Sunday Read: ಜೋಗಿ ಹೊಸ ಪುಸ್ತಕ: ಚಿಯರ್ಸ್: ಅಮರ್ ಅಂತೋಣಿ - Vistara News

ಕಲೆ/ಸಾಹಿತ್ಯ

Sunday Read: ಜೋಗಿ ಹೊಸ ಪುಸ್ತಕ: ಚಿಯರ್ಸ್: ಅಮರ್ ಅಂತೋಣಿ

ಕತೆಗಾರ ಜೋಗಿ ಅವರ ಹೊಸ ಕೃತಿ ʼಚಿಯರ್ಸ್‌‌ʼ ಹಾಗೂ ಇನ್ನಿತರ ಮೂರು ಕೃತಿಗಳು ಇಂದು ಬೆಂಗಳೂರಿನಲ್ಲಿ ಬಿಡುಗಡೆಯಾಗುತ್ತಿವೆ. ಈ ಕೃತಿಯಿಂದ ಆಯ್ದ ಭಾಗ ಇಲ್ಲಿದೆ.

VISTARANEWS.COM


on

jogi book cheers
ಮಹತ್ವದ, ಕುತೂಹಲಕರ ಸುದ್ದಿಗಾಗಿ ಫಾಲೊ ಮಾಡಿ
Koo

ಅಂತೋಣಿ ನೀರಿನಲ್ಲಿ ಮುಳುಗಿ ಸಾಯುವುದಕ್ಕೆ ಮೊದಲು ಏನು ಹೇಳಿದ ಅನ್ನುವುದು ಮಹದೇವನಿಗೆ ಒಗಟಾಗಿಯೇ ಉಳಿದಿದೆ. ಮೂರನೇ ಸಲ ನೀರಿನಿಂದ ಮೇಲೇಳುವ ಹೊತ್ತಿಗೆ ಅಂತೋಣಿಯ ಶ್ವಾಸಕೋಶದೊಳಗೆ ನೀರು ಹೊಕ್ಕಿತ್ತು. ಅವನು ಕೈ ಮೇಲಕ್ಕೆತ್ತಿ ಮಹದೇವನ ಕಡೆ ಕಣ್ಣು ತಿರುಗಿಸಿ ಏನೋ ಹೇಳಿದ. ಅದು ನೀರೊಳಗೆ ಉಸಿರುಬಿಟ್ಟಂತೆ ಗುಳುಗುಳಗುಳುಗುಳ ಸದ್ದು ಮಾಡಿತೇ ಹೊರತು, ಮಹದೇವನಿಗೆ ಒಂಚೂರೂ ಅರ್ಥವಾಗಿರಲಿಲ್ಲ. ಅದಾದ ಕೂಡಲೇ ಮತ್ತೊಂದು ಸಲ ನೀರಲ್ಲಿ ಮುಳುಗಿದ ಅಂತೋಣಿ ಮೇಲೆ ಬರಲಿಲ್ಲ.

ಈ ಘಟನೆ ನಡೆದಾಗ ಮಹದೇವನಿಗೆ ಹತ್ತೊಂಬತ್ತು, ಅಂತೋಣಿಗೆ ಇಪ್ಪತ್ತೇಳು. ಮಹದೇವ ಹದಿನಾಲ್ಕು ವರ್ಷದವನಿದ್ದಾಗ ಅವನಿಗೆ ಅಂತೋಣಿ ಸಿಕ್ಕಿದ್ದ. ಮಹದೇವನಿಗೆ ಅಂತೋಣಿ ಇಷ್ಟವಾಗಲಿಕ್ಕೆ ಕಾರಣ ಅವನು ಹೇಳುತ್ತಿದ್ದ ಪೋಲಿ ಕತೆಗಳು. ಅವನು ಹೊಟ್ಟೆಯೊಳಗೆ ಅಡಗಿಸಿಟ್ಟುಕೊಂಡು ತೋರಿಸುತ್ತಿದ್ದ ಬೆತ್ತಲೆ ಪುಸ್ತಕ. ಅದನ್ನು ಮಹದೇವನ ಕಣ್ಣೆದುರು ಹಿಡಿದು ಅಂತೋಣಿ ಮಹದೇವನಿಗೆ ಹೊಟ್ಟೆ ತೊಳಸುವಂತೆ ಮಾಡುತ್ತಿದ್ದ. ಆದರೂ ಮತ್ತೆ ಮತ್ತೆ ಅದನ್ನು ನೋಡಬೇಕು ಅಂತ ಮಹದೇವನಿಗೆ ಅನ್ನಿಸುತ್ತಿತ್ತು.

ಮಹದೇವ ಶಾಲೆ ಮುಗಿಸಿ ಬರುವಾಗೆಲ್ಲ ಅಂತೋಣಿ ಸಿಗುತ್ತಿದ್ದ. ಶಾನುಭೋಗರ ಮನೆಯ ಗೇಟಿನ ಪಕ್ಕದಲ್ಲಿರುವ ಕಲ್ಲುಬೆಂಚಿನಲ್ಲಿ ಬೀಡಿ ಸೇದುತ್ತಾ ಕೂತಿರುತ್ತಿದ್ದ. ಆ ದಾರಿಯಲ್ಲಿ ಮಹದೇವನನ್ನು ಬಿಟ್ಟರೆ ಮತ್ಯಾರೂ ಬರುತ್ತಿರಲಿಲ್ಲ. ಅಂತೋಣಿಗೂ ಮಾತಾಡಿಸಲು ಯಾರೂ ಸಿಗುತ್ತಿರಲಿಲ್ಲ. ಅದಕ್ಕಾಗಿಯೇ ಅಂತೋಣಿ ದಾರಿಯಲ್ಲಿಯೇ ಕಾಯುತ್ತಾ ಇರುತ್ತಿದ್ದ. ಮಹದೇವ ಬರುತ್ತಿದ್ದಂತೆ ಅವನ ಜತೆಗೇ ಹೆಜ್ಜೆ ಹಾಕುತ್ತಿದ್ದ. ಇಬ್ಬರೂ ಮಾತಾಡುತ್ತಾ ಮಹದೇವನ ಮನೆಯ ಕಡೆ ನಡೆಯುತ್ತಿದ್ದರು.

ಮಹದೇವನ ಮನೆ ಶಾಲೆಯಿಂದ ಮೂರು ಮೈಲು ದೂರವಿತ್ತು. ಅಂತೋಣಿಯ ಮನೆ ಮಹದೇವನ ಮನೆಗಿಂತ ಒಂದು ಮೈಲು ಮೊದಲೇ ಬರುತ್ತಿತ್ತು. ಆದರೂ ಅಂತೋಣಿ ಅವನ ಜತೆಗೇ ಹೋಗಿ, ಮಹದೇವನನ್ನು ಮನೆ ಸೇರಿಸಿಯೇ ವಾಪಸ್ಸು ಬರುತ್ತಿದ್ದ. ಹಾಗಂತ ಮಹದೇವನ ಮನೆಗಾಗಲೀ, ಮನೆಯ ಹತ್ತಿರವಾಗಲೀ ಸುಳಿಯುತ್ತಿರಲಿಲ್ಲ. ಇನ್ನೇನು ಮನೆ ಕಣ್ಣಿಗೆ ಬೀಳುತ್ತದೆ ಅನ್ನುವಷ್ಟರಲ್ಲಿ ವಾಪಸ್ಸು ಹೊರಟು ಹೋಗುತ್ತಿದ್ದ.

ಮೊದಲ ದಿನ ಅಂತೋಣಿಯನ್ನು ನೋಡಿದಾಗ ಮಹದೇವನಿಗೆ ಹೆದರಿಕೆಯಾಗಿತ್ತು. ಶಾನುಭೋಗರ ಮನೆಯ ಕಲ್ಲುಬೆಂಚಿನಲ್ಲಿ ಕೂತು ಬೀಡಿ ಸೇದುತ್ತಿದ್ದ ಅಂತೋಣಿಯನ್ನು ದೂರದಿಂದಲೇ ನೋಡಿ, ತಲೆತಗ್ಗಿಸಿಕೊಂಡು ಹೊರಟ ಮಹದೇವನನ್ನು ಅಂತೋಣಿ ಚಪ್ಪಾಳೆ ತಟ್ಟಿ ಕರೆದಿದ್ದ. ಮಹದೇವ ಭಯದಿಂದ ಹಿಂತಿರುಗಿ ನೋಡಿರಲಿಲ್ಲ. ಅವನು ಮತ್ತೊಮ್ಮೆ ಚಪ್ಪಾಳೆ ತಟ್ಟುತ್ತಿದ್ದಂತೆ ಕೊಂಚ ವೇಗವಾಗಿ ನಡೆದು, ಅವನಿಗೆ ಕಾಣುವುದಿಲ್ಲ ಅಂತ ಅಂದಾಜಾಗುತ್ತಿದ್ದಂತೆ ಓಡಲು ಶುರುಮಾಡಿದ್ದ. ಮನೆಯ ತನಕವೂ ಓಡುತ್ತಾ ಹೋಗಿದ್ದ.

ಮಾರನೇ ದಿನ ಶಾಲೆಯಿಂದ ಬರುವಾಗ ಅವನು ಸಿಗುತ್ತಾನೇನೋ ಅನ್ನುವ ಭಯದಲ್ಲಿಯೇ ಇದ್ದ ಮಹದೇವನಿಗೆ ಕಲ್ಲು ಬೆಂಚಿನ ಮೇಲೆ ಕೂತಿದ್ದ ಅಂತೋಣಿ ಕಣ್ಣಿಗೆ ಬಿದ್ದಿರಲಿಲ್ಲ. ಆದರೂ ಯಾವುದಕ್ಕೂ ಅಲ್ಲಿಂದ ಬೇಗ ಕಣ್ಮರೆಯಾಗಬೇಕು ಅಂತ ಓಡುವುದಕ್ಕೆ ಶುರುಮಾಡಿದ್ದ. ಅಂತೋಣಿ ಅವನಿಗೋಸ್ಕರ ಮುಂದಿನ ತಿರುವಿನಲ್ಲಿ ಕಾಯುತ್ತಿದ್ದ. ಓಡುತ್ತಿದ್ದ ಮಹದೇವನ ಕೈ ಹಿಡಿದು ನಿಲ್ಲಿಸಿದ್ದ. ಓಡುತ್ತಿದ್ದವನನ್ನು ಥಟ್ಟನೆ ಹಿಡಿದು ನಿಲ್ಲಿಸಿದ ರಭಸಕ್ಕೆ ಮೊಳಕೈಯ ಕೀಲು ತಪ್ಪಿದಷ್ಟು ನೋವಾಗಿತ್ತು. ಭಯದಿಂದ ಅಂತೋಣಿಯನ್ನು ನೋಡುತ್ತಾ ಇನ್ನೇನು ಅತ್ತುಬಿಡಬೇಕು ಅನ್ನುವಷ್ಟರಲ್ಲಿ ಅಂತೋಣಿ ಅವನನ್ನು ಮಾತಾಡಿಸಿದ್ದ.

ಅಂತೋಣಿ ಅರ್ಧತೆಂಗಿನಮರದಷ್ಟು ಎತ್ತರ ಇದ್ದ. ಕಪ್ಪು ಬೆಲ್ ಬಾಟಮ್ ಪ್ಯಾಂಟು ಹಾಕಿದ್ದ, ಅಲ್ಲಲ್ಲಿ ಬಣ್ಣಗೆಟ್ಟ ಕೆಂಪು ಬಣ್ಣದ ಶೂ ಹಾಕಿಕೊಂಡಿದ್ದ. ಎಡಗೈಯಲ್ಲಿ ಹೊಳೆಯುವ ವಾಚು, ಅರ್ಧಹೊಟ್ಟೆ ಕಾಣುವಂತೆ ಹಾಕಿಕೊಂಡ ಶರಟು. ಅದರೊಳಗಿನಿಂದ ಇಣುಕುತ್ತಿದ್ದ ಬೆಳ್ಳಿ ಸರವನ್ನೆಲ್ಲ ನೋಡುತ್ತದ್ದಂತೆ ಅವನ ಹತ್ತಿರ ಚೂರಿಯೂ ಇರಬಹುದು ಅಂತ ಮಹದೇವನಿಗೆ ಅನುಮಾನ ಬಂದಿತ್ತು. ಚಂದಮಾಮದಲ್ಲಿ ಓದಿದ ಕಣಿವೆಯ ದರೋಡೆಕೋರರ ನಾಯಕನಂತೆ ಕಾಣುತ್ತಿದ್ದ ಅಂತೋಣಿಯ ಹಿಡಿತದಿಂದ ಬಿಡಿಸಿಕೊಳ್ಳಲು ಹೆಣಗಾಡುತ್ತಿದ್ದಂತೆ ಅಂತೋಣಿ `ಎಂಥದಾ.. ನೀನು ಹೆದರುವುದು ಎಂಥಕಾ’ ಅಂತ ಥೇಟ್ ಕೊಂಕಣಿ ಮಾತಾಡುವ ಶೈಲಿಯಲ್ಲಿ ಕೇಳಿದ್ದ. ಅಂತೋಣಿಯ ಭೀಮಕಾಯಕ್ಕೆ ತಕ್ಕ ಸ್ವರ ಅವನಿಗೆ ಇರಲಿಲ್ಲ. ಮಾತು ಮೃದುವಾಗಿಯೂ ರಾಗವಾಗಿಯೂ ಇತ್ತು. ಅದನ್ನು ಕೇಳುತ್ತಿದ್ದಂತೆ ಮಹದೇವನ ಭಯ ಅರ್ಧ ಹೊರಟುಹೋಗಿತ್ತು.

ಆವತ್ತಿನಿಂದ ಮಹದೇವನ ಸಂಜೆಯ ಸಂಗಾತಿಯಾಗಿ ಅಂತೋಣಿ ಜತೆಯಾಗುತ್ತಿದ್ದ. ಮಹದೇವನ ಜಗತ್ತನ್ನು ವಿಸ್ತರಿಸಿದ್ದೇ ಅಂತೋಣಿ. ಬೆಂಗಳೂರಿನಲ್ಲಿರುವ ಡಬಲ್ ಡೆಕರ್ ಬಸ್ಸು, ಮಂಗಳೂರಿನ ಬಂದರಿಗೆ ಬಂದು ಹಡಗನ್ನೇ ಮಗುಚಿಹಾಕಿದ ತಿಮಿಂಗಿಲ, ವೆಂಕಟರಮಣ ಸ್ವಾಮಿ ದೇವಸ್ಥಾನದ ರಥೋತ್ಸವದಲ್ಲಿ ಇನ್ನೇನು ರಥ ನೆಲಕ್ಕೆ ಬೀಳಬೇಕು ಅನ್ನುವಷ್ಟರಲ್ಲಿ ಓಡಿ ಬಂದು ಬೆನ್ನುಕೊಟ್ಟು ಎತ್ತಿದ ಉಜಿರೆಯ ಆನೆಯ ಕತೆ, ಹಡಗು ಬಂದಾಗ ಎದ್ದು ದಾರಿಕೊಡುವ ಇಂಗ್ಲೆಂಡಿನ ಸೇತುವೆ -ಹೀಗೆ ನೂರೆಂಟು ಸಂಗತಿಗಳು ಅಂತೋಣಿಗೆ ಗೊತ್ತಿದ್ದವು.

ಇವೆಲ್ಲದರ ಜತೆಗೆ ಅಂತೋಣಿ ವಿಚಿತ್ರವಾದ ಕತೆಗಳನ್ನೂ ಹೇಳುತ್ತಿದ್ದ. ಮಡಿಕೇರಿಯಲ್ಲಿರುವ ಕಾಲು ಕಳೆದುಕೊಂಡ ಸೈನಿಕನ ಹೆಂಡತಿ, ಮತ್ತೊಬ್ಬ ಗೆಳೆಯನ ಜತೆ ಓಡಾಡುತ್ತಿದ್ದದ್ದು. ಅದು ಗಂಡನಿಗೆ ಗೊತ್ತಾಗುತ್ತಿದ್ದಂತೆ ಅವಳು ಗುಡ್ಡದಿಂದ ಹಾರಿ ಆತ್ಮಹತ್ಯೆ ಮಾಡಿಕೊಂಡದ್ದು, ತಾನು ಸಾಯುವಾಗ ಅವನನ್ನೂ ಜತೆಗೇ ಎಳೆದುಕೊಂಡು ಬೆಟ್ಟದಿಂದ ಹಾರಿದ್ದು- ಇದನ್ನೆಲ್ಲ ಕಣ್ಮುಂದೆ ನಡೆದಂತೆ ಹೇಳುತ್ತಿದ್ದ. ಅದನ್ನೆಲ್ಲ ಮಹದೇವ ನಿಜ ಎಂದೇ ನಂಬುತ್ತಿದ್ದ. ಎಷ್ಟೋ ವರ್ಷಗಳ ನಂತರವಷ್ಚೇ ಮಹದೇವನಿಗೆ ಅಂತೋಣಿ ಹೇಳಿದ್ದು ಎಡಕಲ್ಲು ಗುಡ್ಡದ ಮೇಲೆ ಸಿನಿಮಾದ ಕತೆ ಅಂತ ಗೊತ್ತಾಗಿತ್ತು.

ಅಂತೋಣಿಗೆ ಕತೆಗೂ ಬದುಕಿಗೂ ವ್ಯತ್ಯಾಸವೇ ಇರಲಿಲ್ಲ. ತಾನು ನೋಡಿದ, ಓದಿದ, ಕೇಳಿದ ಕತೆಯನ್ನೆಲ್ಲ ನಡೆದಿದೆ ಎಂಬಂತೆ ಅವನು ಹೇಳುತ್ತಿದ್ದುದನ್ನು ಬೆರಗಿನಿಂದ ಕೇಳಿಸಿಕೊಳ್ಳುತ್ತಾ ಮಹದೇವನ ಒಳಗೊಂದು ಹೊಸದೇ ಲೋಕ ಸೃಷ್ಟಿಯಾಗುತ್ತಾ ಹೋಯಿತು.

ಮಹದೇವನ ಮನೆ ಇದ್ದದ್ದು ಊರಿನಿಂದ ಹೊರಗೆ. ಅವನ ಅಪ್ಪ ಶಾನುಭೋಗರ ಮನೆಗೆ ಕೂಲಿ ಕೆಲಸಕ್ಕೆ ಹೋಗುತ್ತಿದ್ದರು. ಶಾನುಭೋಗರ ಮುಂದೆ ಕೈ ಮುಗಿದು ನಿಲ್ಲುತ್ತಿದ್ದ ಅಪ್ಪನನ್ನು ಮಹದೇವ ನೋಡಿದ್ದ. ಶಾನುಭೋಗರ ಬಗ್ಗೆ ಮಹದೇವನಿಗೂ ಆಗ ಆರಾಧನಾ ಭಾವ ಇತ್ತು. ಅವರು ದೇವರ ಪ್ರತಿರೂಪ ಎಂದೇ ಅವನೂ ನಂಬಿದ್ದ.

ಅಂಥ ಭಾವನೆಯನ್ನು ಕಿತ್ತು ಎಸೆದಿದ್ದ ಅಂತೋಣಿ.  

ದೇವರ ಕಣ್ಣಲ್ಲಿ ಎಲ್ಲರೂ ಸಮಾನರು. ಎಲ್ಲಾ ಮನುಷ್ಯರೂ ಒಂದೇ. ಇಲ್ಲಿ ದೊಡ್ಡವರು ಸಣ್ಣವರು ಅಂತ ಆಗುವುದು ದುಡ್ಡಿನಿಂದ. ಜಾಸ್ತಿ ದುಡ್ಡಿದ್ದವನು ದೊಡ್ಡ ಮನುಷ್ಯ. ಅವನಿಗೆ ಎಲ್ಲರೂ ನಮಸ್ಕಾರ ಮಾಡುತ್ತಾರೆ. ನೀನೇ ದೇವರು ಅನ್ನುತ್ತಾರೆ. ಆದರೆ ಇದು ನಮ್ಮ ಧರ್ಮದಲ್ಲಿ ಮಾತ್ರ. ನಿಮ್ಮ ಧರ್ಮದಲ್ಲಿ ಎಷ್ಟು ದುಡ್ಡು ಸಂಪಾದನೆ ಮಾಡಿದರೂ ಜಾತಿಯನ್ನು ಕಳೆದುಕೊಳ್ಳಲಿಕ್ಕೆ ಆಗುವುದಿಲ್ಲ. ನಿನ್ನ ಜಾತಿ ಯಾವುದು ಅಂತ ಕೇಳುತ್ತಾರೆ. ನಿನ್ನನ್ನು ಗರ್ಭಗುಡಿಯ ಒಳಗೆ ಬಿಡುವುದಿಲ್ಲ. ಸ್ವಂತ ಸಾಧನೆಯಿಂದ ಸಮಾನತೆ ಸಾಧಿಸುವುದಕ್ಕೆ ನಿಮ್ಮ ಧರ್ಮದಲ್ಲಿ ಅವಕಾಶ ಇಲ್ಲ. ನಮ್ಮಲ್ಲಿ ಅದು ಸಾಧ್ಯ ಉಂಟು. ನಾನು ಮನಸ್ಸು ಮಾಡಿದರೆ ನಮ್ಮ ಚರ್ಚಿನ ಫಾದರ್ ಆಗಬಹುದು. ನೀನು ದೇವಸ್ಥಾನದ ಪೂಜಾರಿ ಆಗಲಿಕ್ಕೆ ಸಾಧ್ಯ ಇಲ್ಲ. ಹಾಗೇನಾದರೂ ಆಗಬೇಕಾದರೆ ನೀನು ಮತ್ತೊಂದು ಸಲ ಹುಟ್ಟಿ ಬರಬೇಕು. ಅದೂ ಅವರ ಜಾತಿಯಲ್ಲಿ ಹುಟ್ಟಬೇಕು.

