ಚಿಯಾ ಬೀಜಗಳು (Chia seeds) ಎಂಬ ಪುಟಾಣಿ ಬೀಜಗಳು ಇಂದು ತಮ್ಮ ಆರೋಗ್ಯಕರ ಗುಣಗಳಿಂದ ಮನೆಮಾತಾಗಿದೆ. ಎಲ್ಲರೂ ತಮ್ಮ ಡಯಟ್‌ನಲ್ಲಿ ಚಿಯಾ ಬೀಜಗಳನ್ನು ಸೇರಿಸಲಾರಂಭಿಸಿದ್ದಾರೆ. ಚಿಯಾ ಬೀಜಗಳಿಂದ ತೂಕ ಇಳಿಸುವುದೂ ಸೇರಿದಂತೆ ಹಲವಾರು ಲಾಭಗಳನ್ನು ಪಡೆಯುವ ಉದ್ದೇಶದಿಂದ ಆರೋಗ್ಯಕರ ಶೈಲಿಯತ್ತ ಹೊರಳುತ್ತಿದ್ದಾರೆ. ಇದೆಲ್ಲ ನಿಜವೇ ಆದರೂ, ನೀವು ಚಿಯಾ ಬೀಜಗಳನ್ನು ಸೇವಿಸುತ್ತಿದ್ದರೆ, ಕೊಂಚ ಎಚ್ಚರಿಕೆಯೂ ಅಗತ್ಯ. ನೀವು ಮಧುಮೇಹಿಗಳಾಗಿದ್ದರೆ, ಅದಕ್ಕಾಗಿ ಔಷಧಿ ಸೇವಿಸುತ್ತಿದ್ದರೆ, ಹೃದಯ, ರಕ್ತದೊತ್ತಡದ ಸಮಸ್ಯೆಯಿದ್ದು ಅದಕ್ಕಾಗಿ ನಿತ್ಯವೂ ಔಷಧಿ ಸೇವಿಸುತ್ತಿದ್ದರೆ ಚಿಯಾ ಬೀಜಗಳಿಂದಾಗಿ ನಿಮ್ಮ ಆರೋಗ್ಯದಲ್ಲಿ ಏರುಪೇರೂ ಆಗಬಹುದು. ಬನ್ನಿ, ಈ ಬಗ್ಗೆ ವಿಸ್ತೃತವಾಗಿ ತಿಳಿಯೋಣ.

ರಕ್ತದೊತ್ತಡ ಹೆಚ್ಚು ಇಳಿಯಬಹುದು

ಚಿಯಾ ಬೀಜಗಳು ರಕ್ತದೊತ್ತಡದ ಸಮಸ್ಯೆ ಇದ್ದವರಿಗೆ ಒಳ್ಳೆಯದು ಎಂದು ನೀವು ಹೇಳಿರುವುದನ್ನು ಕೇಳಿರಬಹುದು. ನಿಜವೇ ಇದು. ಚಿಯಾ ಬೀಜಗಳಲ್ಲಿ ಆಂಟಿ ಆಕ್ಸಿಡೆಂಟ್‌ಗಳು ಹಾಗೂ ಪೆಪ್ಟೈಡ್‌ಗಳಿದ್ದು ಇವು ನೈಸರ್ಗಿಕವಾಗಿಯೇ ರಕ್ತದೊತ್ತಡವನ್ನು ಕಡಿಮೆ ಮಾಡುವ ಗುಣವನ್ನು ಹೊಂದಿದೆ. ಆ ಮೂಲಕ ಹೃದಯದ ಆರೋಗ್ಯಕ್ಕೂ ಇವು ಸ್ನೇಹಿಯಾಗಿಯೇ ವರ್ತಿಸುತ್ತದೆ. ರಕ್ತದೊತ್ತಡವನ್ನು ಕಡಿಮೆ ಮಾಡುವ ತಾಕತ್ತು ಚಿಯಾ ಬೀಜಗಳಿಗಿರುವುದು ಹೌದೇ ಆದರೂ, ನೀವು ರಕ್ತದೊತ್ತಡಕ್ಕೆ ಈಗಾಗಲೇ ಔಷಧಿ ಸೇವಿಸುತ್ತಿದ್ದರೆ ಒಮ್ಮೆ ಯೋಚಿಸಿ. ಯಾಕೆಂದರೆ, ರಕ್ತದೊತ್ತಡಕ್ಕಾಗಿ ನೀವು ಸೇವಿಸುವ ಆಂಟಿ ಹೈಪರ್‌ಟೆನ್ಸಿವ್‌ ಮಾತ್ರೆಗಳ ಜೊತೆಗೆ ಚಿಯಾ ಬೀಜಗಳನ್ನೂ ಸೇವಿಸುವುದರಿಂದ ನೀವು ಅಂದುಕೊಂಡದ್ದಕ್ಕಿಂತಲೂ ರಕ್ತದ ಒತ್ತಡ ಹೆಚ್ಚು ಇಳಿಯುವ ಸಾಧ್ಯತೆಗಳಿವೆ!

ಬ್ಲಡ್‌ ಥಿನ್ನರ್‌ ತೆಗೆದುಕೊಳ್ಳುತ್ತಿದ್ದರೆ ಎಚ್ಚರ

ಚಿಯಾ ಬೀಜಗಳಲ್ಲಿ ಆಂಟಿ ಪ್ಲೇಟ್‌ಲೆಟ್‌ ಗುಣವಿದೆ. ಇದು ರಕ್ತ ಹೆಪ್ಪುಗಟ್ಟುವುದನ್ನು ತಡೆಯುತ್ತದೆ. ಇದು ಹೃದಯದ ಆರೋಗ್ಯಕ್ಕೆ ಪೂರಕವೇ ಆದರೂ, ನೀವು ಈಗಾಗಲೇ ಬ್ಲಡ್‌ ಥಿನ್ನರ್‌ನಂತಹ ಔಷಧಿಗಳನ್ನು ನಿಮ್ಮ ಹೃದಯದ ಸಮಸ್ಯೆಗಾಗಿ ತೆಗೆದುಕೊಳ್ಳುತ್ತಿದ್ದರೆ, ರಕ್ರಸ್ರಾವದಂತಹ ಸಮಸ್ಯೆಗೂ ದೂಡಬಹುದು! ಹಾಗಾಗಿ ಈ ಬಗ್ಗೆ ಎಚ್ಚರಿಕೆ ಇರಲಿ.

