-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಪ್ಯಾರಿಸ್‌ ಹಾಟ್‌ ಕೌಚರ್‌ ಫ್ಯಾಷನ್‌ ವೀಕ್‌ 2024 ಎಂದಿನಂತೆ (Paris fashion week) ಹೊಸ ಪ್ರಯೋಗಾತ್ಮಕ ಡಿಸೈನರ್‌ವೇರ್‌, ವೇರಬಲ್‌-ನಾನ್‌ ವೇರಬಲ್‌ ಉಡುಗೆ-ತೊಡುಗೆಗಳಿಗೆ ಸಾಕ್ಷಿಯಾಯಿತು. ದೇಶ-ವಿದೇಶದಿಂದ ಆಗಮಿಸಿದ್ದ ಸೆಲೆಬ್ರೆಟಿ ಡಿಸೈನರ್‌ಗಳು, ಬ್ರಾಂಡ್‌ ಡಿಸೈನರ್‌ಗಳು ಈ ಫ್ಯಾಷನ್‌ ವೀಕ್‌ನಲ್ಲಿ ತಮ್ಮದೇ ಆದ ಪ್ರಯೋಗಾತ್ಮಕ ಡಿಸೈನರ್‌ವೇರ್‌ಗಳನ್ನು ಯಶಸ್ವಿಯಾಗಿ ಪ್ರದರ್ಶಿಸಿದರು. ಹೌದು, ಪ್ರತಿಬಾರಿಯಂತೆ ಈ ಬಾರಿಯೂ ಕೂಡ ಪ್ಯಾರಿಸ್‌ ಫ್ಯಾಷನ್‌ ವೀಕ್‌ನಲ್ಲಿ ವಾಕ್‌ ಮಾಡಿದ ಹಾಗೂ ಕಾಣಿಸಿಕೊಂಡ ಸೆಲೆಬ್ರೆಟಿಗಳ ಚಿತ್ರ-ವಿಚಿತ್ರ ಡಿಸೈನರ್‌ವೇರ್‌ಗಳು ಜಗತ್ತಿನಾದಾದ್ಯಂತ ಕಾತುರದಿಂದ ಕಾಯುತ್ತಿದ್ದ ಫ್ಯಾಷನ್‌ ಪ್ರಿಯರ ಹುಬ್ಬೇರಿಸಿದವು. ಇದಕ್ಕೆ ನಾವೇನೂ ಕಡಿಮೆ ಇಲ್ಲ ಎಂಬಂತೆ, ನಮ್ಮ ದೇಸಿ ಸ್ಟಾರ್‌ಗಳು ಭಾಗವಹಿಸಿ ಹಿರಿಮೆ ಹೆಚ್ಚಿಸಿದರು ಎನ್ನುತ್ತಾರೆ ಫ್ಯಾಷನ್‌ ವಿಮರ್ಶಕರು.