ಹೀಗೆ ಮಾತಾಡುತ್ತಿದ್ದ ಅಂತೋಣಿಯನ್ನು ಕ್ರಮೇಣ ಮಹದೇವ ಆರಾಧಿಸಲು ಆರಂಭಿಸಿದ್ದ. ತನಗೆ ಬೇಕಾಗಿದ್ದ ಬಿಡುಗಡೆ ಅವನಿಂದ ಸಿಕ್ಕಿದೆ ಅಂತ ಮಹದೇವನಿಗೆ ಅನ್ನಿಸತೊಡಗಿತ್ತು. ಶಾಲೆಯಲ್ಲಿ ಕಲಿಯುತ್ತಿದ್ದ ಪಾಠ ಅರ್ಥವಾಗಲು ಬೇಕಾದ ಬದುಕಿನ ಜ್ಞಾನವನ್ನು ಅಂತೋಣಿ ಹೇಳಿಕೊಡುತ್ತಿದ್ದ. ಅಂತೋಣಿ ಇಲ್ಲದೇ ಹೋಗಿದ್ದರೆ ತಾನು ಹೇಗಿರುತ್ತಿದ್ದೆ ಅನ್ನುವುದನ್ನು ಮಹದೇವನಿಗೆ ಕಲ್ಪಿಸಿಕೊಳ್ಳಲೂ ಸಾಧ್ಯವಿರಲಿಲ್ಲ.

-2-

ಮಹದೇವ ಮುಂಬಯಿಗೆ ಬಂದು ಮೂವತ್ತು ವರ್ಷಗಳಾದ ನಂತರವೂ ಮುಖ್ಯವಾದ ನಿರ್ಧಾರ ತೆಗೆದುಕೊಳ್ಳಬೇಕಾದ ಸಂದರ್ಭದಲ್ಲಿ ಅವನಿಗೆ ಅಂತೋಣಿ ನೆನಪಾಗುತ್ತಾನೆ. ಮನಸ್ಸಿನಲ್ಲಿ ಅಂತೋಣಿಯನ್ನು ನೆನೆದೇ ಅವನು ಇಕ್ಕಟ್ಟಿನ ಸಂದರ್ಭಗಳಲ್ಲಿ ಒಂದು ತೀರ್ಮಾನಕ್ಕೆ ಬರುವುದು. ಹಾಗೆ ಮಾಡಿದಾಗೆಲ್ಲ ಅವನು ಗೆದ್ದಿದ್ದಾನೆ

ಮಹದೇವ ಟ್ರಾನ್ಸ್‌ಪೋರ್ಟ್ ಕಂಪೆನಿಯಲ್ಲಿ ಜನರಲ್ ಮ್ಯಾನೇಜರ್. ದಕ್ಷಿಣ ವಲಯದ ಮುಖ್ಯಸ್ಥನಾಗಿದ್ದ ಅವನು ಮೂರು ಸಾವಿರ ಡ್ರೈವರುಗಳನ್ನು ನಿಭಾಯಿಸಬೇಕಾಗಿತ್ತು. ಒಮ್ಮೆ ಒಬ್ಬ ಡ್ರೈವರ್ ಕುಡಿದು ಲಾರಿ ಓಡಿಸಿದನೆಂದು ಅವನನ್ನು ಅವನ ಮೇಲಧಿಕಾರಿ ಕೆಲಸದಿಂದ ತೆಗೆದಿದ್ದ. ದುರದೃಷ್ಟವಶಾತ್ ಅವನು ಲಾರಿ ಡ್ರೈವರುಗಳ ಸಂಘದ ಅಧ್ಯಕ್ಷನಾಗಿದ್ದ.ಡ್ರೈವರುಗಳನ್ನೆಲ್ಲ ಸೇರಿಸಿ ಅವನು ಧರಣಿ ಕೂತ. ಲಾರಿಗಳು ಎಲ್ಲಿದ್ದವೋ ಅಲ್ಲೇ ಹೇಗಿದ್ದವೋ ಹಾಗೆ ರಸ್ತೆ ಬದಿಯಲ್ಲಿ ನಿಂತುಬಿಟ್ಟವು. ಕನ್‌ಸೈನುಮೆಂಟುಗಳು ತಲುಪಬೇಕಾದ ಜಾಗವನ್ನು ಸರಿಯಾದ ಹೊತ್ತಲ್ಲಿ ತಲುಪದೇ ಹೋದರೆ ಸಂಸ್ಥೆಯ ಹೆಸರು, ಹಣ ಎರಡೂ ನಷ್ಟವಾಗುತ್ತಿತ್ತು.

ಈ ಪರಿಸ್ಥಿತಿಯನ್ನು ನಿಭಾಯಿಸುವ ಹೊಣೆಯಲು ಚೇರ್‌ಮನ್ ಮಹದೇವನ ತಲೆಗೆ ಕಟ್ಟಿದರು. ಮಹದೇವ ತನ್ನ ಅಧಿಕಾರಿಗಳನ್ನು ಕರೆಸಿ ಮೀಟಿಂಗ್ ನಡೆಸಿದಾಗ, ಡ್ರೈವರುಗಳೆಲ್ಲ ಯಾವುದಕ್ಕೂ ಬಗ್ಗುವುದಿಲ್ಲ ಅನ್ನುವ ಸೂಚನೆ ಸಿಕ್ಕಿತು. ಎಲ್ಲರೂ ಕಂಗಾಲಾಗಿ ಹೋಗಿದ್ದರು. ಬೇರೆ ಬೇರೆ ಕಂಪೆನಿಗಳಿಂದ ಕರೆ ಬರುವುದಕ್ಕೆ ಶುರುವಾಗಿತ್ತು. ಲಾರಿಗಳು ರಸ್ತೆ ಬದಿಯಲ್ಲಿ ನಿಂತಿವೆ ಅನ್ನುವ ಕಾರಣಕ್ಕೆ ಪೊಲೀಸರು ಕೇಸು ಜಡಿಯುತ್ತಿದ್ದರು. ಎಷ್ಟೋ ಕಡೆ ಪುಂಡರು ಲಾರಿಯಲ್ಲಿರುವ ವಸ್ತುಗಳನ್ನೆಲ್ಲ ದೋಚಲು ಆರಂಭಿಸಿದ್ದರು.

ಮಹದೇವ ಮೀಟಿಂಗಿನಿಂದ ಎದ್ದು ಹೋಗಿ ಹತ್ತು ನಿಮಿಷ ಮೌನವಾಗಿ ನಿಂತು ಅಂತೋಣಿಯನ್ನು ನೆನೆದಿದ್ದ. ನಂತರ ಒಳಗೆ ಬಂದು ಸಸ್ಪೆಂಡ್ ಆಗಿದ್ದ ಡ್ರೈವರ್ ಜತೆಗೆ ಮುಷ್ಕರ ಹೂಡಿದ್ದ ಅಷ್ಟೂ ಮಂದಿಯನ್ನು ಸಸ್ಪೆಂಡ್ ಮಾಡುವ ನಿರ್ಧಾರ ಕೈಗೊಂಡಿದ್ದ. ಆ ಲಾರಿಗಳನ್ನು ಓಡಿಸಲು ಆಯಾ ಊರಿನಲ್ಲಿರುವ ನಿವೃತ್ತ ಡ್ರೈವರುಗಳಿಗೆ ಹೇಳುವುದೆಂದು ತೀರ್ಮಾನಿಸಿದ್ದ. ನೂರು ವರ್ಷ ಕಳೆಯ ಕಂಪೆನಿ ಆಗಿದ್ದರಿಂದ ಪ್ರತಿ ಊರಲ್ಲೂ ಒಬ್ಬರೋ ಇಬ್ಬರೋ ನಿವೃತ್ತ ಡ್ರೈವರುಗಳು ಇದ್ದೇ ಇದ್ದರು. ಕಂಪೆನಿಯ ಡಾಟಾಬೇಸ್ ತರಿಸಿ, ಡ್ರೈವರುಗಳ ನಂಬರ್ ಹುಡುಕಿ, ಅವರನ್ನು ತಕ್ಷಣವೇ ಹಂಗಾಮಿಯಾಗಿ ಕೆಲಸಕ್ಕೆ ತೆಗೆದುಕೊಂಡು ಲಾರಿಗಳು ಚಾಲೂ ಆಗುವಂತೆ ಮಾಡಿದ್ದ. ನಾಲ್ಕೈದು ಮಂದಿ ಹಲ್ಲೆ ಮಾಡಲು ಮುಂದಾದಾಗ ಪೊಲೀಸರ ಮೂಲಕ ಅವರನ್ನು ಹತ್ತಿಕ್ಕಿದ್ದ.

ಒಂದೆರಡು ಕಡೆ ನಿವೃತ್ತ ಡ್ರೈವರುಗಳು ಲಾರಿ ಹೊರಡಿಸುತ್ತಿದ್ದಂತೆ, ಮಿಕ್ಕ ಡ್ರೈವರುಗಳೆಲ್ಲ ತಾವಾಗಿಯೇ ಮುಷ್ಕರ ನಿಲ್ಲಿಸಿದರು. ಅರ್ಧದಿನದೊಳಗೆ ಸಮಸ್ಯೆ ಕರಗಿಹೋಗಿತ್ತು. ಎಲ್ಲರೂ ಅವನ ನಿರ್ಧಾರವನ್ನು ಕೊಂಡಾಡಿದ್ದರು. ಚೇರ್ಮನ್ ಮಾತ್ರ ಅಸಮಾಧಾನಗೊಂಡಿದ್ದರು.

`ಅಲ್ರೀ, ಎಲ್ಲರೂ ರಾಜೀನಾಮೆ ಕೊಟ್ಟಿದ್ರೆ ಏನು ಮಾಡ್ತಿದ್ರಿ. ಇಂಥ ರಿಸ್ಕ್ ತಗೋಬಾರದು. ನಾನಾಗಿದ್ರೆ ಸಸ್ಪೆಂಡ್ ಮಾಡಿದ್ದ ಡ್ರೈವರನ್ನು ವಾಪಸ್ ತಗೋತಿದ್ದೆ. ಎಲ್ಲಾ ಸರಿಹೋಗಿರೋದು’ ಅಂದಿದ್ದರು. ಅದಕ್ಕೆ ಮಹದೇವ ಅಷ್ಟೇ ಸ್ಪಷ್ಟವಾಗಿ `ಅವನು ಸಸ್ಪೆಂಡ್ ಆಗಿರೋದು ಕುಡಿದು ಡ್ರೈವ್ ಮಾಡಿದ್ದಕ್ಕೆ. ಅವನನ್ನು ಸಸ್ಪೆಂಡ್ ಮಾಡಿರೋದು ನಮ್ಮ ವಿಜಿಲೆನ್ಸ್ ಟೀಮ್. ಈಗ ಅವನನ್ನು ವಾಪಸ್ ತೆಗೆದುಕೊಂಡರೆ ಎಲ್ಲರಿಗೂ ಯಾವ ಮೆಸೇಜ್ ಹೋಗುತ್ತೆ ಯೋಚನೆ ಮಾಡಿ. ನಾಳೆ ಎಲ್ಲರೂ ಕುಡಿದು ಡ್ರೈವ್ ಮಾಡೋಕೆ ಶುರು ಮಾಡ್ತಾರೆ. ಎಲ್ಲರ ಮೊರೇಲೂ ಹಾಳಾಗುತ್ತೆ. ಅದು ಆಗಬಾರದು ಅಂದ್ರೆ ನಾವು ಗಟ್ಟಿಯಾಗಿ ನಿಲ್ಲಬೇಕು’ ಅಂದಿದ್ದ.

ಆ ಪ್ರಕರಣದಿಂದಾಗಿ ಚೇರ್ಮನ್ನಿಗೂ ಅವನಿಗೂ ಅಂತರ ಬೆಳೆಯಿತು. ಆದರೆ ಕಂಪೆನಿಯಲ್ಲಿ ಅವನ ಬಗ್ಗೆ ಗೌರವ ಹೆಚ್ಚಾಯಿತು. ಬೇರೆ ಸಂಸ್ಥೆಗಳ ಮೀಟಿಂಗಿನಲ್ಲಿ ಈ ಕುರಿತು ಚರ್ಚೆಯಾಯಿತು. ಮಿಕ್ಕ ಟ್ರಾನ್ಸ್ ಪೋರ್ಟ್ ಕಂಪೆನಿಗಳು ಕೂಡ ಕಟ್ಟುಪಾಡುಗಳನ್ನು ಬಿಗಿಗೊಳಿಸಿದವು. ಎಲ್ಲಕ್ಕಿಂತ ಹೆಚ್ಚಾಗಿ ಫ್ಯಾಮಿಲಿ ಮೀಟ್ ದಿನದಂದು ಡ್ರೈವರುಗಳ ಹೆಂಡತಿ ಮಕ್ಕಳೆಲ್ಲ ಮಹದೇವನ ನಿರ್ಧಾರವನ್ನು ಮೆಚ್ಚಿಕೊಂಡು ನಾಲ್ಕು ಮಾತಾಡಿದ್ದರು.

ನಮ್ಮ ಮನಸ್ಸಿನ ವಿರುದ್ಧ ಹೋಗಬಾರದು. ಆದರೆ ಅದಕ್ಕಿಂತ ಮುಖ್ಯವಾಗಿ ತತ್ವದ ವಿರುದ್ಧ ಹೋಗಬಾರದು. ಮನಸ್ಸಿನ ಮಾತು ಕೇಳದೇ ಹೋದರೆ ನಮಗೆ ಮಾತ್ರ ಸಮಸ್ಯೆಯಾಗುತ್ತದೆ. ತತ್ವದ ಮಾತಿಗೆ ಕಿವಿಗೊಡದೇ ಇದ್ದರೆ ಒಂದು ಸಮುದಾಯವೇ ತೊಂದರೆಗೆ ಒಳಗಾಗುತ್ತದೆ. ಅದಾಗಲಿಕ್ಕೆ ಯಾವತ್ತೂ ಅವಕಾಶ ಕೊಡಬಾರದು. ಅದು ನಿಜವಾದ ನಾಯಕನ ಲಕ್ಷಣ.

ಹಾಗಂತ ಅಂತೋಣಿ ಹೇಳಿದ್ದು ಮಹದೇವನಿಗೆ ಅಸ್ಪಷ್ಟವಾಗಿ ನೆನಪಿದೆ. ಹತ್ತೊಂಬತ್ತನೆಯ ವಯಸ್ಸಿನಲ್ಲಿ ಅಂತೋಣಿ ತುಂಬಿದ ಆತ್ಮವಿಶ್ವಾಸ, ಧೈರ್ಯ ಎರಡನ್ನೂ ಮಹದೇವ ಧಾರಾಳವಾಗಿ ಖರ್ಚು ಮಾಡುತ್ತಾ ಬಂದಿದ್ದಾನೆ. ಕಷ್ಟ ಎದುರಾದಾಗ ಅಂತೋಣಿಯನ್ನು ನೆನೆಯುತ್ತಾನೆ. ಸಂದಿಗ್ಧ ಬಂದಾಗ ಅಂತೋಣಿಯ ನೆನಪು ಮಾಡಿಕೊಳ್ಳುತ್ತಾನೆ. ಯಾರಾದರೂ ಗೊತ್ತಿಲ್ಲದ ಪ್ರಶ್ನೆ ಕೇಳಿದಾಗ, ಅಂತೋಣಿ ಸರ್ ಹತ್ರ ಕೇಳಿ ಹೇಳುತ್ತೇನೆ ಅನ್ನುತ್ತಾನೆ. ಅವನ ಗೆಳೆಯರು, ಹೆಂಡತಿ, ಮಕ್ಕಳು, ಸಹೋದ್ಯೋಗಿಗಳೆಲ್ಲ ಅಂತೋಣಿ ಎಂಬ ಮಹಾಮಹಿಮ ಎಲ್ಲೋ ಇದ್ದಾನೆ. ಅವನು ಮಹಾ ಪ್ರತಿಭಾವಂತ, ಮಹದೇವನ ಮ್ಯಾನೇಜ್‌ಮೆಂಟ್ ಗುರು ಎಂದು ನಂಬಿದ್ದಾರೆ.

-3-

ಅಂತೋಣಿ ಹೊಳೆಯಲ್ಲಿ ಮುಳುಗಿ ಸಾಯುವ ಮೊದಲು ಆಡಿದ ಮಾತನ್ನು ಮಾತ್ರ ಮಹದೇವನಿಗೆ ಡೀಕೋಡ್ ಮಾಡಲು ಸಾಧ್ಯವಾಗಿಲ್ಲ. ಎರಡು ಮೂರು ದಿನಗಳಿಂದ ಅಂತೋಣಿ ಸಪ್ಪಗಿದ್ದದ್ದು ಮಹದೇವನ ಗಮನಕ್ಕೂ ಬಂದಿತ್ತು. ದಿನಕ್ಕೊಂದು ಪೋಲಿ ಕತೆ ಹೇಳುತ್ತಿದ್ದ ಅಂತೋಣಿ, ಆ ಎರಡು ದಿನ ಮಾತ್ರ ಒಂಚೂರು ನಕ್ಕಿರಲಿಲ್ಲ. ಎಂದಿನಂತೆ ಅವನ ಬೆರಳುಗಳ ನಡುವೆ ಸಿಗರೇಟು ಉರಿಯುತ್ತಿರಲಿಲ್ಲ. ಅವನು ಶಾನುಭೋಗರ ಮನೆಯ ಗೇಟಿನ ಸಮೀಪದ ಕಲ್ಲುಬೆಂಚಿನ ಮೇಲೆ ಕುಳಿತಿರಲಿಲ್ಲ.

ಅವನಿಗೇನೋ ಆಗಿದೆ ಅಂತ ಮಹದೇವನಿಗೆ ಅನ್ನಿಸಿದ್ದರೂ ಮೊದಲ ದಿನ ಕೇಳುವುದಕ್ಕೆ ಧೈರ್ಯವಾಗಿರಲಿಲ್ಲ. ಅಂತೋಣಿ ಯಾವತ್ತೂ ಖಾಸಗಿ ವಿಷಯಗಳ ಕುರಿತು ಮಾತಾಡುತ್ತಲೇ ಇರಲಿಲ್ಲ. ಮಹದೇವ ಪಿಯು ಕಾಲೇಜಿನಿಂದ ಬರುತ್ತಿದ್ದ ಹಾಗೇ, ಸಿಗರೇಟು ಹೊಸಕಿ, ಅವನತ್ತ ನಡೆದುಬರುತ್ತಿದ್ದ ಅಂತೋಣಿ ಮುಗುಳ್ನಕ್ಕರೆ ಅದೇ ನಮಸ್ಕಾರ. ನಂತರ ಇದ್ದಕ್ಕಿದ್ದಂತೆ ಮಾತು ಶುರುಮಾಡುತ್ತಿದ್ದ `ಸೂರ್ಯಗ್ರಹಣದ ದಿನ ಸೂರ್ಯನನ್ನು ರಾಹು ನುಂಗುತ್ತದೆ, ಕೇತು ನುಂಗುತ್ತದೆ ಅಂತ ನಂಬಿದ್ದರಲ್ಲ. ಅದು ಸುಳ್ಳು ಅಂತ ವಿಜ್ಞಾನಿಗಳು ಹೇಳಿದ್ದಾರೆ. ಆದರೆ ಜ್ಯೋತಿಷ್ಯಶಾಸ್ತ್ರದಲ್ಲಿ ರಾಹು ಕೇತು ನುಂಗುತ್ತದೆ ಅಂತ ಹೇಳಿಲ್ಲ. ಆವರಿಸಿಕೊಳ್ಳುತ್ತದೆ ಅಂತ ಬರೆದಿದ್ದಾರೆ. ಅದು ಸುಲಭವಾಗಿ ಅರ್ಥವಾಗಲಿ ಅಂತ ನುಂಗುತ್ತದೆ ಅಂತ ಮಕ್ಕಳಿಗೆ ಹೇಳಿಕೊಟ್ಟಿರ್ತಾರೆ. ಮುಟ್ಟಾದಾಗ ಕಾಗೆ ಮುಟ್ಟಿತು ಅಂತ ಹೇಳೋದಿಲ್ಲವ? ಅದು ಕಾಗೆ ಮುಟ್ಟುವುದಲ್ಲ ಅಂತ ಗೊತ್ತಿದ್ದರೂ ಹಾಗೆ ಹೇಳ್ತಾರಲ್ಲ, ಇದೂ ಹಾಗೆಯೇ. ಇದನ್ನು ಜನಪದದ ನುಡಿಗಟ್ಟು ಅಂತಾರೆ’ ಅಂತ ಹಿಂದುಮುಂದಿಲ್ಲದೇ ಮಾತು ಶುರುಮಾಡುತ್ತಿದ್ದ ಅಂತೋಣಿ, ಅದನ್ನೆಲ್ಲ ಹೇಳಲೆಂದೇ ಕಂಠಪಾಠ ಮಾಡಿಕೊಂಡು ಕಾಯುತ್ತಿದ್ದನೇನೋ ಅಂತ ಯಾರಿಗೇ ಆದರೂ ಅನ್ನಿಸುತ್ತಿತ್ತು.

