ಬೆಂಗಳೂರು: ಒಟ್ಟು 402 ಪೊಲೀಸ್ ಸಬ್ ಇನ್ಸ್‌ಪೆಕ್ಟರ್ ಹುದ್ದೆಗಳಿಗೆ ಇದೇ ತಿಂಗಳ 22ರಂದು ಲಿಖಿತ ಪರೀಕ್ಷೆ (PSI Exam) ನಡೆಯಲಿದ್ದು ಇದಕ್ಕೆ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ಸಕಲ ಸಿದ್ಧತೆ ನಡೆಸಿದೆ. ಒಟ್ಟು 66,000 ಮಂದಿ ಅರ್ಜಿ ಸಲ್ಲಿಸಿದ್ದು, ಪರೀಕ್ಷೆಗೆ ಒಂದು ವಾರ ಮೊದಲು ಪ್ರವೇಶ ಪತ್ರ ಬಿಡುಗಡೆ ಮಾಡಲಾಗುವುದು ಎಂದು ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಎಚ್.ಪ್ರಸನ್ನ ಸೋಮವಾರ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಇದಲ್ಲದೆ ಗ್ರಾಮ ಆಡಳಿತಾಧಿಕಾರಿ ಹುದ್ದೆಗೆ ಕನ್ನಡ ಕಡ್ಡಾಯ ಪರೀಕ್ಷೆ ಸೆ.29ರಂದು ನಡೆಯಲಿದೆ. ಈ ಪರೀಕ್ಷೆಯಲ್ಲಿ ಉತ್ತೀರ್ಣರಾದವರು ಮಾತ್ರ ಅಕ್ಟೋಬರ್ 27ಕ್ಕೆ ನಡೆಯುವ ಪ್ರಮುಖ ಪರೀಕ್ಷೆಗೆ ಅರ್ಹತೆ ಪಡೆಯಲಿದ್ದಾರೆ ಎಂದು ಅವರು ವಿವರಿಸಿದ್ದಾರೆ. ಒಂದು ಸಾವಿರ ಗ್ರಾಮ ಆಡಳಿತಾಧಿಕಾರಿ ಹುದ್ದೆಗಳಿಗೆ 5.7 ಲಕ್ಷ ಮಂದಿ ಅರ್ಜಿ ಸಲ್ಲಿಸಿದ್ದು ಈ ಪರೀಕ್ಷೆಗೂ ತಯಾರಿ‌ ನಡೆಸಲಾಗಿದೆ‌ ಎಂದು ಅವರು ವಿವರಿಸಿದರು.

ಬಳ್ಳಾರಿ: ಪರಪ್ಪನ ಅಗ್ರಹಾರ ಜೈಲಿನಿಂದ ಸೆಂಟ್ರಲ್ ಜೈಲಿಗೆ ಎತ್ತಂಗಡಿ ಆಗಿರೋ ಕೊಲೆ ಆರೋಪಿ ದರ್ಶನ್ (Actor Darshan) ಐದು ದಿನ ಕಳೆದಿದ್ದಾರೆ. ಜೈಲಿನಲ್ಲಿ ಕಳೆದ ಪ್ರತಿ ದಿನವನ್ನು ವರ್ಷದ ರೀತಿ ಕಳೀತಿದ್ದಾರೆ‌. ಅತ್ತ ಸ್ನೇಹಿತೆ ಪವಿತ್ರಾಗೌಡ ಜಾಮೀನು ಅರ್ಜಿ ವಜಾ ಆಗಿದ್ದರಿಂದ ಇತ್ತ ದರ್ಶನ್ ಜೈಲಿನಲ್ಲಿ ಟೆನ್ಶನ್‌ಗೆ ಒಳಗಾಗಿದ್ದಾರೆ.