ದೇಸಿ ಸ್ಟಾರ್‌ಗಳ ಕಲರವ

ಡಿಸೈನರ್‌ ರಾಹುಲ್‌ ಮಿಶ್ರಾ ಅವರ ಡಿಸೈನರ್‌ವೇರ್‌ನಲ್ಲಿ, ಬಾಲಿವುಡ್‌ ನಟಿ ಜಾನ್ವಿ ಕಪೂರ್‌ ಮೊತ್ತ ಮೊದಲ ಬಾರಿಗೆ ಪ್ಯಾರೀಸ್‌ನ ಫ್ಯಾಷನ್‌ ವೀಕ್‌ನಲ್ಲಿ ಭಾಗವಹಿಸಿದರೇ, ನಟಿ ರಾಧಿಕಾ ಆಪ್ಟೆ ಕೂಡ ಅವರ ಡಿಸೈನರ್‌ವೇರ್‌ನಿಂದಲೇ ಎಲ್ಲರ ಗಮನಸೆಳೆದರು. ಇನ್ನು ನಟಿ ಪ್ರೀತಿ ಜಿಂಟಾ, ಐವರಿ ಒಂಬ್ರೆ ವಿನ್ಯಾಸದ ಶೋಲ್ಡರ್‌ಲೆಸ್‌ ಬಾಡಿಕಾನ್‌ ಗೌನ್‌ ಸೇರಿದಂತೆ ನಾನಾ ಡಿಸೈನರ್‌ವೇರ್‌ಗಳಲ್ಲಿ ಫ್ಯಾಷನ್‌ ವೀಕ್‌ನ ಮುಂದಿನ ಸಾಲಿನ ಅತಿಥಿಯಾಗಿ ಆಗಮಿಸಿ, ವೀಕ್ಷಿಸಿದರು. ನಟಿ ಸೋನಂ ಕಪೂರ್‌ ಕೂಡ ಇದೇ ಕೆಲಸವನ್ನು ಮಾಡಿದರು. ಒಟ್ಟಾರೆ, ಇವರೆಲ್ಲರೂ ಟ್ರೆಂಡಿ ಔಟ್‌ಫಿಟ್‌ನಲ್ಲಿ ಕಾಣಿಸಿಕೊಂಡರು. ದೇಸಿ ಔಟ್‌ಫಿಟ್‌ಗಳನ್ನು ಧರಿಸದಿದ್ದರೂ, ನಾವೇನು ಕಡಿಮೆ ಇಲ್ಲ ಎಂಬಂತೆ, ಇಂಟರ್‌ನ್ಯಾಷನಲ್‌ ಶೋನಲ್ಲಿ ಭಾಗವಹಿಸಿದ್ದು, ಜಾಗತೀಕ ಮಟ್ಟದಲ್ಲಿ ಮತ್ತೊಮ್ಮೆ ಭಾರತವೂ ಫ್ಯಾಷನ್‌ ಕ್ಷೇತ್ರದಲ್ಲಿ ಗುರುತಿಸಿಕೊಳ್ಳುವಂತೆ ಮಾಡಿತು ಎನ್ನುತ್ತಾರೆ ಫ್ಯಾಷನ್ ವಿಮರ್ಶಕರಾದ ಮಿಂಚು.

500 ಅಡಿ ಉದ್ದದ ಡ್ರೆಸ್‌ ಟೇಲ್‌

ತಮ್ಮ ಆಲ್ಬಂನ ಪ್ರಮೋಷನ್‌ ಮಾಡಲು ವಿದೇಶಿ ಸ್ಟಾರ್‌ ಕೆಟಿ ಪೆರಿ ಆಯ್ಕೆ ಮಾಡಿಕೊಂಡದ್ದು ತಾನು ಧರಿಸಿದ ಮಿನಿ ವೆಲ್ವೆಟ್‌ ರೆಡ್‌ ಡ್ರೆಸ್‌. ಅದರ ಬಾಲದಂತಿರುವ ಟೇಲ್‌ ನ 500 ಅಡಿ ಉದ್ದದ ಡಿಸೈನ್‌ನಲ್ಲಿ ಹಾಡಿನ ಸಾಲುಗಳನ್ನು ಪ್ರಿಂಟ್‌ ಮಾಡಲಾಗಿತ್ತು. ಈ ಔಟ್‌ಫಿಟ್‌ನ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುವುದರೊಂದಿಗೆ ಹೀಗೂ ಉಂಟಾ ಎಂದೆನಿತು! ಎನ್ನುತ್ತಾರೆ ಫ್ಯಾಷನ್‌ ವಿಮರ್ಶಕ ಜಾನ್‌.

ಜಡೆ ಸೂಟ್‌ನ ಟೈ ಆದಾಗ

ಇನ್ನು, ನಟಿ ಸಲ್ಮಾ ಬ್ಲೈರ್‌ ತಾವು ಧರಿಸಿದ್ದ ಸೂಟ್‌ಗೆ ಟೈ ಧರಿಸುವ ಬದಲು ಆರ್ಟಿಫಿಶಿಯಲ್‌ ಹೇರ್‌ನ ಟೈ ಧರಿಸಿದ್ದು ಎಲ್ಲರ ಹುಬ್ಬೇರಿಸಿತು. ಒಟ್ಟಾರೆ, ಡಿಯೋರ್‌ ಬ್ರಾಂಡ್‌ನಿಂದಿಡಿದು ಶಾಪೊರೆಲಿಯಂತಹ ನಾನಾ ಹೈ ಫ್ಯಾಷನ್‌ ಬ್ರಾಂಡ್‌ಗಳು ಈ ಫ್ಯಾಷನ್‌ ವೀಕ್‌ನಲ್ಲಿ ಭಾಗವಹಿಸಿ, ಮುಂಬರುವ ಡಿಸೈನರ್‌ವೇರ್‌ಗಳ ಪ್ರದರ್ಶನ ಮಾಡಿದವು.

