ತಲೆಯನ್ನು ಕುಟ್ಟಿ ಪುಡಿಮಾಡುವಂಥ ನೋವು, ಕೆಲವೊಮ್ಮೆ ತಲೆಯ ಒಂದೇ ಭಾಗಕ್ಕೆ ನೋವು, ಹೊಟ್ಟೆ ತೊಳೆಸಿದಂತಾಗಿ ವಾಂತಿ, ಬೆಳಕು ಮತ್ತು ಶಬ್ದಕ್ಕೆ ತೊಂದರೆ ಹೆಚ್ಚಾಗುವುದು, ಕಣ್ಣಲ್ಲಿ ಬಣ್ಣ ಕಾಣುವುದು, ದೃಷ್ಟಿ ಮಂಜಾಗುವುದು… ಇಂಥವೆಲ್ಲಾ ಮೈಗ್ರೇನ್‌ ಲಕ್ಷಣಗಳು. ಅರೆತಲೆಶೂಲೆ ಎಂದೂ ಕರೆಯಲಾಗುವ ಮೈಗ್ರೇನ್‌ ತಲೆನೋವು ನೀಡುವ ಹಿಂಸೆ ಅಷ್ಟಿಷ್ಟೇ ಅಲ್ಲ. ಒಮ್ಮೆ ಮೈಗ್ರೇನ್‌ ಆರಂಭವಾದರೆ, ಹಲವಾರು ಗಂಟೆಗಳು ಅಥವಾ ಒಂದೆರಡು ದಿನಗಳವರೆಗೆ ನಿತ್ಯದ ಕೆಲಸವನ್ನೂ ಮಾಡಲಿಕ್ಕಾಗದಷ್ಟು ಅವಸ್ಥೆ ಹದಗೆಡುತ್ತದೆ. ವೈದ್ಯರ ಸಲಹೆಯ ಜೊತೆಗೆ, ಕೆಲವು ಹೆಚ್ಚುವರಿ ಪ್ರಯತ್ನಗಳಿಂದ ಜೀವನಶೈಲಿಯಲ್ಲಿ, ಆಹಾರಕ್ರಮಗಳಲ್ಲಿ ಕೆಲವು ಬದಲಾವಣೆ ಮತ್ತು ಬೆರಳೆಣಿಕೆಯ ಮನೆಮದ್ದುಗಳ ನೆರವಿನಿಂದ ಈ ತಲೆಶೂಲೆಯನ್ನು ನಿಯಂತ್ರಣದಲ್ಲಿಡಲು ಸಾಧ್ಯ. ಅವುಗಳಲ್ಲಿ ನೈಸರ್ಗಿಕ ಸುಗಂಧ ತೈಲಗಳ ಬಳಕೆಯೂ ಒಂದು ಕ್ರಮ. ಉದಾ, ರೋಸ್‌ಮೆರಿ, ಲ್ಯಾವೆಂಡರ್‌ ಅಥವಾ ಪೆಪ್ಪರ್‌ಮಿಂಟ್‌ ತೈಲಗಳನ್ನು ಮೈಗ್ರೇನ್‌ ಹತೋಟಿಗೆಂದು ಬಳಸಲಾಗುತ್ತದೆ. ಅವುಗಳಲ್ಲಿ ರೋಸ್‌ಮೆರಿ ತೈಲದ ಬಳಕೆ ಹೇಗೆ ಎಂಬುದನ್ನು (Migraine Problem) ನೋಡೋಣ.

ಹೇಗೆ ಉಪಯುಕ್ತ?

ರೋಸ್‌ಮೆರಿ ತೈಲವನ್ನು ಶತಮಾನಗಳಿಂದ ಸಾಂಪ್ರದಾಯಿಕ ಔಷಧಗಳಲ್ಲಿ ಬಳಸಲಾಗುತ್ತದೆ. ಭಾರತಕ್ಕೆ ಇದು ಇತ್ತೀಚೆಗೆ ಪರಿಚಯಗೊಂಡರೂ ಪಶ್ಚಿಮ ದೇಶಗಳಲ್ಲಿ ಇದನ್ನು ಅಡುಗೆಗೂ ಬಳಸಲಾಗುತ್ತದೆ. ಮನೆಮದ್ದಿಗೂ ಇದು ಬಳಕೆಯಲ್ಲಿದೆ. ಅದರಲ್ಲೂ ಮೈಗ್ರೇನ್‌ನಂಥ ಸಮಸ್ಯೆಗಳಿಗೆ ಕೆಲವು ರೀತಿಯ ಸುವಾಸನೆಗಳು ಪರಿಣಾಮಕಾರಿ ಉಪಶಮನವನ್ನು ಒದಗಿಸುವ ಹಿನ್ನೆಲೆಯಲ್ಲಿ, ರೋಸ್‌ಮೆರಿಯಂಥ ನೈಸರ್ಗಿಕ ಸುಗಂಧದ್ರವ್ಯಗಳು ವ್ಯಾಪಕವಾಗಿ ಬಳಕೆಯಲ್ಲಿವೆ.

ಲೇಪನ

ರೋಸ್‌ಮೆರಿ ತೈಲದ ಒಂದೆರಡು ಹನಿಯನ್ನು ಕೊಬ್ಬರಿ ಎಣ್ಣೆ ಇಲ್ಲವೇ ಬಾದಾಮಿ ಎಣ್ಣೆಯಂಥ ಇನ್ನೊಂದು ಎಣ್ಣೆಯೊಂದಿಗೆ ಬೆರೆಸಿಕೊಳ್ಳಿ. ಇದನ್ನು ಹಣೆ, ಹುಬ್ಬಿನ ಅಕ್ಕಪಕ್ಕದಲ್ಲೆಲ್ಲ ಲೇಪಿಸಬೇಕು. ಕುತ್ತಿಗೆಯ ಹಿಂಭಾಗಕ್ಕೂ ಧಾರಾಳವಾಗಿ ಲೇಪಿಸಬಹುದು. ಇದರಿಂದ ಹೊರಹೊಮ್ಮುವ ಆಹ್ಲಾದಕರ ಪರಿಮಳವು ಮನಸ್ಸಿನ ಒತ್ತಡ ಕಡಿಮೆ ಮಾಡಿ, ನರಗಳನ್ನು ಶಾಂತಗೊಳಿಸುತ್ತದೆ. ಮನಸ್ಸಿಗೆ ಶಾಂತ ಭಾವ ಬರುತ್ತಿದ್ದಂತೆ ಮೈಗ್ರೇನ್‌ ತೀವ್ರತೆ ಕಡಿಮೆಯಾಗುತ್ತದೆ.

