ಪ್ರಧಾನಿ ಮೋದಿ ಲೇಖನ: ಭಾರತದ ಆಧುನಿಕ, ಪ್ರಗತಿಪರ ಕೃಷಿಗೆ ಎಂ ಎಸ್ ಸ್ವಾಮಿನಾಥನ್ ಅಡಿಪಾಯ - Vistara News

ಅಂಕಣ

ಪ್ರಧಾನಿ ಮೋದಿ ಲೇಖನ: ಭಾರತದ ಆಧುನಿಕ, ಪ್ರಗತಿಪರ ಕೃಷಿಗೆ ಎಂ ಎಸ್ ಸ್ವಾಮಿನಾಥನ್ ಅಡಿಪಾಯ

ಸ್ವಾಮಿನಾಥನ್‌ ಪ್ರೀತಿಸುತ್ತಿದ್ದ ತತ್ವಗಳಿಗೆ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತಲೇ ಇರಬೇಕು, ರೈತರ ಹಿತಕ್ಕಾಗಿ ಹೋರಾಡಬೇಕು ಮತ್ತು ವೈಜ್ಞಾನಿಕ ಆವಿಷ್ಕಾರದ ಫಲಗಳು ನಮ್ಮ ಕೃಷಿ ವಿಸ್ತಾರದ ಬೇರುಗಳನ್ನು ತಲುಪುವಂತೆ ಖಾತರಿಪಡಿಸಬೇಕು. ಮುಂದಿನ ಪೀಳಿಗೆಗಾಗಿ ಬೆಳವಣಿಗೆ, ಸುಸ್ಥಿರತೆ ಮತ್ತು ಸಮೃದ್ಧಿಯನ್ನು ಉತ್ತೇಜಿಸಬೇಕು.

VISTARANEWS.COM


on

MS Swaminathan
ಮಹತ್ವದ, ಕುತೂಹಲಕರ ಸುದ್ದಿಗಾಗಿ ಫಾಲೊ ಮಾಡಿ
Koo

| ನರೇಂದ್ರ ಮೋದಿ, ಪ್ರಧಾನಮಂತ್ರಿಗಳು
ಕೆಲವು ದಿನಗಳ ಹಿಂದಷ್ಟೇ ಪ್ರೊಫೆಸರ್ ಎಂ.ಎಸ್. ಸ್ವಾಮಿನಾಥನ್ ಅವರು ನಮ್ಮನ್ನು ಅಗಲಿದರು. ಕೃಷಿ ವಿಜ್ಞಾನದಲ್ಲಿ ಕ್ರಾಂತಿ ತಂದ ದಾರ್ಶನಿಕರೊಬ್ಬರನ್ನು ನಮ್ಮ ದೇಶವು ಕಳೆದುಕೊಂಡಿತು. ಆದರೂ ಭಾರತಕ್ಕೆ ಅವರ ಕೊಡುಗೆಯು ಸುವರ್ಣಾಕ್ಷರಗಳಲ್ಲಿ ಅಚ್ಚಳಿಯದೆ ಸದಾ ಅಜರಾಮರವಾಗಲಿದೆ. ಪ್ರೊ. ಎಂ.ಎಸ್. ಸ್ವಾಮಿನಾಥನ್ ಅವರು ಭಾರತದ ಬಗ್ಗೆ ಅಪಾರ ಪ್ರೀತಿ ಹೊಂದಿದ್ದರು. ನಮ್ಮ ರಾಷ್ಟ್ರ, ವಿಶೇಷವಾಗಿ ನಮ್ಮ ರೈತರು ಸಮೃದ್ಧಿಯ ಜೀವನವನ್ನು ನಡೆಸಬೇಕೆಂದು ಬಯಸಿದ್ದರು. ಶೈಕ್ಷಣಿಕವಾಗಿ ಪ್ರತಿಭಾವಂತರಾಗಿದ್ದ ಅವರಿಗೆ ಯಾವುದೇ ವೃತ್ತಿಯನ್ನು ಬೇಕಾದರೂ ಆಯ್ಕೆ ಮಾಡಿಕೊಳ್ಳುವ ಅವಕಾಶವಿತ್ತು. ಆದರೆ, 1943ರ ಬಂಗಾಳದ ಕ್ಷಾಮ ಅವರ ಮೇಲೆ ಎಷ್ಟು ಪ್ರಭಾವ ಬೀರಿತೆಂದರೆ, ತಾವು ಮಾಡುವ ಒಂದೇ ಒಂದು ಕೆಲಸ ಯಾವುದಾದರೂ ಇದ್ದರೆ ಅದು ಕೃಷಿಯ ಅಧ್ಯಯನ ಎಂದು ಸ್ಪಷ್ಟ ಸಂಕಲ್ಪತೊಟ್ಟರು.

ವಯಸ್ಸಿನಲ್ಲಿ ಚಿಕ್ಕವರಾದರೂ ಅವರು ಡಾ. ನಾರ್ಮನ್ ಬೋರ್ಲಾಗ್ ಅವರೊಂದಿಗೆ ಸಂಪರ್ಕಕ್ಕೆ ಬಂದರು, ಜೊತೆಗೆ ಅವರ ಕೆಲಸವನ್ನು ಬಹಳ ಆಳವಾಗಿ ಅನುಸರಿಸಿದರು. 1950ರ ದಶಕದಲ್ಲಿ, ಅವರಿಗೆ ಅಮೆರಿಕದಲ್ಲಿ ಬೋಧಕರಾಗುವ ಅವಕಾಶ ಒದಗಿಬಂದಿತು. ಆದರೆ ಅವರು ಭಾರತದಲ್ಲಿ ಮತ್ತು ಭಾರತಕ್ಕಾಗಿ ಕೆಲಸ ಮಾಡಲು ಬಯಸಿದ್ದರಿಂದ ಅದನ್ನು ತಿರಸ್ಕರಿಸಿದರು.

ಸ್ವಾಮಿನಾಥನ್ ಅವರು ನಮ್ಮ ರಾಷ್ಟ್ರವನ್ನು ಸ್ವಾವಲಂಬನೆ ಮತ್ತು ಆತ್ಮವಿಶ್ವಾಸದ ಪಥದತ್ತ ಮುನ್ನಡೆಸಿದ ಸವಾಲಿನ ಸಂದರ್ಭಗಳ ಬಗ್ಗೆ ನೀವೆಲ್ಲರೂ ಯೋಚಿಸಬೇಕೆಂದು ನಾನು ಬಯಸುತ್ತೇನೆ. ಸ್ವಾತಂತ್ರ್ಯದ ನಂತರದ ಮೊದಲ ಎರಡು ದಶಕಗಳಲ್ಲಿ, ಅಪಾರವಾದ ಸವಾಲುಗಳು ನಮ್ಮೆದುರಿಗಿದ್ದವು, ಅವುಗಳಲ್ಲಿ ಆಹಾರದ ಕೊರತೆಯೂ ಒಂದಾಗಿತ್ತು. 1960ರ ದಶಕದ ಆರಂಭದಲ್ಲಿ ಭಾರತವು ಕ್ಷಾಮದ ಕರಿಛಾಯೆಯೊಂದಿಗೆ ಹೋರಾಡುತ್ತಿತ್ತು. ಸರಿಯಾಗಿ ಇದೇ ಸಮಯದಲ್ಲೇ ಪ್ರೊ. ಸ್ವಾಮಿನಾಥನ್ ಅವರ ಅಚಲ ಬದ್ಧತೆ ಮತ್ತು ದೂರದೃಷ್ಟಿಯು ಕೃಷಿ ಸಮೃದ್ಧಿಯ ಹೊಸ ಯುಗಕ್ಕೆ ನಾಂದಿ ಹಾಡಿತು. ಕೃಷಿ ಹಾಗೂ ಗೋಧಿ ತಳಿಯ ಅಭವೃದ್ಧಿಯಂತಹ ನಿರ್ದಿಷ್ಟ ಕ್ಷೇತ್ರಗಳಲ್ಲಿ ಸ್ವಾಮಿನಾಥನ್ ಅವರ ಮುಂಚೂಣಿ ಕೆಲಸವು ಗೋಧಿ ಉತ್ಪಾದನೆಯಲ್ಲಿ ಗಮನಾರ್ಹ ಹೆಚ್ಚಳಕ್ಕೆ ಕಾರಣವಾಯಿತು. ಇದರಿಂದಾಗಿ ಭಾರತವು ಆಹಾರ ಕೊರತೆಯ ದೇಶದ ಹಂತದಿಂದ ಸ್ವಾವಲಂಬಿ ರಾಷ್ಟ್ರವಾಗಿ ಪರಿವರ್ತನೆಯಾಯಿತು. ಈ ಅದ್ಭುತ ಸಾಧನೆಯು ಸ್ವಾಮಿನಾಥನ್ ಅವರಿಗೆ “ಭಾರತೀಯ ಹಸಿರು ಕ್ರಾಂತಿಯ ಪಿತಾಮಹ” ಎಂಬ ಬಿರುದನ್ನು ಗಳಿಸಿಕೊಟ್ಟಿತು.

ಭಾರತದಲ್ಲಿ ಅಂತರ್ಗತವಾಗಿದ್ದ “ನಾವು ಸಹ ಮಾಡಬಲ್ಲೆವು” ಎಂಬ ಮನೋಭಾವದ ಒಂದು ಮುನ್ನೋಟವನ್ನು ಹಸಿರು ಕ್ರಾಂತಿಯು ಒದಗಿಸಿತು – ನಮಗೆ ಶತಕೋಟಿ ಸವಾಲುಗಳಿದ್ದರೇನಂತೆ, ಆ ಸವಾಲುಗಳನ್ನು ಪರಿಹರಿಸಲು ನಾವೀನ್ಯತೆಯ ಜ್ವಾಲೆಯೊಂದಿಗೆ ಶತಕೋಟಿ ಮನಸ್ಸುಗಳೂ ಇಲ್ಲಿವೆ ಎಂಬ ಆಶಾಕಿರಣವನ್ನು ಹೊರ ಹೊಮ್ಮಿಸಿತು. ಹಸಿರು ಕ್ರಾಂತಿ ಪ್ರಾರಂಭವಾದ ಐದು ದಶಕಗಳ ನಂತರ, ಭಾರತೀಯ ಕೃಷಿಯು ಹೆಚ್ಚು ಆಧುನಿಕ ಮತ್ತು ಪ್ರಗತಿಪರವಾಗಿದೆ. ಆದರೆ, ಇದಕ್ಕೆ ಪ್ರೊ. ಸ್ವಾಮಿನಾಥನ್ ಅವರು ಹಾಕಿದ ಅಡಿಪಾಯವನ್ನು ಎಂದಿಗೂ ಮರೆಯಲು ಸಾಧ್ಯವಿಲ್ಲ.

ಹಲವು ವರ್ಷಗಳಲ್ಲಿ, ಅವರು ಆಲೂಗಡ್ಡೆ ಬೆಳೆಗಳ ಮೇಲೆ ಪರಿಣಾಮ ಬೀರುವ ಪರಾವಲಂಬಿ ಜೀವಿಗಳನ್ನು ಎದುರಿಸುವ ಕುರಿತು ಸಂಶೋಧನೆಯನ್ನು ಕೈಗೊಂಡರು. ಅವರ ಸಂಶೋಧನೆಯು ಆಲೂಗಡ್ಡೆ ಬೆಳೆಗಳಿಗೆ ಶೀತ ಹವಾಮಾನವನ್ನು ತಡೆದುಕೊಳ್ಳಲು ಅನುವು ಮಾಡಿಕೊಟ್ಟಿತು. ಇಂದು, ಜಗತ್ತು ಸಿರಿಧಾನ್ಯಗಳು ಅಥವಾ ʻಶ್ರೀಅನ್ನʼ ಶಕ್ತಿಯುತ ಆಹಾರ (ಸೂಪರ್ ಫುಡ್) ಎಂದು ಮಾತನಾಡುತ್ತಿದೆ. ಆದರೆ ಪ್ರೊಫೆಸರ್ ಸ್ವಾಮಿನಾಥನ್ ಅವರು 1990ರ ದಶಕದಿಂದಲೇ ಸಿರಿಧಾನ್ಯಗಳ ಬಗ್ಗೆ ಚರ್ಚೆಯನ್ನು ಪ್ರೋತ್ಸಾಹಿಸಿದ್ದರು.

ಪ್ರೊ. ಸ್ವಾಮಿನಾಥನ್ ಅವರೊಂದಿಗಿನ ನನ್ನ ವೈಯಕ್ತಿಕ ಒಡನಾಟಗಳು ಬಹಳ ವ್ಯಾಪಕವಾಗಿವೆ. 2001ರಲ್ಲಿ ನಾನು ಗುಜರಾತ್ ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡ ಬಳಿಕ ಅವು ಪ್ರಾರಂಭವಾದವು. ಆ ದಿನಗಳಲ್ಲಿ, ಗುಜರಾತ್ ತನ್ನ ಕೃಷಿ ಪರಿಣಿತಿಗೆ ಅಷ್ಟೊಂದು ಹೆಸರುವಾಸಿಯಾಗಿರಲಿಲ್ಲ. ಸತತ ಬರಗಾಲ, ಪ್ರಚಂಡ ಸೈಕ್ಲೋನ್ ಮತ್ತು ಭೂಕಂಪವು ರಾಜ್ಯದ ಬೆಳವಣಿಗೆಯ ಪಥದ ಮೇಲೆ ಪರಿಣಾಮ ಬೀರಿತ್ತು. ನಾವು ಪ್ರಾರಂಭಿಸಿದ ಅನೇಕ ಉಪಕ್ರಮಗಳಲ್ಲಿ, ಮಣ್ಣಿನ ಆರೋಗ್ಯ ಕಾರ್ಡ್ ಕೂಡ ಒಂದಾಗಿತ್ತು. ಇದು ಮಣ್ಣನ್ನು ಚೆನ್ನಾಗಿ ಅರ್ಥಮಾಡಿಕೊಳ್ಳಲು ಮತ್ತು ಸಮಸ್ಯೆಗಳು ಉದ್ಭವಿಸಿದರೆ ಅವುಗಳನ್ನು ಪರಿಹರಿಸಲು ನಮಗೆ ಅನುವು ಮಾಡಿಕೊಟ್ಟಿತು. ಈ ಯೋಜನೆಯ ಹಿನ್ನೆಲೆಯಲ್ಲಿ ನಾನು ಪ್ರೊ. ಸ್ವಾಮಿನಾಥನ್ ಅವರನ್ನು ಭೇಟಿಯಾಗಿದ್ದೆ. ಅವರು ಯೋಜನೆಯನ್ನು ಶ್ಲಾಘಿಸಿದರು ಜೊತೆಗೆ, ಅದಕ್ಕಾಗಿ ತಮ್ಮ ಅಮೂಲ್ಯವಾದ ಸಲಹೆ-ಸೂಚನೆಗಳನ್ನು ನಮ್ಮೊಂದಿಗೆ ಹಂಚಿಕೊಂಡರು. ಈ ಯೋಜನೆಯ ಬಗ್ಗೆ ಸಂದೇಹ ಹೊಂದಿದ್ದವರಿಗೆ ಮನವರಿಕೆ ಮಾಡಲು ಅವರ ಅನುಮೋದನೆಯೊಂದೇ ಸಾಕಾಗಿತ್ತು. ಇದು ಅಂತಿಮವಾಗಿ ಗುಜರಾತ್ ನ ಕೃಷಿ ಯಶಸ್ಸಿಗೆ ವೇದಿಕೆಯನ್ನು ನಿರ್ಮಿಸಿತು.

ಮುಖ್ಯಮಂತ್ರಿಯಾಗಿ ನನ್ನ ಅಧಿಕಾರಾವಧಿಯಲ್ಲಿ ಮತ್ತು ನಾನು ಪ್ರಧಾನಿಯಾಗಿ ಅಧಿಕಾರ ವಹಿಸಿಕೊಂಡಾಗಲೂ ನಮ್ಮ ಒಡನಾಟ ಮುಂದುವರಿಯಿತು. ನಾನು ಅವರನ್ನು 2016ರಲ್ಲಿ ʻಅಂತರರಾಷ್ಟ್ರೀಯ ಕೃಷಿ-ಜೀವವೈವಿಧ್ಯ ಕಾಂಗ್ರೆಸ್ʼನಲ್ಲಿ ಭೇಟಿಯಾಗಿದ್ದೆ. ಅದರ ಮುಂದಿನ ವರ್ಷ 2017ರಲ್ಲಿ, ಅವರು ಬರೆದ ಎರಡು ಭಾಗಗಳ ಪುಸ್ತಕ ಸರಣಿಯನ್ನು ನಾನೇ ಲೋಕಾರ್ಪಣೆ ಮಾಡಿದ್ದೆ.

