ಚಹಾ ಮಾಡುವುದೆಂದರೆ ರಾಕೆಟ್‌ ಹಾರಿಸಿದಂತೇನಲ್ಲ, ಸುಲಭದ ಕೆಲಸ. ಮಾಡುವ ರೀತಿಗಳಲ್ಲಿ ಒಬ್ಬರಿಂದೊಬ್ಬರಿಗೆ ಭಿನ್ನತೆ ಇರಬಹುದೇ ಹೊರತು, ಚಹಾವನ್ನು ಪಾಯಸ ಮಾಡಿದಂತೆ ಮಾಡುವುದಕ್ಕಂತೂ ಸಾಧ್ಯವಿಲ್ಲ. ಅಂದರೆ, ಚಹಾ ಡಿಕಾಕ್ಷನ್‌ಗೆ ಹಾಲು ಹಾಕಿದ ಮೇಲೆ ಪಾಯಸದಂತೆ ಕುದಿಸುವವರಿದ್ದಾರೆ; ಡಿಕಾಕ್ಷನ್‌ ಕುದಿಸಿ ಕೊನೆಗೆ ಹಾಲು ಹಾಕುವವರಿದ್ದಾರೆ- ಹೀಗೆ. ದಿನಕ್ಕೊಂದೆರಡು ಬಾರಿ ಚಹಾ ಕುಡಿಯುವುದರಲ್ಲಿ ಸಮಸ್ಯೆಗಳಿಲ್ಲ. ಅದರಲ್ಲೂ ಏಕ್ಕಿ, ಶುಂಠಿ ಮುಂತಾದ ಮಸಾಲೆಗಳನ್ನು ಹಾಕಿ ಚಹಾ ಮಾಡುವುದರಿಂದ ಆರೋಗ್ಯಕ್ಕೆ ಹಲವು ರೀತಿಯಲ್ಲಿ ಲಾಭಗಳಿವೆ. ಆದರೆ ಇದನ್ನು ಮಾಡುವ ಕ್ರಮ ತಪ್ಪಾಗಿದ್ದರೆ, ಆರೋಗ್ಯಕ್ಕೆ ಸಮಸ್ಯೆಗಳು (Tips On Tea) ಎದುರಾಗಬಹುದು.

ಏನು ಹಾಗೆಂದರೆ?

ಒಮ್ಮೆ ಚಹಾ ಸಿದ್ಧಪಡಿಸಿದ ಮೇಲೆ ಅದನ್ನು ಮತ್ತೆ ಮತ್ತೆ ಬಿಸಿ ಮಾಡುವುದು, ಹಾಲು ಹಾಕಿದ ಮೇಲೆ ದೀರ್ಘಕಾಲ ಕುದಿಸುವುದು- ಇಂಥ ಅಭ್ಯಾಸಗಳು ಬಹಳಷ್ಟು ಜನರಿಗೆ ಇರುತ್ತವೆ. ಇಂಥ ಯಾವುದೇ ಅಭ್ಯಾಸಗಳು ಅನಾರೋಗ್ಯಕರ ಪರಿಣಾಮಗಳನ್ನು ಆರೋಗ್ಯದ ಮೇಲೆ ಉಂಟು ಮಾಡಬಹುದು. ಈ ಬಗೆಗಿನ ವಿವರಗಳು ಇಲ್ಲಿವೆ.

ಏಕೆ ಕುದಿಸಬಾರದು?

ಚಹಾದಲ್ಲಿ ಟ್ಯಾನಿನ್‌ ಅಂಶಗಳಿವೆ. ಟ್ಯಾನಿನ್‌ಗಳೆಂದು ಪಾಲಿಫೆನಾಲ್‌ನಂಥ ಜೈವಿಕ ಕಣಗಳು. ಇವು ಹಣ್ಣುಗಳು, ತರಕಾರಿಗಳು, ಬೀಜಗಳು, ವೈನ್‌, ಚಹಾ ಇಂಥವುಗಳು ಕಂಡುಬರುತ್ತವೆ. ಪ್ರೊಟೀನ್‌, ಸೆಲ್ಯುಲೋಸ್‌, ಖನಿಜಗಳ ಜೊತೆಗೆಲ್ಲ ಟ್ಯಾನಿನ್‌ಗಳು ಅಂಟಿಕೊಂಡಿರುತ್ತವೆ. ಚಹಾದಲ್ಲೂ ಈ ಟ್ಯಾನಿನ್‌ಗಳು ಹೇರಳವಾಗಿರುವುದರಿಂದ, ದೀರ್ಘಕಾಲದವರೆಗೆ ಚಹಾ ಕುದಿಸಿದರೆ, ಕಬ್ಬಿಣದಂಶ ಹೀರಿಕೊಳ್ಳುವುದಕ್ಕೆ ದೇಹಕ್ಕೆ ಸಂಕಷ್ಟವನ್ನು ನೀಡುತ್ತವೆ. ಚಹಾವನ್ನು ಅತಿಯಾಗಿ ಕುದಿಸುವುದರಿಂದ ಸತ್ವಗಳು ನಾಶವಾಗಿ, ಹೊಟ್ಟೆಯಲ್ಲಿ ಆಸಿಡಿಟಿಯನ್ನು ಮಾತ್ರವೇ ಆಹ್ವಾನಿಸಿಕೊಂಡಂತಾಗುತ್ತದೆ. ಇದಲ್ಲದೆ, ಚಹಾವನ್ನು ಅತಿಯಾಗಿ ಕುದಿಸುವುದರ ಅಡ್ಡ ಪರಿಣಾಮಗಳು ಇನ್ನೂ ಏನೇನಿವೆ?