ಅರೋಮಾಥೆರಪಿ

ಇದೂ ಸಹ ಪರಿಮಳವನ್ನು ಆಘ್ರಾಣಿಸುವ ಚಿಕಿತ್ಸೆಯೇ. ಇದಕ್ಕಾಗಿ ಮೀಸಲಾಗಿರುವ ಸಣ್ಣ ಸ್ಟೀಮರ್‌ನಲ್ಲಿ ಒಂದೆರಡು ಹನಿ ರೋಸ್‌ಮೆರಿ ತೈಲವನ್ನು ಹಾಕಿ, ಸ್ಟೀಮರ್‌ಗೆ ಚಾಲನೆ ನೀಡಿ. ಇದರಿಂದ ಹೊರಹೊಮ್ಮುವ ಸುಗಂಧಪೂರಿತ ಆವಿಯನ್ನು ಆಘ್ರಾಣಿಸಿ. ಇಂಥ ಸ್ಟೀಮರ್‌ಗಳು ಇಲ್ಲದಿದ್ದರೆ, ಬಿಸಿ ನೀರಿಗೆ ಒಂದೆರಡು ಹನಿ ರೋಸ್‌ಮೆರಿ ತೈಲ ಹಾಕಿ. ಟವೆಲ್‌ ಮುಚ್ಚಿಕೊಂಡು, ಇದರ ಆವಿಗೆ ಮುಖವೊಡ್ಡಿ ದೀರ್ಘವಾಗಿ ಉಸಿರೆಳೆದುಕೊಳ್ಳಿ.

ಇದನ್ನೂ ಓದಿ: Migraine Control: ಮೈಗ್ರೇನ್‌ನಿಂದ ಪಾರಾಗುವುದು ಹೇಗೆ?

ಕಂಪ್ರೆಸ್‌

ಇದೊಂದು ರೀತಿಯಲ್ಲಿ ಸುಗಂಧತೈಲದ ಶಾಖ ಎನ್ನಬಹುದು. ಬಿಸಿ ನೀರಿಗೆ ಒಂದೆರಡು ಹನಿ ರೋಸ್‌ಮೆರಿ ತೈಲ ಸೇರಿಸಿ. ಈ ನೀರಿನಲ್ಲಿ ಸ್ವಚ್ಛ ಟವೊಲ್‌ ಅದ್ದಿ ಹಿಂಡಿ. ಈ ಬಿಸಿ ಬಟ್ಟೆಯಲ್ಲಿ ಹಣೆ ಮತ್ತು ಕುತ್ತಿಗೆಯ ಹಿಂಭಾಗಗಳಿಗೆ ಶಾಖ ಕೊಡಿ. ಇದನ್ನೇ ಹತ್ತಾರು ಬಾರಿ ಪುನರಾವರ್ತಿಸಬೇಕು. ಒಂದೊಮ್ಮೆ ಬಿಸಿ ಅನುಭವದಿಂದ ಸಮಸ್ಯೆ ಹೆಚ್ಚಾಗುತ್ತದೆ ಎನಿಸಿದರೆ, ಸುಗಂಧ ತೈಲವನ್ನು ಬಿಸಿ ನೀರಿನ ಬದಲು ತಣ್ಣೀರಿಗೆ ಹಾಕಿ, ಕೋಲ್ಡ್‌ ಪ್ಯಾಕ್‌ ಕೊಡಬಹುದು.
ಇವೆಲ್ಲವುಗಳ ಜೊತೆಗೆ ಧಾರಾಳವಾಗಿ ನೀರು ಕುಡಿಯಿರಿ. ದಾಕ್ಷಿಣ್ಯ ಬಿಟ್ಟು ನಿದ್ದೆ ಮಾಡಿ. ಸಾಕಷ್ಟು ವಿಶ್ರಾಂತಿಯನ್ನು ಮನಸ್ಸು ಮತ್ತು ದೇಹಕ್ಕೆ ನೀಡುವುದು ಮೈಗ್ರೇನ್‌ ಹತೋಟಿಯಲ್ಲಿ ಬಹುಮುಖ್ಯ ಪಾತ್ರವನ್ನು ವಹಿಸುತ್ತದೆ. ಮಾತ್ರವಲ್ಲ, ಯೋಗ, ಧಾನ್ಯ, ಪ್ರಾಣಾಯಾಮದಂಥ ಒತ್ತಡ ಶಮನ ಮಾರ್ಗಗಳು ಬದುಕಿನ ಭಾಗವಾಗಿರಲಿ.
ರೋಸ್‌ಮೆರಿ ತೈಲ ಸಾಮಾನ್ಯವಾಗಿ ಎಲ್ಲ ರೀತಿಯ ಚರ್ಮಕ್ಕೂ ಹೊಂದಿಕೆ ಆಗುವಂಥದ್ದು. ಆದರೂ ಮೊದಲ ಬಾರಿಗೆ ಉಪಯೋಗಿಸುವ ಮುನ್ನ ಪ್ಯಾಚ್‌ ಟೆಸ್ಟ್‌ ಮಾಡುವುದು ಒಳಿತು. ಈ ತೈಲವನ್ನು ನೇರವಾಗಿ ಚರ್ಮದ ಮೇಲೆ ಪ್ರಯೋಗಿಸಬೇಡಿ. ಇದನ್ನು ಬಾದಾಮಿ ಎಣ್ಣೆ ಅಥವಾ ಕೊಬ್ಬರಿ ಎಣ್ಣೆಯೊಂದಿಗೆ ಬೆರೆಸಿಯೇ ಹಚ್ಚಿಕೊಳ್ಳಿ. ಇದರಿಂದ ಅಲರ್ಜಿ ಆಗುವ ಸಾಧ್ಯತೆ ಕಡಿಮೆ.