ರೈತರು ಜಗತ್ತನ್ನು ಒಟ್ಟಿಗೆ ಬೆಸೆದು ಹಿಡಿದಿರುವ ಬಂಧಕ ಶಕ್ತಿ ಎಂದು ʻಕುರಾಲ್ʼ ಕೃಷಿಕರನ್ನು ಬಣ್ಣಿಸುತ್ತದೆ. ಏಕೆಂದರೆ ಎಲ್ಲರನ್ನೂ ಪೋಷಿಸುವುದು ರೈತರೇ. ಪ್ರೊ. ಸ್ವಾಮಿನಾಥನ್ ಅವರು ಈ ತತ್ವವನ್ನು ಚೆನ್ನಾಗಿ ಅರ್ಥಮಾಡಿಕೊಂಡಿದ್ದರು. ಬಹಳಷ್ಟು ಜನರು ಅವರನ್ನು “ಕೃಷಿ ವೈಜ್ಞಾನಿಕ್” – ಕೃಷಿ ವಿಜ್ಞಾನಿ ಎಂದು ಕರೆಯುತ್ತಾರೆ. ಆದರೆ, ಅವರು ಅದಕ್ಕೂ ಮಿಗಿಲಾದವರಾಗಿದ್ದರು ಎಂದು ನಾನು ಸದಾ ನಂಬುತ್ತೇನೆ. ಅವರು ನಿಜವಾದ “ಕಿಸಾನ್ ವೈಜ್ಞಾನಿಕ್” – ರೈತರ ವಿಜ್ಞಾನಿ ಆಗಿದ್ದರು. ಅವರ ಹೃದಯದಲ್ಲಿ ಒಬ್ಬ ರೈತನಿದ್ದ. ಅವರ ಕಾರ್ಯ ಮತ್ತು ಕೃತಿಗಳ ಯಶಸ್ಸು ಕೇವಲ ಅವರ ಶೈಕ್ಷಣಿಕ ಉತ್ಕೃಷ್ಟತೆಗಷ್ಟೇ ಸೀಮಿತವಾಗಿಲ್ಲ; ಪ್ರಯೋಗಾಲಯಗಳ ಹೊರಗೆ, ಹೊಲ-ಗದ್ದೆಗಳಲ್ಲಿ ಅವುಗಳು ಬೀರಿದ ಪರಿಣಾಮದಲ್ಲಿ ಇದು ಅಡಗಿದೆ. ಸ್ವಾಮಿನಾಥನ್ ಅವರು ಕೈಗೊಂಡ ಕಾರ್ಯವು ವೈಜ್ಞಾನಿಕ ಜ್ಞಾನ ಮತ್ತು ಅದರ ಪ್ರಾಯೋಗಿಕ ಅನ್ವಯದ ನಡುವಿನ ಅಂತರವನ್ನು ಕಡಿಮೆ ಮಾಡಿತು. ಮಾನವ ಪ್ರಗತಿ ಮತ್ತು ಪರಿಸರ ಸುಸ್ಥಿರತೆಯ ನಡುವಿನ ಸೂಕ್ಷ್ಮ ಸಮತೋಲನವನ್ನು ಒತ್ತಿಹೇಳುವ ಮೂಲಕ ಅವರು ಸುಸ್ಥಿರ ಕೃಷಿಯನ್ನು ನಿರಂತರವಾಗಿ ಪ್ರತಿಪಾದಿಸಿದರು. ಸಣ್ಣ ರೈತರ ಜೀವನವನ್ನು ಸುಧಾರಿಸಲು ಮತ್ತು ಅಂತಹ ರೈತರು ಸಹ ನಾವಿನ್ಯತೆಯ ಫಲಗಳನ್ನು ಆನಂದಿಸುವುದನ್ನು ಖಾತರಿಪಡಿಸಲು ಪ್ರೊ. ಸ್ವಾಮಿನಾಥನ್ ನೀಡಿದ ವಿಶೇಷ ಮಹತ್ವವನ್ನು ನಾನು ಇಲ್ಲಿ ಒತ್ತಿ ಹೇಳಲೇಬೇಕು. ಮಹಿಳಾ ರೈತರ ಜೀವನವನ್ನು ಸುಧಾರಿಸುವ ಬಗ್ಗೆ ಅವರು ವಿಶೇಷವಾಗಿ ಉತ್ಸುಕರಾಗಿದ್ದರು.

ಈ ಸುದ್ದಿಯನ್ನೂ ಓದಿ: MS Swaminathan: ಭಾರತದ `ಹಸಿರು ಕ್ರಾಂತಿ’ಯ ಪಿತಾಮಹ ಎಂಎಸ್ ಸ್ವಾಮಿನಾಥನ್ ಇನ್ನಿಲ್ಲ

ಪ್ರೊ. ಎಂ.ಎಸ್. ಸ್ವಾಮಿನಾಥನ್ ಅವರ ಬಗ್ಗೆ ಹೇಳಬೇಕಾದ ಮತ್ತೊಂದು ಗಮನಾರ್ಹವಾದ ವಿಷಯವಿದೆ – ಅವರು ನಾವೀನ್ಯತೆ ಮತ್ತು ಮಾರ್ಗದರ್ಶನದ ಪರಾಕಾಷ್ಠೆಯಾಗಿ ನಿಂತಿದ್ದಾರೆ. 1987ರಲ್ಲಿ ಅವರು ʻವಿಶ್ವ ಆಹಾರ ಪ್ರಶಸ್ತಿʼಗೆ ಭಾಜನರಾದಾಗ, ಈ ಪ್ರತಿಷ್ಠಿತ ಗೌರವದ ಮೊದಲ ಪುರಸ್ಕೃತರೆನಿಸಿದ ಅವರು ಬಹುಮಾನವಾಗಿ ಬಂದ ಹಣವನ್ನು ಲಾಭರಹಿತ ಸಂಶೋಧನಾ ಪ್ರತಿಷ್ಠಾನವನ್ನು ಸ್ಥಾಪಿಸಲು ಬಳಸಿದರು. ಇಲ್ಲಿಯವರೆಗೆ, ಇದು ವಿವಿಧ ಕ್ಷೇತ್ರಗಳಲ್ಲಿ ವ್ಯಾಪಕವಾದ ಕೆಲಸವನ್ನು ಕೈಗೊಂಡಿದೆ. ಸ್ವಾಮಿನಾಥನ್ ಅವರು ಅಸಂಖ್ಯಾತ ಮನಸ್ಸುಗಳನ್ನು ಪೋಷಿಸಿದ್ದಾರೆ, ಅವರಲ್ಲಿ ಕಲಿಕೆ ಮತ್ತು ನಾವೀನ್ಯತೆಯ ಉತ್ಸಾಹವನ್ನು ತುಂಬಿದ್ದಾರೆ. ವೇಗವಾಗಿ ಬದಲಾಗುತ್ತಿರುವ ಜಗತ್ತಿನಲ್ಲಿ, ಸ್ವಾಮಿನಾಥನ್ ಅವರ ಜೀವನವು ಜ್ಞಾನ, ಮಾರ್ಗದರ್ಶನ ಮತ್ತು ನಾವೀನ್ಯತೆಯ ಅನಂತ ಶಕ್ತಿಯನ್ನು ನಮಗೆ ನೆನಪು ಮಾಡುತ್ತದೆ. ಅವರು ವಿವಿಧ ಸಂಸ್ಥೆಗಳ ನಿರ್ಮಾತೃವೂ ಆಗಿದ್ದರು, ಅಗಾಧ ಸಂಶೋಧನೆ ನಡೆಯುವ ಅನೇಕ ಕೇಂದ್ರಗಳನ್ನು ಅವರು ಹೊಂದಿದ್ದರು. ಮನಿಲಾದ ʻಅಂತಾರಾಷ್ಟ್ರೀಯ ಭತ್ತ ಸಂಶೋಧನಾ ಸಂಸ್ಥೆʼಯ ನಿರ್ದೇಶಕರಾಗಿಯೂ ಸೇವೆ ಸಲ್ಲಿಸಿದ್ದರು. 2018ರಲ್ಲಿ ವಾರಣಾಸಿಯಲ್ಲಿ ʻಅಂತರರಾಷ್ಟ್ರೀಯ ಭತ್ತ ಸಂಶೋಧನಾ ಸಂಸ್ಥೆʼಯ ದಕ್ಷಿಣ ಏಷ್ಯಾ ಪ್ರಾದೇಶಿಕ ಕೇಂದ್ರವನ್ನು ತೆರೆಯಲಾಯಿತು.

ಡಾ. ಸ್ವಾಮಿನಾಥನ್ ಅವರಿಗೆ ಗೌರವ ಸಲ್ಲಿಸಲು ನಾನು ಮತ್ತೆ ʻಕುರಲ್ʼ ಅನ್ನು ಉಲ್ಲೇಖಿಸಲು ಬಯಸುತ್ತೇನೆ. “ಯೋಜನೆಯಲ್ಲಿ ದೃಢತೆಯನ್ನು ಹೊಂದಿರುವವರು, ತಾವು ಬಯಸಿದ ರೀತಿಯಲ್ಲಿ ತಾವು ಬಯಸಿದ್ದನ್ನು ಸಾಧಿಸುತ್ತಾರೆ,” ಎಂಬ ಉಲ್ಲೇಖ ಅದರಲ್ಲಿದೆ. ಕೃಷಿಯನ್ನು ಬಲಪಡಿಸಲು ಮತ್ತು ರೈತರಿಗೆ ಸೇವೆ ಸಲ್ಲಿಸಲು ಬಯಸುತ್ತೇನೆ ಎಂದು ತಮ್ಮ ಜೀವನದ ಆರಂಭದಲ್ಲಿಯೇ ಸಂಕಲ್ಪ ತೊಟ್ಟಿದ್ದ ಒಬ್ಬ ಕಟ್ಟಾಳು ಅವರಾಗಿದ್ದರು. ಅಲ್ಲದೆ, ಅವರು ತಾವು ಅಂದುಕೊಂಡಿದ್ದನ್ನು ಅಸಾಧಾರಣ ರೀತಿಯಲ್ಲಿ, ನವೀನ ರೀತಿಯಲ್ಲಿ ಮತ್ತು ಭಾವೋತ್ಕರ್ಷದಿಂದ ಮಾಡಿದರು. ನಾವು ಕೃಷಿ ನಾವೀನ್ಯತೆ ಮತ್ತು ಸುಸ್ಥಿರತೆಯ ಹಾದಿಯಲ್ಲಿ ಸಾಗುತ್ತಿರುವ ಈ ಹೊತ್ತಿನಲ್ಲಿ ಡಾ. ಸ್ವಾಮಿನಾಥನ್ ಅವರ ಕೊಡುಗೆಗಳು ನಮಗೆ ಸ್ಫೂರ್ತಿ ಮತ್ತು ಮಾರ್ಗದರ್ಶನ ನೀಡುತ್ತಲೇ ಇರುತ್ತವೆ. ಅವರು ಪ್ರೀತಿಸುತ್ತಿದ್ದ ತತ್ವಗಳಿಗೆ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತಲೇ ಇರಬೇಕು, ರೈತರ ಹಿತಕ್ಕಾಗಿ ಹೋರಾಡಬೇಕು ಮತ್ತು ವೈಜ್ಞಾನಿಕ ಆವಿಷ್ಕಾರದ ಫಲಗಳು ನಮ್ಮ ಕೃಷಿ ವಿಸ್ತಾರದ ಬೇರುಗಳನ್ನು ತಲುಪುವಂತೆ ಖಾತರಿಪಡಿಸಬೇಕು. ಮುಂದಿನ ಪೀಳಿಗೆಗಾಗಿ ಬೆಳವಣಿಗೆ, ಸುಸ್ಥಿರತೆ ಮತ್ತು ಸಮೃದ್ಧಿಯನ್ನು ಉತ್ತೇಜಿಸಬೇಕು.

ಇನ್ನಷ್ಟು ಲೇಖನಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.

ಕ್ಷಣ ಕ್ಷಣದ ಮಾಹಿತಿಗಾಗಿ Vistara News FaceBook ಪೇಜ್ ಫಾಲೋ ಮಾಡಿ
ಮಹತ್ವದ ಮಾಹಿತಿಗಾಗಿ ವಿಸ್ತಾರ ನ್ಯೂಸ್ ಆ್ಯಪ್ ಉಚಿತವಾಗಿ ಡೌನ್ ಲೋಡ್ ಮಾಡಿಕೊಳ್ಳಿ: Andriod App | IOS App
Continue Reading
Click to comment

Leave a Reply

Your email address will not be published. Required fields are marked *

ಅಂಕಣ

ವಿಸ್ತಾರ ಅಂಕಣ: ಬ್ರಿಟಿಷ್ ಮಾನಸಿಕತೆಯ ಪಳೆಯುಳಿಕೆ, ಕಾಂಗ್ರೆಸ್

ವಿಸ್ತಾರ ಅಂಕಣ: ಕಾಂಗ್ರೆಸ್‌ನಿಂದ ಹೆಚ್ಚಿನ ನಿರೀಕ್ಷೆಗಳಿಲ್ಲ. ಆ ಪಕ್ಷ ಎಂದಿಗೂ ದೇಶವನ್ನು ಒಡೆಯುವ ಒಂದಲ್ಲ ಒಂದು ಪ್ರಯತ್ನ ಮಾಡುತ್ತಲೇ ಇರುತ್ತದೆ. ಅದು ಬ್ರಿಟಿಷ್ ಮಾನಸಿಕತೆಯ ಪಳೆಯುಳಿಕೆ.

VISTARANEWS.COM


on

congress party
Koo
Vistara Column @ Hariprakash Konemane

ವಿಸ್ತಾರ ಅಂಕಣ: ʼದೇಶವು ಬ್ರಿಟಿಷ್ ಅಧಿಪತ್ಯದಿಂದ ಸ್ವತಂತ್ರಗೊಂಡು 75 ವರ್ಷ ಕಳೆದಿದೆʼ. ಈ ಹೇಳಿಕೆಯನ್ನು ಕಳೆದ ವರ್ಷಪೂರ್ತಿ ಕೇಳಿದ್ದೇವೆ. ಆದರೆ ಇದು ಸಂಪೂರ್ಣ ಸತ್ಯವಲ್ಲ. ನಾವಿನ್ನೂ ಬ್ರಿಟಿಷ್ ಆಡಳಿತದಿಂದ ಮುಕ್ತರಾಗಿಲ್ಲ. ಹಾಗಾಗಿ ʼದೇಶವು ಬ್ರಿಟಿಷ್ ಅಧಿಪತ್ಯದಿಂದ ಸ್ವತಂತ್ರಗೊಳ್ಳಲು ಆರಂಭಿಸಿ 75 ವರ್ಷವಾಯಿತುʼ ಎಂದು ಈ ಹೇಳಿಕೆಯನ್ನು ಬದಲಾಯಿಸಬೇಕು. ಏಕೆಂದರೆ ಭೌತಿಕವಾಗಿ ಬ್ರಿಟಿಷ್ ಆಡಳಿತದಿಂದ ಮುಕ್ತರಾದರೂ ಮಾನಸಿಕವಾಗಿ ಮುಕ್ತವಾಗಲು ಇನ್ನೂ ಸಾಧ್ಯವಾಗಿಲ್ಲ. ಬ್ರಿಟಿಷ್ ಮಾನಸಿಕತೆಯು ಭಾರತದಲ್ಲಿ ಇನ್ನೂ ಉಳಿದುಕೊಂಡಿದ್ದು, ಅದರ ಅಂತಿಮ ಕೊಂಡಿಯೇ ಕಾಂಗ್ರೆಸ್ ಹಾಗೂ ಆ ಪಕ್ಷ ನಡೆಸುವ ಸರ್ಕಾರಗಳು.

ದೇಶದ ಮಾನಸಿಕತೆಯಿಂದ ಬ್ರಿಟಿಷ್ ವಿಚಾರಗಳನ್ನು ಕಿತ್ತೆಸೆಯಬೇಕೆಂದು ಕೇಂದ್ರದ ನರೇಂದ್ರ ಮೋದಿ ಅವರ ನೇತೃತ್ವದ ಸರ್ಕಾರ ಸತತ ಪ್ರಯತ್ನಿಸುತ್ತಿದೆ. ನೇತಾಜಿ ಸುಭಾಷ್ ಚಂದ್ರ ಬೋಸರ ಸಾಹಸ, ಧೈರ್ಯವನ್ನು ಕೊಂಡಾಡಿಬಿಟ್ಟರೆ ಬ್ರಿಟಿಷರ ಕ್ರೌರ್ಯದ ಅರಿವಾಗುತ್ತದೆ. ಹಾಗಾಗಿ ನೇತಾಜಿ ಅವರನ್ನು ಬ್ರಿಟಿಷರು ಕತ್ತಲಲ್ಲೇ ಇಟ್ಟಿದ್ದರು. ಇದೀಗ ನರೇಂದ್ರ ಮೋದಿಯವರು ನೇತಾಜಿ ಅವರ ಪ್ರತಿಮೆಯನ್ನು ಸ್ಥಾಪಿಸುವ ಮೂಲಕ ನಾಯಕನಿಗೆ ಗೌರವ ಸಲ್ಲಿಸುವ ಕಾರ್ಯ ಮಾಡಿದ್ದಾರೆ. ಭಾರತೀಯ ನೌಕಾದಳದದ ಧ್ವಜದಲ್ಲಿ ಇಲ್ಲಿವರೆಗೆ ಇದ್ದ ಬ್ರಿಟಿಷ್ ಆಡಳಿತದ ಪಳೆಯುಳಿಕೆಯನ್ನು ಕಿತ್ತೊಗೆದು ಛತ್ರಪತಿ ಶಿವಾಜಿ ಮಹಾರಾಜರ ಮುದ್ರೆಯನ್ನೊತ್ತಿದ್ದಾರೆ. ನವದೆಹಲಿಯಲ್ಲಿ ನಿರ್ಮಾಣವಾದ ಬೃಹತ್ ಸಭಾಂಗಣಕ್ಕೆ ಭಾರತ ಮಂಟಪಂ ಎಂದು ನಾಮಕರಣ ಮಾಡುವ ಜತೆಗೆ ಪ್ರವೇಶದಲ್ಲಿ ಬೃಹತ್ ಗಾತ್ರದ ನಟರಾಜ ವಿಗ್ರಹ ಸ್ಥಾಪಿಸಿದ್ದಾರೆ. ನೂತನವಾಗಿ ನಿರ್ಮಾಣವಾದ ಸಂಸತ್ ಭವನದ ಒಳಹೊರಗೆ ಭಾರತೀಯ ಸಂಸ್ಕೃತಿ, ಕಲೆಯನ್ನು ಪ್ರತಿಧ್ವನಿಸುವ ಕಲಾಕೃತಿಗಳನ್ನು ನಿರ್ಮಿಸಲಾಗಿದೆ. ಸಂಸತ್ ಭವನದ ಉದ್ಘಾಟನೆಗೆ ಪವಿತ್ರ ಸೆಂಗೋಲ್ ಅನ್ನು ಹಿಡಿದು ಮುನ್ನಡೆದಿದ್ದಾರೆ. . . ʼವಸಾಹತು ಮಾನಸಿಕತೆಯಿಂದ ಹೊರಬರುವುದುʼ ನಮ್ಮ ಕರ್ತವ್ಯವಾಗಿದೆ ಎಂದು ಸ್ವತಃ ಪ್ರಧಾನಿಯವರು ಕರೆ ನೀಡಿದ್ದಾರೆ. ಆದರೆ ಕರ್ನಾಟಕದಲ್ಲಿರುವ ಕಾಂಗ್ರೆಸ್ ಸರ್ಕಾರ ಮಾತ್ರ ಬ್ರಿಟಿಷ್ ಮಾನಸಿಕತೆಯೆಡೆಗೇ ಹೊರಳುತ್ತಿದೆ.

