ಬೆಂಗಳೂರು: ಪಾರ್ಕಿನ್ಸನ್‌ನಿಂದ ಉಂಟಾಗುವ ನರಮಂಡಲದ ಸಮಸ್ಯೆಗಳಿಗೆ ಸೂಕ್ತ ಚಿಕಿತ್ಸೆ ಹಾಗೂ ಥೆರಪಿಗಾಗಿ ಬನ್ನೇರುಘಟ್ಟ ಫೋರ್ಟಿಸ್‌ ಆಸ್ಪತ್ರೆಯಲ್ಲಿ (Fortis Hospital) ಪಾರ್ಕಿನ್ಸನ್‌ ಮತ್ತು ಡೀಪ್‌ ಬ್ರೇನ್‌ ಸ್ಟಿಮುಲೇಷನ್‌ (ಡಿಬಿಎಸ್) ಎನ್ನುವ ಪ್ರತ್ಯೇಕ ಕ್ಲಿನಿಕ್‌ ಪ್ರಾರಂಭಿಸಲಾಗಿದೆ.

ಫೋರ್ಟಿಸ್‌ ಆಸ್ಪತ್ರೆಯ ನರಶಸ್ತ್ರಚಿಕಿತ್ಸಾ ವಿಭಾಗದ ನಿರ್ದೇಶಕ ಡಾ. ರಾಜಕುಮಾರ್ ದೇಶಪಾಂಡೆ, ನೂತನ ಕ್ಲಿನಿಕ್‌ ಅನ್ನು ಉದ್ಘಾಟಿಸಿದರು. ಬಳಿಕ ಮಾತನಾಡಿದ ಅವರು, ಇಂದು ಸಾಕಷ್ಟು ಜನರು ವಯಸ್ಸಾದ ಬಳಿಕ ಪಾರ್ಕಿನ್ಸನ್‌ ಕಾಯಿಲೆಗೆ ತುತ್ತಾಗುತ್ತಿದ್ದಾರೆ, ಇದಕ್ಕೆ ಸೂಕ್ತ ಚಿಕಿತ್ಸೆಯನ್ನು ಫೋರ್ಟಿಸ್‌ ಆಸ್ಪತ್ರೆ ಈಗಾಗಲೇ ಪರಿಚಯಿಸಿದೆ, ಆದರೆ ಕೆಲವರಿಗೆ ಚಿಕಿತ್ಸೆಗಿಂತ ಹೆಚ್ಚಾಗಿ ಕೆಲವು ದೈಹಿಕ ಅಭ್ಯಾಸಗಳ ಮೂಲಕವೂ ಪಾರ್ಕಿನ್ಸನ್‌ನ ಲಕ್ಷಣಗಳಾದ ಕೈ-ಕಾಲು ನಡುಕ ಇತರೆ ದೈಹಿಕ ಆರೋಗ್ಯವನ್ನು ಸುಧಾರಿಸಲು ಸಾಧ್ಯವಾಗಲಿದೆ. ಇದಕ್ಕಾಗಿಯೇ ಪ್ರತ್ಯೇಕ ಕ್ಲಿನಿಕ್‌ ತೆರೆದಿದ್ದೇವೆ. ಇದರ ಜತೆಗೆ, ಡೀಪ್‌ ಬ್ರೇನ್ ಸ್ಟಿಮ್ಯುಲೇಶನ್ (ಡಿಬಿಎಸ್‌) ಚಿಕಿತ್ಸೆಯೂ ದೊರೆಯಲಿದೆ. ಡೀಪ್‌ ಬ್ರೇನ್ ಸ್ಟಿಮ್ಯುಲೇಶನ್ ಪಾರ್ಕಿನ್ಸನ್‌ ಸಮಸ್ಯೆಗೆ ಚಿಕಿತ್ಸೆಯ ಭಾಗ ಎಂದು ವಿವರಿಸಿದರು.

ಇದನ್ನೂ ಓದಿ: Sharavathi Project: ಶರಾವತಿ ಜಲವಿದ್ಯುತ್ ಯೋಜನೆ; ಟೆಂಡರ್‌ ಪ್ರಶ್ನಿಸಿ ಎಲ್ & ಟಿ ಸಲ್ಲಿಸಿದ್ದ ಅರ್ಜಿ ಸುಪ್ರೀಂನಲ್ಲಿ ವಜಾ

