-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಒಂದು ನಯಾ ಪೈಸೆ ಖರ್ಚಿಲ್ಲದೇ (Varamahalakshmi Festival 2024) ನಿಮ್ಮ ಸೀರೆಯನ್ನು ಡಿಸೈನರ್‌ ದಾವಣಿ-ಲಂಗವಾಗಿ ಪರಿವರ್ತಿಸಬಹುದು. ಅದು ಹೇಗೆ? ಎಂದು ಯೋಚಿಸುತ್ತಿದ್ದೀರಾ! ಖಂಡಿತಾ ಸಾಧ್ಯ! ಅದು ಯಾವುದೇ ಮ್ಯಾಜಿಕ್‌ನಿಂದಲ್ಲ! ಸೀರೆಯ ಡಿಫರೆಂಟ್‌ ಡ್ರೇಪಿಂಗ್‌ನಿಂದ ಇದು ಸಾಧ್ಯ ಎನ್ನುತ್ತಾರೆ ಡ್ರೇಪಿಸ್ಟ್‌ಗಳು.
ಹೌದು, ಈ ಫೆಸ್ಟಿವ್‌ ಸೀಸನ್‌ನಲ್ಲಿ, ಹೆಚ್ಚು ಖರ್ಚಿಲ್ಲದೇ ರೇಷ್ಮೆ ಸೀರೆಯನ್ನೇ ಲಂಗ-ದಾವಣಿಯಂತೆ ಧರಿಸುವ ಸ್ಟೈಲಿಂಗ್‌ ಟ್ರೆಂಡಿಯಾಗಿದೆ. ನೋಡಲು ಆಕರ್ಷಕವಾಗಿ ಕಾಣಿಸುವ ಡಿಸೈನರ್‌ ಲಂಗ-ದಾವಣಿಯಂತೆ ಸೀರೆಯನ್ನು ಉಡುವ ಶೈಲಿ ಇದೀಗ ಡ್ರೇಪಿಂಗ್‌ ಪ್ಯಾಟರ್ನ್‌ನಲ್ಲಿ ಹೆಚ್ಚು ಪಾಪುಲರ್‌ ಆಗಿದೆ. ಹಾಗಾದಲ್ಲಿ ಅದು ಹೇಗೆ? ಇದಕ್ಕಾಗಿ ಪಾಲಿಸಬೇಕಾದ ಡ್ರೇಪಿಂಗ್‌ ರೂಲ್ಸ್ ಏನು ಎಂಬುದರ ಕುರಿತಂತೆ ಸ್ಟೈಲಿಸ್ಟ್‌ಗಳು ಇಲ್ಲಿ ಸಿಂಪಲ್ಲಾಗಿ ವಿವರಿಸಿದ್ದಾರೆ.

ಸೀರೆಯನ್ನು ದಾವಣಿಯಂತೆ ಡ್ರೇಪ್‌ ಮಾಡುವುದು ಹೇಗೆ?

