ಬಾಯಿಯ ಆರೋಗ್ಯವು (Oral health) ಒಟ್ಟಾರೆ ಯೋಗಕ್ಷೇಮದ ಪ್ರಮುಖ ಭಾಗವಾಗಿದೆ. ನಿಯಮಿತವಾಗಿ ಹಲ್ಲುಜ್ಜುವ (Toothbrushing Tips) ಮೂಲಕ ಬಾಯಿಯ ಆರೋಗ್ಯವನ್ನು ಮಾತ್ರವಲ್ಲ ದೇಹಾರೋಗ್ಯವನ್ನು ಸುಸ್ಥಿತಿಯಲ್ಲಿ ಇರಿಸಿಕೊಳ್ಳಬಹುದು. ಹಲ್ಲುಗಳನ್ನು ಸ್ವಚ್ಛವಾಗಿರಿಸುವುದರಿಂದ ಹಲ್ಲುಗಳ ಬಣ್ಣ ಬದಲಾಗುವುದನ್ನು ತಡೆಯುತ್ತದೆ, ಕುಳಿಗಲಾಗದಂತೆ ರಕ್ಷಿಸುತ್ತದೆ, ಒಸಡು ಕಾಯಿಲೆಯ ಅಪಾಯವನ್ನು ಕಡಿಮೆ ಮಾಡುತ್ತದೆ, ಬಾಯಿಯ ಕ್ಯಾನ್ಸರ್‌ ಅಪಾಯವನ್ನು ಕಡಿಮೆ ಮಾಡುತ್ತದೆ.

ಹಲ್ಲುಜ್ಜುವ ಅಭ್ಯಾಸಗಳು ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾಗಿರುತ್ತವೆ. ಆದರೆ ತಜ್ಞರು ದಿನಕ್ಕೆ ಎರಡು ಬಾರಿ ಒಂದು ಸಮಯದಲ್ಲಿ ಎರಡು ನಿಮಿಷಗಳ ಕಾಲ ಹಲ್ಲುಜ್ಜಲೇ ಬೇಕು ಎನ್ನುತ್ತಾರೆ. ಹಲ್ಲುಜ್ಜುವ ಜೊತೆಗೆ ಹಲ್ಲುಗಳನ್ನು ಬ್ರಷ್ ಮಾಡುವ ವಿಧಾನ, ಬಳಸುವ ಬ್ರಷ್ ಮತ್ತು ಇತರ ಅಂಶಗಳನ್ನು ಪರಿಗಣಿಸುವುದು ಕೂಡ ಮುಖ್ಯವಾಗಿದೆ.

ಎಷ್ಟು ಹೊತ್ತು ಹಲ್ಲುಜ್ಜಬೇಕು?

ಅಮೆರಿಕನ್ ಡೆಂಟಲ್ ಅಸೋಸಿಯೇಷನ್ ​​ಪ್ರಕಾರ ದಿನಕ್ಕೆ ಎರಡು ಬಾರಿ ಎರಡು ನಿಮಿಷಗಳ ಕಾಲ ಹಲ್ಲುಜ್ಜುವುದು ಉತ್ತಮ. ಹಲ್ಲುಜ್ಜಲು ಎರಡು ನಿಮಿಷಗಳಿಗಿಂತ ಕಡಿಮೆ ಸಮಯವನ್ನು ಕಳೆದರೆ ಹಲ್ಲುಗಳಿಂದ ಬ್ಯಾಕ್ಟೀರಿಯಾಗಳನ್ನು ಹೊರಹಾಕಲು ಸಾಧ್ಯವಿಲ್ಲ. ಹಾಗಂತ ಎರಡು ನಿಮಿಷಗಳು ಹೆಚ್ಚು ಮಾಡುವುದು ಒಳ್ಳೆಯದಲ್ಲ. 2009 ರ ಅಧ್ಯಯನದ ಪ್ರಕಾರ, ಹೆಚ್ಚಿನ ಜನರು ಸುಮಾರು 45 ಸೆಕೆಂಡುಗಳ ಕಾಲ ಮಾತ್ರ ಬ್ರಷ್ ಮಾಡುತ್ತಾರೆ.

ಹಲ್ಲುಗಳನ್ನು ಹೇಗೆ ಬ್ರಷ್ ಮಾಡಬೇಕು?

ಸರಿಯಾದ ರೀತಿಯಲ್ಲಿ ಹಲ್ಲುಜ್ಜಲು ಎಡಿಎ ಈ ಮಾರ್ಗಸೂಚಿಗಳನ್ನು ನೀಡಿದೆ. ಹಲ್ಲುಜ್ಜುವ ಬ್ರಷ್ ಅನ್ನು ಒಸಡುಗಳಿಗೆ 45 ಡಿಗ್ರಿ ಕೋನದಲ್ಲಿ ಹಿಡಿದುಕೊಳ್ಳಿ. ಒಂದೊಂದು ಹಲ್ಲುಗಳ ಸುತ್ತಲೂ ನಿಧಾನವಾಗಿ ಬ್ರಷ್ ಮಾಡಿ. ಹಲ್ಲುಜ್ಜುವ ಬ್ರಷ್ ಅನ್ನು ಹಲ್ಲುಗಳ ಹೊರಗಿನ ಮೇಲ್ಮೈಗಳ ಉದ್ದಕ್ಕೂ ಹಿಂದಕ್ಕೆ ಮತ್ತು ಮುಂದಕ್ಕೆ ಸರಿಸಿ. ಬ್ರಷ್ ಮಾಡುವಾಗ ಮೃದುವಾದ ಒತ್ತಡ ನೀಡಿ. ಹಲ್ಲುಗಳ ಚೂಯಿಂಗ್ ಮೇಲ್ಮೈಗಳ ಉದ್ದಕ್ಕೂ, ಹಿಂದಕ್ಕೆ ಮತ್ತು ಮುಂದಕ್ಕೆ ಚಲನೆಯನ್ನು ಬಳಸಿ. ಹಲ್ಲುಗಳ ಒಳಗಿನ ಮೇಲ್ಮೈಗಳನ್ನು ಸರಿಯಾಗಿ ಬ್ರಷ್ ಮಾಡಲು ಹಲ್ಲುಜ್ಜುವ ಬ್ರಷ್ ಅನ್ನು ಲಂಬವಾಗಿ ಹಿಡಿದುಕೊಳ್ಳಿ ಮತ್ತು ಹಲ್ಲುಗಳ ಒಳಭಾಗದಲ್ಲಿ ಮೇಲಕ್ಕೆ ಮತ್ತು ಕೆಳಕ್ಕೆ ಬ್ರಷ್ ಮಾಡಿ. ಕೆಟ್ಟ ಉಸಿರಾಟವನ್ನು ಉಂಟುಮಾಡುವ ಬ್ಯಾಕ್ಟೀರಿಯಾವನ್ನು ತೆಗೆದುಹಾಕಲು ನಾಲಿಗೆಯನ್ನು ಬ್ರಷ್ ಮಾಡಿ. ಬಳಿಕ ಹಲ್ಲುಜ್ಜುವ ಬ್ರಷ್ ಅನ್ನು ತೊಳೆಯಿರಿ.

