ಗಾಂಧಿನಗರ: ದೇಶದಲ್ಲಿ ಕೊರೊನಾ ಬಿಕ್ಕಟ್ಟಿನ ನಂತರದಲ್ಲಿ ಹೃದಯಾಘಾತ ಪ್ರಕರಣಗಳ (Heart Attack) ಸಂಖ್ಯೆ ಗಣನೀಯವಾಗಿ ಜಾಸ್ತಿಯಾಗಿದೆ. ಅದರಲ್ಲೂ, ಯುವಕರೇ ಹೆಚ್ಚು ಹೃದಯಾಘಾತಕ್ಕೆ ಬಲಿಯಾಗುತ್ತಿದ್ದಾರೆ. ಕೊರೊನಾ ಸೋಂಕು ತಗುಲಿ ಆಸ್ಪತ್ರೆಗೆ ದಾಖಲಾದವರು, ಐಸಿಯುನಲ್ಲಿ ಚಿಕಿತ್ಸೆ ಪಡೆದವರಿಗೇ ಹೆಚ್ಚಿನ ಪ್ರಮಾಣದಲ್ಲಿ ಹೃದಯಾಘಾತ ಆಗುತ್ತಿದೆ ಎಂದು ವರದಿಗಳು ತಿಳಿಸಿವೆ. ಇನ್ನು, ಹೃದಯಾಘಾತ ಹೆಚ್ಚಾಗಲು ಕೊರೊನಾ ನಿರೋಧಕ ಲಸಿಕೆಯೇ ಕಾರಣ ಎನ್ನಲಾಗುತ್ತಿದೆ. ಇದರ ಬೆನ್ನಲ್ಲೇ, ಕಳೆದ ಆರು ತಿಂಗಳಲ್ಲಿ ಗುಜರಾತ್‌ನಲ್ಲಿ ಹೃದಯಾಘಾತದಿಂದ 1,052 ಜನ ಮೃತಪಟ್ಟಿದ್ದಾರೆ ಎಂದು ಸರ್ಕಾರವೇ ತಿಳಿಸಿದೆ. ಇದರಿಂದಾಗಿ ರಾಜ್ಯಾದ್ಯಂತ ಆತಂಕ ಮನೆಮಾಡಿದೆ.

“ಕಳೆದ ಆರು ತಿಂಗಳಲ್ಲಿ ಹೃದಯಾಘಾತದಿಂದ 1,052 ಜನ ಮೃತಪಟ್ಟಿದ್ದಾರೆ. ಇವರಲ್ಲಿ ಶೇ.80ರಷ್ಟು ಮಂದಿ 11-25 ವರ್ಷದವರೇ ಆಗಿದ್ದಾರೆ. ಇದರಿಂದ ಜನರಲ್ಲಿ ಆತಂಕ ಹೆಚ್ಚಾಗಿದೆ. ಹಾಗಾಗಿ, ಎರಡು ಲಕ್ಷ ಶಾಲಾ ಶಿಕ್ಷಕರು ಹಾಗೂ ಕಾಲೇಜುಗಳ ಪ್ರೊಫೆಸರ್‌ಗಳಿಗೆ ಹೃದಯಾಘಾತ ಉಂಟಾದಾಗ ತಕ್ಷಣೆ ಮಾಡುವ ಕಾರ್ಡಿಯೋಪಲ್ಮನರಿ ರಿಸಸಿಟೇಷನ್‌ (CPR) ಪ್ರಕ್ರಿಯೆಯ ಕುರಿತು ತರಬೇತಿ ನೀಡಲಾಗಿದೆ” ಎಂದು ರಾಜ್ಯ ಶಿಕ್ಷಣ ಸಚಿವ ಕುಬೇರ್‌ ದಿಂಡೋರ್‌ ಮಾಹಿತಿ ನೀಡಿದ್ದಾರೆ.

“ಯುವಕರು, ಅದರಲ್ಲೂ ಶಾಲೆ, ಕಾಲೇಜುಗಳ ಯುವಕರಿಗೆ ಹೃದಯಾಘಾತ ಉಂಟಾಗಿದೆ. ಕ್ರಿಕೆಟ್‌ ಆಡುವಾಗ, ಗರ್ಬಾ ಸಾಂಪ್ರದಾಯಿಕ ನೃತ್ಯ ಮಾಡುವಾಗ ಹೆಚ್ಚಿನ ಜನರಿಗೆ ಹೃದಯಾಘಾತ ಉಂಟಾಗಿದೆ. ಆರು ತಿಂಗಳಲ್ಲಿ ನಿತ್ಯ ಸರಾಸರಿ 173 ಜನ ಹೃದಯಾಘಾತ ಉಂಟಾಗಿ ಆಂಬುಲೆನ್ಸ್‌ಗೆ ಕರೆ ಮಾಡಿದ್ದಾರೆ. ಪ್ರಕರಣವನ್ನು ರಾಜ್ಯ ಸರ್ಕಾರ ಗಂಭೀರವಾಗಿ ಪರಿಗಣಿಸಿದೆ. ಜನರಿಗೆ ಅನುಕೂಲವಾಗುವ, ಹೃದಯಾಘಾತ ಪ್ರಕರಣಗಳನ್ನು ತಡೆಯಲು ಹತ್ತಾರು ಕ್ರಮ ತೆಗೆದುಕೊಳ್ಳಲಾಗುತ್ತಿದೆ” ಎಂದು ತಿಳಿಸಿದ್ದಾರೆ.