ಫೋರ್ಟಿಸ್ ಆಸ್ಪತ್ರೆಯ ನರಶಸ್ತ್ರಚಿಕಿತ್ಸಾ ವಿಭಾಗದ ಹೆಚ್ಚುವರಿ ನಿರ್ದೇಶಕ ಡಾ. ರಘುರಾಮ್ ಜಿ. ಮಾತನಾಡಿ, ಪಾರ್ಕಿನ್ಸನ್‌ ಕಾಯಿಲೆಯಿಂದ ಕೈ-ಕಾಲುಗಳಲ್ಲಿ ನಡುಕ, ತಲೆಯಲ್ಲಿ ನಡುಕ, ಸ್ನಾಯುಗಳ ಬಿಗಿತ, ಚಲನೆಯ ನಿಧಾನತೆ, ಖಿನ್ನತೆ ಮತ್ತು ಭಾವನಾತ್ಮಕ ಬದಲಾವಣೆಗಳು ಸೇರಿದಂತೆ ಸಾಕಷ್ಟು ಸಮಸ್ಯೆಗಳು ಕಂಡು ಬರುತ್ತವೆ. ಇಂತಹ ಕಾಯಿಲೆಗೆ ಕೆಲವೊಮ್ಮೆ ಚಿಕಿತ್ಸೆಗಿಂತ ಥೆರಪಿ ಮುಖ್ಯವಾಗಲಿದೆ.

ಹೀಗಾಗಿ ಡೀಪ್‌ ಬ್ರೇನ್‌ ಸ್ಟಿಮುಲೇಷನ್‌ ಥೆರಪಿಗೆ ಇಲ್ಲಿ ಅವಕಾಶ ನೀಡಲಾಗಿದೆ. ವಯಸ್ಸಾದವರು ಈ ರೀತಿಯ ಕಾಯಿಲೆ ಹೊಂದಿದ್ದರೆ, ಈ ಥೆರಪಿ ತೆಗೆದುಕೊಳ್ಳಬಹುದು. ಈ ಕ್ಲಿನಿಕ್‌ ವಾರದ ದಿನಗಳಲ್ಲಿ ಬೆಳಿಗ್ಗೆ 9:30 ರಿಂದ ಮಧ್ಯಾಹ್ನ 3:00 ರವರೆಗೆ ತೆರೆದಿರಲಿದೆ. ಇಂದು ಉದ್ಘಾಟನೆಗೊಂಡ ಕ್ಲಿನಿಕ್‌ನಲ್ಲಿ ಮಾನಸಿಕ ಆರೋಗ್ಯ ತಜ್ಞರು ಮತ್ತು ಯೋಗ ತರಬೇತುದಾರರು, ಮಾನಸಿಕ ಯೋಗಕ್ಷೇಮ ಮತ್ತು ಯೋಗ ಅಭ್ಯಾಸಗಳ ಕುರಿತು ಸೆಷನ್‌ಗಳನ್ನು ನಡೆಯಲಿದೆ ಎಂದರು.

ಇದನ್ನೂ ಓದಿ: Multivitamin Pill: ಮಲ್ಟಿವಿಟಮಿನ್‌ ಮಾತ್ರೆಗಳ ಮೊರೆ ಹೋಗದೆ, ನೈಸರ್ಗಿಕವಾಗಿ ಪೋಷಣೆ ಪಡೆಯುವುದು ಹೇಗೆ?

ಕಾರ್ಯಕ್ರಮದಲ್ಲಿ ಫೋರ್ಟಿಸ್ ಆಸ್ಪತ್ರೆಯ ನರವಿಜ್ಞಾನದ ಹೆಚ್ಚುವರಿ ನಿರ್ದೇಶಕ ಡಾ.ಗುರುಪ್ರಸಾದ್ ಹೊಸೂರ್ಕರ್, ಫೋರ್ಟಿಸ್ ಹಾಸ್ಪಿಟಲ್ಸ್ ಬೆಂಗಳೂರಿನ ಬಿಸಿನೆಸ್ ಹೆಡ್ ಅಕ್ಷಯ್ ಒಲೆಟಿ ಉಪಸ್ಥಿತರಿದ್ದರು.