ಇತ್ತೀಚೆಗೆ ಕರ್ನಾಟಕ ಸರ್ಕಾರದ ನಡೆಗಳನ್ನೇ ನೋಡೋಣ. ಎಲ್ಲವೂ ಪ್ರತ್ಯೇಕ ಪ್ರಕರಣಗಳೆಂದು ಕಣ್ಣಿಗೆ ಕಾಣಿಸಿದರೂ ಒಂದೇ ಸೂತ್ರದಲ್ಲಿ ಬಂಧಿತವಾಗಿವೆ. ಮಂಡ್ಯದ ಕೆರೆಗೋಡಿಯಲ್ಲಿ ಹನುಮಧ್ವಜವನ್ನು ಹಾರಿಸಲು ಸರ್ಕಾರ ಅಡ್ಡಿಪಡಿಸಿದೆ. ಇಡೀ ದೇಶವೇ ಶ್ರೀರಾಮಮಂದಿರ ನಿರ್ಮಾಣ ಹಾಗೂ ರಾಮಲಲ್ಲಾ ಪ್ರಾಣಪ್ರತಿಷ್ಠಾಪನೆಯ ಸಂಭ್ರಮದಲ್ಲಿದ್ದರೆ ಕೆರೆಗೋಡಿನ ಯುವಕರು ಮಾತ್ರ ಹೇಗೆ ಇದರಿಂದ ಹೊರತಾಗಿರುತ್ತಾರೆ? ಅವರೂ ಹನುಮಧ್ವಜವನ್ನು, ಸ್ಥಳೀಯ ಆಡಳಿತದ ಅನುಮತಿ ಪಡೆದೇ ಹಾರಿಸಲು ತೀರ್ಮಾನಿಸಿದರು. ಆದರೆ ಕರ್ನಾಟಕ ಸರ್ಕಾರಕ್ಕೆ ಇದನ್ನು ಸಹಿಸಲು ಆಗಲೇ ಇಲ್ಲ. ಸರ್ಕಾರಿ ಮೈದಾನಗಳಲ್ಲಿ ಶಾಶ್ವತವಾದ ಗೋಡೆಗಳು ನಿರ್ಮಾಣ ಆಗಬಹುದು, ಸಾರ್ವಜನಿಕ ವೃತ್ತಗಳಲ್ಲಿ, ಕೋಲಾರದ ಕ್ಲಾಕ್ ಟವರ್‌ನಲ್ಲಿ ಹಸಿರು ಧ್ವಜ ಹಾರಬಹುದು, ಆದರೆ ಅನುಮತಿ ಪಡೆದ ಸ್ಥಂಭದಲ್ಲಿ ಹನುಮಧ್ವಜ ಹಾರುವುದು ಮಾತ್ರ ಜಾತ್ಯತೀತತೆಗೆ ವಿರೋಧ ಎನ್ನುವುದು ಕಾಂಗ್ರೆಸ್ ಸಿದ್ಧಾಂತ.

Residential Schools Govt changes kuvempu line in school Opposition

ಎರಡನೇ ಘಟನೆಯಲ್ಲಿ, ಸಮಾಜ ಕಲ್ಯಾಣ ಇಲಾಖೆ ಅಧೀನದ ವಸತಿ ಶಾಲೆಗಳಲ್ಲಿ ಕೇವಲ ರಾಷ್ಟ್ರೀಯ ಹಬ್ಬಗಳನ್ನಷ್ಟೇ ಆಚರಿಸಬೇಕು ಎಂಬ ಸುತ್ತೋಲೆ ಹೊರಡಿಸಲಾಯಿತು. ಕೇವಲ ರಾಷ್ಟ್ರೀಯ ಹಬ್ಬಗಳನ್ನು ಆಚರಿಸಬೇಕು, ಯಾವುದೇ ಧಾರ್ಮಿಕ ಹಬ್ಬಗಳನ್ನು ಆಚರಿಸುವಂತಿಲ್ಲ ಎಂದೂ ಆ ಸುತ್ತೋಲೆ ಹೇಳಿತು. ಮೇಲ್ನೋಟಕ್ಕೆ ಇದು ಸರಿ ಎನ್ನಿಸುತ್ತದೆ. ಮಕ್ಕಳಿಗೆ ರಾಷ್ಟ್ರೀಯ ಹಬ್ಬಗಳನ್ನು ಶಾಲೆಯಲ್ಲಿ ಕಲಿಸಿದರೆ ಸಾಕಲ್ಲವೇ? ಅವರವರ ಮನೆಯಲ್ಲಿ ಹಬ್ಬ ಹರಿದಿನಗಳನ್ನು ಮಾಡಿಕೊಳ್ಳಬಹುದಲ್ಲವೇ? ಎಂದು ನಮ್ಮ ವಸಾಹತುಶಾಹಿ ಬುದ್ಧಿಗೆ ಆಲೋಚನೆ ಬರುತ್ತದೆ. ಆದರೆ, ಇಲ್ಲಿ ಪ್ರಮುಖವಾಗಿ ಮೂರು ಪ್ರಶ್ನೆಗಳು ಎದುರಾಗುತ್ತವೆ.

1) ವಸತಿ ಶಾಲೆಯಲ್ಲಿರುವ ಮಕ್ಕಳು ಹಬ್ಬ ಹರಿದಿನಕ್ಕೆಲ್ಲ ಮನೆಗೆ ಹೋಗುವುದಿಲ್ಲ. ಅವರಿಗೆ ಹಾಸ್ಟೆಲ್, ಶಾಲೆಯಲ್ಲೇ ಎಲ್ಲ ಸಂಸ್ಕಾರ ದೊರಕಬೇಕು. ಹಾಗಾದರೆ ವಸತಿ ಶಾಲೆಗೆ ಕಳಿಸುವುದು ಎಂದರೆ ಮಕ್ಕಳನ್ನು ತಮ್ಮ ಧರ್ಮದಿಂದ ಬೇರೆ ಮಾಡುವುದು ಎಂದು ಅರ್ಥವೇ?

2) ಈ ಸುತ್ತೋಲೆ ಹೊರಡಿಸಿದ ಸಂಘದ ಕಾರ್ಯವ್ಯಾಪ್ತಿ ಕೇವಲ ಎಸ್ಸಿಎಸ್ಟಿ, ಹಿಂದುಗಳಿದ ವರ್ಗಗಳ ಹಿಂದೂ ಮಕ್ಕಳ ಶಾಲೆಗಳಷ್ಟೆ. ಅಲ್ಪಸಂಖ್ಯಾತ ಕಲ್ಯಾಣ ಇಲಾಖೆಯ ಅಧೀನದಲ್ಲಿ ಇರುವ ವಸತಿ ಶಾಲೆಗಳು ಈ ಸಂಘದ ಅಡಿಯಲ್ಲಿಲ್ಲ. ಹಾಗಾದರೆ ಧಾರ್ಮಿಕ ಉತ್ಸವಗಳನ್ನು ಕೇವಲ ಹಿಂದೂ ಮಕ್ಕಳಿಗೆ ಮಾತ್ರ ನಿಷೇಧಿಸಲಾಗುತ್ತದೆ ಎಂದರ್ಥ. ಸರ್ವೇ ಜನಾಃ ಸುಖಿನೋ ಭವಂತುಃ ಎನ್ನುವ ಹಿಂದೂ ಧರ್ಮದ ಆಚರಣೆಗಳನ್ನು ನಿಷೇಧಿಸಬೇಕು, ʼಒಬ್ಬನೇ ದೇವರು, ಅವನನ್ನೇ ನಂಬಬೇಕು, ಬೇರೆ ದಾರಿ ಇಲ್ಲʼ ಎನ್ನುವ ರಿಲೀಜನ್ಗಳ ಮಕ್ಕಳಿಗೆ ಸ್ವಾತಂತ್ರ್ಯ. ಇದೇ ಕಾಂಗ್ರೆಸ್‌ನ ಜಾತ್ಯತೀತತೆಯೇ?

Congress Party

3) ರಾಷ್ಟ್ರೀಯ ಹಬ್ಬಗಳು ಹಾಗೂ ಧಾರ್ಮಿಕ ಹಬ್ಬಗಳು ಎಂದಾಗ ಭಾರತದ ಮಟ್ಟಿಗೆ ಅವುಗಳಲ್ಲಿ ವ್ಯತ್ಯಾಸವೇ ಇಲ್ಲ. ಹಿಂದುತ್ವವೇ ಇಲ್ಲಿನ ರಾಷ್ಟ್ರೀಯತೆ. ಹಿಂದುತ್ವವು ರಾಷ್ಟ್ರೀಯತೆಗೆ ಪೂರಕವೇ ಹೊರತು ಮಾರಕವಲ್ಲ. ಸ್ವಾತಂತ್ರ್ಯ ಹೋರಾಟಕ್ಕೆ ಬೆಂಬಲವಾಗಿ ನಿಂತಿದ್ದು ಗಣೇಶ ಚತುರ್ಥಿ. ಹಾಗಾದರೆ ಗಣೇಶ ಚತುರ್ಥಿ ಧಾರ್ಮಿಕ ಉತ್ಸವವೋ, ರಾಷ್ಟ್ರೀಯ ಉತ್ಸವವೋ? ರಾಷ್ಟ್ರೀಯತೆ ಹಾಗೂ ಧರ್ಮವನ್ನು ಬೇರೆ ಮಾಡುವ ಕಾಂಗ್ರೆಸ್ನ ಹುನ್ನಾರವೇ ಹಾಸ್ಟೆಲ್ಗಳ ಸುತ್ತೋಲೆಯ ಕಿತಾಪತಿ.

ಸಾರ್ವಜನಿಕರಿಂದಷ್ಟೆ ಅಲ್ಲದೆ, ಸ್ವತಃ ವಸತಿ ಶಾಲೆಗಳ ಶಿಕ್ಷಕರಿಂದಲೂ ಕಾಂಗ್ರೆಸ್ ನಿರ್ಧಾರಕ್ಕೆ ವಿರೋಧ ವ್ಯಕ್ತವಾಯಿತು. ಅಂತಿಮವಾಗಿ ಸುತ್ತೋಲೆಯನ್ನು ಹಿಂಪಡೆಯಲಾಯಿತು.

ಮೂರನೆಯದಾಗಿ, ಸಮಾಜ ಕಲ್ಯಾಣ ಇಲಾಖೆಯ ಹಾಸ್ಟೆಲ್ಗಳ ಪ್ರವೇಶದಲ್ಲಿ ಅಳವಡಿಸಲಾಗಿದ್ದ ʼಜ್ಞಾನದೇಗುಲವಿದು ಕೈ ಮುಗಿದು ಒಳಗೆ ಬನ್ನಿʼ ಎಂಬುದನ್ನು ತಿದ್ದಿ, ʼಜ್ಞಾನದೇಗುಲವಿದು ಧೈರ್ಯವಾಗಿ ಪ್ರಶ್ನಿಸಿʼ ಎಂದು ಬದಲಾಯಿಸುವ ಆದೇಶವನ್ನು ಐಎಎಸ್ ಅಧಿಕಾರಿಯ ಮೂಲಕ ಮೌಖಿಕವಾಗಿ ಕೊಡಿಸಲಾಯಿತು. ರಾಷ್ಟ್ರಕವಿ ಕುವೆಂಪು ಅವರ ಗೀತೆ ʼಬಾಗಿಲೊಳು ಕೈ ಮುಗಿದು ಒಳಗೆ ಬಾ ಯಾತ್ರಿಕನೆ. . .ʼಯಿಂದ ಪ್ರೇರಣೆ ಪಡೆದ ಈ ಸಾಲುಗಳು ಅನೇಕ ವರ್ಷಗಳಿಂದ ನಾಡಿನ ಬಹುತೇಕ ಶಾಲಾ ಕಾಲೇಜುಗಳಲ್ಲಿ ರಾರಾಜಿಸುತ್ತಿದೆ. ಪ್ರಶ್ನೆ ಮಾಡುವುದನ್ನು ಹೇಳಿಕೊಡುವುದೇ ಹಿಂದೂ ಧರ್ಮ. ಸನಾತನ ಧರ್ಮದ ಉಪನಿಷತ್ತುಗಳು ತುಂಬಿರುವುದೇ ಪ್ರಶ್ನೋತ್ತರಗಳಿಂದ. ಆದರೆ ಧೈರ್ಯವಾಗಿ ಪ್ರಶ್ನಿಸುವುದಲ್ಲ, ಜ್ಞಾನವನ್ನು ಅರಸುವ ವಿನಮ್ರತೆಯಿಂದ ಪ್ರಶ್ನಿಸುವುದು. ಇಲ್ಲಿ ಅಹಂಕಾರಕ್ಕೆ ಜಾಗವಿಲ್ಲ. ವಿದ್ಯಾ ದದಾತಿ ವಿನಯಂ, ಅಂದರೆ ವಿದ್ಯೆಯನ್ನು ಗಳಿಸಿದಷ್ಟೂ ವಿನಯವೂ ಮೈಗೂಡಬೇಕು. ಇಲ್ಲದಿದ್ದರೆ ಆ ವಿದ್ಯೆಗೆ ಬೆಲೆಯೇ ಇಲ್ಲ. ಭಾರತೀಯರ ಈ ಮೂಲ ಮನೋಭಾವವನ್ನೇ ಬದಲಾಯಿಸುವ ಕಾಂಗ್ರೆಸ್ನ ಮತ್ತೊಂದು ಕಿತಾಪತಿಗೂ ಸಾರ್ವಜಿಕರಿಂದ ವಿರೋಧ ವ್ಯಕ್ತವಾಯಿತು. ಅದನ್ನೂ ಹಿಂಪಡೆಯಲಾಯಿತು.

ಇದನ್ನೂ ಓದಿ: ವಿಸ್ತಾರ ಅಂಕಣ: ಮಥುರಾದಲ್ಲೂ ಗತವೈಭವ ಮರುಕಳಿಸುವ ದಿನಗಳು ದೂರವಿಲ್ಲ

ನಾಲ್ಕನೇ ಪ್ರಕರಣ ಎಂದರೆ ನಾಡಗೀತೆಗೆ ಕೊಕ್ ಕೊಟ್ಟಿದ್ದು. ಸರ್ಕಾರದ ರೀತಿ, ನೀತಿ, ನಿಬಂಧನೆಗಳನ್ನು ಖಾಸಗಿ ಶಾಲೆಗಳೂ ಪಾಲಿಸಲೇಬೇಕು. ಆದರೆ ನಾಡಗೀತೆ ಕುರಿತ ಪ್ರಕರಣವೊಂದರ ವಿಚಾರಣೆ ವೇಳೆ, ಖಾಸಗಿ ಶಾಲೆಗಳಲ್ಲಿ ನಾಡಗೀತೆ ಕಡ್ಡಾಯವಲ್ಲ ಎಂಬ ಎಡಬಿಡಂಗಿ ಹೇಳಿಕೆಯನ್ನು ಸರ್ಕಾರ ತಿಳಿಸಿತು. ಹಾಗಾದರೆ ಖಾಸಗಿ ಶಾಲೆ ಮಕ್ಕಳಿಗೆ ದೇಶಭಕ್ತಿ, ನಾಡಪ್ರೀತಿ ಬೇಕಿಲ್ಲವೇ? ಎಂಬ ಆಲೋಚನೆಯೂ ಇಲ್ಲದೆ ಸರ್ಕಾರ ವರ್ತಿಸಿತು. ಕೊನೆಗೆ ಎಂದಿನಂತೆ ಈ ಸುತ್ತೋಲೆಯನ್ನೂ ಹಿಂಪಡೆಯಿತು.