ಯಾವುದೇ ಸೀರೆ ಬ್ಲೌಸ್‌ ಅಥವಾ ಉದ್ದಲಂಗದ ಲಂಗವನ್ನು ಮೊದಲು ಧರಿಸಬೇಕು. ಮಾಮೂಲಿಯಂತೆ ಸೀರೆಯ ಒಂದು ಅಂಚನ್ನು ದಾವಣಿ ಸಿಕ್ಕಿಸುವಂತೆ ಮುಂಭಾಗದಲ್ಲಿ ಸಿಕ್ಕಿಸಿ, ಹಿಂಭಾಗದಲ್ಲಿ ಎಳೆದು ಒಂದಿಷ್ಟು ನೆರಿಗೆ ಮಾಡಿಕೊಳ್ಳಬೇಕು. ಸೆರಗಿಗೆ ಅಗತ್ಯವಿರುವಷ್ಟು ಸೀರೆಯ ಕೊನೆಯ ಭಾಗವನ್ನು ಉಳಿಸಿಕೊಂಡು, ಇನ್ನುಳಿದ ನೆರಿಗೆಯ ಭಾಗವನ್ನು, ಹಿಂಭಾಗದಲ್ಲಿ ಅಂದರೇ, ಬೆನ್ನಿನ ಹಿಂದೆ ಲಂಗಕ್ಕೆ ಸಿಕ್ಕಿಸಬೇಕು. ನಂತರ ಸೆರಗನ್ನು ಮುಂಭಾಗಕ್ಕೆ ಹಾಕಬೇಕು. ಹಿಂಭಾಗದಲ್ಲಿ ಸೀರೆ ನೀಟಾಗಿ ಸಿಕ್ಕಿಸಬೇಕು. ಜಾರಿ ಹೋಗದಂತೆ ಅದನ್ನು ಪಿನ್‌ ಮಾಡಬೇಕು ಎನ್ನುತ್ತಾರೆ ಸೀರೆ ಡ್ರೇಪರ್‌ ಸಾಕ್ಷಿ. ಇಷ್ಟಾಗಿಯೂ ಈ ಸ್ಟೈಲಿಂಗ್‌ ಮಾಡುವುದು ಗೊತ್ತಾಗದಿದ್ದಲ್ಲಿ, ಯೂ ಟ್ಯೂಬ್‌ನಲ್ಲಿಈ ಶೈಲಿಯ ಡ್ರೇಪಿಂಗ್‌ ಕುರಿತ ಸಾಕಷ್ಟು ಟ್ಯುಟೋರಿಯಲ್‌ ಹಾಗೂ ಕಲಿಸಿಕೊಡುವ ವಿಡಿಯೋಗಳು ಲಭ್ಯವಿದೆ. ಅವುಗಳ ಸಹಾಯ ಪಡೆಯಬಹುದು ಎನ್ನುತ್ತಾರೆ ಅವರು.

ದಾವಣಿ-ಲಂಗ ಮಾಪರ್ಡಿಸಲು ಸೀರೆ ಆಯ್ಕೆ ಹೀಗಿರಲಿ

ಹಬ್ಬದಂದು ಸೀರೆಯನ್ನು ಡಿಸೈನರ್‌ ದಾವಣಿ –ಲಂಗದಂತೆ ಮಾರ್ಪಡಿಸಲು ಸೂಕ್ತವಾದ ಸೀರೆಯ ಆಯ್ಕೆ ಮಾಡಬೇಕು. ಆಗಷ್ಟೇ ಅದು ಉಟ್ಟಾಗ ನೋಡಲು ಆಕರ್ಷಕವಾಗಿ ಕಾಣಿಸುವುದು. ಇದಕ್ಕಾಗಿ ಒಂದಿಷ್ಟು ವಿಷಯಗಳನ್ನು ಗಮನದಲ್ಲಿಟ್ಟುಕೊಳ್ಳಬೇಕು ಎನ್ನುತ್ತಾರೆ ಸೀರೆ ಡ್ರೇಪರ್‌ ನೈನಾ.

• ಹಬ್ಬಕ್ಕೆ ಉಡುವುದಾದಲ್ಲಿ ರೇಷ್ಮೆ ಸೀರೆ ಆಯ್ಕೆ ಮಾಡಬೇಕು.
• ಗ್ರ್ಯಾಂಡ್‌ ಸೀರೆಯಾದಲ್ಲಿ ನೋಡಲು ಆಕರ್ಷಕವಾಗಿ ಕಾಣಿಸುವುದು.
• ಉಡುವ ಲಂಗ, ಸೀರೆಗೆ ಕಾಂಟ್ರಾಸ್ಟ್ ಶೇಡ್‌ನದ್ದಾಗಿರಬೇಕು.
• ಯಾವುದೇ ಹಳೆಯ ಸಾದಾ ಲೆಹೆಂಗಾ ಅಥವಾ ರೇಷ್ಮೆಯ ಲಂಗವಾದರೂ ಸರಿಯೇ ಮ್ಯಾಚ್‌ ಆಗುತ್ತದೆ.
• ಪ್ರಿಂಟೆಡ್‌ ಲಂಗ ಆವಾಯ್ಡ್ ಮಾಡಿ. ಸಾದಾ ಡಿಸೈನ್‌ ಅಥವಾ ಗ್ರ್ಯಾಂಡ್‌ ಬ್ರೋಕೆಡ್‌ನವನ್ನು ಆಯ್ಕೆ ಮಾಡಿ.

