ತಮಿಳುನಾಡು ರಾಜಕೀಯಕ್ಕೆ ರೋಚಕ ಟ್ವಿಸ್ಟ್‌, ದಳಪತಿ ಪ್ರಮಾಣವಚನಕ್ಕೆ ಬ್ರೇಕ್‌, ಡಿಎಂಕೆ-ಎಐಎಡಿಎಂಕೆ ಮೈತ್ರಿ ಸಾಧ್ಯತೆ. ತಮಿಳು ರಾಜಕೀಯದಲ್ಲಿ ಟಿವಿಕೆ ಮುಖ್ಯಸ್ಥ ವಿಜಯ್‌ ಮ್ಯಾಜಿಕ್‌ ಮಾಡಿದ್ದಾರೆ. ಯಾರೂ ಊಹಿಸದ ರೀತಿಯಲ್ಲಿ ರಾತೋರಾತ್ರಿ ರಾಜಕೀಯವಾಗಿ ಬೆಳೆದುಬಿಟ್ಟಿದ್ದಾರೆ. ಸದ್ಯ ತಮಿಳುನಾಡು ಮುಖ್ಯಮಂತ್ರಿ ಪಟ್ಟದ ಮೇಲೆ ಕಣ್ಣಿಟ್ಟಿರುವ ಏಕೈಕ ನಾಯಕ ದಳಪತಿ. ಆದರೆ, ವಿಜಯ್‌ ಬಳಿ ಬಹುಮತಕ್ಕೆ ಬೇಕಾದಷ್ಟು ಶಾಸಕರ ಬಲ ಇಲ್ಲ. ೧೧೮ ಶಾಸಕರ ಬಲವನ್ನು ವಿಜಯ್‌ ಹೇಗೆ ಹೊಂದಿಸ್ತಾರೆ, ವಿಜಯ್‌ ಬಹುಮತಕ್ಕೆ ಸರ್ಕಸ್‌ ಮಾಡ್ತಿರುವಾಗಲೇ, ತಮಿಳು ರಾಜಕೀಯದಲ್ಲಿ ಮತ್ತೊಂದು ಸ್ಫೋಟಕ ಬೆಳವಣಿಗೆ ಆಗಬಹುದಾ? ಇಲ್ಲಿದೆ ಡೀಟೆಲ್‌ ರಿಪೋರ್ಟ್‌
ತಮಿಳುನಾಡು ರಾಜಕೀಯದಲ್ಲಿ ಕ್ಷಣ ಕ್ಷಣಕ್ಕೂ ರೋಚಕ ಟ್ವಿಸ್ಟ್‌, ವಿಜಯ್‌ ಪ್ರಮಾಣವಚನಕ್ಕೆ ಬ್ರೇಕ್‌, ಡಿಎಂಕೆ-ಎಐಎಡಿಎಂಕೆ ಮೈತ್ರಿ ಸಾಧ್ಯತೆ, ಹೌದು, ತಮಿಳುನಾಡಿನಲ್ಲಿ ಸದ್ಯ ಅತಂತ್ರ ಸ್ಥಿತಿ ಉಂಟಾಗಿದೆ. ಯಾವ ಪಕ್ಷಕ್ಕೂ ಸಂಪೂರ್ಣ ಬಹುಮತ ಇಲ್ಲ. ೨೩೪ ಸದಸ್ಯ ಬಲದ ಅಸೆಂಬ್ಲಿಯಲ್ಲಿ ಅಧಿಕಾರಕ್ಕೇರಲು ಯಾವುದೇ ಪಕ್ಷಕ್ಕೆ ೧೧೮ ಶಾಸಕರ ಬಲ ಬೇಕು. ಟಿವಿಕೆ ಅತಿದೊಡ್ಡ ಪಕ್ಷವಾಗಿ ಹೊಮ್ಮಿದೆ. ಆದರೆ, ಶಾಸಕರ ಬಲ ಮಾತ್ರ ೧೦೮. ಅದ್ರಲ್ಲೂ ವಿಜಯ್‌ ಒಂದು ಕ್ಷೇತ್ರ ತ್ಯಾಗ ಮಾಡಬೇಕು. ಆಗ ಟಿವಿಕೆ ಶಾಸಕರ ಸಂಖ್ಯೆ ೧೦೭. ಬಹುಮತಕ್ಕೆ ಇನ್ನೂ ೧೧ ಶಾಸಕರು ಬೇಕು. ಈ ಹನ್ನೊಂದರ ಬಿಕ್ಕಟ್ಟೇ ತಮಿಳುನಾಡಲ್ಲಿ ಬ್ರಹನ್ನಾಟಕ ಸೃಷ್ಟಿಸಿದೆ.