ಉಪ್ಪು ಎಂಬ ವಸ್ತು ನಮ್ಮೆಲ್ಲರ ಜೀವನದ ಅವಿಭಾಜ್ಯ ಅಂಗ. ಉಪ್ಪಿಲ್ಲದೆ ಒಂದು ದಿನವನ್ನು ದೂಡುವುದು ಕೂಡಾ ಕಷ್ಟವೇ ಸರಿ. ಉಪ್ಪಿಗಿಂತ ಬೇರೆ ರುಚಿಯೇ ಇಲ್ಲ ಎಂದು ಹಿರಿಯರು ಹೇಳಿದ್ದು ಇದಕ್ಕಾಗಿಯೇ. ಉಪ್ಪಿನ ರುಚಿ, ಉಪ್ಪು ಹಾಕಿದ ಆಹಾರದ ಜೊತೆಗಿದ್ದರೆ ತಿಳಿದೀತು. ಉಪ್ಪಿಲ್ಲದ ಊಟ ನೀರಸವಾಗಿ, ಬದುಕೇ ವ್ಯರ್ಥವಾಗಿ ಕಂಡೀತು. ಇಂತಹ ಉಪ್ಪು ನಮಗೆ ನಿತ್ಯ ಜೀವನದಲ್ಲಿ ಕೇವಲ ಊಟಕ್ಕೆ, ಆಹಾರಕ್ಕೆ ಮಾತ್ರವೇ ಅಲ್ಲ, ಹಲವಾರು ಕೆಲಸಗಳಿಗೂ ಸಹಾಯ ಮಾಡುತ್ತದೆ. ವಸ್ತುಗಳನ್ನು ಶುದ್ಧವಾಗಿ ತೊಳೆಯಲು ಉಪ್ಪು ಕೆಲಸಕ್ಕೆ ಬರುತ್ತದೆ. ಆಹಾರವನ್ನು ಹೆಚ್ಚು ಕಾಲ ಕೆಡದಂತೆ ಸಂರಕ್ಷಿಸಿಡುವಲ್ಲಿಯೂ ಉಪ್ಪು ಬಹುಮುಖ್ಯ ಪಾತ್ರ ವಹಿಸುತ್ತದೆ. ಉಪ್ಪಿನಲ್ಲಿರುವ ಸೋಡಿಯಂ ಹಾಗೂ ಇತರ ಖನಿಜಾಂಶಗಳು ನಮ್ಮ ದೇಹಕ್ಕೆ ಪೋಷಣೆಯನ್ನು ಒದಗಿಸುತ್ತದೆ. ಇಂತಹ ಉಪ್ಪು ಇಂದು ಅನೇಕ ಇತರ ಆಹಾರಗಳ ಮೂಲಕವೂ ನಮ್ಮ ದೇಹ ಸೇರುತ್ತದೆ. ಅಗತ್ಯಕ್ಕಿಂತ ಹೆಚ್ಚಾಗಿ ನಾವು ಉಪ್ಪನ್ನು ನಮ್ಮ ದೇಹಕ್ಕೆ ನೀಡುತ್ತಿದ್ದೇವೆ. ಹೊರಗೆ ಪ್ಯಾಕೆಟ್ಟುಗಳಲ್ಲಿ ದೊರಕುವ ಕುರುಕಲು ಸೇರಿದಂತೆ ನಾನಾ ಆಹಾರ ವಸ್ತುಗಳಲ್ಲಿ ಇಂದು ಅಗತ್ಯಕ್ಕಿಂತ ಹೆಚ್ಚೇ ಉಪ್ಪು ಇರುತ್ತದೆ. ಹೀಗಾಗಿ ನಮ್ಮ ಬದಲಾದ ಆಹಾರ ಶೈಲಿಯ ಪರಿಣಾಮವಾಗಿ ಇಂದು ನಮ್ಮ ದೇಹಕ್ಕೆ ಅಗತ್ಯಕ್ಕಿಂತ ಹೆಚ್ಚೇ ಉಪ್ಪು ಸೇರುವ ಮೂಲಕ ಇದರ ವ್ಯತಿರಿಕ್ತ ಪರಿಣಾಮಗಳನ್ನೂ ನಾವು ಎದುರಿಸುತ್ತಿದ್ದೇವೆ. ಹೃದ್ರೋಗ, ಹೈಪರ್‌ಟೆನ್ಶನ್‌ ಸೇರಿದಂತೆ ಹಲವು ಸಮಸ್ಯೆಗಳು ಸಣ್ಣ ವಯಸ್ಸಿನಲ್ಲೇ ಎಡತಾಕುತ್ತಿವೆ. ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್‌ಒ) ಪ್ರಕಾರ ಒಬ್ಬ ಆರೋಗ್ಯವಂತ ದಿನಕ್ಕೆ ೫ ಗ್ರಾಂಗಿಂತ ಹೆಚ್ಚು ಸೋಡಿಯಂ ಸೇವಿಸಬಾರದು. ಐಸಿಎಂಆರ್‌ ಹೇಳುವಂತೆ ಒಬ್ಬನಿಗೆ ಪ್ರತಿನಿತ್ಯ ೧.೧ರಿಂದ ೩.೩ ಗ್ರಾಂ ಸೋಡಿಯಂ ಅಥವಾ ೨.೮ರಿಂದ ೮.೩ ಗ್ರಾಂ ಸೋಡಿಯಂ ಕ್ಲೋರೈಡ್‌ ಅಗತ್ಯವಿದೆ. ಆದರೆ, ಸದ್ಯ ನಾವೆಲ್ಲರೂ ನಮ್ಮ ದೇಹಕ್ಕೆ ನೀಡುತ್ತಿರುವ ಸೋಡಿಂ ಇದರ ದುಪ್ಪಟ್ಟಿದೆ. ಆಧುನೀಕರಣ, ಆಧುನಿಕ ಆಹಾರ ಶೈಲಿಯ ಪರಿಣಾಮದಿಂದ ನಾವು ನಮ್ಮ ದೇಹಕ್ಕೆ ಅಗತ್ಯವಿರುವ ಸೋಡಿಯಂಗಿಂತ ಹೆಚ್ಚೇ ಸೋಡಿಯಂ ತಿನ್ನುವ ಕಾರಣ ಈ ಬಗ್ಗೆ ನಾವು ಗಂಭೀರವಾಗಿ ಯೋಚನೆ ಮಾಡಬೇಕಿದೆ.
ಹಾಗಾದರೆ, ಸೋಡಿಯಂ ನಮ್ಮ ದೇಹಕ್ಕೆ ಅನಗತ್ಯವಾಗಿ ಸೇರದಂತೆ ಮಾಡಲು ನಾವು ಯಾವ ಕ್ರಮ ಕೈಗೊಳ್ಳಬಹುದು ಎಂಬ ಪ್ರಶ್ನೆ ನಿಮ್ಮದಾಗಿದ್ದರೆ, ಈ ಕೆಲವು ಕ್ರಮಗಳನ್ನು ನೀವು ಗಂಭೀರವಾಗಿ (How Much Salt Is Too Much) ಪರಿಗಣಿಸಬಹುದು.

