ಸೆರಾಮಿಕ್‌ ವಸ್ತುಗಳ ಬಳಕೆ (Ceramic Cookware) ಇಂದು ನಿನ್ನೆಯದಲ್ಲ. ಇದಕ್ಕೆ ಕ್ರಿಸ್ತ ಪೂರ್ವದ ದಿನಗಳ ಇತಿಹಾಸವಿದೆ. ಈ ವಸ್ತುಗಳನ್ನು ಅಡುಗೆ ಮಾಡುವುದಕ್ಕೂ ಬಳಸುತ್ತಿದ್ದ ಇತಿಹಾಸವಿದೆ. ಈಗಿನ ಅಡುಗೆ ಮನೆಗಳಲ್ಲಿ ಸ್ಟೀಲ್‌ ಮತ್ತು ನಾನ್‌ಸ್ಟಿಕ್‌ ಪಾತ್ರೆಗಳದ್ದೇ ದರ್ಬಾರು. ಹಳೆಯ ಕಾಲದ ಮಣ್ಣಿನ ಮತ್ತು ಪಿಂಗಾಣಿ ಪಾತ್ರೆಗಳ ವೈಭವ ನಿಧಾನಕ್ಕೆ ಮರುಕಳಿಸೀತೆ ಎನ್ನುವುದನ್ನು ಕಾದು ನೋಡಬೇಕಷ್ಟೆ. ಸ್ಟೀಲ್‌ ಪಾತ್ರೆಗಳು ಎಲ್ಲ ರೀತಿಯಿಂದಲೂ ಸುರಕ್ಷಿತ. ಆದರೆ ನಾನ್‌ಸ್ಟಿಕ್‌ ಪಾತ್ರೆಗಳ ಬಗ್ಗೆ ಸಾಕಷ್ಟು ಅಪಸ್ವರಗಳಿವೆ. ಆರೋಗ್ಯಕ್ಕೆ ಒಳ್ಳೆಯದಲ್ಲ ಎಂದೇ ಹೇಳಲಾಗುತ್ತದೆ. ಗಾಜಿನ ಪಾತ್ರೆಗಳು ಸುರಕ್ಷಿತ ಹೌದಾದರೂ ಒಡೆಯುವ ಅಪಾಯವನ್ನು ಜೊತೆಗಿಟ್ಟುಕೊಂಡೇ ಬಳಸಬೇಕು. ಮಣ್ಣಿನ ಪಾತ್ರೆಗಳು ಆರೋಗ್ಯಕ್ಕೆ ಒಳ್ಳೆಯವಾದರೂ ನಿರ್ವಹಣೆಗೆ ತೊಡಕಾಗಬಹುದು. ಕಬ್ಬಿಣದ ಕಡಾಯಿಗಳು ಭಾರ ಹೆಚ್ಚು. ತಾಮ್ರ, ಕಂಚಿನವು ಈಗ ದೊರೆಯುವುದೇ ಕಡಿಮೆ. ಈಗ ಸೆರಾಮಿಕ್‌ ಪಾತ್ರೆಗಳ ವಿಷಯಕ್ಕೆ ಬಂದರೆ, ಅವುಗಳ ಬಳಕೆ ಸುರಕ್ಷಿತವೇ? ಇದರಿಂದ ಆರೋಗ್ಯಕ್ಕೆ ಯಾವುದೇ ಹಾನಿಯಿಲ್ಲವೇ?

ಸೆರಾಮಿಕ್‌ ಸುರಕ್ಷಿತವೇ?

ಉನ್ನತ ಗುಣಮಟ್ಟದ ಸೆರಾಮಿಕ್‌ಗಳು ಸಾಮಾನ್ಯವಾಗಿ ಆರೋಗ್ಯಕ್ಕೆ ಸುರಕ್ಷಿತವೇ, ಅನುಮಾನವಿಲ್ಲ. ಇವುಗಳಲ್ಲಿ PTFE (polytetrafluoroethylene) ಮತ್ತು PFOA (perfluorooctanoic acid) ಇರುವುದಿಲ್ಲ. (ಈ ರಾಸಾಯನಿಕಗಳು ಸಾಮಾನ್ಯವಾಗಿ ನಾನ್‌ಸ್ಟಿಕ್‌ನಂಥ ಪಾತ್ರೆಗಳಲ್ಲಿ ಕಾಣುವಂಥವು) ಸೀಸ್‌, ಕ್ಯಾಡ್ಮಿಯಂ ಮುಂತಾದ ಹಾನಿಕಾರ ಲೋಹಗಳೂ ಸೆರಾಮಿಕ್‌ನಲ್ಲಿ ಇರಬಾರದು. ಇದರಲ್ಲಿರುವ ಸಿಲಿಕಾದಂಥ ವಸ್ತುಗಳಿಂದ ಆರೋಗ್ಯಕ್ಕೆ ಸಮಸ್ಯೆಗಳಿಲ್ಲ. ಆದರೂ ಕೆಲವೊಂದು ಎಚ್ಚರಿಕೆಯನ್ನು ತೆಗೆದುಕೊಳ್ಳುವುದು ಅಗತ್ಯ.
ಸುಂದರವಾಗಿ ಕಾಣಲೆಂದು ಕೆಲವು ಸೆರಾಮಿಕ್‌ ಪಾತ್ರೆಗಳ ಮೇಲ್ಮೈಗೆ ಸೀಸ, ಕ್ಯಾಡ್ಮಿಯಂ, ಬ್ಯಾರಿಯಂ ಮುಂತಾದ ಹಾನಿಕಾರಕ ಲೋಹಗಳನ್ನು ಹಾಕಲಾಗುತ್ತದೆ. ಹಾಗಾಗಿ ಸೆರಾಮಿಕ್‌ ಗುಣಮಟ್ಟದ ಬಗ್ಗೆ ಖಾತ್ರಿ ಪಡಿಸಿಕೊಳ್ಳುವುದು ಅಗತ್ಯ. ಕಡಿಮೆ ಬೆಲೆಯಲ್ಲಿ, ಯಾವ್ಯಾವುದೋ ಅಂಗಡಿಗಳಲ್ಲಿ ದೊರೆಯುವ ಸೆರಾಮಿಕ್‌ಗಳನ್ನು ಖರೀದಿಸಿ ಬಳಸುವ ಬದಲು, ಗುಣಮಟ್ಟಕ್ಕೆ ಬೆಲೆ ನೀಡಿ. ಅಲಂಕಾರಕ್ಕೆಂದು ಹಳದಿ, ಕೆಂಪು, ನೀಲಿ ಮುಂತಾದ ಕಡು ಬಣ್ಣಗಳನ್ನು ಉಪಯೋಗಿಸಿದ ಪಾತ್ರೆಗಳಲ್ಲಿ ಲೆಡ್‌ ಮತ್ತು ಕಟು ಲೋಹಗಳೂ ಇರಬಹುದು, ಜಾಗ್ರತೆ.