ಸತ್ವಗಳ ನಾಶ

ಇಲ್ಲೀಗ ಕೇವಲ ಚಹಾ ಡಿಕಾಕ್ಷನ್‌ ಕುದಿಸುತ್ತಿರುವುದರ ಬಗ್ಗೆಯಲ್ಲ ಹೇಳುತ್ತಿರುವುದು. ಡಿಕಾಕ್ಷನ್‌ಗೆ ಹಾಲು ಹಾಕಿ, ಚಹಾ ಸಿದ್ಧವಾದ ಮೇಲೆ ಕುದಿಸುವುದರ ಬಗೆಗಿನ ಮಾತಿದು. ಹಾಲಿನಲ್ಲಿರುವ ಕ್ಯಾಲ್ಶಿಯಂ, ವಿಟಮಿನ್‌ ಸಿ, ವಿಟಮಿನ್‌ ಬಿ12 ಮುಂತಾದ ಪೋಷಕಾಂಶಗಳು ನಾಶವಾಗಿ ಬಿಡುತ್ತವೆ. ಹಾಗಾಗಿ ಚಹಾ ಅತಿಯಾಗಿ ಕುದಿಸುವುದು ಸಲ್ಲದು.

ರುಚಿಗೆಡುತ್ತದೆ

ಚಹಾವನ್ನು ಅತಿಯಾಗಿ ಕುದಿಸುವುದರಿಂದ ರುಚಿಗೆಟ್ಟಂತಾಗುತ್ತದೆ. ಅದರಲ್ಲೂ ಚಹಾ ರುಚಿಯನ್ನು ಸೂಕ್ಷ್ಮವಾಗಿ ಆಸ್ವಾದಿಸುವವರಿಗಂತೂ ಅರೆಘಳಿಗೆ ಹೆಚ್ಚು ಕುದಿಸಿದರೂ ಇಷ್ಟವಾಗದು. ಹೆಚ್ಚು ಕುದಿಸುವುದರಿಂದ ಸಣ್ಣದೊಂದು ಒಗರು, ಕಹಿ ರುಚಿಗಳು ಚಹಾದಲ್ಲಿ ಸೇರಿಕೊಳ್ಳುತ್ತವೆ. ಮಸಾಲೆ ಚಹಾಗಳಾದರೆ ಅದರ ಘಮವನ್ನೂ ಕೆಡಿಸುವಂತೆ ಕಹಿವಾಸನೆ ಚಹಾದಲ್ಲಿ ಸೇರಿಕೊಳ್ಳುತ್ತದೆ.

ಜೀರ್ಣಾಂಗಗಳ ಸಮಸ್ಯೆ

ಚಹಾ ಅತಿಯಾಗಿ ಕುದಿಸುವುದರಿಂದ ಅದರ ಪಿಎಚ್‌ ಹೆಚ್ಚುತ್ತದೆ. ಇದರಿಂದ ಆಸಿಡಿಟಿಯ ತೊಂದರೆ ಅಂಟಿಕೊಳ್ಳಬಹುದು. ಜೊತೆಗೆ, ಹಾಲಿನಲ್ಲಿರುವ ಪ್ರೊಟೀನ್‌ಗಳ ಸ್ವರೂಪ ವ್ಯತ್ಯಾಸವಾಗುತ್ತದೆ. ಇದರಿಂದ ಜೀರ್ಣವಾಗುವುದು ಕಷ್ಟವಾಗಿ, ಅಜೀರ್ಣ, ಹೊಟ್ಟೆಯುಬ್ಬರ, ಹೊಟ್ಟೆನೋವಿಗೆ ಕಾರಣವಾಗಬಹುದು.

ಹಾನಿಕಾರಕ ಅಂಶಗಳು

ಕೆಫೇನ್‌ ಅಂಶವನ್ನು ಅತಿಯಾಗಿ ಕುದಿಸುವುದರ ಅಡ್ಡ ಪರಿಣಾಮಗಳು ಇದ್ದೇಇವೆ. ಜೊತೆಗೆ, ಹೆಚ್ಚಿನ ಉಷ್ಣತೆಯಲ್ಲಿ ಹಾಲಿನಲ್ಲಿರುವ ಲ್ಯಾಕ್ಟೋಸ್‌ ಅಂಶವು ಚಹಾ ಅಂಶಗಳು ಮತ್ತು ಪ್ರೊಟೀನ್‌ಗಳ ಜೊತೆಗೂಡಿ ಇನ್ನಷ್ಟು ತೊಂದರೆ ನೀಡುತ್ತವೆ. ಹಾಗಾಗಿ ಹೆಚ್ಚಿನ ಪ್ರಮಾಣದಲ್ಲಿ ಚಹಾ ಕುಡಿಯುವುದರಿಂದ ಆರೋಗ್ಯ ಹದಗೆಡಬಹುದು.

ಕಾರ್ಸಿನೋಜೆನ್‌ಗಳು

ಅತಿಯಾಗಿ ಕುದಿಸುವುದು ಅಕ್ರಿಲಮೈಡ್‌ನಂಥ ಕಾರ್ಸಿನೋಜೆನ್‌ಗಳನ್ನು ಸೃಷ್ಟಿ ಮಾಡಬಹುದು. ಆದರೆ ಇದು ಅತಿ ಕಡಿಮೆ ಪ್ರಮಾಣದಲ್ಲಿ ಸೃಷ್ಟಿಯಾಗುವುದರಿಂದ, ಈ ಮೂಲಕ ಕ್ಯಾನ್ಸರ್‌ನಂಥ ರೋಗಗಳು ಬರುವಂಥ ಸಾಧ್ಯತೆ ಅಸಾಧ್ಯ. ಆದರೂ ಹೀಗೊಂದು ಸಾಧ್ಯತೆ ಇರುವುದನ್ನು ತಳ್ಳಿ ಹಾಕುವಂತಿಲ್ಲ.

ಎಷ್ಟು ಕುದಿಸಬೇಕು?