ಕೊಲೆ ಆರೋಪಿ ನಟ ದರ್ಶನ್ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಸ್ವರ್ಗದ ಬಾಗಿಲನ್ನೇ ಧರೆಗೆ ಇಳಿಸಿದ್ದರು. ಮೋಜು – ಮಗಿಸಿ ಅಂತ ರಾಜಾರೋಷವಾಗಿ ಜೀವನ ಕಳೆದ್ದರು. ಆದರೆ ಕಳೆದ ನಾಲ್ಕು ರಾತ್ರಿ, ಐದು ಹಗಲು ಕಳೀದಿರೋ ದರ್ಶನ್ ಒಂದು ದಿನವನ್ನ ಒಂದು ವರ್ಷದ ರೀತಿ ಕಳೆದಿದ್ದಾರೆ. ಪ್ರತಿ ಕ್ಷಣ, ಪ್ರತಿ ದಿನ ಟೆನ್ಶನ್‌ನಲ್ಲೇ ಕಾಲ ಇದ್ದಾರೆ. ಅದ್ರಲ್ಲೂ ಮುಖ್ಯವಾಗಿ ಜೈಲಿಗೆ ಬಂದ ದಿನವೇ ಕೈಗೆ ಬಟ್ಟೆ ಧರಿಸಿಯೇ ಬಂದಿದ್ದರು. ಸೆಂಟ್ರಲ್‌ ಜೈಲ್ ನೂರಾರು ವರ್ಷದ ಹಳೆಯ ಜೈಲ್‌ ಆಗಿರುವುದರಿಂದ ಇಂಡಿಯನ್ ಶೌಚಾಲಯ ವ್ಯವಸ್ಥೆ ಇದ್ದು ನಟ ದರ್ಶನ್‌ಗೆ ಸ್ಪೈನಲ್ ಕಾರ್ಡ್‌ ಸಮಸ್ಯೆ ಇರೋದ್ರಿಂದ ಸರ್ಜಿಕಲ್ ಚೇರ್‌ಗೆ ಕುಟುಂಬಸ್ಥರ ಮೂಕಲ ಮನವಿ ಮಾಡಿದರು. ಮೆಲು ನೋಟಕ್ಕೆ ದರ್ಶನ್‌ಗೆ ಬೆನ್ನು ನೋವು ಇರೋದು ಬೆಳಕಿಗೆ ಬಂದಿದೆ. ಡಿಐಜಿ ಅನುಮತಿ ಮೇರೆಗೆ ಜಿಲ್ಲಾ ಆಸ್ಪತ್ರೆಯ ಸರ್ಕಾರಿ ವೈದ್ಯರು, ಆರ್ಥೋಫೆಡಿಕ್ ಪರಿಶೀಲನೆ ಬಳಿಕ ದರ್ಶನ್‌ಗೆ ಸರ್ಜಿಕಲ್ ಚೇರ್ ನೀಡೋದಕ್ಕೆ ಬಹುತೇಕ ಜೈಲಾಧಿಕಾರಿಗಳು ಒಪ್ಪಿದ್ದು ಇಂದು ಸಂಜೆಯೇ ಸರ್ಜಿಕಲ್ ಚೇರ್ ನೀಡಲಾಗ್ತದೆ ಎಂದು ಹೇಳಿದ್ದಾರೆ.