(ಲೇಖಕಿ ಫ್ಯಾಷನ್‌ ಪತ್ರಕರ್ತೆ)

ಇದನ್ನೂ ಓದಿ: Paris Fashion Week: ಪ್ಯಾರಿಸ್‌ ಹಾಟ್‌ ಕೌಚರ್‌ ಫ್ಯಾಷನ್‌ ವೀಕ್‌ನಲ್ಲಿ ಮೊದಲ ಬಾರಿ ಹೆಜ್ಜೆ ಹಾಕಿದ ಜಾನ್ವಿ ಕಪೂರ್‌!

-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಜಾನ್ವಿ ಕಪೂರ್‌ ಮೊತ್ತ ಮೊದಲ ಬಾರಿಗೆ ಪ್ಯಾರಿಸ್‌ನ ಹಾಟ್‌ ಕೌಚರ್‌ ವೀಕ್‌ 2024ರಲ್ಲಿ ಹೆಜ್ಜೆ ಹಾಕಿದ್ದಾರೆ. ಹೌದು, ಅಂತರಾಷ್ಟ್ರೀಯ ಮಟ್ಟದಲ್ಲಿ ನಡೆಯುವ ಈ ಫ್ಯಾಷನ್‌ ವೀಕ್‌ನಲ್ಲಿ, ಸೆಲೆಬ್ರೆಟಿ ಡಿಸೈನರ್‌ ರಾಹುಲ್‌ ಮಿಶ್ರಾ ಅವರ ಔರಾ ಬ್ರಾಂಡ್‌ನ ಆಕರ್ಷಕ ಮೆರ್ಮೈಡ್ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ.

ಜಾನ್ವಿ ಸೌಂದರ್ಯ ಹೆಚ್ಚಿಸಿದ ಮೆರ್ಮೈಡ್ ಡಿಸೈನರ್‌ವೇರ್

ರಾಹುಲ್‌ ಮಿಶ್ರಾ ಅವರು, ಜಾನ್ವಿ ಅವರಿಗಾಗಿಯೇ ಬಾಡಿಕಾನ್‌ ಮೆರ್ಮೈಡ್‌ ಸಿಕ್ವೀನ್ಸ್ ಸ್ಕರ್ಟ್ ಅದಕ್ಕೆ ಹೊಂದುವಂತಹ ಡಾರ್ಕ್‌ ಶೇಡ್‌ನ ಬಿಕಿನಿಯಂತಿರುವ ಸ್ಟ್ರಾಪ್‌ಲೆಸ್‌ ಬ್ಲೌಸ್‌ ಡಿಸೈನ್‌ ಮಾಡಿದ್ದು, ಜಾನ್ವಿ ವಾಕ್‌ ಮಾಡುವಾಗ ನೆಲವನ್ನು ಸಾವರಿಸಿಕೊಂಡು ಹೋಗುತ್ತಿದ್ದ ಲಾಂಗ್‌ ಸ್ಕರ್ಟ್ ಅಲ್ಲಿನ ನೋಡುಗರನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿದೆ. ಮೀನಿನ ಚರ್ಮದಂತೆ ಬಿಂಬಿಸುವ ಬ್ಲ್ಯಾಕ್‌ ಹಾಗೂ ಗ್ರೇ ವರ್ಣದ ಡಿಸೈನ್‌ ಹೊಂದಿದ್ದ ಈ ಡಿಸೈನರ್‌ವೇರ್‌ ಜಾನ್ವಿಯ ಸೌಂದರ್ಯವನ್ನು ಹೆಚ್ಚಿಸಿತ್ತು. ವಿದೇಶಿಗರನ್ನು ಹೆಚ್ಚಾಗಿ ಸೆಳೆಯಿತು ಎಂದು ಖುದ್ದು ಡಿಸೈನರ್‌ ರಾಹುಲ್‌ ಮಿಶ್ರಾ ಸಂತಸ ಹಂಚಿಕೊಂಡಿದ್ದಾರೆ.