ಹಾಗಾದರೆ ಎಷ್ಟು ಕುದಿಸಬೇಕು? ಹಾಲು ಹಾಕುವ ಮುನ್ನ ಮತ್ತು ಹಾಕಿದ ಮೇಲೆ- ಎಲ್ಲವೂ ಸೇರಿ ಅತಿ ಹೆಚ್ಚೆಂದರೆ 4-5 ನಿಮಿಷಗಳವರೆಗೆ ಕುದಿಸಿದರೆ ಸಾಕು. ಆದರೆ ಎಷ್ಟು ಕಡಿಮೆ ಕುದಿಸಿದರೂ ಅಷ್ಟು ಒಳ್ಳೆಯದು. ತಜ್ಞರ ಪ್ರಕಾರ, ಚಹಾವನ್ನು ಕುದಿಸುವುದಕ್ಕಿಂತ ನಿಧಾನ ವಿಧಾನದಲ್ಲಿ ಬ್ರೂ ಮಾಡುವುದು ಒಳ್ಳೆಯ ವಿಧಾನ. ಏನು ಹಾಗೆಂದರೆ? ಹೇಗೆ ಮಾಡುವುದು ಅದನ್ನು?

ಇದನ್ನೂ ಓದಿ: Drinks for Summer: ಬೇಸಿಗೆಯಲ್ಲಿ ತಂಪಾಗಿರಬೇಕೆ? ಈ ಪೇಯಗಳನ್ನು ತಪ್ಪದೇ ಕುಡಿಯಿರಿ

ಟೀ ಬ್ರೂ ಮಾಡುವುದೆಂದರೆ

ಚಹಾ ಮಾಡುವಾಗ ಅದಕ್ಕೆ ಹಾಲು, ಸಕ್ಕರೆ ಹಾಕಿ ಪಾಯಸದಂತೆ ಕುದಿಸುವದಲ್ಲ. ಬದಲಿಗೆ, ಕುದಿಯುವ ನೀರಿಗೆ ಚಹಾ ಪುಡಿಯನ್ನು ಹಾಕಿ. ಉರಿ ಆರಿಸಿ, ಮುಚ್ಚಿಡಿ. ಐದು ನಿಮಿಷದ ನಂತರ ಅದು ಕುಡಿಯಲು ಸಿದ್ಧವಾಗಿರುತ್ತದೆ. ಒಂದೊಮ್ಮೆ ಹಾಲು ಮತ್ತು ಸಕ್ಕರೆ ಬೇಕೆಂದರೆ, ಅದನ್ನು ಪ್ರತ್ಯೇಕವಾಗಿ ಬಿಸಿ ಮಾಡಿ, ಕಡೆಯ ಹಂತದಲ್ಲಿ ಬೆರೆಸಿಕೊಳ್ಳಿ.

–ಡಾ. ಪದ್ಮಕುಮಾರ್ ಎವಿ, ಹಿರಿಯ ನಿರ್ದೇಶಕರು, ಕ್ರಿಟಿಕಲ್ ಕೇರ್ ಮೆಡಿಸಿನ್ ವಿಭಾಗ, ಫೋರ್ಟಿಸ್ ಆಸ್ಪತ್ರೆ, ಬನ್ನೇರುಘಟ್ಟ ರಸ್ತೆ

ಇನ್ನು ಕೆಲವೇ ದಿನಗಳಲ್ಲಿ ಮಳೆಗಾಲ ಶುರುವಾಗಲಿದ್ದು, ಇದರ ಜೊತೆಗೆ ಸೊಳ್ಳೆಗಳ ಕಾಟವೂ ಹೆಚ್ಚಲಿದೆ. ಹೌದು, ಡೆಂಗ್ಯೂ ಜ್ವರ ಹೆಚ್ಚಳವೂ ಇದೇ ಋತುವಿನಲ್ಲಿ ಆಗುವುದರಿಂದ ಈಗಿನಿಂದಲೇ ಎಚ್ಚರ ವಹಿಸುವುದು ಅತಿ ಅವಶ್ಯಕ. ಜಾಗತಿಕ ಜನಸಂಖ್ಯೆಯ ಸುಮಾರು ಮೂರನೇ ಒಂದು ಭಾಗದಷ್ಟು ಜನರು ಡೆಂಗ್ಯೂಗೆ (Dengue Fever) ಗುರಿಯಾಗುತ್ತಾರೆ. ಡೆಂಗ್ಯೂ ನಿರೋಧಕ ಲಸಿಕೆ ಇನ್ನಷ್ಟೇ ಪ್ರಯೋಗದ ಹಂತದಲ್ಲಿದೆ. ದೇಶದ ವಿವಿಧ ಭಾಗದಲ್ಲಿ ಸೊಳ್ಳೆಯಿಂದ ಉಂಟಾಗುವ ಡೆಂಗ್ಯೂ ಮಾರಣಾಂತಿಕ. ಕೆಲವರ ಜೀವವನ್ನು ಸಹ ಬಲಿಪಡೆದುಬಿಡುತ್ತದೆ. ಅದರಲ್ಲೂ ಗ್ರಾಮೀಣ ಭಾಗದಲ್ಲಿ ಈ ಬಗ್ಗೆ ಜಾಗೃತಿ ಇಲ್ಲದ ಕಾರಣ, ಹೆಚ್ಚು ನಿರ್ಲಕ್ಷ್ಯಕ್ಕೆ ಒಳಗಾಗಿ ಡೆಂಗ್ಯೂಗೆ ಬಲಿಯಾಗುತ್ತಾರೆ. ಡೆಂಗ್ಯೂನಲ್ಲಿ ಪ್ರಮುಖವಾಗಿ ಸ್ಪೆಕ್ಟ್ರಮ್ ಡೆಂಗ್ಯೂನಿಂದ ಎಚ್ಚರಿಕೆ ವಹಿಸುವುದು ಅವಶ್ಯಕ. ಕಡಿಮೆ ತೀವ್ರತೆ, ಮಧ್ಯಮ ಹಾಗೂ ಅತಿ ಹೆಚ್ಚು ತೀವ್ರತೆಯ ಡೆಂಗ್ಯೂ ಹರಡುತ್ತದೆ. ಕಡಿಮೆ ಲಕ್ಷಣವಿರುವ ಡೆಂಗ್ಯೂ ಬಂದರೆ ಕೆಲವೇ ದಿನಗಳಲ್ಲಿ ಜ್ವರದ ಬಳಿಕ ಕಡಿಮೆಯಾಗಲಿದೆ. ಮಧ್ಯಮದ ತೀವ್ರತೆಯ ಡೆಂಗ್ಯೂ ಸಹ, ಆಸ್ಪತ್ರೆಯಲ್ಲಿ ವೈದ್ಯರ ಚಿಕಿತ್ಸೆಯಿಂದ ಗುಣವಾಗಲಿದೆ. ಆದರೆ, ಅತಿಹೆಚ್ಚು ತೀವ್ರತೆಯ ಲಕ್ಷಣ ಹೊಂದಿರುವ ಡೆಂಗ್ಯೂ ಮನುಷ್ಯನನ್ನೇ ಬಲಿ ತೆಗೆದುಕೊಳ್ಳಬಹುದು. ದೇಹದಲ್ಲಿನ ಬಿಳಿರಕ್ತಕಣವನ್ನು ಕಡಿಮೆಗೊಳಿಸಿ ಮನುಷ್ಯರನ್ನು ಅಸ್ವಸ್ಥಗೊಳಿಸುತ್ತದೆ, ಇದಕ್ಕೆ ಸೂಕ್ತ ಸಮಯದಲ್ಲಿ ಸೂಕ್ತ ಚಿಕಿತ್ಸೆ ಪಡೆಯದೇ ಹೋದರೆ (Dengue Fever) ಬದುಕುವುದು ಕಷ್ಟ.