• ಬೇಳೆಕಾಳುಗಳಲ್ಲಿ ಸೋಡಿಯಂ ಅತ್ಯಂತ ಕಡಿಮೆ ಇದೆ. ಇವುಗಳಲ್ಲಿ ಆರೋಗ್ಯಕ್ಕೆ ಅತ್ಯಂತ ಅಗತ್ಯವಾದ ಪ್ರೊಟೀನ್‌, ಪೊಟಾಶಿಯಂ, ಪಾಸ್ಪರಸ್‌ ಹಾಗೂ ನಾರಿನಂಶವಿದೆ. ಹಾಗಾಗಿ, ಬೇಳೆ ಕಾಳುಗಳ ಸೇವನೆಯನ್ನು ಹೆಚ್ಚು ಮಾಡಿ. ಮಾಂಸ ಸೇವಿಸುವವರಾಗಿದ್ದರೆ, ಸಂಸ್ಕರಿಸಿದ ಮಾಂಸಕ್ಕೆ ಬದಲಾಗಿ ತಾಜಾ ಮಾಂಸವನ್ನೇ ಬಳಸಿ.
• ತಾಜಾ ಹಾಲು, ಪನೀರ್‌, ಮೊಸರು ಇವುಗಳಲ್ಲಿ ಕಡಿಮೆ ಸೋಡಿಯಂ ಇರುತ್ತದೆ. ಸಂಸ್ಕರಿಸಿದ ಚೀಸ್‌ನಲ್ಲಿ ಹೆಚ್ಚು ಸೋಡಿಯಂ ಇರುತ್ತದೆ.
• ಹಣ್ಣುಗಳು ಹಾಗೂ ತರಕಾರಿಗಳ ಪೈಕಿ, ಆಯಾ ಕಾಲಕ್ಕೆ ದೊರೆಯುವುದನ್ನೇ ಹೆಚ್ಚು ಬಳಸಿ. ಋತುಮಾನಕ್ಕೆ ಅನುಗುಣವಾಗಿ ದೊರೆಯುವ ತರಕಾರಿ ಹಣ್ಣುಗಳನ್ನು ಸೇವನೆ ಮಾಡಿ. ತಾಜಾ ಆಹಾರಗಳಲ್ಲಿ ಸೋಡಿಯಂ ಕಡಿಮೆ ಇರುತ್ತದೆ. ಸೋಡಿಯಂ ಕಡಿಮೆ ಇರುವ ಆಹಾರಗಳಲ್ಲಿ ಸಹಜವಾಗಿಯೇ ಪೊಟಾಶಿಯಂ ಹೆಚ್ಚು ಇರುತ್ತದೆ. ಪೊಟಾಶಿಯಂ ಹೈಪರ್‌ ಟೆನ್ಶನ್‌ ಸೇರಿದಂತೆ ಹಲವು ಸಮಸ್ಯೆಗೆ ಆರೋಗ್ಯಕರವಾದ ಪೋಷಕಾಂಶವಾಗಿದೆ. ಒಣಹಣ್ಣುಗಳನ್ನೂ ತಿನ್ನಬಹುದು. ಆದರೆ, ಒಣಹಣ್ಣುಗಳನ್ನು ಸಂಸ್ಕರಿಸಿ ಮಾಡಿದ ಆರೋಗ್ಯಕರದ ಹೆಸರಿನಲ್ಲಿ ಉಪ್ಪು ಸಕ್ಕರೆ ಸೇರಿಸಿದ ಪ್ಯಾಕೆಟ್ಟುಗಳ ಆಹಾರಗಳನ್ನು ಕಡಿಮೆ ಮಾಡಿ. ತಾಜಾ ಒಣಹಣ್ಣುಗಳಾಗಿದ್ದರೆ ಒಳ್ಳೆಯದೇ. ಟೊಮೆಟೋ ಕೆಚಪ್‌ಗಳು, ಸಾಸ್‌ಗಳು, ಡಿಪ್‌ಗಳು ಇತ್ಯಾದಿಗಳ ಬಳಕೆ ಆದಷ್ಟು ಕಡಿಮೆ ಮಾಡಿ.
• ಪುಡಿ ಉಪ್ಪಾದರೂ ಸರಿ, ಹಿಮಾಲಯನ್‌ ಕಲ್ಲುಪ್ಪಾದರೂ ಸರಿ, ಉಪ್ಪು ಉಪ್ಪೇ. ಅದು ಅತಿಯಾಗಬಾರದು. ಹೀಗಾಗಿ, ಬಹುಮುಖ್ಯವಾಗಿ ನಿಯಂತ್ರಣ ಸಾಧಿಸಬೇಕಾದ ಆಹಾರ ಎಂದರೆ ಅದು ಕುರುಕಲು ತಿಂಡಿಗಳು. ಹೊರಗೆ ದೊರೆಯುವ ಚಿಪ್ಸ್‌ ಸೇರಿದಂತೆ ನಾನಾ ಬಗೆಯ ಆಕರ್ಷಕ ಕುರುಕಲು ತಿಂಡಿಗಳ ಬಳಕೆ ಆದಷ್ಟೂ ಕಡಿಮೆ ಮಾಡಿ. ಇದನ್ನು ನಿಯಂತ್ರಿಸಿದರೆ ನಿಮ್ಮ ದೇಹಕ್ಕೆ ಅಧಿಕವಾಗ ಸೇರುವ ಉಪ್ಪಿನ ಪ್ರಮಾಣ ಒಂದು ಹಂತಕ್ಕೆ ನಿಯಂತ್ರಣಕ್ಕೆ ಬರುತ್ತದೆ. ಹಾಗಂತ ಯಾವುದಕ್ಕೂ ಉಪ್ಪು ಹಾಕದೆ ತಿನ್ನಬೇಕಾಗಿಲ್ಲ. ಅಗತ್ಯ ಪ್ರಮಾಣದ ಉಪ್ಪು ದೇಹಕ್ಕೆ ಬೇಕೇ ಬೇಕು ಎಂಬುದೂ ನೆನಪಿನಲ್ಲಿರಲಿ.