ಇದನ್ನೂ ಓದಿ: High Calcium Foods: ದೇಹಕ್ಕೆ ಮುಖ್ಯವಾದ ಅಧಿಕ ಕ್ಯಾಲ್ಶಿಯಂ ಆಹಾರಗಳನ್ನು ಪಡೆಯುವುದು ಹೇಗೆ?

ಸೆರಾಮಿಕ್‌ ಬಳಕೆ

ಇವುಗಳನ್ನು ಬಳಸುವಾಗ ಕೆಲವು ಎಚ್ಚರಿಕೆಗಳನ್ನು ತೆಗೆದುಕೊಳ್ಳುವುದು ಅಗತ್ಯ. ಅವುಗಳನ್ನು ಉಪಯೋಗಿಸುವಾಗ ಕುಕ್ಕಿ, ಕೆರೆದು, ಪರಚುವಂತಿಲ್ಲ. ಇವುಗಳ ಮೇಲ್ಮೈ ಹಾಳಾದರೆ ಬಳಕೆಗೆ ಸುರಕ್ಷಿತ ಅಲ್ಲ ಎಂದೇ ಭಾವಿಸಬೇಕು. ಹಾಗಾಗಿ ಚೂಪಾದ ವಸ್ತುಗಳನ್ನು ಅಡುಗೆ ಮಾಡುವಾಗ ಬಳಸಬಾರದು. ಇವುಗಳು ಕ್ರಮೇಣ ಬಿಸಿ ಮಾಡಿ. ಒಮ್ಮೆಲೇ ಅತಿ ಹೆಚ್ಚು ಬಿಸಿಗೆ ಒಡ್ಡಬೇಡಿ. ಅಲ್ಲದಿದ್ದರೂ, ಮಧ್ಯಮ ಉರಿಗಿಂತ ಹೆಚ್ಚಿನ ಉರಿಯನ್ನು ಸೋಕಿಸಬೇಡಿ. ಬೇಕಿಂಗ್‌ ವಸ್ತುಗಳಾದರೆ 180 ಡಿ. ಗಿಂತ ಹೆಚ್ಚು ತಾಪಮಾನಕ್ಕೆ ಅವು ಯೋಗ್ಯವೇ ಎಂಬುದನ್ನು ಆಯಾ ವಸ್ತುವಿನ ಮ್ಯಾನುವಲ್‌ನಲ್ಲಿ ಪರಿಶೀಲಿಸಿ. ಎಲ್ಲ ಪಿಂಗಾಣಿಗಳೂ ಒಲೆ ಮೇಲೆ ಇರಿಸಲು ಬರುವುದಿಲ್ಲ. ʻಸೇಫ್‌ ಫಾರ್‌ ಸ್ಟೋವ್‌ ಟಾಪ್‌ʼ ಎಂಬ ಒಕ್ಕಣೆ ಅದರ ಪ್ಯಾಕಿಂಗ್‌ ಮೇಲಿಗೆಯೇ ಎಂಬುದನ್ನು ಖಾತ್ರಿ ಪಡಿಸಿಕೊಳ್ಳಿ. ಕೆಲವೊಮ್ಮೆ ಬಿಸಿ ಆಹಾರಗಳನ್ನು ಸರ್ವ್‌ ಮಾಡಲು ಮಾತ್ರವೇ ಬಳಸುವಂಥದ್ದಾಇರುತ್ತದೆ. ಬಿಸಿಯಾದ ಪಾತ್ರೆಗೆ ತಣ್ಣನೆಯ ನೀರು ಸುರಿಯಬೇಡಿ. ಇದರಿಂದ ಮೇಲ್ಮೈಗೆ ಹಾನಿಯಾಗುತ್ತದೆ. ಸ್ವಚ್ಛ ಮಾಡುವಾಗ ಸೌಮ್ಯವಾದ ಸೋಪಿನ ಜೊತೆಗೆ ಸ್ಪಾಂಜ್‌ ಬಳಸಿ. ಕಠೋರವಾದ ಡಿಟರ್ಜೆಂಟ್‌ಗಳು ಇದಕ್ಕೆ ಹೇಳಿಸಿದ್ದಲ್ಲ. ಡಿಶ್‌ವಾಷರ್‌ಗೆ ಹಾಕುವ ಮುನ್ನ, ಅದನ್ನು ಹಾಗೆ ಮಾಡಬಹುದೇ ಎಂಬ ಸೂಚನೆಯನ್ನು ಮೊದಲು ಗಮನಿಸಿ. ಸೆರಾಮಿಕ್‌ ಮೇಲೆ ಕೆಲವೊಮ್ಮೆ ನಾನ್‌ಸ್ಟಿಕ್‌ ಮೇಲ್ಮೈ ಸಹ ಇರಬಹುದು. ಉಳಿದ ನಾನ್‌ಸ್ಟಿಕ್‌ಗಳಂತೆ ಇವು ವಾತಾವರಣಕ್ಕೆ ವಿಷಕಾರಿ ಅನಿಲಗಳನ್ನು ಬಿಡುಗಡೆ ಮಾಡುವುದಿಲ್ಲ. ಆದರೆ ಇದನ್ನೂ ಸಹ ಅತಿಯಾಗಿ ಬಿಸಿ ಮಾಡದೆ, ಮೇಲ್ಮೈ ಹಾಳಾಗದಂತೆ ಜಾಗ್ರತೆಯಿಂದ ಬಳಸಬೇಕು. ಸ್ವಚ್ಛಗೊಳಿಸುವಾಗಲೂ ನಾಜೂಕಾಗಿಯೇ ಆಗಬೇಕೇ ಹೊರತು, ಒರಟಾದ ವಸ್ತುಗಳಿಂದ ಉಜ್ಜುವಂತಿಲ್ಲ. ಇವುಗಳನ್ನು ಸ್ಟೋರ್‌ ಮಾಡುವಾಗಲೂ ಸ್ವಚ್ಛವಾಗಿ ಒರೆಸಿಯೇ ಕಪಾಟಿನೊಳಗಿಡಿ.