ಹಲ್ಲುಜ್ಜುವ ಬ್ರಷ್ ಅನ್ನು ನೇರವಾಗಿ ಇರಿಸಿ. ಸಂಗಾತಿ, ರೂಮ್‌ಮೇಟ್ ಅಥವಾ ಕುಟುಂಬದ ಸದಸ್ಯರು ತಮ್ಮ ಬ್ರಷ್‌ಗಳನ್ನು ಒಂದೇ ಸ್ಥಳದಲ್ಲಿ ಸಂಗ್ರಹಿಸಿದರೆ ಟೂತ್ ಬ್ರಷ್‌ ಗಳು ಪರಸ್ಪರ ಸ್ಪರ್ಶಿಸದಂತೆ ನೋಡಿಕೊಳ್ಳಿ. ಹಲ್ಲುಜ್ಜುವ ಬ್ರಷ್‌ ಅನ್ನು ಮುಚ್ಚಿದ ಟೂತ್ ಬ್ರಷ್ ಹೋಲ್ಡರ್‌ನಲ್ಲಿ ಸಂಗ್ರಹಿಸುವ ಬದಲು ಗಾಳಿಯಲ್ಲಿ ಒಣಗಲು ಬಿಡಿ.
ಹಲ್ಲುಜ್ಜುವ ಮೊದಲು ಪ್ರತಿದಿನ ಫ್ಲಸ್ ಮಾಡುವುದು ಒಳ್ಳೆಯದು. ಇದು ಹಲ್ಲುಗಳ ನಡುವೆ ಸಿಕ್ಕಿಕೊಂಡಿರುವ ಆಹಾರದ ಕಣಗಳನ್ನು ತೆಗೆದುಹಾಕಲು ಸಹಾಯ ಮಾಡುತ್ತದೆ. ಹಲ್ಲುಗಳ ನಡುವಿನ ಪ್ಲೇಕ್ ಅನ್ನು ಕೇವಲ ಟೂತ್ ಬ್ರಷ್‌ನಿಂದ ತಲುಪಲು ಸಾಧ್ಯವಿಲ್ಲ.

ಹಲ್ಲುಗಳನ್ನು ಬ್ರಷ್ ಮಾಡಲು ಉತ್ತಮ ಸಮಯ ಯಾವುದು?

ದಂತ ವೈದ್ಯರು ಪ್ರತಿ ಊಟದ ಅನಂತರ ಹಲ್ಲುಜ್ಜಲು ಶಿಫಾರಸು ಮಾಡುತ್ತಾರೆ. ಆದರೂ ದಿನಕ್ಕೆ ಎರಡು ಬಾರಿ ಹಲ್ಲುಜ್ಜುತ್ತಿದ್ದರೆ ಬೆಳಗ್ಗೆ ಎದ್ದ ತಕ್ಷಣ, ರಾತ್ರಿ ಮಲಗುವ ಮೊದಲು ಹಲ್ಲುಜ್ಜಲು ಮರೆಯದಿರಿ.

ಉಪಾಹಾರದ ಅನಂತರ ಬ್ರಷ್ ಮಾಡುವುದಾದರೆ ಹಲ್ಲುಗಳನ್ನು ಬ್ರಷ್ ಮಾಡಲು ಕನಿಷ್ಠ ಒಂದು ಗಂಟೆ ಕಾಯಿರಿ. ಯಾಕೆಂದರೆ ಸಿಟ್ರಸ್‌ನಂತಹ ಆಮ್ಲೀಯ ಪದಾರ್ಥವನ್ನು ಸೇವಿಸಿದರೆ ಅಥವಾ ಕುಡಿಯುತ್ತಿದ್ದರೆ ಬ್ರಷ್‌ ಮಾಡಲು ಕಾಯುವುದು ಹೆಚ್ಚು ಮುಖ್ಯವಾಗಿದೆ. ಆಮ್ಲೀಯ ಆಹಾರಗಳು ಅಥವಾ ಪಾನೀಯಗಳನ್ನು ಸೇವಿಸಿದ ಅನಂತರ ಬೇಗನೆ ಹಲ್ಲುಜ್ಜುವುದು ಆಮ್ಲದಿಂದ ದುರ್ಬಲಗೊಂಡ ಹಲ್ಲುಗಳ ಮೇಲಿನ ದಂತ ಕವಚದ ಮೇಲೆ ಪರಿಣಾಮ ಬೀರುವುದು. ಏನೇ ತಿಂದರೂ ಬಳಿಕ ಸ್ವಲ್ಪ ನೀರಿನಿಂದ ಬಾಯಿಯನ್ನು ತೊಳೆಯುವುದು ಒಳ್ಳೆಯದು.