ಬಿಯರ್‌ ಕೈಯಲ್ಲಿ ಹಿಡಿದು ʻಚಿಯರ್ಸ್‌ʼ ಹೇಳುವವರ ಸಂಖ್ಯೆ ಆಗಸದಲ್ಲಿನ ಚುಕ್ಕಿಗಳಂತೆ… ಎಣಿಸಲಾಗದು. ಮನದಲ್ಲಿರುವ ಭಾವ ಯಾವುದೇ ಇರಲಿ, ಅವೆಲ್ಲಕ್ಕೂ ಕೈಯಲ್ಲಿರುವ ಗ್ಲಾಸೇ ಮದ್ದು ಎಂದು ನಂಬಿದವರಿದ್ದಾರೆ. ಅಂದರೆ ಬೇಸರ, ಖುಷಿ, ಶೋಕ, ಉತ್ಸಾಹ, ಮುರಿದೋದ ಮನಸ್ಸು, ಆಫೀಸಿನ ಪ್ರಮೋಶನ್ನು ಮುಂತಾದ ಎಲ್ಲವಕ್ಕೂ ಇದೊಂದೇ ಪಥ್ಯ. ಬಿಯರನ್ನು ʻನಂಬಿ ಕೆಟ್ಟವರಿಲ್ಲʼ ಎಂಬುದು ಇವರ ನಿಷ್ಠೆಗೆ ಸಾಕ್ಷಿ. ಆದರೂ ತಂತಮ್ಮ ʻಹೊಟ್ಟೆಪಾಡನ್ನುʼ ನೋಡಿಕೊಳ್ಳಬೇಡವೇ? ಬೇಡವೆಂದರೂ ಹೊರಗಿಣುಕಿ ಎಲ್ಲರೆದುರು ಮರ್ಯಾದೆಯನ್ನು ಹರಾಜಾಕುವ ʻಬಿಯರ್‌ ಬೆಲ್ಲಿʼಗಳಿಗೆ ಏನು ಮದ್ದು ಮಾಡುವುದು? ಇಷ್ಟಕ್ಕೂ ಬಿಯರ್‌ ಕುಡಿಯುವುದರಿಂದ (Beer Side Effect) ತೂಕ ಹೆಚ್ಚುವುದು ನಿಜವೇ?

ಏನಿದು ಬಿಯರ್‌?

ಬಿಯರ್‌ ಎಂದರೆ ಆಲ್ಕೋಹಾಲ್‌ ಅಲ್ಲವೇ ಅಲ್ಲ ಎಂದು ಯಾರಾದರೂ ನಂಬಿಸಲು ಯತ್ನಿಸಿದರೆ, ಯಾವುದಕ್ಕೂ ಇರಲಿ ಈ ವಿಷಯ ನಿಮ್ಮಲ್ಲಿ! ಗೋದಿ, ಬಾರ್ಲಿ ಮುಂತಾದ ಧಾನ್ಯಗಳಿಂದ ಸಿದ್ಧವಾಗುವ ಆಲ್ಕೋಹಾಲ್‌ ಇರುವಂಥ ಪೇಯವಿದು. ಮೊದಲಿಗೆ ಈ ಧಾನ್ಯಗಳನ್ನು ಹುರಿದು ಒಡೆದುಕೊಳ್ಳಲಾಗುತ್ತದೆ. ಅದನ್ನು ನೀರಿನಲ್ಲಿ ನೆನೆಸಿಟ್ಟು, ಅದರ ನೈಸರ್ಗಿಕ ಸಕ್ಕರೆಯಂಶವನ್ನು ಬೇರ್ಪಡಿಸಿ, ಸಂಸ್ಕರಿಸಿ, ಯೀಸ್ಟ್‌ ಸೇರಿಸಿ ಬಿಯರ್‌ ಸಿದ್ಧ ಮಾಡಲಾಗುತ್ತದೆ.
ಈ ಪ್ರಕ್ರಿಯೆಯಲ್ಲಿ ಆಲ್ಕೋಹಾಲ್‌ ಎಲ್ಲಿದೆ? ಯೀಸ್ಟ್‌ ಸೇರಿಸಿದ ನಂತರ ಇದರಲ್ಲಿ ಆಲ್ಕೋಹಾಲ್‌ ಮತ್ತು ಇಂಗಾಲದ ಡೈಆಕ್ಸೈಡ್‌ ಬಿಡುಗಡೆ ಆಗುತ್ತದೆ. ಸಾಮಾನ್ಯವಾಗಿ ಬಿಯರ್‌ನಲ್ಲಿ 4-6 ಶೇ. ಆಲ್ಕೋಹಾಲ್‌ ಇರುತ್ತದೆ. ಆದರೆ ಪಾನಪ್ರಿಯರ ಪಾಲಿಗೆ ಇದು ಏನೂ ಅಲ್ಲ! ಹಾಗಾಗಿ ಸ್ಟ್ರಾಂಗ್‌ ಬಿಯರ್‌ಗಳಿಗೆ ಬೇಡಿಕೆ ಹೆಚ್ಚು. ಇನ್ನು, ಶೇ. ೪೦ರಷ್ಟು ಆಲ್ಕೋಹಾಲ್‌ ಹೊಂದಿರುವ ಕಠೋರ ಬಿಯರ್‌ಗಳೂ ಲಭ್ಯವಿವೆ. ಇದರಲ್ಲಿ ಬಳಸುವ ಧಾನ್ಯ, ಆಲ್ಕೋಹಾಲ್‌ ಪ್ರಮಾಣ ವ್ಯತ್ಯಾಸವಾದಂತೆ ಬಿಯರ್‌ನ ರುಚಿ, ಬಣ್ಣಗಳೂ ಭಿನ್ನವಾಗುತ್ತವೆ. ಇದಿಷ್ಟು ಬಿಯರ್‌ನ ಪ್ರವರ. ಇದನ್ನು ಕುಡಿದರೆ ಡೊಳ್ಳು ಹೊಟ್ಟೆ ಗುಂಡಂದಿರಾಗುವುದು ಹೌದೇ? ಅರೆ! ಇದೇನು ಸುಮ್ಮನೆ ಹೇಳುವುದಲ್ಲ… ಕುಡಿದು ತಲೆ ಬೆಳ್ಳಗಾದವರ ಅನುಭವದ ಮಾತುಗಳಿವು. ಆಲ್ಕೋಹಾಲ್‌ ಪೇಯಗಳ ಕ್ಯಾಲರಿಗಳು ಹೆಚ್ಚು. ಅವೆಲ್ಲ ಶರೀರಕ್ಕೆ ಬೇಕಾಗುವಂಥ ಸತ್ವಗಳಲ್ಲದೆ, ಖಾಲಿ ಕ್ಯಾಲರಿಗಳು. ಇದರ ಸಮಸ್ಯೆಯೆಂದರೆ ಹೊಟ್ಟೆ ತುಂಬುವುದಿಲ್ಲ. ಅಂದರೆ ದೇಹಕ್ಕೆ ಕ್ಯಾಲರಿಗಳು ಹೋಗಿದ್ದು ಹೌದು, ಆದರೆ ಹೊಟ್ಟೆ ಹಸಿದೇ ಇರುತ್ತದೆ. ಹಾಗಾಗಿ ಈಗ ಕುಡಿದಿದ್ದು ಸಾಲದೆಂಬಂತೆ ಮತ್ತಷ್ಟು ತಿನ್ನುವುದು ಅನಿವಾರ್ಯ. ಜೊತೆಗೆ, ಈ ಪೇಯಗಳ ಜೊತೆಗೆ ತಿನ್ನುವುದೆಲ್ಲ, ಜಿಡ್ಡು ಮತ್ತು ಉಪ್ಪಿನ ತಿನಿಸುಗಳು. ಇವೆಲ್ಲವುಗಳ ಪರಿಣಾಮವೆಂದರೆ, ಅಗತ್ಯಕ್ಕಿಂತ ಅತಿ ಹೆಚ್ಚಿನ ಕ್ಯಾಲರಿ ಒಳಗೆ ಹೋಗುವುದು. ಜೊತೆಗೆ, ದೇಹದಲ್ಲಿ ಕೊಬ್ಬು ಕರಗಿಸುವ ಪ್ರಯತ್ನದಲ್ಲಿ ಇದ್ದವರಿಗೆ ಹಿನ್ನಡೆಯಾಗುವುದು. ನೋಡಿ, ಪಾನಪ್ರಿಯರ ಜೀವನಾನುಭವ ಸುಳ್ಳೇನಲ್ಲವಲ್ಲ!