ಇದನ್ನೂ ಓದಿ: Cholesterol: ಕೊಲೆಸ್ಟೆರಾಲ್‌ ನಿಜಕ್ಕೂ ಕೆಟ್ಟದ್ದೇ? ಇದಕ್ಕೂ ಹೃದಯಾಘಾತಕ್ಕೂ ನೇರಾನೇರ ಸಂಬಂಧ ಇದೆಯೇ?

ಕಠಿಣ ಕೆಲಸ ಮಾಡದಂತೆ ಕೇಂದ್ರ ಸೂಚನೆ

“ಕೊರೊನಾ ಸೋಂಕು ತಗುಲಿ, ಐಸಿಯುನಲ್ಲಿ ಚಿಕಿತ್ಸೆ ಪಡೆಯುವುದು ಸೇರಿ ಆರೋಗ್ಯ ಸ್ಥಿತಿ ಗಂಭೀರವಾಗಿ, ಬದುಕಿ ಬಂದವರು ಯಾವುದೇ ಕಾರಣಕ್ಕೂ ಹೆಚ್ಚು ಕೆಲಸ ಮಾಡಬಾರದು. ಭಾರತೀಯ ವೈದ್ಯಕೀಯ ಸಂಶೋಧನಾ ಸಂಸ್ಥೆ (ICMR) ಅಧ್ಯಯನ ವರದಿ ಪ್ರಕಾರ, ಹೃದಯಾಘಾತದ ಭೀತಿ ಇರುವ ಕಾರಣ ಒಂದಷ್ಟು ಸಮಯದವರೆಗೆ ಕೊರೊನಾ ಸೋಂಕಿತರು ಹೆಚ್ಚು ಸಮಯದವರೆಗೆ ಅಥವಾ ಹೆಚ್ಚು ಭಾರ ಹೊರುವ ಕೆಲಸ ಮಾಡಬಾರದು. ಒಂದು ವರ್ಷ ಅಥವಾ ಎರಡು ವರ್ಷಗಳವರೆಗೆ ಇಂತಹ ವ್ಯಕ್ತಿಗಳು ಅತಿಯಾದ ವ್ಯಾಯಾಮ, ಜಿಮ್‌ನಲ್ಲಿ ವರ್ಕೌಟ್‌ ಕೂಡ ಮಾಡಬಾರದು” ಎಂದು ಅಧ್ಯಯನ ವರದಿ ಉಲ್ಲೇಖಿಸಿ ಕೇಂದ್ರ ಆರೋಗ್ಯ ಸಚಿವ ಮನ್ಸುಖ್‌ ಮಂಡಾವೀಯ ತಿಳಿಸಿದ್ದಾರೆ.

ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ

ನಮಗೆ ʻಶೀತʼ ಆಗದಿದ್ದರೆ ಚಳಿಗಾಲ ಒಳ್ಳೆಯದು ಎಂಬ ಮಾತಿದೆ. ಅಂದರೆ ನಮ್ಮ ಆರೋಗ್ಯ ಸರಿಯಿದ್ದರೆ ಋತುಮಾನಗಳನ್ನು ಆನಂದಿಸಬಹುದು. ನಮ್ಮದೇ ಆರೋಗ್ಯ ಕೈಕೊಟ್ಟರೆ…? ಆಗ ಎಲ್ಲ ಕಾಲವೂ ಕೇಡುಗಾಲವೇ. ಆರೋಗ್ಯ ರಕ್ಷಣೆಗೆ ಅಗತ್ಯವಾಗಿ ಬೇಕಾದಂಥ ಪೋಷಕಾಂಶಗಳು ನಮಗೆ ದೊರೆಯುತ್ತಿವೆ ಎಂಬುದು ಖಾತ್ರಿಯಾದರೆ ಉತ್ತಮ ಆರೋಗ್ಯವೂ ಖಾತ್ರಿಯಾದಂತೆ. ಹಾಗಾದರೆ ಚಳಿಗಾಲದಲ್ಲಿ ನಮ್ಮ ಪ್ರತಿರೋಧಕ ಶಕ್ತಿ ಜಾಗೃತವಾಗಿ ಇರುವಂತೆ ಮಾಡುವ ಪೋಷಕಾಂಶಗಳು ಮತ್ತು ಆಹಾರಗಳು (winter diet tips) ಯಾವುವು?