ದರ್ಶನ್ ಸಾಮಾನ್ಯ ಖೈದಿ ಆಗಿದ್ದರೆ ಇಷ್ಟೊಂದು ತಲೆಕೆಡಸಿಕೊಳ್ಳಬೇಕಾದ ಅವಶ್ಯಕತೆ ಇರಲಿಲ್ಲ. ಕರಿಯನ ವಿರುದ್ಧ ಕೇಳಿ ಬಂದಿರೋ ಕೊಲೆ ಆರೋಪ ಹೈಪ್ರೋಫೈಲ್ ಕೇಸ್ ಆಗಿದ್ದರಿಂದ ದರ್ಶನ್ ಮೇಲೆ ಇಂಚಿಂಚು ನಿಗಾ ವಹಿಸಲಾಗಿದೆ. ಅದರಲ್ಲೂ ಪರಪ್ಪನ ಅಗ್ರಹಾರ ಜೈಲಿನಲ್ಲಾದ ಲೋಪಗಳು ಸೆಂಟ್ರಲ್ ಜೈಲಿನಲ್ಲಿ ಆಗಬಾರದು ಅಂತ 10/10 ಅಡಿಯ ಹೈಸೆಕ್ಯೂರಿಟಿ ಕೋಣೆಯಲ್ಲಿ ದರ್ಶನ್‌ನನ್ನು ಇರಿಸಲಾಗಿದೆ. 15ನೇ ಸೆಲ್‌ನಲ್ಲಿರೋ ದರ್ಶನ್ ಅಕ್ಕ-ಪಕ್ಕದ ಸೆಲ್‌ನಲ್ಲಿ ಯಾವೊಬ್ಬ ಖೈದಿಯನ್ನ ಇರಿಸಲಾಗಿಲ್ಲ. ಅದ್ರಲ್ಲೂ ಒಬ್ಬ ಎಎಸ್ಐ, ಇಬ್ಬರು ಸಿಬ್ಬಂದಿ, ಮೂರು ಸಿಸಿ ಕ್ಯಾಮರಾ, ಕುಟುಂಬಸ್ಥರು ಬಂದು ಹೋಗುವ ಚಲನವಲನ ದೃಶ್ಯಾವಳಿಗಳನ್ನ ಪ್ರತ್ಯೇಕವಾಗಿಯೇ ಸಂಗ್ರಹಿಸಿಡಲಾಗುತ್ತಿದೆ. ದೃಶ್ಯಾವಳಿ ಸಂಗ್ರಹಣೆಗೆ ಅಂತಲೇ ಹೊಸ ಹಾರ್ಡ್ ಸಿಸ್ಕ್ ಖರೀದಿಸಲಾಗಿದೆ‌.

ಪರಪ್ಪನ ಅಗ್ರಹಾರ ಜೈಲಿನಲ್ಲಾದಲ್ಲಾದ ಲೋಪ ಬಳ್ಳಾರಿ ಜೈಲಲ್ಲಿ ನಡೆಬಾರದು ಎಂದು ಬಹಳ ಜಾಗೃತಿ ವಹಿಸುತ್ತಾ ಇದ್ದಾರೆ. ಇದರ ಮಧ್ಯೆ ಜೈಲು ಊಟ ಕೊಡಲು ಹೋದ ಸಿಬ್ಬಂದಿಗರ ಇತರೇ ಖೈದಿಗಳಿಗು ದರ್ಶನ್ ಎಲ್ಲಿದ್ದಾರೆ‌? ದರ್ಶನ್ ಯಾವ ಸೆಲ್ ನಲ್ಲಿದ್ದಾರೆ? ದರ್ಶನ್ ರನ್ನ ಹೊರಗಡೆ ನೋಡೋದಕ್ಕೆ ಆಗಲ್ಲ‌‌. ಹೀಗಾಗಿ ದರ್ಶನ್ ಅವರನ್ನ ನೋಡೋದಕ್ಕೆ ಅವಕಾಶ ಮಾಡಿಕೊಡಿ ಅಂತ ದುಂಬಾಲು ಬಿದ್ದಿದ್ದಾರಂತೆ. ದರ್ಶನ್ ಸೆಂಟ್ರಲ್ ಜೈಲಿಗೆ ಬಂದಿದ್ದು ಸಿಬ್ಬಂದಿಗೆ ಒಂದ್ಕಡೆ ತಲೆನೋವಾದ್ರೆ ಇತರ ಖೈದಿಗಳ ಬೇಡಿಕೆ ಮತ್ತೊಂದು ತಲೆನೋವಾಗಿದೆ. ಇದ್ರ ಮಧ್ಯೆ ನನಗೆ ಬೇಲ್ ಸಿಕ್ರೆ, ಜೈಲು ಅಧಿಕಾರಿಗಳು ಅನುಮತಿ ಕೊಟ್ರೆ ಖಂಡಿತ ನಿಮ್ಮನ್ನ ಭೇಟಿ ಮಾಡ್ತಾರಂತೆ ಅಂತೇಳಿ ಅಂತ ಜೈಲು ಸಿಬ್ಬಂದಿಗೆ ದರ್ಶನ್ ಹೇಳಿದ್ದಾರಂತೆ.