ಇದನ್ನೂ ಓದಿ: Drinks for Summer: ಬೇಸಿಗೆಯಲ್ಲಿ ತಂಪಾಗಿರಬೇಕೆ? ಈ ಪೇಯಗಳನ್ನು ತಪ್ಪದೇ ಕುಡಿಯಿರಿ

ಫೈಟೊಈಸ್ಟ್ರೋಜೆನ್‌

ಬಿಯರ್‌ನ ರುಚಿ ಹೆಚ್ಚಿಸುವುದಕ್ಕೆ ಹಾಪ್‌ ಗಿಡದ ಹೂವುಗಳನ್ನು ಬಳಸಲಾಗುತ್ತದೆ. ಈ ಹೂವುಗಳಿಗೆ ವಿಭಿನ್ನ ಕಹಿ ರುಚಿಯೊಂದಿದ್ದು, ಬಿಯರ್‌ನ ರುಚಿ ಹತ್ತಿಸುವ ಕಹಿಗೆ ಇದೇ ಕಾರಣ. ಇದರ ರುಚಿ ಹೆಚ್ಚಿಸಲು ಸಾಕಷ್ಟು ಸಿಹಿಯನ್ನು ಸೇರಿಸುವುದರಿಂದ, ಈ ಕಹಿ ರುಚಿಯನ್ನೂ ಇದಕ್ಕೆ ಸೇರಿಸಲಾಗುತ್ತದೆ. ಈ ಹಾಪ್‌ ಹೂವುಗಳಲ್ಲಿ ಫೈಟೊ ಈಸ್ಟ್ರೋಜೆನ್‌ಗಳು ಹೇರಳವಾಗಿವೆ. ಅಂದರೆ, ಸ್ತ್ರೀ ಹಾರ್ಮೋನುಗಳಾದ ಈಸ್ಟ್ರೋಜೆನ್‌ಗಳಂತೆ ವರ್ತಿಸುವ, ಆದರೆ ಅದಲ್ಲದ, ಅಂಶಗಳಿವು. ಇದರಲ್ಲಿರುವ ಗಮ್ಮತ್ತೇನೆಂದರೆ, ಪುರುಷರ ಹಾರ್ಮೋನುಗಳನ್ನು ಏರುಪೇರು ಮಾಡುವ ಈ ಫೈಟೊ ಈಸ್ಟ್ರೋಜೆನ್‌ಗಳು, ಹೊಟ್ಟೆಯ ಸುತ್ತಳತೆಯನ್ನು ಹಿಗ್ಗಿಸುತ್ತಾ ಹೋಗುತ್ತವೆ. ಅಲ್ಲಿಗೆ ತಪ್ಪು ಕುಡಿಯುವವರದ್ದಲ್ಲ, ಫೈಟೊಈಸ್ಟ್ರೋಜೆನ್‌ದು! ಹಾಗಾಗಿ, ಬಿಯರ್‌ ಕುಡಿಯುವುದು ಕೇವಲ ಹೊಟ್ಟೆಯ ಸುತ್ತಳತೆಯನ್ನು ಹೆಚ್ಚಿಸುವುದಷ್ಟೇ ಅಲ್ಲ, ದೇಹದ ಒಟ್ಟಾರೆ ತೂಕವನ್ನೂ ಏರಿಸುತ್ತದೆ. ಇದರಿಂದ ಹೃದಯದ ತೊಂದರೆಗಳು, ಯಕೃತ್ತಿನ ಸಮಸ್ಯೆಗಳು, ರಕ್ತದೊತ್ತಡ, ಮಧುಮೇಹ, ಟ್ರೈಗ್ಲಿಸರೈಡ್‌ ಹೆಚ್ಚಳ ಮುಂತಾದ ಹತ್ತಾರು ಸಮಸ್ಯೆಗಳು ಅಮರಿಕೊಳ್ಳುತ್ತವೆ. ಪಾನಪ್ರಿಯರಿಗೆ ಯಾವ ರೋಗ ಆದೀತು ಎಂಬುದನ್ನು ಆಯ್ದುಕೊಳ್ಳುವುದಕ್ಕೂ ದಾರಿಯಿಲ್ಲ. ಇರುವ ದಾರಿಯೆಂದರೆ, ಇಂಥವನ್ನೆಲ್ಲ ಮಿತಗೊಳಿಸುವುದು.