ವಿಟಮಿನ್‌ ಸಿ

ಚಳಿಗಾಲದಲ್ಲಿ ನಮಗೆ ಅಗತ್ಯವಾಗಿ ಬೇಕಾದಂಥ ಸತ್ವಗಳಲ್ಲಿ ವಿಟಮಿನ್‌ ಸಿ ಮುಖ್ಯವಾಗಿದ್ದು, ಶರೀರದ ಪ್ರತಿರೋಧಕ ಶಕ್ತಿಯನ್ನು ಹೆಚ್ಚಿಸುವುದಕ್ಕೆ ಇದು ಅತ್ಯಗತ್ಯ. ಜೊತೆಗೆ ಚಳಿಗಾಲದಲ್ಲಿ ಸಮಸ್ಯೆಯಾಗುವ ಇನ್ನೊಂದು ಭಾಗವೆಂದರೆ ಚರ್ಮ. ಇದರ ರಕ್ಷಣೆಗೂ ಸಿ ಜೀವಸತ್ವದ ಆವಶ್ಯಕತೆ ಅಧಿಕವಾಗಿದೆ.

ಇದರ ಮೂಲಗಳೇನು?

ಇದಕ್ಕಾಗಿ ಸೀಬೆ ಹಣ್ಣು, ಕಿವಿ, ಪಪ್ಪಾಯ, ನಿಂಬೆ ರಸ, ಕಿತ್ತಳೆ, ಬೆರ್ರಿಗಳು, ಬ್ರೊಕೊಲಿ, ಕ್ಯಾಪ್ಸಿಕಂ, ಮುಂತಾದವುಗಳಲ್ಲಿ ವಿಟಮಿನ್‌ ಸಿ ಹೇರಳವಾಗಿದೆ. ಇವುಗಳ (ವಿಟಮಿನ್‌ ಸಿ ಸೇರಿದಂತೆ) ಉತ್ಕರ್ಷಣ ನಿರೋಧಕಗಳು ಸೋಂಕುಗಳೊಂದಿಗೆ ಹೋರಾಡುವ ಸಾಮರ್ಥ್ಯವನ್ನು ಹೆಚ್ಚಿಸುತ್ತವೆ.

ಜಿಂಕ್

ಜಂಕ್‌ ಮಾತ್ರ ಕೇಳಿ ಗೊತ್ತಿರುವವರಿಗೆ ಜಿಂಕ್‌ ಅಥವಾ ಸತು ಸ್ವಲ್ಪ ಹೊಸತೆನಿಸಬಹುದು. ಸತುವಿನ ಕೊರತೆಯಿಂದ ರೋಗ ನಿರೋಧಕ ಶಕ್ತಿ ಕುಂಠಿತವಾಗುತ್ತದೆ. ಚಳಿಗಾಲದಲ್ಲಿ ವೈರಸ್‌ಗಳು ದಾಳಿ ಇಡಲು ಇಷ್ಟು ಸಾಲದೇ? ದೇಹದ ಕೋಶಗಳ ಬೆಳವಣಿಗೆಗೆ ಮತ್ತು ರಿಪೇರಿಗೆ ಅಗತ್ಯವಾದ ಪೋಷಕಾಂಶವಿದು. ಹಾಗಾಗಿ ಜಿಂಕ್‌ ನಮ್ಮ ಆಹಾರದಲ್ಲಿ ಇರುವಂತೆ ನಿಗಾ ವಹಿಸುವುದು ಮುಖ್ಯ.

ಮೂಲಗಳೇನು?

ಆಹಾರದಿಂದ ಜಂಕ್‌ ಕಡಿಮೆ ಮಾಡಿದರೆ, ಜಿಂಕ್‌ ದೇಹಕ್ಕೆ ಒದಗಿಸುವುದು ಕಷ್ಟವಲ್ಲ. ಬೇಳೆ ಮತ್ತು ಇಡಿಕಾಳುಗಳು, ನಾನಾ ರೀತಿಯ ಬೀಜಗಳು, ಡೈರಿ ಉತ್ಪನ್ನಗಳು, ಲೀನ್‌ ಮೀಟ್‌, ಇಡೀ ಧಾನ್ಯಗಳು- ಇಂಥ ಎಲ್ಲಾ ಆಹಾರಗಳಲ್ಲೂ ಸತು ದೊರೆಯುತ್ತದೆ.