ಟಿವಿಕೆ ಮುಖ್ಯಸ್ಥ ವಿಜಯ್‌, ತಮಿಳುನಾಡು ರಾಜ್ಯಪಾಲರನ್ನು ಎರಡು ಸಲ ಭೇಟಿ ಮಾಡಿ, ಸರ್ಕಾರ ರಚನೆ ಹಕ್ಕು ಮಂಡಿಸಿದ್ದಾರೆ. ಎರಡೂ ಸಲವೂ, ಎಲ್ಲಾ ೧೧೮ ಶಾಸಕರ ಬೆಂಬಲದ ಪತ್ರ ನೀಡಿ ಎಂದಿದ್ದಾರೆ ಗವರ್ನರ್. ವಿಜಯ್‌ ಬಳಿ ಸದ್ಯ ಇರೋದು‌, ತನ್ನ ೧೦೭ ಶಾಸಕರು ಪ್ಲಸ್‌ ಕಾಂಗ್ರೆಸ್‌ನ ಐವರು ಶಾಸಕರು, ಒಟ್ಟು ೧೧೨ ಎಂಎಲ್‌ಎಗಳ ಬಲ. ಬಹುಮತ ಸಾಬೀತುಪಡಿಸಲು ಇನ್ನೂ ಆರು ಶಾಸಕರ ಕೊರತೆ ಟಿವಿಕೆಯನ್ನು ಕಾಡುತ್ತಿದೆ. ಹಾಗಾಗಿ, ಸದ್ಯ ವಿಜಯ್‌ ಪ್ರಮಾಣವಚನ ಸ್ವೀಕಾರ ಮಾಡುವ ಸಾಧ್ಯತೆಗಳು ಕಡಿಮೆ.
ಈ ನಡುವೆ, ತಮಿಳುನಾಡು ಪಾಲಿಟಿಕ್ಸ್‌ಗೆ ಹೊಸ ತಿರುವು ಸಿಕ್ಕಿದೆ. ವಿಜಯ್‌ ಪ್ರಮಾಣವಚನಕ್ಕೆ ಬ್ರೇಕ್‌ ಬಿದ್ದ ಬೆನ್ನಲ್ಲೇ, ಬದ್ಧ ವೈರಿಗಳಾದ ಡಿಎಂಕೆ-ಎಐಎಡಿಎಂಕೆ ನಡುವೆ ಮೈತ್ರಿಯ ಸುದ್ದಿಗಳು ಹೊರಬರುತ್ತಿವೆ. ರಾಜಕೀಯದಲ್ಲಿ ಯಾವುದೂ ಅಸಾಧ್ಯ ಇಲ್ಲ. ಬದ್ಧ ವೈರಿಗಳು ಒಂದಾದರೆ ಯಾವುದೇ ಅಶ್ಚರ್ಯ ಪಡಬೇಕಿಲ್ಲ. ಹಾಗಾಗಿ, ಡಿಎಂಕೆ-ಎಐಎಡಿಎಂಕೆ ನಡುವೆ ಮೈತ್ರಿ ತಳ್ಳಿ ಹಾಕುವ ಹಾಗಿಲ್ಲ. ಸದ್ಯ ಎರಡೂ ಪಕ್ಷಗಳು ಈ ಸುದ್ಧಿಯನ್ನು ದೃಢಪಡಿಸಿಲ್ಲ. ತಮಿಳುನಾಡಿನಲ್ಲಿ ಡಿಎಂಕೆ ೫೯ , ಎಐಎಡಿಎಂಕೆ ೪೭ ಎಂಎಲ್ಎಗಳನ್ನು ಹೊಂದಿವೆ. ಎರಡೂ ಪಕ್ಷಗಳ ಒಟ್ಟು ಬಲ ೧೦೬ ಆಗುತ್ತೆ. ಮೈತ್ರಿ ಆದ್ರೂ, ಬಹುಮತಕ್ಕೆ ಅಲ್ಲಿಯೂ ೧೨ ಶಾಸಕರ ಕೊರತೆ ಉಂಟಾಗುತ್ತೆ. ಮತ್ತೆ, ಮುಸ್ಲೀಂ ಲೀಗ್‌, ಎಡಪಕ್ಷ ಹಾಗೂ ವಿಸಿಕೆ ಬೆಂಬಲ ಅನಿವಾರ್ಯ ಆಗುತ್ತೆ.
ಇಷ್ಟೇ ಅಲ್ಲ, ಈ ಎಲ್ಲಾ ಬೆಳವಣಿಗೆ ಮಧ್ಯದಲ್ಲೇ ಅಣ್ಣಾಡಿಎಂಕೆ ಪಾರ್ಟಿ ಒಡೆಯುತ್ತಾ ಅನ್ನೋ ಅನುಮಾನ ಶುರುವಾಗಿದೆ. ಪಕ್ಷದ ಒಂದು ಬಣ, ಟಿವಿಕೆಗೆ ಬೆಂಬಲ ನೀಡಲು ಪಕ್ಷದೊಳಗೇ ರಣತಂತ್ರ ರೂಪಿಸುತ್ತಿದೆ. ಹಾಗಾಗಿ ಸಂಭಾವ್ಯ ಕುದುರೆ ವ್ಯಾಪಾರ ತಪ್ಪಿಸಲು, ಎಐಎಡಿಎಂಕೆ, ತನ್ನ ಶಾಸಕರನ್ನು ಪುದುಚೇರಿಯ ರೆಸಾರ್ಟ್‌ಗೆ ಶಿಫ್ಟ್‌ ಮಾಡುತ್ತಿದೆ. ಸುಮಾರು ೪೦ ಶಾಸಕರನ್ನು ಈಗಾಗಲೇ ಶಿಫ್ಟ್‌ ಮಾಡಲಾಗಿದೆ. ರೆಸಾರ್ಟ್‌ನಲ್ಲಿರುವ ಎಲ್ಲಾ ರೂಮ್‌ಗಳು ಬುಕ್‌ ಆಗಿವೆ.
ಮತ್ತೊಂದು ಕಡೆ, ವಿಜಯ್‌ ನೇತೃತ್ವದ ಟಿವಿಕೆಗೆ ಈ ರೀತಿಯ ಪವರ್‌ ಪಾಲಿಟಿಕ್ಸ್‌ ಸಂಪೂರ್ಣ ಹೊಸತು. ಯಾವುದೇ ರಾಜಕೀಯ ಅನುಭವ ಇಲ್ಲದ ಟಿವಿಕೆ ಮುಖ್ಯಸ್ಥ ವಿಜಯ್‌, ಹೇಗೆ ತಮಿಳುನಾಡು ಸಿಎಂ ಆಗ್ತಾರೆ, ಆದರೂ ಬಹುಮತ ಸಾಬೀತುಪಡಿಸುವಲ್ಲಿ ಸಕ್ಸಸ್‌ ಆಗ್ತಾರಾ ಅನ್ನೋದು ಸದ್ಯದ ಸಸ್ಪೆನ್ಸ್‌.