ಆ ಎರಡು ದಿನ ಅಂತೋಣಿ ಯಾಕೆ ಏನೂ ಮಾತಾಡದೇ ಸುಮ್ಮನಿದ್ದ ಅನ್ನುವುದು ಮಹದೇವನಿಗೆ ಗೊತ್ತಾಗದೇ ಹೋದರೂ, ಮೌನವಾಗಿರುವ ಅಂತೋಣಿಯನ್ನು ಸಹಿಸಿಕೊಳ್ಳುವುದು ಕಷ್ಟ ಎನ್ನುವುದು ಮಾತ್ರ ಅರಿವಾಯಿತು. ಒಳ್ಳೆಯವರ ಮೌನವನ್ನೂ ಕೆಟ್ಟವರ ಮಾತನ್ನೂ ತಡಕೊಳ್ಳುವುದು ಕಷ್ಟ ಅಂತ ಹಿಂದೊಮ್ಮೆ ಅಂತೋಣಿಯೇ ಹೇಳಿದ್ದು ನೆನಪಾಗಿತ್ತು. ಅಂತೋಣಿಯ ಹತ್ತಿರ ನಿನಗೇನಾಗಿದೆ ಅಂತ ಕೇಳುವುದೋ ಬೇಡವೋ ಅನ್ನುವ ಗೊಂದಲದಲ್ಲೇ ಎರಡು ದಿನ ಕಳೆದಿತ್ತು.

ಮೂರನೆಯ ದಿನ ಶಾನುಭೋಗರ ಮನೆಯ ಗೇಟಿನ ಮುಂದೆ  ಮೂರೋ ನಾಲ್ಕೋ ಮಂದಿ ಅಪರಿಚಿತರು ನಿಂತಿದ್ದರು. ಅವರನ್ನು ಮಹದೇವ ಆ ಮೊದಲು ಎಲ್ಲೂ ನೋಡಿರಲಿಲ್ಲ. ಆವತ್ತು ಮಹದೇವ ಮನೆಗೆ ಹೋಗುತ್ತಲೇ ಅಪ್ಪ ಆತಂಕದ ಸ್ವರದಲ್ಲಿ ನಿನಗೆ ಅಂತೋಣಿ ಗೊತ್ತಿದ್ದಾನಾ ಕೇಳಿದ್ದರು. ಮಹದೇವ ಕಣ್ಣೋಜಿಯಂತೆ ಅಂಟೋಣಿಯಾ, ಯಾರದು ಅಂತ ಕೇಳಿದ್ದ. ಗೊತ್ತಿಲ್ಲ ಅಲ್ವಾ.. ಅಷ್ಟು ಸಾಕು ಅಂದಿದ್ದರು ಅಪ್ಪ. ಅಂತೋಣಿಯ ಮೇಲೆ ಯಾವುದೋ ಅಪರಾಧದ ನೆರಳು ಬಿದ್ದಿದೆ ಅಂತ ಮಹದೇವನಿಗೆ ಅಸ್ಪಷ್ಟವಾಗಿ ಅನ್ನಿಸತೊಡಗಿತ್ತು.

ಅದಾದ ನಂತರ ಅಂತೋಣಿ ಇದ್ದಕ್ಕಿದ್ದಂತೆ ಊರು ತುಂಬ ಹಬ್ಬಿದ. ಎಲ್ಲರೂ ಅವನ ಕುರಿತೇ ಮಾತಾಡುತ್ತಿದ್ದರು. ಅಂತೋಣಿ ಹುಡುಗರನ್ನೂ ಹುಡುಗಿಯರನ್ನೂ ಮತಾಂತರ ಮಾಡಿಸುತ್ತಾನೆ ಅಂತ ಒಂದು ಗುಂಪು ಹೇಳುತ್ತಿತ್ತು. ಅವನು ಗಾಂಜಾ ಮಾರುತ್ತಾನೆ. ಅದಕ್ಕಾಗಿಯೇ ಅವನು ಈ ಊರಿಗೆ ಬಂದಿದ್ದಾನೆ ಅಂತ ಮತ್ತೊಂದಷ್ಟು ಜನ ಹೇಳುತ್ತಿದ್ದರು. ಅವನು ಶಾನುಭೋಗರ ಮಗಳು ಗೀತಾಳಿಗೆ ಲವ್ ಲೆಟರ್ ಬರೆದುಕೊಟ್ಟಿದ್ದಾನೆ ಅನ್ನುವ ಸುದ್ದಿಯೂ ಹಬ್ಬಿತು. ಇವೆಲ್ಲಕ್ಕೂ ಮೀರಿದ ಒಂದು ಸುದ್ದಿ ಅಂತೋಣಿಯ ಅಸ್ತಿತ್ವಕ್ಕೇ ಮುಳುವಾಗುವಂತೆ ಊರನ್ನು ಸುತ್ತತೊಡಗಿತು.

ಅಂತೋಣಿಯ ಅಪ್ಪ ಆಲ್ಬರ್ಟ್  ಅದೇ ಊರಿನವನು. ಆ ಊರಲ್ಲಿರುವುದೆಲ್ಲ ಆಲ್ಬರ್ಟ್ ಆಸ್ತಿಯೇ. ಬ್ರಿಟಿಷರ ಕಾಲಕ್ಕೆ ಆ ಊರು ಬ್ರಿಟಿಷರು ಕುದುರೆಗಳನ್ನು ಮೇಯಿಸುವ ಜಾಗವಾಗಿತ್ತು. ಕುದುರೆ ಮೇಯಿಸುತ್ತಿದ್ದ ಫ್ರಾನ್ಸಿಸ್ ಅನ್ನುವವನಿಗೆ ಇಡೀ ಜಾಗವನ್ನು ಬ್ರಿಟಿಷರು ಬರೆದು ಕೊಟ್ಟಿದ್ದರು. ಫ್ರಾನ್ಸಿಸ್ ನಂತರ ಆ ಜಾಗ ಅವನ ಮಗ ಜಾನ್ಸನ್‌ಗೆ ಬಂತು. ನಂತರ ಅವನ ಮಗ ಅಲ್ಬರ್ಟ್‌ಗೆ ಬಂತು. ಕುಡುಕನೂ ಸ್ತ್ರೀವ್ಯಾಮೋಹಿಯೂ ಆಗಿದ್ದ ಆಲ್ಬರ್ಟ್ ಆ ಜಾಗವನ್ನು ಕಂಡಕಂಡವರಿಗೆ ಹಂಚಿದ್ದ. ಆಲ್ಬರ್ಟ್ ಹೆಂಡತಿ ಅವನ ಅವತಾರ ತಾಳಲಾರದೆ, ಒಂದು ದಿನ ಪುಟ್ಟ ಮಗುವನ್ನು ಕರಕೊಂಡು ತವರು ಮನೆಗೆ ಹೋದ ನಂತರ, ಆಲ್ಬರ್ಟ್ ಕಾಟ ಮತ್ತೂ ಹೆಚ್ಚಾಯಿತು.

ಆಲ್ಬರ್ಟ್ ಆರೂವರೆ ಅಡಿ ಎತ್ತರವಿದ್ದ. ಅವನ ತೋಳುಗಳು ಒನಕೆಯಂತಿದ್ದವು. ಕುಳಿತರೆ ಎರಡು ಕೇಜಿ ಹಂದಿಯನ್ನು ಲೀಲಾಜಾಲವಾಗಿ ತಿನ್ನುತ್ತಿದ್ದ. ಲೀಟರ್‌ಗಟ್ಟಲೆ ಹೆಂಡ ಕುಡಿಯುತ್ತಿದ್ದ. ನಂತರ ಅವನ ಬೇಟೆ ಶುರುವಾಗುತ್ತಿತ್ತು. ಹೆಣ್ಣುಗಳನ್ನು ಹುಡುಕಿಕೊಂಡು ಹೊರಡುತ್ತಿದ್ದ. ಅವನ ಮೇಲೆ ಊರಿನ ಮಂದಿಗೆ ಅಪಾರ ಸಿಟ್ಟಿತ್ತು. ಆದರೆ ಅವನು ಹಂಚುತ್ತಿದ್ದ ಭೂಮಿಯ ಮೇಲಿನ ಮೋಹವೂ ಇತ್ತು. ಹೀಗಾಗಿ ಮನಸ್ಸಿಲ್ಲದ ಮನಸ್ಸಿನಿಂದ, ಮನಸ್ಸಿದ್ದರೂ ಮನಸ್ಸಿಲ್ಲದಂತೆ ನಟಿಸುತ್ತಾ ಅವನನ್ನು ಸಹಿಸಿಕೊಳ್ಳುತ್ತಿದ್ದರು. ಕೂಲಿನಾಲಿ ಮಾಡುತ್ತಿದ್ದವರೆಲ್ಲ ಆಲ್ಬರ್ಟ್ ದೆಸೆಯಿಂದ ಗದ್ದೆ, ತೋಟ, ಮನೆ ಮಾಡಿಕೊಂಡರು.

ಇದ್ದಕ್ಕಿದ್ದಂತೆ ಒಂದು ದಿನ ಆಲ್ಬರ್ಟ್ ಕಾಣೆಯಾದ. ಅವನು ಎಲ್ಲಿಗೆ ಹೋದ ಎಂಬುದು ಯಾರಿಗೂ ಗೊತ್ತಾಗಲೇ ಇಲ್ಲ. ಅವನನ್ನು ಹುಡುಕುವ ಪ್ರಯತ್ನವನ್ನೂ ಯಾರೂ ಮಾಡಲಿಲ್ಲ. ಆಲ್ಬರ್ಟ್ ಮನೆ ಮತ್ತು ಮನೆಯ ಸುತ್ತಮುತ್ತ ಇದ್ದ ಹತ್ತಾರು ಎಕರೆಯನ್ನು ಶಾನುಭೋಗರು ತಮ್ಮದನ್ನಾಗಿ ಮಾಡಿಕೊಂಡರು.

ಇದೆಲ್ಲ ಆಗಿ ಹದಿನೈದು ವರ್ಷಗಳ ನಂತರ, ಆ ಊರಲ್ಲಿ ಅಂತೋಣಿ ಕಾಣಿಸಿಕೊಂಡಿದ್ದ. ಅವನ ಮೇಲೆ ಊರ ಮಂದಿ ನೂರಾರು ಆರೋಪಗಳನ್ನು ಮಾಡಲು ಮುಖ್ಯ ಕಾರಣ ಅವನು ಆಲ್ಬರ್ಟ್ ಮಗ ಅನ್ನುವುದೇ ಆಗಿತ್ತು. ಅಂತೋಣಿ ಊರಿಗೆ ಬಂದಿರುವುದೇ ಅಪ್ಪನ ಆಸ್ತಿಗೋಸ್ಕರ. ಆಸ್ತಿ ಪತ್ರ ಅವನ ಹತ್ತಿರ ಇದೆ. ಅದನ್ನಿಟ್ಟುಕೊಂಡು ಅವನು ಕೋರ್ಟಿಗೆ ಹೋದರೆ ಊರಿಗೆ ಊರೇ ತಾವಿರುವ ಜಾಗ ಮನೆ ಬಿಡಬೇಕಾಗುತ್ತದೆ ಎಂಬ ಸುದ್ದಿ ಹಬ್ಬಿದ್ದೇ ತಡ, ಅಂತೋಣಿಯನ್ನು ಯಾವುದಾದರೂ ಒಂದು ಪ್ರಕರಣದಲ್ಲಿ ಸಿಲುಕಿಸಲಿಕ್ಕೆ ಜನ ಕಾಯತೊಡಗಿದರು.

ಇದೆಲ್ಲ ಎಷ್ಟು ಸೂಕ್ಷ್ಮವಾಗಿ ನಡೆಯಿತು ಅಂತ ಮಹದೇವನಿಗೆ ಆಶ್ಚರ್ಯವಾಗುತ್ತದೆ. ಈ ಪ್ರಸಂಗವೆಲ್ಲ ಮಹದೇವನಿಗೆ ಗೊತ್ತಾದದ್ದು ಅಂತೋಣಿ ಸತ್ತ ನಂತರವೇ. ಆದರೆ ಅಂತೋಣಿ ಇದ್ದಾಗಲೇ ಜನ ಒಳಗೊಳಗೇ ಅವನನ್ನು ಹಿಂಬಾಲಿಸುತ್ತಿದ್ದರು. ಅವನ ಚಲನವಲನಗಳನ್ನು ಗುಟ್ಟಾಗಿ ಗಮನಿಸುತ್ತಿದ್ದರು ಅಂತ ಮಹದೇವನಿಗೆ ಆಮೇಲಾಮೇಲೆ ಅರಿವಾಯಿತು.

ಇದನ್ನೂ ಓದಿ: Sunday Read: ಚಿಂತಾಮಣಿ ಕೊಡ್ಲೆಕೆರೆ ಕಥಾ ಸಂಕಲನ ʼಭರತದ ಮಧ್ಯಾಹ್ನʼ

ಅಂತೋಣಿ ಸಾಯುವ ಹಿಂದಿನ ದಿನ ಮಹದೇವನಿಗೆ ಒಂದು ಚೀಟಿ ಸಿಕ್ಕಿತ್ತು. ಮಹದೇವ ನಡೆದುಹೋಗುವ ದಾರಿಯಲ್ಲಿ ಆ ಚೀಟಿಯನ್ನು ಒಂದು ಕಲ್ಲಿಗೆ ಸುತ್ತಿ ಅವರಿಬ್ಬರೂ ಕುಳಿತುಕೊಳ್ಳುತ್ತಿದ್ದ ಮರದ ಕೊಂಬೆಗೆ ಸಿಕ್ಕಿಸಿದ್ದ. ಉದಾಸೀನದಿಂದ ನಡೆದುಕೊಂಡು ಬರುತ್ತಿದ್ದ ಮಹದೇವನಿಗೆ ಆ ಕಲ್ಲೂ ಚೀಟಿಯೂ ಕಣ್ಣಿಗೆ ಬಿದ್ದು, ಓದಿ ನೋಡಿದರೆ `ನಾಳೆ ಸಂಜೆ ಐದು ಗಂಟೆಗೆ ಹೊಳೆಯ ಹತ್ತಿರ ಬಾ. ಮಾತಾಡುವುದಿದೆ’ ಅಂತ ಅಂತೋಣಿ ಬರೆದಿಟ್ಟಿದ್ದ.

-4-

ಮಹಾದೇವನನ್ನು ಮುಂದೆ ಕೂರಿಸಿಕೊಂಡು ಅವರೆಲ್ಲ ಕೊತಕೊತ ಕುದಿಯುತ್ತಾ ಕೂತಿದ್ದರು. `ಗೊತ್ತಿದ್ದರೆ ಹೇಳಪ್ಪಿ. ನಿಂಗೆ ಯಾವ ಸೀಮೆ ಫ್ರೆಂಡು ಅಂವ. ಫಟಿಂಗ. ನಮ್ಮನ್ನೆಲ್ಲ ಹಾಳು ಮಾಡಲಿಕ್ಕೇ ಬಂದವನು’.

`ಹೇಳ್ತಾನೆ ಬಿಡ್ರೀ. ಮಹದೇವ ನಮ್ಮೂರಿನ ಹುಡುಗ. ನಮ್ಮೂರಿನ ಮೇಲೆ ಅವನಿಗೆ ಪ್ರೀತಿ ಇರಬೇಕು.ಇದೆ. ಯಾರೋ ಬಂದು ನಮ್ಮನ್ನೆಲ್ಲ ಊರು ಬಿಡಿಸ್ತಾರೆ ಅಂದ್ರೆ ನಮ್ಮ ಮಹದೇವ ಸುಮ್ನಿರೋದಿಲ್ಲ’

‘ಹೇಳ್ಲಿಲ್ಲ ಅಂದ್ರೆ ಅವನಿಗೆ ಏನು ಮಾಡಬೇಕೂಂತ ಇದ್ವೋ ಅದನ್ನೇ ನಿಂಗೂ ಮಾಡ್ತೀವಿ’

‘ಹಾಗೆಲ್ಲ ಮಾತಾಡಬಾರದು. ಸುಮ್ನಿರೋ. ಮಹದೇವ ನಮ್ಮವನು..’

ಹೊಳೆಬದಿಗೆ ಅವರೆಲ್ಲ ಹೋದರು. ಮಹದೇವ ಹೋಗಲಿಲ್ಲ

-5-

ಆ ರಾತ್ರಿ ಕನಸಲ್ಲಿ ಅಂತೋಣಿ ಬಂದಿದ್ದ.

ಅವನನು ನೀರಲ್ಲಿ ಎರಡು ಸಲ ಮುಳುಗಿ, ಮೂರನೇ ಸಲ ಮೇಲೆ ಬಂದು ಮಹದೇವನ ಕಡೆ ಕೊಂಚವೇ ತಿರುಗಿ ಏನೋ ಹೇಳಲು ಯತ್ನಿಸಿದ. ಅವನ ಶ್ವಾಸಕೋಶದಲ್ಲಿ ನೀರು ತುಂಬಿತ್ತು. ಮಾತುಗಳು ಕೇಳಿಸುತ್ತಿರಲಿಲ್ಲ. ಅಸ್ಪಷ್ಟವಾಗಿ ಗುಳುಗುಳಗುಳುಗುಳ ಅಂತೇನೋ ಕೇಳಿಸಿತು. ಮತ್ತೊಮ್ಮೆ ಅದನ್ನು ಕೇಳಿಸಿಕೊಂಡರೆ ಅರ್ಥವಾದೀತೇನೋ ಅಂತ ಮಹದೇವ ಆ ಕನಸಿಗಾಗಿ ಕಾಯುತ್ತಲೇ ಇದ್ದಾನೆ. ಅವನಿಗೆ ಇದುವರೆಗೂ ಅಂತೋಣಿಯ ಕನಸು ಬಿದ್ದಿಲ್ಲ.

ಅಂತೋಣಿಯ ಮಾತುಗಳನ್ನು ಡೀಕೋಡ್ ಮಾಡಲು ಮಹದೇವ ಪ್ರಯತ್ನಪಡುತ್ತಲೇ ಇದ್ದಾನೆ. ಆದರೆ ಪ್ರತಿಸಲವೂ ಸೋಲುತ್ತಾನೆ. ಮೀಟಿಂಗು ನಡೆಯುತ್ತಿದ್ದಾಗ, ಊಟ ಮಾಡುವಾಗ, ಪ್ರೇಮಿಸುವಾಗ ಅಂತೋಣಿಯ ಕೊನೆಯ ಮಾತು ಕಿವಿಗೆ ಬೀಳುತ್ತದೆ.

ಅಂತೋಣಿಯ ಕೊನೆಯ ಮಾತು ಏನಿರಬಹುದು ಎಂದು ತಿಳಿಯಲು ಮಹದೇವ ಸಾಕಷ್ಟು ಪ್ರಯತ್ನಪಟ್ಟು ಸೋತಿದ್ದಾನೆ. ಮನೋವೈದ್ಯರನ್ನು ಭೇಟಿಯಾಗಿದ್ದಾನೆ. ಆತ್ಮಹತ್ಯೆ ಮಾಡಿಕೊಂಡವರು ಬರೆದಿಟ್ಟ ಡೆತ್ ನೋಟ್, ಸಾಯುವವರ ಕೊನೆಯಾಸೆಗಳು, ನೇಣಿಗೆ ಹಾಕುವಾಗ ಎದುರಲ್ಲಿದ್ದ ಪೊಲೀಸ್ ಅಧಿಕಾರಿಗಳ ನೆನಪುಗಳನ್ನೆಲ್ಲ ಜಾಲಾಡಿಸಿದರೂ ಅವನಿಗೆ ಉತ್ತರ ಸಿಕ್ಕಿಲ್ಲ. ಮಹದೇವ ಮತ್ತೆ ಮತ್ತೆ ಕೇಳಿದಾಗ ಅವನ ಹೆಂಡತಿ ಉಮಾಳಿಗೆ ಸಿಟ್ಟು ನೆತ್ತಿಗೆ ಹತ್ತಿ, ‘ನೀವೊಂದು ಸಲ ಹೊಳೆಗೆ ಹಾರಿ. ಮೂರನೇ ಸಲ ಮೇಲೆ ಬರುವಾಗ ಏನು ಹೇಳ್ತೀರಿ ಅಂತ ನಿಮಗೇ ಗೊತ್ತಾಗ್ತದೆ’ ಅಂದ ನಂತರ, ಮಹದೇವ ಆ ಬಗ್ಗೆ ಮನೆಯಲ್ಲಿ ಮಾತಾಡುವುದನ್ನು ನಿಲ್ಲಿಸಿದ್ದಾನೆ.

ಮಹದೇವ ಹೊಳೆಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡ ಅಂತ ಯಾವತ್ತೋ ಪತ್ರಿಕೆಯಲ್ಲಿ ಬಂದರೆ, ಈ ಕತೆ ಓದಿದ ನೀವೂ ನಾನೂ ಅವನು ಹೊಳೆಗೆ ಹಾರಿದ್ದು ಬೇರೆ ಯಾವ ಕಾರಣಕ್ಕೂ ಅಲ್ಲ, ನೀರಿನಲ್ಲಿ ಮುಳುಗಿ ಸಾಯುವವನು ಮೂರನೇ ಸಲ ಮೇಲೆ ಬಂದಾಗ ಏನು ಹೇಳುತ್ತಾನೆ ಅನ್ನುವುದನ್ನು ತಿಳಿದುಕೊಳ್ಳುವ ಅದಮ್ಯ ಆಸೆಯಿಂದ ಎಂದು ತೀರ್ಮಾನಿಸಬಹುದು.