ಇದನ್ನೂ ಓದಿ: Actor Darshan : ರೇಣುಕಾಸ್ವಾಮಿ ಕೊಲೆ ಕೇಸ್‌; ದರ್ಶನ್‌ ಗ್ಯಾಂಗ್‌ ವಿರುದ್ಧ ಇನ್ನೆರಡು ದಿನಗಳಲ್ಲಿ ಚಾರ್ಜ್‌ಶೀಟ್‌ ಸಲ್ಲಿಕೆ!

ದರ್ಶನ್ ಪರಪ್ಪನ ಅಗ್ರಹಾರದಲ್ಲಿದ್ದಾಗ ಬೇಕಾದವರು ಅವಶ್ಯಕ ಸಂದರ್ಭದಲ್ಲಿ ಭೇಟಿ ಮಾಡಿದ್ದರು. ದರ್ಶನ್ ಕೂಡಾ ತನಗಾದ ಸಂಕಷ್ಟವನ್ನು ಆಪ್ತರ ಬಳಿ ಹೇಳಿಕೊಳ್ಳುತ್ತಿದ್ದರು. ಆದರೆ ಬಳ್ಳಾರಿ ಜೈಲಿನಲ್ಲಿ ರಕ್ತ ಸಂಬಂಧಿಕರ ಭೇಟಿಗೆ ಮಾತ್ರ ಅವಕಾಶ ಕೊಟ್ಟಿದ್ದರಿಂದ ತನ್ನ ನೋವನ್ನ ಯಾರ ಬಳಿ ಹೇಳಿಕೊಳ್ಳೋದಕ್ಕೆ ದರ್ಶನ್‌ಗೆ ಆಗುತ್ತಿಲ್ಲ. ಇದರ ಮಧ್ಯೆ ಬಂದಾಗಿನಿಂದಲೂ ಯಾರ ಬಳಿಯೂ ಮಾತನಾಡದ ದರ್ಶನ್ ಪತ್ನಿ ಬಂದು ಹೋದ ಬಳಿಕ ಎರಡೂ ದಿನವೂ ಬೆಳಗ್ಗೆ ವಾಕ್ ಮಾಡಿದ್ದಾರೆ. ಆದರೆ ಪತ್ನಿ ತಂದ ಬೇಕರಿ ಐಟೆಮ್ ಜೊತೆಜೆ ಜೈಲು ಊಟ ಮಾಡಿರುವ ದರ್ಶನ್ ಯಾರ ಬಳಿಯೂ ಮಾತಾಡದೇ ಬಹುತೇಕ ಮೌನಕ್ಕೆ ಜಾರಿದ್ದಾರೆ ಎನ್ನಲಾಗಿದೆ.