ಲಸಿಕೆಗಳು

ಡೆಂಗ್ಯೂ ನಿಯಂತ್ರಣಕ್ಕೆ ಲಸಿಕೆ ತರಲು ಸಾಕಷ್ಟು ಪ್ರಯತ್ನಗಳು ನಡೆಯುತ್ತಿವೆ, ಇದನ್ನು ಪಡೆದುಕೊಳ್ಳಲು ಪರ ವಿರೊಧ ಚರ್ಚೆಗಳು ನಡೆಯುತ್ತಿವೆ. ಅದರಲ್ಲೂ ಸನೋಫಿ ಗ್ಲೋಬಲ್‌ ಹೆಲ್ತ್‌ಕೇರ್‌ ಅಭಿವೃದ್ಧಿಪಡಿಸಿ, ಪರವಾನಗಿ ಪಡೆದ “ಡೆಂಗ್‌ವಾಕ್ಸಿಯಾ” ಎಂಬ ಲಸಿಕೆಯು ಸಹ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.

ಇದನ್ನೂ ಓದಿ: Mouth Sleeping: ನಿದ್ದೆಯಲ್ಲಿದ್ದಾಗ ಬಾಯಿಯಿಂದ ಉಸಿರಾಡುತ್ತೀರಾ? ಹಾಗಾದರೆ ಮುಂದೆ ಸಮಸ್ಯೆಯಾಗಬಹುದು!

ಆಶಾದಾಯಕ ಬೆಳವಣಿಗೆಗಳು

ಡೆಂಗ್‌ವಾಕ್ಸಿಯಾದ ಹಿನ್ನಡೆಯ ಹೊರತಾಗಿಯೂ, ಭಾರತದಲ್ಲಿ ಡೆಂಗ್ಯೂ ಲಸಿಕೆ ಅಭಿವೃದ್ಧಿಯ ದಿಗಂತದಲ್ಲಿ ಭರವಸೆಯ ಬೆಳವಣಿಗೆಗಳಿವೆ. ಕನಿಷ್ಠ ಎರಡು ಸ್ಥಳೀಯ ಡೆಂಗ್ಯೂ ಲಸಿಕೆ ಅಭಿವೃದ್ಧಿಪಡಿಸಲು ಸಂಶೋಧನಾ ಸಂಸ್ಥೆಗಳ ನೇತೃತ್ವದಲ್ಲಿ ಸ್ಥಳೀಯ ಪ್ರಯತ್ನಗಳು ಸಕ್ರಿಯವಾಗಿ ನಡೆಯುತ್ತಿವೆ. ಹೆಚ್ಚುವರಿಯಾಗಿ, ಡೆಂಗ್ಯೂ ವಿರುದ್ಧ ಹೋರಾಡಲು ಸುರಕ್ಷಿತ ಮತ್ತು ಪರಿಣಾಮಕಾರಿ ಪರಿಹಾರವನ್ನು ಕಂಡುಹಿಡಿಯುವ ಬದ್ಧತೆಯನ್ನು ಪ್ರದರ್ಶಿಸುವ ಲೈವ್-ಅಟೆನ್ಯೂಯೇಟೆಡ್ ಟೆಟ್ರಾವೆಲೆಂಟ್ ಲಸಿಕೆಯಂತಹ ಭರವಸೆಗೆ ಭಾರತವು ಅಂತರರಾಷ್ಟ್ರೀಯ ಪ್ರಯೋಗಗಳಲ್ಲಿ ಸಹಕರಿಸುತ್ತಿದೆ. ಹೀಗಾಗಿ ಭಾರತದಲ್ಲಿ ಡೆಂಗ್ಯೂ ಲಸಿಕೆ ಅಭಿವೃದ್ಧಿ ಪಡಿಸುವ ಕಾರ್ಯ ಭರದಿಂದ ಸಾಗಿದ್ದು, ಭವಿಷ್ಯದಲ್ಲಿ ಲಸಿಕೆ ಸಿಗಲಿದೆ ಎಂಬ ಭರವಸೆ ಇದೆ, ಒಂದು ವೇಳೆ ಡೆಂಗ್ಯೂ ಲಸಿಕೆ ಜನರಿಗೆ ಸಿಕ್ಕರೆ, ಸಾಕಷ್ಟು ಸಾವು ನೋವುಗಳನ್ನು ತಡೆಯಬಹುದು.

