ಕೇರಳಂನಲ್ಲಿ ಹತ್ತು ವರ್ಷಗಳ ನಂತರ ಕಾಂಗ್ರೆಸ್‌ ನೇತೃತ್ವದ ಯುಡಿಎಫ್‌ ಭರ್ಜರಿ ಬಹುಮತ ಪಡೆದಿದೆ. ಕರ್ನಾಟಕ, ತೆಲಂಗಾಣ ನಂತರ ಕೇರಳಂನಲ್ಲೂ ಕಾಂಗ್ರೆಸ್‌ ಅಧಿಕಾರಕ್ಕೆ ಬಂದಿದೆ. ದಶಕದ ಆಡಳಿತದ ನಂತರ ಎಲ್‌ಡಿಎಫ್‌ ಅಧಿಕಾರ ಕಳೆದು ಕೊಂಡಿದೆ.
ಕಾಂಗ್ರೆಸ್‌ ಕೇರಳ ಜಯಭೇರಿಗೆ ಸಪ್ತ ಕಾರಣಗಳು
1. ಕಾಂಗ್ರೆಸ್‌ನಲ್ಲಿ ಒಗ್ಗಟ್ಟು:
ಸ್ಥಳೀಯ ಸಂಸ್ಥೆಗಳಲ್ಲಿ ಕಾಂಗ್ರೆಸ್‌ ಗೆದ್ದಾಗಲೇ, ಅಸೆಂಬ್ಲಿಯ ಚುನಾವಣೆ ದಿಕ್ಸೂಚಿ ಸ್ಪಷ್ಟವಾಗಿತ್ತು. ಗೆಲ್ಲಲೇ ಬೇಕೆಂಬ ಹಠಕ್ಕೆ ಬಿದ್ದ ಕಾಂಗ್ರೆಸ್‌, ಮೊದಲು ಪಕ್ಷದಲ್ಲಿ ಇದ್ದ ಭಿನ್ನಮತ ಬಗೆಹರಿಸಿತು. ಎಲ್ಲಾ ನಾಯಕರನ್ನು ಮಾತುಕತೆ ಮೂಲಕ ಮನವೊಲಿಸಿ ಅಭೂತಪೂರ್ವ ಒಗ್ಗಟ್ಟು ಪ್ರದರ್ಶಿಸಿತು. ಇದು ಗೆಲುವಿಗೆ ಮೂಲ ಕಾರಣ
2. ಟಿಕೆಟ್‌ ನೀಡುವಲ್ಲಿ ಸ್ಪಷ್ಟತೆ:
ಟಿಕೆಟ್‌ ಗೊಂದಲ ತಪ್ಪಿಸಲು ಕಾಂಗ್ರೆಸ್‌ ಹೈಕಮಾಂಡ್‌, ಕೇರಳಕ್ಕೆ ಮದುಸೂಧನ್‌ ಮಿಸ್ತ್ರಿ ಅವರನ್ನು ರವಾನಿಸಿತ್ತು. ಹಾಲಿ ಸಂಸದರಿಗೆ ಟಿಕೆಟ್‌ ನೀಡಲೇ ಇಲ್ಲ. ಪ್ರಬಲ ಅಭ್ಯರ್ಥಿಗಳಿಗೆ ಮೊದಲು ಮಣೆ ಹಾಕಿತು. ಕೇರಳ ಕಾಂಗ್ರೆಸ್‌ನಲ್ಲಿ ಟಿಕೆಟ್‌ ಗೊಂದಲ ಉಂಟಾಗದಂತೆ ನೋಡಿಕೊಳ್ಳಲಾಯಿತು.
3. ಶಿಸ್ತಿನ ಪಕ್ಷವಾಗಿ ರೂಪುಗೊಂಡಿದ್ದು :
ಚುನಾವಣೆಗೆ ಕೆಲವೇ ತಿಂಗಳು ಮೊದಲು ಕಾಂಗ್ರೆಸ್‌ನಲ್ಲಿ ಅದ್ಭುತ ಬದಲಾವಣೆ ಉಂಟಾಗಿತ್ತು. ಪರಸ್ಪರ ಕಿತ್ತಾಡುತ್ತಿದ್ದ ನಾಯಕರು ಒಂದಾಗಿದ್ದರು. ಪಕ್ಷದ ಇಮೇಜ್‌ ಸಂಪೂರ್ಣವಾಗಿ ಬದಲಾಗಿತ್ತು. ಕಾಂಗ್ರೆಸ್‌ ಘಟಕ ಸಂಪೂರ್ಣ ಸಂಯೋಜಿತ ತಂಡವಾಗಿ ಮಾರ್ಪಾಡಾಗಿತ್ತು. ಈ ರಣತಂತ್ರ ರೂಪಿಸಿದ್ದು ಪಕ್ಷದ ಉಸ್ತುವಾರಿ ದೀಪ್‌ ದಾಸ್‌ ಮುನ್ಶಿ.