ಸಕ್ಕರೆ ಅಂಶ ಹೆಚ್ಚು ಇಳಿಯಬಹುದು

ಚಿಯಾ ಬೀಜಗಳು ಮಧುಮೇಹಕ್ಕೆ ಬಹಳ ಒಳ್ಳೆಯದು. ಯಾಕೆಂದರೆ ಇದು ರಕ್ತದಲ್ಲಿರುವ ಸಕ್ಕರೆಯಂಶವನ್ನು ಕಡಿಮೆ ಮಾಡುವ ಗುಣವನ್ನು ಹೊಂದಿದೆ. ಇದರಲ್ಲಿರುವ ನಾರಿನಂಶ ಜೀರ್ಣಕ್ರಿಯೆಯನ್ನು ಪ್ರಚೋದಿಸಿ, ರಕ್ತಕ್ಕೆ ಸಕ್ಕರೆಯಂಶ ಸೇರುವುದನ್ನು ನಿಧಾನಗೊಳಿಸುತ್ತದೆ. ಇದೆಲ್ಲ ಒಳ್ಳೆಯದೇ ಆದರೂ, ನೀವು ಈಗಾಗಲೇ ಮಧುಮೇಹಕ್ಕಾಗಿ ಇನ್ಸುಲಿನ್‌ನಂತಹ ಔಷಧಿಗಳನ್ನು ಪಡೆಯುತ್ತಿದ್ದರೆ, ನಿಮ್ಮ ಶುಗರ್‌ ಲೆವೆಲ್‌ ಅನ್ನು ಪರೀಕ್ಷೆ ಮಾಡಿಕೊಳ್ಳಿ. ಚಿಯಾ ಬೀಜಗಳೂ ಸ್ವಲ್ಪ ಪ್ರಮಾಣದಲ್ಲಿ ಈ ಕೆಲಸ ಮಾಡುವುದರಿಂದ ಸಕ್ಕರೆಯ ಮಟ್ಟ ಅಂದುಕೊಂಡದ್ದಕ್ಕಿಂತ ಹೆಚ್ಚು ಇಳಿಯಬಹುದು. ಹೀಗಾಗಿ, ವೈದ್ಯರನ್ನು ಸಂಪರ್ಕಿಸಿ, ಔಷಧಿಯ ಮಟ್ಟವನ್ನು ಬೇಕಾದಷ್ಟಕ್ಕೆ ಬದಲಾಯಿಸಿಕೊಳ್ಳಿ.

ನಾರಿನ ಹೆಚ್ಚಾದರೂ ಒಳ್ಳೆಯದಲ್ಲ

ಚಿಯಾ ಬೀಜಗಳಲ್ಲಿ ಹೆಚ್ಚು ನಾರಿನಂಶವಿದೆ. ಕೆಲವೊಮ್ಮೆ ನಿಮ್ಮ ದೇಹಕ್ಕೆ ಅಗತ್ಯಕ್ಕಿಂತ ಹೆಚ್ಚು ನಾರಿನಂಶ ಇದರಿಂದ ಲಬ್ಯವಾಗಬಹುದು. ನಿತ್ಯವೂ ಚಿಯಾ ಬೀಜಗಳನ್ನು ಸೇವಿಸುವ ಮಂದಿ ಹಿತಮಿತವಾಗಿ ತೆಗೆದುಕೊಳ್ಳುವ ಬಗ್ಗೆ ಯೋಚಿಸಿ. ನಾರಿನಂಶ ಹೆಚ್ಚಾದರೆ, ಔಷಧ ದೇಹದಲ್ಲಿ ಕರಗುವ ಸಾಮರ್ಥ್ಯ ಕಡಿಮೆಯಾಗುತ್ತದೆ. ನೀವು ಮಾತ್ರೆಗಳನ್ನು ನಿತ್ಯವೂ ಸೇವಿಸುವವರಾಗಿದ್ದರೆ, ಚಿಯಾ ಬೀಜಗಳು ನಿಮ್ಮ ಮಾತ್ರೆಗಳನ್ನು ದೇಹಕ್ಕೆ ಸರಿಯಾದ ಪ್ರಮಾಣದಲ್ಲಿ ಹೀರಿಕೆಯಾಗದಂತೆ ಮಾಡಬಹುದು. ಹೀಗಾಗಿ, ನೀವು ಔಷಧಿ ಸೇವಿಸುವ ಹೊತ್ತು ಹಾಗೂ ಚಿಯಾ ಬೀಜಗಳನ್ನು ಸೇವಿಸುವ ಹೊತ್ತಿನ ಸಮತೋಲನ ಮಾಡಿಕೊಳ್ಳಲು ವೈದ್ಯರ ಸಲಹೆ ಪಡೆಯಿರಿ. ಅಗತ್ಯಕ್ಕಿಂತ ಹೆಚ್ಚು ಚಿಯಾಬೀಜಗಳನ್ನು ಸೇವಿಸಬೇಡಿ.

ಇದನ್ನೂ ಓದಿ: Breakfast Tips: ಬೆಳಗಿನ ಉಪಾಹಾರಕ್ಕೆ ಈ 5 ಬಗೆಯ ಆಹಾರಗಳನ್ನು ಸೇವಿಸಬೇಡಿ!

ಕಡಿಮೆ ಪ್ರಮಾಣದಿಂದ ಆರಂಭಿಸಿ

ನೀವು ಚಿಯಾ ಬೀಜಗಳನ್ನು ಸೇವಿಸಲು ಆರಂಭಿಸುವವರಾಗಿದ್ದರೆ, ಒಮ್ಮೆಲೇ ಅಧಿಕವಾಗಿ ತೆಗೆದುಕೊಳ್ಳಬೇಡಿ. ಕಡಿಮೆ ಪ್ರಮಾಣದಿಂದ ಆರಂಭಿಸಿ. ನಿಮಗೆ ಯಾವುದೇ ಆರೋಗ್ಯ ಸಮಸ್ಯೆಯಿದ್ದರೂ, ವೈದ್ಯರನ್ನು ಸಂಪರ್ಕಿಸಿ, ನಂತರ ಸೇವಿಸಿ. ಚಿಯಾ ಬೀಜಗಳು ಪೋಷಕಾಂಶಗಳಿಂದ ಸಮೃದ್ಧವಾಗಿದ್ದು, ಒಮೆಗಾ- 3, ನಾರಿನಂಶ, ಆಂಟಿ ಆಕ್ಸಿಡೆಂಟ್‌ಗಳೆಲ್ಲ ಇದ್ದರೂ, ಇವುಗಳು ಔಷಧಿ ಸೇವಿಸುತ್ತಿರಯವ ಮಂದಿಯ ದೇಹದಲ್ಲಿ ವರ್ತಿಸುವ ಪರಿಣಾಮವೇ ಬೇರೆ. ಹಾಗಾಗಿ, ಈಗಾಗಲೇ, ರಕ್ತದೊತ್ತಡ, ಹೃದಯದ ಸಮಸ್ಯೆ, ಮಧುಮೇಹ ಮತ್ತಿತರ ಸಮಸ್ಯೆಗಳಿಗೆ ಔಷಧಿ ಸೇವಿಸುತ್ತಿರುವ ಮಂದಿ ವೈದ್ಯರ ಸಲಹೆ ಪಡೆದು ಸೇವಿಸಿ. ಅಥವಾ, ಔಷಧಿಯ ಸಮಯಕ್ಕೂ ಚಿಯಾ ಬೀಜಗಳ ಸೇವನೆಗೂ ಕೊಂಚ ಅಂತರವಿಟ್ಟು ಅತಿ ಕಡಿಮೆ ಪ್ರಮಾಣದಲ್ಲಿ ಸೇವಿಸಿ. ಯಾವುದಕ್ಕೂ ವೈದ್ಯರ ಸಲಹೆ ಬಹಳ ಮುಖ್ಯ, ನೆನಪಿಡಿ.