ಕಬ್ಬಿಣಾಂಶ

ಈ ಖನಿಜಕ್ಕೆ ದೇಹದಲ್ಲಿ ಬಹಳಷ್ಟು ಕೆಲಸಗಳಿವೆ ಮಾಡುವುದಕ್ಕೆ. ಕೆಂಪು ರಕ್ತ ಕಣಗಳನ್ನು ಉತ್ಪಾದನೆ ಮಾಡುವುದರಿಂದ ಹಿಡಿದು ಆಮ್ಲಜನಕವನ್ನು ದೇಹದೆಲ್ಲೆಡೆ ಸಾಗಿಸುವವರೆಗೆ ಎಲ್ಲದಕ್ಕೂ ಕಬ್ಬಿಣ ಅಗತ್ಯ. ಇದರ ಕೊರತೆಯಾದರೆ ರಕ್ತಹೀನತೆ ಗಂಟು ಬೀಳುತ್ತದೆ. ಆದರೆ ಕಬ್ಬಿಣದಂಶ ಹೇರಳವಾಗಿರುವಂಥ ಬಹಳಷ್ಟು ಆಹಾರಗಳು ನಮಗೆ ಲಭ್ಯವಿವೆ ಸುಲಭದಲ್ಲಿ.

ಮೂಲಗಳೇನು?

ಪಾಲಕ್‌ನಂಥ ಹಸಿರು ಸೊಪ್ಪುಗಳು, ಕೆಂಪು ಹರಿವೆಯಂಥವು, ಬೀಟ್‌ರೂಟ್‌, ನುಗ್ಗೆಕಾಯಿ, ಹಲವು ರೀತಿಯ ಬೀಜಗಳು, ಕಾಳುಗಳು, ಮೀನುಗಳು, ತೋಫು, ಕಿನೊವಾ ಮುಂತಾದವುಗಳಲ್ಲಿ ಕಬ್ಬಿಣದಂಶ ಧಾರಾಳವಾಗಿ ದೊರೆಯುತ್ತದೆ.

ಸೂಕ್ಷ್ಮ ಪೋಷಕಾಂಶಗಳು

ಮೊಟ್ಟೆ ಮತ್ತು ಕೊಬ್ಬಿನ ಮೀನುಗಳಲ್ಲಿ ಸೂಕ್ಷ್ಮ ಪೋಷಕಾಂಶಗಳು ಸಾಂದ್ರವಾಗಿವೆ. ಇವು ಹಲವು ರೀತಿಯಲ್ಲಿ ದೇಹಕ್ಕೆ ಉಪಕಾರಿಯಾಗಿವೆ. ವಿಟಮಿನ್‌ ಡಿ, ಬಿ6, ಬಿ12 ಮುಂತಾದ ಜೀವಸತ್ವಗಳು ಎಲ್ಲಾ ಆಹಾರಗಳಲ್ಲೂ ಸುಲಭವಾಗಿ ದೊರೆಯುವುದು ಕಷ್ಟ. ಹಾಗಾಗಿ ಮೀನು, ಮೊಟ್ಟೆಯಂಥ ತಿನಿಸುಗಳು ಅಗತ್ಯವಾಗುತ್ತವೆ. ಮೊಟ್ಟೆಯಲ್ಲಿ ಉತ್ತಮ ಗುಣಮಟ್ಟದ ಪ್ರೊಟೀನ್‌, ಸೆಲೆನಿಯಂ, ಜಿಂಕ್‌, ಕಬ್ಬಿಣ, ತಾಮ್ರದ ಸತ್ವಗಳು ದೊರೆಯುತ್ತವೆ. ಮೀನುಗಳಲ್ಲಿ ಒಮೇಗಾ 3 ಕೊಬ್ಬಿನಾಮ್ಲ ಮತ್ತು ವಿಟಮಿನ್‌ ಡಿ ಅಂಶ ಭರಪೂರ ದೊರೆಯುತ್ತದೆ. ಇದರಿಂದ ದೇಹದಲ್ಲಿ ಉತ್ತಮ ಕೊಬ್ಬಿನ ಮಟ್ಟ ಹೆಚ್ಚುತ್ತದೆ, ಹೃದಯದ ಆರೋಗ್ಯ ಸುಧಾರಿಸುತ್ತದೆ, ದೃಷ್ಟಿಯೂ ಚುರುಕಾಗುತ್ತದೆ.

ಶರ್ಕರಪಿಷ್ಟಾದಿಗಳು ಮಿತಿಯಲ್ಲಿರಲಿ

ಚಳಿಗಾಲವೆಂದರೆ ನಾನಾ ರೀತಿಯ ತಿನಿಸುಗಳನ್ನು ಬಾಯಿ ಬೇಡುವ ಕಾಲ. ಜೊತೆಗೆ, ಸೂರ್ಯನ ಬೆಳಕು ಕಡಿಮೆಯಾದಂತೆ ದೇಹದಲ್ಲಿ ಸೆರೊಟೋನಿನ್‌ ಹಾರ್ಮೋನಿನ ಮಟ್ಟವೂ ಕಡಿಮೆಯಾಗಿ, ಹೆಚ್ಚು ಪಿಷ್ಟಭರಿತ ಆಹಾರವನ್ನು ದೇಹ ಬಯಸುತ್ತದೆ. ಪಿಷ್ಟದ ಪ್ರಮಾಣ ಮಿತಿ ಮೀರಿದರೆ ಆರೋಗ್ಯ ಸಮಸ್ಯೆಗಳು ಗಂಟು ಬೀಳಬಹುದು. ಹಾಗಾಗಿ ಪೋಷಕಾಂಶಗಳು ಸಮತೋಲನದಲ್ಲಿರಲಿ.

