಣ ಘಟನೆ ನಡೆದಿದೆ. ಉಡುಪಿಯ ಬೈಂದೂರು ತಾಲೂಕಿನ ತಗ್ಗರ್ಸೆ ಗ್ರಾಮದ ಹೆಗ್ಗೇರಿಯಲ್ಲಿ ಅವಘಡ ನಡೆದಿದೆ.

ಲೈನ್ ಮ್ಯಾನ್ ಸಲೀಂ (38) ಮೃತ ದುರ್ದೈವಿ. ಟ್ರಾನ್ಸ್‌ಫಾರ್ಮರ್ ಬಳಿ ವಿದ್ಯುತ್ ಸಂಪರ್ಕ ರಿಪೇರಿ ಮಾಡುವಾಗ ಶಾಕ್‌ ಹೊಡೆದಿದೆ ಪರಿಣಾಮ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಉತ್ತರ ಕರ್ನಾಟಕದ ಮುಂಡಗೋಡು ನಿವಾಸಿಯಾಗಿರುವ ಸಲೀಂ, ಬೈಂದೂರು ಮೆಸ್ಕಾಂನಲ್ಲಿ ಕಳೆದ ಎಂಟು ವರ್ಷದಿಂದ ಸೇವೆ ಸಲ್ಲಿಸುತ್ತಿದ್ದಾರೆ. ಬೈಂದೂರಿನಲ್ಲಿ ಸಲೀಂ ಜನಸ್ನೇಹಿ ಲೈನ್‌ಮ್ಯಾನ್ ಆಗಿದ್ದರು.

ಇದನ್ನೂ ಓದಿ: Road Accident : ಎದುರಿಗೆ ಬಂದ ಬೈಕ್‌ ತಪ್ಪಿಸಲು ಹೋಗಿ ಮಹಿಳೆಗೆ ಗುದ್ದಿದ ಕಾರು; ಎಗರಿ ಬಿದ್ದವಳು ಸ್ಥಳದಲ್ಲೇ ಸಾವು

ಬೆಸ್ಕಾಂ ಅಧಿಕಾರಿಗಳ ನಿರ್ಲಕ್ಷ್ಯಕ್ಕೆ ಮೂಕಜೀವಿ ಬಲಿ

ಬೆಂಗಳೂರು ಹೊರವಲಯ ಜಿಗಣಿ ಸಮೀಪದ ಮಂಚನಹಳ್ಳಿಯಲ್ಲಿ ವಿದ್ಯುತ್ ಶಾಕ್‌ನಿಂದ ಹಸುವೊಂದು ದಾರುಣವಾಗಿ ಮೃತಪಟ್ಟಿದೆ. ಕರೆಂಟ್ ಶಾಕ್‌ನಿಂದ ಹಸು ಮೃತಪಡುವ ದೃಶ್ಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.

ಕರಗಪ್ಪ ಎಂಬುವವರು ಹಸುಗಳನ್ನ ಮೇಯಿಸಿಕೊಂಡು ರಸ್ತೆಯಲ್ಲಿ ನಡೆದು ಬರುತ್ತಿದ್ದರು. ಈ ವೇಳೆ ವಿದ್ಯುತ್ ಕಂಬದ ಬಳಿ ಕರೆಂಟ್ ಗ್ರೌಂಡಿಂಗ್ ಆಗಿ ಹಸು ಮೃತಪಟ್ಟಿದೆ. ಇದೇ ರೀತಿ ನಾಲ್ಕೈದು ಹಸುಗಳಿಗೆ ಅದೇ ಜಾಗದಲ್ಲಿ ಗ್ರೌಂಡಿಂಗ್‌ನಿಂದ ಶಾಕ್ ಆಗಿದೆ.

ರೈತನ ಜೀವನಾಧಾರೆಯಾಗಿದ್ದ ಹಸು ಮೃತಪಟ್ಟಿದ್ದಕ್ಕೆ ಜಿಗಣಿ ಬೆಸ್ಕಾಂ ಅಧಿಕಾರಿಗಳ ನಿರ್ಲಕ್ಷ್ಯಕ್ಕೆ ಕಾರಣವೆಂದು ಆರೋಪಿಸಿದ್ದಾರೆ. ಒಂದು ಲಕ್ಷಕ್ಕೂ ಬೆಲೆಬಾಳುವ ಹಸುವನ್ನು ಕಳೆದುಕೊಂಡ ರೈತ ಕಂಗಾಲಾಗಿದ್ದಾರೆ. ಬೆಸ್ಕಾಂ ಇಲಾಖೆ ಸೂಕ್ತ ಪರಿಹಾರ ಕಲ್ಪಿಸಿಕೊಡಬೇಕೆಂದು ಕರಗಪ್ಪ ಒತ್ತಾಯಿಸಿದ್ದಾರೆ.

ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