ಜಾನ್ವಿ ಕಪೂರ್‌ ಮೊದಲ ವಿದೇಶಿ ಫ್ಯಾಷನ್‌ ವೀಕ್‌

ಇದುವರೆಗೂ ಸ್ಥಳೀಯ ರ‍್ಯಾಂಪ್‌ ಹಾಗೂ ಫ್ಯಾಷನ್‌ ಶೋಗಳಲ್ಲಿ ಮಾತ್ರ ಕಾಣಿಸಿಕೊಳ್ಳುತ್ತಿದ್ದ ಜಾನ್ವಿ ಕಪೂರ್‌, ಇದೇ ಮೊದಲ ಬಾರಿಗೆ ಅಂತರಾಷ್ಟ್ರೀಯ ಮಟ್ಟದ ಫ್ಯಾಷನ್‌ ವೀಕ್‌ನಲ್ಲಿ, ಅದರಲ್ಲೂ ಪ್ಯಾರಿಸ್‌ನಲ್ಲಿ ಕಾಣಿಸಿಕೊಂಡಿರುವುದಂತೆ. ಈ ಹಿಂದೆ ಜಾನ್ವಿ ತಂಗಿ ಖುಷಿ ಕಪೂರ್‌, ಇದೇ ಫ್ಯಾಷನ್‌ ವೀಕ್‌ನಲ್ಲಿ ಕಾಣಿಸಿಕೊಂಡಿದ್ದರು. ಆಗ ಜಾನ್ವಿ, ಸಿನಿಮಾ ಶೂಟಿಂಗ್‌ಗಳಲ್ಲಿ ಸಾಕಷ್ಟು ಬ್ಯುಸಿ ಇದ್ದ ಕಾರಣ, ವಿದೇಶಿ ಫ್ಯಾಷನ್‌ ವೀಕ್‌ಗಳಲ್ಲಿ ಭಾಗವಹಿಸಲು ಸಾಧ್ಯವಾಗಿರಲಿಲ್ಲವಂತೆ ಹಾಗೆನ್ನುತ್ತವೆ ಅವರ ಆಪ್ತ ಮೂಲಗಳು.

ಇದನ್ನೂ ಓದಿ: Twinning Fashion: ಪರ್ಫೆಕ್ಟ್ ಟ್ವಿನ್ನಿಂಗ್ ಫ್ಯಾಷನ್‌ಗೆ ಇಲ್ಲಿದೆ 5 ಐಡಿಯಾ!

ಫ್ಯಾಷನ್‌ ವಿಮರ್ಶಕರ ಮಾತು

ಇನ್ನು ಫ್ಯಾಷನ್‌ ವಿಮರ್ಶಕರಾದ ಜಾನ್‌ ಪ್ರಕಾರ, ಜಾನ್ವಿ ಅವರು ಪ್ರತಿ ಫ್ಯಾಷನ್‌ ಶೋಗಳಲ್ಲೂ ತಮ್ಮದೇ ಆದ ರ‍್ಯಾಂಪ್‌ ವಾಕ್‌ ಮೂಲಕ ಸೆಳೆಯುತ್ತಾರೆ. ಪ್ಯಾರಿಸ್‌ನ ಫ್ಯಾಷನ್‌ ವೀಕ್‌ಗಳಲ್ಲಿ, ರ‍್ಯಾಂಪ್‌ ಬದಲು ಫ್ಲೋರ್‌ ಮೇಲೆ ಮಾಡೆಲ್ಸ್ ವಾಕ್‌ ಮಾಡುವುದು ಸಾಮಾನ್ಯ ದೃಶ್ಯ. ನೆರೆದಿದ್ದ ಫ್ಯಾಷನ್‌ ಪ್ರಿಯರ ನಡುವೆಯೇ ಹಾದು ಹೋಗುತ್ತಾ, ಹೆಜ್ಜೆ ಹಾಕುವುದು, ಇವರೆಲ್ಲರ ಮಧ್ಯೆಯೇ ಸುಳಿದಾಡುವುದು ಇಲ್ಲಿನ ಫ್ಯಾಷನ್‌ ವೀಕ್‌ಗಳ ವಿಶೇಷತೆ. ಇದಕ್ಕೆ ತಕ್ಕಂತೆ ಜಾನ್ವಿ ಕೂಡ ಹೆಜ್ಜೆ ಹಾಕಿದ್ದಾರೆ. ಶೋ ಸ್ಟಾಪರ್‌ ಎನ್ನುವುದಕ್ಕಿಂತ ಇಂಟರ್‌ನ್ಯಾಷನಲ್‌ ಮಾಡೆಲ್‌ಗಳೊಂದಿಗೆ ಸೂಪರ್‌ ಮಾಡೆಲ್‌ನಂತೆ ನಡೆದಾಡಿದ್ದಾರೆ ಎನ್ನುತ್ತಾರೆ.