( ಲೇಖಕಿ ಫ್ಯಾಷನ್‌ ಪತ್ರಕರ್ತೆ )

ಇದನ್ನೂ ಓದಿ: Varamahalakshmi Festival Fashion: ಫೆಸ್ಟಿವ್‌ ಸೀಸನ್‌ಗೆ ಮರಳಿದ ಹೆಣ್ಣುಮಕ್ಕಳ ಟ್ರೆಡಿಷನಲ್‌ ಉದ್ದ ಲಂಗ!

-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಹೊಸ ತಲೆಮಾರಿನ ಯುವತಿಯರನ್ನು (Prime fashion week) ಗಮನದಲ್ಲಿಟ್ಟುಕೊಂಡು ಡಿಸೈನ್‌ ಮಾಡಲಾದ ಅತ್ಯಾಕರ್ಷಕವಾದ ಡಿಸೈನರ್‌ವೇರ್‌ಗಳು ರ‍್ಯಾಂಪ್‌ ಮೇಲೆ ಮಾಡೆಲ್‌ಗಳು ಧರಿಸಿ ನಡೆಯುತ್ತಿದ್ದರೆ ನೆರೆದಿದ್ದ ಫ್ಯಾಷನ್‌ ಪ್ರಿಯರು ಕಣ್ಣರಳಿಸಿ ನೋಡುತ್ತಿದ್ದರು. ಹೌದು. ಉದ್ಯಾನನಗರಿಯಲ್ಲಿ ಎರಡು ದಿನಗಳ ಕಾಲ ನಡೆದ ಪ್ರೈಮ್‌ ಫ್ಯಾಷನ್‌ ವೀಕ್‌ನಲ್ಲಿ ಸೆಲೆಬ್ರೆಟಿ ಡಿಸೈನರ್‌ ಸಂಜಯ್‌ ಚೊಲಾರಿಯಾ ವಿನ್ಯಾಸಗೊಳಿಸಿದ ನಾನಾ ಬಗೆಯ ಡಿಸೈನರ್‌ವೇರ್‌ಗಳು ಯಶಸ್ವಿಯಾಗಿ ಪ್ರದರ್ಶನಗೊಂಡವು.

ಜೆನ್‌ ಜಿ ಜನರೇಷನ್‌ ಡಿಸೈನರ್‌ವೇರ್ಸ್

ಇಂದಿನ ಜನರೇಷನ್‌ನ ಯುವತಿಯರನ್ನು ಹಾಗೂ ಮಹಿಳೆಯರನ್ನು ಮನದಲ್ಲಿರಿಸಿಕೊಂಡು ಈ ಡಿಸೈನರ್‌ವೇರ್‌ಗಳನ್ನು ʼಇವರಾʼ ಕಾನ್ಸೆಪ್ಟ್ ಹೆಸರಿನಲ್ಲಿ ಮೊದಲ ದಿನದ ರ‍್ಯಾಂಪ್‌ ಶೋಗಾಗಿ ಡಿಸೈನ್‌ ಮಾಡಲಾಗಿದೆ. ವಿಶೇಷವೆಂದರೆ ಈ ಉಡುಗೆಗಳು ಮಹಿಳೆಯ ಆತ್ಮವಿಶ್ವಾಸ ಹಾಗೂ ಬಲದ ಸಂಕೇತವಾಗಿದೆ ಎಂದು ಡಿಸೈನರ್‌ ಸಂಜಯ್‌ ಚೊಲಾರಿಯಾ ಹೇಳಿದರು.