ಒಂದೆಡೆ ಸರ್ಕಾರಗಳು ತಮ್ಮ ಮನಸೋಯಿಚ್ಛೆ ವರ್ತಿಸುವುದು ಆಗಾಗ್ಗೆ ನಡೆದೇ ಇರುತ್ತದೆ. ರಾಜಕಾರಣಿಗಳು ಜನರಿಂದ ಆಯ್ಕೆ ಆಗಿ ಬಂದಿರುತ್ತಾರೆ, ಅವರಿಗೆ ತಮ್ಮದೇ ಸಿದ್ಧಾಂತಗಳಿರುತ್ತವೆ. ಅವರು ಏನು ಬೇಕಾದರೂ ಹೇಳಬಹುದು. ಆದರೆ ಭಾರತದ ಅಖಂಡತೆ, ಅಸ್ಮಿತೆ, ಸಾರ್ವಭೌಮತ್ವವನ್ನು ಕಾಪಾಡಿಕೊಳ್ಳುವುದು ಅಖಿಲ ಭಾರತ ಅಧಿಕಾರಿಗಳ (ಐಎಎಸ್) ಹೊಣೆ. ಕೇಂದ್ರೀಕೃತ ವ್ಯವಸ್ಥೆಯಲ್ಲಿ ನೇಮಕ ಮಾಡಿ, ಏಕರೂಪದ ತರಬೇತಿ ನೀಡಿ ದೇಶಾದ್ಯಂತ ಇವರನ್ನು ನಿಯೋಜನೆ ಮಾಡುವುದೇ ಈ ಕಾರಣಕ್ಕೆ. ಆದರೆ ಸರ್ಕಾರಗಳು ಬದಲಾದಂತೆ ಕೆಲವು ಅಧಿಕಾರಿಗಳು ಊಸರವಳ್ಳಿಯಂತೆ ಬಣ್ಣ ಬದಲಾಯಿಸುವುದನ್ನು ಕಾಣುತ್ತೇವೆ. ಸಮಾಜ ಕಲ್ಯಾಣ ಇಲಾಖೆಯ ಸುತ್ತೋಲೆ ಪ್ರಕರಣದಲ್ಲಿ ನೇರವಾಗಿ ಐಎಎಸ್ ಅಧಿಕಾರಿಯೊಬ್ಬರು ಭಾಗಿಯಾಗಿರುವುದನ್ನು ರಾಜ್ಯವೇ ನೋಡಿದೆ. ಇದು ತಮ್ಮ ಹುದ್ದೆಗೆ ಮಾಡುತ್ತಿರುವ ಅವಮಾನ ಎನ್ನುವುದು ಆ ಅಧಿಕಾರಿಗೆ ತಿಳಿದಿರಬೇಕಿತ್ತು. ಮತ್ತು, ಸರ್ಕಾರಗಳು ಬದಲಾಗುತ್ತವೆ ಎಂಬ ಅರಿವೂ ಅವರಿಗೆ ಇರಬೇಕಿತ್ತು. ಕಾಂಗ್ರೆಸ್‌ನಿಂದ ಹೆಚ್ಚಿನ ನಿರೀಕ್ಷೆಗಳಿಲ್ಲ. ಆ ಪಕ್ಷ ಎಂದಿಗೂ ದೇಶವನ್ನು ಒಡೆಯುವ ಒಂದಲ್ಲ ಒಂದು ಪ್ರಯತ್ನ ಮಾಡುತ್ತಲೇ ಇರುತ್ತದೆ. ಅದು ಬ್ರಿಟಿಷ್ ಮಾನಸಿಕತೆಯ ಪಳೆಯುಳಿಕೆ. ಆದರೆ ಐಎಎಸ್ ಅಧಿಕಾರಿಗಳಾದರೂ ತಮ್ಮ ಬುದ್ಧಿಯನ್ನು ಸ್ಥಿಮಿತದಲ್ಲಿರಿಸಿಕೊಂಡು, ನಾಡಿನ ಹಿತಾಸಕ್ತಿಗೆ ಅನುಗುಣವಾಗಿ ನಡೆದುಕೊಳ್ಳಬೇಕಿದೆ.

ಇದನ್ನೂ ಓದಿ: ವಿಸ್ತಾರ ಅಂಕಣ: ಐತಿಹಾಸಿಕ ನಿರ್ಧಾರ ಕೈಗೊಳ್ಳುವ ಅವಕಾಶ ಮುಸ್ಲಿಂ ಸಮುದಾಯದ ಎದುರಿದೆ

Continue Reading

ಸ್ಫೂರ್ತಿ ಕತೆ

Raja Marga Column : ಮರೆಯಾದ ಗೋಲ್ಡನ್ ವಾಯ್ಸ್ : ಬಿನಾಕಾ ಗೀತಮಾಲಾದ ಅಮೀನ್ ಸಯಾನಿ

Raja Marga Column : ಆಕಾಶವಾಣಿಯ ‘ಬಿನಾಕಾ ಗೀತಮಾಲಾ’ (Binaca Geetmala) ಎಂಬ ಕಾರ್ಯಕ್ರಮ ಕೇಳದವರು ಯಾರು? ಅಮೀನ್ ಸಯಾನಿ (Ameen Sayani) ಎಂಬ ಗೋಲ್ಡನ್‌ ವಾಯ್ಸ್‌ ಸರದಾರ ನಡೆಸಿಕೊಡುತ್ತಿದ್ದ ಅದ್ಭುತ ಅದು. ಮಂಗಳವಾರ ನಮ್ಮನ್ನು ಅಗಲಿದ ಅಮರ ಧ್ವನಿಯ ಸವಿ ನೆನಪುಗಳು ಇಲ್ಲಿವೆ.

VISTARANEWS.COM


on

Raja Marga Column Ameen Sayani Geet mala
Koo

Raja Marga Column : ಆ ಅದ್ಭುತ ಬೇಸ್ ವಾಯ್ಸ್ ಭಾರತವನ್ನು (Powerful Base Voice) ಆರುವತ್ತು ವರ್ಷಕ್ಕೂ ಅಧಿಕ ಕಾಲ ರೂಲ್ ಮಾಡಿತ್ತು. ಆಲ್ ಇಂಡಿಯಾ ರೇಡಿಯೋದ (All India Radio) ಒಂದು ಜನಪ್ರಿಯ ಕಾರ್ಯಕ್ರಮ 42 ವರ್ಷಗಳ ಕಾಲ ನಿರಂತರ ಆಕಾಶವಾಣಿಯಿಂದ ಪ್ರಸಾರ ಆಯಿತು ಮತ್ತು ಲಿಮ್ಕಾ ದಾಖಲೆ ಕ್ರಿಯೇಟ್ ಮಾಡಿತು ಅಂದರೆ ಅದು ಅದ್ಭುತವೇ ಹೌದು. ಆ ಶೋನ ಹೆಸರು ‘ಬಿನಾಕಾ ಗೀತಮಾಲಾ’ (Binaca Geetmala) ಮತ್ತು ಆ ನಿರೂಪಕನ ಹೆಸರು ಅಮೀನ್ ಸಯಾನಿ (Ameen Sayani). ಅವರು ಈ ಮಂಗಳವಾರ (ಫೆಬ್ರುವರಿ 20) ನಮ್ಮನ್ನು ಅಗಲಿದ್ದಾರೆ ಅನ್ನುವುದು ಅವರ ಅಭಿಮಾನಿಗಳಿಗೆ ಬಿಗ್ ಶಾಕ್ ಹೌದು.

Raja Marga Column  Ameen Sayani Geet mala voice

Raja Marga Column: ಅದು ಕಾಪಿ ಮಾಡಲು ಸಾಧ್ಯವೇ ಆಗದ ಧ್ವನಿ!

ಅಮೀನ್ ಸಯಾನಿ ಹುಟ್ಟಿದ್ದು 1932 ಮುಂಬೈಯಲ್ಲಿ. ಜನ್ಮದತ್ತವಾಗಿ ಬಂದದ್ದು ಗೋಲ್ಡನ್ ವಾಯ್ಸ್. ಬಹಳ ಭಾರವಾದ ಬೇಸ್ ವಾಯ್ಸ್. ಆಕಾಶವಾಣಿಯ ಮೈಕ್ ಮುಂದೆ ಕೂತು ಅವರು ಮಾತಾಡಲು ತೊಡಗಿದರೆ ಇಡೀ ಭಾರತ ಮೈಮರೆತು ಕೇಳುತ್ತಿತ್ತು. ಹಿಂದಿ ಸಾಹಿತ್ಯವನ್ನು ಆಪೋಶನ ಮಾಡಿಕೊಂಡ ಹಾಗೆ ಓದಿಕೊಂಡಿದ್ದ ಅವರು ಇಂಗ್ಲಿಷ್ ಕೂಡ ಅದ್ಭುತವಾಗಿ ಮಾತಾಡುತ್ತಿದ್ದರು. ಅವರು ಮಾತಾಡುವಾಗ ಆಕಾಶವಾಣಿಯ ಮೈಕ್ ಕೂಡ ನಡುಗುತ್ತಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ. ಅವರು ತಮ್ಮ ತಾಯಿಯು ಹೊರತರುತ್ತಿದ್ದ ‘ರಾಹಬೀರ್ ‘ ಎಂಬ ಪತ್ರಿಕೆಗೆ ಹಿಂದಿ, ಗುಜರಾತಿ ಮತ್ತು ಉರ್ದು ಭಾಷೆಗಳಲ್ಲಿ ಲೇಖನ ಬರೆಯುತ್ತಿದ್ದರು. ಅವರ ತಾಯಿ ಗಾಂಧೀಜಿಯವರ ದಟ್ಟ ಪ್ರಭಾವದಿಂದ ರಾಷ್ಟ್ರೀಯ ವಿಚಾರ ಧಾರೆಯನ್ನು ಹೊಂದಿದ್ದರು. ಬರವಣಿಗೆಯಿಂದ ಅಮೀನ್ ಅವರ ಮಾತು ಪಳಗಿತು ಎನ್ನಬಹುದು. ಅವರು ಮಾತಿಗೆ ನಿಂತರೆ ಹಿಂದಿ ಮತ್ತು ಉರ್ದು ಶಾಯರಿಗಳು ಧಾರೆ ಧಾರೆಯಾಗಿ ಹರಿದು ಬರುತ್ತಿದ್ದವು. ಎಷ್ಟೋ ಶಾಯರಿಗಳು ಸ್ಥಳದಲ್ಲಿಯೇ ಹುಟ್ಟಿ ಬರುತ್ತಿದ್ದವು.

ಹೆಚ್ಚು ಗ್ರಾಂಥಿಕವಾದ ಮತ್ತು ಸಾಹಿತ್ಯಿಕವಾದ ಭಾಷೆಯನ್ನು ಬಳಸದೆ ಅತ್ಯಂತ ಸರಳವಾದ ಮತ್ತು ಸರಸವಾದ ಭಾಷೆ ಬಳಕೆ ಮಾಡಿಕೊಂಡ ಕಾರಣ ಅವರ ಕಾರ್ಯಕ್ರಮಗಳು ಸಾಮಾನ್ಯ ಜನರ ಹೃದಯವನ್ನು ಕೂಡ ತಟ್ಟಿದವು ಎನ್ನಬಹುದು.

ಅವರು ತಮ್ಮ ಮೊದಲ ಕೆಲಸ ಆರಂಭ ಮಾಡಿದ್ದು ಶ್ರೀಲಂಕಾ ರೇಡಿಯೋದ ಮೂಲಕ. ಅಲ್ಲಿ 1951ರಲ್ಲಿ ಹುಟ್ಟಿದ್ದು ಲಿಮ್ಕಾ ದಾಖಲೆಯ ಶೋ ‘ಬಿನಾಕಾ ಗೀತ ಮಾಲಾ’

Raja Marga Column  Ameen Sayani Geet mala1

Raja Marga Column : ಒಂದು ರೇಡಿಯೋ ಶೋ 42 ವರ್ಷ ಓಡಿತು ಎಂದರೆ!

ಬಿನಾಕ ಗೀತಮಾಲ ವಾರಕ್ಕೊಮ್ಮೆ ಪ್ರಸಾರವಾಗುತ್ತಿದ್ದ ಕಾರ್ಯಕ್ರಮ. ಹೇಳಿ ಕೇಳಿ ಅದು ಆಗಿನ ಜನಪ್ರಿಯ ಹಿಂದೀ ಸಿನಿಮಾ ಗೀತೆಗಳ ಶೋ. ಜನರ ಆಯ್ಕೆಯ ಮಾನದಂಡದ ಮೇಲೆ ಆ ವಾರದ ಜನಪ್ರಿಯ ಹಾಡುಗಳ ಆಯ್ಕೆ ಮತ್ತು ಪ್ರಸಾರದ ಕಾರ್ಯಕ್ರಮ. ಪ್ರತೀ ವಾರ ಯಾವ ಹಾಡುಗಳು ಟಾಪ್ 3 (ಅಥವಾ ಟಾಪ್ 5) ಪ್ಲೇಸಲ್ಲಿ ಬಂದು ಕೂತವು ಎಂಬ ರಹಸ್ಯವನ್ನು ಕೊನೆಯವರೆಗೆ ಕಾಪಾಡಿಕೊಂಡು ಬರಲಾಗುತ್ತಿತ್ತು. ಉದಾಹರಣೆಗೆ ಯೇಸುದಾಸ್ ಹಾಡಿದ ಚಿತ್ ಚೋರ್ ಸಿನಿಮಾದ ‘ಗೋರಿ ತೇರಾ ಗಾಂವ್ ಬಡಾ ಪ್ಯಾರಾ’ ಹಾಡು ಸತತವಾಗಿ 13 ವಾರ ಟಾಪ್ ಒಂದು ಪ್ಲೇಸಲ್ಲಿ ಗಟ್ಟಿಯಾಗಿ ಕೂತಿತ್ತು. ಪಾಕಿಜಾ ಸಿನೆಮಾದ ‘ಇನ್ಹಿ ಲೋಗೋ ನೇ’ ಎಂಬ ಮುಜ್ರಾ ಹಾಡು ಹಲವು ವಾರ ಟಾಪ್ ಪ್ಲೇಸಲ್ಲಿ ಕೂತದ್ದು ನನಗೆ ನೆನಪಿದೆ. ಶೋಲೆ ಸಿನಿಮಾದ ‘ಏ ದೋಸತಿ’ ಹಾಡು, ಸದ್ಮಾ ಚಿತ್ರದ ‘ಸುರ್ ಮೈ ಅಖಿಯೊ ಮೇ’ ಮೊದಲಾದವುಗಳು ಎಷ್ಟೋ ವಾರಗಳ ಕಾಲ ಹಿಟ್ ಪ್ಲೇಸಲ್ಲಿ ವಿರಾಜಮಾನ ಆಗಿದ್ದವು.

‘ರಾಮ್ ತೇರಿ ಗಂಗಾ ಮೈಲಿ’ ಸಿನಿಮಾದ ‘ಸುನ್ ಸಾಯ್ಬಾ ಸುನ್’, ಸಾಗರ್ ಕಿನಾರೆ ಸಿನಿಮಾದ ಟೈಟಲ್ ಸಾಂಗ್, ಬಾಬ್ಬಿ ಸಿನೆಮಾದ ‘ಚಾಬಿ ಖೋ ಜಾಯ್’, ಜ್ಯೂಲಿ ಸಿನಿಮಾದ‌ ‘ಭೂಲ್ ಗಯಾ ಸಬ್ ಕುಚ್’ ಮೊದಲಾದ ಹಾಡುಗಳಿಗೆ ಸ್ಟಾರ್ ವ್ಯಾಲ್ಯೂ ಬಂದದ್ದು ಇದೇ ಕಾರ್ಯಕ್ರಮದ ಮೂಲಕ ಅಂದರೆ ಅತಿಶಯೋಕ್ತಿ ಅಲ್ಲ.

ಆ ಕಾರ್ಯಕ್ರಮದ ಜೀವಾಳವೇ ಅಮೀನ್ ಸಯಾನಿ ಅವರ ಅದ್ಭುತ ನಿರೂಪಣೆ ಮತ್ತು ಗೋಲ್ಡನ್ ವಾಯ್ಸ್.