(ಲೇಖಕಿ ಫ್ಯಾಷನ್‌ ಪತ್ರಕರ್ತೆ)

-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಬಲೂನ್‌ ಡೆನಿಮ್‌ ಡ್ರೆಸ್‌ಗಳು (Balloon Denim frock Fashion) ಮಾನ್ಸೂನ್‌ ಫ್ಯಾಷನ್‌ಲೋಕಕ್ಕೆ ಎಂಟ್ರಿ ನೀಡಿವೆ. ಈ ಬಾರಿಯ ಮಾನ್ಸೂನ್‌ ಸೀಸನ್‌ಗೆ ಕಾಲಿಟ್ಟಿರುವ ಲೈಟ್‌ವೈಟ್‌ ಬಲೂನ್‌ ಡೆನಿಮ್ ಡ್ರೆಸ್‌ಗಳು ವಿಶೇಷವಾಗಿ ಕಾಲೇಜು ಯುವತಿಯರನ್ನು ಸೆಳೆದಿವೆ. ತಕ್ಷಣಕ್ಕೆ ನೋಡಲು ಫಿಟ್‌ & ಫ್ಲೇನರ್‌ನಂತೆ ಕಾಣುವ ಈ ಔಟ್‌ಫಿಟ್‌, ಸ್ಲಿಮ್‌ ಹುಡುಗಿಯರು ಧರಿಸಿದಾಗ ಬಾಡಿ ಮಾಸ್‌ ಇಂಡೆಕ್ಸ್ ಹೈಲೈಟ್‌ ಮಾಡುವುದರೊಂದಿಗೆ ಆಕರ್ಷಕವಾಗಿ ಬಿಂಬಿಸುತ್ತವೆ.

ಡೆನಿಮ್‌ ನ್ಯೂ ಲುಕ್‌

ಇದಕ್ಕೆ ಪೂರಕ ಎಂಬಂತೆ, ಇತ್ತೀಚೆಗೆ ಸಿನಿಮಾ ಇವೆಂಟ್‌ನಲ್ಲಿ ಬಾಲಿವುಡ್‌ ನಟಿ ಶಾರ್ವರಿ ಧರಿಸಿದ ಬಲೂನ್‌ ಡೆನಿಮ್‌ ಮಿನಿ ಡ್ರೆಸ್‌ ಫ್ಯಾಷನ್‌ ಪ್ರಿಯ ಹುಡುಗಿಯರನ್ನು ಆಕರ್ಷಿಸಿತ್ತು.

ಟೀನೇಜ್‌ ಹುಡುಗಿಯರಿಗೆ ಪ್ರಿಯವಾದ ಮಿನಿ ಡೆನಿಮ್‌ ಬಲೂನ್‌ ಡ್ರೆಸ್

“ಇತ್ತೀಚೆಗೆ ನಾನಾ ಬಗೆಯ ಡೆನಿಮ್‌ ಡ್ರೆಸ್‌ಗಳು ಫ್ಯಾಷನ್‌ ಲೋಕದಲ್ಲಿ ಕಾಲಿಡುತ್ತಿದ್ದು, ಅವುಗಳಲ್ಲಿ ಇದೀಗ ಚಾಲ್ತಿಯಲ್ಲಿರುವ ಬಲೂನ್‌ ಡೆನಿಮ್‌ ಡ್ರೆಸ್‌ ಟೀನೇಜ್‌ ಯುವತಿಯರ ವಾರ್ಡ್ರೋಬ್‌ ಸೇರಿವೆ. ಅವುಗಳಲ್ಲಿ ಮಿನಿ ಅಥವಾ ಶಾರ್ಟ್ ಬಲೂನ್‌ ಡ್ರೆಸ್‌ಗಳು ಅತಿ ಹೆಚ್ಚು ಪ್ರಚಲಿತದಲ್ಲಿವೆ. ಸ್ಲಿಮ್‌ ಹುಡುಗಿಯರು ಧರಿಸಿದಾಗ ಬೊಂಬೆಯಂತೆ ಬಿಂಬಿಸುವ ಈ ಬಲೂನ್‌ ಡೆನಿಮ್‌ ಡ್ರೆಸ್‌ಗಳು ಈ ಸೀಸನ್‌ಗೆ ತಕ್ಕಂತಹ ಡಿಸೈನ್‌ನಲ್ಲಿ ಆಗಮಿಸಿವೆ” ಎನ್ನುತ್ತಾರೆ ಸ್ಟೈಲಿಸ್ಟ್ ಜಾಕೀರ್‌. ಅವರ ಪ್ರಕಾರ, ಈ ಡ್ರೆಸ್‌ಗಳು ಅತಿ ಹೆಚ್ಚಾಗಿ ಬಿಂದಾಸ್‌ ಹುಡುಗಿಯರನ್ನು ಸಿಂಗರಿಸಿವೆ.