ಡಿಸೈನರ್‌ವೇರ್‌ಗಳ ಯಶಸ್ವಿ ಪ್ರದರ್ಶನ

ಎರಡನೇ ದಿನದ ರ‍್ಯಾಂಪ್‌ ಶೋನಲ್ಲಿ ಜಪಾನ್‌ ಟೆಂಪಲ್‌ ಹೆಸರನ್ನು ಬಿಂಬಿಸುವ ʼಮಿಯಾನಾʼ ಕಾನ್ಸೆಪ್ಟ್‌ನಲ್ಲಿ ಡಿಸೈನರ್‌ವೇರ್‌ಗಳನ್ನು ಸಿದ್ಧಪಡಿಸಲಾಗಿದೆ. ಈ ಡಿಸೈನರ್‌ವೇರ್‌ಗಳು ಕೂಡ ಮಹಿಳೆಯರ ಶಕ್ತಿ, ಸ್ಥೈರ್ಯ ಹಾಗೂ ಬಲದ ದ್ಯೋತಕವಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಸಂಜಯ್‌ ಹೇಳಿದ್ದಾರೆ. ಒಬ್ಬ ಡಿಸೈನರ್‌ ಫ್ಯಾಷನ್‌ ವೀಕ್‌ನಲ್ಲಿ ಎರಡೂ ದಿನವೂ ಡಿಸೈನರ್‌ವೇರ್‌ಗಳನ್ನು ಪ್ರದರ್ಶಿಸುವುದು ಕಷ್ಟ. ಅದನ್ನು ಯಶಸ್ವಿಯಾಗಿ ಪೂರೈಸಿದ್ದೇನೆ. ಇದು ನನಗೆ ಸಂತಸ ತಂದಿದೆ ಎಂದು ಅವರು ವಿಸ್ತಾರ ನ್ಯೂಸ್‌ಗೆ ತಿಳಿಸಿದ್ದಾರೆ.

ನಟಿ ಶುಭಾ ರಕ್ಷಾ & ಪ್ರಿಯಾಂಕಾ ಅರೋರಾ ಶೋ ಸ್ಟಾಪರ್‌

ಫ್ಯಾಷನ್‌ ವೀಕ್‌ನ ಮೊದಲ ದಿನ ನಟಿ ಹಾಗೂ ಮಾಡೆಲ್‌ ಶುಭಾ ರಕ್ಷಾ ಗೋಲ್ಡನ್‌ ಗೌನ್‌ನಲ್ಲಿ ಸೆಲೆಬ್ರೆಟಿ ಶೋ ಸ್ಟಾಪರ್‌ ಆಗಿ ರ‍್ಯಾಂಪ್‌ ವಾಕ್‌ ಮಾಡಿದರು. ಈ ಸಂದರ್ಭದಲ್ಲಿ, ಮಾಧ್ಯಮದೊಂದಿಗೆ ಮಾತನಾಡಿದ ಅವರು, ಸಂಜಯ್‌ ಚೊಲಾರಿಯಾ ಡಿಸೈನರ್‌ವೇರ್‌ಗಳು ನವೋಲ್ಲಾಸ ಹೆಚ್ಚಿಸುತ್ತವೆ ಎಂದು ಹೇಳಿದರು. ಎರಡನೇ ದಿನ ರ‍್ಯಾಂಪ್‌ ಶೋನಲ್ಲಿ ಮಾಡೆಲ್‌ ಪ್ರಿಯಾಂಕಾ ಅರೋರಾ ತ್ರೀ ಪೀಸ್‌ ಗ್ರ್ಯಾಂಡ್‌ ಡಿಸೈನರ್‌ವೇರ್‌ನಲ್ಲಿ ವಾಕ್‌ ಮಾಡಿದರು. ಇವರುಗಳೊಂದಿಗೆ ಡಿಸೈನರ್‌ಗಳಾದ ಸಂಜಯ್‌ ಚೊಲಾರಿಯಾ ಮತ್ತು ಡಿಸೈನರ್‌ ಶ್ಯಾಮಿ ಚೊಲಾರಿಯಾ ಕೂಡ ವಾಕ್‌ ಮಾಡಿದರು.

( ಲೇಖಕಿ ಫ್ಯಾಷನ್‌ ಪತ್ರಕರ್ತೆ )