4. ಯುವ, ಹೊಸ ಮುಖಗಳಿಗೆ ಮಣೆ:
ಎಲ್‌ಡಿಎಫ್‌ ಶಾಸಕರ ದೌರ್ಬಲ್ಯಗಳನ್ನು ಕಾಂಗ್ರೆಸ್‌ ಚೆನ್ನಾಗಿ ಅಧ್ಯಯನ ಮಾಡಿತ್ತು. ಹಾಗಾಗಿ, ಶಾಸಕರ ವಿರೋಧಿ ಅಲೆ ಹೆಚ್ಚಿರುವ ಕಡೆ ಯುವ ಹಾಗೂ ಹೊಸ ಮುಖಗಳಿಗೆ ಮಣೆ ಹಾಕಿತ್ತು. ಹಾಗಾಗಿ, ಬದಲಾವಣೆ ಬಯಸುವ ಮತದಾರ ಹೊಸ ನಾಯಕತ್ವಕ್ಕೆ ಮತಹಾಕಿದ್ದ. ಯುವಕರಿಗೆ ಮಣೆ ಹಾಕುವ ರಣತಂತ್ರ ಫಲ ನೀಡಿತ್ತು.
5. ಆಡಳಿತ ವಿರೋಧಿ ಅಲೆ:
ಪಿಣರಾಯಿ ಸರ್ಕಾರದ ಲೋಪದೋಷಗಳನ್ನು ಕಾಂಗ್ರೆಸ್‌ ಯಶಸ್ವಿಯಾಗಿಯೇ ಎಕ್ಸ್‌ಪೋಸ್‌ ಮಾಡಿತ್ತು. ಅಲ್ಲದೇ, ಹತ್ತು ವರ್ಷಗಳ ಆಡಳಿತದ ಕಾರಣ ಸಹಜವಾಗಿಯೇ ಆಡಳಿತ ವಿರೋಧಿ ಅಲೆ ದಟ್ಟವಾಗಿತ್ತು. ಆ ಅಲೆಯ ಮೇಲೆ ಸವಾರಿ ಮಾಡಿದ್ದ ಕಾಂಗ್ರೆಸ್‌ ಗೆಲುವಿನ ದಡ ಸೇರಿತ್ತು.
6. ಪವರ್‌ಫುಲ್‌ ಪ್ರಚಾರ:
ಪ್ರಚಾರದಲ್ಲಿ ಕೂಡಾ ಕಾಂಗ್ರೆಸ್‌ ಹಿಂದೆ ಬೀಳಲಿಲ್ಲ. ಗ್ಯಾರಂಟಿ ಯೋಜನೆಗಳು ಮುನ್ನೆಲೆಗೆ ಬಂತು. ರಾಹುಲ್‌ ಗಾಂಧಿ ಖುದ್ದು ಪ್ರಚಾರದ ಚುಕ್ಕಾಣಿ ಹಿಡಿದಿದ್ದರು. ಎಡರಂಗ ಸರ್ಕಾರದ ಲೋಪದೋಷಗಳನ್ನು ಜನರ ಮುಂದಿಡುವಲ್ಲಿ ಕಾಂಗ್ರೆಸ್‌ ಸಕ್ಸಸ್‌ ಆಯಿತು. ಕಾಂಗ್ರೆಸ್‌ ಪಿಣರಾಯಿಯವರನ್ನು ಟಾರ್ಗೆಟ್‌ ಮಾಡಿ ಪ್ರಚಾರ ನಡೆಸುತಿತ್ತು. ಕರ್ನಾಟಕವೂ ಸೇರಿ, ದೇಶಾದ್ಯಂತ ಇರುವ ಕಾಂಗ್ರೆಸ್‌ ನಾಯಕರ ನೆರವನ್ನೂ ಪಡೆಯಲಾಗಿತ್ತು.