ಏನಿದು ಬಲೂನ್‌ ಡೆನಿಮ್‌ ಡ್ರೆಸ್‌

ನೋಡಲು ಮಿನಿ ಫ್ರಾಕ್‌ನಂತೆ ಕಾಣುವ ಬಲೂನ್‌ ಡ್ರೆಸ್‌ನ ಸ್ಲೀವ್‌ ಉದ್ದನಾಗಿರುತ್ತವೆ. ಫುಲ್ ಸ್ಲೀವ್‌ ಹೊಂದಿರುತ್ತದೆ. ಇನ್ನು ವೇಸ್ಟ್‌ಲೈನ್‌ವರೆಗೂ ಫಿಟ್‌ ಆಗಿರುತ್ತವೆ. ಡೆನಿಮ್‌ನಲ್ಲಿ ಕೆಳಗೆ ಫ್ಲೇರ್‌ ನೀಡಲಾಗುವುದಿಲ್ಲವಾದ್ದರಿಂದ ಬಲೂನ್‌ನಂತಹ ವಿನ್ಯಾಸ ಡಬ್ಬಲ್‌ ಮಡಿಸಿದ ರೀತಿಯ ಡಿಸೈನ್‌ ಬಲೂನ್‌ನಂತೆ ಬಿಂಬಿಸುತ್ತದೆ. ಕೆಲವು ಡ್ರೆಸ್‌ಗಳು ಮಿನಿ ಫ್ರಾಕ್‌ನಂತೆ ಇರುತ್ತವೆ. ಹೊಟ್ಟೆಯ ಭಾಗದಲ್ಲಿ ಟೈಟಾಗಿರುತ್ತವೆ. ಕ್ಯಾಶುವಲ್‌ ಲುಕ್‌ ನೀಡುತ್ತವೆ. ಸಾಮಾನ್ಯ ಸ್ಯಾಟಿನ್‌ ಫ್ಯಾಬ್ರಿಕ್‌ನಲ್ಲಿ ಟ್ರೆಂಡಿಯಾಗಿದ್ದ ಈ ವಿನ್ಯಾಸ ಇದೀಗ ಡೆನಿಮ್‌ ಫ್ಯಾಬ್ರಿಕ್‌ನಲ್ಲಿ ಬಂದಿವೆ ಎನ್ನುತ್ತಾರೆ ಫ್ಯಾಷನಿಸ್ಟ್‌ಗಳು.

ಇದನ್ನೂ ಓದಿ: Crush Saree Fashion: ಸೆಲೆಬ್ರೆಟಿ ಲುಕ್‌ ನೀಡುವ ಡಿಸೈನರ್‌ ಕ್ರಶ್‌ ಸೀರೆಗಳು

ಬಲೂನ್‌ ಡ್ರೆಸ್‌ ಪ್ರಿಯರಿಗೆ ಒಂದಿಷ್ಟು ಸಿಂಪಲ್‌ ಸಲಹೆ

• ಬಾಡಿ ಮಾಸ್‌ ಇಂಡೆಕ್ಸ್‌ಗೆ ತಕ್ಕಂತೆ ಬಲೂನ್‌ ಡ್ರೆಸ್ ಹೊಂದಬೇಕು.
• ಟಮ್ಮಿ ಭಾಗ ಅಗಲವಾಗಿದ್ದಲ್ಲಿ ಈ ಔಟ್‌ಫಿಟ್‌ ಬೇಡ.
• ಈ ಡ್ರೆಸ್‌ನೊಂದಿಗೆ ಹೈ ಹೀಲ್ಸ್ ಅಥವಾ ಸ್ನೀಕರ್ಸ್ ಮ್ಯಾಚ್‌ ಆಗುತ್ತದೆ.
• ನೆಕ್‌ಲೈನ್‌ ಅಗಲವಾಗಿಲ್ಲದ ಕಾರಣ ಹೆಚ್ಚು ಆಕ್ಸೆಸರೀಸ್‌ ಧರಿಸುವ ಅಗತ್ಯವಿಲ್ಲ.
• ಈ ಡ್ರೆಸ್ ಎಂತಹವರಿಗೂ ಯಂಗ್‌ ಲುಕ್‌ ನೀಡುತ್ತದೆ.
• ಸ್ಲಿಮ್‌ ಇರುವವರಿಗೆ ಹೇಳಿಮಾಡಿಸಿದ ವೆಸ್ಟರ್ನ್‌ ಔಟ್‌ಫಿಟ್‌.