ಹೀಗೊಂದು ಸನ್ನಿವೇಶವನ್ನು (Mouth Sleeping) ಊಹಿಸಿಕೊಳ್ಳಿ- ನಿಮಗೆ ಸಖತ್‌ ನೆಗಡಿಯಾಗಿದೆ. ಮೂಗೆಲ್ಲ ಕಟ್ಟಿ ಉಸಿರಾಡಲು ಸಾಧ್ಯವಾಗುತ್ತಿಲ್ಲ. ಮಲಗಿದಾಗ ಈ ಸಮಸ್ಯೆ ಇನ್ನೂ ಹೆಚ್ಚು ಬಾಧಿಸುತ್ತಿದೆ. ಇಂಥ ಹೊತ್ತಿನಲ್ಲಿ ಬಾಯಲ್ಲಿ ಉಸಿರಾಡುವುದೊಂದೇ ಮಾರ್ಗ. ಆದರೆ ನೆಗಡಿ ಕಡಿಮೆಯಾದ ನಂತರ ಮರಳಿ, ಮೂಗಲ್ಲೇ ಉಸಿರಾಟ ಆರಂಭಿಸುತ್ತೀರಿ. ಹಾಗಲ್ಲದೆ, ಮಲಗಿದಾಗೆಲ್ಲ ಮೂಗಿನಲ್ಲಲ್ಲದೆ, ಬಾಯಲ್ಲೇ ಉಸಿರಾಡುತ್ತೀರಾ? ನೆಗಡಿ ಇಲ್ಲದಿದ್ದರೂ ನಿಮ್ಮ ಉಸಿರಾಟ ಬಾಯಲ್ಲೇ ನಡೆಯುತ್ತದೆಯೇ? ಹಾಗಾದರೆ ಇದರಿಂದ ಆರೋಗ್ಯದ ಮೇಲೆ ಅಡ್ಡ ಪರಿಣಾಮಗಳು ಉಂಟಾಗಬಹುದು. ಅತಿಯಾಗಿ ವ್ಯಾಯಾಮ ಮಾಡುವಾಗ, ಜೋರಾಗಿ ಓಡುವಾಗ ಅಥವಾ ನಡೆಯುವಾಗಲೂ ನಾವು ಬಾಯಲ್ಲಿ ಉಸಿರಾಡುತ್ತೇವೆ. ಇದರಿಂದ ದೇಹಕ್ಕೆ ಬೇಕಾದ ಆಮ್ಲಜನಕವನ್ನು ಬೇಗನೇ ಒದಗಿಸುವುದಕ್ಕೆ ಸಾಧ್ಯ. ಆದರೆ ಮಲಗಿದಾಗ, ನಿದ್ದೆಯಲ್ಲಿ ಬಾಯಲ್ಲಿ ಉಸಿರಾಡುವುದು ಸಮಸ್ಯೆಗೆ ಕಾರಣವಾಗಬಹುದು ಎನ್ನುತ್ತಾರೆ ಆರೋಗ್ಯ ತಜ್ಞರು. ಆದರೆ ನಿದ್ದೆ ಮಾಡುತ್ತಿರುವವರಿಗೆ ಅವರು ಹೇಗೆ ಉಸಿರಾಡುತ್ತಿದ್ದಾರೆ ಎಂಬುದು ತಿಳಿಯುವುದಾದರೂ ಹೇಗೆ?

ತಿಳಿಯಬಹುದು

ನಿದ್ದೆ ಮಾಡುವಾಗ ತಿಳಿಯದಿದ್ದರೂ, ನಿದ್ದೆಯಿಂದ ಎದ್ದಾಗ ತಿಳಿಯುವುದಕ್ಕೆ ದಾರಿಗಳಿವೆ. ಬೆಳಗ್ಗೆ ಎದ್ದಾಗ ಬಾಯೆಲ್ಲ ಒಣಗಿದಂತಿದ್ದರೆ, ಬಾಯಲ್ಲಿ ದುರ್ಗಂಧ ಅತಿಯಾಗಿದ್ದರೆ, ಧ್ವನಿ ಒರಟಾಗಿದ್ದರೆ, ಏಳುವಾಗ ಅತಿಯಾದ ಸುಸ್ತು ಅಥವಾ ಕಿರಿಕಿರಿ ಎನಿಸುತ್ತಿದ್ದರೆ, ಕಣ್ಣಿನ ಕೆಳಗೆ ಕಪ್ಪು ವರ್ತುಲಗಳು ಕಾಣುತ್ತಿದ್ದರೆ, ಎದ್ದಾಗ ಬುದ್ಧಿಯಲ್ಲಿ ಸ್ಪಷ್ಟತೆಯ ಬದಲು ಗೊಂದಲ ಇದ್ದರೆ- ಮಲಗಿದಾಗ ಬಾಯಲ್ಲಿ ಉಸಿರಾಡಿರುವ ಸಾಧ್ಯತೆಗಳು ಅಧಿಕ.

ಯಾಕೆ ಹೀಗೆ?