ಅವರು ಆ ಹಾಡುಗಳ ಸಾಹಿತ್ಯದ ಮೌಲ್ಯ, ರಾಗ ಸಂಯೋಜನೆ, ವಾದ್ಯಗಳ ಬಳಕೆ, ಯಾವ ರಾಗ? ಯಾವ ತಾಳ, ಯಾವ ಗಾಯಕರು? ಹಾಡಿನ ಮನೋಧರ್ಮ ಯಾವುದು? ಆ ಹಾಡಿನ ಜನಪ್ರಿಯತೆಗೆ ಕಾರಣ ಏನು?… ಹೀಗೆ ಎಲ್ಲವನ್ನೂ ಹೃದ್ಯವಾದ ಹಿಂದಿ ಮತ್ತು ಉರ್ದು ಭಾಷೆಗಳಲ್ಲಿ ನಿರೂಪಣೆ ಮಾಡುತ್ತ ಹೋದಂತೆ ಜನರು ಅವರ ನಿರೂಪಣಾ ಶೈಲಿಗೆ ಮಾರುಹೋಗುತ್ತಿದ್ದರು. ಆಗಿನ ಜನಪ್ರಿಯ ಟೂಥ್ ಪೇಸ್ಟ್ ಬಿನಾಕಾ ಆ ಕಾರ್ಯಕ್ರಮದ ಪ್ರಾಯೋಜಕತ್ವ ವಹಿಸಿಕೊಂಡ ಕಾರಣ ಅದು ‘ಬಿನಾಕಾ ಗೀತಮಾಲಾ’ ಎಂದೇ ಜನಪ್ರಿಯ ಆಯಿತು. ಮುಂದೆ ಬಿನಾಕ ಕಂಪೆನಿ ಹೆಸರು ಬದಲಾವಣೆ ಮಾಡಿಕೊಂಡ ಕಾರಣ ಅದು ‘ಸಿಬಾಕಾ ಗೀತ್ ಮಾಲಾ’ ಆಗಿ ಬದಲಾಯಿತು.

ಮುಂದೆ ಅದೇ ಕಾರ್ಯಕ್ರಮ ಭಾರತೀಯ ಆಕಾಶವಾಣಿಗೆ (ಆಲ್ ಇಂಡಿಯಾ ರೇಡಿಯೋ) ವರ್ಗಾವಣೆ ಆಯಿತು. ಆದರೆ 42 ವರ್ಷ ಆ ಕಾರ್ಯಕ್ರಮದ ಜನಪ್ರಿಯತೆಯು (ಆಗ TRP ಎಂಬ ಮಾನದಂಡ ಇರಲಿಲ್ಲ) ಒಂದಿಂಚೂ ಕಡಿಮೆ ಆಗಿರಲಿಲ್ಲ ಅನ್ನುವುದು ಅಮೀನ್ ಸಯಾನಿ ಅವರ ಧ್ವನಿಯ ತಾಕತ್ತು. ಅದು ಆಕಾಶವಾಣಿಗೆ ಹೇಳಿ ಮಾಡಿಸಿದ ಧ್ವನಿ ಆಗಿತ್ತು. ಕಾರ್ಯಕ್ರಮದ ಮರುದಿನ ಇಡೀ ಭಾರತ ಆ ಕಾರ್ಯಕ್ರಮದ ಬಗ್ಗೆ ಮತ್ತು ಹಾಡುಗಳ ಬಗ್ಗೆ ಚರ್ಚೆ ಮಾಡುತ್ತಿದ್ದದನ್ನು ನಾನು ಗಮನಿಸಿದ್ದೇನೆ. ಆ ಹಾಡುಗಳ ಕ್ಯಾಸೆಟ್‌ಗಳು ಬಿಸಿ ದೋಸೆಯ ಹಾಗೆ ಮಾರಾಟ ಆಗುತ್ತಿದ್ದವು.

Raja Marga Column  Ameen Sayani Geet mala2

54,000 ರೇಡಿಯೋ ಶೋಗಳ ದಾಖಲೆ!

1951-2014 ಅವಧಿಯಲ್ಲಿ ಅವರು ನಡೆಸಿಕೊಟ್ಟ ರೇಡಿಯೋ ಶೋಗಳ ಸಂಖ್ಯೆ 54,000 ದಾಟಿತ್ತು ಅಂದರೆ ನಂಬುವುದು ಕಷ್ಟ ಆಗಬಹುದು! ಅದರ ಜೊತೆಗೆ 19,000 ರೇಡಿಯೋ ಜಿಂಗಲ್‌ಗಳಿಗೆ ಅವರ ಧ್ವನಿಯು ಬಳಕೆ ಆಗಿದೆ! ಹಲವು ಹಿಂದಿ ಸಿನಿಮಾ ಮತ್ತು ಧಾರಾವಾಹಿಗಳಿಗೆ ಅವರ ಧ್ವನಿಯು ಹಿನ್ನೆಲೆ ಧ್ವನಿಯಾಗಿ ಬಳಕೆ ಆಗಿದೆ. ಬಿಬಿಸಿ ಸೇರಿದಂತೆ ಹಲವು ವಿದೇಶದ ರೇಡಿಯೋ ಶೋಗಳಲ್ಲಿ ಅವರ ಧ್ವನಿಯ ನಿರೂಪಣೆಯು ಮಿಂಚಿದೆ. ಅವರ ‘ಬೇಹನೋ ಔರ್ ಬಾಯಿಯೋ ‘ಎಂಬ ಆರಂಭದ ಮಾತು ಸಿಕ್ಕಾಪಟ್ಟೆ ಮೋಡಿ ಮಾಡುತ್ತಿತ್ತು.

ಸಂಗೀತ್ ಕೆ ಸಿತಾರೆ ಮೇಹಫಿಲ್, ಬೋರ್ನ್ವಿಟಾ ಕ್ವಿಜ್ ಕಂಟೆಸ್ಟ್, ಶಾಲಿಮಾರ್ ಸೂಪರ್ ಜೋಡಿ ಇವೆಲ್ಲವೂ ಅವರೇ ಹುಟ್ಟುಹಾಕಿದ ಜನಪ್ರಿಯವಾದ ರೇಡಿಯೋ ಶೋಗಳು. ನಿರೂಪಣೆ ಕೂಡ ಅವರದ್ದೇ. ಅವರು ಜಗತ್ತಿನಾದ್ಯಂತ ಜನಪ್ರಿಯ ಹಾಡುಗಳ ಸ್ಟೇಜ್ಶೋ ಗಳನ್ನು ಹೋಸ್ಟ್ ಮಾಡಿದ್ದಾರೆ. ನಾನು ಅವರ ಧ್ವನಿಯ ಅಭಿಮಾನಿ ಎಂದು ಲತಾ ಮಂಗೇಶ್ಕರ್ ಮತ್ತು ಅಮಿತಾಬ್ ಬಚ್ಚನ್ ಹಾಡಿ ಹೊಗಳಿದ್ದಾರೆ.

ಇದನ್ನೂ ಓದಿ : Raja Marga Column : ಬೇಕಿರುವುದು ಅನುಕಂಪವಲ್ಲ, ಸಹಾನುಭೂತಿ; ಏನೀ ಪ್ರೀತಿ ಮಂತ್ರ?

ಗೋಲ್ಡನ್ ವಾಯ್ಸ್ ಆಫ್ ಇಂಡಿಯಾ

2014ರವರೆಗೆ ರೇಡಿಯೋ ಶೋಗಳನ್ನು ನಿರ್ವಹಣೆ ಮಾಡುತ್ತ ಬಂದಿದ್ದ ಅವರ ಧ್ವನಿಯು ಭಾರತದಲ್ಲಿ ಮೆಟ್ರೋ ರೈಲುಗಳಲ್ಲಿ ಕೂಡ ಪ್ರಸಾರವಾಗಿ ಜನಪ್ರಿಯ ಆಗಿತ್ತು. ಅವರಿಗೆ ಪದ್ಮಶ್ರೀ ಪ್ರಶಸ್ತಿ, ‘ಗೋಲ್ಡನ್ ವಾಯ್ಸ್ ಆಫ್ ಇಂಡಿಯಾ’ ಪ್ರಶಸ್ತಿಗಳು ಕೂಡ ದೊರೆತಿರುವುದು ಉಲ್ಲೇಖನೀಯ.

ಅವರು ಈ ಮಂಗಳವಾರ ನಮ್ಮನ್ನು ಆಗಲಿದ್ದು (81 ವರ್ಷ) ಭಾರತೀಯ ರೇಡಿಯೋ ಅಭಿಮಾನಿಗಳಿಗೆ ತುಂಬಲಾಗದ ನಷ್ಟ. ಟಿವಿ ರಿಯಾಲಿಟಿ ಶೋಗಳ ಈ ಆಧುನಿಕ ಕಾಲದಲ್ಲೂ ರೇಡಿಯೋ ಕಿವಿಗೆ ಹಚ್ಚಿ ಆಲಿಸುವ ಕೋಟಿ ಕೋಟಿ ಅಭಿಮಾನಿಗಳು ಭಾರತದಲ್ಲಿ ಈಗಲೂ ಇದ್ದಾರೆ ಅಂದರೆ ಅದಕ್ಕೆ ಕಾರಣ ಅಮೀನ್ ಸಯಾನಿ ಅವರಂತಹ ಲೆಜೆಂಡ್ ವಾಯ್ಸ್‌ಗಳು. ಇಂದು ಆರ್ ಜೆ ಆಗಿ ಬದುಕು ಆರಂಭಿಸುವ ಹಲವು ಯುವಕ , ಯುವತಿಯರು ಅವರ ನಿರೂಪಣೆಯ ಶೈಲಿಯನ್ನು ಒಮ್ಮೆ ಗಮನಿಸುವುದು ಉತ್ತಮ. ಅವರಿಗೆ ನಮ್ಮ ಶ್ರದ್ಧಾಂಜಲಿ.

ಇಲ್ಲಿವೆ ಅಮೀನ್‌ ಸಯಾನಿ ಅವರ ವಿವರಣೆಗಳನ್ನು ಒಳಗೊಂಡ ನೂರು ಹಾಡುಗಳು

Continue Reading

ಸ್ಫೂರ್ತಿ ಕತೆ

Raja Marga Column : ಬೇಕಿರುವುದು ಅನುಕಂಪವಲ್ಲ, ಸಹಾನುಭೂತಿ; ಏನೀ ಪ್ರೀತಿ ಮಂತ್ರ?

Raja Marga Column : ನಾವು ಇನ್ನೊಬ್ಬರ ಬಗ್ಗೆ ಹೊಂದಬೇಕಾಗಿರುವುದು ಅನುಕಂಪವಲ್ಲ, ಸಹಾನುಭೂತಿ. ಅವರ ಸ್ಥಾನದಲ್ಲಿ ನಿಂತು ಅವರ ಸಮಸ್ಯೆಯನ್ನು ಅರ್ಥ ಮಾಡಿಕೊಳ್ಳುವ ಪ್ರಯತ್ನ ಅನ್ನುತ್ತಾರೆ ಲೇಖಕರು, ಹಲವು ಉದಾಹರಣೆಗಳ ಜತೆಗೆ.

VISTARANEWS.COM


on

Raja Marga Column Empathy
Koo
RAJAMARGA

Raja Marga Column: ಒಂದು ಕಥೆಯಿಂದ ಆರಂಭ ಮಾಡುತ್ತೇನೆ. ಒಂದೂರಲ್ಲಿ ಒಂದು ನಾಯಿಗಳ ಪ್ರದರ್ಶನ (Dog Show) ಮತ್ತು ಮಾರಾಟ ಮಾಡುವ ಕಾರ್ಯಕ್ರಮ ಏರ್ಪಾಡಾಗಿತ್ತು. ಬೇರೆ ಬೇರೆ ಜಾತಿಯ, ಬೇರೆ ಬೇರೆ ಬಣ್ಣದ ಚಂದ ಚಂದದ ನಾಯಿಗಳು. ಬೆಳಗ್ಗೆಯಿಂದ ಜನಸಾಗರ ಹರಿದು ಬಂದು ನಾಯಿಗಳನ್ನು ನೋಡುತ್ತ ತಮಗೆ ಇಷ್ಟವಾದ ನಾಯಿಗಳನ್ನು ಖರೀದಿ ಮಾಡುತ್ತಿದ್ದರು.

ಆದರೆ ಒಂದು ನಾಯಿ ಮೇಜಿನ ಕೆಳಗೆ ಧೂಳಲ್ಲಿ ಬಿದ್ದು ಒದ್ದಾಡುತ್ತಿತ್ತು. ಅದಕ್ಕೆ ಬೊಗಳಲು ಕೂಡ ತ್ರಾಣ ಇರಲಿಲ್ಲ. ಅದು ಯಾರಿಗೂ ಬೇಡವಾದ ನಾಯಿ ಆಗಿತ್ತು. ಯಾರೂ ಅದರ ಮೈದಡವಲೂ ಹೋಗಲಿಲ್ಲ.

ಆದರೆ ಮಧ್ಯಾಹ್ನದ ನಂತರ ಒಬ್ಬ ಹುಡುಗ ಆ ಪ್ರದರ್ಶನಕ್ಕೆ ಬಂದ. ಎಲ್ಲ ನಾಯಿಗಳನ್ನು ನೋಡುತ್ತಾ, ಮೈದಡವುತ್ತ ಮುಂದೆ ಬಂದ. ಕೊನೆಗೆ ಆ ನಾಯಿಯ ಹತ್ತಿರ ಬಂದು ನಿಂತ. ಅದರ ಬೆನ್ನು ಸವರಿದ. ಕಣ್ಣಲ್ಲಿ ಕಣ್ಣಿಟ್ಟು ಮಾತಾಡಿದ. ಆ ನಾಯಿಯ ರೇಟ್ ಎಷ್ಟು ಎಂದು ಕೇಳಿದ. ಆ ಪ್ರದರ್ಶನದ ಸಂಘಟಕರು “ಆ ನಾಯಿಗೆ ರೇಟ್ ಫಿಕ್ಸ್ ಮಾಡಿಲ್ಲ. ಅದರ ಒಂದು ಕಾಲು ಮೊನ್ನೆ ಮುರಿದಿದೆ. ಎಷ್ಟು ಬೇಕಾದರೂ ದುಡ್ಡು ಕೊಟ್ಟು ಈ ನಾಯಿ ಖರೀದಿ ಮಾಡಬಹುದು. ಫ್ರೀ ಬೇಕಾದರೂ ಕೊಡಲು ನಾವು ರೆಡಿ ಇದ್ದೇವೆ!” ಎಂದರು. ಹುಡುಗ ಮತ್ತೆ ಆ ನಾಯಿಯ ಮೈ ಸವರಿದ. ತನ್ನ ಕಿಸೆ ಎಲ್ಲ ಹುಡುಕಿದ. ನೂರೋ, ಇನ್ನೂರೋ ರೂಪಾಯಿ ಅವನ ಕೈಗೆ ಬಂತು. ಅದನ್ನು ಕೊಟ್ಟು ಅದೇ ನಾಯಿ ಬೇಕು ಎಂದು ಹಠ ಹಿಡಿದು ಆ ನಾಯಿಯನ್ನು ಖರೀದಿ ಮಾಡಿ ಮನೆಗೆ ತೆಗೆದುಕೊಂಡು ಹೋದ!

ಕಾರಣ ಕೇಳಿದರೆ ನೀವು ದಂಗಾಗಬಹುದು. ಆ ನಾಯಿಯ ಒಂದು ಕಾಲು ಮುರಿದಿತ್ತು ಮತ್ತು ಆ ಹುಡುಗನಿಗೂ ಒಂದು ಕಾಲು ಇರಲಿಲ್ಲ! ಆ ನಾಯಿಯ ಕಷ್ಟ ಅವನಿಗಿಂತ ಚೆನ್ನಾಗಿ ಬೇರೆ ಯಾರಿಗೂ ಅರ್ಥವಾಗುವ ಚಾನ್ಸ್ ಇರಲಿಲ್ಲ!

Raja Marga Column Empathy dog

Raja Marga Column : ಸಿಂಪೆಥಿ vs ಎಂಪಥಿ!

ಈ ಗುಣಕ್ಕೆ ಸಹಾನುಭೂತಿ (Empathy) ಎಂದು ಕರೆಯುತ್ತೇವೆ. Putting ourself in other person’s shoes is empathy ಅನ್ನುತ್ತದೆ ಶಬ್ದಕೋಶ. ಅಂದರೆ ನಾವು ನಮ್ಮನ್ನು ಬೇರೆಯವರ ಜಾಗದಲ್ಲಿ ಕೂರಿಸಿ ಫೀಲ್ ಮಾಡುವುದು ಸಹಾನುಭೂತಿ! ಇದು ಅನುಕಂಪಕ್ಕಿಂತ (Sympathy) ಒಂದು ಹೆಜ್ಜೆ ಮುಂದೆ ಇರುತ್ತದೆ. ಯಾರದಾದರೂ ಬಗ್ಗೆ ಅಯ್ಯೋ ಪಾಪ ಎಂದು ಅಲ್ಲಿಗೆ ಬಿಟ್ಟುಬಿಡುವುದು ಅನುಕಂಪ. ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ ಆ ವ್ಯಕ್ತಿಗಳ ಜಾಗದಲ್ಲಿ ಕೂತು ಅವರ ಕಷ್ಟಗಳನ್ನು ಅರ್ಥ ಮಾಡಿಕೊಳ್ಳುವುದು ಸಹಾನುಭೂತಿ! ಅದೇ ನಮ್ಮನ್ನು ಸದಾಕಾಲ ಗೆಲ್ಲಿಸುತ್ತ ಹೋಗುತ್ತದೆ!

ಇದನ್ನೂ ಓದಿ : Raja Marga Column : ಯುವಜನತೆ ಹಾದಿ ತಪ್ಪುತ್ತಿದೆ ಅನ್ನೋದು ಸುಳ್ಳು, ಅವರ ರೂಟ್‌ ಸರಿ ಇದೆ!

Raja Marga Column Empathy old age

Raja Marga Column : ಮಾನವೀಯ ಸಂಬಂಧಗಳ ಪಂಚಾಂಗ ಇದು!