೭. ಮುಸ್ಲಿಂ, ಕ್ರೈಸ್ತ ಹಾಗೂ ನಾಯರ್‌ ಸಮುದಾಯದ ಬೆಂಬಲ:
ಮುಸ್ಲಿಂ ಲೀಗ್‌ ಜೊತೆ ಮೈತ್ರಿ ಇತ್ತು. ಈ ಕಾರಣಕ್ಕೆ ಮುಸ್ಲಿಂ ಮತಗಳು ಸುಲಭವಾಗಿ ಸಿಕ್ಕಿತು. ಇಮ್ರಾನ್‌ ಪ್ರತಾಪ್‌ಗಡಿಯಂತಹ ನಾಯಕರನ್ನು ಮುಸ್ಲಿಮ್‌ ಮತಗಳಿಗಾಗಿಯೇ ನಿಯೋಜಿಸಲಾಗಿತ್ತು. ಸಂಪ್ರದಾಯಿಕ ಕ್ರೈಸ್ತರ ಮತಗಳೂ ಕಾಂಗ್ರೆಸ್‌ ಪಾಲಾಗಿತ್ತು. ಸಿಎಂ ರೇಸ್‌ನಲ್ಲಿರುವ ಕೆ.ಸಿ ವೇಣುಗೋಪಾಲ್‌, ವಿ.ಡಿ ಸತೀಶನ್‌ ಮತ್ತು ರಮೇಶ್‌ ಚೆನ್ನಿಂತಲ – ಮೂವರೂ ನಾಯರ್‌ ಸಮುದಾಯದ ನಾಯಕರಾಗಿರುವ ಕಾರಣಕ್ಕೆ, ಆ ಸಮುದಾಯವೂ ಕಾಂಗ್ರೆಸ್‌ನ್ನು ಸಂಪೂರ್ಣವಾಗಿ ಬೆಂಬಲಿಸಿತ್ತು.

ಕಾಂಗ್ರೆಸ್‌ ಪಕ್ಷಕ್ಕೆ ಪ್ರತಿಷ್ಠೆಯ ಕಣವಾಗಿದ್ದ ದಾವಣಗೆರೆ ದಕ್ಷಿಣ ವಿಧಾನಸಭಾ ಕ್ಷೇತ್ರಕ್ಕೆ ನಡೆದ ಉಪಚುನಾವಣೆಯಲ್ಲಿ ಕಾಂಗ್ರೆಸ್‌‌‌ ಅಭ್ಯರ್ಥಿ ಸಮರ್ಥ್​ ಮಲ್ಲಿಕಾರ್ಜುನ್‌‌‌‌‌‌ ವಿಜಯ ಪತಾಕೆ ಹಾರಿಸಿದ್ದಾರೆ. ದಿವಂಗತ ಶಾಮನೂರು ಶಿವಶಂಕರಪ್ಪ ಮೊಮ್ಮಗ ಹಾಗೂ ಸಚಿವ ಎಸ್‌.ಎಸ್‌.ಮಲ್ಲಿಕಾರ್ಜುನ್‌, ಸಂಸದೆ ಪ್ರಭಾ ಮಲ್ಲಿಕಾರ್ಜುನ್‌ ಅವರ ಪುತ್ರ ಸಮರ್ಥ್‌ ಉಪಸಮರದಲ್ಲಿ ಗೆದ್ದು ಬೀಗಿದ್ದಾರೆ. ಇವರಿಗೆ ಪ್ರಬಲ ಪೈಪೋಟಿ ನೀಡಿದ್ದ ಬಿಜೆಪಿ ಅಭ್ಯರ್ಥಿ ಶ್ರೀನಿವಾಸ ದಾಸ ಕರಿಯಪ್ಪ ಸೋಲನುಭವಿಸಿದ್ದಾರೆ. ಕಾಂಗ್ರೆಸ್‌ನ ಹಿರಿಯ ಶಾಸಕ ಶಾಮನೂರು ಶಿವಶಂಕರಪ್ಪ ಅವರ ನಿಧನದಿಂದ ತೆರವಾಗಿದ್ದ ಕ್ಷೇತ್ರಕ್ಕೆ ಏ.9ರಂದು ಉಪಚುನಾವಣೆ ನಡೆದಿತ್ತು.