ಹಲ್ಲುಗಳನ್ನು ತುಂಬಾ ಬ್ರಷ್ ಮಾಡಿದರೆ ಏನಾಗುತ್ತದೆ?

ದಿನಕ್ಕೆ ಮೂರು ಬಾರಿ ಹಲ್ಲುಜ್ಜುವುದು ಅಥವಾ ಪ್ರತಿ ಊಟದ ಅನಂತರ ಹಲ್ಲುಜ್ಜುವುದರಿಂದ ಹಲ್ಲುಗಳಿಗೆ ಹಾನಿಯಾಗುವುದಿಲ್ಲ. ಆದರೆ ಆಮ್ಲೀಯ ಆಹಾರವನ್ನು ಸೇವಿಸಿದ ಅನಂತರ ತುಂಬಾ ಗಟ್ಟಿಯಾಗಿ ಅಥವಾ ಬೇಗನೆ ಹಲ್ಲುಜ್ಜುವುದು ಹಲ್ಲುಗಳ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ.

ಹಲ್ಲುಜ್ಜುವಾಗ ಲಘು ಸ್ಪರ್ಶವನ್ನು ಮಾತ್ರ ಮಾಡಬೇಕು. ಬಲವಂತವಾಗಿ ಹಲ್ಲುಜ್ಜುವುದರಿಂದ ಹಲ್ಲಿನ ದಂತಕವಚ, ಒಸಡುಗಳ ಮೇಲೆ ಪರಿಣಾಮ ಬೀರುತ್ತದೆ.

ಯಾವ ರೀತಿಯ ಬ್ರಷ್ ಬಳಸಬೇಕು?

ಹಲ್ಲುಗಳನ್ನು ಸ್ವಚ್ಛಗೊಳಿಸಲು ಮೃದುವಾದ ಬ್ರಿಸ್ಟಲ್ ಟೂತ್ ಬ್ರಷ್ ಅನ್ನು ಬಳಸುವುದು ಉತ್ತಮ. ಗಟ್ಟಿಯಾದ ಬ್ರಿಸ್ಟಲ್ ಟೂತ್ ಬ್ರಷ್ ಅನ್ನು ಬಳಸುವುದರಿಂದ ಒಸಡು, ದಂತ ಕವಚದ ಮೇಲೆ ಪರಿಣಾಮ ಬೀರುತ್ತದೆ.

ಇದನ್ನೂ ಓದಿ: Sodium reduction: ಉಪ್ಪು ಸೇವನೆ ಕಡಿಮೆಯಾದರೆ ಈ ಎಲ್ಲ ಸಮಸ್ಯೆಗಳು ಕಾಡುತ್ತವೆ

ಹಲ್ಲುಜ್ಜುವ ಬ್ರಷ್ ಸವೆಯಲು ಪ್ರಾರಂಭಿಸಿದ ತಕ್ಷಣ ಬದಲಾಯಿಸಿ. ಪ್ರತಿ ಮೂರರಿಂದ ನಾಲ್ಕು ತಿಂಗಳಿಗೊಮ್ಮೆ ಟೂತ್ ಬ್ರಷ್ ಅನ್ನು ಬದಲಾಯಿಸುವುದು ಒಳ್ಳೆಯದು.

.

ಬೆಂಗಳೂರು: ವಿಶ್ವ ಹಿರಿಯ ನಾಗರಿಕರ ದಿನದ (World Senior Citizens Day) ಪ್ರಯುಕ್ತ ಹಿರಿಯರ ಆರೋಗ್ಯದ ಬಗೆಗೆ ಕಾಳಜಿ ವಹಿಸುವ ನಿಟ್ಟಿನಲ್ಲಿ ಆಗಸ್ಟ್‌ 21 ರಂದು ವಾಸವಿ ಆಸ್ಪತ್ರೆಯು ವಿಶೇಷವಾದ ಆರೋಗ್ಯ ಶಿಬಿರವನ್ನು ಹಮ್ಮಿಕೊಳ್ಳಲಾಗಿದೆ.

ಪ್ರತಿ ವರ್ಷ ಆಗಸ್ಟ್‌ 21 ಅನ್ನು ವಿಶ್ವ ನಾಗರಿಕರ ದಿನವನ್ನಾಗಿ ಆಚರಿಸಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಹಿರಿಯ ನಾಗರಿಕರಿಗೆ ಅನುಭವಿ ವೈದ್ಯರಿಂದ ಉಚಿತ ಸಮಾಲೋಚನೆ, ಲ್ಯಾಬ್‌ ಪರೀಕ್ಷೆಯಲ್ಲಿ ಶೇ.20ರಷ್ಟು ರಿಯಾಯಿತಿ ಮತ್ತು ರೇಡಿಯಾಲಜಿ ಸೇವೆಗಳಲ್ಲಿ ಶೇ.50ರಷ್ಟು ರಿಯಾಯಿತಿಯನ್ನು ನೀಡಲಾಗುತ್ತಿದೆ.