-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಹೆಣ್ಣು ಮಕ್ಕಳಿಗೆ ಟ್ರೆಡಿಷನಲ್‌ ಲುಕ್‌ ನೀಡುವ (Varamahalakshmi Festival Fashion) ಉದ್ದ ಲಂಗದ ಫ್ಯಾಷನ್‌ ಈ ಫೆಸ್ಟಿವ್‌ ಸೀಸನ್‌ನಲ್ಲಿ ಹೊಸ ವಿನ್ಯಾಸಗಳೊಂದಿಗೆ ಮರಳಿದೆ. ಹೌದು. ವರಮಹಾಲಕ್ಷ್ಮಿ ಹಬ್ಬ ಹೆಣ್ಣು ಮಕ್ಕಳ ಹಬ್ಬ. ಆ ದಿನದಂದು ಮಕ್ಕಳು ಹಾಗೂ ಮಹಿಳೆಯರೆಲ್ಲರೂ ಸಾಂಪ್ರದಾಯಿಕವಾಗಿ ಸಿಂಗರಿಸಿಕೊಂಡು ಹಬ್ಬ ಆಚರಿಸುವುದು ಸಂಪ್ರದಾಯ. ಇದಕ್ಕೆ ಪೂರಕ ಎಂಬಂತೆ, ನಾನಾ ಬಗೆಯ ದೇಸಿ ಲುಕ್ ನೀಡುವ ಉಡುಗೆ-ತೊಡುಗೆಗಳು ಫ್ಯಾಷನ್‌ ಲೋಕಕ್ಕೆ ಕಾಲಿಟ್ಟಿದ್ದು, ಅವುಗಳಲ್ಲಿ ಇದೀಗ ಹೆಣ್ಣು ಮಕ್ಕಳನ್ನು ಅಂದವಾಗಿ ಬಿಂಬಿಸಬಲ್ಲ, ನಮ್ಮ ಸಂಸ್ಕೃತಿಗೆ ಸಾಥ್‌ ನೀಡಬಲ್ಲ ಟ್ರೆಡಿಷನಲ್‌ ಲುಕ್‌ ನೀಡುವಂತಹ ಉದ್ದ –ಲಂಗದ ಡ್ರೆಸ್‌ಗಳು ಮರಳಿವೆ.

ಹೊಸ ಲುಕ್‌ನೊಂದಿಗೆ ಉದ್ದ-ಲಂಗ ರೀ ಎಂಟ್ರಿ

ಉದ್ದ ಲಂಗ ಧರಿಸುವುದು ನಮ್ಮ ಸಂಸ್ಕೃತಿಯಲ್ಲಿ ಹೊಸತೇನಲ್ಲ! ಆದರೆ, ಇತ್ತೀಚಿನ ಹೆಣ್ಣು ಮಕ್ಕಳು ವೆಸ್ಟರ್ನ್‌ ಉಡುಗೆ ತೊಡುಗೆಗಳನ್ನು ಹೆಚ್ಚಾಗಿ ಪ್ರಿಫರ್‌ ಮಾಡುವುದರಿಂದ ಈ ಟ್ರೆಡಿಷನಲ್‌ ಉದ್ದ-ಲಂಗದ ಫ್ಯಾಷನ್‌ ಸೈಡಿಗೆ ಸರಿದಿತ್ತು. ಆದರೆ, ಕೆಲವು ಡಿಸೈನರ್‌ಗಳು ಇವಕ್ಕೆ ಕೊಂಚ ಗ್ರ್ಯಾಂಡ್‌ ಲುಕ್‌ ಹಾಗೂ ಆಕರ್ಷಕ ವಿನ್ಯಾಸವನ್ನು ಸೇರಿಸಿ ಅನಾವರಣಗೊಳಿಸಲಾರಂಭಿಸಿದರು. ಪರಿಣಾಮ, ಹೆಣ್ಣು ಮಕ್ಕಳನ್ನು ಇವು ಆಕರ್ಷಿಸತೊಡಗಿದವು. ಹೈಲೈಟಾಗುವ ಕಲರ್‌ ಕಾಂಬಿನೇಷನ್‌ ಹಾಗೂ ಮನ ಸೆಳೆಯುವ ವಿನ್ಯಾಸ, ಹಬ್ಬಗಳಲ್ಲಿ ಇವನ್ನು ಧರಿಸಲು ಆರಂಭಿಸುವಂತೆ ಮನಪರಿವರ್ತಿಸಿದವು. ಪರಿಣಾಮ ಲೆಕ್ಕವಿಲ್ಲದಷ್ಟು ಬಗೆಯ ವಿನ್ಯಾಸದ ಉದ್ದ-ಲಂಗಗಳು ಮಾರುಕಟ್ಟೆಯನ್ನು ಪ್ರವೇಶಿಸಿದವು. ಹಾಗಾಗಿ ಫೆಸ್ಟಿವ್‌ ಸೀಸನ್‌ನಲ್ಲಿ ಇವುಗಳ ರೀ ಎಂಟ್ರಿ ಟ್ರೆಂಡಿಯಾಗಲು ಕಾರಣವಾಯಿತು ಎನ್ನುತ್ತಾರೆ ಫ್ಯಾಷನ್‌ ವಿಮರ್ಶಕರಾದ ಜಾನ್‌ ಹಾಗೂ ರಚ್ಚು.