ಬಾಗಲಕೋಟೆ ವಿಧಾನಸಭಾ ಕ್ಷೇತ್ರಕ್ಕೆ ನಡೆದ ಉಪಚುನಾವಣೆಯಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿ ಉಮೇಶ್‌‌ ಮೇಟಿ ಗೆಲುವು ಸಾಧಿಸಿದ್ದಾರೆ. 21,866 ಮತಗಳ ಅಂತರದಿಂದ ಬಿಜೆಪಿ ಅಭ್ಯರ್ಥಿ ವೀರಣ್ಣ ಚರಂತಮಠ ವಿರುದ್ಧ ಕಾಂಗ್ರೆಸ್‌‌ನ ಉಮೇಶ್‌ ಮೇಟಿ ಗೆಲುವು ಪಡೆದಿದ್ದಾರೆ. ಉಮೇಶ್‌ ಮೇಟಿ 97,941 ಮತಗಳನ್ನು ಪಡೆದಿದ್ರೆ, ವೀರಣ್ಣ ಚರಂತಿಮಠ 76,075 ಮತಗಳನ್ನು ಪಡೆದುಕೊಂಡಿದ್ದರು. ಬಾಗಲಕೋಟೆಯಲ್ಲಿ ಕಾಂಗ್ರೆಸ್‌ ಕಾರ್ಯಕರ್ತರಲ್ಲಿ ಸಂಭ್ರಮ ಮನೆ ಮಾಡಿದೆ. ಉಮೇಶ್‌‌ ಮೇಟಿಯವರ ತಂದೆ ಹೆಚ್‌.ವೈ.ಮೇಟಿ ಯವರ ನಿಧನದಿಂದ ತೆರವಾಗಿದ್ದ ಕ್ಷೇತ್ರವನ್ನು ತನ್ನಲ್ಲೇ ಉಳಿಸಿಕೊಳ್ಳುವಲ್ಲಿ ಕಾಂಗ್ರೆಸ್‌ ಪಕ್ಷ ಯಶಸ್ವಿಯಾಗಿದೆ.

ತಮಿಳುನಾಡು ಅಕ್ಷರಶಃ ಅಚ್ಚರಿಯ ಫಲಿತಾಂಶ ನೀಡಿದೆ. ʼವಿಜಯ್‌ ವೋಟ್‌ ಕಟರ್‌ ಆಗಬಹುದು..ಒಂದು ಅಥವಾ ಎರಡು ಸೀಟು ಗೆದ್ದರೆ ಹೆಚ್ಚುʼ, ಎಂದವರ ಮಧ್ಯೆ ದಳಪತಿ ತಮಿಳುನಾಡಿನ ಅತಿದೊಡ್ಡ ಶಕ್ತಿಯಾಗಿ ಹೊಮ್ಮಿದ್ದಾರೆ. ತಮಿಳುನಾಡಿನ ಮುಂದಿನ ಮುಖ್ಯಮಂತ್ರಿಯಾಗುವ ಸಾಧ್ಯತೆಗಳಿವೆ. ಈ ಮೂಲಕ ಪಕ್ಷ ಕಟ್ಟಿದ ಚೊಚ್ಚಲ ಪ್ರಯತ್ನದಲ್ಲೇ ಸಿಎಂ ಆದ ನಟರ ಸಾಲಲ್ಲಿ ವಿಜಯ್‌ ನಿಂತಿದ್ದಾರೆ. ತಮಿಳುನಾಡಿನ ಎಂ.ಜಿ ರಾಮಚಂದ್ರನ್‌, ಆಂಧ್ರದ ಎನ್‌ ಟಿ ರಾಮರಾವ್‌ ಬಿಟ್ಟರೆ, ಈ ದಾಖಲೆ ಮಾಡಿದ್ದು ವಿಜಯ್‌ ಮಾತ್ರ.
ವಿಜಯ್‌ ಗೆಲುವಿಗೆ 10 ಕಾರಣಗಳೇನು?
1. ನಟ ವಿಜಯ್‌ ಜನಪ್ರಿಯತೆ:
ಇದರಲ್ಲಿ ಯಾವುದೇ ಸಂದೇಹ ಇಲ್ಲ. ವಿಜಯ್‌ ದಕ್ಷಿಣ ಭಾರತದ ಜನಪ್ರಿಯ ನಟ. ಈ ಜನಪ್ರಿಯತೆಯೇ ಮತವಾಗಿ ವಿಜಯ್‌ ಗೆಲುವಿಗೆ ಕಾರಣವಾಗಿದೆ.