ಹೀಗೊಂದು ಸನ್ನಿವೇಶವನ್ನು (Whiten Your Yellow Teeth) ಊಹಿಸಿಕೊಳ್ಳಿ- ಅದೊಂದು ಸುಂದರವಾದ ನಗು. ಆದರೆ ಬಾಯಿ ಬಿಟ್ಟರೆ ಬಣ್ಣಗೇಡು ಎನ್ನುವಂಥ ಅವಸ್ಥೆ. ಅಂದರೆ ಬಾಯಿ ಮುಚ್ಚಿಕೊಂಡಾಗ ಸುಂದರವಾಗಿ ಕಾಣುವ ನಗು, ಬಾಯಿ ಬಿಟ್ಟಾಕ್ಷಣ ಹಳದಿ ಬಣ್ಣದ ಹಲ್ಲುಗಳೊಂದಿಗೆ ರಾರಾಜಿಸುತ್ತದೆ! ಈ ಬಣ್ಣಗೇಡು ಹಲ್ಲುಗಳೊಂದಿಗೆ ನಗುವುದಕ್ಕೆ ಮುಜುಗರವಾಗಿ ಹೇಗ್ಹೇಗೋ ನಗುವವರು ಬಹಳ ಮಂದಿಯಿದ್ದಾರೆ. ಹೌದು, ಮನಸ್ಸು ನಿರ್ಮಲವಾಗಿದ್ದರೆ, ನಗುವೂ ಸ್ವಚ್ಛವೇ. ಆದರೆ ʻಹಲ್ಲು ಬಿಟ್ಟರೆ ಸಂತೋಷ, ಬಿಡದಿದ್ದರೆ ಇನ್ನೂ ಸಂತೋಷʼ ಎನ್ನುವ ಅವಸ್ಥೆಯಲ್ಲಿ ಫೋಟೋಗೆ ನಿಲ್ಲುವುದಾದರೂ ಹೇಗೆ? ಯಾವುದೇ ಸಾಮಾಜಿಕ ಮಾಧ್ಯಮಗಳಲ್ಲಿ ಅದನ್ನು ಹಾಕಿದಾಗ ಒಬ್ಬರಲ್ಲ ಒಬ್ಬರು ಈ ಬಗ್ಗೆ ಕಮೆಂಟಿಸಿಬಿಟ್ಟರೆ, ಶೋಕದ ಮಹಾಪೂರವೇ ಹರಿಯುವುದಿಲ್ಲವೇ? ಹಳದಿ ಹಲ್ಲುಗಳಿಗೆ ಏನು ಪರಿಹಾರ? ನಾವು ತಿನ್ನುವ ಆಹಾರಗಳು, ಕುಡಿಯುವ ಪೇಯಗಳು, ಬಾಯಿ ಸ್ವಚ್ಛಗೊಳಿಸುವ/ ಗೊಳಿಸದಿರುವ ನಮ್ಮ ಅಭ್ಯಾಸಗಳು, ಕೆಲವೊಂದು ಔಷಧಗಳು- ಹೀಗೆ ಹಲವು ಕಾರಣಗಳಿಂದಾಗಿ ನಮ್ಮ ದಂತಪಂಕ್ತಿಯ ಬಣ್ಣ ಬದಲಾಗಬಹುದು. ಇದಕ್ಕೆ ಸುಲಭದ ಪರಿಹಾರವೆಂದರೆ ದಂತವೈದ್ಯರನ್ನು ಕಾಣುವುದು ಮತ್ತು ಹಲ್ಲುಗಳನ್ನು ಬಿಳಿ ಮಾಡಿಸಿಕೊಳ್ಳುವುದು. ಅನತಿ ಸಮಯದಲ್ಲಿ, ಬೇಗನೇ ದೊರೆಯುವ ಪರಿಹಾರವಿದು. ಆದರೆ ಇದು ದೂರಗಾಮಿ ಪರಿಹಾರವಲ್ಲ. ಕೆಲವು ದಿನಗಳ ನಂತರ ದಂತಪಂಕ್ತಿ ಮತ್ತೆ ಬಣ್ಣಗೆಡಬಹುದು. ಎಷ್ಟು ಬಾರಿ ದಂತ ವೈದ್ಯರ ಬಳಿ ಹೋಗಿ ದುಬಾರಿ ಚಿಕಿತ್ಸೆಗಳನ್ನು ಮಾಡಿಸಿಕೊಳ್ಳಲು ಸಾಧ್ಯ? ಇದಕ್ಕೆ ದೀರ್ಘಾವಧಿ ಪರಿಹಾರವಿಲ್ಲವೇ ಎಂಬುದೀಗ ವಿಷಯ. ಮಾತ್ರವಲ್ಲ, ಆಹಾರಗಳಿಂದ ಇದನ್ನು ನಿರ್ವಹಿಸಲು ಸಾಧ್ಯವಿಲ್ಲವೇ?
ಕೆಲವು ಆಹಾರಗಳು ನಮ್ಮ ಹಲ್ಲುಗಳ ಮೇಲೆ ದೀರ್ಘಕಾಲ ಉಳಿದು ಎನಾಮಲ್‌ ಕವಚಕ್ಕೆ ಹಾನಿ ತರುವುದು ಮಾತ್ರವಲ್ಲ, ಬಿಳಿಯ ಬಣ್ಣವನ್ನೂ ಹಾಳು ಮಾಡಬಲ್ಲವು. ಅಂಥ ಕೆಲವು ಆಹಾರಗಳ ಬಗ್ಗೆ ಜಾಗ್ರತೆ ಬೇಕು. ಇದಲ್ಲದೆ, ಇನ್ನು ಕೆಲವು ಆಹಾರಗಳು ದಂತಗಳ ಸ್ವಾಸ್ಥ್ಯವನ್ನು ಹೆಚ್ಚಿಸಬಲ್ಲವು. ಅಂಥವುಗಳನ್ನು ಮರೆಯದೇ ಆಹಾರದಲ್ಲಿ ಸೇರಿಸಿಕೊಳ್ಳಬೇಕು. ಆಗ ಹೆಚ್ಚಿನ ರಾಸಾಯನಿಕಗಳ ಗೊಡವೆ ಇಲ್ಲದೆಯೇ ಸುಂದರ, ಸ್ವಚ್ಛ ನಗುವನ್ನು ನಿಮ್ಮದಾಗಿಸಿಕೊಳ್ಳಬಹುದು. ಎಂಥ ಆಹಾರಗಳು ಹಲ್ಲುಗಳಿಗೆ ಸೂಕ್ತವಲ್ಲ?

ಸಕ್ಕರೆ ಮಾರಿಗಳು

ಅಂಟಾದ ಶುಗರ್‌ ಕ್ಯಾಂಡಿಗಳು, ಸೋಡಾ, ಫ್ರೂಟ್‌ ಜ್ಯೂಸ್‌ಗಳು ಈ ಸಾಲಿನಲ್ಲಿ ಮುಂಚೂಣಿಯಲ್ಲಿವೆ. ಇವುಗಳಲ್ಲಿರುವ ಸಕ್ಕರೆಯಂಶ ಹಲ್ಲಿನ ಮೇಲೆ ದೀರ್ಘ ಕಾಲ ಅಂಟಿಕೂತು ಬ್ಯಾಕ್ಟೀರಿಯಗಳನ್ನು ಕೂಗಿ ಕರೆಯುತ್ತದೆ. ಸೋಡಾಗಳಲ್ಲಿರುವ ಕಾರ್ಬನ್‌ ಅಂಶವು ಎನಾಮಲ್‌ ದುರ್ಬಲ ಮಾಡುವುದರಲ್ಲಿ ಸದಾ ಮುಂದು. ಇದರ ಫಲವಾಗಿ ಹಲ್ಲುಗಳ ಬಣ್ಣವೂ ಹಾಳಾಗುತ್ತದೆ.