ಬೆಂಗಳೂರು: ಮತ್ತಷ್ಟು ಅವನತಿ ಹಾದಿ ತಲುಪಿದ ಬೈಜೂಸ್ (BYJU’S ) ಆನ್‌ಲೈನ್ ಟ್ಯೂಷನ್ ಸೆಂಟರ್ ಇದೀಗ ವಂಚನೆ ಮಾಡುತ್ತಿದ್ದಾರೆ ಎಂಬ ಆರೋಪವೂ ಕೇಳಿ ಬಂದಿದೆ. ರಾಮ್ ಕೈಲಾಶ್ ಯಾದವ್ ಎಂಬ ಗ್ರಾಹಕ ಸಂಪಂಗಿರಾಮನಗರ ಪೊಲೀಸ್‌ ಠಾಣೆಯಲ್ಲಿ ಬೈಜೂಸ್ ಟ್ಯೂಷನ್ ಸೆಂಟರ್ ವಿರುದ್ಧ ದೂರು ನೀಡಿದ್ದಾರೆ. “ಇತ್ತ ಟ್ಯೂಷನ್ ಇಲ್ಲ , ರೀಫಂಡ್ ಇಲ್ಲ ಅಷ್ಟಲ್ಲದೆ ಅಕೌಂಟ್‌ನಿಂದ ಹಣ ಸಹ ಕಟ್ ಆಗಿದೆ” ಎಂದು ಅಳಲು ತೋಡಿಕೊಂಡಿದ್ದಾರೆ. ಮೊದಲು ಸಣ್ಣ ಮಟ್ಟಿನ ಹೊಸತನದ ಉದ್ಯಮವಾಗಿ ಹೊರಹೊಮ್ಮಿದ ಬೈಜೂಸ್ , ಕೋವಿಡ್ ಸಂಧರ್ಭದಲ್ಲಿ ಸಾಕಷ್ಟು ಖ್ಯಾತಿ ಪಡೆದುಕೊಂಡಿತ್ತು‌. ಇದಕ್ಕೆ ಈ ಹಿಂದೆ ಖ್ಯಾತ ನಟ ಶಾರುಕ್ ಖಾನ್ ಕೂಡ ಪಬ್ಲಿಸಿಟಿ ಮಾಡಿದ್ದರು.

ನಂತರ ಆರ್ಥಕ‌ ಸಂಕಷ್ಟ ಮಕ್ಕಳು ಆನ್‌ಲೈನ್ ಕ್ಲಾಸ್‌ನಲ್ಲಿ ಭಾಗವಹಿಸದ ಹಿನ್ನಲೆ ಕ್ರಮೇಣ ಉದ್ಯಮ ತಳ ಹಿಡಿಯಲು ಶುರುವಾಗಿತ್ತು ಸದ್ಯ ಅದರ ಎಫೆಕ್ಟ್ ಎಂಬಂತೆ ಈಗ ಮತ್ತೊಂದು ಪ್ರಕರಣ ಎಸ್ ಆರ್ ನಗರ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದೆ. ದೂರುದಾರ ರಾಮ್ ಕೈಲಾಸ್ ಅವರು ತಮ್ಮ ಮಗನನ್ನ ಸಂಪಂಗಿರಾಮನಗರ ಬಳಿ ಇರುವ ಬೈಜೂಸ್ ಸೆಂಟರ್‌ನಲ್ಲಿ ಟ್ಯೂಷನ್‌ಗೆ ಸೇರಿಸಿದ್ದರು. ಸ್ವಲ್ಪ ದಿನಗಳ ಬಳಿಕ ಟ್ಯೂಷನ್ ಸರಿಯಾಗಿ ಮಾಡದ ಕಾರಣ ರಿಫಂಡ್ ಮಾಡಿ ಎಂದು ದೂರುದಾರ ಕೇಳಿಕೊಂಡಿದ್ದರು.

ಇದರ ಮಧ್ಯೆ ಕಟ್ಟಡದ ಬಾಡಿಗೆ ಕಟ್ಟಿಲ್ಲ ಎಂಬ ಕಾರಣಕ್ಕೆ ಬೈಜೂಸ್ ಸೆಂಟರ್ ಅನ್ನು ಕ್ಲೋಸ್ ಮಾಡಲಾಗಿತ್ತು. ಈ ವೇಳೆ ರಿಫಂಡ್ ಮಾಡಿ ಎಂದು ಬೈಜೂಸ್ ಸೆಂಟರ್‌ಗೆ ಕರೆ ಮಾಡಿದ್ದರು. ರಿಫಂಡ್ ಮಾಡುತ್ತೆವೆ ಆದರೆ ನಿಮ್ಮ ಅಕೌಂಟ್ ವರ್ಕ್ ಆಗುತ್ತಿಲ್ಲ. ಒಂದು ಆ್ಯಪ್ ಕಳಿಸುತ್ತೇವೆ. ಅದನ್ನು ಇನ್‌ಸ್ಟಾಲ್ ಮಾಡಿ ಎಂರು ಹೇಳಿದ್ದರು. ನಂತರ ರಸ್ಟ್ ಡೆಸ್ಕ್ ಎಂಬ ಆ್ಯಪ್‌ನ ಲಿಂಕ್ ಕಳಿಸಿದ್ದಾರೆ. ಇದನ್ನ ಇನ್‌ಸ್ಟಾಲ್‌ ಮಾಡಿದ ಕೂಡಲೇ ಯಾದವ್ ಅಕೌಂಟ್‌ನಿಂದ ಬರೋಬ್ಬರಿ 1 ಲಕ್ಷದ 30 ಸಾವಿರ ಹಣ ಕಟ್ ಆಗಿದೆ. ಅಷ್ಟೆಲ್ಲದೆ ನಿಮ್ಮ ಟ್ಯೂಷನ್ ಹಣ ಬಾಕಿ ಇದೆ ಎಂದು ಮೆಸೇಜ್ ಕೂಡ ಕಳಿಸಿದ್ದಾರೆಂದು ದೂರಿದ್ದಾರೆ.