ಕೊಲ್ಕತ್ತಾ: ಪಶ್ಚಿಮ ಬಂಗಾಳದಲ್ಲಿ ಹೊಸ ಸರ್ಕಾರ ರಚನೆ ಕಸರತ್ತುಗಳು ತೀವ್ರಗೊಳ್ಳುತ್ತಿವೆ. ಮೇ 9ರಂದು ಹೊಸ ಸರ್ಕಾರ ಅಸ್ತಿತ್ವಕ್ಕೆ ಬರುವ ಸಾಧ್ಯತೆಗಳಿವೆ. ಶನಿವಾರ ಪ್ರಮಾಣವಚನ ಸಮಾರಂಭ ನೆರವೇರಲಿದೆ ಎಂದು ಹೇಳಲಾಗುತ್ತಿದೆ. ಹಾಗಾಗಿ, ಶುಕ್ರವಾರಕ್ಕೂ ಮೊದಲು ಹೊಸ ಸಿಎಂ ಹೆಸರು ಘೋಷಣೆಯಾಗಲಿದೆ. ಕೇಂದ್ರ ಗೃಹ ಸಚಿವ ಹಾಗೂ ಬಿಜೆಪಿ ಹಿರಿಯ ನಾಯಕ ಅಮಿತ್‌ ಶಾ ಪಶ್ಚಿಮ ಬಂಗಾಳದಲ್ಲಿ ಗೆಲುವು ಸಾಧಿಸಿರುವ ಎಲ್ಲಾ ಶಾಸಕರೊಂದಿಗೆ ಸಮಾಲೋಚನೆ ನಡೆಸಲಿದ್ದಾರೆ. ಆ ಬಳಿಕ ಹೊಸ ಮುಖ್ಯಮಂತ್ರಿಯ ಘೋಷಣೆಯಾಗಲಿದೆ. ಮುಖ್ಯಮಂತ್ರಿ ರೇಸ್‌ನಲ್ಲಿ ಸುವೆಂದು ಅಧಿಕಾರಿ ಮುಂಚೂಣಿಯಲ್ಲಿದ್ದಾರೆ. ದಿಲೀಪ್‌ ಘೋಷ್‌, ಶಮಿಕ್‌ ಭಟ್ಟಾಚಾರ್ಯ, ರೂಪಾ ಗಂಗೂಲಿ ಹೆಸರುಗಳೂ ಕೇಳಿಬರುತ್ತಿವೆ.