ಸಿಟ್ರಸ್‌ ಹಣ್ಣುಗಳು

ದ್ರಾಕ್ಷಿ, ಕಿತ್ತಳೆ, ನಿಂಬೆಯಂಥ ಹುಳಿ ಹಣ್ಣುಗಳು ಆರೋಗ್ಯಕ್ಕೆ ಒಳ್ಳೆಯವೆ. ಹಾಗೆ ನೋಡಿದರೆ ಹಲ್ಲುಗಳ ಆರೋಗ್ಯಕ್ಕೆ ಇವೇನೂ ಹಾಳಲ್ಲ. ಹೊಳಪಿಗೂ ಸಮಸ್ಯೆ ತರುವಂಥವಲ್ಲ. ಆದರೆ ಇವುಗಳನ್ನು ತಿಂದ ಮೇಲೆ ನೆನಪಿನಿಂದ ಬಾಯಿ ಸ್ವಚ್ಛ ಮಾಡಿಕೊಳ್ಳಲೇಬೇಕು. ಅದಿಲ್ಲದಿದ್ದರೆ ಇದರಲ್ಲಿರುವ ಆಮ್ಲೀಯ ಅಂಶಗಳು ದಂತಪಂಕ್ತಿಗಳಿಗೆ ಹಾನಿ ಮಾಡಬಹುದು.

ಕಾಫಿ, ಚಹಾ

ಹಲ್ಲುಗಳನ್ನು ಬಣ್ಣಗೇಡು ಮಾಡುವುದರಲ್ಲಿ ಇವುಗಳದ್ದು ಎತ್ತಿದ ಕೈ. ದಂತಗಳ ಬಿಳಿಯ ಬಣ್ಣ ಹಾಳು ಮಾಡುವ ಗುಣ ಇವುಗಳಿಗೆ ಇದ್ದೇ ಇದೆ. ಜೊತೆಗೆ, ಇವನ್ನು ಕುಡಿದ ಮೇಲೆ ಬಾಯಿ ತೊಳೆಯುವ ಅಭ್ಯಾಸ ಹೆಚ್ಚಿನವರಿಗೆ ಇರುವುದಿಲ್ಲ. ಹಾಗಾಗಿ ಸಮಸ್ಯೆ ಹೆಚ್ಚುತ್ತದೆ. ಕೆಫೇನ್‌ ಮಿತವಾಗಿದ್ದರೆ ಹಲ್ಲುಗಳಿಗೂ ಒಳ್ಳೆಯದು.

ಒಳ್ಳೆಯದಾವುದು?

ಚೀಸ್‌, ಯೋಗರ್ಟ್‌ನಂಥವು ದಂತಸ್ವಾಸ್ಥ್ಯಕ್ಕೆ ಪೂರಕವಾದವು. ಕ್ಯಾಲ್ಶಿಯಂ, ಫಾಸ್ಫೇಟ್‌ ಮತ್ತು ಪ್ರೊಬಯಾಟಿಕ್ಸ್‌ ಹೊಂದಿರುವ ಈ ಆಹಾರಗಳು ಹಲ್ಲುಗಳ ಎನಾಮಲ್‌ ಬಲಪಡಿಸುತ್ತವೆ. ಬಾಯಲ್ಲಿ ಜೊಲ್ಲು ರಸದ ಉತ್ಪಾದನೆಗೆ ಪ್ರೋತ್ಸಾಹ ನೀಡಿ, ಹಲ್ಲಿನ ಮೇಲ್ಮೈಯಲ್ಲಿ ಅಂಟಿ ಕೂರುವ ಬ್ಯಾಕ್ಟೀರಿಯಗಳನ್ನು ಕಡಿಮೆ ಮಾಡುತ್ತವೆ. ಈ ಮೂಲಕ ಹಲ್ಲಿನ ಹೊಳಪಿಗೆ ಕಾರಣವಾಗುತ್ತವೆ.

ತರಕಾರಿಗಳು

ಕ್ಯಾರೆಟ್‌, ಹಸಿರು ಸೊಪ್ಪು-ತರಕಾರಿಗಳು ಹಲ್ಲುಗಳ ಆರೋಗ್ಯಕ್ಕೆ ಬೇಕಾದಂಥವು. ಕರುಂಕುರುಂ ತಿನ್ನಬಹುದಾದ ಕ್ಯಾರೆಟ್‌, ಸೆಲೆರಿಯಂಥವು ಹಲ್ಲುಗಳಿಗೆ ನೈಸರ್ಗಿಕ ಬ್ರಷ್‌ನಂತೆ ಕೆಲಸ ಮಾಡುತ್ತವೆ. ಜೊತೆಗೆ ಕ್ಯಾಲ್ಶಿಯಂನಂಥ ಖನಿಜಗಳು ಮತ್ತು ಫಾಲಿಕ್‌ ಆಮ್ಲಗಳನ್ನು ಹೇರಳವಾಗಿ ಹೊಂದಿರುವ ಹಸಿರು ಸೊಪ್ಪುಗಳಿಗೆ ಹಲ್ಲುಗಳು ಎಲ್ಲ ರೀತಿಯಲ್ಲೂ ನಳನಳಿಸುತ್ತವೆ.

ಇದನ್ನೂ ಓದಿ: Almonds Benefits: ಈ 9 ಕಾರಣಗಳಿಗಾಗಿ ನೆನೆಸಿದ ಬಾದಾಮಿಯನ್ನು ಖಾಲಿ ಹೊಟ್ಟೆಯಲ್ಲಿ ನಿತ್ಯ ಸೇವಿಸಬೇಕು!