ಮೂಗಿನಲ್ಲಿ ಸರಾಗ ಉಸಿರಾಡುವುದಕ್ಕೆ ಯಾವುದೇ ಸಮಸ್ಯೆ ಎದುರಾದರೂ, ತಕ್ಷಣಕ್ಕೆ ಬಾಯಲ್ಲಿ ಉಸಿರಾಡುವುದು ದೇಹಧರ್ಮ. ಮೂಗು ಕಟ್ಟಿದ್ದರೆ, ಕಫ ಬಿಗಿದಿದ್ದರೆ, ಟಾನ್ಸಿಲ್‌ ಸಮಸ್ಯೆಯಿದ್ದರೆ, ಶ್ವಾಸನಾಳದಲ್ಲಿ ಎಲ್ಲಾದರೂ ಪಾಲಿಪ್‌ಗಳಿದ್ದರೆ, ಅತಿಯಾದ ಸುಸ್ತು, ಒತ್ತಡದಿಂದ ಬಳಲುತ್ತಿದ್ದರೆ- ಹೀಗೆ ಮೂಗಿನ ಬದಲು ಬಾಯಲ್ಲಿ ಉಸಿರಾಡುವುದಕ್ಕೆ ಹಲವಾರು ಕಾರಣಗಳು ಇರಬಹುದು.

ಏನಾಗುತ್ತದೆ?

ನಿದ್ದೆ ಮಾಡುವಾಗ ಹೀಗೆ ಬಾಯಲ್ಲಿ ಉಸಿರಾಡಿದರೆ ಆಗುವ ಸಮಸ್ಯೆಯೇನು? ಹೇಗೋ ಒಂದು- ಉಸಿರಾಡುವುದು ಮುಖ್ಯವಲ್ಲವೇ? ಉಸಿರಾಡುವುದು ಮುಖ್ಯ ಎಂಬುದು ಹೌದಾದರೂ, ಹೇಗೋ ಒಂದು ಎಂಬುದು ಸರಿಯಲ್ಲ. ಇದರಿಂದ ಬಾಯಿಯಲ್ಲಿರುವ ಬ್ಯಾಕ್ಟೀರಿಯಗಳ ಸಂಖ್ಯೆ ತ್ವರಿತವಾಗಿ ದ್ವಿಗುಣಗೊಳ್ಳುತ್ತದೆ. ಜೊತೆಗೆ ಇನ್ನಷ್ಟು ಸಮಸ್ಯೆಗಳು ಗಂಟಿಕ್ಕಿಕೊಳ್ಳುತ್ತವೆ.

• ಹ್ಯಾಲಿಟೋಸಿಸ್‌ ಅಥವಾ ಬಾಯಿಯ ದುರ್ಗಂಧದ ಸಮಸ್ಯೆ ಎದುರಾಗುತ್ತದೆ. ಕಾರಣ, ಬಾಯಿಯಲ್ಲಿರುವ ಬ್ಯಾಕ್ಟೀರಿಯಗಳು ಅಧಿಕವಾಗುತ್ತವೆ.
• ಹಲ್ಲಿನ ಸಮಸ್ಯೆಗಳು ಸಹ ಹೆಚ್ಚುತ್ತವೆ. ಒಸಡುಗಳಿಗೆ ಸೋಂಕು ಉಂಟಾಗಬಹುದು. ಹಲ್ಲಿನ ಹುಳುಕು ಕಾಡಬಹುದು.
  ಗಂಟಲು ಮತ್ತು ಕಿವಿಯ ಸೋಂಕು ಪದೇಪದೆ ಕಾಡಬಹುದು. ಮಕ್ಕಳಲ್ಲಿ ಈ ಸಮಸ್ಯೆ ಇದ್ದರೆ, ಅದರ ಪ್ರಮಾಣ ಹೆಚ್ಚಬಹುದು.
• ಬಾಯಲ್ಲಿ ಉಸಿರಾಡುವುದರಿಂದ ರಕ್ತದಲ್ಲಿನ ಆಮ್ಲಜನಕದ ಮಟ್ಟ ಕುಸಿಯುವ ಸಂಭವವಿದೆ. ಇದರಿಂದ ಶ್ವಾಸಕೋಶಗಳ ಕ್ಷಮತೆಯೂ ಕಡಿಮೆಯಾಗಬಹುದು. ಅಲರ್ಜಿ, ಅಸ್ತಮಾದಂಥ ತೊಂದರೆಗಳಲ್ಲಿ ಇದು ಹೆಚ್ಚಿನ ಉಪಟಳ ನೀಡುತ್ತದೆ.
• ಮಕ್ಕಳಲ್ಲಿ ಮುಖದ ಆಕಾರ ಬದಲಾಗುವುದು, ಒಸಡುಗಳ ಆಕೃತಿ ಬದಲಾಗುವುದು, ಹಲ್ಲುಗಳು ಒತ್ತೊತ್ತಾಗಿ ಮೂಡುವುದು ಮುಂತಾದ ತೊಂದರೆಗಳು ಕಾಣಬಹುದು.

ಇದನ್ನೂ ಓದಿ: Jackfruit Seed: ಹಲಸಿನ ಹಣ್ಣು ತಿಂದು ಬೀಜ ಎಸೆಯದಿರಿ; ಬೀಜದಿಂದಾಗುವ ಆರೋಗ್ಯ ಲಾಭಗಳು ಹಲವು!

ಪರಿಹಾರ ಏನು?

ತಲೆಯನ್ನು ಕೊಂಚ ಎತ್ತರಿಸಿ ಮಲಗುವುದರಿಂದ ಶ್ವಾಸನಾಳಗಳು ತೆರೆದುಕೊಂಡು, ಮೂಗಲ್ಲಿ ಉಸಿರಾಡುವುದು ಸುಲಭವಾಗುತ್ತದೆ. ಮೂಗು ಕಟ್ಟಿದಾಗ ಸಲೈನ್‌ ಸ್ಪ್ರೇಗಳನ್ನು ಉಪಯೋಗಿಸುವುದರಿಂದ ಉಸಿರಾಟ ಸುಲಭವಾಗಬಹುದು. ಮನೆಯ ವಾತಾವರಣವನ್ನು ಶುಚಿಯಾಗಿ ಇರಿಸಿಕೊಳ್ಳುವುದರಿಂದ ಅಲರ್ಜಿಯನ್ನು ಮಟ್ಟ ಹಾಕಲು ಸಾಧ್ಯ. ಯೋಗ, ಪ್ರಾಣಾಯಾಮಗಳು ಶ್ವಾಸಕೋಶದ ಬಲವರ್ಧನೆ ಮಾಡಿ, ಮೂಗಿನ ಉಸಿರಾಟವನ್ನು ಸುಲಭ ಮಾಡುತ್ತವೆ.