ತೂಕ ಇಳಿಸಲು ಇಂದು ನೂರಾರು (Walking for Weight Loss) ದಾರಿಗಳಿವೆ. ಪ್ರತಿಯೊಬ್ಬರೂ ತಾವು ಮಾಡಿ ಯಶಸ್ವಿಯಾದ ಬಗೆಯನ್ನು ತಮ್ಮ ಹತ್ತಿರದವರಲ್ಲಿ ಹೇಳಿಕೊಳ್ಳುತ್ತಾರೆ. ಅದು ಡಯಟ್‌ ಇರಬಹುದು, ವ್ಯಾಯಾಮಗಳಿರಬಹುದು. ಒಟ್ಟಾರೆಯಾಗಿ, ತೂಕ ಇಳಿಸಲು ಹೊರಟ ಮಂದಿ ಯಾವ ಬಗೆಯ ವ್ಯಾಯಾಮದಲ್ಲಿ ತೂಕವನ್ನು ಖಂಡಿತ ಇಳಿಸಬಹುದು ಎಂಬ ಪ್ರಶ್ನೆಗೆ ಉತ್ತರವನ್ನು ಅಪೇಕ್ಷಿಸುತ್ತಾರೆ. ಇನ್ನೂ ಕೆಲವರಿಗೆ, ಯಾವ ಬಗೆಯ ವ್ಯಾಯಾಮವನ್ನೂ ನಿಯಮಿತವಾಗಿ ಮಾಡಲು ಸಾಧ್ಯವಾಗುವುದಿಲ್ಲ. ತೂಕ ಇಳಿಸುವುದು ಮಿಲಿಯನ್‌ ಡಾಲರ್‌ ಪ್ರಶ್ನೆಯಾಗಿ ಉಳಿಯುತ್ತದೆ. ಎಲ್ಲಿ ತಾನು ತಪ್ಪುತ್ತಿದ್ದೇನೆ ಎಂಬುದೂ ಅರ್ಥವಾಗುವುದಿಲ್ಲ. ಇನ್ನೂ ಕೆಲವರು, ಯಾವ ವ್ಯಾಯಾಮ, ಜಿಮ್‌ಗೂ ಗಂಟು ಬೀಳದೆ, ಕೇವಲ ವಾಕ್‌ ಮಾಡುವುದರಿಂದ ತಾನು ತೂಕ ಇಳಿಸುತ್ತೇನೆ, ಫಿಟ್‌ ಇರುತ್ತೇನೆ ಎಂದು ನಡಿಗೆಯನ್ನೇ ನಂಬುತ್ತಾರೆ. ನಿಯಮಿತ ನಡಿಗೆಯಿಂದಲೂ ತೂಕ ಇಳಿಸಬಹುದು ಎಂಬುದನ್ನು ಸಾಧಿಸಿ ತೋರಿಸಿದ ಮಂದಿಯೂ ಅನೇಕರಿದ್ದಾರೆ. ಬನ್ನಿ, ಕೇವಲ ನಡಿಗೆಯನ್ನೇ ನೀವು ನೆಚ್ಚಿಕೊಂಡಿರುವವರಾದರೆ, ನಡಿಗೆಯಿಂದ ತೂಕ ಇಳಿಸುವುದು ಹೇಗೆ ಎಂಬುದನ್ನು ನೋಡೋಣ.

ಇಂಟರ್ವಲ್‌ ವಾಕಿಂಗ್‌

ವಾಕ್‌ ಮಾಡುವಾಗ ಆಗಾಗ ಮಧ್ಯ ಮಧ್ಯ ಜೋರಾಗಿ ವೇಗವಾಗಿ ವಾಕ್‌ ಮಾಡುವುದು ಇಂಟರ್ವಲ್‌ ವಾಕಿಂಗ್‌. ಸ್ವಲ್ಪ ಕಾಲ ಜೋರಾದ ನಡಿಗೆ, ನಂತರ ನಿಧಾನವಾಗಿ ನಡಿಗೆಯ ವೇಗ ಕಡಿಮೆ ಮಾಡುವುದು, ಮತ್ತೆ ಜೋರಾಗಿ ನಡೆಯುವುದು, ಮತ್ತೆ ಸಾಮಾನ್ಯ ಸ್ಥಿತಿಯ ನಡಿಗೆ ಹೀಗೆ, ಇದನ್ನೇ ನಿತ್ಯವೂ ಮಾಡುವುದು. ಇಂತಹ ನಡಿಗೆಯಿಂದ ಹೆಚ್ಚು ಕ್ಯಾಲರಿಗಳು ಬರ್ನ್‌ ಆಗುವುದಲ್ಲದೆ, ಇದು ಒಳ್ಳೆಯ ಕಾರ್ಡಿಯೋನಂತೆ ಕೆಲಸ ಮಾಡುತ್ತದೆ. ಹೃದಯ ಬಡಿತ ಹೆಚ್ಚಾಗಿ, ದೇಹ ಚುರುಕಾಗಿತ್ತದೆ.

ಇನ್‌ಕ್ಲೈನ್‌ ವಾಕಿಂಗ್‌

ಈ ಬಗೆಯ ವಾಕಿಂಗ್‌ ಕೂಡಾ ತೂಕ ಇಳಿಸಲು ಹೆಚ್ಚು ಸೂಕ್ತವಾದ ವಾಕಿಂಗ್‌. ನಿಮ್ಮ ಮನೆಯ ಸುತ್ತಮುತ್ತ ಎಲ್ಲಾದರೂ ಏರುತಗ್ಗುಗಳ ಜಾಗವಿದ್ದರೆ ಹೀಗೆ ಮಾಡಬಹುದು. ಏರುಹಾದಿಯಲ್ಲಿ ವಾಕ್‌ ಮಾಡುವುದರಿಂದ ಮಾಂಸಖಂಡಗಳಿಗೆ ಒಳ್ಳೆಯ ವ್ಯಾಯಾಮ ದೊರಕಿ ಹೆಚ್ಚು ಕ್ಯಾಲರಿ ಬರ್ನ್‌ ಆಗುತ್ತದೆ.