ಇದನ್ನೂ ಓದಿ: Healthy Food: ಈ ಎಲ್ಲ ರಾಸಾಯನಿಕಗಳು ನೀವು ತಿನ್ನುವ ಆಹಾರದಲ್ಲಿದೆಯೇ? ಹಾಗಾದರೆ ಎಚ್ಚರ!

ಬೆಂಗಳೂರು: ಪ್ರತಿಷ್ಠಿತ ವಾಣಿವಿಲಾಸ್‌ ಆಸ್ಪತ್ರೆಯಲ್ಲಿ (Vanivilas Hospital) ಜಿರಳೆ ಕಾಟ (Cockroach bite) ಹೆಚ್ಚಾಗಿದ್ದು, ಎರಡು ದಿನದ ಹಿಂದಷ್ಟೇ ಜನಿಸಿದ ಮಗುವನ್ನು ಕಚ್ಚಿ ಹಾಕಿದೆ ಎಂದು ಪೋಷಕರು ಆರೋಪಿಸಿದ್ದಾರೆ. ನಾಗರಬಾವಿ ನಿವಾಸಿ ಆಶಾರಾಣಿ ಅವರು ಕಳೆದೆರಡು ದಿನದ ಹಿಂದೆ ವಾಣಿವಿಲಾಸ್ ಆಸ್ಪತ್ರೆಗೆ ಹೆರಿಗೆ ನೋವಿನಿಂದ ದಾಖಲಾಗಿದ್ದರು.

ಕಳೆದ ಗುರುವಾರ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ತಾಯಿ-ಮಗು ಇಬ್ಬರು ಆರೋಗ್ಯವಾಗಿದ್ದರಿಂದ ವಾರ್ಡ್‌ಗೆ ಶಿಫ್ಟ್‌ ಮಾಡಲಾಗಿತ್ತು. ಆದರೆ ವಾರ್ಡ್‌ ಪೂರ್ತಿ ಎಲ್ಲೆಂದರಲ್ಲಿ ಜಿರಳೆಗಳೇ ತುಂಬಿ ಹೋಗಿದ್ದು, ಮಗುವನ್ನು ಕಚ್ಚಿ ಹಾಕಿವೆ. ಬೆಡ್ ಸ್ವಚ್ಛಗೊಳಿಸದ ಆಸ್ಪತ್ರೆ ಸಿಬ್ಬಂದಿ ವಿರುದ್ಧ ಪೋಷಕರು ಕಿಡಿಕಾರಿದ್ದಾರೆ.

ಹೆರಿಗೆ ವಾರ್ಡ್ ಸೇರಿದಂತೆ ಬಾಣಂತಿ ವಾರ್ಡ್‌ನಲ್ಲೂ ಜಿರಳೆಗಳೇ ಇವೆ. ಎಳೆ ಕಂದಮ್ಮಗಳ ಸುತ್ತ ಜಿರಳೆಗಳು ಓಡಾಡುತ್ತಿವೆ. ಮೊನ್ನೆಯಿಂದಲೂ ಪುಟ್ಟ ಮಗುವಿಗೆ ಜಿರಳೆಗಳು ಕಚ್ಚುತ್ತಿದೆ. ಈ ಬಗ್ಗೆ ಆಸ್ಪತ್ರೆ ವೈದ್ಯರಿಗೆ ಹಾಗೂ ಸಿಬ್ಬಂದಿಗೆ ಹೇಳಿದರೂ ಕ್ಯಾರೇ ಎನ್ನದೆ ನಿರ್ಲಕ್ಷ್ಯವನ್ನು ತೋರಿದ್ದಾರೆ ಎಂದು ಆಕ್ರೋಶ ಹೊರಹಾಕಿದ್ದಾರೆ.

ಬಡವರ, ಮಧ್ಯಮ ವರ್ಗದವರ ಪಾಲಿಗೆ ಸಂಜೀವಿನಿ ಆಗಬೇಕಿದ್ದ ಸರ್ಕಾರಿ ಆಸ್ಪತ್ರೆಗಳೇ ಕಂಟಕವಾಗುತ್ತಿದೆ. ಹಿಂದೆಲ್ಲ ಸರ್ಕಾರಿ ಆಸ್ಪತ್ರೆಯಲ್ಲಿ ಗುಣಮಟ್ಟದ ಯಂತ್ರೋಪಕರಣಗಳು, ಮೂಲಭೂತ ಸೌಕಾರ್ಯವಿಲ್ಲ ಎಂಬ ಆರೋಪಗಳು ಕೇಳಿಬರುತ್ತಿದ್ದವು. ಕಾಲಕಾಲಕ್ಕೆ ಅವೆಲ್ಲವೂ ಮರೆಯಾದವು, ಆದರೆ ಸ್ವಚ್ಛತೆ ಮಾತ್ರ ಶೂನ್ಯವಾಗಿದೆ.