ಪುಸ್ತಕ: ಚಿಯರ್ಸ್‌, drink life like a fish
ಲೇಖಕ: ಜೋಗಿ
ಪ್ರಕಾಶನ: ಸಾವಣ್ಣ ಪ್ರಕಾಶನ
ಬೆಲೆ: 150 ರೂ.

ಇದನ್ನೂ ಓದಿ: Sunday Read: ಹೊಸ ಪುಸ್ತಕ: ಎಚ್‌.ಎಸ್‌ ವೆಂಕಟೇಶಮೂರ್ತಿ ಹೊಸ ಕವನ ಸಂಕಲನದ ಕವಿತೆ: ಕಾಂಚನಜುಂಗ

ಕ್ಷಣ ಕ್ಷಣದ ಮಾಹಿತಿಗಾಗಿ Vistara News FaceBook ಪೇಜ್ ಫಾಲೋ ಮಾಡಿ
ಮಹತ್ವದ ಮಾಹಿತಿಗಾಗಿ ವಿಸ್ತಾರ ನ್ಯೂಸ್ ಆ್ಯಪ್ ಉಚಿತವಾಗಿ ಡೌನ್ ಲೋಡ್ ಮಾಡಿಕೊಳ್ಳಿ: Andriod App | IOS App
Continue Reading
Click to comment

Leave a Reply

Your email address will not be published. Required fields are marked *

ಅಂಕಣ

ಧವಳ ಧಾರಿಣಿ ಅಂಕಣ: ಘನ ದಶರಥನಿಗೆ ನಿಲುಕದ ಅಪೂರ್ವ ಮಿಲನ

ಧವಳ ಧಾರಿಣಿ ಅಂಕಣ: ಧೃತರಾಷ್ಟ್ರನದ್ದು ಕುರುಡು ಮೋಹವಾದರೆ ದಶರಥನದ್ದು ಹುಚ್ಚುಮೋಹ. ಮೊದಲಿನ ಘನತೆಯ ಚಕ್ರವರ್ತಿ ನಂತರ ಈ ಅಂಧಪ್ರೀತಿಯ ಕಾರಣ ಅಳುಮುಂಜಿಯಾದ.

VISTARANEWS.COM


on

king dasharatha
Koo

ಭಾಗ 2:

ಶ್ರೀರಾಮದರ್ಶನಕ್ಕೆ ಅಡ್ಡಿಯಾದ ಪುತ್ರವ್ಯಾಮೋಹ

dhavala dharini by Narayana yaji

ಧವಳ ಧಾರಿಣಿ ಅಂಕಣ: ಕೋಸಲ ಸೀಮೆಯ ಚಕ್ರವರ್ತಿಯಾದ ದಶರಥ ಘನತೆಯಿಂದ ರಾಜ್ಯವನ್ನಾಳುತ್ತಿದ್ದನು ಎನ್ನುವುದಕ್ಕೆ ವಾಲ್ಮೀಕಿಯಷ್ಟು ವಿವರವಾಗಿ ಬೇರೆ ಯಾರೂ ಕೊಡಲಿಲ್ಲ. ಕಾಳಿದಾಸನೂ ಸಹ ತನ್ನ ರಘುವಂಶದಲ್ಲಿ ದಿಲೀಪ, ರಘು ಅಜರಿಗೆ ಕೊಟ್ಟಷ್ಟು ಮಹತ್ವವನ್ನು ದಶರಥನಿಗೆ ನೀಡಿಲ್ಲ. ಸೂರ್ಯವಂಶದ ದೊರೆಗಳಲ್ಲಿ ಕಾಳಿದಾಸನ ಪ್ರಕಾರ ರಘುವಿನಷ್ಟು ಘನತೆಯುಳ್ಳ ದೊರೆಗಳು ಬೇರೆ ಯಾರೂ ಇಲ್ಲ. ಪಾತ್ರವನ್ನು ಭಂಜಿಸಿ ಪುನಃ ನವೀನವಾಗಿ ಕಟ್ಟುವುದು ಕಾವ್ಯದಲ್ಲಿ ಇರುವ ಒಂದು ಕ್ರಮ. ಆದರೆ ಇಂತಹ ಕ್ರಿಯೆಯಿಂದ ಮೂಲ ಪಾತ್ರದ ನಿರ್ವಚನೆವೇ ಸೂತ್ರ ತಪ್ಪಿಹೋಗುವಾಗ ಅದನ್ನು ಆಗಾಗ ನೆನಪಿಸಿಕೊಳ್ಳುವುದೂ ಸಹ ಅಷ್ಟೇ ಮುಖ್ಯವಾಗುತ್ತದೆ. ಜನಸಾಮಾನ್ಯರಲ್ಲಿ ಮೂಲಕಾವ್ಯದ ಪಾತ್ರಕ್ಕಿಂತ ಅದರಿಂದ ಹೊರಬಂದ ಟಿಸಿಲುಗಳು ಜನಪ್ರಿಯವಾಗಿವೆ. ಕೆಲವೊಂದು ರಾಮಾಯಣದಲ್ಲಿ ಪರಶುರಾಮ ಯುದ್ಧಕ್ಕೆ ಬಂದಾಗಲೆಲ್ಲ ದಶರಥ ಹೆಣ್ಣುಗಳ ನಡುವೆ ಇದ್ದ ಎನ್ನುವ ಕಥೆಯನ್ನೂ ಹೆಣೆದಿವೆ. ರಾಮಾಯಣ ದರ್ಶನದಲ್ಲಿ ಕುವೆಂಪು ದಶರಥನನ್ನು ಬಣ್ಣಿಸುವುದು ಹೀಗೆ:

ಚಕ್ರವರ್ತಿಯದಕ್ಕೆ ದಶರಥಂ ದೊರೆ ಸಗ್ಗದೊಡೆಯಂಗೆ. ಇಕ್ಷ್ವಾಕು
ರಘು ದೀಲೀಪರ ಕುಲಪಯೋಧಿ ಸುಧಾಸೂತಿ.
ರಾಜರ್ಷಿಯಾ ದೀರ್ಘದರ್ಶಿಯಾ ಸಮದರ್ಶಿ ತಾಂ…
…ಸರ್ವ ಪ್ರಜಾಮತಕೆ ತಾನು ಪ್ರತಿನಿಧಿಯೆಂಬ
ಮೇಣವರ ಹಿತಕೆ ಹೊಣೆಯೆಂದೆಂಬ ಬುಧರೊಲಿದ
ಸಮದರ್ಶನವನೊಪ್ಪಿ

ವಾಲ್ಮೀಕಿ ಕಟ್ಟಿದ ಪಾತ್ರದ ʼದರ್ಶನʼ ಕುವೆಂಪು ಅವರಿಗೆ ಆಗಿರುವುದು ಸ್ಪಷ್ಟವಾಗಿ ಗೋಚರಿಸುತ್ತದೆ. ದಶರಥ ಅಪ್ರತಿಮ ಪರಾಕ್ರಮಿಯಾಗಿದ್ದ ಎನ್ನುವುದನ್ನು ಮತ್ತು ಆತನಿಗೆ ಶಬ್ಧವೇಧಿ ವಿದ್ಯೆ ಸಿದ್ಧಿಸಿತ್ತು. ಆತನ ಕಾಲದಲ್ಲಿ ರಾವಣನ ಪ್ರತಿರೋಧವನ್ನು ತಡೆಯಲಿಲ್ಲವೇ ಎನ್ನುವುದು. ಇಲ್ಲಿ ಗಮನಿಸಬೇಕಾದ ಸಂಗತಿಯೆಂದರೆ ರಾವಣ ಅನರಣ್ಯನ ವಧೆಯನ್ನು ಮಾಡಿದ ನಂತರ ರಾವಣ ದಂಡಕಾರಣ್ಯದ ಆಚೆ ಬಂದಿರಲಿಲ್ಲ. ದಂಡಕಾರಣ್ಯದಲ್ಲಿ ರಾಮ ಖರನೊಡನೆ ಯುದ್ಧ ಮಾಡುವಾಗ,

ಪಾಪಮಾಚರತಾಂ ಘೋರಂ ಲೋಕಸ್ಯಾಪ್ರಿಯಮಿಚ್ಛತಾಮ್.
ಅಹಮಾಸಾದಿತೋ ರಾಜಾ ಪ್ರಾಣಾನ್ಹನ್ತುಂ ನಿಶಾಚರ৷৷ಅ.29.10৷৷

“ನಿಶಾಚರನೇ ಘೋರವಾದ ಪಾಪಗಳನ್ನು ಮಾಡುವವರ ಮತ್ತು ಜನರಿಗೆ ಅಹಿತವನ್ನು ಬಯಸುವವರ ಸಂಹಾರಕ್ಕಾಗಿಯೇ ರಾಜನಾದ (ದಶರಥ) ನಿಂದ ನಿಯುಕ್ತನಾಗಿ ಇಲ್ಲಿಗೆ ಬಂದಿರುತ್ತೇನೆ” ಎನ್ನುವ ಮಾತುಗಳನ್ನು ವಿಮರ್ಶಿಸುವುದಾದರೆ ದಶರಥ ರಾಕ್ಷಸರನ್ನು ಹಿಮ್ಮೆಟ್ಟಿಸುವತ್ತ ಸದಾ ಪ್ರಯತ್ನವನ್ನು ನಡೆಸುತ್ತಿದ್ದ ಎನ್ನುವುದು ಸ್ಪಷ್ಟವಗುತ್ತದೆ. ಜಟಾಯು ಮತ್ತು ಸಂಪಾತಿ ಎನ್ನುವ ಪಕ್ಷಿಗಳು ದಶರಥನ ಶೌರ್ಯತನಕ್ಕೊಲಿದು ಆತನ ಸ್ನೇಹವನ್ನು ಸಂಪಾದಿಸಿದ್ದವು. ಅವು ಇರುವುದೂ ಸಹ ದಂಡಕಾರಣ್ಯದಲ್ಲಿಯೇ. ಶಂಭರನನ್ನು ನಿಗ್ರಹಿಸಿರುವುದೂ ಸಹ ದಂಡಕಾರಣ್ಯದಲ್ಲಿಯೇ. ಶಂಭರರೆಂದರೆ ರಾಕ್ಷಸರ ಒಂದು ಪ್ರಬೇಧ. ಧಶರಥನ ಕಾಲದಲ್ಲಿ ಇದ್ದವ ತಿಮಿದ್ವಜ ಎನ್ನುವಾತ. ಆತ ದಂಡಕಾರಣ್ಯದ ನಡುವೆ ವೈಜಯಂತಪುರ ಎನ್ನುವಲ್ಲಿ ತನ್ನ ರಾಜ್ಯವನ್ನು ನಿರ್ಮಿಸಿಕೊಂಡಿದ್ದ. ಇಂದ್ರನ ಕೋರಿಕೆಯ ಮೇರೆಗೆ ದಶರಥ ದಕ್ಷಿಣದಲ್ಲಿರುವ ದಂಡಕಾರಣ್ಯದ ನಡುವೆ ಇರುವ ತಿಮಿಧ್ವಜನನ್ನು ಎದುರಿಸಲು ಹೋದಾಗ ಯುದ್ಧದಲ್ಲಿ ಕ್ಷತ-ವಿಕ್ಷತವಾಗಿ ರಥದಲ್ಲಿ ಮೂರ್ಚಿತನಗಿದ್ದ ಕಾಲದಲ್ಲಿ ಆತನ ಸಂಗಡವೇ ಇದ್ದ ಕೈಕೆ ಆತನನ್ನು ಯುದ್ಧರಂಗದಿಂದ ದೂರ ಒಯ್ದು ರಕ್ಷಿಸಿದ್ದಳು. ಬಹುಶಃ ಆ ಸಮಯದಲ್ಲಿ ಕೈಕೆ ದಶರಥನ ಸಾರಥಿ ಆಗಿರಬೇಕು. ಸಾರಥಿ ಮಾತ್ರವೇ ತನ್ನ ರಥಿಕನ ಪ್ರಾಣವನ್ನು ಇಂಥ ಹೊತ್ತಿನಲ್ಲಿ ಕಾಪಾಡಬಲ್ಲನೆಂದು ಮಹಾಭಾರತ ಯುದ್ಧದಲ್ಲಿ ಅನೇಕ ಕಡೆ ಬರುತ್ತದೆ.

ತನ್ನ ಜೀವವನ್ನು ಉಳಿಸಿದವಳೆನ್ನುವ ಕಾರಣಕ್ಕೆ ದಶರಥ ಕೈಕೆಗೆ ಎರಡು ವರವನ್ನು ಕೊಟ್ಟಿರುವುದು ಗೊತ್ತಿರುವ ಸಂಗತಿಯೇ ಆಗಿದೆ. ರಾಮಾಯಣದಲ್ಲಿ ಮತ್ತೆ ಈ ತಿಮಿಧ್ವಜನ ಪ್ರಕರಣ ಎಲ್ಲಿಯೂ ಬರುವುದಿಲ್ಲ ಬಹುಶಃ ಮೂರ್ಛೆಯಿಂದ ಎದ್ದ ನಂತರ ದಶರಥ ತಿಮಿಧ್ವಜನನ್ನು ನಿಗ್ರಹಿಸಿರಬೇಕೆನ್ನುವುದು ಖರನಲ್ಲಿ ರಾಮ ಹೇಳುವ ಮೇಲಿನ ಮಾತುಗಳಿಂದ ಸ್ಪಷ್ಟವಾಗುತ್ತದೆ. ಆ ನಂತರದಲ್ಲಿ ರಾವಣನಿಂದ ನಿಯುಕ್ತರಾಗಿ ಖರ ದೂಷಣರು ದಂಡಕಾರಣ್ಯದಲ್ಲಿ ತಮ್ಮ ರಾಜ್ಯವನ್ನು ನಿರ್ಮಿಸಿಕೊಂಡಿರಬಹುದು. ಹಾಗಾದರೆ ಸಿದ್ಧಾಶ್ರಮಕ್ಕೆ ತಾಟಕಿ ಮತ್ತು ಆಕೆಯ ಮಕ್ಕಳು ಬಂದಿರುವ ಘಟನೆಯನ್ನು ಪರಿಶೀಲಿಸುವುದಾದರೆ ಅವರು ಅಲ್ಲಿ ವಾಸ ಮಾಡುತ್ತಿರಲಿಲ್ಲ. ಆಕಾಶಮಾರ್ಗದಿಂದ ಬಂದು ತಪಸ್ಸನ್ನು ಕೆಡಿಸಿ ಹೋಗುತ್ತಿದ್ದರು. ಆ ಕಾಲಕ್ಕೆ ದಶರಥ ವೃದ್ಧನೂ ಆಗಿರುವುದರಿಂದ ಮತ್ತು ಮಕ್ಕಳಾಗದಿರುವುದರಿಂದ ಆತ ಕೊನೆ ಕೊನೆಗೆ ಅನ್ಯಮನಸ್ಕನಾಗಿದ್ದ ಎಂತಲೂ ಊಹಿಸಬಹುದಾಗಿದೆ.

ರಾಮ ಮೋಹಿತ:
ಚತುರ್ಣಾಮಾತ್ಮಜಾನಾಂ ಹಿ ಪ್ರೀತಿ:ಪರಮಿಕಾ ಮಮ৷৷
ಜ್ಯೇಷ್ಠಂ ಧರ್ಮಪ್ರಧಾನಂ ಚ ನ ರಾಮಂ ನೇತುಮರ್ಹಸಿ. ৷৷ಅ-20-11 ৷৷

ಈ ನಾಲ್ವರು ಮಕ್ಕಳಲ್ಲಿ ನನಗೆ ಅತ್ಯಂತ ಪ್ರಿಯನಾದವನು ರಾಮನೇ. ಇವನು ಜ್ಯೇಷ್ಠಪುತ್ರನಾಗಿದ್ದಾನೆ; ಧರ್ಮರಕ್ಷಕನಾಗಿರುವನು. ಆದುದರಿಂದ ನೀವು ರಾಮನನ್ನು ಒಯ್ಯುವುದು ಖಂಡಿತವಾಗಿಯೂ ಯುಕ್ತವಾದುದಲ್ಲ.

ದಶರಥನ ರಾಮನ ಮೇಲಿನ ಅತಿಯಾದ ವ್ಯಾಮೋಹಕ್ಕೆ ಈ ಮೇಲಿನ ಶ್ಲೋಕವೊಂದು ಸಾಕು. ಮಕ್ಕಳೇ ಆಗುವುದಿಲ್ಲ ಎನ್ನುವ ಹೊತ್ತಿಗೆ ದಶರಥನಿಗೆ ಪಾಯಸದ ಅನುಗ್ರಹದಿಂದ ಮಕ್ಕಳಾದರು. ರಾಮ, ಭರತ, ಲಕ್ಷ್ಮಣ ಮತ್ತು ಶತೃಘ್ನರು ಕ್ರಮವಾಗಿ ಪುನರ್ವಸು , ಪುಷ್ಯ ಮತ್ತು ಆಶ್ಲೇಷಾ ನಕ್ಷತ್ರಗಳಲ್ಲಿ ಜನಿಸಿದ್ದಾರೆಂದು ವಾಲ್ಮೀಕಿ ತಿಳಿಸುತ್ತಾನೆ. ಬಹುಕಾಲದ ನಂತರ ಅರಮನೆಯಲ್ಲಿ ಮಕ್ಕಳ ಗಜ್ಜೆಗಳ ಸದ್ದು ಸಹಜವಾಗಿಯೇ ತಂದೆತಾಯಿಗಳಲ್ಲಿ ಸಂತಸವನ್ನು ಉಕ್ಕೇರಿಸಿದೆ. ಅದಕ್ಕೂ ಮೊದಲು ಅರಮನೆಯ ಬಿಡಿಸಿದ ರಂಗೋಲಿ ಮಾರನೆಯ ದಿನ ಹೊಸ ರಂಗೋಲಿ ಹಾಕುವವರೆಗೂ ನಳಿನಳಿಸುತ್ತಿರುತ್ತಿತ್ತು, ಈಗ ಚಿತ್ರಿಸಿದ ಮರುಕ್ಷಣದಲ್ಲಿಯೇ ಮಕ್ಕಳು ಕ್ಷಣಮಾತ್ರದಲ್ಲಿ ಅದನ್ನು ಅಳಿಸಿ ಹಾಕಿಬಿಡುವುದನ್ನು ನೋಡಿ ತಾಯಿಯಂದಿರು ಸಂಭ್ರಮದಿಂದ ದಾಸಿಯರ ಸಂಗಡ ಕುಣಿದು ಕುಪ್ಪಳಿಸುತ್ತಿದ್ದರಂತೆ. ದಶರಥನಿಗೆ ಮಕ್ಕಳಾಗಿರುವ ಸಂತಸ ಸಹಜವಾಗಿ ಆಗಿರುವುದು ಒಂದು ಕಡೆ ಆದರೆ ಹಿರಿಯ ಮಗನಾದ ರಾಮನ ಮೇಲೆ ಎಲ್ಲಕ್ಕಿಂತ ಹೆಚ್ಚಿನ ಪ್ರೀತಿಯುಂಟಾಗಿ ಅದು ವ್ಯಾಮೋಹಕ್ಕೆ ತಿರುಗಿಬಿಟ್ಟಿತ್ತು.

ಕೈಕೆಯನ್ನು ಮದುವೆಯಾದ ಮೇಲೆ ದಶರಥನಿಗೆ ತನ್ನ ಇನ್ನಿಬ್ಬರು ರಾಣಿಯರನ್ನು ಅಲಕ್ಷ್ಯ ಮಾಡಿದ್ದ. ಆದರೆ ಕೌಸಲ್ಯೆಯ ಮಗನಾದ ಶ್ರೀ ರಾಮನೆಂದರೆ ಹುಚ್ಚು ಕಕ್ಕುಲತೆಯಾಗಿತ್ತು. ರಾಮಾಯಣವನ್ನು ಬರೆದ ಎಲ್ಲಾ ಕವಿಗಳೂ ದಶರಥನ ಈ ಪುತ್ರವ್ಯಾಮೋಹವನ್ನೇ ಪ್ರಧಾನವಾಗಿ ಬಣ್ಣಿಸಿದ್ದಾರೆ. ಅದರಲ್ಲಿಯೂ ಭಾಸ ತನ್ನ ಪ್ರತಿಮಾ ನಾಟಕದಲ್ಲಿ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ದಶರಥ ರಾಮನನ್ನು ಸರಿಯಾಗಿ ನೋಡಲೇ ಇಲ್ಲವೆನ್ನುವ ರೀತಿಯಲ್ಲಿ ಚಿತ್ರಿಸುತ್ತಾನೆ. ರಾಮ ರಾಜಸಭೆಗೆ ಬಂದು ದಶರಥನಿಗೆ ನಮಸ್ಕರಿಸಿದಾಗ ಧಶರಥನಿಗೆ ಆನಂದ ಭಾಷ್ಪದಿಂದ ಹರಿದ ಕಣ್ಣೀರು ರಾಮನ ನೆತ್ತಿಯನ್ನು ತೋಯಿಸಿತಂತೆ. ತಂದೆಯ ಇಂತಹ ಪ್ರೀತಿಯನ್ನು ಅನುಭವಿಸಿದ ರಾಮನ ಆನಂದಭಾಷ್ಪ ದಶರಥನ ಪಾದವನ್ನು ತೋಯಿಸಿತಂತೆ. ಭಾಸನ ಪ್ರಕಾರ ಯಾವಾಗಲೂ ದಶರಥನಿಗೆ ರಾಮನನ್ನು ಸರಿಯಾಗಿ ನೋಡಲು ಆತನ ಆನಂದಭಾಷ್ಪ ಅಡ್ಡಿಬರುತ್ತಿತ್ತೆಂದು ವಿಮರ್ಶಕರು ಹೇಳುತ್ತಾರೆ. ರಾಮ ಮಹಾತೇಜಸ್ವಿಯೂ, ಸತ್ಯವಾದ ಪರಾಕ್ರಮಿಯೂ, ಪ್ರಜೆಗಳಿಗೆ ಪ್ರಿಯನಾಗಿಯೂ ಇದ್ದನು. ದಶರಥನಿಗಂಟೂ ರಾಮ ತನ್ನ ವಂಶದ ಕಲಶಪ್ರಾಯನಾಗಿಬಿಟ್ಟಿದ್ದ. ಮಕ್ಕಳು ಬೆಳೆಯುತ್ತಾ ಬೆಳೆಯುತ್ತಾ ಹದಿನೈದು ವರ್ಷಗಳಾದಾಗ ಒಂದು ದಿವಸ ವಿಶ್ವಾಮಿತ್ರರು ರಾಜಸಭೆಗೆ ಆಗಮಿಸಿ ಸಿದ್ಧಾಶ್ರಮದಲ್ಲಿ ನಡೆಸಲಿರುವ ಯಜ್ಞಗಳಿಗೆ ತಾಟಕಿ ಮತ್ತು ಆಕ್ಯೆಯ ಮಕ್ಕಳಾದ ಸುಭಾಹು ಮಾರೀಚರೆನ್ನುವ ರಾಕ್ಷಕರ ಕಾಟ ವಿಪರೀತವಾಗಿದೆ. ಅವರನ್ನು ನಿಗ್ರಹಿಸಲು ರಾಮನನ್ನು ತನ್ನೊಡನೆ ಕಳುಹಿಸಬೇಕು ಎಂದಾಗ ದಶರಥನಿಗೆ ಆಘಾತವುಂಟಾಯಿತು. ಮೂರ್ಛಿತನಾಗಿ ಬಿಟ್ಟ. ರಾಕ್ಷಸರ ವಿರುದ್ಧ ಹೋರಾಡಲು ಸಹಾಯವನ್ನು ಯಾಚಿಸುವಂತಹ ಪರಾಕ್ರಮಿಯಾಗಿದ್ದ ದಶರಥನ ಜಂಘಾಬಲವೇ ಉಡುಗಿಹೋಯಿತು.