(ಲೇಖಕಿ ಫ್ಯಾಷನ್‌ ಪತ್ರಕರ್ತೆ)

-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಇತ್ತೀಚೆಗೆ ಕ್ರಶ್‌ ಸೀರೆಗಳು ನೀರೆಯರನ್ನು (Crush Saree Fashion) ಸೆಳೆದಿವೆ. ಬಣ್ಣದ ಬಣ್ಣದ ಕ್ರಶ್‌ ಸೀರೆಗಳು ಮಾನೋಕ್ರೋಮ್‌, ಸಾಲಿಡ್‌ ಶೇಡ್‌ ಹಾಗೂ ಮಿಕ್ಸ್ ಶೇಡ್‌ಗಳಲ್ಲಿಆಗಮಿಸಿದ್ದು, ಫ್ಯಾಷನ್‌ ಪ್ರಿಯ ಮಾನಿನಿಯರನ್ನು ಬರಸೆಳೆದಿವೆ. ನೋಡಲು ಒಂದೇ ಡಿಸೈನ್‌ನಂತೆ ಕಂಡರೂ ಅವುಗಳ ಬಣ್ಣ ಹಾಗೂ ಡಿಸೈನ್‌ನಿಂದ ಡಿಫರೆಂಟ್‌ ಲುಕ್‌ ನೀಡುತ್ತಿವೆ.

ಮಾಡರ್ನ್‌ ನೀರೆಯರ ಸೀರೆಗಳಿವು

ಮಾಡರ್ನ್‌ ಹಾಗೂ ಜೆನ್‌ ಜಿ ಹುಡುಗಿಯರ ಸೀರೆಗಳಿವು. ಯಾಕೆಂದರೆ, ಇವು ಟ್ರೆಡಿಷನಲ್‌ ಲುಕ್‌ ನೀಡುವುದಿಲ್ಲ, ಬದಲಿಗೆ ಪ್ರಯೋಗಾತ್ಮಕ ಡಿಸೈನರ್‌ ಬ್ಲೌಸ್‌ಗಳ ಜೊತೆಗೆ ಧರಿಸಬಹುದಾದಂತಹ ಸೀರೆಗಳಿವು. ಎಲ್ಲದಕ್ಕಿಂತ ಹೆಚ್ಚಾಗಿ ಸೆಲೆಬ್ರೆಟಿಗಳು ಹಾಗೂ ಫ್ಯಾಷನ್‌ ಕ್ಷೇತ್ರದ ಮಾಡೆಲ್‌ಗಳು ಉಡುವಂತಹ ಸೀರೆಗಳು ಎನ್ನಬಹುದು. ಸಾಮಾನ್ಯವರ ಮಹಿಳೆಯರ ಚಾಯ್ಸ್‌ನಲ್ಲಿ ಹೆಚ್ಚಾಗಿ ಇಂತಹ ಸೀರೆಗಳು ಕಂಡು ಬರುವುದಿಲ್ಲ ಎನ್ನುತ್ತಾರೆ ಸೀರೆ ಸ್ಪೆಷಲಿಸ್ಟ್ ರಾಕಿ.