ಇದನ್ನೂ ಓದಿ: Kannada New Movie: ʼಲಂಗೋಟಿ ಮ್ಯಾನ್ʼ ಚಿತ್ರದ ಟೀಸರ್ ಬಿಡುಗಡೆಗೊಳಿಸಿದ ನಟ ಶರಣ್

58 ವರ್ಷ ಮೇಲ್ಪಟ್ಟ ಹಿರಿಯರು ಈ ಆರೋಗ್ಯ ಶಿಬಿರದಲ್ಲಿ ಪಾಲ್ಗೊಳ್ಳಲು ಅರ್ಹರಾಗಿರುತ್ತಾರೆ. ವಯೋಮಿತಿಯನ್ನು ದೃಢಪಡಿಸುವ ಯಾವುದೇ ದಾಖಲೆಗಳನ್ನು ತೆಗೆದುಕೊಂಡು ಹೋಗಿ ಕುಮಾರಸ್ವಾಮಿ ಲೇಔಟ್‌ನಲ್ಲಿರುವ ವಾಸವಿ ಆಸ್ಪತ್ರೆಯಲ್ಲಿ ಈ ಸೌಲಭ್ಯವನ್ನು ಪಡೆಯಬಹುದು.

ಇದನ್ನೂ ಓದಿ: Kannada New Movie: ಮಧುಸೂದನ್ ಹವಾಲ್ದಾರ್ ನಿರ್ದೇಶನದ ʼಕಾಖಂಡಕಿ ಶ್ರೀ ಮಹಿಪತಿದಾಸರುʼ ಚಿತ್ರದ ಹಾಡುಗಳ ಅನಾವರಣ

ನಗರದ ವಾಸವಿ ಆಸ್ಪತ್ರೆಯು ನುರಿತ ತಂತ್ರಜ್ಞಾನಗಳನ್ನು ಒಳಗೊಂಡಿದ್ದು, ಉತ್ತಮ ಗುಣಮಟ್ಟದ ಆರೋಗ್ಯ ಸೇವೆಗಳನ್ನು ಒದಗಿಸುತ್ತಾ ಬಂದಿದೆ. ಅಲ್ಲದೆ ಹಿರಿಯ ನಾಗರಿಕರ ಆರೋಗ್ಯದ ಕಾಳಜಿಯ ಮಹತ್ವವನ್ನು ಸಾರುವ ನಿಟ್ಟಿನಲ್ಲಿ ಈ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದೆ. ಆಸಕ್ತರು ಹೆಚ್ಚಿನ ಮಾಹಿತಿಗಾಗಿ ದೂ.ಸಂಖೈ: 080 71500500/504 ಸಂಪರ್ಕಿಸಬಹುದಾಗಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.

ಇಂದು ವಿಶ್ವ ಸೊಳ್ಳೆ ದಿನ. ಹಾಗೆ ನೋಡಿದರೆ, ವರ್ಷದ ಅಷ್ಟೂ ದಿನವೂ ಸೊಳ್ಳೆ ದಿನವೇ (World Mosquito Day) ಎಂಬಂತಾಗಿದೆ! ಮಲೇರಿಯ ಮತ್ತು ಸೊಳ್ಳೆಯ ನಡುವಣ ನಂಟನ್ನು ಪತ್ತೆ ಹಚ್ಚಿ, ಮಾರಕ ಮಲೇರಿಯ ನಿಯಂತ್ರಣಕ್ಕೆ ಬುನಾದಿ ಹಾಕಿದ ಸರ್‌ ರೊನಾಲ್ಡ್‌ ರಾಸ್‌ ಅವರ ಸಂಶೋಧನೆಯನ್ನು ನೆನಪಿಸಿಕೊಳ್ಳುವುದಕ್ಕಾಗಿ ಈ ದಿನವನ್ನು ಆಚರಿಸಲಾಗುತ್ತದೆ. ಸಣ್ಣ ಜೀವಿಗಳೆಂದು ಉಪೇಕ್ಷೆ ಮಾಡದೆ, ಅವುಗಳನ್ನು ಕಟ್ಟುನಿಟ್ಟಾಗಿ ನಿಯಂತ್ರಿಸುವುದರಿಂದ ಬಹಳಷ್ಟು ರೀತಿಯ ರೋಗಗಳನ್ನು ಮಟ್ಟ ಹಾಕಬಹುದೆಂಬುದು ನಮಗೆಂದೋ ಅರಿವಾಗಿದೆ. ಆದರೂ, ಸೊಳ್ಳೆಗಳ ಸುತ್ತಮುತ್ತ ಹಲವು ರೀತಿಯ ಮಿಥ್ಯೆಗಳು, ತಪ್ಪು ಕಲ್ಪನೆಗಳು ಹೆಣೆದುಕೊಂಡಿವೆ. ಇದರಿಂದ ರೋಗ ನಿಯಂತ್ರಣಕ್ಕೆ ತೊಡಕಾಗಬಹುದು. ಈ ಹಿನ್ನೆಲೆಯಲ್ಲಿ, ಸೊಳ್ಳೆಗಳ ಸುತ್ತಲಿನ ಸುಳ್ಳಿನ ಬಲೆಯನ್ನು ತೆಗೆಯೋಣ.

ಎಲ್ಲಾ ಸೊಳ್ಳೆಗಳೂ ಮನುಷ್ಯರಿಗೆ ಕಚ್ಚುತ್ತವೆ?

ಇಲ್ಲ. ಸೊಳ್ಳೆಗಳಲ್ಲಿ 3,500 ಜಾತಿಗಳಿದ್ದು, ಅವುಗಳಲ್ಲಿ ಕೆಲವು ಮಾತ್ರವೇ ಮಾನವರಿಗೆ ಕಚ್ಚುತ್ತವೆ. ಕೆಲವು ಜಾತಿಯ ಸೊಳ್ಳೆಗಳು ಪ್ರಾಣಿಗಳ ರಕ್ತವನ್ನು ಹೀರುತ್ತವೆ. ಬಹಳಷ್ಟು ಜಾತಿಯ ಸೊಳ್ಳೆಗಳು, ಅದರಲ್ಲೂ ಗಂಡು ಸೊಳ್ಳೆಗಳು ಹೂವು-ಗಿಡಗಳ ರಸಗಳನ್ನು ಹೀರಿ ಬದುಕುತ್ತವೆ. ತಮ್ಮ ಮೊಟ್ಟೆಗಳ ಬೆಳವಣಿಗೆಗೆ ಬೇಕು ಎನ್ನುವ ಕಾರಣಕ್ಕಾಗಿ ಹೆಣ್ಣು ಸೊಳ್ಳೆಗಳು ಮಾತ್ರ ಮಾನವರ ರಕ್ತವನ್ನು ಹೀರುವಂಥವು!