ವಿಶ್ವಾಮಿತ್ರರು ರಾಮನನ್ನು ಕೇವಲ ಹತ್ತುದಿನಗಳ ಮಟ್ಟಿಗೆ ಕಳುಹಿಸು ಎನ್ನುತ್ತಾರೆ. ಅದು ತನಕ ರಾಮನ ರಥಯುದ್ಧ ಕೌಶಲವನ್ನೂ, ಆನೆ ಅಶ್ವಗಳ ಸವಾರಿಯ ಚಾಕಚಕ್ಯತೆಯನ್ನೂ ಬಿಲ್ಲು ವಿದ್ಯೆಯ ನಿಪುಣತೆಯನ್ನೂ ನೋಡಿ ಆನಂದಿಸುತ್ತಿದ್ದ ದಶರಥ ಏಕಾಏಕಿಯಾಗಿ ಮಾರೀಚ ಸುಭಾಹು ಮತ್ತು ರಾವಣನಂತವರನ್ನು ಎದುರಿಸಲು ತಾನು ಅಸಮರ್ಥ, ರಾಮನಿಗೆ ಬಿಲ್ಲು ವಿದ್ಯೆಯ ಪರಿಪೂರ್ಣತೆ ಆಗಿಲ್ಲ, ಅವನಿನ್ನೂ ಎಳೆಸು, ರಾಮನ ಬದಲು ತಾನು ಬಂದು ಹೋರಾಡುತ್ತೇನೆ, ಆದರೆ ಯುದ್ಧದಲ್ಲಿ ತನ್ನ ಪ್ರಾಣವೇ ಹೋಗಬಹುದು. ಆದರೂ ಚಿಂತೆಯಿಲ್ಲ ಎಂದೆಲ್ಲಾ ಹೇಳುತ್ತಾ ಅಳುತ್ತಾನೆ. ಆತ ಈಗ ಮೊದಲಿನ ದಶರಥನಾಗಿ ಉಳಿಯದೇ ತನ್ನ ಮಗ ರಾಮನನ್ನು ಕಳುಹಿಸಲು ಮನಸ್ಸಿಲ್ಲದೇ ಆತ ವಯಸ್ಸಿನ ಕಾರಣಕ್ಕೆ ಮತ್ತು ತನ್ನಲ್ಲಿನ ವೃದ್ಧಾಪ್ಯದ ಕಾರಣಕ್ಕೆ ರಾಕ್ಷಸರನ್ನು ಎದುರಿಸುವ ಬಲ ತನ್ನಲ್ಲಿ ಈಗ ಉಳಿದಿಲ್ಲ ಎನ್ನುವ ಸುಳ್ಳುಗಳನ್ನೂ ಹೇಳುತ್ತಾನೆನ್ನುವ ಎನ್ನುವುದು ವಿಶ್ವಾಮಿತ್ರರಿಗೆ ತಿಳಿಯಿತು. ಒಂದರ್ಥದಲ್ಲಿ ಇದು ವಶಿಷ್ಠರು ಕಲಿಸಿದ ವಿದ್ಯೆಗೂ ಅವಮಾನ ಎನ್ನುವುದನ್ನು ರಾಜ ಮರೆತು ಬಿಟ್ಟಿದ್ದ. ತಾನೋರ್ವ ಹೇಡಿ ಎನ್ನುವ ಭಾವ ಬರುವ ಮಾತುಗಳನ್ನೂ ಆಡಿದ ಕೇಳಿದ ವಿಶ್ವಾಮಿತ್ರರಿಗೆ ಕ್ರೋಧ ಬಂತು. ಮಕ್ಕಳನ್ನು ಕಳುಹಿಸಲಾರೆ ಎನ್ನುವ ಕಾರಣಕ್ಕೆ ಕ್ರೋಧ ಬಂದಿಲ್ಲ. ದಶರಥ ಮಗನ ಮೇಲಿನ ಮೋಹದಿಂದ ಸೂರ್ಯವಂಶದ ತೇಜಸ್ಸನ್ನೇ ಅವಮಾನ ಮಾಡುತ್ತಿದ್ದಾನೆ (ನರಪತಿಜಲ್ಪನಾತ್) ಎನ್ನುವ ಕಾರಣಕ್ಕಾಗಿ.

ಸಿಟ್ಟುಗೊಂಡು “ಆಯಿತು, ಸತ್ಯಪ್ರತಿಜ್ಞರ ಮಹಾ ವಂಶದಲ್ಲಿ ಮಿಥ್ಯಾವಾದಿಯೋರ್ವ ಹುಟ್ಟಿದನು” ಎನ್ನುವ ಅಪವಾದ ನಿನಗೆ ಬರುತ್ತದೆ, ತಾನಿನ್ನು ಹೊರಡುತ್ತೇನೆ ಎಂದು ಸಿಟ್ಟಿನಿಂದ ಹೊರಡಲುದ್ಯುಕ್ತನಾದ. ತಪಸ್ವಿಯಾದ ವಿಶ್ವಾಮಿತ್ರರಿಗೆ ತಾವೇ ರಾಕ್ಷಸರನ್ನು ನಿಗ್ರಹಿಸುವ ಶಕ್ತಿಯಿತ್ತು. ಆದರೆ ಅವರೀಗ ಬ್ರಹ್ಮರ್ಷಿಗಳಾಗಿದ್ದಾರೆ. ತಪಸ್ಸನ್ನು ಪುಣ್ಯಕ್ಕಾಗಿ ಉಪಯೋಗಿಸಬೇಕು, ರಕ್ಕಸರ ನಿರ್ಮೂಲನೆಗೆ ಕ್ಷತ್ರಿಯರ ದಂಡು ಸಿದ್ಧವಾಗಬೇಕು ಎನ್ನುವ ಸಂಕಲ್ಪದಿಂದ ಬಂದಿದ್ದರು. ದೇರಾಜೆ ಸೀತಾರಾಮನವರ “ರಾಮ ರಾಜ್ಯದ ರುವಾರಿ” ಎನ್ನುವ ಕೃತಿಯನ್ನು ಓದಿದರೆ ಇದರ ಸಂಪೂರ್ಣ ವಿವರ ಸಿಗುತ್ತದೆ. ತನ್ನ ಯೌವನದ ಕಾಲದಲ್ಲಿ ಇಂದ್ರನಿಗೆ ಸಮನಾದ ಶೌರ್ಯವಂತನಾಗಿದ್ದ ದಶರಥನಿಗೆ ಪುತ್ರಮೋಹವೆನ್ನುವುದು ಆತನ ಎಲ್ಲ ಘನತೆ ಮತ್ತು ಗುಣಗಳನ್ನು ಮರೆಮಾಚಿ ಬಿಟ್ಟಿತ್ತು. ಮಕ್ಕಳ ಮೇಲಿನ ಅತಿಯಾದ ಮೋಹದಿಂದ ಅನೇಕ ಪಾಲಕರು ತಮ್ಮಮಕ್ಕಳಿಗೆ ಆರತಿ ತೆಗೆದುಕೊಂಡರೆ ಉಷ್ಣ, ತೀರ್ಥ ತೆಗೆದುಕೊಂಡರೆ ಶೀತ ಎನ್ನುವ ರೀತಿಯಲ್ಲಿ ವರ್ತಿಸುವದನ್ನು ಇಂದಿಗೂ ಕಾಣಬಹುದು. ದಶರಥ ಹೀಗೆ ತನ್ನ ಮಕ್ಕಳ ಕುರಿತು ಅದರಲ್ಲಿಯೂ ವಿಶೇಷವಾಗಿ ರಾಮನ ವಿಷಯದಲ್ಲಿ ಮೋಹಪರವಶನಾಗಿದ್ದ.

ವಿಶ್ವಾಮಿತ್ರರು ಬಂದಾಗ ಅವರಿಗೆ ಯಾವ ಸಹಾಯ ತನ್ನಿಂದ ಬೇಕು ಅದನ್ನು “ಕರ್ತಾ ಚಾಹಮಶೇಷೇಣ ದೈವತಂ ಹಿ ಭವಾನ್ಮಮ” ‘ಎಂತಹ ಕ್ಲಿಷ್ಟವಾದ ಕಾರ್ಯವನ್ನಾದರೂ ಅದನ್ನು ಮರುಮಾತಿಲ್ಲದೇ ನಡೆಸಿಕೊಡುತ್ತೇನೆ. ನೀವೇ ನನಗೆ ಪರದೈವ’ ಎಂದು ಮಾತುಕೊಟ್ಟ ದೊರೆ ಪುತ್ರ ವ್ಯಾಮೋಹದಿಂದ ಅದನ್ನು ಈಡೇರಿಸಲು ಅಸಹಾಯಕತೆಯನ್ನು ವ್ಯಕ್ತಪಡಿಸುತ್ತಿರುವುದನ್ನು ನೋಡಲು ವಶಿಷ್ಠರಿಂದಾಗಲಿಲ್ಲ. ದಶರಥನಿಗೆ “ರಾಮನನ್ನು ವಿಶ್ವಾಮಿತ್ರರ ಸಂಗಡ ಕಳುಹಿಸು, ಆತನ ಶ್ರೇಯೋಭಿವೃದ್ದಿಗೆ ಇದು ನಾಂದಿಯಾಗುತ್ತದೆ. ಒಂದುವೇಳೆ ಕಲುಹಿಸದಿದ್ದರೆ ನೀನು ಇದುತನಕ ಮಾಡಿದ ಅಶ್ವಮೇದ ಯಾಗದ ಫಲ, ವಾಪಿ-ಕೂಪ-ತಟಾಕಾದಿಗಳನ್ನು ನಿರ್ಮಿಸಿದ ಫಲಗತಿಗಳೆಲ್ಲ ನಾಶವಾಗುತ್ತದೆ ಎಂದು ಎಚ್ಚರಿಸಿದರೋ ಆಗ ಅಂತೂ ಅನ್ಯಮನಸ್ಕನಾಗಿಯೇ ರಾಮನನ್ನು ವಿಶ್ವಾಮಿತ್ರರ ಜೊತೆಯಲ್ಲಿ ಯಜ್ಞರಕ್ಷಣೆಗಾಗಿ ಕಳುಹಿಸಿಕೊಟ್ಟ. ಕೇವಲ ಹತ್ತು ದಿನಗಳ ಮಟ್ಟಿಗೆ ಕರೆದುಕೊಂಡು ಹೋಗುತ್ತೇನೆಂದು ಹೋದ ವಿಶ್ವಾಮಿತ್ರರು ಯಜ್ಞ ಮುಗಿದ ಮೇಲೆ ಅಲ್ಲಿಂದ ಮಿಥಿಲೆಗೆ ಕರೆದುಕೊಂಡು ಹೋಗಿ ರಾಮ ಶಿವಧನಸ್ಸನ್ನು ಮುರಿದು ಸೀತೆಯನ್ನು ಮದುವೆಯಾಗುವ ಸಂಗತಿ ದಶರಥನಿಗೆ ತಿಳಿಯುವ ತನಕ ಆತ ಎಷ್ಟು ಒದ್ದಾಡಿದ್ದನೋ ಏನೋ! ದಶರಥನನ್ನು ಮಿಥಿಲೆಗೆ ಆಹ್ವಾನಿಸಲು ಹೋದ ದೂತರು ಅಯೋಧ್ಯೆಯನ್ನು ತಲುಪಲು ನಾಲ್ಕು ದಿನಗಳನ್ನು ತೆಗೆದುಕೊಂಡಿದ್ದರು. ರಾಮನಿಗೆ ಮದುವೆಯ ವಿಷಯ ಕೇಳಿದ ದಶರಥ ಸಂತಸಪಟ್ಟಿದ್ದು ಓರ್ವ ತಂದೆಯಾಗಿ ಸಹಜದ ಕ್ರಿಯೆ. ಮದುವೆಯೆಲ್ಲ ಸಾಂಗವಾಗಿ ಮುಗಿದು ನಾಲ್ವರೂ ಮಕ್ಕಳು ಮತ್ತು ಸೊಸೆಯೊಂದಿಗೆ ಅಯೋಧ್ಯೆಗೆ ಬರುವಾಗ ಬೀಸಿತೊಂದು ಭಯಂಕರ ಬಿರುಗಾಳಿ.

ರಾಮ ಮರ್ಧಿಸಿದ ಮಹಾಧನುಸ್ಸೆರಡನ್ನೂ ನೋಡಲಿಲ್ಲ ದೊರೆ:

ಅಗ್ರತಃ ಚತುರೋ ವೇದಾಃ ಪೃಷ್ಠತಃ ಸಶರಂ ಧನುಃ |
ಇದಂ ಬ್ರಾಹ್ಮಂ ಇದಂ ಕ್ಷಾತ್ರಂ ಶಾಪಾದಪಿ ಶರಾದಪಿ ||

ಇದ್ದಕ್ಕಿಂತ ಸುಂಟರಗಾಳಿ ಬೀಸಿ ಮಹಾವೃಕ್ಷಗಳನ್ನೆಲ್ಲ ಬುಡಮೇಲು ಮಾಡತೊಡಗಿತು. ಭೂಮಿಯಿಂದ ಎದ್ದ ಧೂಳು ಸೂರ್ಯನನ್ನೇ ಮರೆಮಾಚಿತು. ದಿಕ್ಕುಗಳೇ ಕಾಂತಿಹೀನವಾಯಿತು. ಎಲ್ಲರೂ ತಮ್ಮ ಜೀವದ ಆಶೆಯನ್ನೇ ತೊರೆದರು. ವಸಿಷ್ಠರು ದಶರಥ ಆವನ ಮಕ್ಕಳು ಮಾತ್ರ ಈ ಬಿರುಗಾಳಿಗೆ ಹೆದರದೇ ಇದ್ದರು. ಆ ಅಂಧಕಾರದಿಂದ ಭಯಂಕರ ಪ್ರಕಾಶದಿಂದ ಕೂಡಿದ, ಜಟಾಮಂಡಲಧಾರಿಯಾದ ಕ್ಷತ್ರಿಯಕುಲವಿಧ್ವಂಸಕನಾದ ಪರಶುರಾಮರ ಆಕೃತಿ ಗೋಚರವಾಯಿತು.

king dasharatha

ನೇರವಾಗಿ ರಾಮನನ್ನು ಉದ್ಧೇಶಿಸಿ ಅವರು “ರಾಮ! ದಾಶರಥೇ! ವೀರ! ನೀನು ಇದುತನಕ ಗೈದ ಪರಾಕ್ರಮಗಳಾದ ತಾಟಕಾವಧೆಯಿಂದ ಹಿಡಿದು ಇತ್ತೀಚೆಗೆ ಶಿವಧನುರ್ಭಂಗದವರೆಗಿನ ಎಲ್ಲವನ್ನೂ ಕೇಳಿದ್ದೇನೆ. ನಿಜವಾಗಿಯೂ ನೀನು ಅಷ್ಟೊಂದು ಪರಾಕ್ರಮಿಯೇ ಹೌದಾದರೆ ನನ್ನ ಕೈಯಲ್ಲಿರುವ ಈ ವೈಷ್ಣವ ಧನಸ್ಸನ್ನು ನೋಡು. ಈ ಮಹಾಧನಸ್ಸಿಗೆ ನೀವು ಮೌರ್ವಿಯನ್ನು ಬಿಗಿದು ತೋಲನ-ಪೂರಣ-ಶರಸಂಧಾನದಿಗಳನ್ನು ಮಾಡಿದರೆ ನಾನು ನಿನಗೆ ವೀರ್ಯಶ್ಲಾಘ್ಯವಾದ ದ್ವಂದ್ವಯುದ್ಧವನ್ನು ಕೊಡುತ್ತೇನೆ” ಎಂದು ತನ್ನ ಕಂಚಿನ ಕಂಠದ ಧ್ವನಿಯಲ್ಲಿ ಹೇಳಿದನು. ಈ ಮಾತನ್ನು ಕೇಳಿದ ದಶರಥನಿಗೆ ಜಂಘಾಬಲವೇ ಉಡುಗಿಹೋಯಿತು. ಪರಶುರಾಮನ ಹತ್ತಿರ ಅಳಲಿಕ್ಕೇ ಮೊದಲಾಗುತ್ತಾನೆ. ರಾಮನಿಗೇನಾದರೂ ಆದರೆ ತಾವ್ಯಾರೂ ಬದುಕುವುದಿಲ್ಲ ಎಂದು ಗೋಳಿಡುತ್ತಾನೆ. ತಾನೋರ್ವ ಕ್ಷತ್ರಿಯ, ಮಹಾಪ್ರರಾಕ್ರಮಿಯಾದವ ಎನ್ನುವುದಕ್ಕಿಂತಲೂ ರಾಮನಿಗೆ ಏನಾದರೂ ಆಗಿಬಿಟ್ಟರೆ ಎನ್ನುವ ಕಲ್ಪನೆಯೇ ಆತನಲ್ಲಿ ಭೀತಿಯನ್ನು ಹುಟ್ಟಿಸಿತು. ಸಾಲದ್ದಕ್ಕೆ ಪರಶುರಾಮ ದಶರಥನ ಮಾತಿಗೆ ಲಕ್ಷ್ಯವನ್ನೇ ಕೊಡದೇ ರಾಮನಲ್ಲಿ ಪಂಥಾಹ್ವಾನವನ್ನು ಕೊಟ್ಟಾಗ ರಾಮ ಅದನ್ನು ಧೈರ್ಯದಿಂದಲೇ ಸ್ವೀಕರಿಸಿದ. ದಶರಥ ಇನ್ನು ಕಥೆ ಮುಗಿಯಿತು ಎಂದವನೇ ಕಣ್ಣುಮುಚ್ಚಿ ಗಡಗಡ ನಡುಗುತ್ತ ಹೆಣ್ಣುಗಳ ಹಿಂದೆ ಅಡಗಿಕೊಳ್ಳಲು ಜಾಗ ಹುಡುಕಿದ.