ಟ್ರೆಂಡ್‌ನಲ್ಲಿರುವ ಕ್ರಶ್‌ ಸೀರೆಗಳು

ಜಾರ್ಜೆಟ್‌ ಕ್ರಶ್‌ ಸೀರೆ, ಶಿಫಾನ್‌, ಚಂದೇರಿ, ಸಿಲ್ಕ್‌ ಫ್ಯಾಬ್ರಿಕ್‌ನಲ್ಲೂ ಕ್ರಶ್‌ ಸೀರೆಗಳು ಇತ್ತೀಚೆಗೆ ಪ್ರಚಲಿತದಲ್ಲಿವೆ. ಆದರೆ, ಜಾರ್ಜೆಟ್‌ನವು ಹೆಚ್ಚು ಟ್ರೆಂಡ್‌ನಲ್ಲಿವೆ. ಇವುಗಳೊಂದಿಗೆ ಕಸ್ಟಮೈಸ್ಡ್ ಕ್ರಶ್‌ ಸೀರೆಗಳು ಇದೀಗ ಹೆಚ್ಚು ಚಾಲ್ತಿಯಲ್ಲಿವೆ. ನಮಗೆ ಬೇಕಾದ ಕಲರ್‌ನವನ್ನು ಕಸ್ಟಮೈಸ್ಡ್‌ ಮಾಡಿಸಿ, ಮಿಕ್ಸ್ ಶೇಡ್‌ಗಳಲ್ಲಿ ಸಿದ್ಧಪಡಿಸಿ ಕೊಡುವ ಸೀರೆ ಮಾರಾಟಗಾರರು ಇದ್ದಾರೆ. ಬಹುತೇಕ ಸೆಲೆಬ್ರೆಟಿಗಳು ಕಸ್ಟಮೈಸ್ಡ್ ಕ್ರಶ್‌ ಸೀರೆಗಳನ್ನು ಉಡುತ್ತಾರೆ.

ಕ್ರಶ್‌ ಸೀರೆಗಳ ರೂಲ್ಸ್

ಕ್ರಶ್‌ ಸೀರೆಗಳು ಸ್ಲಿಮ್‌ ಹಾಗೂ ಉದ್ದನಾಗಿರುವವರಿಗೆ ಆಕರ್ಷಕವಾಗಿ ಕಾಣಿಸುತ್ತವೆ. ಪ್ಲಂಪಿಯಾಗಿರುವವರಿಗೆ ಚೆನ್ನಾಗಿ ಕಾಣಿಸುವುದಿಲ್ಲ. ಯಾಕೆಂದರೆ, ಇವು ಹರಡಿಕೊಳ್ಳುತ್ತವೆ. ಕೆಲವು ಫ್ಯಾಬ್ರಿಕ್‌ ಸಾಫ್ಟಾಗಿರುತ್ತವೆ. ಅಂತವನ್ನು ಆಯ್ಕೆ ಮಾಡಿಕೊಂಡರೇ ಉತ್ತಮ ಎನ್ನುತ್ತಾರೆ ಸೀರೆ ಡ್ರೇಪರ್ಸ್.

ಇದನ್ನೂ ಓದಿ: Dogs Monsoon Fashion: ಮುದ್ದು ಶ್ವಾನಗಳಿಗೂ ಬಂತು ಮಾನ್ಸೂನ್‌ ಫ್ಯಾಷನ್‌!

ಕ್ರಶ್‌ ಸೀರೆ ಪ್ರಿಯರಿಗೆ 5 ಟಿಪ್ಸ್

• ನಿಯಾನ್‌ ವರ್ಣದವು ಸಖತ್‌ ಟ್ರೆಂಡ್‌ನಲ್ಲಿವೆ. ಇವುಗಳ ಆಯ್ಕೆ ಉತ್ತಮ.
• ಸೆಲೆಬ್ರೆಟಿ ಲುಕ್‌ ಪಡೆಯಲು ಆದಷ್ಟೂ ಟ್ರೆಂಡಿಯಾಗಿರುವ ಸಾಲಿಡ್‌ ಕಲರ್‌ನವನ್ನು ಚೂಸ್‌ ಮಾಡಬೇಕು.
• ಈ ಸೀರೆಗಳಿಗೆ ಗ್ಲಾಮರಸ್‌ ಬ್ಲೌಸ್‌ ಧರಿಸಿದಲ್ಲಿ ಮಾತ್ರ ಚೆನ್ನಾಗಿ ಕಾಣಿಸುವುದು.
• ನಿಮ್ಮ ಪರ್ಸನಾಲಿಟಿಗೆ ಹೊಂದುವುದೇ ಎಂಬುದನ್ನು ನೋಡಿಕೊಂಡು ಖರೀದಿಸುವುದು ಉತ್ತಮ.
• ಇವುಗಳಿಗೆ ಕಾಂಟ್ರಸ್ಟ್ ಬ್ಲೌಸ್‌ ಮ್ಯಾಚ್‌ ಮಾಡಬಹುದು.

(ಲೇಖಕಿ ಫ್ಯಾಷನ್‌ ಪತ್ರಕರ್ತೆ )