ಟ್ರೆಂಡ್‌ನಲ್ಲಿರುವ ಉದ್ದ ಲಂಗದ ವಿನ್ಯಾಸಗಳು

ಕ್ವೀನ್‌ ಡಿಸೈನ್‌, ಕಾಂಟ್ರಾಸ್ಟ್ ಉದ್ದ-ಲಂಗ, ಬಿಗ್‌ ಬಾರ್ಡರ್‌ ಉದ್ದ-ಲಂಗ, ಫ್ಲೋರಲ್‌ ಸಿಲ್ಕ್‌, ರೇಷ್ಮೆಯ ಕಾಂಟ್ರಾಸ್ಟ್ ಶೇಡ್‌ ಉದ್ದ-ಲಂಗ, ಕಮರ್‌ಬಾಂದ್ ಬ್ಲೌಸ್‌ನವು, ಪಫ್‌, ಫೆದರ್‌ ಸ್ಲೀವ್‌ನ ಉದ್ದಲಂಗ, ಗೌನ್‌ ಶೈಲಿಯ ಉದ್ದ-ಲಂಗಗಳು ಈ ಫೆಸ್ಟಿವ್‌ ಸೀಸನ್‌ನ ಟ್ರೆಂಡ್‌ ಲಿಸ್ಟ್‌ನಲ್ಲಿ ಸೇರಿವೆ.

ಆಕರ್ಷಕವಾಗಿರುವ ಉದ್ದ ಲಂಗ ಆಯ್ಕೆ ಮಾಡುವುದು ಹೇಗೆ?

• ಟ್ರೆಂಡಿಯಾಗಿರುವ ಕಾಂಟ್ರಸ್ಟ್ ಶೇಡ್‌ನವು ಮಕ್ಕಳಿಗೆ ಆಕರ್ಷಕವಾಗಿ ಕಾಣಿಸುತ್ತವೆ.
• ಟ್ರೆಡಿಷನಲ್‌ ಸ್ಲೀವ್‌ ಹಾಗೂ ಬಾರ್ಡರ್ ಉದ್ದ-ಲಂಗ ಸಾಂಪ್ರದಾಯಿಕ ಲುಕ್‌ ನೀಡುತ್ತವೆ.
• ಪಾದಗಳಿಗಿಂತ ಕೆಳಗಿರುವ ಲಂಗವನ್ನು ಆಯ್ಕೆ ಮಾಡಬಾರದು.
• ಬ್ಲೌಸ್‌ ಮಕ್ಕಳಿಗೆ ಫಿಟ್‌ ಆಗಿ ಕಾಣಿಸಬೇಕು. ದೊಗಲೆಯಾಗಿರಬಾರದು.
• ಬ್ರೋಕೆಡ್‌ ಪ್ರಿಂಟ್‌ನವು ಹಬ್ಬಕ್ಕೆ ಅಂದವಾಗಿ ಕಾಣಿಸುತ್ತವೆ.

(ಲೇಖಕಿ ಫ್ಯಾಷನ್‌ ಪತ್ರಕರ್ತೆ)

ಇದನ್ನೂ ಓದಿ: Varamahalakshmi Festival 2024: ಹಬ್ಬಕ್ಕೆ ಮಾರುಕಟ್ಟೆ ಪ್ರವೇಶಿಸಿವೆ ರೆಡಿಮೇಡ್‌ ವರಮಹಾಲಕ್ಷ್ಮಿ ಮೂರ್ತಿಗಳು!