ರಾಮ ಮರು ಮಾತಾಡದೇ ತನ್ನ ಕಾಲಿನಲ್ಲಿ ಬಿಲ್ಲಿನ ಪಾದವನ್ನು ಹಿಡಿದು ಬಗ್ಗಿಸಿ ನಾಣನ್ನು ಕಟ್ಟಿದವನೇ ಬಾಣವನ್ನು ಹೂಡಿ ಪರಶುರಾಮನತ್ತ ತಿರುಗಿ ಗಂಬೀರಸ್ವರದಲ್ಲಿ “ನೀನು ಗೌರವಾನ್ವಿತನಾದವ ಮತ್ತು ನನ್ನ ಗುರು ವಿಶ್ವಾಮಿತ್ರರ ಜ್ಞಾತಿಬಂಧುವಾಗಿರುವೆ. ಈ ಕಾರಣದಿಂದ ನಿನ್ನ ಮೇಲೆ ಶರಪ್ರಯೋಗ ಮಾಡಲಾರೆ. ಎಲ್ಲೆಂದರಲ್ಲಿ ಸಾಗುವ ಸ್ವೇಚ್ಛಾಗಮನಕ್ಕೆ ಬಾಣವನ್ನು ಬಿಡಲೇ ಇಲ್ಲವೇ ತಪಸ್ಸಿನಿಂದ ಗಳಿಸಿರುವ ನಿನ್ನ ಅಪ್ರತಿಮ ಪುಣ್ಯದ ರಾಶಿಗೆ ಬಿಡಲೇ” ಎಂದು ಗಂಭೀರಸ್ವರದಲ್ಲಿ ಕೇಳಿದ.. ಪರಶುರಾಮ ಪ್ರಪಂಚದಲ್ಲಿಯೇ ಎರಡನೆಯದಿಲ್ಲದ ವೈಷ್ಣವ ಧನಸ್ಸನ್ನು ರಾಮ ಲೀಲಾಜಾಲವಾಗಿ ಹೆದೆಯೇರಿಸಿ ತನ್ನೆಡೆಗೇ ಗುರಿಯಿಟ್ಟ. ಪರಶುರಾಮ ರಾಮನ ಕಣ್ಣಿನ ತೇಜಸ್ಸನ್ನು ನೋಡಿದ. ಅರ್ಥವಾಯಿತು! “ಹಿಂದೆ ತಾನು ಗೆದ್ದ ಈ ಭೂಮಿಯನ್ನು ಕಶ್ಯಪರಿಗೆ ದಾನವಾಗಿ ಕೊಟ್ಟಮೇಲೆ ಇದು ತನ್ನದಲ್ಲ. ಹಾಗಾಗಿ ತಾನು ಇಲ್ಲಿ ಹೆಚ್ಚುಹೊತ್ತು ಇರಲಾರೆ. ತನ್ನ ಸ್ವೇಚ್ಛಾಗಮನಕ್ಕೆ ಹಾನಿ ಮಾಡಬೇಡ. ದಿವ್ಯಲೋಕಗಳಿಗೆ ಹೋಗಬಹುದಾದ ಸಾಮರ್ಥ್ಯವನ್ನು ಗಳಿಸಿರುವ ತನ್ನ ಪುಣ್ಯರಾಶಿಯ ಮೇಲೆಯೇ ಬಾಣಪ್ರಯೋಗ ಮಾಡು. ಆ ಶಕ್ತಿ ತನ್ನಿಂದ ಹ್ರಾಸವಾದರೂ ತೊಂದರೆಯಿಲ್ಲ” ಎಂದು ಹೇಳಿದನು.

ಇದನ್ನೂ ಓದಿ: ಧವಳ ಧಾರಿಣಿ ಅಂಕಣ: ರಘುವಂಶದ ಘನತೆಯ ಚಕ್ರವರ್ತಿ ದಶರಥ

ಮೂಲತತ್ತ್ವದ ಅಂಶವೇ ಆದ ಪರಶುರಾಮನಿಗೆ ಪಾಪ ಪುಣ್ಯಗಳ ಹಂಗಿಲ್ಲ. ಇಲ್ಲಿ ಶಿವ ಮತ್ತು ವೈಷ್ಣವ ಈ ಎರಡು ಶಕ್ತಿಯ ಸಂಕೇತಗಳು. ರಾಮನೆನ್ನುವವ ನಾಮರೂಪಾತ್ಮಕವಾದ ಎರಡನ್ನೂ ಅಂಶಗಳನ್ನು ಮೀರಿನಿಂತವ ಎನ್ನುವುದನ್ನು ವಾಲ್ಮೀಕಿ ರೂಪಕದಮೂಲಕ ವಿವರಿಸಿದ್ದಾನೆ. ರಾಮನೆನ್ನುವವ ಪರತತ್ತ್ವ. ಪರಾವಸ್ತು. ಸೃಷ್ಟಿಯ ಎಲ್ಲವೂ ರಾವಣನನ್ನು ಗೆಲ್ಲಲು ಸಮರ್ಥವಾಗಲಾರದು. ಅದನ್ನು ಮೀರಿದ ಪರವಸ್ತುವೇ ಮಾನವ ರೂಪ ತಾಳಿ ರಾವಣತ್ವದ ವಧೆಗೆ ಕಾರಣವಾಗಬೇಕು. ಅಮೂರ್ತವಾಗಿರುವ ಈ ತತ್ತ್ವವೇ ಮಾನವ ಮೂರ್ತಿಯಾಗಿ ವೈಷ್ಣವ ಧನಸ್ಸನ್ನು ಎತ್ತಿರುವ ಅಪರೂಪದ ದೃಶ್ಯವನ್ನು ನೋಡಲು ಸ್ವತಃ ಬ್ರಹ್ಮನೇ ಅಲ್ಲಿಗೆ ಬಂದುನೋಡಿ ಆನಂದಿಸಿದ. ಅವರೆಲ್ಲರೂ ನೋಡುತ್ತಿರುವಂತೆ ರಾಮ ಹೆದೆಯೇರಿಸಿ ಬಾಣವನ್ನು ಬಿಟ್ಟ. ಕ್ಷತ್ರಿಯರನ್ನು ನಿಗ್ರಹಿಸಿದ ಭಯಂಕರ ಮುನಿಯ ತೇಜಸ್ಸು ಕ್ಷಾತ್ರ ತೇಜಸ್ಸಿನಲ್ಲಿ ಸೇರಿಹೋಯಿತು. ರಾಮನಿಗೆ ಜೈಕಾರ ಹಾಕಿದ ಪರಶುರಾಮ ಅಲ್ಲಿಂದ ಮಹೇಂದ್ರಾಚಲಕ್ಕೆ ಹೊರಟ. ಕೊಡಲಿರಾಮನ ಪುಣ್ಯ ರಘುರಾಮನಿಗೆ ಹೀಗೆ ಕೊಡಲ್ಪಟ್ಟಿರುವುದನ್ನು ನೋಡಿ ಸಂತೋಷಪಡುವ ಭಾಗ್ಯ ದಶರಥನಿಗೆ ಇಲ್ಲವಾಗಿತ್ತು. ಆತ ಈ ಸನ್ನೀವೇಶ ಪ್ರಾರಂಭವಾದಾಗಿನಿಂದಲೂ ಭಯದಿಂದ ಕಣ್ಣುಮುಚ್ಚಿಕೊಂಡಿದ್ದ. ಪರಶುರಾಮ ಹೊರಟ ಎಷ್ಟೋ ಹೊತ್ತಿನನಂತರ ಆತ ಕಣ್ಣುಬಿಟ್ಟು ಈ ಎಲ್ಲ ಸಂಗತಿಗಳನ್ನು ತಿಳಿದುಕೊಂಡ. ಅಯೋಧ್ಯೆಗೆ ಹೊರಟ್ಟಿತು ರಾಮನ ದಂಡು.

ಮಕ್ಕಳಿಲ್ಲದೇ ಕೊರಗಿದ್ದ ದಶರಥ ಬದುಕಿನಲ್ಲಿ ಆಸಕ್ತಿಯನ್ನೇ ಕಳೆದುಕೊಂಡಿದ್ದ. ರಾಜ್ಯವನ್ನು ಸಮರ್ಥರಾದ ಮಂತ್ರಿಗಳು ಆಳುತ್ತಿದ್ದ ಕಾರಣ ರಾಜಕಾರಣದ ಚಿಂತೆ ಇರಲಿಲ್ಲ. ಮಕ್ಕಳ ಸಲುವಾಗಿ ಕಣ್ಣೀರು ಹಾಕುತ್ತಾ ಇರುವವನಿಗೆ ರಾಮನಂತಹ ಮಕ್ಕಳನ್ನು ಕಂಡವನೇ ಇನ್ನುಳಿದ ಮಕ್ಕಳಿಗಿಂತ ರಾಮನೇ ಆತನನ್ನು ಸಂಪೂರ್ಣವಾಗಿ ಆವರಿಸಿದ್ದ. ಧೃತರಾಷ್ಟ್ರನದ್ದು ಕುರುಡು ಮೋಹವಾದರೆ ದಶರಥನದ್ದು ಹುಚ್ಚುಮೋಹ. ರಾಮನಿಗೆ ಏನೂ ಆಗಬಾರದೆನ್ನುವ ಕಾರಣಕ್ಕೆ ಆತ ತಾನೋರ್ವ ಪರಾಕ್ರಮಿಯಾದ ದೊರೆಯೆನ್ನುವುದನ್ನೂ ಮರೆತು ದೀನನಾಗಿ ರಾಮನನ್ನು ಉಳಿಸಿಕೊಳ್ಳಲು ವಿಶ್ವಾಮಿತ್ರರಲ್ಲಿ, ಪರಶುರಾಮರಲ್ಲಿ ವಸ್ತುತಃ ಯಾಚಿಸಿದ್ದ. ಮೊದಲಿನ ಘನತೆಯ ಚಕ್ರವರ್ತಿ ನಂತರ ಈ ಅಂಧಪ್ರೀತಿಯ ಕಾರಣದಿಂದ ಅಳುಮುಂಜಿಯಾಗಿ ಬದಲಾಗಿ ಮಕ್ಕಳಿಲ್ಲದ ವೇಳೆಯಲ್ಲಿ ಗಂಗೋದಕವನ್ನೂ ಹಾಕುವವರಿಲ್ಲದ ಸ್ಥಿತಿಯಲ್ಲಿ ಕೊರಗಿ ಕೊರಗಿ ಸಾಯಬೇಕಾಯಿತು.

ಇದನ್ನೂ ಓದಿ: ಧವಳ ಧಾರಿಣಿ ಅಂಕಣ: ಗಂಧವತಿಗೆ ಸಿರಿಗಂಧಲೇಪನನ ಆಗಮನ

Continue Reading

ಪ್ರಮುಖ ಸುದ್ದಿ

ದಶಮುಖ ಅಂಕಣ: ಮಸಣದಲ್ಲಿ ಕೆಲವು ಕ್ಷಣ

ದಶಮುಖ ಅಂಕಣ: ಸ್ಮಶಾನದ ವರ್ಣನೆಗಳನ್ನು ನೋಡಿದಾಗ, ಅದರ ಕಲ್ಪನೆ ಭೀಕರವೋ, ಅದು ತನ್ನೊಳಗೆ ಹುದುಗಿಸಿಕೊಳ್ಳುವ ಸಾವು ಭೀಕರವೋ ಎಂಬುದೇ ತಿಳಿಯದೆ ಗೊಂದಲಕ್ಕೆ ಬಿದ್ದರೆ ಅಚ್ಚರಿಯಿಲ್ಲ.

VISTARANEWS.COM


on

graveyard
Koo

ಈ ಅಂಕಣವನ್ನು ಇಲ್ಲಿ ಆಲಿಸಿ:

dashamukha column logo

ದಶಮುಖ ಅಂಕಣ: ಒಂದಿಷ್ಟು ಮಕ್ಕಳು ಕಥೆ ಕೇಳುತ್ತಿದ್ದರು. ಕಥೆಯೊಂದರ ನಡುವೆ ಸ್ಮಶಾನದ ಪ್ರಸ್ತಾಪ ಬಂತು. ಮಕ್ಕಳೆಲ್ಲರೂ ಮುಂದೇನಾಗುವುದೆಂದು ಗೊತ್ತಿರುವವರಂತೆ, ʻಯಬ್ಬಾ…!ʼ ಎಂದು ಕಣ್ಣು-ಬಾಯಿ ಬಿಡುತ್ತಾ ಹುಬ್ಬೇರಿಸಿದರು. ಅಲ್ಲೊಂದು ಭೂತ ಬರುತ್ತದೆಂದು ಅವರಾಗಲೇ ನಿರ್ಧರಿಸಿಬಿಟ್ಟಿದ್ದರು. ಹಾಗಾಗಿ ಉಸಿರು ಹಿಡಿದು, ಪಕ್ಕದಲ್ಲಿ ಕೂತವರ ಕೈಯೂ ಹಿಡಿದು, ಭೂತಚೇಷ್ಟೆಗೆ ತಯಾರಾಗಿಯೇ ಕಥೆಯಲ್ಲಿರುವ ಸ್ಮಶಾನ ಹೊಕ್ಕಿದ್ದರು. ಕಥೆಯಲ್ಲಿ ಭೂತ ಬಂತಾ, ಬಂದೇನು ಮಾಡಿತು ಇತ್ಯಾದಿಗಳು ನಮಗಿಲ್ಲಿ ಬೇಡದಿದ್ದರೂ, ಅವರ ವರ್ತನೆಗಳು ಒಂದಿಷ್ಟು ಚಿಂತನೆಗೆ ಹಚ್ಚಿದ್ದು ಹೌದು. ಸ್ಮಶಾನವೆಂದರೆ ನಾವಷ್ಟು ಇರಿಸುಮುರುಸು ಮಾಡಿಕೊಳ್ಳುತ್ತೇವಲ್ಲ, ಯಾಕೆ? ಆ ಮಕ್ಕಳ ಹಾಗೆ, ಸ್ಮಶಾನದೊಂದಿಗೆ ನಮ್ಮ ಭಾವಕೋಶದಲ್ಲಿ ಅಡಗಿ ಹೆದರಿಸುವ ಭೂತಕ್ಕೋ ಅಥವಾ ವ್ಯಕ್ತಿಗಳೇ ಸತ್ತು ಭೂತಕಾಲ ಸೇರುತ್ತಾರೆಂಬ ಸತ್ಯಕ್ಕೋ? ಯಾವುದು ನಮಗೆ ಹೆಚ್ಚು ಅಹಿತವಾಗುವ ವಿಷಯ ಮತ್ತು ಯಾಕೆ?

ಬದುಕು ಎಷ್ಟು ನಶ್ವರ ಎಂಬುದನ್ನು ಇಲ್ಲಿ ಹೇಳುತ್ತಿಲ್ಲ; ಸಾವಿನ ಬಗ್ಗೆ ಚರ್ಚಿಸುವುದಕ್ಕೆ ಇಲ್ಲಿ ಖಂಡಿತಕ್ಕೂ ಕುಳಿತಿಲ್ಲ; ಈ ಬಗ್ಗೆ ಮಾತಾಡಲಿ ಬಿಡಲಿ, ಅದೊಂದು ನಿತ್ಯ ಸತ್ಯ ಎಂಬುದು ಎಲ್ಲರಿಗೂ ತಿಳಿದಿದ್ದೇ. ಸ್ಮಶಾನದ ಬಗ್ಗೆ, ಅಲ್ಲಿದೆಯೆಂದು ಭಾವಿಸಲಾದ ಸಾವಿನಾಚೆಯ ಬದುಕುಗಳ ಬಗ್ಗೆ ಹೇಳಿ ಬೆದರಿಸುವ ಉದ್ದೇಶವಂತೂ ಮೊದಲೇ ಇಲ್ಲ. ಹಾಗಾದರೆ ಸ್ಮಶಾನದ ಬಗೆಗಿನ ಪ್ರಸ್ತಾಪ ಬಂದಿದ್ದೇಕೆ? ನಮಗೆಷ್ಟೇ ಅಹಿತವಾದ ವಿಷಯಗಳೂ ಬದುಕಿನಲ್ಲಿ ನಮಗರಿವಿಲ್ಲದಂತೆಯೇ ಹಾಸುಹೊಕ್ಕಾಗಿ ಬರುತ್ತವಲ್ಲ ಎಂಬ ಸೋಜಿಗವೊಂದು ನಿಶ್ಚಿತವಾಗಿ ಇದರ ಹಿಂದಿದೆ. ನಮಗಿಷ್ಟವಾಗದ ವಿಷಯವನ್ನೇ ಮಣಮಣಿಸುತ್ತಿದ್ದರೆ ಆ ಕುರಿತ ನಮ್ಮ ಸಹಿಷ್ಣುತೆ ಹೆಚ್ಚಾದೀತೇ ಎಂಬ ಜಿಜ್ಞಾಸೆಯೂ ಈ ಲಹರಿಗೆ ಕಾರಣವಾಗಿರಬಹುದು.

ಹದಿನೆಂಟನೇ ಶತಮಾನದ ಕೆಲವು ಇಂಗ್ಲಿಷ್‌ ಕವಿಗಳು ನೆನಪಾಗುತ್ತಿದ್ದಾರೆ. ಸ್ಮಶಾನ ಕವಿಗಳು ಅಥವಾ ಗ್ರೇವ್‌ಯಾರ್ಡ್‌ ಪೊಯೆಟ್ಸ್‌ ಎಂದೆಲ್ಲಾ ಕರೆಯಲಾಗುತ್ತಿತ್ತು ಇವರನ್ನು. ಬದುಕಿನ ನಶ್ವರತೆಯನ್ನು ಬಿಂಬಿಸುತ್ತಾ ಅಧ್ಯಾತ್ಮದೆಡೆಗಿನ ತುಡಿತವನ್ನು ಹೇಳುವಂಥ ಕವಿತೆಗಳು ಈ ಸಾಹಿತ್ಯ ಪ್ರಕಾರದಲ್ಲಿದ್ದವು. ಮುಖ್ಯವಾಗಿ ನೋವು, ದುಃಖ, ವಿಯೋಗದಂಥ ಭಾವತೀವ್ರತೆಯ ವಿಷಯಗಳ ಬಗ್ಗೆ ಹೇಳುವುದಕ್ಕೆ ಸ್ಮಶಾನ, ಗೋರಿ, ಶವಪೆಟ್ಟಿಗೆ ಇತ್ಯಾದಿಗಳನ್ನು ರೂಪಕಗಳಂತೆ ಈ ಕವಿಗಳು ಬಳಸಿಕೊಂಡಿದ್ದರು. ರಾಬರ್ಟ್‌ ಬ್ಲೇರ್‌, ಥಾಮಸ್‌ ಗ್ರೇ, ಎಡ್ವರ್ಡ್‌ ಯಂಗ್ ಮುಂತಾದ ಹೆಸರಾಂತ ಕವಿಗಳು ಸ್ಮಶಾನ ಮತ್ತು ಸಾವನ್ನು ತಮ್ಮ ಅಭಿವ್ಯಕ್ತಿ ರೂಪಕವಾಗಿ ಬಳಸಿದ್ದಾರೆ.

ಇಂಗ್ಲಿಷ್‌ ಕವಿಗಳು ಮಾತ್ರವೇ ಅಲ್ಲ, ನಮ್ಮದೇ ನೆಲದ ಕವಿಗಳು ಸಹ ಸ್ಮಶಾನದ ಉಲ್ಲೇಖಗಳನ್ನು ಬಳಸಿದ್ದಾರೆ. ಈ ನಿಟ್ಟಿನಲ್ಲಿ ಫಕ್ಕನೆ ನೆನಪಾಗುವುದು ರಾಘವಾಂಕ ಕವಿಯ ʻಹರಿಶ್ಚಂದ್ರ ಕಾವ್ಯʼ. ಮಡಿದ ಮಗನಿಗಾಗಿ ವಿಲಪಿಸುತ್ತಾ, ಆತನನ್ನು ಸ್ಮಶಾನಕ್ಕೆ ಹೊತ್ತು ತರುತ್ತಾಳೆ ಆತನ ತಾಯಿ, ಹರಿಶ್ಚಂದ್ರನ ಮಡದಿ ಚಂದ್ರಮತಿ. ರಾತ್ರಿಯ ಆ ಹೊತ್ತು ಸ್ಮಶಾನ ಹೇಗಿತ್ತು ಎಂಬುದನ್ನು ರಾಘವಾಂಕ ಹೀಗೆ ವರ್ಣಿಸುತ್ತಾನೆ-

“ಹಸಿಯ ತೊಗಲುಡಿಗೆ ಹಿಂಡಿಲುಗರುಳ ಚಲ್ಲಣದ/ ಕುಸುರಿಗಂಡದ ತೊಂಡಲಸ್ಥಿಗಳ ತೊಡಿಗೆ ದ/ ಟ್ಟಿಸುವ ರಕ್ತದ ಭಾರಿಗಣ್ಣಾಲಿಗಳ ಸೊಡರು ಕಾಳಿಜದ ಚರುಗುಗಡುಬು|| ಸಸಿದು ಕೊಬ್ಬಿದ ಮಿದುಳ ರಾಸಿಗೂಳೆಸೆಯೆ ಮಾ/ ಮಸಕದಿಂ ಚಾಮುಂಡಿ ಕಮಲಾಕ್ಷಿಯರ ನಡುವೆ/ ಹೊಸತನಿಕ್ಕುವ ಭೂತವೇತಾಳರಾಡಿದರು ಮಾನಿನಿಯ ಮನ ಬೆದರಲು||”

(ಸ್ಥೂಲಾರ್ಥದಲ್ಲಿ ಹೇಳುವುದಾದರೆ- ಹಸಿ ಚರ್ಮದ ಉಡಿಗೆ, ಕರುಳುಗೊಂಚಲಿನ ಕುಸುರಿಯ ಆಭರಣ, ಅಸ್ಥಿ ಕಿರೀಟದ ತೊಡಿಗೆ, ರಕ್ತಗೆಂಪು ಬಣ್ಣದ ಸೊಡರಿನಂಥ ಕಣ್ಣು, ಪಿತ್ತಜನಕಾಂಗದ ಬಲಿ ಪಡೆದ, ಕೊಬ್ಬಿದ ಮಿದುಳಿನ ರಾಶಿಗಳನ್ನೇ ಊಟವಾಗಿಸಿಕೊಂಡಿರುವ ಕಡುಕೋಪದ ಚಾಮುಂಡಿ ಕಮಲಾಕ್ಷಿಯರ ನಡುವೆ ಹೊಸದಾಗಿ ಸೇರಿದ್ದ ಭೂತಬೇತಾಳಗಳು ಮಾನಿನಿಯನ್ನು ಬೆದರಿಸುವಂತೆ ವರ್ತಿಸುತ್ತಿದ್ದವು)

ಇಲ್ಲೀಗ ಹೆದರಿಸುವಂಥ ವರ್ಣನೆಗಳು ಮಾತ್ರವೇ ಅಲ್ಲ, ಭಯಾನಕ, ಭೀಕರ, ಭೀಭತ್ಸ ಎನಿಸುವಂಥ ಬಣ್ಣನೆಗಳು ಕಾಣುತ್ತವೆ. ಖಂಡಿತಕ್ಕೂ ಇಂಥವನ್ನು ಕವಿ ಖುದ್ದಾಗಿ ಕಂಡಿರಲಾರ. ಆದರೆ ಈ ವರ್ಣನೆಗಳನ್ನು ನೋಡಿದಾಗ, ಸ್ಮಶಾನವೆಂಬ ಕಲ್ಪನೆ ಭೀಕರವೋ, ಅದು ತನ್ನೊಳಗೆ ಹುದುಗಿಸಿಕೊಳ್ಳುವ ಸಾವು ಭೀಕರವೋ ಎಂಬುದೇ ತಿಳಿಯದೆ ಗೊಂದಲಕ್ಕೆ ಬಿದ್ದರೆ ಅಚ್ಚರಿಯಿಲ್ಲ.