ಪವರ್‌ ವಾಕಿಂಗ್‌

ಇದು ಕಡಿಮೆ ಸಮಯದಲ್ಲಿ ಹೆಚ್ಚು ನಡಿಗೆ ಕ್ರಮ. ಇದರಲ್ಲಿ, ನೀವು ಪ್ರತಿದಿನ ವೇಗವಾಗಿ ನಡೆಯುತ್ತೀರಿ. ಆರಂಭದಿಂದ ಅಂತ್ಯದವರೆಗೂ ಒಂದೇ ಬಗೆಯಲ್ಲಿ ವೇಗವಾಗಿ ನಡೆದು ಬಹುಬೇಗನೆ ಒಂದು ಸೀಮಿತ ದೂರವನ್ನು, ಟಾರ್ಗೆಟ್‌ ಅನ್ನು ತಲುಪುತ್ತೀರಿ. ಇದರಿಂದ ಹೃದಯ ಬಡಿತ ಹೆಚ್ಚಾಗಿ, ಮೈಬೆವರಿ, ಹೆಚ್ಚು ಕ್ಯಾಲರಿ ಬರ್ನ್‌ ಆಗುತ್ತದೆ.

ಬ್ಯಾಕ್‌ವೆರ್ಡ್‌ ವಾಕಿಂಗ್‌

ಯಾವಾಗಲೂ ನಡೆಯುವುದಕ್ಕಿಂತ ಉಲ್ಟಾ ನಡೆದು ನೋಡಿ! ಹಿಮ್ಮುಖವಾಗಿ ನಡೆಯುವುದು ಅಷ್ಟು ಸುಲಭವಲ್ಲ. ಇದಕ್ಕೆ ನಮ್ಮ ಬೇರೆಯದೇ ಮಾಂಸಖಂಡಗಳು ಬಳಕೆಯಾಗುತ್ತವೆ. ಸಹಜವಾಗಿಯೇ, ನಿತಯವೂ ಮಾಡದ ಕೆಲಸವನ್ನು ಮಾಡುವ ಕಾರಣ, ಕಷ್ಟವಾಗುವುದರಿಂದ ಬಹುಬೇಗನೆ ಕ್ಯಾಲರಿ ಬರ್ನ್‌ ಆಗುತ್ತದೆ.

ವೈಟೆಡ್‌ ವಾಕಿಂಗ್‌

ಈ ಬಗೆಯ ನಡಿಯಲ್ಲಿ ನಿಮ್ಮ ಎರಡೂ ಕೈಗಳಲ್ಲಿ ಭಾರವನ್ನೂ ಎತ್ತಿರುತ್ತೀರಿ. ಜಿಮ್‌ನಲ್ಲಿ ವ್ಯಾಯಾಮಕ್ಕೆ ಬಳಸುವ ಡಂಬಲ್ಸ್‌ ಎತ್ತಿಕೊಂಡು ವಾಕ್‌ ಮಾಡುವುದರಿಂದ ಕಡಿಮೆ ಅವಧಿಯಲ್ಲಿ ಹೆಚ್ಚು ಕ್ಯಾಲರಿ ಬರ್ನ್‌ ಆಗುತ್ತದೆ.

ವಾಕಿಂಗ್‌ ಲೂಂಜಸ್‌

ವ್ಯಾಯಾಮಗಳನ್ನು ಮಾಡಿ ಅಭ್ಯಾಸ ಇರುವವರಿಗೆ ಲೂಂಜಸ್‌ ಬಗ್ಗೆ ತಿಳಿದಿಬಹುದು. ಈ ಲೂಂಜಸ್‌ ಅನ್ನು ಮಧ್ಯದಲ್ಲಿ ಮಾಡುತ್ತಾ ವಾಕ್‌ ಮಾಡುವುದರಿಂದ ಹೆಚ್ಚು ಕ್ಯಾಲರಿ ವರ್ನ್‌ ಮಾಡಬಹುದು.

ಹೈ ನೀ ವಾಕಿಂಗ್‌

ಮೊಣಕಾಲನ್ನು ಎತ್ತರೆತ್ತರಕ್ಕೆ ಎತ್ತಿ ಇಡುತ್ತಾ ನಡೆಯುವುದು ಈ ಬಗೆಯ ವಾಕಿಂಗ್‌. ಇದರಲ್ಲೂ ಬೇಗನೆ ತೂಕ ಇಳಿಯುತ್ತದೆ.

ಸೈಡ್‌ ಸ್ಟೆಪ್ಸ್‌

ದೇಹದ ಬೇರೆ ಬೇರೆ ಮಾಂಸಖಂಡಗಳಿಗೆ ವ್ಯಾಯಾಮ ನೀಡಲು ವಾಕಿಂಗ್‌ ನಡುವೆ ಈ ಬದಲಾವಣೆ ಮಾಡಿಕೊಳ್ಳಬಹುದು. ಸೈಡ್‌ ಸ್ಟೆಪ್ಸ್‌ ಹಾಕುತ್ತಾ ನಡೆಯುವುದರಿಂದ ಹೆಚ್ಚು ಕ್ಯಾಲರಿ ಕರಗಿಸಬಹುದು.

ಜಾಗಿಂಗ್‌ ಇಂಟರ್ವಲ್ಸ್‌

ವಾಕ್‌ ಮಾಡುತ್ತಾ ಮಧ್ಯದಲ್ಲಿ ಸ್ವಲ್ಪ ದೂರ ಜಾಗಿಂಗ್‌ ಮಾಡುವುದು ಕೂಡಾ ದೇಹವನ್ನು ಚುರುಕಾಗಿಸಿ, ಹೃದಯ ಬಡಿತ ವೇಗವಾಗಿಸಿ, ಒಳ್ಳೆಯ ವ್ಯಾಯಾಮ ನೀಡುತ್ತದೆ.

ಇದನ್ನೂ ಓದಿ: Almonds For Health: ಉತ್ತಮ ಆರೋಗ್ಯಕ್ಕಾಗಿ ದಿನಕ್ಕೆ ಎಷ್ಟು ಬಾದಾಮಿ ತಿನ್ನಬೇಕು?

ಮೈಂಡ್‌ಫುಲ್‌ ವಾಕಿಂಗ್‌

ದೇಹದ ಭಂಗಿ, ಉಸಿರಾಟದ ಕ್ರಮ ಎಲ್ಲವನ್ನೂ ಗಮನಿಸುತ್ತಾ, ಒಂದು ರಿದಮ್‌ನಲ್ಲಿ ಒಂದು ನಿಗದಿತ ದೂರವನನು ನಿಯಮಿತವಾಗಿ ಕ್ರಮಿಸುವುದು. ಇಡೀ ನಡಿಗೆಯನ್ನು ಮಾನಸಿಕವಾಗಿಯೂ ದೈಹಿಕವಾಗಿಯೂ ಅನುಭವಿಸುವ ಕ್ರಮ ಇದರಲ್ಲಿದೆ. ಇದರಿಂದ ಮಾನಸಿಕವಾಗಿಯೂ, ದೈಹಿಕವಾಗಿಯೂ ಲಾಭ ಪಡೆಯಬಹುದು.