ಆನೇಕಲ್‌: ಸೋಮವಾರ ಆನೇಕಲ್ ತಾಲ್ಲೂಕಿನಾದ್ಯಂತ (Karnataka Weather Forecast) ಮಳೆರಾಯನ ಅಬ್ಬರ (Rain News) ಜೋರಾಗಿತ್ತು. ಆನೇಕಲ್, ಬನ್ನೇರುಘಟ್ಟ, ಜಿಗಣಿ, ಅತ್ತಿಬೆಲೆ ಸುತ್ತಮುತ್ತ ಮಳೆಯ ಸಿಂಚನವಾಗಿದೆ. ಬೆಳಗ್ಗೆಯಿಂದ ಮೋಡ ಕವಿದ ವಾತಾವರಣವಿತ್ತು, ಬಳಿಕ ಮಧ್ಯಾಹ್ನದ ಹೊತ್ತಿಗೆ ದಿಢೀರ್ ಮಳೆಯಿಂದ ವಾಹನ ಸವಾರರು ಪರದಾಡಬೇಕಾಯಿತು.

ಕೆಲವರು ಬಸ್ ನಿಲ್ದಾಣದಲ್ಲಿ ಆಶ್ರಯ ಪಡೆಯಬೇಕಾಯಿತು. ಮಳೆರಾಯನ ಆಗಮನದಿಂದ ವಾತಾವರಣ ಕೂಲ್ ಆಗಿತ್ತು. ಕೆಲ ತಾಸು ಸುರಿದ ಮಳೆಗೆ ಆನೇಕಲ್‌ ರಸ್ತೆಗಳು ಜಲಾವೃತಗೊಂಡಿದ್ದವು. ಇತ್ತ ಮಳೆಯಿಂದಾಗಿ ಬನ್ನೇರುಘಟ್ಟ ರಸ್ತೆ ಕೆರೆಯಂತಾಗಿತ್ತು. ಮುಕ್ಕಾಲು ಅಡಿ ನೀರು ನಿಂತ ಕಾರಣ ವಾಹನ ಸವಾರರು ಪರದಾಡಿದರು. ಬನ್ನೇರುಘಟ್ಟದಿಂದ ಆನೇಕಲ್ ಗೆ ಸಂಪರ್ಕ ಕಲ್ಪಿಸುವ ಮಾರ್ಗ ಇದಾಗಿದ್ದು, ರಸ್ತೆ ಕಾಣದೆ ಸವಾರರ ಕಂಗಲಾದರು. ಬನ್ನೇರುಘಟ್ಟ ರಸ್ತೆಯ ರಾಗೀಹಳ್ಳಿ ಬಳಿ ಘಟನೆ ನಡೆದಿದೆ.