ಮಗುವಿಗೆ ಜಿರಳೆ ಕಚ್ಚಿಲ್ಲ

ಮಗುವಿಗೆ ಜಿರಳೆ ಕಚ್ಚಿಲ್ಲ. ಬದಲಿಗೆ ಪೋಷಕರು ಮಗುವಿಗೆ ಹಾಕಿರುವ ಸ್ವೇಟರ್‌ನಿಂದ ಇನ್ಫೆಕ್ಷನ್ ಆಗಿದೆ ಎಂದು ವಾಣಿ ವಿಲಾಸ್ ಆಸ್ಪತ್ರೆಯ ಮೆಡಿಕಲ್‌ ಸುಪರಿಟೆಂಡೆಂಟ್‌ ಸವಿತಾ ಮಾಹಿತಿ ನೀಡಿದ್ದಾರೆ. ನಾವು ನಮ್ಮ ವೈದ್ಯರ ಜತೆ ಮಾತನಾಡಿದ್ದೇವೆ ಅದು ಜಿರಳೆ ಕಚ್ಚಿರುವುದರಿಂದ ಆಗಿಲ್ಲ ಎಂದು ಹೇಳಿದ್ದಾರೆ. ವೈದ್ಯರು ಮಗುವಿನ ತಪಾಸಣೆ ಮಾಡಿದ್ದಾರೆ. ಸ್ವೇಟರ್ ಹಾಕಿರುವ ಕಾರಣಕ್ಕೆ ಮಗುವಿನ ಮೈ ಮೇಲೆ ಅಲರ್ಜಿ ಆಗಿದೆ. ಇದು ಮಕ್ಕಳಲ್ಲಿ ಸ್ವಾಭಾವಿಕ ಕಾಣಿಸಿಕೊಳ್ಳುತ್ತದೆ. ಮಕ್ಕಳ ಚರ್ಮ ಸಾಕಷ್ಟು ಸೂಕ್ಷ್ಮವಾಗಿರುತ್ತದೆ. ಹೀಗಾಗಿ ಇಂತಹ ಅಲರ್ಜಿ ಆಗುವುದು ಮಾಮೂಲಿ ಎಂದು ತಿಳಿಸಿದ್ದಾರೆ.

ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ. ಜತೆಗೆ ರಾಜ್ಯದ ಇನ್ನಷ್ಟು ಸುದ್ದಿಗಾಗಿ ಈ ಲಿಂಕ್‌ ಕ್ಲಿಕ್‌ ಮಾಡಿ.

ಬೆಂಗಳೂರು: ಪ್ರಧಾನ ಮಂತ್ರಿ ನರೇಂದ್ರ ಮೋದಿ (Narendra Modi) ರಾಜಕಾರಣದಲ್ಲಿ ಸದಾ ಬ್ಯುಸಿಯಾಗಿರುತ್ತಾರೆ. ಒಂದು ದಿನವೂ ರಜೆ ಮಾಡದೆ ಅವರು ಕೆಲಸದಲ್ಲಿ ನಿರತರಾಗಿರುತ್ತಾರೆ. ಈ ಮಧ್ಯೆ ಚುನಾವಣೆ ಇದ್ದರೆ ದೇಶಾದ್ಯಂತ ಓಡಾಡಿ ಪ್ರಚಾರದಲ್ಲಿಯೂ ತೊಡಗಿಕೊಳ್ಳುತ್ತಾರೆ. ಹೀಗೆ ಸದಾ ಕ್ರಿಯಾಶೀಲರಾಗಿರಲು ಅವರ ಜೀವನ ಶೈಲಿಯೂ ಕಾರಣ. ಮೋದಿ ಯೋಗ, ಧ್ಯಾನ ಮತ್ತು ಉತ್ತಮ ಆಹಾರ ಪದ್ಧತಿಯನ್ನು ರೂಢಿಸಿಕೊಳ್ಳುವ ಪೂಲಕ ಸದಾ ಫಿಟ್‌ ಆಗಿರುತ್ತಾರೆ. ಮೋದಿ ತಮ್ಮ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವ ಆಹಾರದ ಭಾಗವಾಗಿ ನುಗ್ಗೆ ಪರೋಟಗಳನ್ನು (Moringa parathas) ಸೇವಿಸುವುದನ್ನು ಉಲ್ಲೇಖಿಸಿದ್ದಾರೆ. ಹಾಗಾದರೆ ನುಗ್ಗೆ ಹೇಗೆ ನಮ್ಮ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ? ತೂಕ ಇಳಿಕೆಗೆ ಇದು ಹೇಗೆ ನೆರವಾಗುತ್ತದೆ? ಎನ್ನುವುದರ ವಿವರ ಇಲ್ಲಿದೆ (Health Tips).