ಬೀಜಗಳೆಲ್ಲ ಸದ್ಗುಣಿಗಳೇ, ಅದರಲ್ಲಿ (Almonds for Health) ಅನುಮಾನ ಬೇಡ! ಸ್ಪರ್ಧೆಯ ಅಂತಿಮ ಸುತ್ತಿನಲ್ಲಿ ಇರುವವರೆಲ್ಲ ಸಮರ್ಥರೇ ಆದರೂ ಚಿನ್ನ, ಬೆಳ್ಳಿ, ಕಂಚು ಎಂದು ಪದಕಗಳನ್ನು ನೀಡುವುದಿಲ್ಲವೇ? ಹಾಗೆಯೇ, ಬೀಜಗಳಲ್ಲಿ ಚಿನ್ನದ ಪದಕ ಸಲ್ಲುವುದು ಬಾದಾಮಿಗೆ. ಮಕ್ಕಳಿಂದ ಹಿಡಿದು ವೃದ್ಧರವರೆಗೆ ಎಲ್ಲರಿಗೂ ಒಂದಿಲ್ಲೊಂದು ರೀತಿಯಲ್ಲಿ ಆರೋಗ್ಯ ಕಾಪಾಡಿಕೊಳ್ಳುವುದಕ್ಕೆ ಇದು ನೆರವಾಗುತ್ತದೆ. ವಿಟಮಿನ್‌ ಇ, ಕ್ಯಾಲ್ಶಿಯಂ, ಫಾಸ್ಫರಸ್‌, ಜಿಂಕ್‌, ಸೆಲೆನಿಯಂ, ತಾವ್ರ, ನಯಾಸಿನ್‌, ಕಬ್ಬಿಣ, ಮೆಗ್ನೀಶಿಯಂ ಮುಂತಾದ ಹಲವಾರು ಒಳ್ಳೆಯ ಅಂಶಗಳನ್ನು ಒಳಗೊಂಡಿರುವ ಇದನ್ನು ಎಷ್ಟು ತಿನ್ನಬೇಕು? ನಮಗಿಷ್ಟ ಬಂದಷ್ಟು ತಿನ್ನಬೇಕೆ ಅಥವಾ ಅದಕ್ಕೊಂದು ಪ್ರಮಾಣ ಇದೆಯೇ? ಸೇವಿಸಬೇಕಾದ ಬಾದಾಮಿಯ ಪ್ರಮಾಣ ನಿರ್ಧಾರವಾಗುವುದು ಆಯಾ ವ್ಯಕ್ತಿಗಳ ಆರೋಗ್ಯ ಸ್ಥಿತಿ, ಆಹಾರ ಪದ್ಧತಿ ಮತ್ತು ಪ್ರಾದೇಶಿಕ ಹವಾಮಾನಗಳ ಮೇಲೆ. ಚಳಿ ದೇಶಗಳಲ್ಲಿ ಸೇವಿಸುವಷ್ಟು ಬಾದಾಮಿಗಳ ಸೇವನೆ ಉಷ್ಣವಲಯದ ದೇಶಗಳಲ್ಲಿ ಅಗತ್ಯವಿಲ್ಲ. ಇಡಿಯಾದ ಒಣ ಬಾದಾಮಿಗಳು ಭಾರತದಂಥ ಉಷ್ಣವಲಯದ ಹವಾಮಾನಗಳಲ್ಲಿ ಉಷ್ಣತೆಯನ್ನು ಇನ್ನಷ್ಟು ಹೆಚ್ಚಿಸುತ್ತವೆ. ಹಾಗಾಗಿ ಅವುಗಳನ್ನು ನೀರು ಅಥವಾ ಹಾಲಿನಲ್ಲಿ ರಾತ್ರಿಡೀ ನೆನೆಸಿ, ಬೆಳಗ್ಗೆ ಸೇವಿಸುವುದು ಕ್ಷೇಮ. ಸಾಮಾನ್ಯ ವ್ಯಕ್ತಿಗೆ ಬೆಳಗಿನ ಉಪಾಹಾರದೊಂದಿಗೆ, ನೆನೆಸಿದ ಏಳೆಂಟು ಬಾದಾಮಿಗಳು ಸಾಕಾಗಬಹುದು. ಆದರೆ ಕಠಿಣ ದೇಹಶ್ರಮದ ಕೆಲಸ ಮಾಡುವ ಯುವಜನರಿಗೆ ೨೦-೨೨ ಬಾದಾಮಿಗಳವರೆಗೂ ಬೇಕಾಗಬಹುದು. ತಮಗೆಷ್ಟು ಬೇಕು ಎಂಬುದನ್ನು ಆಯಾ ವ್ಯಕ್ತಿಗಳೇ ನಿರ್ಧರಿಸಿಕೊಳ್ಳಬಹುದು.

ಪೌಷ್ಟಿಕಾಂಶಗಳು ಏನಿವೆ?