ಹಣ್ಣುಗಳು

ಈ ಸಾಲಿನಲ್ಲಿ ಮುಂದೆ ನಿಲ್ಲುವುದು ಸ್ಟ್ರಾಬೆರಿ. ನೈಸರ್ಗಿಕವಾಗಿಯೇ ಹಲ್ಲುಗಳನ್ನು ಬೆಳ್ಳಗೆ ಮಾಡುವ ಸಾಮರ್ಥ್ಯ ಇವುಗಳಿಗೆ ಇದೆ. ಜೊತೆಗೆ ಸೇಬು, ಬಾಳೆಯ ಹಣ್ಣುಗಳಲ್ಲೂ ಹಲ್ಲುಗಳ ಹೊಳಪು ಕಾಪಾಡುವ ಗುಣವಿದೆ. ಇವುಗಳಲ್ಲಿ ಇರುವ ಅಧಿಕ ನೀರಿನಂಶ ಲಾಲಾ ರಸದ ಉತ್ಪಾದನೆಗೆ ನೆರವಾಗುತ್ತದೆ. ಹಾಗಾಗಿ ಬಾಯಿಯ ಆರೋಗ್ಯಕ್ಕೆ ಅಧಿಕ ಪ್ರಮಾಣದಲ್ಲಿ ನೀರು ಕುಡಿಯುವುದು ಮಹತ್ವದ್ದು.

ಸಾಲ ಮಾಡಿಯಾದರೂ ತುಪ್ಪ ತಿನ್ನು ಎನ್ನುವ ಮಾತಿದೆ. ತುತ್ತು ಎತ್ತುವುದಕ್ಕೆ ತುಪ್ಪ ಬೇಕು ಎಂದವರೂ ಇದ್ದಾರೆ. ಇಂಥ ಮಾತುಗಳು ತುಪ್ಪ ನಮಗೆಷ್ಟು ಆವಶ್ಯಕ ಎನ್ನುವುದನ್ನು ತೋರಿಸುವಂತಿದೆ. ನಮ್ಮ ಆರೋಗ್ಯದ ಮೇಲೆ ತುಪ್ಪವು ಹಲವು ರೀತಿಯಲ್ಲಿ ಧನಾತ್ಮಕ ಪರಿಣಾಮಗಳನ್ನು ಬೀರಬಲ್ಲದು ಎಂಬುದು ನಿಸ್ಸಂಶಯ. ಹಾಗೆಂದು ತಿನ್ನುವುದಕ್ಕೆಲ್ಲ ತುಪ್ಪ ಸುರಿದುಕೊಳ್ಳಬಹುದೇ? ಅಷ್ಟೊಂದು ಜಿಡ್ಡಿನ ಪದಾರ್ಥವನ್ನು ಒಳ್ಳೆಯದೆಂದು ತಿನ್ನುತ್ತಾ ಹೋದರೆ ಆರೋಗ್ಯದ ಗತಿ ಏನು? ಸಾಲ ಮಾಡಿ ತಿನ್ನುವಷ್ಟು ತುಪ್ಪ ನಮಗೆ ಬೇಕೆ! ದಿನಕ್ಕೆ ಎಷ್ಟು ತುಪ್ಪ ತಿನ್ನಬಹುದು? ದಿನಕ್ಕೆ ಎಷ್ಟು ತುಪ್ಪ ತಿನ್ನಬಹುದು ಎಂಬುದಕ್ಕೆ ನಿಖರವಾದ ಉತ್ತರವನ್ನು ನೀಡುವ ಮುನ್ನ, ನಮ್ಮ ಉಳಿದ ಜೀವನಶೈಲಿಯನ್ನೂ ಗಣನೆಗೆ ತೆಗೆದುಕೊಳ್ಳಬೇಕು. ಅಂದರೆ ಜಡ ಜೀವನವನ್ನು ಹೊಂದಿದ ವ್ಯಕ್ತಿಗೆ ಒಬ್ಬ ಅಥ್ಲೀಟ್‌ನಷ್ಟು ತುಪ್ಪ ಬೇಕಾಗುವುದಿಲ್ಲ, ಅಷ್ಟು ತಿನ್ನಬಾರದು. ಹಾಗಾಗಿ ನಮ್ಮ ವಯಸ್ಸು, ಆರೋಗ್ಯ, ತೂಕ ಇತ್ಯಾದಿಗಳ ಮೇಲೆ, ದಿನಕ್ಕೆಷ್ಟು ತುಪ್ಪ ಬೇಕು ಮತ್ತು ಸಾಕು ಎನ್ನುವುದನ್ನು ನಿರ್ಧರಿಸಬಹುದು. ಈಗಾಗಲೇ ಸಾಕಷ್ಟು ಎಣ್ಣೆ ಮತ್ತು ಜಿಡ್ಡಿನಂಶ ನಮ್ಮ ಆಹಾರದಲ್ಲಿದ್ದರೆ, ಅದಕ್ಕೆ ತುಪ್ಪವನ್ನೂ ಹೆಚ್ಚುವರಿಯಾಗಿ ಸೇರಿಸಬೇಕಿಲ್ಲ. ಬದಲಿಗೆ, ಈಗಾಗಲೇ ಇರುವ ಕೆಲವು ಜಿಡ್ಡಿನ ವಸ್ತುಗಳನ್ನು ಕಡಿಮೆ ಮಾಡಿ, ಅದರ ಬದಲಿಗೆ ತುಪ್ಪವನ್ನು (Ghee For Health) ಆಹಾರದಲ್ಲಿ ಸೇರಿಸಿಕೊಳ್ಳಬಹುದು.

ಎಷ್ಟು ಬೇಕು?

ಸಾಮಾನ್ಯ ಅಂದಾಜಿಗೆ ಹೇಳುವುದಾದರೆ, ವಯಸ್ಕರಿಗೆ ದಿನಕ್ಕೆ 2-4 ಚಮಚ ತುಪ್ಪ ದಿನಕ್ಕೆ ಸಾಕಾಗುತ್ತದೆ. ಸಾಮಾನ್ಯವಾಗಿ ಬೆಳಗಿನ ಹೊತ್ತು ತುಪ್ಪವನ್ನು ತಿನ್ನುವುದು, ಅದರಲ್ಲೂ ಬೆಚ್ಚಗಿನ ತುಪ್ಪದ ಸೇವನೆ ಒಳ್ಳೆಯದು ಎನ್ನುತ್ತಾರೆ ಪೋಷಕಾಂಶ ತಜ್ಞರು. ಆದರೆ ಅವರ ಆರೋಗ್ಯ ಮತ್ತು ಜೀವನಶೈಲಿಯನ್ನು ಗಮನಿಸಿಕೊಳ್ಳಬೇಕು. ಗರ್ಭಿಣಿಯರು ಮತ್ತು ಹಾಲುಣಿಸುವ ತಾಯಂದಿರಿಗೆ ತುಪ್ಪ ಅಗತ್ಯವಾಗಿ ಬೇಕು. ಅದೇ ಹೃದ್ರೋಗಿಗಳಿಗಾದರೆ ವೈದ್ಯರಲ್ಲಿ ಮಾತಾಡಿಯೇ ನಿರ್ಧರಿಸಬೇಕು. ಜೀರ್ಣಾಂಗಗಳಲ್ಲಿ ಉತ್ತಮ ಬ್ಯಾಕ್ಟೀರಿಯಗಳನ್ನು ಹೆಚ್ಚಿಸುವುದರಿಂದ ತೊಡಗಿ, ಶಕ್ತಿ ಸಂಚಯಿಸುವ, ಉರಿಯೂತ ಕಡಿಮೆ ಮಾಡುವವರೆಗೆ ಬಹಳಷ್ಟು ರೀತಿಯಲ್ಲಿ ದೇಹಕ್ಕೆ ನೆರವಾಗಬಲ್ಲವು.