ಪೋಷಕಾಂಶಗಳಿಂದ ಸಮೃದ್ಧ

ನುಗ್ಗೆ ಎಲೆ ಜೀವಸತ್ವಗಳು (ಎ, ಸಿ, ಇ ಮತ್ತು ಬಿ-ಕಾಂಪ್ಲೆಕ್ಸ್), ಖನಿಜಗಳು (ಕ್ಯಾಲ್ಶಿಯಂ, ಮೆಗ್ನೀಶಿಯಮ್, ಪೊಟ್ಯಾಶಿಯಮ್) ಮತ್ತು ಪ್ರೋಟೀನ್‌ನಂತಹ ಪೋಷಕಾಂಶಗಳಿಂದ ಸಮೃದ್ಧವಾಗಿವೆ. ಇವು ಒಟ್ಟಾರೆ ಆರೋಗ್ಯಕ್ಕೆ ಉತ್ತಮ ಕೊಡುಗೆ ನೀಡುತ್ತವೆ. ಮಾತ್ರವಲ್ಲ ಜೀರ್ಣ ಕ್ರಿಯೆಯನ್ನು ಹೆಚ್ಚಿಸುತ್ತವೆ. ನುಗ್ಗೆ ನೈಸರ್ಗಿಕವಾಗಿ ಹಸಿವನ್ನು ನಿಗ್ರಹಿಸುತ್ತದೆ. ಇದರಲ್ಲಿ ಫೈಬರ್ ಅಂಶಗಳು ಧಾರಾಳವಾಗಿವೆ. ಜತೆಗೆ ಹೆಚ್ಚಿನ ಕ್ಯಾಲರಿಯನ್ನು ನಾಶ ಮಾಡುತ್ತದೆ.

ಕೊಬ್ಬು ನಿಯಂತ್ರಿಸುತ್ತದೆ

ನುಗ್ಗೆ ಸಕ್ಕರೆ ಅಂಶಗಳನ್ನು ಹೊಸ ಕೊಬ್ಬಿನ ಕೋಶಗಳಾಗಿ ಪರಿವರ್ತಿಸುವುದನ್ನು ತಡೆಯುವ ಮೂಲಕ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಕಡಿಮೆ ಮಾಡುತ್ತದೆ. ಇನ್ಸುಲಿನ್‌ನ ಕಾರ್ಯಕ್ಷಮತೆಯನ್ನು ಸುಧಾರಿಸುತ್ತದೆ. ಇದರಲ್ಲಿನ ಮೆಥಿಯೋನಿನ್ ಕೊಬ್ಬನ್ನು ಹೀರಿಕೊಳ್ಳುತ್ತದೆ ಮತ್ತು ಕೊಲೆಸ್ಟ್ರಾಲ್ ಅನ್ನು ಕಡಿಮೆ ಮಾಡುತ್ತದೆ. ಹೀಗಾಗಿ ಹೊಟ್ಟೆಯ ಕೊಬ್ಬು ನೈಸರ್ಗಿಕವಾಗಿ ಕರಗುತ್ತದೆ. ದೇಹವು ಆಹಾರವನ್ನು ಪರಿಣಾಮಕಾರಿಯಾಗಿ ಹೀರಿಕೊಂಡಾಗ ಮತ್ತು ಸರಿಯಾಗಿ ಕರಗಿದಾಗ ಸಹಜವಾಗಿ ತೂಕ ಕಡಿಮೆಯಾಗುತ್ತದೆ.

ಸಂಶೋಧನೆ ಏನು ಹೇಳುತ್ತದೆ?

ಅಧಿಕ ತೂಕ ಹೊಂದಿದ 41 ಮಂದಿಗೆ 8 ವಾರಗಳ ಕಾಲ ಒಂದೇ ರೀತಿಯ ಆಹಾರ ಮತ್ತು ವ್ಯಾಯಾಮ ಒದಗಿಸಿ ಅಧ್ಯಯನ ನಡೆಸಲಾಗಿದೆ. ಜತೆಗೆ ಅವರಿಗೆ 900 ಮಿಗ್ರಾಂ ನುಗ್ಗೆಕಾಯಿ, ಅರಿಶಿನ ಮತ್ತು ಕರಿಬೇವಿನ ಎಲೆಗಳ ಪೂರಕ ಮಿಶ್ರಣವನ್ನು ನೀಡಲಾಗಿತ್ತು. ಪರಿಣಾಮ ಅವರು ಸುಮಾರು 4.8 ಕೆಜಿ ತೂಕ ಕಳೆದುಕೊಂಡಿದ್ದಾರೆ ಎಂದು ಸಂಶೋಧನಾಕಾರರು ತಿಳಿಸಿದ್ದಾರೆ. 2021ರಲ್ಲಿ ನಡೆಸಿದ ಇನ್ನೊಂದು ಅಧ್ಯಯನದಲ್ಲಿ ನುಗ್ಗೆ ಎಲೆಯಲ್ಲಿನ ಸಾರವು ಬೊಜ್ಜು ವಿರೋಧಿ ಗುಣ ಹೊಂದಿದೆ ಎನ್ನುವುದು ಸಾಬೀತಾಗಿದೆ.