ವಿಟಮಿನ್‌ ಇ, ವಿಟಮಿನ್‌ ಬಿ1, ಥಿಯಮಿನ್‌, ವಿಟಮಿನ್‌ ಬಿ೩, ಫೋಲೇಟ್‌, ವಿಟಮಿನ್‌ ಬಿ9, ಪ್ರೊಟೀನ್‌, ನಾರು, ಮೆಗ್ನೀಶಿಯಂ, ಕಬ್ಬಿಣ ಮತ್ತು ಕ್ಯಾಲ್ಸಿಯಂ ಅಂಶಗಳು ಪ್ರಧಾನವಾಗಿವೆ. ಕೆಲವು ಸೂಕ್ಷ್ಮ ಪೋಷಕಾಂಶಗಳು ಸಹ ಇದರಿಂದ ದೊರೆಯುತ್ತವೆ. ಇದರಿಂದ ಮೂಳೆಗಳ ಸಾಂದ್ರತೆ ಬಲಗೊಳ್ಳುತ್ತದೆ, ಕೆಂಪು ರಕ್ತಕಣಗಳ ಸಂಖ್ಯೆ ವೃದ್ಧಿಗೊಳ್ಳುತ್ತದೆ, ಸ್ನಾಯುಗಳು ಸದೃಢವಾಗುತ್ತವೆ. ಕಣ್ಣಿನ ಆರೋಗ್ಯಕ್ಕೂ ಒಳ್ಳೆಯದು. ಹೃದ್ರೋಗಿಗಳು ಮತ್ತು ಮಧುಮೇಹಿಗಳು ಸಹ ಸೇವಿಸಬಹುದಾದ ಆಹಾರವಿದಾಗಿದ್ದು, ಕೊಲೆಸ್ಟ್ರಾಲ್‌ ಮತ್ತು ರಕ್ತದ ಸಕ್ಕರೆಯ ಪ್ರಮಾಣವನ್ನು ನಿಯಂತ್ರಿಸಲು ನೆರವಾಗುತ್ತದೆ. ಜೀರ್ಣಾಂಗದ ಕ್ಯಾನ್ಸರ್‌ ತಡೆಗಟ್ಟಲು ನೆರವಾಗುವ ಈ ಪುಟ್ಟ ಬೀಜಗಳು, ಅಲ್ಜೈಮರ್ಸ್‌ ಉಲ್ಭಣಿಸುವುದನ್ನು ತಡೆಯಲು ಸಹಕಾರಿ. ತೆಂಗಿನ ಹಾಲಿನಂತೆ ಬಾದಾಮಿಯ ಹಾಲು ಸಹ ಲಭ್ಯವಿದೆ. ಮಾತ್ರವಲ್ಲ, ಬಾದಾಮಿ ಎಣ್ಣೆ ಮತ್ತು ಪೀನಟ್‌ ಬಟರ್‌ನಂತೆ ಬಾದಾಮಿ ಬೆಣ್ಣೆ ಸಹ ದೊರೆಯುತ್ತವೆ.
ದಿನದಲ್ಲಿ ಹಸಿವಾದಾಗ ಸಿಕ್ಕಿದ್ದನ್ನು ಬಾಯಿಗೆ ಹಾಕುವ ಬದಲು, ಒಂದಿಷ್ಟು ಬಾದಾಮಿಗಳನ್ನು ಬಾಯಾಡುವುದು ಎಲ್ಲಾ ಲೆಕ್ಕದಲ್ಲೂ ಸೂಕ್ತವಾದದ್ದು. ಹೆಚ್ಚಿನ ಬಾದಾಮಿಗಳ ಸೇವನೆಯಿಂದ ನಮ್ಮ ಜಠರದಲ್ಲಿ ಹೆಚ್ಚಾಗಿ ಉತ್ಪಾದನೆಯಾಗುವ ಬ್ಯೂಟರೇಟ್‌ನಿಂದ ದೇಹಕ್ಕೆ ಹಲವು ರೀತಿಯಲ್ಲಿ ಲಾಭವಿದೆ. ಜೀರ್ಣಾಂಗದಿಂದ ನಮ್ಮ ರಕ್ತವನ್ನು ಪ್ರವೇಶಿಸುವ ಈ ರಾಸಾಯನಿಕದಿಂದ ಶ್ವಾಸಕೋಶ, ಯಕೃತ್ತು ಮತ್ತು ಮೆದುಳಿನ ಆರೋಗ್ಯವೂ ಉತ್ತಮಗೊಳ್ಳುತ್ತದೆ. ಮಾತ್ರವಲ್ಲ, ಹಾನಿಕಾರಕ ಬ್ಯಾಕ್ಟೀರಿಯಾಗಳು ನಮ್ಮ ಪರಿಚಲನಾ ವ್ಯವಸ್ಥೆ ಪ್ರವೇಶಿಸುವುದನ್ನು ತಡೆಯುವ ಬ್ಯೂಟರೇಟ್‌, ಹೊಟ್ಟೆಯ ಉರಿಯೂತವನ್ನೂ ಶಮನಗೊಳಿಸುತ್ತದೆ. ಬಾದಾಮಿಯಿಂದ ಚರ್ಮದ ಕಾಂತಿ ಹೆಚ್ಚುವುದೇ ಅಲ್ಲದೆ, ಕೂದಲಿನ ಆರೋಗ್ಯವೂ ವೃದ್ಧಿಸುತ್ತದೆ.

ಹೆಚ್ಚಾದರೇನಾಗುತ್ತದೆ?

ಇದರಲ್ಲಿ ಸತ್ವ ಮಾತ್ರವಲ್ಲ, ಕ್ಯಾಲರಿಯೂ ಹೆಚ್ಚು. ಹಾಗಾಗಿ ಅತಿಯಾಗಿ ತಿಂದರೆ ತೂಕ ಹೆಚ್ಚುವುದು ನಿಶ್ಚಿತ. ಅದರಲ್ಲೂ ಬಾದಾಮಿಯಲ್ಲಿ ಉತ್ತಮವಾದ ಕೊಬ್ಬಿನಂಶ ಹೇರಳವಾಗಿದೆ. ಹಾಗಾಗಿ ತಿಳಿದು ತಿನ್ನುವುದು ಒಳ್ಳೆಯದು.

ಜೀರ್ಣಾಂಗಗಳ ಸಮಸ್ಯೆ

ಈ ಬೀಜಗಳಲ್ಲಿ ನಾರು ವಿಫುಲವಾಗಿದೆ. ನಾರಿನಂಶ ಜೀರ್ಣಾಂಗಗಳಿಗೆ ಒಳ್ಳೆಯದೇ ಎನ್ನುವುದು ಹೌದಾದರೂ, ಅದನ್ನು ಅತಿಯಾಗಿ ತಿಂದರೆ ಹೊಟ್ಟೆ ಏರುಪೇರಾಗುತ್ತದೆ. ಆಗ ಸಾಕಷ್ಟು ನೀರು ಕುಡಿಯಬೇಕು. ಅದೂ ಕಡಿಮೆಯಾದರೆ ಹೊಟ್ಟೆ ಉಬ್ಬರಿಸಿ, ಅಜೀರ್ಣದ ಬಾಧೆ ಕಾಡುತ್ತದೆ.

ಆಕ್ಸಲೇಟ್‌ಗಳು

ಬಾದಾಮಿಯಲ್ಲಿ ಆಕ್ಸಲೇಟ್‌ ಅಂಶವಿದೆ. ಇದರಿಂದ ಹೆಚ್ಚಿನವರಿಗೆ ತೊಂದರೆಯಿಲ್ಲ. ಆದರೆ ಕಿಡ್ನಿ ಕಲ್ಲಿನ ಸಮಸ್ಯೆ ಇರುವವರಿಗೆ ಆಕ್ಸಲೇಟ್‌ ಇರುವ ಆಹಾರಗಳು ಸೂಕ್ತವಲ್ಲ. ಅಂಥವರು ಬಾದಾಮಿಯನ್ನು ಅಧಿಕ ಪ್ರಮಾಣದಲ್ಲಿ ತಿನ್ನುವುದು ತೊಂದರೆ ನೀಡಬಹುದು.

ಇದನ್ನೂ ಓದಿ: Beetroot Side Effects: ಬೀಟ್‌ರೂಟ್‌ ಎಲ್ಲರಿಗೂ ಒಳ್ಳೆಯದಲ್ಲ! ಯಾರು ಇದನ್ನು ತಿನ್ನಬಾರದು ಗೊತ್ತೇ?

ಫೈಟಿಕ್‌ ಆಮ್ಲ

ಪೋಷಕಾಂಶಗಳನ್ನು ಹೀರಿಕೊಳ್ಳಲು ತೊಂದರೆ ನೀಡುವಂಥ ಅಂಶವಿದು. ಇದು ಬಾದಾಮಿಯಲ್ಲಿದೆ. ಸಮತೋಲಿತ ಆಹಾರ ಸೇವಿಸುತ್ತಿರುವವರಿಗೆ ಇದರಿಂದ ಅಂಥ ತೊಂದರೆಯೇನೂ ಆಗುವುದಿಲ್ಲ. ಆದರೆ ಅಧಿಕ ಪ್ರಮಾಣದಲ್ಲಿ ಬಾದಾಮಿಯನ್ನು ದೀರ್ಘ ಕಾಲದವರೆಗೆ ತಿನ್ನುತ್ತಿದ್ದರೆ ಫೈಟಿಕ್‌ ಆಮ್ಲದಿಂದ ಸಮಸ್ಯೆ ಆದರೆ ಅಚ್ಚರಿಯಿಲ್ಲ.