-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಮುಂಬರುವ ಹಬ್ಬದ ಅಂಗವಾಗಿ (Varamahalakshmi Festival 2024) ನಾನಾ ರೂಪದಲ್ಲಿ ಅಲಂಕೃತಗೊಂಡ ರೆಡಿಮೇಡ್‌ ವರಮಹಾಲಕ್ಷ್ಮಿ ಉತ್ಸವ ಮೂರ್ತಿಗಳು ಈಗಾಗಲೇ ಮಾರುಕಟ್ಟೆ ಪ್ರವೇಶಿಸಿವೆ. ಹೌದು. ವರಮಹಾಲಕ್ಷ್ಮಿ ಹಬ್ಬ ಮಹಿಳೆಯರ ಫೇವರೇಟ್‌ ಹಬ್ಬ. ಈ ಹಬ್ಬಕ್ಕೆ ಪೂರಕ ಎಂಬಂತೆ, ಈಗಾಗಲೇ ಲೆಕ್ಕವಿಲ್ಲದಷ್ಟು ಬಗೆಯ ಅಲಂಕಾರಿಕ ಸಾಮಗ್ರಿಗಳು ಕಾಲಿಟ್ಟಿದ್ದು, ಇವುಗಳೊಂದಿಗೆ ಕಂಪ್ಲೀಟ್‌ ಅಲಂಕೃತಗೊಂಡ ರೆಡಿಮೇಡ್‌ ವರಮಹಾಲಕ್ಷ್ಮಿಯ ಉತ್ಸವಮೂರ್ತಿಗಳು ಬಂದಿವೆ. ಶ್ರೀಮಂತರು, ಉದ್ಯೋಗಸ್ಥರು ಹಾಗೂ ಸಮಯದ ಅಭಾವವಿರುವವರು, ಇನ್ಮುಂದೆ ಹಬ್ಬದ ದೇವಿಯ ಅಲಂಕಾರದ ಬಗ್ಗೆ ಯೋಚಿಸಬೇಕಾಗಿಲ್ಲ! ಇಂತಹವರಿಗೆಂದೇ ರೆಡಿಮೇಡ್‌ ವರಮಹಾಲಕ್ಷ್ಮಿಯರು ಅಂದರೇ, ಅಲಂಕೃತಗೊಂಡ ಬ್ಯೂಟಿಫುಲ್‌ ಉತ್ಸವ ಮೂರ್ತಿಗಳು ಆಗಮಿಸಿವೆ.

ಕಾನ್ಸೆಪ್ಟ್‌ಗೆ ತಕ್ಕಂತೆ ದೊರೆಯುವ ರೆಡಿಮೇಡ್‌ ವರಮಹಾಲಕ್ಷ್ಮಿ

ಮನೆಯಲ್ಲಿ ಹಬ್ಬ ಆಚರಿಸುವ ಕಾನ್ಸೆಪ್ಟ್‌ಗೆ ತಕ್ಕಂತೆ ವರಮಹಾಲಕ್ಷ್ಮಿಯ ಉತ್ಸವ ಮೂರ್ತಿಗಳು ದೊರಕುತ್ತಿವೆ. ಉದಾಹರಣೆಗೆ, ಫ್ಲೋರಲ್‌ ಥೀಮ್‌ ಆಗಿದ್ದಲ್ಲಿ, ಅಲಂಕೃತಗೊಂಡ ದೇವಿಯ ಕಂಪ್ಲೀಟ್‌ ಉಡುಗೆ-ತೊಡುಗೆ ಹಾಗೂ ಅಲಂಕಾರಿಕ ಆಕ್ಸೆಸರೀಸ್‌ಗಳು ಹೂವಿನ ಡಿಸೈನ್‌ನಿಂದ ಅಲಂಕೃತಗೊಂಡಿರುತ್ತವೆ. ಹಸಿರು ಕಲರ್‌ಗೆ ಪ್ರಾಮುಖ್ಯತೆ ನೀಡುವವರಿಗೆಂದು ಈ ಕಲರ್‌ನ ಸೀರೆ, ಬಳೆ, ಆಭರಣ ಧರಿಸಿರುವ ವರಮಹಾಲಕ್ಷ್ಮಿ ದೊರೆಯುತ್ತವೆ. ಜ್ಯುವೆಲರಿಗಳಿಂದಲೇ ಸೆಳೆಯುವಂಥವು, ಮಧುರೈ ಮೀನಾಕ್ಷಿ, ಕಂಚಿ ಕಾಮಾಕ್ಷಿ, ದಾವಣಿ-ಲಂಗ ಧರಿಸಿದ ಕನ್ಯಾ ಕುಮಾರಿಯಂತೆ ಕಾಣುವ ವರಮಹಾಲಕ್ಷ್ಮಿ, ಕಮಲದ ಹೂವಿನೊಳಗೆ ಕುಳಿತ ಲಕ್ಷ್ಮಿ, ಆದಿ ಶಕ್ತಿಯಂತೆ ಕಾಣಿಸುವ ನಿಂತ ವರಮಹಾಲಕ್ಷ್ಮಿ ಸೇರಿದಂತೆ ನಾನಾ ಕಾನ್ಸೆಪ್ಸ್ಟಗೆ ತಕ್ಕಂತೆ ಅಲಂಕೃತಗೊಂಡ ವರಮಹಾಲಕ್ಷ್ಮಿ ಉತ್ಸವ ಮೂರ್ತಿಗಳು ಗಾಂಧೀ ಬಜಾರ್‌, ಮಲ್ಲೇಶ್ವರದ ಮುಖ್ಯ ರಸ್ತೆಯ ಸುತ್ತ-ಮುತ್ತ, ಜಯನಗರ 4 ನೇ ಬ್ಲಾಕ್‌ ಸೇರಿದಂತೆ ನಾನಾ ಮಾರುಕಟ್ಟೆಗಳಲ್ಲಿ ರಾರಾಜಿಸುತ್ತಿವೆ.