1. ಒಬ್ಬ ಹುಡುಗ ತನ್ನ ಅಪ್ಪ ಹಾಗೆ, ಅಪ್ಪ ಹೀಗೆ ಎಂದು ದಿನವೂ ಬೈತಾ ಇದ್ದ. ಒಂದು ದಿನ ಅಪ್ಪನ ಜಾಗದಲ್ಲಿ ಅವನು ಕೂತು ಯೋಚನೆ ಮಾಡಿದರೆ ಅವನು ಮುಂದೆ ಖಂಡಿತ ಬಯ್ಯುವುದಿಲ್ಲ!

2. ಒಂದು ದಂಪತಿ ಜಗಳ ಮಾಡಿಕೊಂಡು ನನ್ನ ಬಳಿಗೆ ಬಂದಿದ್ದರು. “ನಾನು ಇಷ್ಟೊಂದು ದುಡಿದು ಸುಸ್ತಾಗಿ ಮನೆಗೆ ಬರ್ತೇನೆ. ಅವಳು ಮನೆಯ ಕೆಲಸ ಬಿಟ್ಟರೆ ಬೇರೇನು ಮಾಡ್ತಾಳೆ?” ಎನ್ನುವುದು ಗಂಡನ ದೂರು.
“ನನ್ನ ಕಷ್ಟ ಯಾರ ಹತ್ತಿರ ಹೇಳಲಿ? ನನ್ನ ಕೆಲಸಕ್ಕೆ ಯಾರು ಸಂಬಳ ಕೊಡುತ್ತಾರೆ? ಒಂದು ಮೆಚ್ಚುಗೆಯ ಮಾತು ಕೂಡ ಇವರಿಂದ ಬರುವುದಿಲ್ಲ!” ಎನ್ನುವುದು ಹೆಂಡತಿಯ ಆರೋಪ.
“ಒಂದು ದಿನದ ಮಟ್ಟಿಗೆ ನಿಮ್ಮ ಕೆಲಸಗಳನ್ನು ಅದಲು ಬದಲು ಮಾಡಿ ನೋಡಿ. ಮತ್ತೆ ನನ್ನ ಬಳಿ ಬನ್ನಿ” ಎಂಬುದು ನಾನು ಕೊಟ್ಟ ಪರಿಹಾರ. ಒಪ್ಪಿಕೊಂಡ ದಂಪತಿಗಳು ಹಿಂದೆ ಹೋದರು. ಮತ್ತೆ ಅವರು ನನ್ನ ಹತ್ತಿರ ಸಲಹೆ ಕೇಳಲು ಬರಲಿಲ್ಲ. ಯಾಕೆಂದರೆ ಅವರು ಜಗಳ ಮಾಡುವುದನ್ನು ಪೂರ್ತಿ ಬಿಟ್ಟಿದ್ದಾರೆ ಅನ್ನುವುದು ನನ್ನ ಚಾಲೆಂಜ್!

3. ಇಲ್ಲೊಬ್ಬ ತಾಯಿ, ಮಗಳ ನಿತ್ಯ ಜಗಳ. ತಾಯಿಯು ಹಳೆಯ ಕಾಲದವರು. ಮಗಳು ಅಲ್ಟ್ರಾ ಮಾಡರ್ನ್! ಅವರಿಬ್ಬರ ಮಧ್ಯೆ ಒಂದು ದೊಡ್ಡ ಜನರೇಶನ್ ಗ್ಯಾಪ್ ಇದೆ. ಮಗಳ ಡ್ರೆಸ್ ಕೋಡ್ ಬಗ್ಗೆ ಅಮ್ಮನದ್ದು ಆಕ್ಷೇಪ. ಇಡೀ ದಿನ ಮೊಬೈಲ್ ಹಿಡಿದುಕೊಂಡೆ ಇರುತ್ತಾಳೆ, ನಮ್ಮ ಕಾಲದಲ್ಲಿ ಹೀಗೆ ಇತ್ತಾ? ಎನ್ನುವುದು ಅಮ್ಮನ ದೂರು!
ಕಾಲ ಬದಲಾಗಿದೆ. ಅಮ್ಮ ಯಾಕೆ ಅವರ ಕಾಲದ ಯೋಚನೆ ಮಾಡುತ್ತಾರೆ? ನನಗೆ ವೈಚಾರಿಕ ಸ್ವಾತಂತ್ರ್ಯ ಬೇಡವಾ? ಅನ್ನುವುದು ಮಗಳ ಆಕ್ಷೇಪ!
ಅವರಿಬ್ಬರನ್ನು ಕೂರಿಸಿ ನಾನು ಹೇಳಿದ ಎಂಪಥಿಯ ಪಾಠವು ತುಂಬಾ ವರ್ಕ್ ಆಯ್ತು! ಈಗ ಅವರಿಬ್ಬರೂ ಅವರವರ ನಿಲುವುಗಳಲ್ಲಿ ಖುಷಿ ಆಗಿದ್ದಾರೆ, ಬೇರೆಯವರ ನಿಲುವುಗಳನ್ನು ಪ್ರಶ್ನೆ ಮಾಡಲು ಹೋಗುವುದಿಲ್ಲ! ಆದ್ದರಿಂದ ಜಗಳ ಇಲ್ಲ!

ಇದನ್ನೂ ಓದಿ : Raja Marga Column : ಯಾವ ಕೆಲಸವೇ ಇರಲಿ, ಗಂಡನ್ನು ಮೀರಿಸಬಲ್ಲ ಪವರ್‌ ಹೌಸ್‌ ಹೆಣ್ಣು!

Raja Marga Column mother in Law

5. ಜಗತ್ತಿನ ಅತ್ಯಂತ ಕ್ಲಿಷ್ಟ ಸಂಬಂಧ ಅಂದರೆ ಅತ್ತೆ ಸೊಸೆಯರ ಸಂಬಂಧ!
“ನಾನು ನನ್ನ ಮಗ ಚೆನ್ನಾಗಿದ್ದೆವು. ಇವಳೊಬ್ಬಳು ಮಾಟಗಾತಿ ಬಂದು ಬಿಟ್ಟಳು! ಈಗ ನನ್ನ ಮಗ ಅವಳ ಹಿಂದೆ ಓಡಾಡುತ್ತಾನೆ. ಅಮ್ಮನ ಬಗ್ಗೆ ಗೊಡವೆಯೇ ಇಲ್ಲ!” ಇದು ಅತ್ತೆಯ ದೂರು.
“ನಾನು ನನ್ನ ತಾಯಿಯ ಮನೆಯನ್ನು ಬಿಟ್ಟು ಗಂಡನ ಮನೆಗೆ ಬಂದವಳು. ನನಗೆ ನನ್ನ ಗಂಡನ ಪ್ರೀತಿ ಬೇಡವಾ? ಅತ್ತೆ ನನ್ನ ಪ್ರತಿಯೊಂದು ನಡೆಯನ್ನು ಪ್ರಶ್ನೆ ಮಾಡಿದರೆ ನಾನೇನು ಮಾಡಲಿ? ” ಇದು ಸೊಸೆಯ ವರಸೆ!
“ನನಗೆ ಉಭಯ ಸಂಕಟ ಆಗ್ತಾ ಇದೆ. ನಾನು ಯಾರ ಪಕ್ಷ ವಹಿಸಲಿ?” ಅನ್ನುತ್ತಾನೆ ಮಗರಾಯ!

ನಾನು ಅತ್ತೆಗೆ ಹೇಳಿದ ಎಂಪಥಿಯ ಪಾಠ ಹೀಗಿತ್ತು “ನೋಡಿ ಅಮ್ಮ. ನೀವು ಹೊಸದಾಗಿ ಮದುವೆಯಾಗಿ ಗಂಡನ ಮನೆಗೆ ಬಂದಾಗ ನಿಮಗೂ ಗಂಡನ ಪ್ರೀತಿಯು ತುಂಬಾ ಬೇಕಿತ್ತು ತಾನೇ? ಮತ್ತೆ ಈಗ ಯಾವ ಕಾರಣಕ್ಕೆ ನೊಂದುಕೊಳ್ಳುತ್ತೀರಿ? ಸ್ವಲ್ಪ ದಿನ ಮಗ ಸೊಸೆ ಖುಷಿ ಆಗಿರಲಿ”
ಸೊಸೆಗೆ ನಾನು ಹೇಳಿದ ಎಂಪಥಿಯ ಪಾಠ – “ನೋಡಮ್ಮ, ನಿಮ್ಮ ಗಂಡನನ್ನು ಬಾಲ್ಯದಿಂದ ಜೋಪಾನ ಮಾಡಿ ಸಾಕಿದವರು ನಿಮ್ಮ ಅತ್ತೆ ತಾನೇ? ನೀವು ಹೊಸದಾಗಿ ಮದುವೆಯಾಗಿ ಬಂದವರು. ಈಗಲೇ ಯಾಕೆ ಅಮ್ಮ, ಮಗನನ್ನು ಸಪರೇಟ್ ಮಾಡುತ್ತೀರಿ? ಸ್ವಲ್ಪ ದಿನ ತಾಳ್ಮೆ ತೆಗೆದುಕೊಳ್ಳಿ. ಮುಂದೆ ಅವರೇ ನಿಮ್ಮನ್ನು ಮಗಳಾಗಿ ತೆಗೆದುಕೊಳ್ಳುತ್ತಾರೆ!”

ಗಂಡನಿಗೆ ನಾನು ಹೇಳಿದ ಎಂಪಥಿಯ ಪಾಠ – ” ನೋಡಪ್ಪ ಮಗರಾಯ. ಮದುವೆಗಿಂತ ಮೊದಲು ನೀನು ಬರುವಾಗ ಎಷ್ಟು ರಾತ್ರಿ ಆದರೂ ನಿಮಗಾಗಿ ಹಸಿವೆಯಿಂದ ಕಾದು ಊಟ ಬಡಿಸುತ್ತ ಇದ್ದದ್ದು ಅಮ್ಮ ತಾನೇ? ಈಗ ಮನೆಗೆ ಬಂದ ಕೂಡಲೇ ಹೆಂಡತಿಯನ್ನು ಕರೆದು ಊಟ ಬಡಿಸು ಎಂದು ಯಾಕೆ ಹೇಳುತ್ತೀ? ಸ್ವಲ್ಪ ದಿನ ಅಮ್ಮ ಊಟ ಬಡಿಸಲಿ ಬಿಡು! ಅವರು ಹಳೆಯ ಕಾಲದವರು. ಹೊಂದಾಣಿಕೆ ಆಗಲು ಸ್ವಲ್ಪ ಸಮಯ ತೆಗೆದುಕೊಳ್ಳುತ್ತಾರೆ. ಮುಂದೆ ನಿನ್ನ ಹೆಂಡತಿಯೇ ನಿನಗೆ ಕೈತುತ್ತು ಕೊಡಲಿ ಬಿಡು!”

ಈಗ ಮೂರೂ ಜನ ಅವರವರ ಕಂಫರ್ಟ್ ವಲಯದಲ್ಲಿ ಸುಖವಾಗಿದ್ದಾರೆ. ಈಗ ಅವರದ್ದು ಸುಖೀ ಸಂಸಾರ.

ಈ ಎಂಪಥಿ ನಿಮ್ಮನ್ನು ನಿತ್ಯವೂ ಗೆಲ್ಲಿಸುವ ಮಂತ್ರ ಎಂದು ನಿಮಗೆ ಇಷ್ಟು ಹೊತ್ತಿಗೆ ಅರ್ಥ ಆಗಿರಬೇಕು!

Continue Reading

ಅಂಕಣ

ನನ್ನ ದೇಶ ನನ್ನ ದನಿ ಅಂಕಣ: ಶತಮಾನದಾಚೆಗೆ ವಿಸ್ತರಿಸಿದ ಪ್ರತಿಭೆ ಪ್ರೊ || ಎಲ್.ಎಸ್. ಶೇಷಗಿರಿರಾವ್

ಇದೀಗ ಪ್ರೊ|| ಎಲ್.ಎಸ್.ಶೇಷಗಿರಿರಾವ್ ಅವರ ಶತಮಾನೋತ್ಸವ ವರ್ಷಾರಂಭ. ಅವರ ಸಾಹಿತ್ಯ, ಅವರ ಸಹೃದಯ ವಿಮರ್ಶೆ, ಅವರ ಕೃತಿಗಳು ನಮ್ಮ ಭಾಷಾಲೋಕವನ್ನು ಮತ್ತೊಮ್ಮೆ ಬೆಳಗಲಿ.

VISTARANEWS.COM


on

LS Sheshagiri Rao
Koo

ಈ ಅಂಕಣವನ್ನು ಇಲ್ಲಿ ಆಲಿಸಿ:

ajjampura manjunath

ನನ್ನ ದೇಶ ನನ್ನ ದನಿ ಅಂಕಣ: ಇತಿಹಾಸದ ವಿಷಯ ಬಂದಾಗ ಸುಪ್ರಸಿದ್ಧ ಇತಿಹಾಸಕಾರ ವಿಲ್ ಡ್ಯೂರಾಂಟ್ ನೆನಪಾಗುತ್ತಾರೆ. ವಿಲ್ ಡ್ಯೂರಾಂಟ್ ವಿಷಯ ಬಂದಾಗಲೂ ಪ್ರತಿಬಾರಿ ನನಗೆ ಎಲ್‌ ಎಸ್‌ ಶೇಷಗಿರಿ ರಾವ್‌ (ಎಲ್ಲೆಸ್ಸೆಸ್- LS Sheshagiri Rao) ಅವರ ಚಿತ್ರವೇ ಕಣ್ಮುಂದೆ ಬರುತ್ತದೆ. ಸುಮಾರು ಏಳು ದಶಕಗಳ ಹಿಂದೆ ಮಡಿಕೇರಿಯಲ್ಲಿ ಅವರು ಇಂಗ್ಲಿಷ್ ಅಧ್ಯಾಪಕರಾಗಿದ್ದರು. ಆಗ ಅಲ್ಲಿನ ಕಾಲೇಜು ಗ್ರಂಥ ಭಂಡಾರಕ್ಕೆ ವಿಲ್ ಡ್ಯೂರಾಂಟ್ ಅವರ ಪ್ರಖ್ಯಾತ “ದ ಸ್ಟೋರಿ ಆಫ್ ಸಿವಿಲೈಸೇಷನ್” ಸರಣಿಯ ಎಲ್ಲ ಸಂಪುಟಗಳೂ ಬಂದವು. ಕುತೂಹಲಕ್ಕೆ ಒಂದು ಸಂಪುಟವನ್ನು ಮನೆಗೆ ತೆಗೆದುಕೊಂಡು ಹೋಗಿ ಓದಲು ಪ್ರಾರಂಭಿಸಿದ ಅವರ ಆಸಕ್ತಿಯನ್ನು ಈ ಸರಣಿಯು ಸೆರೆ ಹಿಡಿಯಿತು. ಬೇಸಿಗೆ ರಜದಲ್ಲಿ ಬೆಂಗಳೂರಿಗೆ ಬರುವಾಗಲೂ ಒಂದೊಂದು ಸಂಪುಟವನ್ನು ಓದಲು ತರುತ್ತಿದ್ದರಂತೆ. ಸುಮಾರು ಮೂರು ವರ್ಷಗಳಲ್ಲಿ ಎಲ್ಲ ಸಂಪುಟಗಳನ್ನೂ ಓದಿ ಮುಗಿಸಿದೆ, ಎಂದಿದ್ದಾರೆ. ಎಲ್ಲೆಸ್ಸೆಸ್ ಅಂತಹ ವಿದ್ವಾಂಸರಿಗೇ ಮೂರು ಮೂರು ವರ್ಷ ಓದಲು ಹಿಡಿಯಿತು, ಎಂದರೆ ವಿಲ್ ಡ್ಯೂರಾಂಟ್ ಮತ್ತು ಅವರ ಪತ್ನಿ ಏರಿಯಲ್ ಡ್ಯೂರಾಂಟ್ ಅವರ ಮಾಹಿತಿ ಸಂಗ್ರಹ, ಸಾಧನೆ, ಪ್ರಕಟಣೆಗಳಿಗೆ ಏನೆನ್ನಬೇಕೋ ತಿಳಿಯದು. ಕುವೆಂಪು ಭಾಷಾ ಭಾರತಿಯು ಈ ಸಂಪುಟಗಳನ್ನು ಕನ್ನಡಕ್ಕೆ ಅನುವಾದಿಸಿ ಪ್ರಕಟಿಸುವ ಸಾಹಸವನ್ನು ಮಾಡಿರುವುದು ಅಭಿವಂದನೀಯ.

ಈ ಇತಿಹಾಸಾನುವಾದ ಸರಣಿಗೆ ಮುನ್ನುಡಿ ಬರೆದು ಮಾರ್ಗದರ್ಶನ ನೀಡಿದವರು ಎಲ್ಲೆಸ್ಸೆಸ್.