ಆ್ಯಂಟಿ ಆ್ಯಕ್ಸಿಡೆಂಟ್‌ ಗುಣ

ನುಗ್ಗೆಕಾಯಿಯಲ್ಲಿ ಕ್ವೆರ್ಸೆಟಿನ್, ಕ್ಲೋರೊಜೆನಿಕ್ ಆಮ್ಲ ಮತ್ತು ಬೀಟಾ-ಕ್ಯಾರೋಟಿನ್‌ನಂತಹ ಆ್ಯಂಟಿ ಆ್ಯಕ್ಸಿಡೆಂಟ್‌ ಗುಣಗಳಿವೆ. ಇದು ಉರಿಯೂತದ ಮಟ್ಟವನ್ನು ಕಡಿಮೆ ಮಾಡುವ ಮೂಲಕ ಜೀರ್ಣ ಶಕ್ತಿಯನ್ನು ಹೆಚ್ಚಿಸುತ್ತದೆ.

ಕೊಬ್ಬು ಹೀರಿಕೊಳ್ಳುವ ನಾರಿನಾಂಶ

ಮೊದಲೇ ಹೇಳಿದಂತೆ ನುಗ್ಗೆಕಾಯಿಯಲ್ಲಿ ನಾರಿನಾಂಶ ಅಧಿಕವಿದ್ದು, ಜೀರ್ಣಾಂಗ ವ್ಯವಸ್ಥೆಯನ್ನು ಸರಿ ಮಾಡುತ್ತದೆ. ಆರೋಗ್ಯಕರ ಜೀರ್ಣಾಂಗ ವ್ಯವಸ್ಥೆಯು ಸರಿಯಾದ ಪೋಷಕಾಂಶ ಹೀರಿಕೊಳ್ಳಲು ಮತ್ತು ತ್ಯಾಜ್ಯವನ್ನು ಸಮರ್ಪಕವಾಗಿ ಹೊರ ಹಾಕಲು ನೆರವಾಗುತ್ತದೆ. ಇದು ತೂಕ ಇಳಿಕೆಗೆ ಕಾರಣವಾಗುತ್ತದೆ.

ಇದನ್ನೂ ಓದಿ: Drumstick Leaves Benefits: ಸರ್ವಗುಣ ಸಂಪನ್ನ ನುಗ್ಗೆಸೊಪ್ಪಿನ ಮಹಾತ್ಮೆ!

ಎಚ್ಚರಿಕೆ ವಹಿಸಿ

ನುಗ್ಗೆ ಸೇವನೆಯಿಂದ ಮಾತ್ರ ತೂಕ ಇಳಿಕೆಯಾಗುವುದಿಲ್ಲ ಎನ್ನುವುದನ್ನು ಗಮನಿಸಿ. ಸಮತೋಲಿತ ಆಹಾರ, ನಿಯಮಿತ ವ್ಯಾಯಾಮ, ಸಾಕಷ್ಟು ನಿದ್ರೆ ಮತ್ತು ಒತ್ತಡ ನಿರ್ವಹಣೆ ಸೇರಿದಂತೆ ಸಾಕಷ್ಟು ಅಂಶಗಳ ಸಂಯೋಜನೆಗಳ ಜತೆಗೆ ನುಗ್ಗೆಯ ಸೇವನೆ ಕೊಬ್ಬು ಕರಗಲು ನೆರವಾಗುತ್ತದೆ. ತೂಕ ಇಳಿಕೆಗಾಗಿ ಒಮ್ಮಿಂದೊಮ್ಮೆಗೆ ಅತಿಯಾದ ನುಗ್ಗೆಯ ಬಳಕೆ ಸಲ್ಲ. ಮಧುಮೇಹಿಗಳು, ಗರ್ಭಿಣಿಯರು ಅಥವಾ ಇತರ ಅರೋಗ್ಯ ಸಮಸ್ಯೆ ಹೊಂದಿರುವವರು ನುಗ್ಗೆ ಸೇವನೆಯ ಮುನ್ನ ವೈದ್ಯರೊಂದಿಗೆ ಸಮಾಲೋಚನೆ ನಡೆಸುವುದು ಅಗತ್ಯ. ನಿಯಮಿತವಾಗಿ ತೆಗೆದುಕೊಳ್ಳುವ ಔಷಧಗಳ ಮೇಲೆ ಇದು ಪರಿಣಾಮ ಬೀರುವುದಿಲ್ಲ ಎನ್ನುವುದನ್ನು ಖಚಿತಪಡಿಸಿಕೊಳ್ಳಬೇಕು.

ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಮೆಂಟ್ ಮೂಲಕ ತಿಳಿಸಿ