ಚಯಾಪಚಯ ಚುರುಕು

ತುಪ್ಪದಲ್ಲಿ ಕಿರುಕೊಂಡಿಗಳ ಕೊಬ್ಬಿನಾಮ್ಲ (SCFAs) ಇರುತ್ತದೆ. ಇವು ಸುಲಭವಾಗಿ ದೇಹಕ್ಕೆ ಹೀರಲ್ಪಡುತ್ತವೆ. ಇದರಿಂದ ಉತ್ಪತ್ತಿಯಾಗುವ ಶಾಖವು ದೇಹದಲ್ಲಿನ ಹೆಚ್ಚುವರಿ ಕೊಬ್ಬು ಕರಗಿಸಲು ನೆರವಾಗುತ್ತದೆ. ಅಂದರೆ, ಇದರಿಂದ ಚುರುಕಾಗುವ ಚಯಾಪಚಯ ಕ್ರಿಯೆಯಿಂದ ಹೆಚ್ಚಿನ ಕ್ಯಾಲರಿಗಳು ಕರಗಿ, ಕೊಬ್ಬೂ ಕಡಿಮೆಯಾಗುತ್ತದೆ

ಜೀರ್ಣಾಂಗಗಳ ಆರೋಗ್ಯ ಸುಧಾರಣೆ

ಖಾಲಿ ಹೊಟ್ಟೆಗೆ ಬೀಳುವ ಬೆಚ್ಚನೆಯ ತುಪ್ಪವು ಜೀರ್ಣಾಂಗಗಳ ಆರೋಗ್ಯ ವೃದ್ಧಿಸುತ್ತದೆ. ಇದರಲ್ಲಿರುವ ಬಟೈರೇಟ್‌ ಅಂಶವು ಜಠರ ಮತ್ತು ಕರುಳಿನ ಒಳಪದರಗಳಲ್ಲಿನ ಉರಿಯೂತವನ್ನು ಕಡಿಮೆ ಮಾಡುತ್ತದೆ. ಇದರಿಂದ ಅಜೀರ್ಣ, ಆಸಿಡಿಟಿಯಂಥವು ಕಡಿಮೆಯಾಗುತ್ತವೆ. ಹೊಟ್ಟೆಯ ಆರೋಗ್ಯಕ್ಕೆ ಅಗತ್ಯವಾದ ಉತ್ತಮ ಬ್ಯಾಕ್ಟೀರಿಯಗಳ ಸಂಖೆಯನ್ನು ಹೆಚ್ಚಿಸುತ್ತದೆ. ಇದರಿಂದ ಜೀರ್ಣಾಂಗಗಳ ಆರೋಗ್ಯ ಸುಧಾರಿಸಿ, ಆಹಾರದಲ್ಲಿನ ಪೋಷಕಾಂಶಗಳು ಚೆನ್ನಾಗಿ ಹೀರಲ್ಪಡುತ್ತವೆ.

ತಿನ್ನುವ ಬಯಕೆಗೆ ಕಡಿವಾಣ

ಬೆಳಗಿನ ಸಮಯದಲ್ಲಿ ದೇಹಕ್ಕೆ ದೊರೆಯುವ ಆರೋಗ್ಯಕರ ಕೊಬ್ಬಿನಿಂದ ದಿನವಿಡೀ ಹೆಚ್ಚು ತಿನ್ನಬೇಕೆಂಬ ಬಯಕೆಗೆ ಕಡಿವಾಣ ಹಾಕುವುದು ಸುಲಭವಾಗುತ್ತದೆ. ಇದರಿಂದ ಕಳ್ಳ ಹಸಿವಿಗೆ ಏನಾದರೂ ಬಾಯಾಡಬೇಕೆಂಬ ಚಟ ನಿಂತು, ದೇಹಕ್ಕೆ ಆರೋಗ್ಯಕರ ತೂಕವನ್ನು ಕಲ್ಪಿಸುವುದಕ್ಕೆ ಸಹಾಯವಾಗುತ್ತದೆ. ಹೊಟ್ಟೆ ತುಂಬಿದ ಭಾವವನ್ನು ಪ್ರಚೋದಿಸುವ ಚೋದಕಗಳ ಬಿಡುಗಡೆಗೂ ಇದು ನೆರವಾಗುತ್ತದೆ. ತಿಳಿದು ತಿಂದರೆ ತುಪ್ಪದಿಂದ ತೂಕವನ್ನು ಇಳಿಸಲೂ ಬಹುದು.

ಶಕ್ತಿ ಸಂಚಯನ

ಇದರ ಕೊಬ್ಬಿನ ಸ್ವರೂಪವು ಹೇಗಿದೆಯೆಂದರೆ ದೀರ್ಘಕಾಲದವರೆಗೆ ದೇಹಕ್ಕೆ ಸುಸ್ಥಿರವಾಗಿ ಶಕ್ತಿಯನ್ನು ನೀಡುತ್ತಲೇ ಇರುವಂತೆ ರೂಪಿತವಾಗಿದೆ. ತ್ವರಿತವಾಗಿ ಶಕ್ತಿಯ ಸ್ವರೂಪ ಪಡೆದು, ದೇಹಕ್ಕೆ ಬೇಕಾದ ಇಂಧನವನ್ನು ಒದಗಿಸುವುದು ತುಪ್ಪದಲ್ಲಿರುವ ಕೊಬ್ಬಿಗೆ ಸಾಧ್ಯ.

ಇದನ್ನೂ ಓದಿ: Oats or Quinoa: ಓಟ್ಸ್‌, ಕಿನೊವಾ- ಇವೆರೆಡರಲ್ಲಿ ಯಾವುದು ಬೆಸ್ಟ್?