ಪಶ್ಚಿಮ ಬಂಗಾಳ ವಿಧಾನಸಭಾ ಚುನಾವಣೆಯಲ್ಲಿ ಸೋತ ಬಳಿಕವೂ ತಾನು ಯಾವುದೇ ಕಾರಣಕ್ಕೂ ಸಿಎಂ ಸ್ಥಾನಕ್ಕೆ ರಾಜೀನಾಮೆ ನೀಡಲ್ಲ ಎನ್ನುತ್ತಿದ್ದಾರೆ ಮಮತಾ ಬ್ಯಾನರ್ಜಿ. ಇದೇ ವೇಳೆ ಶುಕ್ರವಾರ ಪಶ್ಚಿಮ ಬಂಗಾಳ ವಿಧಾನಸಭೆ ಅವಧಿ ಮುಗಿಯಲಿದೆ. ಮಮತಾ ಬ್ಯಾನರ್ಜಿ ರಾಜೀನಾಮೆ ಕೊಡಲಿ, ಕೊಡದೇ ಇರಲಿ, ಅದು ಯಾವುದೇ ಪರಿಣಾಮ ಬೀರಲ್ಲ. ಯಾಕಂದರೆ, ವಿಧಾನಸಭೆಯ ಅವಧಿ ಮುಗಿದ ಬಳಿಕ ಸಂಪೂರ್ಣ ಮಂತ್ರಿ ಮಂಡಲವೇ ಮಾಜಿ ಆಗಲಿದೆ. ಹೊಸ ಸರ್ಕಾರ ಅಸ್ತಿತ್ವಕ್ಕೆ ಬರುವ ತನಕ ಕೇರ್‌ ಟೇಕರ್‌ ಆಗಿ ಮಮತಾ ಬ್ಯಾನರ್ಜಿ ಇರಬಹುದು, ಅಷ್ಟೇ. ಹಾಗಾಗಿ ಈಗ ಮಮತಾ ಬ್ಯಾನರ್ಜಿ ರಾಜೀನಾಮೆ ಪ್ರಶ್ನೆಯೇ ಅಪ್ರಸ್ತುತ.

ತಮಿಳುನಾಡಿನಲ್ಲಿ ಇದೀಗ ಹೊಸ ಶಕೆ ಆರಂಭವಾಗಲಿದೆ. ಜೆನ್‌ ಜಿ ಹಾಗೂ ಮಿಲೇನಿಯಲ್‌ ಗಳ ಫೇವರಿಟ್‌ ಜೋಸೆಫ್‌ ವಿಜಯ್‌ ತಮಿಳುನಾಡಿನ ಮುಖ್ಯಮಂತ್ರಿಯಾಗಿ ಪ್ರಮಾಣ ಸ್ವೀಕರಿಸಲಿದ್ದಾರೆ. ಮೇ.7 ಗುರುವಾರ ದಳಪತಿ ವಿಜಯ್‌ ನೇತೃತ್ವದ ಸರ್ಕಾರ ಅಧಿಕಾರಕ್ಕೆ ಬರಲಿದೆ.