ಮೆದುಳಿನ ಸುತ್ತಲಿನ ಕೋಶಗಳ ಅಸಹಜ ಬೆಳವಣಿಗೆಯನ್ನು ಟ್ಯೂಮರ್‌ ಎಂದು ಕರೆಯಲಾಗುತ್ತದೆ. ಈ ಸಮಸ್ಯೆಯನ್ನು ಎದುರಿಸುವವರು ಬಹಳಷ್ಟು ಆರೋಗ್ಯದ ಸಮಸ್ಯೆಗಳಿಗೂ ತುತ್ತಾಗುವಂತಾಗುತ್ತದೆ. ಹಲವಾರು ಪ್ರಕರಣಗಳಲ್ಲಿ ಶರೀರದ ಅಂಗಾಂಗಗಳ ಕ್ಷಮತೆಯೂ ಕುಸಿಯುವಂತಾಗುತ್ತದೆ. ಮಕ್ಕಳಲ್ಲಿ ಇಂಥ ಪ್ರಕರಣಗಳು ಎದುರಾದಾಗ, ವಯಸ್ಕರಲ್ಲಿ ಕಾಣುವ ಲಕ್ಷಣಗಳು ಮತ್ತು ಚಿಕಿತ್ಸೆಗೆ ಸ್ಪಂದಿಸುವ ರೀತಿ ಭಿನ್ನವಾಗಿಯೇ ಇರುತ್ತದೆ. ಮೆದುಳಿನ ಯಾವ ಭಾಗದಲ್ಲಿ ಟ್ಯೂಮರ್‌ ಕಾಣಿಸಿಕೊಂಡಿದೆ, ಗಡ್ಡೆ ಎಷ್ಟು ದೊಡ್ಡದಿದೆ ಮುಂತಾದವುಗಳ ಮೇಲೆ ಗೋಚರಿಸುವ ಲಕ್ಷಣಗಳು ವ್ಯತ್ಯಾಸವಾಗುತ್ತವೆ. ಇತ್ತೀಚಿನ ವರ್ಷಗಳಲ್ಲಿ ಮಕ್ಕಳಲ್ಲಿ ಮೆದುಳಿನ ಗಡ್ಡೆಯ ಪ್ರಕರಣಗಳು ವಿಶ್ವದೆಲ್ಲೆಡೆ ಹೆಚ್ಚುತ್ತಿದ್ದು, ಆತಂಕ ಮೂಡಿಸುತ್ತಿದೆ. ಈ ಹಿನ್ನೆಲೆಯಲ್ಲಿ ಟ್ಯೂಮರ್‌ ಇರುವಾಗಿನ ಕೆಲವು ಲಕ್ಷಣಗಳನ್ನು ಗುರುತಿಸಿ ಜಾಗ್ರತೆ ಮಾಡುವುದಕ್ಕೆ ಬೇಕಾಗಿ, ಒಂದಿಷ್ಟು (Brain Tumour In Kids) ವಿವರಗಳು ಇಲ್ಲಿವೆ.

ತಲೆನೋವು

ಇದರರ್ಥ ತಲೆ ನೋವು ಬಂದಾಗಲೆಲ್ಲ ಮೆದುಳಿನಲ್ಲಿ ಗಡ್ಡೆಯಿದೆ ಎಂದಲ್ಲ. ತಲೆನೋವು ತರಹೇವಾರಿ ಕಾರಣಗಳಿಗೆ ಬರಬಹುದು. ಆದರೆ ಟ್ಯೂಮರ್‌ ಇರುವಂಥ ಸಂದರ್ಭದಲ್ಲಿ ತಲೆನೋವಿಗೊಂದು ಪ್ರತ್ಯೇಕ ಸ್ವರೂಪವಿರುತ್ತದೆ. ಮೈಗ್ರೇನ್‌, ಆಸಿಡಿಟಿ ಮುಂತಾದ ಸಂದರ್ಭಗಳಲ್ಲಿ ಬರುವ ತಲೆನೋವಿಗಿಂತ ಇದು ಬೇರೆಯಾಗಿರುತ್ತದೆ. ಅಂದರೆ, ಬೆಳಗ್ಗೆ ಏಳುತ್ತಿದ್ದಂತೆ ತಲೆನೋವು ಪ್ರಾರಂಭವಾಗುವುದು, ರಾತ್ರಿ ಮಲಗಿದಾಗ ತಲೆನೋವು ಹೆಚ್ಚುವುದು- ಇಂಥ ಲಕ್ಷಣಗಳು ಗೋಚರಿಸಿದರೆ, ವೈದ್ಯರಲ್ಲಿ ಹೋಗಲೇಬೇಕು.

ದೃಷ್ಟಿ ಮಂದವಾಗುವುದು

ಹಲವು ರೀತಿಯ ಟ್ಯೂಮರ್‌ಗಳು ದೃಷ್ಟಿಯನ್ನು ಮಂದವಾಗಿಸುತ್ತವೆ. ಗೆಜೆಟ್‌ಗಳ ಭರಾಟೆಯಲ್ಲಿ ಮಕ್ಕಳ ದೃಷ್ಟಿ ಕ್ಷೀಣಿಸುವುದು ಅಸಹಜ ಅಲ್ಲ ಎನ್ನುವುದು ಹೌದಾದರೂ, ನೇತ್ರ ತಜ್ಞರಲ್ಲಿ ಸಮಾಲೋಚನೆ ಅಗತ್ಯವಿದೆ. ಬೆಳಕಿಗೆ ಕಣ್ಣು ಬಿಡಲಾಗದಿರುವುದು, ಯಾವುದನ್ನೂ ಕೇಂದ್ರೀಕರಿಸಲು ದೃಷ್ಟಿ ಸಹಕರಿಸದಿರುವುದು- ಇವೆಲ್ಲ ಟ್ಯೂಮರ್‌ನಿಂದಾಗಿ ದೃಷ್ಟಿ ನರದ ಮೇಲೆ ಬೀಳುತ್ತಿರುವ ಒತ್ತಡದ ಲಕ್ಷಣಗಳಾಗಿರಬಹುದು.