2. ದ್ರಾವಿಡ ಪಕ್ಷಗಳ ಪ್ರಾಬಲ್ಯಕ್ಕೆ ಬ್ರೇಕ್‌:
ತಮಿಳುನಾಡಲ್ಲಿ ಇದುವರೆಗೆ ಡಿಎಂಕೆ, ಎಐಎಡಿಎಂಕೆಯದ್ದೇ ಪ್ರಾಬಲ್ಯ. ಕಳೆದ ಐವತ್ತು ವರ್ಷಗಳಲ್ಲಿ ಈ ಎರಡು ಪಕ್ಷಗಳು ಪರ್ಯಾಯ ಅವಧಿಗೆ ತಮಿಳುನಾಡಲ್ಲಿ ಆಡಳಿತ ನಡೆಸಿವೆ. ಬದಲಾವಣೆ ಬಯಸಿದ ಜನರಿಗೆ ಆಶಾಕಿರಣವಾಗಿ ಹೊಮ್ಮಿದ್ದು ಟಿವಿಕೆ ಮುಖ್ಯಸ್ಥ ವಿಜಯ್‌. ಹಾಗಾಗಿ, ಜನತೆ ವಿಜಯ್‌ ಮೂಲಕ ಬದಲಾವಣೆ ತಂದಿದ್ದಾರೆ ಎಂದು ಹೇಳಬಹುದು.
3. ಯುವಕರನ್ನು ಸೆಳೆದ ದಳಪತಿ:
ತಮಿಳುನಾಡಿನ ಶೇ. 42 ರಷ್ಟು ಯುವ ಮತದಾರರಿದ್ದಾರೆ. ವಿದ್ಯಾರ್ಥಿಗಳಿದ್ದಾರೆ. ಬಹುತೇಕ ಯುವ ಮತದಾರರು ಡಿಎಂಕೆ, ಎಐಡಿಎಂಕೆ ಬಿಟ್ಟು ವಿಜಯ್‌ ಕೈಹಿಡಿದಿದ್ದಾರೆ. 20ರಿಂದ 29 ವಯೋಮಾನದ ಶೇ. 59ರಷ್ಟು ಯುವಕರು ಟಿವಿಕೆಗೆ ಜೈ ಎಂದಿದ್ದಾರೆ. 30-39 ವಯೋಮಾನದ ಶೇ. 45 ಮಂದಿ ದಳಪತಿಯನ್ನು ದಡಮುಟ್ಟಿಸಿದ್ದಾರೆ ಎನ್ನಲಾಗುತ್ತಿದೆ.
4. ಹೊಸ ಮತದಾರರ ಮೊದಲ ಆಯ್ಕೆ ವಿಜಯ್‌:
ತಮಿಳುನಾಡಿನಲ್ಲಿ ನಡೆದ ಸರ್ವೇ ಪ್ರಕಾರ ಶೇ. 68 ರಷ್ಟು ಹೊಸ ವೋಟರ್ಸ್‌ ವಿಜಯ್‌ಗೆ ಬೆಂಬಲ ನೀಡಿದ್ದಾರೆ. ದ್ರಾವಿಡ ರಾಜಕಾರಣದ ಅಂತಃಸುಳಿವನ್ನೇ ಅರಿಯದ ಈ ಹೊಸ ವೋಟರ್ಸ್‌ ವಿಜಯ್‌ ವಿಜಯ ಯಾತ್ರೆಗೆ ಸಾಥ್‌ ಕೊಟ್ಟಿದ್ದಾರೆ.
5. ಟಿವಿಕೆಗೆ ಮಹಿಳೆಯರ ಬೆಂಬಲ:
ಸುಪ್ರಸಿದ್ದ ನಟ ಎಂಬುದರ ಜೊತೆಗೆ ವಿಜಯ್‌ ಅಭಿವೃದ್ಧಿ ಆಧಾರಿತ ರಾಜಕೀಯಕ್ಕೆ ಮಹಿಳೆಯರೂ ಸೈ ಎಂದಿದ್ದಾರೆ. ಟಿವಿಕೆಗೆ ಮತ ಹಾಕುವ ಮೂಲಕ ಡಿಎಂಕೆ, ಎಐಎಡಿಎಂಕೆ ಪ್ರಾಬಲ್ಯಕ್ಕೆ ಬ್ರೇಕ್‌ ಹಾಕಿದ್ದಾರೆ.