ಕುವೆಂಪು ಅವರ ʻಶ್ಮಶಾನ ಕುರುಕ್ಷೇತ್ರʼ ನಾಟಕವನ್ನೂ ಇಲ್ಲಿ ಉಲ್ಲೇಖಿಸಬಹುದು. ಮೊದಲ ಮಹಾಯುದ್ಧದ ನಂತರ ಬರೆದಂಥ ಈ ನಾಟಕವು, ಯುದ್ಧಗಳು ಹೇಗೆ ವಿಶಾಲವಾದ ಸ್ಮಶಾನಗಳನ್ನು ಹುಟ್ಟು ಹಾಕುತ್ತವೆ ಎಂಬುದನ್ನು ವಿಸ್ತರಿಸುತ್ತದೆ. ವಿನಾಶದ ಪರಿಕಲ್ಪನೆಗೆ ಪರ್ಯಾಯವಾಗಿ ಸ್ಮಶಾನವೆಂಬ ಪ್ರತಿಮೆ ಇಲ್ಲಿ ರೂಪುಗೊಂಡಿದೆ. ಆದರೆ ಇದಕ್ಕೆ ರೂಪಕವಾಗಿ ನಾಟಕದಲ್ಲಿ ಮೂಡಿಬಂದಿರುವುದು ಮಹಾಭಾರತದ ಕುರುಕ್ಷೇತ್ರ. ಯುದ್ಧಭೂಮಿಗಳ ಭೀಕರತೆಯನ್ನು ವಿವರಿಸುವುದಕ್ಕೆ ಭೂತಬೇತಾಳಗಳ ಕಲ್ಪನೆಯನ್ನು ಪಂಪನಾದಿಯಾಗಿ ಹಲವಾರು ಕವಿಗಳು ಬಳಸಿದ್ದಾರೆ.

ಥೋ! ಇದೆಂಥಾ ಸುಡುಗಾಡು ವರ್ಣನೆಗಳು, ಮಾಡೋಕೆ ಬೇರೆ ಕೆಲಸ ಇಲ್ವೇ ಎಂದು ಬೈಯ್ದುಕೊಂಡರೆ… ವಿಷಯ ಸುಡುಗಾಡಿನದ್ದೇ ಅಲ್ಲವೆ! ಈ ಕಠೋರ ವರ್ಣನೆಗಳನ್ನು ಬಿಟ್ಟು ಜನಮಾನಸದಲ್ಲಿ ಸ್ಮಶಾನದ ಬಗೆಗಿನ ಕಲ್ಪನೆಗಳನ್ನು ಗಮನಿಸೋಣ. ಜನಪದರಲ್ಲಿ ಬೈಗುಳಕ್ಕೆ ಅತಿ ಪ್ರಿಯವಾದ ವಿಷಯವೆಂದರೆ ಸ್ಮಶಾನ ಮತ್ತು ಹೆಣ! ಯಾವುದಕ್ಕೂ ಸಲ್ಲದವನನ್ನು ʻಮನೆಗೆ ಮನುಷ್ಯನಲ್ಲ, ಮಸಣಕ್ಕೆ ಹೆಣವಲ್ಲʼ ಎಂದು ಮೂದಲಿಸುವುದಿದೆ. ಪ್ರಾಂತ್ಯಾವಾರು ಮಟ್ಟದಲ್ಲಿ ಬೈಗುಳಗಳನ್ನು ವಿಂಗಡಿಸಿದರೆ, ಹಳೆ ಮೈಸೂರಿನ ಜನ ಈ ವಿಷಯದಲ್ಲಿ ಗಟ್ಟಿಗರು. (ಉತ್ತರ ಕರ್ನಾಟಕದ ಬೈಗುಳದ ರೀತಿಗಳೇ ಬೇರೆ. ಅದಿಲ್ಲಿ ಬೇಡ ಬಿಡಿ) ʻಅವ್ನ ಹೆಣ ಎತ್ತʼ ಎನ್ನುವುದರಿಂದ ಶುರು ಮಾಡಿದರೆ, ʻಮುಖಾ ಮುಚ್ಚ, ಹೆಜ್ಜೆ ಅಳಸ, ಹೊಗೆ ಹಾಕ, ಹೊತ್ಗಂಡ್ಹೋಗ, ಬಾಯಿಗ್‌ ಮಣ್ಹಾಕ, ಕರಿನಾಗ ಕಚ್ಚ, ಮನೆ ಮಶಾಣಾಗ, ಎಕ್ಕುಟ್ಹೋಗ (ಎಕ್ಕ-ಹುಟ್ಟಿ-ಹೋಗ, ಅಂದರೆ ನಾಶವಾಗು), ಸೀಮೆ ಸುಡುಗಾಡಾಗ…ʼ ಎಂದು ಸಹಸ್ರನಾಮಾವಳಿಯಂತೆ ಸಾವಿನ ಶಾಪಾವಳಿಯನ್ನೇ ಕರೆಯಬಲ್ಲರು. ಅದರಲ್ಲೂ ಕೆಲವು ಹಳೆಯ ತಲೆಮಾರಿನವರು ರಾಗವಾಗಿ ಬೈಗುಳ ಪ್ರಾರಂಭಿಸಿದರೆಂದರೆ ತಾಸುಗಟ್ಟಲೆ ತಡೆ ರಹಿತವಾಗಿ ಬೈಯಬಲ್ಲರು. ಈ ಬೈಗುಳಗಳು ಹಾರೈಸುವುದು ಸಾವು, ನಾಶವನ್ನೇ ಹೊರತು ಮತ್ತೇನಲ್ಲ.

ಯಾವುದೇ ಜನಪದ ಕಲ್ಪನೆಗಳಲ್ಲಿ, ಮಕ್ಕಳ ಕಥೆಗಳಲ್ಲಿ ಸ್ಮಶಾನಕ್ಕೂ, ಹುಣಸೇಮರಕ್ಕೂ, ಭೂತಕ್ಕೂ, ಒಂಥರಾ ನಂಟು. ಊರಾಚೆಗೊಂದು ಸ್ಮಶಾನ, ಅಲ್ಲೊಂದು ಭೂತದಂಥ ಒಂಟಿ ಹುಣಸೆಮರ, ಅದರಲ್ಲೊಂದು ನೇತಾಡುವ ದೆವ್ವ… ಇಂಥ ಕಲ್ಪನೆಯ ಕಥೆಗಳನ್ನು ಬಾಲ್ಯದಲ್ಲಿ ಲೆಕ್ಕವಿಲ್ಲದಷ್ಟು ಕೇಳಿದ್ದಿದೆ. ʻಒಂದಾನೊಂದು ಊರಿನ ಹೊರಗೆ ಭಾರೀ ಹುಣಸೆಮರ/ ಅದರಲ್ಲಿತ್ತು ಒಂದಾನೊಂದು ದೆವ್ವ ಹುಚ್ಚಿ ಥರʼ ಎಂಬ ಎಚ್‌.ಎಸ್‌. ವೆಂಕಟೇಶಮೂರ್ತಿಗಳ ಕವನ ಮಕ್ಕಳಿಗೆ ಕಚುಗುಳಿ ಇಡುವಂತಿದೆ.

ಈ ಹೊತ್ತಿನಲ್ಲಿ ಸುಡುಗಾಡು ಸಿದ್ಧರು ನೆನಪಾಗುತ್ತಿದ್ದಾರೆ. ಹಿಂದಿನ ಕಾಲದಲ್ಲಿ ಹಳ್ಳಿಗಳಲ್ಲಿ ಜಾದೂಗಾರರಂತೆ ಕಂಡು ಬರುತ್ತಿದ್ದ ಅಲೆಮಾರಿ ಜನಾಂಗವಿದು. ಈಗ ಇವರ ಮುಂದಿನ ತಲೆಮಾರುಗಳು ವಿದ್ಯಾಭ್ಯಾಸದೆಡೆಗೆ ಹೊರಳಿರುವುದರಿಂದ ಇವರ ಜೀವನಕ್ರಮ ಬದಲಾಗುತ್ತಿದೆ. ಹಣೆಗೆ ಬೂದಿ ಬಳಿದುಕೊಂಡು, ಕೊರಳಿಗೆ ರುದ್ರಾಕ್ಷಿ ಧರಿಸಿ, ಶುಭಾಶುಭಗಳ ಭವಿಷ್ಯ ಹೇಳುತ್ತಾ, ಇಂದ್ರಜಾಲಿಕರಂತೆ ಏನೇನೋ ಜಾದೂ ಮಾಡುವ ಇವರು, ಸುಡುಗಾಡುಗಳಲ್ಲಿದ್ದು ಸಿದ್ಧಿಗಳನ್ನು ಕರಗತ ಮಾಡಿಕೊಳ್ಳುತ್ತಾರೆಂಬ ಪ್ರತೀತಿಯಿದೆ. ಸುಡುಗಾಡುಗಳೆಂದರೆ ಬರೀ ಇಂಥ ಭಾವಗಳೇ ಬರಬೇಕಿಲ್ಲ ಎಂಬಂತೆ, ಶಿರಸಿಯ ʻನೆಮ್ಮದಿ ಕುಟೀರʼ ಕೆಲಸ ಮಾಡಬಹುದು; ʻಸ್ಮಶಾನವೇ ನಮ್ಮ ನಿತ್ಯ ಭೇಟಿಯ ತಾಣʼ ಎನ್ನುವ ಗೆಳೆಯರ ಬಳಗವೂ ಇರಬಹುದು.

ಇದನ್ನೂ ಓದಿ: ದಶಮುಖ ಅಂಕಣ: …. ನೋಡಲಿಕ್ಕೆ ಹೋಗೋಣು ಬಾರೆ!

ಭಾಷೆಯ ಜಾಯಮಾನದಲ್ಲೂ ಇದರ ಬಗ್ಗೆ ಸಾಕಷ್ಟು ವಿಚಾರಗಳು ಚಾಲ್ತಿಯಲ್ಲಿವೆ. ಭಯಾನಕ ನಿಶ್ಶಬ್ದವನ್ನು ʻಸ್ಮಶಾನ ಮೌನʼ, ಸತ್ತಾಗ ಹುಟ್ಟುವ ವೈರಾಗ್ಯವನ್ನು ʻಸ್ಮಶಾನ ವೈರಾಗ್ಯʼ, ಭೀಕರವಾದ ಅವಸ್ಥೆಯನ್ನು ʻಸ್ಮಶಾನ ಸದೃಶ್ಯʼ, ಯಾರಿಗೂ ಬೇಡದ್ದನ್ನು ʻಮಸಣದ ಹೂವುʼ, ಕಡೆಯ ಯಾತ್ರೆಯನ್ನು ʻಸ್ಮಶಾನ ಯಾತ್ರೆʼ… ನೋಡಿ, ನಮಗೆ ಅಹಿತವಾಗುವ ವಿಷಯವನ್ನೇ ಎಷ್ಟೆಲ್ಲ ರೀತಿಯಲ್ಲಿ ಬಳಸಿಕೊಳ್ಳುತ್ತೇವೆ ನಾವು.

ಇಷ್ಟು ಹೇಳಿದ ಮೇಲೆ ಸ್ಮಶಾನವಾಸಿಯ ಬಗ್ಗೆ ಹೇಳದಿದ್ದರೆ ವಿಷಯವೇ ಅಪೂರ್ಣ. ಮೊದಲೆಲ್ಲ ಊರಿನ ದಕ್ಷಿಣ ದಿಕ್ಕಿನಲ್ಲಿ ಸ್ಮಶಾನಗಳು ಇರುತ್ತಿದ್ದುದರಿಂದ ಈ ದಿಕ್ಕೇ ಅಶುಭ ಎನ್ನುವ ಕಲ್ಪನೆ ಜನಮಾನಸದಲ್ಲಿದೆ. ಹಾಗೆಂದು ʻಆತʼ ದಕ್ಷಿಣ ದಿಕ್ಕಿನ ಒಡೆಯ. ಹೆಸರು ರುದ್ರ, ಇರುವುದು ರುದ್ರಭೂಮಿಯಲ್ಲಿ. ರುಂಡಮಾಲಿ, ಕಪಾಲಿ, ಭೂತಗಣಗಳ ನಾಥ, ಬೂದಿಬಡುಕ… ಇಂಥ ಹಲವು ಹೆಸರುಗಳು ಆತನಿಗೆ. ಜಗತ್ತಿನಲ್ಲಿ ಸೃಷ್ಟಿ ಮತ್ತು ಸ್ಥಿತಿಯನ್ನು ಕಾಪಾಡುವ ಹೊಣೆ ಬ್ರಹ್ಮ ಮತ್ತು ವಿಷ್ಣುವಿಗಿದ್ದರೆ ಈತನಿಗೆ ಲಯದ ಕೆಲಸ. ಹೌದು, ಲಯಕರ್ತನಾದ ಶಿವನ ಬಗೆಗಿನ ಮಾತಿದು. ಇನ್ನೇನು ಬರಲಿರುವ ಶಿವರಾತ್ರಿಯ ಹಿನ್ನೆಲೆಯಲ್ಲಿ ʻಲಯʼ ಎನ್ನುವುದಕ್ಕಿರುವ ಘನತೆಯನ್ನು ಗಮನಿಸಬೇಕಿದೆ ನಾವು. ಜಗತ್ತಿನ ಮುಂದುವರಿಕೆಗೆ ಇದು ಅಗತ್ಯ. ಹಾಗೆಂದೇ ʻಇಲ್ಲʼ ಎನ್ನುವುದಕ್ಕೆ ನಮ್ಮ ಭಾವಕೋಶದಲ್ಲಿ ಯಾವುದೇ ಅರ್ಥವಿದ್ದರೂ, ಅದಕ್ಕೊಂದು ದೈವತ್ವವನ್ನು ಕಲ್ಪಿಸಿದ್ದೇವೆ; ಅದಕ್ಕೊಂದು ಅಧ್ಯಾತ್ಮವನ್ನೂ ಸೃಷ್ಟಿಸಿದ್ದೇವೆ. ʻಮದುವೆಗೋ ಮಸಣಕೋ ಹೋಗೆಂದ ಕಡೆ ಹೋಗು/ ಪದ ಕುಸಿಯೆ ನೆಲವಿಹುದು ಮಂಕುತಿಮ್ಮʼ ಎಂಬುದರ ಅರ್ಥವನ್ನು ಈ ಹಿನ್ನೆಲೆಯಲ್ಲೂ ಗ್ರಹಿಸಬಹುದೇ.

ಇದನ್ನೂ ಓದಿ: ದಶಮುಖ ಅಂಕಣ: ಬಾಗಿಲನು ತೆರೆದು…

Continue Reading

ಬೆಂಗಳೂರು

ಮಲ್ಲೇಶ್ವರದಲ್ಲಿ ಫೆ.27ರಿಂದ 29ರವರೆಗೆ ʼನಚಿಕೇತ ಎಂಬ ಸತ್ಯಕಾಮನ ಕಥೆʼ ಕಠೋಪನಿಷತ್ತಿನ ಪ್ರವಚನ

ಬೆಂಗಳೂರಿನ ಮಲ್ಲೇಶ್ವರದಲ್ಲಿ ಫೆಬ್ರವರಿ 27ರಿಂದ 29ರವರೆಗೆ ಪ್ರವಚನ ಕಾರ್ಯಕ್ರಮ ನಡೆಯಲಿದ್ದು, ಆಧ್ಯಾತ್ಮಿಕ ಮಾರ್ಗದರ್ಶಿ, ವೈಶ್ವಿಕ ಭಾಷಣಕಾರ ಶ್ರೀ ಎಂ ಅವರು ಪ್ರವಚನ ನೀಡಲಿದ್ದಾರೆ. ಕಾರ್ಯಕ್ರಮಕ್ಕೆ ವಿಸ್ತಾರ ನ್ಯೂಸ್‌ ಮಾಧ್ಯಮ ಸಹಯೋಗ ನೀಡಿದೆ.

VISTARANEWS.COM


on

Kathopanishad discourse
Koo

ಬೆಂಗಳೂರು: ಸತ್ಸಂಗ ಫೌಂಡೇಶನ್‌ ವತಿಯಿಂದ ಫೆಬ್ರವರಿ 27ರಿಂದ 29ರವರೆಗೆ ʼನಚಿಕೇತ ಎಂಬ ಸತ್ಯಕಾಮನ ಕಥೆʼ ಕಠೋಪನಿಷತ್ತಿನ ಪ್ರವಚನವನ್ನು ನಗರದ ಮಲ್ಲೇಶ್ವರದ ಚೌಡಯ್ಯ ಸ್ಮಾರಕ ಭವನದಲ್ಲಿ ಆಯೋಜಿಸಲಾಗಿದೆ. ಸಮಾಜ ಸುಧಾರಕ, ಆಧ್ಯಾತ್ಮಿಕ ಮಾರ್ಗದರ್ಶಿ, ಶಿಕ್ಷಣ ತಜ್ಞ, ಲೇಖಕ ಹಾಗೂ ವೈಶ್ವಿಕ ಭಾಷಣಕಾರ ಶ್ರೀ ಎಂ (ಪದ್ಮಭೂಷಣ ಪುರಸ್ಕೃತ ಶ್ರೀ ಮಧುಕರ್ ನಾಥ್) ಅವರು ಇಂಗ್ಲಿಷ್‌ನಲ್ಲಿ ಪ್ರವಚನ ನೀಡಲಿದ್ದಾರೆ.

ಫೆಬ್ರವರಿ 27ರಿಂದ 29ರವರೆಗೆ ಪ್ರತಿದಿನ ಸಂಜೆ 6ರಿಂದ 7ಗಂಟೆವರೆಗೆ ಕಠೋಪನಿಷತ್ತಿನ ಪ್ರವಚನ ನಡೆಯಲಿದ್ದು, ಕಾರ್ಯಕ್ರಮಕ್ಕೆ ವಿಸ್ತಾರ ನ್ಯೂಸ್‌ ಮಾಧ್ಯಮ ಸಹಯೋಗ ನೀಡಿದೆ. ಮೊದಲ ದಿನವಾದ ಫೆ. 27ರಂದು ಸಂಜೆ 4.55ರಿಂದ 5.10ರವರೆಗೆ ವಿಸ್ತಾರ ನ್ಯೂಸ್‌ನಿಂದ ಪ್ರವಚನಕಾರ ಶ್ರೀ ಎಂ ಅವರ ಸಂದರ್ಶನ ನಡೆಯಲಿದೆ. ಸಂಜೆ 5.44ಕ್ಕೆ ಕಾರ್ಯಕ್ರಮ ಉದ್ಘಾಟನೆ ನೆರವೇರಲಿದ್ದು, ಈ ವೇಳೆ ಗಣ್ಯರು ಕನ್ನಡ ಪುಸ್ತಕಗಳನ್ನು ಬಿಡುಗಡೆ ಮಾಡಲಿದ್ದಾರೆ. ನಂತರ 6ರಿಂದ 7ಗಂಟೆವರೆಗೆ ಕಠೋಪನಿಷತ್ತಿನ ಪ್ರವಚನ (ಇಂಗ್ಲಿಷ್‌ನಲ್ಲಿ) ನಡೆಯಲಿದೆ.

ಇದನ್ನೂ ಓದಿ | ಫೆ.28ರಂದು ಕನ್ನಡದ ನಾಳೆಗಳಿಗಾಗಿ ಮಾತುಕತೆ: ಮಾಲಿಕೆ-೩ ಮತ್ತು ಪುಸ್ತಕ ಬಿಡುಗಡೆ

ಮುಖ್ಯ ಅತಿಥಿಗಳಾಗಿ ಇಸ್ರೋ ಅಧ್ಯಕ್ಷ ಎಸ್‌.ಸೋಮನಾಥ್‌, ಫೋರ್ಟಿಸ್‌ ಆಸ್ಪತ್ರೆಯ ಚೀಫ್‌ ಕಾರ್ಡಿಯೋಥೊರಾಸಿಕ್ & ವಾಸ್ಕ್ಯುಲರ್ ಸರ್ಜನ್‌ ಡಾ. ವಿವೇಕ್‌ ಜವಳಿ, ರಾಜ್ಯ ಬಿಜೆಪಿ ಉಪಾಧ್ಯಕ್ಷೆ ಹಾಗೂ ಅದಮ್ಯ ಚೇತನ ಸಂಸ್ಥೆ ಅಧ್ಯಕ್ಷೆ ತೇಜಸ್ವಿನಿ ಅನಂತಕುಮಾರ್‌, ಮಾಜಿ ಡಿಜಿಪಿ ಅಜಯ್‌ ಕುಮಾರ್‌ ಸಿಂಗ್‌, ಇಸ್ರೋ ಮಾಜಿ ಅಧ್ಯಕ್ಷ ಕಿರಣ್‌ ಕುಮಾರ್‌ ಭಾಗವಹಿಸಲಿದ್ದಾರೆ.