“ವಿಲ್ ಡ್ಯೂರಾಂಟ್ ಮೂಲತಃ ತತ್ತ್ವಶಾಸ್ತ್ರದ ಪ್ರಾಧ್ಯಾಪಕರು. ಈ ಬೃಹತ್ ಇತಿಹಾಸ ಗ್ರಂಥಗಳನ್ನು ಓದುವುದೇ ಒಂದು ವಿಶೇಷ ಅನುಭವ, ಒಂದು ಶಿಕ್ಷಣ. ವಿಲ್ ಡ್ಯೂರಾಂಟ್ ತತ್ತ್ವಶಾಸ್ತ್ರದ ತಜ್ಞರಾದುದರಿಂದ, ಸಾಮಾನ್ಯವಾಗಿ ಇತಿಹಾಸವನ್ನು ನಿರೂಪಿಸುವಂತೆ ಅವರು ನಿರೂಪಣೆ ಮಾಡುವುದಿಲ್ಲ, ನಿರೂಪಣೆಯಲ್ಲಿ ಚಿಂತನೆಯನ್ನು ಹೆಣೆಯುತ್ತಾರೆ. ಈ ಕೃತಿಯು ಮಾಹಿತಿಯ ಅದ್ಭುತ ಗಣಿ. ಜಗತ್ತಿನ ಬೇರೆ ಬೇರೆ ಭಾಗಗಳಲ್ಲಿ ನಾಗರಿಕತೆ ನಡೆದು ಬಂದ ದಾರಿಯನ್ನು ಗುರುತಿಸುವ ಮತ್ತು ವಿಶ್ಲೇಷಿಸುವ ಈ ಬೃಹತ್ ಕೃತಿಯಲ್ಲಿ, ಅವರು ನಮ್ಮ ಮುಂದಿಡುವ ಹಿಮಾಲಯ-ಸದೃಶ ಮಾಹಿತಿಯನ್ನು ಸಂಗ್ರಹಿಸಿದ್ದು ಹೇಗೆ, ಅದಷ್ಟನ್ನೂ ಅಧ್ಯಯನ ಮಾಡಿ ಒಂದು ಸ್ವರೂಪ ನೀಡಿದ್ದು ಹೇಗೆ, ಎಂದು ಬೆರಗಾಗುತ್ತೇವೆ. ಅವರು ಹಲವು ಮಂದಿ ಸಹಾಯಕರನ್ನು ಜೊತೆಗಿಟ್ಟುಕೊಂಡಿದ್ದರು, ಎಂದೇ ಭಾವಿಸೋಣ. ಆದರೆ, ಕೃತಿಯ ಕರ್ತೃತ್ವದ ಹೊಣೆಯನ್ನು ಹೊತ್ತ ವಿಲ್ ಡ್ಯೂರಾಂಟ್ ಅದಷ್ಟನ್ನೂ ಪರಿಶೀಲಿಸಿ, ವರ್ಗೀಕರಿಸಿ, ತಮ್ಮ ಯೋಜನೆಗೆ ಅನುಗುಣವಾಗಿ ವ್ಯವಸ್ಥೆ ಮಾಡಿ ನಿರೂಪಿಸಬೇಕಾಯಿತು. ಇಲ್ಲಿರುವುದು ಸೊಗಸಾಗಿ ವರ್ಗೀಕೃತವಾದ ಮಾಹಿತಿಯಷ್ಟೇ ಅಲ್ಲ. ಆ ಮಾಹಿತಿಯ ವ್ಯಾಖ್ಯಾನ, ಅದರಿಂದ ಕಲಿಯಬಹುದಾದ ಪಾಠ, ಇವೂ ಇಲ್ಲಿವೆ. ಈ ಮಹಾಪ್ರತಿಭೆಯು ಸಿದ್ಧಪಡಿಸಿ ತನ್ನದೇ ರೀತಿಯಲ್ಲಿ ನಮ್ಮ ಮುಂದಿಟ್ಟ ಸಾಮಗ್ರಿಯನ್ನು ಗ್ರಹಿಸಿ ನಮ್ಮದನ್ನಾಗಿ ಮಾಡಿಕೊಳ್ಳುವುದೇ ನಮಗೊಂದು ಸವಾಲು”.

ಇದು ಅದ್ಭುತವಾದ, ವಿಶಿಷ್ಟವಾದ ಅವರ ಭಾಷೆ, ಅವರ ಸ್ಮರಣೀಯ ಮುನ್ನುಡಿ. ಅವರ ಬರೆಹಗಳನ್ನು ಓದುವಾಗ ಆಪ್ತ ಶೈಲಿಯಲ್ಲಿ ಅವರೇ ನಿರೂಪಿಸಿದಂತಾಗುತ್ತದೆ, ಕಿವಿಯಲ್ಲಿ ಅವರದ್ದೇ ಧ್ವನಿಯ ಅನುರಣನ.

ಸ್ವತಃ ವಿಮರ್ಶಕರೂ, ವಿದ್ವಾಂಸರೂ ಆದ ಎಲ್ಲೆಸ್ಸೆಸ್ ಬರಿಯ ಹೊಗಳಿಕೆಗೆ ತಮ್ಮ ಮುನ್ನುಡಿಯನ್ನು ಮೀಸಲಾಗಿರಿಸಿಲ್ಲ. ಸರಣಿಯ ಮಿತಿಯನ್ನೂ ಹೇಳುತ್ತಾರೆ. “ವಿಲ್ ಡ್ಯೂರಾಂಟ್ ಅವರ ಇತಿಹಾಸ ನಿರೂಪಣೆ ಪರಿಪೂರ್ಣ ಎಂದು ಹೇಳುವಂತಿಲ್ಲ. ಅವರು ಈ ವೃತ್ತಾಂತಗಳನ್ನು ಬರೆದದ್ದು ಏಳೆಂಟು ದಶಕಗಳ ಹಿಂದೆ. ಅನಂತರದ ಸಂಶೋಧನೆಯು ನಮ್ಮ ಅಂದಿನ ಎಲ್ಲೆಗಳನ್ನು ವಿಸ್ತರಿಸಿದೆ, ಹಲವು ನಿರ್ಣಯಗಳನ್ನು ಮಾರ್ಪಡಿಸಿದೆ. ಅಲ್ಲದೆ, ಹಲವು ಯುಗಗಳನ್ನು ಹಲವು ದೇಶಗಳನ್ನು ಕುರಿತು ಬರೆಯುವಾಗ, ನಿರೂಪಣಕಾರನೇ ಎಲ್ಲ ಮಾಹಿತಿಯನ್ನು ಸಂಗ್ರಹಿಸುವುದು ಸಾಧ್ಯವಿಲ್ಲ. ಇತರ ಆಕರಗಳನ್ನು ನೆಚ್ಚಬೇಕಾಗುತ್ತದೆ. ಆ ಆಕರಗಳಿಂದಲೇ ಅವನಿಗೆ ತಪ್ಪು ಮಾಹಿತಿ ಅಥವಾ ವ್ಯಾಖ್ಯಾನ ಲಭ್ಯವಾಗಿರಬಹುದು ಅಥವಾ ಅವನು ಮಾಹಿತಿಯನ್ನು ಗ್ರಹಿಸುವಾಗಲೇ ತಪ್ಪಾಗಿರಬಹುದು. ವಿಲ್ ಡ್ಯೂರಾಂಟ್ ಪ್ರಸ್ತುತಪಡಿಸಿರುವ ಇತಿಹಾಸದಲ್ಲಿ, ಭಾರತದ ಭಾಗವನ್ನು ಓದುವಾಗಲೇ ನಮಗೆ ಹಲವು ತಪ್ಪುಗಳು, ತಪ್ಪು ಮಾಹಿತಿಗಳು ಕಾಣಬಹುದು….”.

ಮೆಚ್ಚಿದಂತೆಯೇ, ದೋಷಗಳನ್ನೂ ಬಿಚ್ಚಿಡುತ್ತಾರೆ ಎಲ್ಲೆಸ್ಸೆಸ್. ಅವರು ಬಹಳ ದೊಡ್ಡ ಮಾರ್ಗದರ್ಶಕರು. ಅವರ ಬರೆಹಗಳು ಕೈದೀವಟಿಗೆಗಳಂತೆ. ಎಲ್ಲೆಸ್ಸೆಸ್ ಎಂದರೆ ಶತಮಾನದ ಆಚೆಗೂ ವಿಸ್ತರಿಸಿದ ಮಹಾನ್ ಪ್ರತಿಭೆ.

ಕನ್ನಡದಿಂದ ಇಂಗ್ಲಿಷ್ ಭಾಷೆಗೆ ಧಂಡಿಯಾಗಿ ಆಗಿರುವ ಅನುವಾದಗಳ ಗುಣಮಟ್ಟವನ್ನು ನೋಡಿದಾಗ, ಬಹಳ ಜನ ಪ್ರತಿಭಾಶಾಲಿಗಳೂ ಸೋತುಹೋಗಿರುವುದು ಸ್ಪಷ್ಟವಾಗಿ ಕಾಣುತ್ತದೆ. ಅನುವಾದ, ಭಾಷಾಂತರಗಳೇ ಹಾಗೆ. ಅದು ಪುನರ್‌ಸೃಷ್ಟಿ, ಸ್ವತಃ ಬರೆಯುವುದಕ್ಕಿಂತ ಬಹಳ ಬಹಳ ಕಷ್ಟ. ಈ ಪರಿಪ್ರೇಕ್ಷ್ಯದಲ್ಲಿ, ಎಲ್ಲೆಸ್ಸೆಸ್ ಅವರ ನಿಜವಾದ ಶಕ್ತಿ ತಿಳಿಯುತ್ತದೆ. ಮೂಲದ ಸೊಗಡು, ಸೊಬಗುಗಳನ್ನು ಮುಖ್ಯವಾಗಿ ಕನ್ನಡದ ಬನಿಯನ್ನು – ಕನ್ನಡ ದೇಸಿತನವನ್ನು ಬೇರೆಯೇ ಲೋಕದ, ಬೇರೆಯೇ ಸಂಸ್ಕೃತಿಯ ಭಾಷೆಯಾದ ಇಂಗ್ಲಿಷಿಗೆ ತುಂಬ ಚೆನ್ನಾಗಿ ಅನುವಾದ ಮಾಡಿರುವುದು ಎಲ್ಲೆಸ್ಸೆಸ್ ಅವರ ಸಾಧನೆ ಮತ್ತು ಕೊಡುಗೆ.

LS Sheshagiri Rao

ಇಂಗ್ಲಿಷ್ ಭಾಷೆಯ ಎಲ್ಲೆಸ್ಸೆಸ್ ಅವರ ಮಹಾಭಾರತವೂ ಸಹ ಭಾರತೀಯ ಸಾಹಿತ್ಯದ ಒಂದು ಮೈಲಿಗಲ್ಲು. ಇಂಗ್ಲಿಷ್ ಭಾಷೆಯ, ಇಂಗ್ಲಿಷ್ ಮಾಧ್ಯಮದ ಪ್ರಭಾವ – ಶಕ್ತಿಗಳು ಮಿತಿಮೀರಿಹೋಗಿರುವ ಪ್ರಸ್ತುತ ಕಾಲಘಟ್ಟದಲ್ಲಿ ವಾಲ್ಮೀಕಿ, ವ್ಯಾಸರಿಗೆ ನಿಷ್ಠರಾಗಿ ರಚಿಸಿದಂತಹ ಇಂಗ್ಲಿಷ್ ಭಾಷೆಯ ರಾಮಾಯಣ – ಮಹಾಭಾರತದ ಆವೃತ್ತಿಗಳಿಗೆ ಅಪಾರ ಬೇಡಿಕೆಯಿದೆ. ಕಳ್ಳರು, ಸುಳ್ಳರು ತುಂಬಿರುವ ಸಾಹಿತ್ಯಲೋಕದಲ್ಲಿ ಅಬದ್ಧವನ್ನೇ ಬರೆದು ಹಣ ಮಾಡುತ್ತಿರುವ ಇಂಗ್ಲಿಷ್ ಲೇಖಕರಿದ್ದಾರೆ. ಈ ಪರಿಪ್ರೇಕ್ಷ್ಯದಲ್ಲಿ, ಎಲ್ಲೆಸ್ಸೆಸ್ ಅವರ ಇಂಗ್ಲಿಷ್ ಕೃತಿಗಳು, ಇಂಗ್ಲಿಷ್ ಅನುವಾದಗಳು ದೊಡ್ಡ ಸಂಖ್ಯೆಯ ಓದುಗರಿಗೆ ತಲುಪಬೇಕಿರುವುದು ಯುಗಮಾನದ ನಿರೀಕ್ಷೆಯಾಗಿದೆ.

ತಾವು ಸ್ವಯಂಭೂ ಎಂಬಂತೆ ಪೋಜು ಕೊಡುವ ಅರೆಬೆಂದವರ ಸಂತೆಯಲ್ಲಿ, ತಮ್ಮ ಪ್ರತಿಭೆ – ವಿದ್ವತ್ತುಗಳ ಆರೈಕೆ, ಪೋಷಣೆಗಳಿಗೆ ಕಾರಣರಾದ ಹಿರಿಯರನ್ನು, ಅಧ್ಯಾಪಕರನ್ನು, ಗುರುಗಳನ್ನು ಸ್ಮರಿಸುವ ಎಲ್ಲೆಸ್ಸೆಸ್ ದೊಡ್ಡವರಾಗುತ್ತಾರೆ, ಶ್ರೇಷ್ಠತೆಯನ್ನು ಮೆರೆಯುತ್ತಾರೆ. ಈ ಬಗೆಯ ಕೃತಿಗಳೆಂದರೆ ಅಕ್ಷರಶಃ ಚಿನ್ನದ ಗಣಿಗಳು. ಈ ಬಗೆಯ ನಿಜಜೀವನದ ಕಥೆಗಳು, ಜೀವನಚಿತ್ರಗಳು ದೇವದುರ್ಲಭ. ಎಲ್ಲೆಸ್ಸೆಸ್ ಅವರಿಗೆ ನಾವು ಅದೆಷ್ಟು ಕೃತಜ್ಞರಾಗಿದ್ದರೂ ಸಾಲದು. ಸ್ವತಃ ದೊಡ್ಡವರಾದ ಅವರು ಉಳಿದ ದೊಡ್ಡವರ ವಿಶಿಷ್ಟ ಪರಿಚಯವನ್ನೂ ಕನ್ನಡದ ಓದುಗರಿಗೆ ನೀಡಿಹೋಗಿದ್ದಾರೆ. ಹಾಗೆ ಮಾಡಿ, ಎಲ್ಲೆಸ್ಸೆಸ್ ಅವರು ಇನ್ನಷ್ಟು ದೊಡ್ಡವರೂ ಅದರು. ಇದು ಕನ್ನಡ ಭಾಷೆಯ, ಕರ್ನಾಟಕದ, ಅಪರೂಪದ ನಮ್ಮ ಸಾಹಿತ್ಯ ಪರಂಪರೆಯ – ಅಪರೂಪದ ನಮ್ಮ ವಿದ್ವಲ್ಲೋಕದ ದೀವಟಿಗೆಗಳ ಇತಿಹಾಸವೂ ಹೌದು. ಕನ್ನಡಿಗನು ಋಣಿಯೂ ಹೌದು.

ನಾನು ಮತ್ತೆ ಮತ್ತೆ ಓದಿ ಬೆಳಕು ಕಂಡುಕೊಂಡ ಕೃತಿ, ಎಲ್ಲೆಸ್ಸೆಸ್ ಅವರ “ಸಿರಿಸಂಪದ”. ಅದನ್ನು ಓದಲು ನನ್ನ ಎಷ್ಟೋ ಗೆಳೆಯರಿಗೆ ನಾನು ವರಾತ ಹಚ್ಚಿದ್ದಿದೆ. “ಮೊದಲ ಮಾತು” ಗಳಲ್ಲಿ ಅವರು ಬರೆದಿರುವ “ಬದುಕು ನನಗೆ ಕರುಣಿಸಿದ ಭಾಗ್ಯಗಳಲ್ಲಿ ಒಂದು, ಹಿರಿಯ ಜೀವಗಳ ಸನ್ನಿಧಿ, ಒಡನಾಟ. ಅಂತಹ ಜೀವಗಳನ್ನು ಕೃತಜ್ಞತೆಯಿಂದ ಸ್ಮರಿಸಿಕೊಂಡ ನಮನ ಈ ’ಸಿರಿಸಂಪದ’. ಇಲ್ಲಿ ನಾನು ಸ್ಮರಿಸಿರುವ ಪ್ರಾತಃಸ್ಮರಣೀಯರನ್ನೆಲ್ಲ ಸಮೀಪದಿಂದ ಕಾಣುವ ಭಾಗ್ಯ ನನ್ನದು. ನನ್ನ ಹಿಂದಿನ ಪೀಳಿಗೆಗಳಿಗೆ ಸೇರಿದ ಅವರೆಲ್ಲ ನನ್ನ ಮೇಲೆ ನೇರವಾಗಿ ಪ್ರಭಾವ ಬೀರಿದರು. ಈ ಭಾಗ್ಯವನ್ನು ಓದುಗರೊಡನೆ ಹಂಚಿಕೊಳ್ಳುತ್ತಿದ್ದೇನೆ. ಎಂದಿಗೂ ಉಳಿಯಬೇಕಾದ ನೆನಪು ಇವರದ್ದು. ತಮ್ಮ ಕಾಲದಲ್ಲಿ ಬೆಳಕಾಗಿದ್ದ ಈ ದೀಪಗಳ (ಡಿವಿಜಿ, ಮಾಸ್ತಿ, ಎಂ.ಆರ್.ಶ್ರೀನಿವಾಸಮೂರ್ತಿ, ನಾ.ಕಸ್ತೂರಿ, ತಿ.ತಾ.ಶರ್ಮ, ಎಸ್.ವಿ.ರಂಗಣ್ಣ, ವಿ.ಸೀತಾರಾಮಯ್ಯ, ಕೆ.ಅನಂತರಾಮಯ್ಯ, ಎ.ಎನ್.ಮೂರ್ತಿ ರಾವ್, ಶಿವರಾಮ ಕಾರಂತ, ತೀ.ನಂ.ಶ್ರೀ., ಅ.ನ.ಕೃ., ವಿ.ಕೆ.ಗೋಕಾಕ್, ಬಿ.ಜಿ.ಎಲ್.ಸ್ವಾಮಿ, ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ, ಆರ್.ಗುರುರಾಜ ರಾವ್) ಪ್ರಭೆ ಬಹುಕಾಲ ಬೆಳಗುತ್ತಿರಲಿ”.