6. ಟಿವಿಕೆಗೆ ಮತ ಹಾಕಿರುವ ಗ್ರಾಮೀಣರು:
ತಮಿಳುನಾಡಿನ ಗ್ರಾಮೀಣ ಭಾಗದಲ್ಲಿರುವ 90 ಕ್ಷೇತ್ರಗಳಲ್ಲಿ ಟಿವಿಕೆ ಅತ್ಯುತ್ತಮ ಸಾಧನೆ ತೋರಿದೆ. ವಿಜಯ್‌ ಗೆಲುವಿನ ಹಿಂದಿನ ಶಕ್ತಿಯೇ ಗ್ರಾಮೀಣ ಭಾಗದ ಜನ. ಯಾವುದೇ ಅಲೋಚನೆ ಮಾಡದೆ ಜನತೆ ವಿಜಿಲ್‌ಗೆ ವೋಟ್‌ ಒತ್ತಿದ್ದಾರೆ.
7. ಜಾತಿ ಮೀರಿದ ರಾಜಕೀಯ ಶಕ್ತಿಯಾದ ವಿಜಯ್‌:
ಒಂದು ಸಮೀಕ್ಷೆ ಪ್ರಕಾರ ದಳಪತಿಗೆ ಎಲ್ಲಾ ವರ್ಗ, ಸಮುದಾಯದ ಜನರ ಬೆಂಬಲ ಸಿಕ್ಕಿದೆ. ವಿಜಯ್‌ ಮೂಲತಃ ಕ್ರೈಸ್ತ ಧರ್ಮಕ್ಕೆ ಸೇರಿದ್ದರೂ ಕೂಡಾ ಹಿಂದೂ, ಮುಸ್ಲಿಂ, ಕ್ರೈಸ್ತ, ದಲಿತ ಹೀಗೆ ಎಲ್ಲಾ ವರ್ಗಗಳ ಬೆಂಬಲವೂ ವಿಜಯ್‌ಗೆ ಸಿಕ್ಕಿದೆ ಎನ್ನಲಾಗಿದೆ.
8. ಅಭಿಮಾನಿ ಬಳಗದ ಡಿಜಿಟಲ್‌ ಪ್ರಚಾರ:
ವಿಜಯ್‌ ಅಭಿಮಾನಿಗಳ ಡಿಜಿಟಲ್‌ ಪ್ರಚಾರವೇ ಟಿವಿಕೆ ಅತಿದೊಡ್ಡ ಶಕ್ತಿ ಎನ್ನಲಾಗಿದೆ. ವಿಜಯ್‌ ಫ್ಯಾನ್ಸ್‌ ತಮ್ಮ ಡಿಜಿಟಲ್‌ ಪ್ರಚಾರದ ಮೂಲಕ ಶೇ 40ರಷ್ಟು ಮತದಾರರ ಮೇಲೆ ಪ್ರಭಾವ ಬೀರಿದ್ದರು.
9. ಟಿವಿಕೆ ಪಕ್ಷದ ಪ್ರಣಾಳಿಕೆ:
ಪ್ರಣಾಳಿಕೆಯಲ್ಲಿ ವಿಜಯ್‌ ಫೋಕಸ್‌ ಮಾಡಿದ್ದೇ ಯುವಕರನ್ನ. ಅಡಮಾನವಿಲ್ಲದ ಶೈಕ್ಷಣಿಕ ಸಾಲ, ನಿರುದ್ಯೋಗ ಭತ್ಯೆ ಇತ್ಯಾದಿ ಆಶ್ವಾಸನೆಗಳು ಜನರ ಮನಗೆದ್ದಿವೆ ಎನ್ನಲಾಗಿದೆ.
10. ತಮಿಳುನಾಡಿನಲ್ಲಿ ತ್ರಿಕೋನ ಸ್ಪರ್ಧೆ:
ಇಲ್ಲಿಯವರೆಗೆ ತಮಿಳುನಾಡಲ್ಲಿ ಡಿಎಂಕೆ-ಎಐಡಿಎಂಕೆ ನಡುವೆ ನೇರ ಸ್ಪರ್ಧೆ ಇತ್ತು. ಈ ಸಲ ಅಖಾಡಕ್ಕೆ ಟಿವಿಕೆ ಪ್ರವೇಶದಿಂದಾಗಿ ವೋಟು ಮೂರು ಭಾಗವಾಗಿತ್ತು. ಮತ ವಿಭಜನೆಯ ನೇರ ಲಾಭ ವಿಜಯ್‌ಗೆ ಆಗಿದೆ ಎನ್ನಲಾಗಿದೆ.