Continue Reading

ಬೆಂಗಳೂರು

ಫೆ.28ರಂದು ಕನ್ನಡದ ನಾಳೆಗಳಿಗಾಗಿ ಮಾತುಕತೆ: ಮಾಲಿಕೆ-೩ ಮತ್ತು ಪುಸ್ತಕ ಬಿಡುಗಡೆ

ಬೆಂಗಳೂರಿನ ಚಾಮರಾಜಪೇಟೆಯ ಕನ್ನಡ ಸಾಹಿತ್ಯ ಪರಿಷತ್‌ನ ಆವರಣದಲ್ಲಿ ‘ಕನ್ನಡದ ನಾಳೆಗಳಿಗಾಗಿ ಮಾತುಕತೆ: ಮಾಲಿಕೆ-೩’ ಮತ್ತು ಸಾಹಿತಿ ಡಾ.ರಾಜಶೇಖರ ಮಠಪತಿ (ರಾಗಂ) ಅವರ ‘ಕನ್ನಡ ವಿಚಾರ-ವಿಸ್ತಾರ-ಅಸ್ಮಿತೆ ಪುಸ್ತಕ ಬಿಡುಗಡೆʼ ಕಾರ್ಯಕ್ರಮ ನಡೆಯಲಿದೆ.

VISTARANEWS.COM


on

Kannada Nalegaligagi Mathukate programme in Bangalore on Feb 28
Koo

ಬೆಂಗಳೂರು: ಬೆಂಗಳೂರು ನಗರ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್‌ ವತಿಯಿಂದ ಫೆ.28ರಂದು ಸಂಜೆ 5.30ಕ್ಕೆ ‘ಕನ್ನಡದ ನಾಳೆಗಳಿಗಾಗಿ ಮಾತುಕತೆ: ಮಾಲಿಕೆ-೩’ ಮತ್ತು ಸಾಹಿತಿ ಡಾ.ರಾಜಶೇಖರ ಮಠಪತಿ (ರಾಗಂ) ಅವರ ‘ಕನ್ನಡ ವಿಚಾರ-ವಿಸ್ತಾರ-ಅಸ್ಮಿತೆ’ ಪುಸ್ತಕ ಬಿಡುಗಡೆ ಕಾರ್ಯಕ್ರಮವನ್ನು ನಗರದ ಚಾಮರಾಜಪೇಟೆಯ ಕನ್ನಡ ಸಾಹಿತ್ಯ ಪರಿಷತ್‌ನ ಆವರಣದ ಶತಮಾನೋತ್ಸವ ಭವನದ ಅಕ್ಕಮಹಾದೇವಿ ಸಭಾಂಗಣದಲ್ಲಿ ಆಯೋಜಿಸಲಾಗಿದೆ ಎಂದು ಪರಿಷತ್‌ ಅಧ್ಯಕ್ಷ ಎಂ. ಪ್ರಕಾಶಮೂರ್ತಿ ತಿಳಿಸಿದ್ದಾರೆ.

ಕನ್ನಡಪರ ಹಿರಿಯ ಹೋರಾಟಗಾರ ಜಿ. ಗುರು ಪ್ರಸಾದ್‌ ಅವರು ಪುಸ್ತಕ ಬಿಡುಗಡೆ ಮಾಡಲಿದ್ದು, ಮಾತುಕತೆಯಲ್ಲಿ ಪುಸ್ತಕದ ಲೇಖಕ, ಪ್ರಾಧ್ಯಾಪಕ ಹಾಗೂ ಸಾಹಿತಿ ಡಾ.ರಾಜಶೇಖರ ಮಠಪತಿ (ರಾಗಂ) ಭಾಗವಹಿಸಲಿದ್ದಾರೆ. ಕನ್ನಡಪರ ಚಿಂತಕ ಹಾಗೂ ಸಮಾಜಸೇವಕ ಪ್ರಶಾಂತ್‌ ಕಲ್ಲೂರ್‌ ಉಪಸ್ಥಿತರಿರಲಿದ್ದು, ಬೆಂಗಳೂರು ನಗರ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್‌ ಅಧ್ಯಕ್ಷ ಎಂ.ಪ್ರಕಾಶಮೂರ್ತಿ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಲಿದ್ದಾರೆ ಎಂದು ಹೇಳಿದ್ದಾರೆ.

ನಗರ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್‌ನ ಪ್ರತಿನಿಧಿ ಸದಸ್ಯ ಡಾ.ಎಸ್‌. ತಿಮ್ಮಯ್ಯ ನಾಡಗೀತೆ ಹಾಡಲಿದ್ದು, ಗೌರವ ಕಾರ್ಯದರ್ಶಿ ಎಲ್‌. ಹರ್ಷ ಸ್ವಾಗತಿಸಲಿದ್ದು, ಕಾರ್ಯಕಾರಿ ಸಮಿತಿ ಸದಸ್ಯರಾದ ಇಂದಿರಾ ಶರಣ್‌ ಜಮ್ಮಲದಿನ್ನಿ ನಿರೂಪಣೆ ಮಾಡಲಿದ್ದು, ಸಂಘ ಸಂಸ್ಥೆಗಳ ಪ್ರತಿನಿಧಿ ಡಾ. ಮಾಗಡಿ ಗಿರೀಶ್‌ ವಂದನಾರ್ಪಣೆ ಸಲ್ಲಿಸಲಿದ್ದಾರೆ ಎಂದು ತಿಳಿಸಿದ್ದಾರೆ.

ಇದನ್ನೂ ಓದಿ | H D Deve Gowda: ಎಚ್.ಡಿ.ದೇವೇಗೌಡರಿಗೆ ‘ಮಣ್ಣಿನ ಮಗ’ ಕೃತಿಯ ಪ್ರಥಮ ಪ್ರತಿ; ಫೆ.29ರಂದು ಬಿಡುಗಡೆ

ಕನ್ನಡ ನಾಡು, ನುಡಿ, ಕನ್ನಡಿಗರು ಎದುರಿಸುತ್ತಿರುವ ಸವಾಲುಗಳ ಬಗ್ಗೆ ಚರ್ಚೆ

ಪ್ರತಿಯೊಬ್ಬ ಕನ್ನಡಿಗನಿಗೂ ಕನ್ನಡದ ಮೇಲೆ ಅಭಿಮಾನ, ಕಾಳಜಿ, ಪ್ರೀತಿ ಇರುತ್ತವೆ. ಭಾವನಾತ್ಮಕವಾಗಿ ಕನ್ನಡದ ಕೆಲಸ ಎಂದು ನಾವು ಹಲವು ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳುತ್ತೇವೆ. ಕನ್ನಡನಾಡಿನ ನಾಳೆಗಳ ಬಗ್ಗೆ ಒಂದು ಸ್ಪಷ್ಟವಾದ ಕನಸು-ಗುರಿ ನಮ್ಮೆದುರು ಇದ್ದು, ನಾವು ಮಾಡುತ್ತಿರುವ ಚಟುವಟಿಕೆಗಳು ಆ ಕನಸುಗಳನ್ನು ನನಸಾಗಿಸುವ ನಿಟ್ಟಿನಲ್ಲಿ ಯಾವ ಕೊಡುಗೆ ನೀಡುತ್ತಿವೆ ಎಂಬುದು ನಮಗೆ ಮನವರಿಕೆಯಾದರೆ, ಅದು ನಮ್ಮ ಕೆಲಸದ ವೇಗ, ದಿಕ್ಕುದೆಸೆಗಳನ್ನು ಮಾರ್ಪಡಿಸಿಕೊಳ್ಳಲು ನೆರವಾಗುತ್ತದೆ. ಹಾಗೆಲ್ಲಾ ಮಾಡಲು ಯಾವುದಾದರೂ ಸಿದ್ದ ವಿಧಾನವಿದೆಯೇ? ಕನ್ನಡ ನಾಡು-ನುಡಿ, ಕನ್ನಡಿಗರು ಎದುರಿಸುತ್ತಿರುವ ಸವಾಲುಗಳೇನು? ನಮ್ಮ ಮುಂದಿರುವ ಆಯ್ಕೆಗಳೇನು? ಎಂಬಿತ್ಯಾದಿಗಳನ್ನು ಕುರಿತು ಕನ್ನಡದ ನಾಳೆಗಳಿಗಾಗಿ ಮಾತುಕತೆ : ಮಾಲಿಕೆ ೩ ಕಾರ್ಯಕ್ರಮವನ್ನು, ಏರ್ಪಡಿಸಲಾಗಿದೆ ಎಂದು ಬೆಂಗಳೂರು ನಗರ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್‌ ಅಧ್ಯಕ್ಷ ಎಂ. ಪ್ರಕಾಶಮೂರ್ತಿ ಹೇಳಿದ್ದಾರೆ.

Continue Reading
Advertisement
nbcc
ಅವಿಭಾಗೀಕೃತ2 mins ago

Job Alert: ಎನ್‌ಬಿಸಿಸಿಯಲ್ಲಿದೆ ಉದ್ಯೋಗಾವಕಾಶ; ಆನ್‌ಲೈನ್‌ ಮೂಲಕ ಅರ್ಜಿ ಸಲ್ಲಿಸಿ

Blast in Bengaluru Time bomb planted in rameshwaram cafe Important evidence found
ಬೆಂಗಳೂರು9 mins ago

Blast in Bengaluru: ರಾಮೇಶ್ವರಂ ಕೆಫೆ ಬ್ಲಾಸ್ಟ್‌; ಹೋಟೆಲ್‌ನಲ್ಲಿಟ್ಟಿದ್ದು ಟೈಂ ಬಾಂಬ್‌? ಸಿಕ್ಕಿದೆ ಮಹತ್ವದ ಸಾಕ್ಷ್ಯ

Tarang Mela 1
ಬೆಂಗಳೂರು24 mins ago

TARANG Mela: ಬೆಂಗಳೂರಿನಲ್ಲಿ ತರಂಗ್ ಮೇಳಕ್ಕೆ ಚಾಲನೆ; ಕೃಷಿ ಉತ್ಪನ್ನ, ಕರಕುಶಲ ವಸ್ತು ಪ್ರದರ್ಶನ, ಮಾರಾಟ

Live In Couple
ದೇಶ26 mins ago

ಲಿವ್‌ ಇನ್‌ ಪಾರ್ಟ್‌ನರ್‌ನನ್ನೇ ಕೊಂದು ಪೊಲೀಸರಿಗೆ ಕರೆ ಮಾಡಿದಳು ಕೊಲೆಗಾತಿ! ಮುಂದೇನಾಯ್ತು?

Exam Tips
ಆರೋಗ್ಯ57 mins ago

Exam Tips: ಮಕ್ಕಳ ಪರೀಕ್ಷೆ ಪೋಷಕರಿಗೂ ಪರೀಕ್ಷೆಯೇ? ಇಲ್ಲಿವೆ ಒತ್ತಡರಹಿತ ಎಕ್ಸಾಮ್‌ಗಾಗಿ ಟಿಪ್ಸ್!

Water crisis in Karnataka Govt orders supply from private borewells
ಬೆಂಗಳೂರು59 mins ago

water crisis: ಕರ್ನಾಟಕಕ್ಕೆ ಜಲಾಘಾತ! ಹಳ್ಳಿ ಹಳ್ಳಿಯಲ್ಲಿ ನೀರಿಲ್ಲ; ಖಾಸಗಿ ಬೋರ್‌ವೆಲ್‌ನಿಂದ ಪೂರೈಕೆಗೆ ಸರ್ಕಾರ ಸೂಚನೆ

rameshwaram cafe bengaluru incident
ಬೆಂಗಳೂರು1 hour ago

blast in bengaluru: ರಾಮೇಶ್ವರಂ ಕೆಫೆ ಬ್ಲಾಸ್ಟ್‌; ಜಸ್ಟ್‌ 10 ಸೆಕೆಂಡ್‌ ಅಂತರದಲ್ಲಿ ಎರಡೆರಡು ಬಾರಿ ಸ್ಫೋಟ!

Pro Kabaddi Final
ಕ್ರೀಡೆ1 hour ago

Pro Kabaddi Final: ಕೆಲವೇ ಕ್ಷಣದಲ್ಲಿ ಫೈನಲ್; ಚೊಚ್ಚಲ ಪ್ರಶಸ್ತಿಗಾಗಿ ಪುಣೇರಿ-ಹರಿಯಾಣ ಫೈಟ್​

Doggie's Summer Fashion
ಫ್ಯಾಷನ್1 hour ago

Doggie’s Summer Fashion: ಮುದ್ದಿನ ಶ್ವಾನಗಳಿಗೂ ಬಂತು ಫ್ಯಾಷೆನಬಲ್‌ ಸಮ್ಮರ್‌ ಕ್ಯಾಪ್ಸ್ & ಹ್ಯಾಟ್ಸ್

Kannada New Movie dheer bhahath Roy song out
ಸ್ಯಾಂಡಲ್ ವುಡ್1 hour ago

Kannada New Movie: ʻಧೀರ ಭಗತ್ ರಾಯ್ʼ ಸಿನಿಮಾದ ʼಏನು ಕರ್ಮʼ ಹಾಡು ಬಿಡುಗಡೆ

Sharmitha Gowda in bikini
ಕಿರುತೆರೆ5 months ago

Geetha Serial Kannada: ನಿದ್ದೆ ಕದ್ದ ಚೋರಿ! ನಟಿ `ಭಾನುಮತಿ’ ಹಾಟ್‌ ಪೋಟೊಗಳಿಗೆ ಫ್ಯಾನ್ಸ್ ಫುಲ್ ಫಿದಾ

Kannada Serials
ಕಿರುತೆರೆ5 months ago

Kannada Serials TRP: 2ನೇ ಸ್ಥಾನದಲ್ಲಿ 2 ಧಾರಾವಾಹಿಗಳು; ಟಿಆರ್‌ಪಿ ರೇಸ್‌ನಲ್ಲಿಲ್ಲ ಭಾಗ್ಯಲಕ್ಷ್ಮೀ!

Bigg Boss- Saregamapa 20 average TRP
ಕಿರುತೆರೆ4 months ago

Kannada Serials TRP: ಏಳನೇ ಸ್ಥಾನಕ್ಕೆ ʻಅಮೃತಧಾರೆʼ ಕುಸಿತ; ಬಿಗ್‌ ಬಾಸ್‌-ಸರಿಗಮಪ ಟಿಆರ್‌ಪಿ ಎಷ್ಟು?

galipata neetu
ಕಿರುತೆರೆ3 months ago

Kanyadana Serial: ಕಿರುತೆರೆಗೆ ಮತ್ತೆ ಎಂಟ್ರಿ ಕೊಟ್ಟ ʻಗಾಳಿಪಟʼ ಖ್ಯಾತಿಯ ʻನೀತುʼ!

Kannada Serials
ಕಿರುತೆರೆ5 months ago

Kannada Serials TRP: ನಾಲ್ಕನೇ ಸ್ಥಾನಕ್ಕೆ ಕುಸಿತ ಕಂಡ ʻಸೀತಾ ರಾಮʼ; ಟಿಆರ್‌ಪಿ ರೇಸ್‌ಗೆ ʻಭಾಗ್ಯಲಕ್ಷ್ಮಿʼ ಬ್ಯಾಕ್‌!

Kannada Serials
ಕಿರುತೆರೆ5 months ago

Kannada Serials TRP: ಟಿಆರ್‌ಪಿಯಲ್ಲಿ ʻಭಾಗ್ಯಲಕ್ಷ್ಮೀʼ ಹವಾ; ʻಪುಟ್ಟಕ್ಕನ ಮಕ್ಕಳುʼ ಧಾರಾವಾಹಿಗೆ ಸಂಕಷ್ಟ!

Bigg Boss' dominates TRP; Sita Rama fell to the sixth position
ಕಿರುತೆರೆ4 months ago

Kannada Serials TRP: ಟಿಆರ್‌ಪಿಯಲ್ಲಿ ʻಬಿಗ್ ಬಾಸ್ʼದೇ ಮೇಲುಗೈ; 6ನೇ ಸ್ಥಾನಕ್ಕೆ ಕುಸಿದ ʻಸೀತಾ ರಾಮʼ

geetha serial Dhanush gowda engagement
ಕಿರುತೆರೆ3 months ago

Dhanush Gowda: ಗೀತಾ ಧಾರಾವಾಹಿ ನಟನ ನಿಶ್ಚಿತಾರ್ಥ; ಭವ್ಯಾಳ ಕಮೆಂಟ್‌ ಬಾಕ್ಸ್‌ ಆಫ್‌!

varun
ಕಿರುತೆರೆ3 months ago

Brindavana Serial: ʼಬೃಂದಾವನʼ ಧಾರಾವಾಹಿಯಲ್ಲಿ ದೊಡ್ಡ ಟ್ವಿಸ್ಟ್‌; ಪ್ರಮುಖ ಪಾತ್ರಧಾರಿಯೇ ಬದಲು

Kannada Serials
ಕಿರುತೆರೆ6 months ago

Kannada Serials TRP: ಟಿಆರ್‌ಪಿಯಲ್ಲಿ ಏರಿಕೆ ಕಂಡ ʻಅಮೃತಧಾರೆʼ; ʻಗಟ್ಟಿಮೇಳʼಕ್ಕೆ ನಾಲ್ಕನೇ ಸ್ಥಾನ!

Blast in Bengaluru Time bomb planted in rameshwaram cafe Important evidence found
ಬೆಂಗಳೂರು9 mins ago

Blast in Bengaluru: ರಾಮೇಶ್ವರಂ ಕೆಫೆ ಬ್ಲಾಸ್ಟ್‌; ಹೋಟೆಲ್‌ನಲ್ಲಿಟ್ಟಿದ್ದು ಟೈಂ ಬಾಂಬ್‌? ಸಿಕ್ಕಿದೆ ಮಹತ್ವದ ಸಾಕ್ಷ್ಯ

rameshwaram cafe bengaluru incident
ಬೆಂಗಳೂರು2 hours ago

Blast in Bengaluru : ರಾಮೇಶ್ವರಂ ಕೆಫೆ ಸ್ಫೋಟದ ಸ್ಥಳದಲ್ಲಿ ಬ್ಯಾಟರಿ ಪತ್ತೆ!

Elephants spotted in many places
ಹಾಸನ3 hours ago

Elephant Attack: ಹಾಸನ, ರಾಮನಗರ, ಮೈಸೂರಲ್ಲಿ ಆನೆ ಬೇನೆ; ಬೆಳಗಾವಿಯಲ್ಲಿ ಬಿಂದಾಸ್‌ ಓಡಾಟ

read your daily horoscope predictions for march 1st 2024
ಭವಿಷ್ಯ13 hours ago

Dina Bhavishya : ಈ ರಾಶಿಯವರು ಪ್ರಮುಖ ಜನರೊಡನೆ ವ್ಯವಹರಿಸುವಾಗ ಎಚ್ಚರಿಕೆಯಿಂದ ಮಾತನಾಡಿ

dina bhavishya read your daily horoscope predictions for February 28 2024
ಭವಿಷ್ಯ2 days ago

Dina Bhavishya: ಇಂದು 12 ರಾಶಿಯವರ ಲಕ್ಕಿ ನಂಬರ್‌ ಏನು? ಯಾರಿಗೆ ಧನ ಲಾಭ?

Dina Bhavishya
ಭವಿಷ್ಯ3 days ago

Dina Bhavishya : ಈ ರಾಶಿಯವರು ಇಂದು ದೊಡ್ಡದೊಂದು ಸಮಸ್ಯೆಯಿಂದ ಮುಕ್ತಿ ಪಡೆಯುವಿರಿ

Rajya Sabha election Pakistan Zindabad slogans raised inside Vidhana Soudha by Nasir Hussain supporters
ರಾಜಕೀಯ3 days ago

ವಿಧಾನಸೌಧದೊಳಗೇ ಪಾಕಿಸ್ತಾನ ಜಿಂದಾಬಾದ್‌ ಘೋಷಣೆ; ನಾಸಿರ್‌ ಹುಸೇನ್‌ ಬೆಂಬಲಿಗ ದೇಶದ್ರೋಹಿಗಳ ಉದ್ಧಟತನ

Ghar Wapsi ST Somashekhar and Shivaram Hebbar to quit BJP
ರಾಜಕೀಯ3 days ago

Ghar Wapsi: ಎಸ್‌.ಟಿ. ಸೋಮಶೇಖರ್‌, ಶಿವರಾಂ ಹೆಬ್ಬಾರ್‌ ಬಿಜೆಪಿಗೆ ಗುಡ್‌ ಬೈ? ಇಂದೇ ರಾಜೀನಾಮೆ?

Rajyasabha Elections 42 Congress MLAs contacted by JDS candidate says DK Shivakumar
ರಾಜಕೀಯ3 days ago

Rajya sabha Election: ಕಾಂಗ್ರೆಸ್‌ನ 42 ಶಾಸಕರನ್ನು ಸಂಪರ್ಕ ಮಾಡಿದ್ದಾರೆ: ಡಿ.ಕೆ. ಶಿವಕುಮಾರ್

read your daily horoscope predictions for february 27 2024
ಭವಿಷ್ಯ4 days ago

Dina Bhavishya : ಇಂದು ಆಪ್ತರಿಂದಲೇ ಈ ರಾಶಿಯವರಿಗೆ ಕಂಟಕ!

ಟ್ರೆಂಡಿಂಗ್‌