ಸೊಳ್ಳೆಗಳು ಬೆವರಿನತ್ತ ಆಕರ್ಷಿತವಾಗುತ್ತವೆ?

ಕೆಲವರಿಗೆ ಮಾತ್ರವೇ ಸೊಳ್ಳೆಗಳು ಕಚ್ಚುವುದು ಹೆಚ್ಚು, ಹಾಗಾಗಿ ಅವರ ಬೆವರಿನ ವಾಸನೆಗೆ ಸೊಳ್ಳೆಗಳು ಹತ್ತಿರ ಬರುತ್ತವೆ ಎಂಬ ಭಾವನೆಗಳು ಪ್ರಚಲಿತವಿದೆ. ನಿಜವೆಂದರೆ, ಆ ಕೆಲವರಿಗೆ ಸೊಳ್ಳೆ ಕಚ್ಚುವುದಿಲ್ಲ ಎಂದಲ್ಲ, ಕಚ್ಚುವುದು ತಿಳಿಯುವುದಿಲ್ಲ! ಬೆವರಿನಲ್ಲಿರುವ ರಾಸಾಯನಿಕಗಳು ಸೊಳ್ಳೆಗಳನ್ನು ಆಕರ್ಷಿಸುವುದಕ್ಕಿಂತಲೂ, ಮಾನವರು ಉಸಿರಿನಲ್ಲಿ ಬಿಡುವ ಇಂಗಾಲದ ಡೈ ಆಕ್ಸೈಡ್‌ ಮತ್ತು ಶರೀರದ ಉಷ್ಣತೆಯತ್ತ ಸೊಳ್ಳೆಗಳು ಸೆಳೆಯಲ್ಪಡುತ್ತವೆ. ಚೆನ್ನಾಗಿ ಬೆವರಿದಾಗ ದೇಹದ ಶಾಖವೂ ಹೆಚ್ಚುವುದು ಹೌದಲ್ಲವೇ? ಹಾಗಾಗಿ ಬೆವರೇ ಸೊಳ್ಳೆಗಳನ್ನು ಕರೆಯುತ್ತದೆಂಬ ಭಾವ ಬರಬಹುದು.

ಸೊಳ್ಳೆಗಳಿಗೆ ಎಚ್ಚರವಾಗುವುದು ರಾತ್ರಿ ಮಾತ್ರ?

ಸೊಳ್ಳೆಗಳೇನು ನಿಶಾಚರಿಗಳಲ್ಲ. ಆದರೆ ಕೆಲವು ಜಾತಿಯ ಸೊಳ್ಳೆಗಳು, ಮುಸ್ಸಂಜೆ ಮತ್ತು ನಸುಕಿನಲ್ಲಿ ಹೆಚ್ಚು ಚುರುಕಾಗುತ್ತವೆ ಎಂಬುದು ನಿಜ. ಹೆಚ್ಚಿನ ಜಾತಿಯ ಸೊಳ್ಳೆಗಳು ಹಗಲು ಹೊತ್ತೇ ರಕ್ತ ಹೀರಲು ಬರುತ್ತವೆ. ಈಗ ಪ್ರಚಲಿತವಿರುವ ಡೆಂಗು, ಜಿಕಾ ಮುಂತಾದ ರೋಗ ತರುವ ಸೊಳ್ಳೆಗಳು ಕಚ್ಚುವುದು ಹಗಲಿನಲ್ಲೇ ಅಧಿಕ. ಹಾಗಾಗಿ ಹಗಲು- ರಾತ್ರಿ ಎಂಬ ವ್ಯತ್ಯಾಸವಿಲ್ಲದೆ, ಸೊಳ್ಳೆಗಳು ಯಾವಾಗ ಬೇಕಿದ್ದರೂ ಕಚ್ಚಬಹುದು.

ಇವು ಉಷ್ಣವಲಯದಲ್ಲಿ ಮಾತ್ರ ಜೀವಿಸುವಂಥವೆ?

ಸೊಳ್ಳೆಗಳು ಉಷ್ಣ ಮತ್ತು ಸಮಶೀತೋಷ್ಣ ವಲಯಗಳಿಗೆ ಗುತ್ತಿಗೆಗೆ ಹೋದವಲ್ಲ! ಅವು ಯಾವುದೇ ಹವಾಮಾನದಲ್ಲೂ ಬದುಕಬಲ್ಲವು, ಬದುಕುತ್ತವೆ ಮತ್ತು ಕಚ್ಚುತ್ತವೆ. ಅವು ಹಲವರು ರೀತಿಯ ವಾತಾವರಣಗಳಿಗೆ ಹೊಂದಿಕೊಳ್ಳಬಲ್ಲವು. ಉಷ್ಣ ಮತ್ತು ಸಮಶೀತೋಷ್ಣ ವಲಯಗಳಲ್ಲಿ ಇವು ಹೆಚ್ಚು ಮತ್ತು ಸೊಳ್ಳೆಗಳಿಂದ ಉಂಟಾಗುವ ರೋಗಗಳು ಸಹ ಹೆಚ್ಚು ಎಂಬುದು ನಿಜವಾದರೂ, ಜಿಕಾ ಮತ್ತು ವೆಸ್ಟ್‌ ನೈಲ್‌ ಜ್ವರಗಳು ಯುರೋಪ್‌ ಮತ್ತು ಉತ್ತರ ಅಮೇರಿಕದ ಹಲವು ಭಾಗಗಳಲ್ಲಿವೆ.