ವಾಂತಿ, ಹೊಟ್ಟೆ ತೊಳೆಸುವುದು

ಫ್ಲೂ ಮಾದರಿಯ ಲಕ್ಷಣಗಳ ಜೊತೆಗೆ ಅತೀವ ತಲೆನೋವಿದೆ ಎಂದರೆ- ಎಚ್ಚರ ಅಗತ್ಯ. ಸಿಕ್ಕಾಪಟ್ಟೆ ಹೊಟ್ಟೆ ತೊಳೆಸುವುದು, ವಾಂತಿ ಕಂಡುಬರಬಹುದು. ಮೆದುಳಿನ ಒಂದು ನಿಗದಿತ ಜಾಗದಲ್ಲಿ ಟ್ಯೂಮರ್‌ ಬೆಳೆದು ದೊಡ್ಡದಾಗುತ್ತಿದ್ದರೆ ಇಂಥ ಲಕ್ಷಣಗಳು ಕಾಣುವುದು ಸಾಮಾನ್ಯ.

ಕಿವಿ ಕೇಳದಿರುವುದು

ಅತಿಯಾಗಿ ಇಯರ್‌ಫೋನ್‌ ಬಳಕೆಯ ಪ್ರಭಾವ ಎಂದು ಭಾವಿಸಿ, ಕಿವಿ ಕೇಳದ ಸಮಸ್ಯೆಯನ್ನು ನಿರ್ಲಕ್ಷಿಸುವ ಸಾಧ್ಯತೆ ಇಲ್ಲದಿಲ್ಲ. ಆದರೆ ಶ್ರವಣ ನರಗಳ ಮೇಲಿನ ಅತೀವ ಒತ್ತಡದಿಂದ ತೀವ್ರ ಕಿವಿನೋವು, ಕಿವಿ ಕೇಳುವುದು ಕಡಿಮೆಯಾದಂತೆ ಅನಿಸುವುದು ಸಾಮಾನ್ಯ. ಒಳಗಿವಿಯಿಂದ ಮೆದುಳಿಗೆ ಸಂದೇಶ ರವಾನಿಸುವ ಈ ನರಗಳು ಶ್ರವಣ ಸಾಮರ್ಥ್ಯ ಸರಿಯಾಗಿರಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ. ಇಂಥ ಸಂದರ್ಭದಲ್ಲೂ ಮೆದುಳಿನ ಟ್ಯೂಮರ್‌ ಇಲ್ಲ ಎಂಬುದನ್ನು ವೈದ್ಯರಿಂದ ಖಾತ್ರಿ ಪಡಿಸಿಕೊಳ್ಳಬೇಕು.

ಇದನ್ನೂ ಓದಿ: Balancing Hormones Naturally: ಹಾರ್ಮೋನು ಸಮತೋಲನಕ್ಕೆ ಬೇಕು ಇಂಥ ಆಹಾರಗಳು

ಅಪಸ್ಮಾರ

ಇದು ಸಹ ಅತ್ಯಂತ ಸಾಮಾನ್ಯವಾದ ಲಕ್ಷಣ. ಮೆದುಳಿನ ಟ್ಯೂಮರ್‌ ಇರುವವರಲ್ಲಿ ಶೇ. 40ರಷ್ಟು ಜನರಿಗೆ ಒಮ್ಮೆಯಾದರೂ ಅಪಸ್ಮಾರ ಕಾಣುವುದು ಸಹಜ ಎನ್ನುತ್ತಾರೆ ನರರೋಗ ತಜ್ಞರು. ಕೆಲವೊಮ್ಮೆ ಇದನ್ನು ಟ್ಯೂಮರ್‌ನ ಪ್ರಾಥಮಿಕ ಲಕ್ಷಣವೆಂದು ಗ್ರಹಿಸಲಾಗುತ್ತದೆ. ಹಾಗಾಗಿ ಈ ಬಗ್ಗೆ ನರರೋಗ ತಜ್ಞರಲ್ಲಿ ಸಮಾಲೋಚನೆ ಅಗತ್ಯ.
ಇಂಥ ಯಾವುದೇ ಸೂಚನೆಗಳು ಕಂಡುಬಂದಲ್ಲಿ ವೈದ್ಯರಲ್ಲಿ ತುರ್ತು ಸಮಾಲೋಚನೆ ಅಗತ್ಯ. ಇದಕ್ಕೆ ಹಲವಾರು ಸುತ್ತಿನ ಪರೀಕ್ಷೆಗಳನ್ನು ಮಾಡಿಸಲಾಗುತ್ತದೆ. ಸ್ಕ್ಯಾನಿಂಗ್‌ನಿಂದ ಹಿಡಿದು ಬಯಾಪ್ಸಿಯವರೆಗೂ ಪರೀಕ್ಷೆಗಳ ಅಗತ್ಯ ಬರಬಹುದು. ಆದರೆ ಆರಂಭಿಕ ಹಂತದಲ್ಲಿ ಈ ರೋಗ ಪತ್ತೆಯಾದರೆ ಶರೀರಕ್ಕೆ ಹೆಚ್ಚಿನ ಹಾನಿಯಾಗದಂತೆ ಚಿಕಿತ್ಸೆ ನೀಡುವ ಸಾಧ್ಯತೆ ಹೆಚ್ಚುತ್ತದೆ.