ಅಲಂಕಾರಕ್ಕೆ ತಕ್ಕಂತೆ ಬೆಲೆ ನಿಗದಿ

ಇನ್ನು, ಇವುಗಳ ಬೆಲೆ ಆಯಾ ವರಮಹಾಲಕ್ಷ್ಮಿ ದೇವಿಯ ಸೈಜ್‌ ಹಾಗೂ ಡೆಕೋರೇಷನ್‌ಗೆ ತಕ್ಕಂತೆ ನಿಗದಿಯಾಗಿರುತ್ತದೆ. ಚಿಕ್ಕ ಉತ್ಸವಮೂರ್ತಿಗೆ ಕಡಿಮೆಯೆಂದರೂ 1 ಸಾವಿರ ರೂ.ಗಳ ಬೆಲೆ ಇರುತ್ತದೆ. ಎತ್ತರ ಹಾಗೂ ಡೆಕೋರೇಷನ್‌ ಆಧಾರದ ಮೇಲೆ ಬೆಲೆ ನಿಗಧಿಯಾಗಿರುತ್ತದೆ. ಗರಿಷ್ಠ ಎಂದರೂ 30-40 ಸಾವಿರ ರೂ.ಗಳ ಬೆಲೆಯಿದೆ ಎನ್ನುತ್ತಾರೆ ಗಾಂಧಿ ಬಜಾರ್‌ ಶಾಪ್‌ವೊಂದರ ಮಾರಾಟಗಾರರು. ಅಲ್ಲದೇ ಗ್ರಾಹಕರಿಗೆ ಇವುಗಳ ಉಚಿತ ಹೋಮ್‌ ಡಿಲಿವಿರಿ ಸೌಲಭ್ಯ ಕೂಡ ನೀಡಲಾಗುತ್ತಿದೆ ಎನ್ನುತ್ತಾರೆ ಮಲ್ಲೇಶ್ವರದ ಅಂಗಡಿಯೊಂದರ ಸೇಲ್ಸ್ ಮ್ಯಾನ್‌.

ಇದನ್ನೂ ಓದಿ: Varamahalaxmi Decoration: ವರಮಹಾಲಕ್ಷ್ಮಿಯ ಸಿಂಗಾರಕ್ಕೂ ಬಂತು ಮಿನಿ ವಸ್ತ್ರಾಭರಣಗಳು!

ರೆಡಿಮೇಡ್‌ ವರಮಹಾಲಕ್ಷ್ಮಿ ಖರೀದಿಸುವುದಾದಲ್ಲಿ

• ಹಬ್ಬದ ನಂತರ ಮರಳಿ ತೆಗೆದು ಬಳಸುವುದು ಹೇಗೆ ಎಂಬುದನ್ನು ತಿಳಿದುಕೊಳ್ಳಿ.
• ಗುಣಮಟ್ಟದ ಅಲಂಕಾರಿಕ ಸಾಮಗ್ರಿ ಬಳಸಿದಂತಹ ಉತ್ಸವಮೂರ್ತಿ ಖರೀದಿಸಿ.
• ನಿರ್ವಹಣೆ ಹೇಗೆ? ಬಾಳಿಕೆ ಕುರಿತಂತೆ ಅರಿಯಿರಿ.

(ಲೇಖಕಿ ಫ್ಯಾಷನ್‌ ಪತ್ರಕರ್ತೆ)