ಬಟ್ಟೆಯ ಮೇಲೂ ಸೊಳ್ಳೆಗಳು ಕಚ್ಚುತ್ತವೆಯೇ?

ಇದು ಅರ್ಧ ಸತ್ಯ. ಸೊಳ್ಳೆಗಳು ಹೆಚ್ಚಾಗಿ ಅರಸುವುದು ಚರ್ಮದ ಭಾಗವನ್ನೇ. ಕೆಲವೊಮ್ಮೆ ತೆಳ್ಳಗಿನ ವಸ್ತ್ರಗಳ ಮೇಲೂ ಕಚ್ಚಬಹುದು. ಅದಿಲ್ಲದಿದ್ದರೆ, ತೀರಾ ಬಿಗಿಯಾದ ಉಡುಪಿನ ಮೇಲೆ ಕಚ್ಚಬಹುದು. ಆದರೆ ದಪ್ಪನೆಯ ಮತ್ತು ಸಡಿಲವಾದ ವಸ್ತ್ರಗಳ ಮೇಲೆ ಕುಳಿತು ಕಚ್ಚುವುದಕ್ಕೆ ಅವುಗಳಿಗೆ ಆಗದು. ಹಾಗಾಗಿ ಸೊಳ್ಳೆ ಇರುವಲ್ಲಿ ಉದ್ದವಾದ ದಪ್ಪನೆಯ ವಸ್ತ್ರಗಳನ್ನು ಮೈ ತುಂಬಾ ಧರಿಸುವುದರಿಂದ ಸೊಳ್ಳೆಗಳಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿದೆ.

ಕೆಲವು ಆಹಾರಗಳನ್ನು ತಿನ್ನುವುದರಿಂದ ಸೊಳ್ಳೆ ಹತ್ತಿರ ಬರುವುದಿಲ್ಲ?

ಬೆಳ್ಳುಳ್ಳಿ, ಈರುಳ್ಳಿ, ಬಾಳೆಹಣ್ಣು ಮುಂತಾದ ಯಾವ್ಯಾವುದೋ ಆಹಾರಗಳನ್ನು ತಿನ್ನುವುದರಿಂದ ಸೊಳ್ಳೆಗಳು ಹತ್ತಿರ ಬರುವುದಿಲ್ಲ ಎಂಬುದು ನಿಜವಲ್ಲ. ಇಂಥ ಕೆಲವು ಆಹಾರಗಳನ್ನು ತಿನ್ನುವುದರಿಂದ ನೈಸರ್ಗಿಕ ತನುಗಂಧ ಬದಲಾಗುವುದು ನಿಜ. ಆದರೆ ಇದರಿಂದ ಸೊಳ್ಳೆಗಳನ್ನ ಹತ್ತಿರಕ್ಕೆ ಬಾರದಂತೆ ಓಡಿಸಬಹುದು ಎನ್ನುವುದಕ್ಕೆ ವೈಜ್ಞಾನಿಕ ಪುರಾವೆಗಳಿಲ್ಲ. ಇಂಥ ಪ್ರಯೋಗಗಳನ್ನು ಮಾಡಿ ಸೊಳ್ಳೆ ಕಚ್ಚಿಸಿಕೊಳ್ಳುವ ಬದಲು, ಒಳ್ಳೆಯ ರಿಪೆಲ್ಲೆಂಟ್‌ ಬಳಸಿ.

ಇದನ್ನೂ ಓದಿ: Sodium reduction: ಉಪ್ಪು ಸೇವನೆ ಕಡಿಮೆಯಾದರೆ ಈ ಎಲ್ಲ ಸಮಸ್ಯೆಗಳು ಕಾಡುತ್ತವೆ

ಸೊಳ್ಳೆಗಳು ಎಲ್ಲಾ ರೋಗಗಳನ್ನೂ ಹರಡುತ್ತವೆಯೆ?

ಇಲ್ಲ, ದೇಹದಲ್ಲಿ ಯಾವುದೇ ವೈರಸ್‌ ಇದ್ದರೂ ಆ ಸೋಂಕನ್ನೆಲ್ಲ ಸೊಳ್ಳೆಗಳು ಇತರರಿಗೆ ಹರಡುವುದಿಲ್ಲ. ಕೆಲವು ವೈರಸ್‌ಗಳ ಸೋಂಕನ್ನು ಮಾತ್ರವೇ ಸೊಳ್ಳೆಗಳು ಒಬ್ಬರಿಂದೊಬ್ಬರಿಗೆ ಹರಡಬಲ್ಲವು. ಮಲೇರಿಯ, ಡೆಂಗು, ಚಿಕುನ್‌ಗುನ್ಯ, ಜಿಕಾ ಮುಂತಾದ ವೈರಸ್‌ಗಳನ್ನು ಮಾತ್ರವೇ ಹರಡಬಲ್ಲವು.