ಹೃದಯದ ಆರೋಗ್ಯಕ್ಕೂ ಪೂರಕ

ತುಪ್ಪದಲ್ಲಿ ದೇಹಕ್ಕೆ ಅಗತ್ಯವಾದ ಉತ್ಕರ್ಷಣ ನಿರೋಧಕ ಸತ್ವಗಳಿವೆ. ಇದು ಶರೀರದಲ್ಲಿ ಆಗಬಹುದಾದ ಉರಿಯೂತವನ್ನು ಕಡಿಮೆ ಮಾಡುತ್ತದೆ. ಹೃದಯದ ಆರೋಗ್ಯವನ್ನು ಕಾಪಾಡಿ, ಮಾರಕ ರೋಗಗಳನ್ನು ದೂರ ಇರಿಸುತ್ತವೆ. ಉತ್ತಮ ಕೊಬ್ಬನ್ನು ದೇಹಕ್ಕೆ ನೀಡುತ್ತಾ ಕೊಲೆಸ್ಟ್ರಾಲ್‌ನಂಥ ಬೇಡದ ಕೊಬ್ಬನ್ನು ಕಡಿಮೆ ಮಾಡಬಹುದು. ಆದರೆ ನೆನಪಿಡಿ, ಅತಿಯಾದರೆ ಅಮೃತವೂ ವಿಷ! ತುಪ್ಪ ಒಳ್ಳೆಯದು ಎಂಬ ಕಾರಣಕ್ಕಾಗಿ ಹೆಚ್ಚು ತಿನ್ನುವಂತಿಲ್ಲ. ಅದೇ ಸಮಸ್ಯೆಗೆ ಕಾರಣವಾಗಬಹುದು. ಹಾಗಾಗಿ ಮಿತವಾಗಿಯೇ ಬೆಳಗಿನ ತಿಂಡಿಯ ಜೊತೆಗೆ ಸೇರಿಸಿಕೊಂಡರೆ, ಹಲವು ರೀತಿಯ ಲಾಭಗಳನ್ನು ಪಡೆಯಬಹುದು.

ಗಡ್ಡೆ-ಗೆಣಸುಗಳು ಪೂರ್ವಿಕರ ಕಾಲದಿಂದಲೇ ನಮ್ಮ ಆಹಾರವಾಗಿ ಬಳಕೆಯಾಗುತ್ತಿದೆ. ಅದರಲ್ಲೂ ಮರಗೆಣಸಿಗಿಂತಲೂ ಸಿಹಿ ಗೆಣಸು ಎಲ್ಲರಿಗೂ ಇಷ್ಟವಾಗುವಂಥ ಗಡ್ಡೆ. ತಿಳಿಗುಲಾಬಿ, ಕಂದು, ತಿಳಿ ಹಳದಿ, ನೇರಳೆ ಮುಂತಾಗಿ ಒಂದಕ್ಕಿಂತ ಹೆಚ್ಚು ಬಣ್ಣಗಳಲ್ಲಿರುವ ಈ ಗೆಣಸಿನ ಎಲ್ಲ ಬಣ್ಣಗಳೂ ಆರೋಗ್ಯಕ್ಕೆ ಒಳ್ಳೆಯವೆ. ಇದರ ಬಣ್ಣ ಗಾಢವಾದಷ್ಟೂ ಇದರಲ್ಲಿರುವ ಉತ್ಕರ್ಷಣ ನಿರೋಧಕಗಳ ಸಾಂದ್ರತೆ ಹೆಚ್ಚು ಎಂದು ತಿಳಿಯಬಹುದು. ಸುಮ್ಮನೆ ಬೇಯಿಸಿ ತಿನ್ನುವುದರಿಂದ ಹಿಡಿದು, ಪಲ್ಯ, ಭಾಜಿಗಳ ರೀತಿಯಲ್ಲಿ ಅಡುಗೆಗೆ ಬಳಸಬಹುದು, ಸಲಾಡ್‌ಗೆ, ಚಾಟ್‌ಗಳಿಗೆ ಹಾಕಿ ರುಚಿ ಹೆಚ್ಚಿಸಬಹುದು. ಪೋಡಿ, ಬಜ್ಜಿಗಳ ರೀತಿಯಲ್ಲಿ ಸವಿಯುವವರಿಗೂ ಬರವಿಲ್ಲ. ಇಂಥ ಗಡ್ಡೆಯನ್ನು ತಿನ್ನುವುದರಿಂದ (Sweet Potato Benefits) ಆಗುವ ಲಾಭಗಳೇನು?

ನಾರಿನಂಶ ಹೇರಳ

ಗೆಣಸಿನಲ್ಲಿ ನಾರಿನ ಅಂಶ ವಿಫುಲವಾಗಿದೆ. ಹೆಚ್ಚು ನಾರು ಇರುವಂಥ ಆಹಾರಗಳು ನಮಗೆ ಹಲವು ರೀತಿಯಲ್ಲಿ ಉಪಕಾರವನ್ನು ಮಾಡಬಲ್ಲವು. ಅದರಲ್ಲೂ ಕಳ್ಳ ಹಸಿವನ್ನು ಮಟ್ಟ ಹಾಕುವಲ್ಲಿ ಇದರ ನೆರವು ಅಗತ್ಯವಾಗಿ ಬೇಕಾಗುತ್ತದೆ. ದೀರ್ಘ ಕಾಲದವರೆಗೆ ಹೊಟ್ಟೆ ತುಂಬಿದ ಭಾವವನ್ನು ನೀಡುವ ಇವು, ತಿಂದ ತೃಪ್ತಿಯನ್ನು ಹೆಚ್ಚಿಸುತ್ತವೆ. ಕರಗಬಲ್ಲ ನಾರುಗಳು ದೇಹದಲ್ಲಿ ಅಡಗಿರುವ ಕೊಬ್ಬಿನಂಶವನ್ನು ಕರಗಿಸಿದರೆ, ಕರಗದಿರುವ ನಾರು ಮಲಬದ್ಧತೆಯನ್ನು ನಿವಾರಿಸುತ್ತದೆ.

ಗ್ಲೈಸೆಮಿಕ್‌ ಸೂಚಿ

ಇದರ ರುಚಿ ಸಿಹಿಯೇ ಆದರೂ ಗ್ಲೈಸೆಮಿಕ್‌ ಸೂಚಿ ತೀರಾ ಹೆಚ್ಚೇನಿಲ್ಲ. ಹಾಗಾಗಿ ಜಿಐ ಹೆಚ್ಚಿರುವ ಆಹಾರಗಳಿಗೆ ಹೋಲಿಸಿದಲ್ಲಿ, ರಕ್ತದಲ್ಲಿ ಸಕ್ಕರೆಯಂಶ ದಿಢೀರ್‌ ಏರಿಕೆಯಾಗದಂತೆ ಇದು ನಿರ್ವಹಿಸುತ್ತದೆ. ಇದರಿಂದ ರಕ್ತದಲ್ಲಿ ಇನ್‌ಸುಲಿನ್‌ ಮಟ್ಟವನ್ನು ನಿಯಂತ್ರಿಸಲು ಅನುಕೂಲವಾಗುತ್ತದೆ. ಇದರಿಂದ ತಿನ್ನುವ ಬಯಕೆಯನ್ನು ನಿಯಂತ್ರಿಸಬಹುದು. ಈ ಮೂಲಕ ಚಯಾಪಚಯ ಕೆಡದಂತೆ ಕಾಪಾಡಿಕೊಂಡು, ಹೊಟ್ಟೆಯಲ್ಲಿ ಕೊಬ್ಬು ಶೇಖರವಾಗುವುದನ್ನು ತಡೆಯಬಹುದು.