ಕಲರ್‌ಫುಲ್‌ ರಾಜಕಾರಣಕ್ಕೆ ಹೆಸರಾದ ದ್ರಾವಿಡ ನಾಡಿನಲ್ಲಿ ಮತ್ತೊಮ್ಮೆ ಚಿತ್ರನಟ ಸಿಎಂ ಆಗಿ ಅಧಿಕಾರದ ಗದ್ದುಗೆ ಏರಲಿದ್ದಾರೆ. 234 ಕ್ಷೇತ್ರಗಳನ್ನು ಹೊಂದಿರುವ ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ವಿಜಯ್‌ ಅವರ ಟಿವಿಕೆ 108 ಸ್ಥಾನಗಳಲ್ಲಿ ಜಯಭೇರಿ ಬಾರಿಸಿ ಅಗ್ರ ಸ್ಥಾನದಲ್ಲಿ ನಿಂತಿದೆ. ಆದರೆ, ಅಧಿಕಾರಕ್ಕೇರಲು ಇನ್ನೂ 10 ಸ್ಥಾನಗಳ ಕೊರತೆಯಿದ್ದು, ಕಾಂಗ್ರೆಸ್‌ ಸೇರಿದಂತೆ ವಿಸಿಕೆ, ಸಿಪಿಐ, ಸಿಪಿಎಂ ಬೆಂಬಲದೊಂದಿಗೆ ಮೈತ್ರಿ ಸರ್ಕಾರ ರಚಿಸಲು ದಳಪತಿ ಸೇನೆ ಸಿದ್ದತೆ ನಡೆಸುತ್ತಿದೆ. ಮತ್ತೊಂದೆಡೆ ಎಐಎಡಿಎಂಕೆ ಹಲವು ಶಾಸಕರು ಟಿವಿಕೆ ಗೆ ಬೆಂಬಲ ನೀಡುವ ಯೋಚನೆಯಲ್ಲಿದ್ದು, ಈ ವಿಚಾರದಲ್ಲಿ ಎಐಎಡಿಎಂಕೆ ಪಕ್ಷದಲ್ಲಿ ಸದ್ಯ ಭಿನ್ನಮತ ಕಾಣಿಸಿಕೊಂಡಿದೆ.

ಮೇ 7 ಗುರುವಾರ ದಳಪತಿ ಖ್ಯಾತಿಯ ವಿಜಯ್‌ ತಮಿಳುನಾಡಿನ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ. ವಿಜಯ್‌ ಜೊತೆಗೆ 9 ಜನ ಕ್ಯಾಬಿನೆಟ್‌ ಸಚಿವರು ಸಹ ಇದೇ ವೇಳೆ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ ಎಂಬ ಮಾಹಿತಿ ಸದ್ಯಕ್ಕೆ ಲಭ್ಯವಾಗಿದೆ. ವಿಜಯ್‌ ಕ್ಯಾಬಿನೆಟ್‌ನಲ್ಲಿ ಕಾಂಗ್ರೆಸ್‌ ಸಹ ಸೇರಲಿದೆ ಎನ್ನಲಾಗುತ್ತಿದೆ. ಈಗಾಗಲೇ ವಿಜಯ್‌ ಪ್ರಮಾಣ ಸ್ವೀಕಾರಕ್ಕೆ ಚೆನ್ನೈನಲ್ಲಿ ಸಿದ್ಧತೆಗಳನ್ನು ಆರಂಭಿಸಲಾಗಿದೆ.

ನಿಷ್ಠಾವಂತ ಹಿರಿಯ ನಾಯಕರು ಹಾಗೂ ಹೊಸಬರ ಸಮ್ಮಿಲನದೊಂದಿಗೆ ವಿಜಯ್‌ ಅವರ ಕ್ಯಾಬಿನೆಟ್‌ ರಚನೆಯಾಗುವ ಸಾಧ್ಯತೆಯಿದೆ. ಇತ್ತೀಚೆಗೆ ಎಐಎಡಿಎಂಕೆಯಿಂದ ಉಚ್ಚಾಟನೆಗೊಂಡು ಟಿವಿಕೆ ಸೇರಿ ಚುನಾವಣೆಯಲ್ಲಿ ಗೆಲುವು ಸಾಧಿಸಿರುವ ಹಿರಿಯ ನಾಯಕ ಕೆ.ಎ.ಸೆಂಗೋಟ್ಟೈಯನ್‌ ಅವರಿಗೆ ಸಚಿವ ಸಂಪುಟದಲ್ಲಿ ಪ್ರಮುಖ ಸ್ಥಾನ ಸಿಗುವ ಸಾಧ್ಯತೆಯಿದೆ ಎನ್ನಲಾಗಿದೆ. ಇದರ ಜೊತೆಗೆ ಜೆನ್‌ ಜಿ ಗಳ ಪ್ರತಿನಿಧಿಗಳಾಗಿ ಚುನಾವಣೆಯಲ್ಲಿ ಗೆದ್ದ ಯುವ ನಾಯಕರಿಗೆ ವಿಜಯ್‌ ಕ್ಯಾಬಿನೆಟ್‌ ನಲ್ಲಿ ಪ್ರಾಮುಖ್ಯತೆ ಸಿಗುವ ಸಾಧ್ಯತೆಯಿದೆ.