ಪನೀರ್‌ ಎಂಬ ಪ್ರೊಟೀನ್‌ಯುಕ್ತ ಆಹಾರ ಬಹುತೇಕ ಎಲ್ಲರೂ ತಮ್ಮ ಮನೆಗಳಲ್ಲಿ ಉಪಯೋಗಿಸಿರುತ್ತೀರಿ. ತೂಕ ಇಳಿಸುವ, ಫಿಟ್‌ನೆಸ್‌ ಪ್ರಿಯರ ಮನೆಗಳಲ್ಲಂತೂ ಪನೀರ್‌ ಖಂಡಿತ ಇದ್ದೇ ಇರುತ್ತದೆ. ಸಸ್ಯಾಹಾರಿಗಳಿಗೆ ಪ್ರೊಟೀನ್‌ ಸುಲಭವಾಗಿ ದಕ್ಕಬಹುದಾದ ಆಕೆಗಳ ಪೈಕಿ ಪನೀರ್‌ ಕೂಡ ಒಂದು. ಇಷ್ಟಪಟ್ಟು ತಿನ್ನಬಹುದಾದ ಈ ಪನೀರ್‌ ಅನ್ನು ಕೆಲವರು ಮನೆಯಲ್ಲೇ ಮಾಡಿಕೊಂಡು ತಿಂದರೆ, ಇನ್ನೂ ಕೆಲವರು ಹೊರಗಿನಿಂದ ನೇರವಾಗಿ ಖರೀದಿಸಿ ತರುವುದು ಸಾಮಾನ್ಯ. ಪ್ಯಾಕಟ್ಟುಗಳಲ್ಲಿ ಅಥವಾ ಡೈರಿಗಳಲ್ಲಿ ತಾಜಾ ಪನೀರ್‌ ಕೂಡಾ ಇಂದು ಲಭ್ಯವಿವೆ. ಮನೆಯಲ್ಲೇ ಮಾಡುವುದಾದರೆ, ಹಾಲು ಕುದಿಸಿಕೊಂಡು ಅದು ಕುದಿಯುತ್ತಿರುವಾಗಲೇ ಅದಕ್ಕೆ ನಿಂಬೆಹಣ್ಣು ಹಿಂಡಿದರೆ, ಹಾಲು ಒಡೆಯುತ್ತದೆ. ಇದನ್ನೊಂದು ಬಟ್ಟೆಯಲ್ಲಿ ಸೋಸಿಕೊಂಡರೆ, ಇದರ ನೀರು ಪ್ರತ್ಯೇಕವಾಗಿ ಬಟ್ಟೆಯಲ್ಲಿ ಕೇವಲ ಪನೀರ್‌ ಉಳಿಯುತ್ತದೆ. ಪನೀರ್‌ ಅನ್ನು ಹಿಂಡಿಕೊಂಡು ಬಳಸಿದರೆ, ಉಳಿದ ನೀರನ್ನು ಅನೇಕರು ಚೆಲ್ಲಿ ಬಿಡುವುದು ರೂಢಿ. ಆದರೆ, ಈ ನೀರಿನಲ್ಲೂ ಸಾಕಷ್ಟು ಪ್ರೊಟೀನ್‌ ಇದೆ. ಅನೇಕ ಪೋಷಕಾಂಶಗಳೂ ಇವೆ. ಇವನ್ನು ಚೆಲ್ಲಿದರೆ ಪೋಷಕಾಂಶಗಳು ನಷ್ಟವಾಗುತ್ತವೆ. ಹಾಗಾಗಿ, ಈ ಉಳಿದುಕೊಂಡ ನೀರು ಅಂದರೆ, ವೇ ವಾಟರ್‌ ಅನ್ನು ನೀವು ಅನೇಕ ವಿಧಗಳಲ್ಲಿ ಬಳಸಬಹುದು. ಅದರಲ್ಲಿರುವ ಪೋಷಕಾಂಶ ನಮ್ಮ ದೇಹಕ್ಕೆ ಲಭ್ಯವಾಗುವಂತೆ ಮಾಡಬಹುದು. ಬನ್ನಿ, ವೇ ವಾಟರ್‌ ಅನ್ನು ಯಾವೆಲ್ಲ ವಿಧಾನಗಳಿಂದ ಬಳಸಬಹುದು (Use Of Paneer Water) ಎಂಬುದನ್ನು ನೋಡೋಣ.

ಕರ್ರಿಗಳು ಹಾಗೂ ಗ್ರೇವಿಗಳು

ಪನೀರ್‌ನ ಉಳಿದ ನೀರು ನೀವು ಮಾಡುವ ಕರ್ರಿ ಹಾಗೂ ಗ್ರೇವಿಗಳಿಗೆ ಸೇರಿಸುವುದು ಅತ್ಯುತ್ತಮ ಉಪಾಯ. ಕೇವಲ ನೀವು ಸಾಮಾನ್ಯ ನೀರನ್ನು ಬಳಸುವಲ್ಲಿ ಪನೀರ್‌ನ ಉಳಿದ ನೀರನ್ನು ಸೇರಿಸಬಹುದು. ಶಾಹಿ ಪನೀರ್‌, ಪನೀರ್‌ ಬಟರ್‌ ಮಸಾಲ, ಪಾಲಕ್‌ ಪನೀರ್‌ ಅಥವಾ ಸಾಮಾನ್ಯವಾದ ದಾಲ್‌ ತಡ್ಕಾ ಕೂಡಾ ನೀವು ಮಾಡುತ್ತಿದ್ದರೆ ಈ ಪನೀರ್‌ನ ನೀರನ್ನು ಸೇರಿಸಬಹುದು. ಇದರಿಂದ ನೀವು ಮಾಡಿದ ಈ ಡಿಶ್‌ನ ರುಚಿ ಇನ್ನಷ್ಟು ಸಮೃದ್ಧವಾಗುತ್ತದೆ. ಇದರಲ್ಲಿ ಹೆಚ್ಚು ಪ್ರೊಟೀನ್‌ ಇರುವುದರಿಂದ ಆರೋಗ್ಯಕ್ಕೂ ಒಳ್ಳೆಯದನ್ನೇ ಮಾಡುತ್ತದೆ.