ಬಗೆಬಗೆಯ (Health Tips Kannada) ಐಸ್‌ಕ್ರೀಂ, ಚಾಕೋಲೇಟ್‌, ಬ್ರೌನಿ ಡೋನಟ್‌ಗಳು, ಕೇಕ್‌-ಪೇಸ್ಟ್ರಿಗಳು, ಪಿಜ್ಜಾ ಬರ್ಗರ್‌ಗಳು ಬಾಯಲ್ಲಿ ನೀರೂರಿಸುವ ತಿನಿಸುಗಳೇ ಎಂಬುದರಲ್ಲಿ ಎರಡು ಮಾತಿಲ್ಲ. ಇವೆಲ್ಲ ನಮಗಿಷ್ಟವಿಲ್ಲ ಎಂದು ಹೇಳುವ ಮಂದಿ ಸಿಗುವುದು ಬಹಳ ಕಷ್ಟ. ಪುಟಾಣಿ ಮಕ್ಕಳಿಂದ ಹಿಡಿದು, ಮುದುಕರವರೆಗೆ ಎಲ್ಲರೂ ಇಂತಹ ಆಹಾರದ ಹೆಸರು ಕೇಳುತ್ತಲೇ ಬಾಯಿ ಚಪ್ಪರಿಸುವವರೇ. ಗೆಳೆಯರೆಲ್ಲ ಜೊತೆ ಸೇರಿದಾಗ, ಯಾಕೋ ಬೇಸರವೆನಿಸಿದಾಗ, ಬೇಸಿಗೆಯ ಬಿಸಿಲಿಗೆ, ಮಳೆಗಾಲದ ಚಳಿಗೆ ಅಥವಾ ʻಯಾರು ಅಡುಗೆ ಮಾಡುತ್ತಾರೆʼ ಎಂದೆನಿಸುವ ಉದಾಸೀನದ ಸಂಜೆಗಳಲ್ಲಿ ಈ ಎಲ್ಲ ತಿನಿಸುಗಳೂ ನಮ್ಮನ್ನು ತಮ್ಮ ಬಳಿಗೆ ಕರೆಯುತ್ತವೆ. ಆಧುನಿಕ ಜೀವನಶೈಲಿಯೂ ಕೂಡಾ ಇಂತಹ ಒಂದಿಲ್ಲೊಂದು ಬಗೆಯ ತಿನಿಸುಗಳನ್ನು ವಾರಕ್ಕೆರಡು ಬಾರಿಯಾದರೂ ತಿನ್ನುವಂತೆ ಮಾಡುತ್ತವೆ. ಆರೋಗ್ಯಕ್ಕೆ ಒಳ್ಳೆಯದಲ್ಲ ಎಂಬುದು ತಿಳಿದಿದ್ದರೂ ಇವನ್ನು ನೋಡಿದಾಗ,, ನೆನೆಸಿಕೊಂಡಾಗ ಬಾಯಲ್ಲಿ ನೀರೂರುವಂತೆ ಮಾಡುತ್ತವೆ. ಈ ಎಲ್ಲ ಆಹಾರಗಳು ನಮಗೆ ಆಯಾ ಕ್ಷಣಕ್ಕೆ ಸಂತೋಷವನ್ನು ನೀಡಬಲ್ಲವಾದರೂ, ನಿಜಕ್ಕೂ ನಮ್ಮ ಮಿದುಳಿಗೆ ಸಂತೋಷ ನೀಡಬಲ್ಲವೇ?

ಖಿನ್ನತೆಗೆ ದೂಡಬಹುದು:

ಖಂಡಿತಾ ಇಲ್ಲ. ಇವಾವುವೂ ನಿಮ್ಮ ಮಿದುಳಿಗೆ ಸಂತೋಷ ನೀಡುವ ಆಹಾರಗಳಲ್ಲ. ಬದಲಾಗಿ ನಿಮ್ಮ ದುಃಖವನ್ನು, ಬೇಸರವನ್ನು, ಏಕತಾನತೆಯ ಭಾವವನ್ನು ಇನ್ನಷ್ಟು ಹೆಚ್ಚು ಮಾಡುತ್ತದೆ. ಹೌದು. ಆ ಕ್ಷಣದಲ್ಲಿ, ಸಂತೋಷ ಸಿಕ್ಕರೂ, ಖುಷಿಯೆನಿಸದರೂ, ಇಂತಹ ಆಹಾರಗಳಿಗೆ ನಮ್ಮನ್ನು ಬೇಸರಕ್ಕೆ ತಳ್ಳುವ ಗುಣವಿದೆ. ಇನ್ನಷ್ಟು ಮತ್ತಷ್ಟು ಇಂತಹ ಆಹಾರವನ್ನು ಬಯಸುವ ನಮ್ಮ ಮನಸ್ಸು ನಮ್ಮನ್ನು ಮತ್ತಷ್ಟು ಖಿನ್ನತೆಗೆ ದೂಡುತ್ತದೆ.