ಇದರ ಜೊತೆಗೆ ಟಿವಿಕೆ ಚುನಾವಣಾ ಪ್ರಣಾಳಿಕೆಯ ವೇಳೆ ತಮಿಳುನಾಡಿನ ಜನರಿಗೆ ಘೋಷಿಸಿರುವ ಉಚಿತ ಭರವಸೆಗಳನ್ನ ಹೇಗೆ ಜಾರಿಗೆ ತರಲಿದೆ, ಅವುಗಳಲ್ಲಿ ಯಾವುದಾದ್ರೂ ಒಂದು ಯೋಜನೆಯನ್ನು ಮೊದಲ ದಿನವೇ ಜಾರಿಗೆ ತರುತ್ತಾರಾ ಎಂಬ ಕುತೂಹಲವೂ ಇದೆ.

ಒಟ್ಟಿನಲ್ಲಿ ನಾಳೆಯ ವಿಜಯ್‌ ಪ್ರಮಾಣ ವಚನದ ಕಡೆಗೆ ತಮಿಳುನಾಡು ಸೇರಿದಂತೆ ದೇಶದ ಜನತೆಯ ದೃಷ್ಠಿ ನೆಟ್ಟಿದೆ. ವಿಜಯ್‌ ಅಧಿಕಾರ ಸ್ವೀಕರಿಸಿದ ನಂತರ ಫಸ್ಟ್‌ ಡೇ ಫಸ್ಟ್‌ ಶೋ ಹೇಗಿರಲಿದೆ ಅನ್ನೋದಕ್ಕೆ ಕೆಲವೇ ಗಂಟೆಗಳಲ್ಲಿ ಉತ್ತರ ಸಿಗಲಿದೆ.

ಪಶ್ಚಿಮ ಬಂಗಾಳದಲ್ಲಿ ಟಿಎಂಸಿ ಹೀನಾಯವಾಗಿ ಸೋಲನುಭವಿಸಿದರೂ ತಾನು ಮಾತ್ರ ಸಿಎಂ ಸ್ಥಾನಕ್ಕೆ ರಾಜೀನಾಮೆ ನೀಡುವುದಿಲ್ಲ ಎಂದು ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಹೇಳಿಕೆ ನೀಡಿದ್ದಾರೆ. ಇಂದು ಕೋಲ್ಕತ್ತಾದಲ್ಲಿ ಸುದ್ದಿಗೋಷ್ಠಿ ನಡೆಸಿದ ಮಮತಾ ಬ್ಯಾನರ್ಜಿ ತಾವು ಸಿಎಂ ಸ್ಥಾನಕ್ಕೆ ರಾಜೀನಾಮೆ ನೀಡುವ ಪ್ರಶ್ನೆಯೇ ಇಲ್ಲ ಎಂದಿದ್ದಾರೆ.

ನಾವು ಪಶ್ಚಿಮ ಬಂಗಾಳದಲ್ಲಿ ಸೋತಿಲ್ಲ. ನಿಷ್ಪಕ್ಷಪಾತವಾಗಿ ಚುನಾವಣೆ ನಡೆದಿಲ್ಲ. ನ್ಯಾಯಯುತವಾಗಿ ಚುನಾವಣೆ ನಡೆದಿದ್ದರೆ ನಾನು ಸಿಎಂ ಸ್ಥಾನಕ್ಕೆ ರಾಜೀನಾಮೆ ನೀಡುತ್ತಿದ್ದೆ. ಆದರೆ ಈಗ ರಾಜಭವನಕ್ಕೆ ಹೋಗುವ ಮಾತೇ ಇಲ್ಲ. ಯಾವುದೇ ಕಾರಣಕ್ಕೂ ರಾಜೀನಾಮೆ ನೀಡುವುದಿಲ್ಲ. ಪಶ್ಚಿಮ ಬಂಗಾಳದಲ್ಲಿ ಇವಿಎಂಗಳ ಲೂಟಿ ಮಾಡಲಾಗಿದೆ. ಚುನಾವಣಾ ಆಯೋಗ ಬಿಜೆಪಿ ಜೊತೆ ಸೇರಿಕೊಂಡಿದೆ. ಆದರೆ ನೈತಿಕವಾಗಿ ನಾವು ಗೆಲುವನ್ನು ಸಾಧಿಸಿದ್ದೇವೆ ಎಂದಿದ್ದಾರೆ.