ಭಾರತದಲ್ಲಿ ಶ್ರಾವಣ ಮಾಸವು ಹೆಚ್ಚಿನ ಪ್ರಾಮುಖ್ಯತೆಯನ್ನು (Shravan Recipes) ಹೊಂದಿದೆ. ಶಿವನ ಆಶೀರ್ವಾದವನ್ನು ಪಡೆಯಲು ಹೆಚ್ಚಿನ ಭಕ್ತರು (Shravan 2024) ಉಪವಾಸ ವ್ರತಾಚರಣೆ (fast) ಮಾಡುತ್ತಾರೆ. ಉಪವಾಸ ನಿರತರು ಸಾತ್ವಿಕ ಆಹಾರವನ್ನು (fasting food) ಮಾತ್ರ ಸೇವಿಸುತ್ತಾರೆ. ಉಪವಾಸ ವ್ರತಗಳನ್ನು ಆಚರಿಸುವವರು ಏನು ತಿನ್ನಬೇಕು, ಏನು ತಿನ್ನಬಾರದು ಎನ್ನುವ ನಿಯಮಗಳಿವೆ. ಉಪವಾಸ ನಿರತರಿಗೆ ತಾಜಾ ತರಕಾರಿ (Vegetables) ಮತ್ತು ಹಣ್ಣುಗಳ (fruits) ಜೊತೆಗೆ, ಸಾಬುದಾನವು (Sabudana) ಭಾರತದಲ್ಲಿ ಅತ್ಯಂತ ಜನಪ್ರಿಯ ಉಪವಾಸದ ಆಹಾರವಾಗಿದೆ.

ಸಾಕಷ್ಟು ಆರೋಗ್ಯ ಪ್ರಯೋಜನಗಳನ್ನು ಹೊಂದಿರುವ ಸಾಬುದಾನವನ್ನು ಪ್ರತಿ ದಿನ ಒಂದೇ ರೀತಿಯಾಗಿ ತಿನ್ನುವುದು ಬೇಸರ ಮೂಡಿಸಬಹುದು. ಅದಕ್ಕಾಗಿ ಸಾಬುದಾನದ ವಿವಿಧ ರೀತಿಯ ಖಾದ್ಯಗಳನ್ನು ಮಾಡಿ ಸೇವಿಸಬಹುದು.

ಮರಗೆಣಸಿನ ಬೇರುಗಳಿಂದ ತಯಾರಿಸುವ ಸಾಬುದಾನ ವ್ರತ ಸ್ನೇಹಿ ಆಹಾರಗಳಲ್ಲಿ ಒಂದು. ಇದನ್ನು ಉಪವಾಸ ನಿರತರು ಸೇವಿಸುವುದರಿಂದ ಹೆಚ್ಚು ಕಾಲ ಹೊಟ್ಟೆ ತುಂಬಿದ ಅನುಭವವನ್ನು ಪಡೆಯಬಹುದು. ಹಲವಾರು ಪೋಷಕಾಂಶಗಳನ್ನು ಹೊಂದಿರುವ ಸಾಬುದಾನ ನಂಬರ್ ಒನ್ ಫಾಸ್ಟಿಂಗ್ ಫುಡ್ ಎಂದೇ ಪರಿಗಣಿಸಲಾಗಿದೆ.

ಟಪಿಯೋಕಾ ಮುತ್ತುಗಳು ಎಂದೂ ಕರೆಯಲ್ಪಡುವ ಸಾಬುದಾನವು ಅನೇಕ ಭಾರತೀಯ ಮನೆಗಳಲ್ಲಿ ಪ್ರಧಾನವಾಗಿ ಬಳಸಲಾಗುತ್ತದೆ. ವಿಶೇಷವಾಗಿ ನವರಾತ್ರಿ, ಜನ್ಮಾಷ್ಟಮಿ ಮತ್ತು ಶ್ರಾವಣ ಮಾಸದ ಉಪವಾಸದ ಅವಧಿಯಲ್ಲಿ ಇದನ್ನು ಹೆಚ್ಚಾಗಿ ಬಳಸಲಾಗುತ್ತದೆ.

ಸಾಬುದಾನ ಅಥವಾ ಸಾಗೋ ಮೂಲತಃ ಸಣ್ಣ ಪಿಷ್ಟದ ಮುತ್ತುಗಳು. ಇದರಲ್ಲಿ ಹೆಚ್ಚಿನ ಪಿಷ್ಟದ ಅಂಶವಿರುವುದರಿಂದ ಸುಲಭವಾಗಿ ಬೇಯಿಸಬಹುದು. ಸಿಹಿ ಮತ್ತು ಖಾರ ಎರಡಕ್ಕೂ ಹೊಂದಿಕೆಯಾಗುವ ಸಾಗುವಿನ ರುಚಿ ಮಕ್ಕಳಿಂದ ಹಿಡಿದು ವೃದ್ಧರಿಗೂ ಪ್ರಿಯವಾಗುವುದು.

ಆರೋಗ್ಯ ಪ್ರಯೋಜನಗಳು ಏನು?

ಉಪವಾಸ ನಿರತರು ಸಾಮಾನ್ಯವಾಗಿ ಆಹಾರ ಸೇವಿಸದೇ ದೀರ್ಘಕಾಲದವರೆಗೆ ಇರಬೇಕಾಗುತ್ತದೆ. ಹೀಗಾಗಿ ನಿರಂತರ ಶಕ್ತಿಯನ್ನು ಒದಗಿಸುವ ಯಾವುದನ್ನಾದರೂ ಸ್ವಲ್ಪ ಸಾತ್ವಿಕ ಆಹಾರ ಸೇವಿಸುವುದು ಬಹುಮುಖ್ಯವಾಗಿರುತ್ತದೆ. ಆದ್ದರಿಂದ ಪ್ರಾಥಮಿಕವಾಗಿ ಕಾರ್ಬೋಹೈಡ್ರೇಟ್‌ಗಳನ್ನು ಒಳಗೊಂಡಿರುವ ಸಬುದಾನವು ದಿನವಿಡೀ ನಮ್ಮನ್ನು ಶಕ್ತಿಯುತವಾಗಿರಿಸುತ್ತದೆ.

ಉಪವಾಸದ ಸಮಯದಲ್ಲಿ ಸಾಬುದಾನಕ್ಕೆ ಆದ್ಯತೆ ನೀಡಲು ಮತ್ತೊಂದು ಪ್ರಮುಖ ಕಾರಣವೆಂದರೆ ಅದು ಸುಲಭವಾಗಿ ಜೀರ್ಣವಾಗುತ್ತದೆ. ಹೊಟ್ಟೆಯನ್ನು ಭಾರಗೊಳಿಸುವುದಿಲ್ಲ. ಹೊಟ್ಟೆಗೆ ಸಂಬಂಧಿಸಿ ಯಾವುದೇ ಅಸ್ವಸ್ಥತೆ ಅಥವಾ ಉಬ್ಬುವಿಕೆಯನ್ನು ಉಂಟುಮಾಡುವುದಿಲ್ಲ.