ಲಸ್ಸಿ

ಕರ್ರಿ ಅಥವಾ ಗ್ರೇವಿಗಳನ್ನು ಮಾಡುವುದು ಕಡಿಮೆ ಎಂದಾದಲ್ಲಿ ಪನೀರ್‌ ನೀರನ್ನು ಬಳಸಿಕೊಳ್ಳಲ್ಲು ಬೇರೆ ಉಪಾಯಗಳೂ ಇವೆ, ಚಿಂತಿಸಬೇಡಿ. ಮನೆಯಲ್ಲಿ ಸುಲಭವಾಗಿ ಮಾಡಬಹುದಾದ ಪೇಯಗಳ ಪೈಕಿ ಲಸ್ಸಿ ಕೂಡಾ ಒಂದು. ಪನೀರ್‌ನ ನೀರನ್ನು ನೀವು ಲಸ್ಸಿ ಮಾಡುವಾಗ ಸೇರಿಸಬಹುದು. ಇದರಿಂದ ಲಸ್ಸಿ ಇನ್ನಷ್ಟು ರುಚಿಕರವಷ್ಟೇ ಅಲ್ಲ, ಪೋಷಕಾಂಶಗಳಿಂದ ಸಮೃದ್ಧವಾಗುತ್ತದೆ. ಮೊಸರಿಗೆ ಪನೀರ್‌ನ ನೀರನ್ನು ಸೇರಿಸಿ, ಕೊಂಚ ಸಕ್ಕರೆಯನ್ನೋ ಜೇನುತುಪ್ಪವನ್ನೋ ಸೇರಿಸಿಕೊಂಡು ಅಥವಾ ಉಪ್ಪು ಸೇರಿಸಿಕೊಂಡೋ ಕುಡಿಯಬಹುದು. ಬೇಸಿಗೆಯ ಝಳಕ್ಕೆ ಸಮೃದ್ಧವಾದ ಪ್ರೊಬಯಾಟಿಕ್‌ ಪೇಯವಿದು. ದೇಹವನ್ನು ತಂಪಾಗಿಸುವ ದಿವ್ಯಾಮೃತವೂ ಕೂಡ.

ಇಡ್ಲಿ, ದೋಸೆ ಹಿಟ್ಟು

ಹೌದು. ಪನೀರ್‌ನ ನೀರನ್ನು ಬಿಸಾಗಿ ವೇಸ್ಟ್‌ ಮಾಡುವ ಮೊದಲು ಹೀಗೂ ಬಳಸುವ ಸಾಧ್ಯತೆಗಳನ್ನು ಯೋಚಿಸಿ. ನಿತ್ಯವೂ ದೋಸೆ ಹಿಟ್ಟಂತೂ ನಿಮ್ಮಲ್ಲಿ ಮಾಡಿಯೇ ಇರುತ್ತೀರಿ. ಹುಳಿ ಬರಿಸಿದ ಹಿಟ್ಟನ್ನು ತೆಳುವಾಗಿಸಲು ನೀರು ಹಾಕುವ ಬದಲು ಪನೀರ್‌ನ ನೀರನ್ನು ಹಾಕಿ. ಅಥವಾ ಉದ್ದು ಹಾಗೂ ಅಕ್ಕಿಯನ್ನು ರುಬ್ಬುವ ಸಂದರ್ಭವೇ ನೀರಿನ ಬದಲು ಪನೀರ್‌ ನೀರನ್ನು ಹಾಕಿ. ಹುಳಿ ಬರುವ ಪ್ರಕ್ರಿಯೆ ಇನ್ನೂ ಸುಲಭವಾಗುತ್ತದೆ. ವೇ ವಾಟರ್‌ ಅಥವಾ ಈ ಪನೀರ್‌ನ ನೀರಿನಲ್ಲಿರುವ ಪೋಷಕಾಂಶಗಳೂ ಕೂಡಾ ಹಿಟ್ಟಿನ ಮೂಲಕ ದೋಸೆಯಾಗಿ, ಇಡ್ಲಿಯಾಗಿ ನಿಮ್ಮ ಹೊಟ್ಟೆ ಸೇರುತ್ತದೆ.

ಅಕ್ಕಿ ಬೇಯಿಸಲು

ಅಕ್ಕಿ ಅಥವಾ ಬೇಳೆ ಬೇಯಿಸಲೂ ಕೂಡಾ ನೀರಿನ ಬದಲು ಪನೀರ್‌ನ ನೀರನ್ನೇ ಬಳಸಬಹುದು. ಇದರಿಂದ ಅವುಗಳ ರುಚಿಯೂ ಇಮ್ಮಡಿಯಾಗುತ್ತದೆ. ಪನೀರ್‌ನ ನೀರಿನಲ್ಲಿರುವ ಪೋಷಕಾಂಶವೂ ನಷ್ಟವಾಗದು.

ಇದನ್ನೂ ಓದಿ: Benefits Of Onion Hair Oil: ಕೂದಲು ಬಿಳಿಯಾಗುತ್ತಿದೆಯೆ? ಈರುಳ್ಳಿ ತೈಲವನ್ನು ಈ ರೀತಿ ಬಳಸಿ

ಚಪಾತಿ ಹಿಟ್ಟು ಕಲಸಲು

ಹೌದು. ಈವಾವುವೂ ಬೇಡ ಎಂದಾದರೆ, ಚಪಾತಿ ಹಿಟ್ಟು ಕಲಸಿಡಿ. ಮಾರನೇ ದಿನದ ನಿಮ್ಮ ಅಥವಾ ಮಕ್ಕಳ ಟಿಫನ್‌ ಬಾಕ್ಸಿಗೆ ಚಪಾತಿ ಹಿಟ್ಟು ಕಲಸುತ್ತಿದ್ದರೆ, ನೀರಿನ ಬದಲು ಪನೀರ್‌ ನೀರನ್ನು ಹಾಕಿ. ಇದರಿಂದ ಚಪಾತಿ ಚೆನ್ನಾಗಿ ಮೆದುವಾಗಿ ಉಬ್ಬಿಕೊಂಡು ಬರುವುದಲ್ಲದೆ, ರುಚಿಕರವಾಗಿಯೂ, ಪೋಷಕಾಂಶಗಳಿಂದ ಸಮೃದ್ಧವಾಗಿಯೂ ಇರುತ್ತದೆ.