ಒಂದು ಅಧ್ಯಯನದ ಪ್ರಕಾರ, ಇಂತಹ ಆಹಾರಗಳನ್ನು ಅಥವಾ, ಪೋಷಕಾಂಶಗಳ ಕೊರತೆಯಿರುವ ಆಹಾರವನ್ನೇ ತಿಂದ ಮಂದಿಯ ಮಿದುಳಿನ ಆರೋಗ್ಯ ದಿನೇದಿನೇ ಹದಗೆಟ್ಟಿವೆ. ಅಷ್ಟೇ ಅಲ್ಲ, ಕಾಲಕ್ರಮೇಣ ಇಂತಹ ಆಹಾರ ತಿಂದವರು ಬಹುಬೇಗನೆ ಖಿನ್ನತೆ ಹಾಗೂ ಮಾನಸಿಕ ಒತ್ತಡದಂತಹ ಸಮಸ್ಯೆಗಳಿಗೆ ಒಳಗಾಗಿರುವುದು ಅದ್ಯಯನಗಳಿಂದ ತಿಳಿದುಬಂದಿದೆ.

ನಮಗೆ ಖುಷಿಯೆನಿಸುವ ಆಹಾರ ನಮ್ಮ ಮಿದುಳಿಗೆ ಖುಷಿಕೊಡಬೇಕೆಂದೇನಿಲ್ಲ. ಮಿದುಳಿಗೆ ಖುಷಿ ಕೊಡುವ ಆಹಾರಗಳೇ ಬೇರೆ. ತಾಜಾ ಹಣ್ಣುಗಳು ಹಾಗೂ ತರಕಾರಿಗಳು, ಬೇಳೆ ಕಾಳುಗಳು, ಹಿತಮಿತವಾಗಿ ಎಣ್ಣೆ (ಒಳ್ಳೆಯ ಎಣ್ಣೆ), ಮೊಳಕೆ ಕಾಳುಗಳು, ಮೀನು, ಒಣ ಬೀಜಗಳು, ಹಾಲು ಹಾಗೂ ಹಾಲಿನ ಉತ್ಪನ್ನಗಳು, ಮೊಟ್ಟೆ, ಕೋಳಿ ಇತ್ಯಾದಿ ನಮ್ಮ ಮಿದುಳನ್ನೂ ಆರೋಗ್ಯವಾಗಿ ಖಷಿಯಾಗಿ ಇಡುವಂತಹ ಆಹಾರಗಳು ಎಂದು ಅದ್ಯಯನ ಹೇಳುತ್ತದೆ.

ಮಿದುಳಿನ ಮೇಲೆ ಪರಿಣಾಮ:

ಈ ಎಲ್ಲ ಆಹಾರಗಳೂ ನಮ್ಮ ಮಿದುಳನ್ನು ಇದ್ದಕ್ಕಿದ್ದಂತೆ ಉಲ್ಲಾಸದಾಯಕವನ್ನಾಗಿ ಮಾಡಲಾಗದಿದ್ದರೂ, ಇವು ದೀರ್ಘಕಾಲಿಕವಾಗಿ ಮಿದುಳಿನ ಮೇಲೆ ಉತ್ತಮ ಪರಿಣಾಮ ಬೀರುವ ಸಾಮರ್ಥ್ಯ ಉಳ್ಳವಾಗಿವೆ. ಸಂಸ್ಕರಿಸಿದ ಆಹಾರಗಳು ಹಾಗೂ ಫಟಾಫಟ್‌ ಆಧುನಿಕ ತಿನಿಸುಗಳು ನಮ್ಮನ್ನು ದಿಢೀರ್‌ ಸೆಳೆವ ಹಾಗೂ ಉಲ್ಲಾಸದಾಯಕವನ್ನಾಗಿ ಮಾಡುವ ಗೂಣ ಹೊಂದಿದ್ದರೂ ನಮ್ಮ ದೇಹದ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುವಂತೆಯೇ ಮಿದುಳಿನ ಮೇಲೆಯೂ ಕೆಟ್ಟ ಪರಿಣಾಮ ಬೀರಬಲ್ಲವು.

ಇದನ್ನೂ ಓದಿ:Video Viral: ಮಹಿಳೆಯನ್ನು ತಿವಿದು ರಸ್ತೆಯುದ್ದಕ್ಕೂ ಎಳೆದೊಯ್ದ ಎಮ್ಮೆ! ವಿಡಿಯೊ ಇದೆ

ಮಾನಸಿಕವಾಗಿ ಖಿನ್ನತೆ ಹಾಗೂ ಇನ್ನಿತರ ಸಮಸ್ಯೆಗಳಿಂದ ಬಳಲುವ ಮಂದಿಯ ಆಹಾರಕ್ರಮ ಗಮನಿಸಿದರೂ ಇದಕ್ಕೆ ಪುಷ್ಟಿ ದೊರೆಯುತ್ತದೆ. ನಿಮ್ಮ ನಾಲಿಗೆ ಬಯಸುವ ಆಹಾರಗಳನ್ನು ನಿಮ್ಮ ಮಿದುಳು ಬಯಸದು ಎಂಬುದನ್ನು ನೆನಪಿನಲ್ಲಿಡಿ. ಪ್ಯಾಕೇಜ್ಡ್‌ ಸ್ನ್ಯಾಕ್‌ಗಳು, ಆಲ್ಕೋಹಾಲ್‌, ಸೋಡಾ ಹಾಗೂ ಮಾರುಕಟ್ಟೆಯ ಇತರ ಪ್ಯಾಕೇಜ್ಡ್‌ ಡ್ರಿಂಕ್‌ಗಳು, ಪ್ರೆಂಚ್‌ ಫ್ರೈಗಳು, ಡೋನಟ್‌, ವೈಟ್‌ ಬ್ರೆಡ್‌, ಸಂಸ್ಕರಿಸಿದ ಮಾಂಸ, ಬೆಣ್ಣೆ ಹಾಗೂ ಫುಲ್‌ ಕೊಬ್ಬಿರುವ ಚೀಸ್‌, ಕೆಚಪ್‌, ಸಿರಪ್‌, ಡಿಪ್‌ ಹಾಗೂ ಡ್ರೆಸ್ಸಿಂಗ್‌ಗಳು ಎಲ್ಲವೂ ಮಿದುಳಿಗೆ ನಿಜಕ್ಕೂ ಖುಷಿ ಕೊಡದ ಆಹಾರಗಳು ಎಂಬುದನ್ನು ನೆನಪಿಡಿ.