ಸಾಬುದಾನದಲ್ಲಿ ಕ್ಯಾಲ್ಸಿಯಂ ಮತ್ತು ಕಬ್ಬಿಣದಂತಹ ಖನಿಜಗಳಲ್ಲಿ ಸಮೃದ್ಧವಾಗಿದೆ. ಹೀಗಾಗಿ ಇದರ ಸೇವನೆ ಉಪವಾಸ ನಿರತರಿಗೆ ಅತ್ಯಗತ್ಯ.

1. ಸಾಬುದಾನ ಖಿಚಡಿ

ಬೆಳಗ್ಗಿನ ಉಪಾಹಾರ, ಸಂಜೆಯ ಫಲಾಹಾರಕ್ಕೆ ಸಾಬುದಾನ ಖಿಚಡಿ ಒಂದು ಜನಪ್ರಿಯ ಉಪವಾಸ ಖಾದ್ಯ. ರಾತ್ರಿಯಿಡೀ ನೆನೆಸಿಟ್ಟ ಸಾಬುದಾನಕ್ಕೆ ಹುರಿದ ಕಡಲೆಕಾಳು, ಜೀರಿಗೆ, ಹಸಿರು ಮೆಣಸಿನಕಾಯಿ ಮತ್ತು ಬೇಯಿಸಿದ ಆಲೂಗಡ್ಡೆಯನ್ನು ಬೆರೆಸಿ ಖಿಚಿಡಿ ತಯಾರಿಸಲಾಗುತ್ತದೆ.

2. ಸಾಬುದಾನ ವಡಾ

ಉಪವಾಸದ ವೇಳೆ ಗರಿಗರಿಯಾದ ಮತ್ತು ರುಚಿಕರವಾದ ತಿಂಡಿಗಳನ್ನು ತಿನ್ನಲು ಬಯಸುವವರು ಸಾಬುದಾನ ವಡಾವನ್ನು ತಯಾರಿಸಬಹುದು. ನೆನೆಸಿದ ಸಾಬುದಾನವನ್ನು ಬೇಯಿಸಿದ ಆಲೂಗಡ್ಡೆ, ಹುರಿದ ಕಡಲೆಕಾಯಿಗಳು ಮತ್ತು ವಿವಿಧ ಮಸಾಲೆಗಳೊಂದಿಗೆ ಬೆರೆಸಿ, ಅನಂತರ ಆಕಾರ ಕೊಟ್ಟು ಎಣ್ಣೆಯಲ್ಲಿ ಕರಿಯಿರಿ. ಇದನ್ನು ಹುಣಸೆ ಹಣ್ಣಿನ ಚಟ್ನಿ ಅಥವಾ ಮಸಾಲೆಯುಕ್ತ ಹಸಿರು ಚಟ್ನಿಯೊಂದಿಗೆ ಸೇವಿಸಲು ರುಚಿಯಾಗಿರುತ್ತದೆ.

3. ಸಾಬುದಾನ ಖೀರ್

ಸಿಹಿ ತಿನ್ನಲು ಬಯಸುವವರಿಗೆ ಸಾಬುದಾನದ ಖೀರ್‌ ಅತ್ಯುತ್ತಮ ಆಯ್ಕೆಯಾಗಿದೆ. ಇದು ಸಾಗು, ಹಾಲು ಮತ್ತು ಸಕ್ಕರೆ ಹಾಕಿ ಇದನ್ನು ತಯಾರಿಸಲಾಗುತ್ತದೆ. ಇದಕ್ಕಾಗಿ ಸಾಬುದಾನವನ್ನು ಮೊದಲು ನೆನೆಸಿ ಇಡಬೇಕು. ಬಳಿಕ ಹಾಲಿನಲ್ಲಿ ಬೇಯಿಸಿ ಸಕ್ಕರೆ, ಏಲಕ್ಕಿ ಸೇರಿಸಿ. ಜೊತೆಗೆ ಒಂದೆರಡು ಕೇಸರಿ ದಳಗಳು, ಕತ್ತರಿಸಿದ ಬೀಜಗಳನ್ನು ಹಾಕಿದರೆ ಸಾಬೂದಾನದ ಖೀರ್ ಸವಿಯಲು ಸಿದ್ಧ.

4. ಸಾಬುದಾನ ದೋಸೆ

ಸಾಬುದಾನ ದೋಸೆಯು ದಕ್ಷಿಣ ಭಾರತದ ಸಾಂಪ್ರದಾಯಿಕ ಉಪಹಾರದ ವಿಶಿಷ್ಟ ಮತ್ತು ಆರೋಗ್ಯಕರ ತಿನಿಸು. ಅಕ್ಕಿಯ ಬದಲಿಗೆ ನೆನೆಸಿದ ಸಾಬುದಾನ, ಹಿಸುಕಿದ ಆಲೂಗಡ್ಡೆ ಮತ್ತು ಮಸಾಲೆಯನ್ನು ಸೇರಿಸಿ ಇದನ್ನು ತಯಾರಿಸಲಾಗುತ್ತದೆ. ಈ ದೋಸೆಯು ಗ್ಲುಟನ್ ಮುಕ್ತವಾಗಿದೆ ಮತ್ತು ಪೋಷಕಾಂಶಗಳಿಂದ ತುಂಬಿರುತ್ತದೆ. ಇದನ್ನು ತೆಂಗಿನಕಾಯಿ ಚಟ್ನಿಯೊಂದಿಗೆ ಬಿಸಿಯಾಗಿ ಸವಿಯಬಹುದು.

ಇದನ್ನೂ ಓದಿ: Shravan 2024: ಶ್ರಾವಣ ಮಾಸದಲ್ಲೇಕೆ ಮಾಂಸಾಹಾರ ಮಾಡಬಾರದು? ಇದಕ್ಕಿದೆ ವೈಜ್ಞಾನಿಕ ಕಾರಣ!

5. ಸಾಬುದಾನದ ಲಡ್ಡು

ಸಕ್ಕರೆ ಮತ್ತು ತುಪ್ಪದಿಂದ ತಯಾರಿಸಿದ ಸಾಬುದಾನದ ಲಡ್ಡು ರುಚಿಯ ಜೊತೆಗೆ ಪೌಷ್ಟಿಕ ಖಾದ್ಯವಾಗಿದೆ. ಸಕ್ಕರೆ ಪುಡಿ, ಏಲಕ್ಕಿ ಮತ್ತು ಗೋಡಂಬಿ ಮತ್ತು ಬಾದಾಮಿಗಳಂತಹ ಬೀಜಗಳನ್ನು ಲಡ್ಡುವಿನಲ್ಲಿ ಸೇರಿಸಬಹುದು. ಇದು ತ್ವರಿತ ಶಕ್ತಿಯ ವರ್ಧಕವೂ ಹೌದು.