ಸತ್ವಯುತ

ಇದರಲ್ಲಿ ಪಿಷ್ಟ ಮತ್ತು ನಾರಿನ ಹೊರತಾಗಿ ವಿಟಮಿನ್‌ ಎ, ಸಿ ಮತ್ತು ಬಿ೬ ವಿಫುಲವಾಗಿವೆ. ಜೊತೆಗೆ ಪೊಟಾಶಿಯಂ, ಮ್ಯಾಂಗನೀಸ್‌ನಂಥ ಖನಿಜಗಳು ತುಂಬಿವೆ. ಇವುಗಳೊಂದಿಗೆ ಉತ್ಕರ್ಷಣ ನಿರೋಧಕಗಳು ಸೇರಿಕೊಂಡು ಸತ್ವಯುತ ಆಹಾರವೊಂದು ನಮ್ಮೆದುರಿಗೆ ತೆರೆದುಕೊಳ್ಳುತ್ತದೆ. ಚರ್ಮದ ಹೊಳಪಿಗೆ, ದೃಷ್ಟಿಯ ಪೋಷಣೆಗೆ ಅಗತ್ಯವಾದ ಸತ್ವಗಳು ಇದರಲ್ಲಿವೆ. ಗೆಣಸು ತಿನ್ನುವಾಗ ಅದರ ಸಿಪ್ಪೆ ಸಮೇತ ತಿನ್ನಿ. ಇದರಿಂದ ವಿಟಮಿನ್‌ ಎ ಅಂಶ ಸಮೃದ್ಧವಾಗಿ ದೇಹಕ್ಕೆ ದೊರೆಯುತ್ತದೆ. ಕಡಿಮೆ ಕ್ಯಾಲರಿಯಲ್ಲಿ, ರುಚಿಕಟ್ಟಾದ ಸತ್ವಯುತ ಆಹಾರ ದೊರೆತರೆ ಬೇಡ ಎನ್ನುವವರಾರು?

ತೂಕ ಇಳಿಕೆ

ಇದರಲ್ಲಿರುವ ಪೊಟಾಶಿಯಂ ಅಂಶವು ಡೈಯುರೇಟಿಕ್‌ನಂತೆ ಕೆಲಸ ಮಾಡುತ್ತದೆ. ಅಂದರೆ ಹೆಚ್ಚುವರಿ ನೀರಿನಂಶ ದೇಹದಲ್ಲಿ ಉಳಿಯದಂತೆ, ಹೊಟ್ಟೆ ಉಬ್ಬರಿಸದಂತೆಯೂ ಪರಿಣಾಮ ಬೀರುತ್ತದೆ. ತೂಕ ಇಳಿಸುವವರಿಗೆ ಇದು ಇಂಥ ಹಲವು ವಿಷಯಗಳಲ್ಲಿ ಉಪಯುಕ್ತ ಎನಿಸಬಹುದು. ಅಂದರೆ, ನಾರಿನಂಶ ಹೆಚ್ಚಿರುವುದರಿಂದ ಬೇಗ ಹಸಿವಾಗುವುದಿಲ್ಲ. ಆಗಾಗ ತಿನ್ನು ಬೇಡಿಕೆಯನ್ನು ಮಟ್ಟ ಹಾಕಬಹುದು ಜೊತೆಗೆ ದೇಹದಲ್ಲಿನ ಹೆಚ್ಚುವರಿ ನೀರನ್ನು ತೆಗೆದು ಹೊಟ್ಟೆಯೆಲ್ಲ ಸಪೂರ ಆದಂತೆ ಕಾಣಿಸುತ್ತದೆ.

ಇದನ್ನೂ ಓದಿ: Hair Oil Tips: ನಮ್ಮ ತಲೆಗೂದಲಿಗೆ ಬೇಕಾದ ತೈಲವನ್ನು ಆಯ್ದುಕೊಳ್ಳುವುದು ಹೇಗೆ?

ಎಲ್ಲದಕ್ಕೂ ಹೊಂದುತ್ತದೆ

ಯಾವುದೇ ರೀತಿಯ ಅಡುಗೆಗಳಿಗೆ ಇದನ್ನು ಕಷ್ಟವಿಲ್ಲದೆ ಹೊಂದಿಕೊಳ್ಳಬಹುದು. ಚಪಾತಿಯೊಂದಿಗೆ ಗೆಣಸಿನ ಭಾಜಿ ಮಾಡಿದರೆ ರುಚಿ ಹೆಚ್ಚು. ಊಟಕ್ಕೆ ಜೊತೆಯಾಗಿ ಪಲ್ಯ ಮಾಡಿದರೆ ಒಲ್ಲೆ ಎನ್ನುವವರಿಲ್ಲ. ಬರೀ ಸಲಾಡ್‌ ಮಾಡುವ ಯೋಚನೆಯಿದ್ದರೆ ಗೆಣಸನ್ನು ಬೇಯಿಸಿ ಸೇರಿಸಿಕೊಳ್ಳಬಹುದು. ಸೂಪ್‌ ಜೊತೆಗೆ ಬೇಯಿಸಿದ ಗೆಣಸು ಬೇಗ ಹೊಟ್ಟೆ ತುಂಬಿಸಿ, ನಿಮ್ಮ ಡಯೆಟ್‌ ಯೋಜನೆಯನ್ನು ಕಾಪಾಡುತ್ತದೆ. ಪಾಸ್ತಾ ಮಾಡುವ ಯೋಚನೆಯಿದ್ದರೆ, ಯಾವುದಾದರೂ ಒಂದಿಷ್ಟು ನಟ್‌ಗಳನ್ನು ನೆನೆಸಿ, ಬೇಯಿಸಿದ ಗೆಣಸಿನೊಂಸಿಗೆ ಪೇಸ್ಟ್‌ ಮಾಡಿ ಸಾಸ್‌ ಮಾಡಿದರೆ ಮಕ್ಕಳು ಚಪ್ಪರಿಸಿಕೊಂಡು ತಿನ್ನುತ್ತವೆ. ಮಳೆಗಾಲದಲ್ಲಿ, ಚಳಿಗಾಲದಲ್ಲಿ ಸುಮ್ಮನೆ ಕೆಂಡದಲ್ಲಿ ಸುಟ್ಟು ಅಥವಾ ಬೇಯಿಸಿಕೊಂಡು ಸಿಪ್ಪೆ ಸಮೇತ ತಿಂದರೆ, ಬೇರೆ ಸ್ವರ್ಗವೇ ಬೇಡ!