ಇದನ್ನೂ ಓದಿ: ನನ್ನ ದೇಶ ನನ್ನ ದನಿ ಅಂಕಣ: ಭಾರತ- ದ್ವೇಷಿ ಹಿಟ್ಲರನ ಬಗೆಗೂ ಘನಘೋರ ಸುಳ್ಳುಗಳು

ಈ ಕೃತಿ ಕನ್ನಡದ ಇತಿಹಾಸವೂ ಹೌದು, ಇಪ್ಪತ್ತನೆಯ ಶತಮಾನದ ಕರ್ನಾಟಕದ ಇತಿಹಾಸಪುರುಷರ ಆಖ್ಯಾನವೂ ಹೌದು.

ರಾಷ್ಟ್ರೋತ್ಥಾನ ಪರಿಷತ್ತಿಗೆ ದಾಖಲೆಯ ಸಂಖ್ಯೆಯ ಪುಸ್ತಕಗಳನ್ನು ಸಂಪಾದಿಸಿಕೊಟ್ಟು, ಪುಸ್ತಕ ಪ್ರಕಟಣೆಯಲ್ಲಿ ದಾಖಲೆಯ ಇತಿಹಾಸವನ್ನೇ ಸೃಷ್ಟಿಸಿದ “ಭಾರತ – ಭಾರತಿ” ಸರಣಿಯನ್ನು ಸಂಪಾದಿಸಿಕೊಟ್ಟರೂ, ಎಲ್ಲೆಸ್ಸೆಸ್ ಅವರೇನೂ ಸಂಘ ಪರಿವಾರದವರಾಗಿರಲಿಲ್ಲ. ಆರೆಸ್ಸೆಸ್ ಚಿಂತನೆಗೆ ಮನಸೋತವರೂ ಆಗಿರಲಿಲ್ಲ. ಈ ಕಾರಣದಿಂದ ಕನ್ನಡ ಸಾಹಿತ್ಯಲೋಕದ ಕಮ್ಯೂನಿಸ್ಟ್ ಮಾಫಿಯಾದವರ ಟೀಕೆ – ಕಟಕಿಗಳಿಗೆ ಗುರಿಯಾದರೂ, ಅವರು ತಲೆಯನ್ನು ಕೆಡಿಸಿಕೊಳ್ಳಲೂ ಇಲ್ಲ.

ಪ್ರೊ|| ಎಲ್.ಎಸ್.ಶೇಷಗಿರಿರಾವ್ ಅವರ ಕನ್ನಡ ಮತ್ತು ಇಂಗ್ಲಿಷ್ ಭಾಷಣಗಳನ್ನು ಕೇಳಿದಾಗ, ದೇವರೇ, ನನಗೆ ಇಂತಹ ಗುರುಗಳನ್ನು ಏಕೆ ದಯಪಾಲಿಸಲಿಲ್ಲ, ಎಂದೆನಿಸಿದ್ದುಂಟು. ಅವರ ಇಂಗ್ಲಿಷ್ ಸಹ ನನಗೆ ಕನ್ನಡದಂತೆಯೇ ಆಪ್ಯಾಯಮಾನವಾಗಿ ಕೇಳಿಸಿದ್ದುಂಟು. ಅದು ಇಂಗ್ಲೆಂಡಿನ ಇಂಗ್ಲಿಷ್ ಆಗಿರಲಿಲ್ಲ, ಇತ್ತೀಚಿನವರು ಆಡುವ ಅಮೆರಿಕನ್ ಇಂಗ್ಲಿಷ್ ಸಹ ಆಗಿರಲಿಲ್ಲ.

ಇದೀಗ ಪ್ರೊ|| ಎಲ್.ಎಸ್.ಶೇಷಗಿರಿರಾವ್ ಅವರ ಶತಮಾನೋತ್ಸವ ವರ್ಷಾರಂಭ. ಅವರ ಸಾಹಿತ್ಯ, ಅವರ ಸಹೃದಯ ವಿಮರ್ಶೆ, ಅವರ ಕೃತಿಗಳು ನಮ್ಮ ಭಾಷಾಲೋಕವನ್ನು ಮತ್ತೊಮ್ಮೆ ಬೆಳಗಲಿ.

ಇದನ್ನೂ ಓದಿ: ನನ್ನ ದೇಶ ನನ್ನ ದನಿ ಅಂಕಣ: ಭಾರತೀಯ ಸೈನ್ಯದ ಸ್ವರೂಪ, ಪ್ರಸ್ತುತಿಗಳಲ್ಲಿ ಬದಲಾವಣೆ ಬೇಕಿದೆ

Continue Reading
Advertisement
Drunk husband assaults wife
ಬೆಂಗಳೂರು17 mins ago

Assault Case :‌ ಹೊಡಿತಾನೆ ಬಡಿತಾನೆ ನನ್ನ ಗಂಡ; ಅನುಮಾನ ಪಿಶಾಚಿ ಕಾಟಕ್ಕೆ ಬೇಸತ್ತಳು ಹೆಂಡತಿ

indian penal code
ದೇಶ20 mins ago

New Laws: ಐಪಿಸಿ ಮೂಲೆಗೆ; ಜುಲೈ 1ರಿಂದಲೇ ಹೊಸ ಕಾನೂನು ಜಾರಿ, ಏನೆಲ್ಲ ಬದಲು?

bankok
ವೈರಲ್ ನ್ಯೂಸ್28 mins ago

Guinness World Records: ಬರೋಬ್ಬರಿ 168 ಅಕ್ಷರಗಳನ್ನೊಳಗೊಂಡ ಈ ನಗರದ ಹೆಸರಿನಲ್ಲಿದೆ ವಿಶ್ವ ದಾಖಲೆ

Amazon Sweets
ವಾಣಿಜ್ಯ37 mins ago

Empower HER Exhibition : ಎಫ್‌ಕೆಸಿಸಿಐ ಆವರಣದಲ್ಲಿ ಮಹಿಳಾ ಉದ್ದಿಮೆದಾರರಿಂದ ಯಶಸ್ವಿ ವಸ್ತು ಪ್ರದರ್ಶನ ಮತ್ತು ಮಾರಾಟ

Actor Manoj Rajput Arrested On Allegations Of Raping
ಸಿನಿಮಾ37 mins ago

Actor Manoj Rajput: ಅತ್ಯಾಚಾರ ಎಸಗಿದ ಆರೋಪದ ಮೇಲೆ ನಟ ಮನೋಜ್ ರಜಪೂತ್ ಬಂಧನ

40 percent commission Court summons CM No defamation if advertised says Siddaramaiah
ರಾಜಕೀಯ52 mins ago

40 percent commission: ಸಿಎಂಗೆ ಕೋರ್ಟ್‌ ಸಮನ್ಸ್;‌ ಜಾಹೀರಾತು ಕೊಟ್ಟರೆ ಮಾನನಷ್ಟ ಆಗಲ್ಲ: ವಕೀಲರು ಉತ್ತರಿಸುತ್ತಾರೆಂದ ಸಿದ್ದರಾಮಯ್ಯ

Shah Rukh Kahan
ಪ್ರಮುಖ ಸುದ್ದಿ60 mins ago

Shah rukh Khan : ಕನ್ನಡದಲ್ಲಿ ಮಾತನಾಡಿ ಅಭಿಮಾನಿಗಳ ಮನಗೆದ್ದ ಶಾರುಖ್​ ಖಾನ್​

PM Narendra Modi is determined to make India a developing country by 2047 says Pralhad Joshi
ರಾಜಕೀಯ2 hours ago

PM Narendra Modi: ಮೋದಿ ಚಿಂತೆ ಮಾಡುವವರಲ್ಲ, ಚಿಂತನೆ ಮಾಡುವ ಪ್ರಧಾನಿ: ಪ್ರಲ್ಹಾದ್‌ ಜೋಶಿ

Idli
ವೈರಲ್ ನ್ಯೂಸ್2 hours ago

Biodiversity: ದಿನಾ ಇಡ್ಲಿ ತಿಂತೀರಾ? ಹಾಗಾದ್ರೆ ಜೀವವೈವಿಧ್ಯ ಹಾನಿಗೆ ನಿಮ್ಮದೇ ಹೆಚ್ಚಿನ ಕೊಡುಗೆ!

Anil John Sequeira youngest judge in Karnataka
ದಕ್ಷಿಣ ಕನ್ನಡ2 hours ago

Anil John Sequeira : ಬಂಟ್ವಾಳ ಯುವಕನ ಅಪರೂಪದ ಸಾಧನೆ; 25ನೇ ವಯಸ್ಸಿಗೆ ನ್ಯಾಯಾಧೀಶರಾಗಿ ಆಯ್ಕೆ

Sharmitha Gowda in bikini
ಕಿರುತೆರೆ5 months ago

Geetha Serial Kannada: ನಿದ್ದೆ ಕದ್ದ ಚೋರಿ! ನಟಿ `ಭಾನುಮತಿ’ ಹಾಟ್‌ ಪೋಟೊಗಳಿಗೆ ಫ್ಯಾನ್ಸ್ ಫುಲ್ ಫಿದಾ

Kannada Serials
ಕಿರುತೆರೆ4 months ago

Kannada Serials TRP: 2ನೇ ಸ್ಥಾನದಲ್ಲಿ 2 ಧಾರಾವಾಹಿಗಳು; ಟಿಆರ್‌ಪಿ ರೇಸ್‌ನಲ್ಲಿಲ್ಲ ಭಾಗ್ಯಲಕ್ಷ್ಮೀ!

Bigg Boss- Saregamapa 20 average TRP
ಕಿರುತೆರೆ4 months ago

Kannada Serials TRP: ಏಳನೇ ಸ್ಥಾನಕ್ಕೆ ʻಅಮೃತಧಾರೆʼ ಕುಸಿತ; ಬಿಗ್‌ ಬಾಸ್‌-ಸರಿಗಮಪ ಟಿಆರ್‌ಪಿ ಎಷ್ಟು?

galipata neetu
ಕಿರುತೆರೆ3 months ago

Kanyadana Serial: ಕಿರುತೆರೆಗೆ ಮತ್ತೆ ಎಂಟ್ರಿ ಕೊಟ್ಟ ʻಗಾಳಿಪಟʼ ಖ್ಯಾತಿಯ ʻನೀತುʼ!

Kannada Serials
ಕಿರುತೆರೆ5 months ago

Kannada Serials TRP: ನಾಲ್ಕನೇ ಸ್ಥಾನಕ್ಕೆ ಕುಸಿತ ಕಂಡ ʻಸೀತಾ ರಾಮʼ; ಟಿಆರ್‌ಪಿ ರೇಸ್‌ಗೆ ʻಭಾಗ್ಯಲಕ್ಷ್ಮಿʼ ಬ್ಯಾಕ್‌!

Kannada Serials
ಕಿರುತೆರೆ5 months ago

Kannada Serials TRP: ಟಿಆರ್‌ಪಿಯಲ್ಲಿ ʻಭಾಗ್ಯಲಕ್ಷ್ಮೀʼ ಹವಾ; ʻಪುಟ್ಟಕ್ಕನ ಮಕ್ಕಳುʼ ಧಾರಾವಾಹಿಗೆ ಸಂಕಷ್ಟ!

Bigg Boss' dominates TRP; Sita Rama fell to the sixth position
ಕಿರುತೆರೆ4 months ago

Kannada Serials TRP: ಟಿಆರ್‌ಪಿಯಲ್ಲಿ ʻಬಿಗ್ ಬಾಸ್ʼದೇ ಮೇಲುಗೈ; 6ನೇ ಸ್ಥಾನಕ್ಕೆ ಕುಸಿದ ʻಸೀತಾ ರಾಮʼ

geetha serial Dhanush gowda engagement
ಕಿರುತೆರೆ2 months ago

Dhanush Gowda: ಗೀತಾ ಧಾರಾವಾಹಿ ನಟನ ನಿಶ್ಚಿತಾರ್ಥ; ಭವ್ಯಾಳ ಕಮೆಂಟ್‌ ಬಾಕ್ಸ್‌ ಆಫ್‌!

varun
ಕಿರುತೆರೆ3 months ago

Brindavana Serial: ʼಬೃಂದಾವನʼ ಧಾರಾವಾಹಿಯಲ್ಲಿ ದೊಡ್ಡ ಟ್ವಿಸ್ಟ್‌; ಪ್ರಮುಖ ಪಾತ್ರಧಾರಿಯೇ ಬದಲು

Kannada Serials
ಕಿರುತೆರೆ5 months ago

Kannada Serials TRP: ಟಿಆರ್‌ಪಿಯಲ್ಲಿ ಏರಿಕೆ ಕಂಡ ʻಅಮೃತಧಾರೆʼ; ʻಗಟ್ಟಿಮೇಳʼಕ್ಕೆ ನಾಲ್ಕನೇ ಸ್ಥಾನ!

Varthur Santhosh
ಮಂಡ್ಯ3 hours ago

Varthur Santhosh: ಮತ್ತೆ ಹಳ್ಳಿಕಾರ್‌ ಒಡೆಯ ವಿವಾದ; ವರ್ತೂರ್‌ ಸಂತೋಷ್ ವಿರುದ್ಧ ಕಾನೂನು ಸಮರ

read your daily horoscope predictions for february 24 2024
ಭವಿಷ್ಯ11 hours ago

Dina Bhavishya : ಹೂಡಿಕೆ ವ್ಯವಹಾರದಲ್ಲಿ ಈ ರಾಶಿಯವರಿಗೆ ಸಿಗಲಿದೆ ಸಂಗಾತಿ ಸಾಥ್‌

Staff nurses attempt to convert at health centre in Ratagal village
ಕಲಬುರಗಿ23 hours ago

Forced Conversion : ಆಪರೇಶನ್‌ ಮತಾಂತರ; ನರ್ಸ್‌ಗಳಿಂದ ಹಿಂದೂಗಳ ಬ್ರೈನ್‌ ವಾಶ್‌

Fire breaks out in auto shed Burnt autos
ಬೆಂಗಳೂರು1 day ago

Fire Accident : ಬೆಂಗಳೂರಿನಲ್ಲಿ ತಡರಾತ್ರಿ ಭಾರೀ ಅಗ್ನಿ ಅವಘಡ! 40-50 ಆಟೋಗಳು ಬೆಂಕಿಗಾಹುತಿ

He sent a private photo video of his girlfriend
ಬೆಳಗಾವಿ1 day ago

Belgavi News : ನವ ವಿವಾಹಿತೆಯ ಖಾಸಗಿ ವಿಡಿಯೊ ಹರಿಬಿಟ್ಟು ಹಳೇ ಪ್ರೇಮಿ ಕಿತಾಪತಿ!

read your daily horoscope predictions for february 23 2024
ಭವಿಷ್ಯ1 day ago

Dina Bhavishya : ಈ ರಾಶಿಯವರಿಗೆ ಆಫೀಸ್‌ನಲ್ಲಿ ಬಾಸ್‌ನ ಕಿರಿಕಿರಿಯಿಂದ ದಿನಪೂರ್ತಿ ಟೆನ್ಷನ್‌!

Catton Candy contain cancer Will there be a ban in Karnataka
ಬೆಂಗಳೂರು2 days ago

cotton candy Ban : ಕರ್ನಾಟಕದಲ್ಲಿ ಬ್ಯಾನ್‌ ಆಗುತ್ತಾ ಬಾಂಬೆ ಮಿಠಾಯಿ; ಕ್ಯಾನ್ಸರ್​​ ಕಾರಕ ವಿಷ ಪತ್ತೆ!

Swarnavalli Mutt appoints successor ceremony
ಕರ್ನಾಟಕ2 days ago

Swarnavalli Mutt: ಸ್ವರ್ಣವಲ್ಲೀ ಶ್ರೀಗಳ ಶಿಷ್ಯ ಸ್ವೀಕಾರ ಸಂಪನ್ನ; ಇಲ್ಲಿದೆ ಲೈವ್‌ ವಿಡಿಯೊ

read your daily horoscope predictions for february 21 2024
ಭವಿಷ್ಯ3 days ago

Dina Bhavishya : ಈ ರಾಶಿಯವರಿಗೆ ಸಂಗಾತಿಯ ವರ್ತನೆಯು ಕೋಪ, ಮುಜುಗರವನ್ನುಂಟು ಮಾಡುತ್ತೆ!

read your daily horoscope predictions for february 20 2024
ಭವಿಷ್ಯ4 days ago

Dina Bhavishya : ಈ ದಿನ ಆತುರದಲ್ಲಿ ಈ ರಾಶಿಯವರು ಯಾವ ತೀರ್ಮಾನವನ್ನು ಮಾಡ್ಬೇಡಿ!

ಟ್ರೆಂಡಿಂಗ್‌