ಯಾದಗಿರಿಯಲ್ಲಿ ನಿರಂತರ ಮಳೆ

ಯಾದಗಿರಿ ಜಿಲ್ಲೆಯಲ್ಲಿ ನಿರಂತರ ಸುರಿದ ಮಳೆಯಿಂದಾಗಿ ಅಪಾರ ಪ್ರಮಾಣದ ಬೆಳೆ ನೀರು ಪಾಲಾಗಿತ್ತು. ಮಳೆ ನೀರಿನಿಂದ ರೈತರ ಜಮೀನು ಪ್ರದೇಶ ನದಿಯಂತಾಗಿತ್ತು. ಯಾದಗಿರಿ ಜಿಲ್ಲೆಯ ಪಗಲಾಪುರ, ನಂದೆಪಲ್ಲಿ, ಬದ್ದೆಪಲ್ಲಿ, ವಂಕಸಂಬ್ರ ಸೇರಿದಂತೆ ಮೊದಲಾದ ಕಡೆ ಬೆಳೆ ಹಾಳಾಗಿತ್ತು. ಹತ್ತಿ, ಭತ್ತ, ತೊಗರಿ ಬೆಳೆ ಎಲ್ಲವೂ ನೀರುಪಾಲಾಗಿದ್ದವು. ಬೆಳೆ ಹಾನಿಯಿಂದ ಯಾದಗಿರಿ ಜಿಲ್ಲೆಯ ರೈತರ ಸಂಕಷ್ಟ ಎದುರಿಸಬೇಕಾಯಿತು. ಸರಕಾರ ಸೂಕ್ತ ಪರಿಹಾರ ಕಲ್ಪಿಸುವಂತೆ ಉಮೇಶ ಮುದ್ನಾಳ ಒತ್ತಾಯಸಿದರು.

ಇಂದು- ನಾಳೆ ಭಾರಿ ಮಳೆ ಎಚ್ಚರಿಕೆ

ಸೆ.2ರ ಸಂಜೆ ನಂತರ ಉತ್ತರ ಕನ್ನಡ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಪ್ರತ್ಯೇಕವಾಗಿ ಭಾರೀ ಮಳೆಯಾಗುವ ಸಾಧ್ಯತೆಯಿದೆ. ಉಡುಪಿಯಲ್ಲಿ ಹೆಚ್ಚಿನ ಸ್ಥಳಗಳಲ್ಲಿ ಸಾಧಾರಣ ಮಳೆಯಾಗಲಿದೆ. ಒಳನಾಡಿನ ಸುತ್ತಮುತ್ತ ಕೆಲವು ಸ್ಥಳಗಳಲ್ಲಿ ಹಗುರದಿಂದ ಸಾಧಾರಣ ಮಳೆಯಾಗುವ ಸಾಧ್ಯತೆಯಿದೆ. ಇನ್ನು ನಾಳೆ ಮಂಗಳವಾರ ದಕ್ಷಿಣ ಕನ್ನಡ, ಉಡುಪಿ ಮತ್ತು ಉತ್ತರ ಕನ್ನಡ ಜಿಲ್ಲೆಗಳಲ್ಲಿ ಭಾರೀ ಮಳೆಯಾಗುವ ಸಾಧ್ಯತೆಯಿದೆ. ಕರ್ನಾಟಕದ ಒಳನಾಡಿನ ಜಿಲ್ಲೆಗಳಲ್ಲಿ ಪ್ರತ್ಯೇಕ ಸ್ಥಳಗಳಲ್ಲಿ ಹಗುರ ಮಳೆಯಾಗುವ ಸಾಧ್ಯತೆಯಿದೆ. ಬೆಂಗಳೂರಿನಲ್ಲಿ ಸಾಮಾನ್ಯವಾಗಿ ಮೋಡ ಕವಿದ ವಾತಾವರಣ ಇರಲಿದ್ದು, ಗರಿಷ್ಠ ಮತ್ತು ಕನಿಷ್ಠ ತಾಪಮಾನವು ಕ್ರಮವಾಗಿ 30 ಡಿ.ಸೆ ಮತ್ತು 21 ಡಿ.ಸೆ ಇರಲಿದೆ.