ಈಗ ಏನಿದ್ದರೂ ರೆಡಿಮೇಡ್‌ ಕಾಲ. ಎಲ್ಲವೂ ದಿಢೀರ್‌ ಆಗಬೇಕು. ಕಾಯುವುದಕ್ಕೆ, ಮಾಡುವುದಕ್ಕೆ ಯಾರಿಗೂ ಸಮಯವಿಲ್ಲ. ಅಡುಗೆಯಿಂದ ಹಿಡಿದು ಪೋಷಣೆಯವರೆಗೆ ನಮಗೆ ಮಾರುಕಟ್ಟೆಯಲ್ಲಿ ಸಿಗುವ ರೆಡಿಮೇಡ್‌ ವಸ್ತುಗಳೇ ಬೇಕು. ಪ್ರೊಟೀನ್‌ಗಾಗಿ ಪ್ರೊಟೀನ್‌ ಮಿಕ್ಸ್‌ಗಳು, ಮಲ್ಟಿವಿಟಮಿನ್‌ ಮಾತ್ರೆಗಳು ಇತ್ಯಾದಿಗಳ ಸೇವನೆಯೂ ಸಹಜ ಎಂಬಷ್ಟು ಸಲೀಸಾಗಿದೆ. ಆದರೆ, ನಾವು ನಿತ್ಯವೂ ಸೇವಿಸುವ ಆಹಾರ ಮೂಲಗಳಲ್ಲೇ ನಾವು ಪೋಷಕಾಂಶಗಳನ್ನು ಕಡಿಮೆ ಮಾಡಿಕೊಳ್ಳುತ್ತಿದ್ದೇವೆ ಎಂಬುದು ವಿಪರ್ಯಾಸ. ಮಾರುಕಟ್ಟೆಯಲ್ಲೂ ವಿಧವಿಧವಾದ ಮಲ್ಟಿವಿಟಮಿನ್‌ಗಳು, ಪೋಷಣೆಯ ಡ್ರಿಂಕ್‌ಗಳೂ ಲಭ್ಯವಿರುವುದರಿಂದ ನಿತ್ಯದ ಪೋಷಣೆಯನ್ನು ಅವುಗಳ ಮೂಲಕವೇ ಸುಲಭವಾಗಿ ಪಡೆಯುವುದು ಬಹಳ ಮಂದಿಗೆ ಧಾವಂತದ ಜೀವನದಲ್ಲಿ ಅಭ್ಯಾಸವೂ ಆಗಿಬಿಟ್ಟಿದೆ. ಆದರೆ ಇವು ನಿಜಕ್ಕೂ, ಆಹಾರಗಳನ್ನು ಸೇವಿಸುವ ಮೂಲಕ ಪಡೆಯುವ ಪೋಷಣೆಯಂತೆ ಒಳ್ಳೆಯದನ್ನೇ ಮಾಡಬಲ್ಲವೇ? ನಾವು ಸೇವಿಸುವ ಎಲ್ಲವೂ ಸರಿಯಾದ ಮೂಲದಿಂದ ಬಂದ ಉತ್ತಮ ಪೋಷಣೆಯ ಮಾತ್ರೆಗಳೇ ಎಂಬ ಬಗ್ಗೆ ಗೊಂದಲಗಳು ಇದ್ದೇ ಇವೆ. ಆದರೆ, ನಾವು ಸರಿಯಾದ ಆಹಾರ ಸೇವನೆಯ ಮೂಲಕವೂ ನಮ್ಮ ದೇಹಕ್ಕೆ ಅಗತ್ಯವಾದ ಪೋಷಣೆಯನ್ನೂ ಆರೋಗ್ಯಯುತವಾದ ನೈಸರ್ಗಿಕ ಮಾರ್ಗದಲ್ಲಿಯೇ ಪಡೆದುಕೊಳ್ಳಬಹುದು. ಬನ್ನಿ, ಯಾವೆಲ್ಲ ಆಹಾರಗಳ ಸೇವನೆಯಿಂದ ನಿಮ್ಮ ಮಲ್ಟಿವಿಟಮಿನ್‌ ಮಾತ್ರೆಗಳಿಗಿಂತಲೂ (multivitamin pill) ಹೆಚ್ಚು ಪೋಷಣೆಯನ್ನು ಪಡೆಯಬಹುದು ಎಂಬುದನ್ನು ನೋಡೋಣ.

ಹಳದಿ ಕ್ಯಾಪ್ಸಿಕಂ

ಹಳದಿ ಬಣ್ಣದ ಕ್ಯಾಪ್ಸಿಕಂ ವಿಟಮಿನ್‌ ಸಿ ನಮ್ಮ ದೇಹಕ್ಕೆ ಒದಗಿಸಬಲ್ಲ ಆಹಾರಗಳ ಪೈಕಿ ಬಹುಮುಖ್ಯವಾದುದು. ವಿಟಮಿನ್‌ ಸಿ ನೀರಿನಲ್ಲಿ ಕರಗಬಲ್ಲ ಹಾಗೂ ದೇಹ ಹೆಚ್ಚುವರಿಯನ್ನು ಶೇಖರಿಸಿ ಇಡಲಾಗದ ಪೋಷಕಾಂಶವಾದ್ದರಿಂದ ಇದು ನಿತ್ಯವೂ ನಮ್ಮ ದೇಹಕ್ಕೆ ಬೇಕಾದ ಪೋಷಣೆ. ವಿಟಮಿನ್‌ ಸಿ ಕೊರತೆಯಿಂದ ಸ್ಕರ್ವಿ ಸೇರಿದಂತೆ ತಲೆಸುತ್ತು, ಸುಸ್ತು, ಚರ್ಮದಲ್ಲಿ ಕಜ್ಜಿ-ಗುಳ್ಳೆಗಳು, ಮಾಂಸಖಂಡಗಳಲ್ಲಿ ಊತ ಹಾಗೂ ರಕ್ತಸ್ರಾವದಂತಹ ಸಮಸ್ಯೆಗಳೂ ಬರಬಹುದು. ರೋಗನಿರೋಧಕ ಶಕ್ತಿಯನ್ನು ಹೆಚ್ಚು ಮಾಡಲು ವಿಟಮಿನ್‌ ಸಿ ಬೇಕೇಬೇಕು. ಒಂದು ಹಳದಿ ಕ್ಯಾಪ್ಸಿಕಂನಲ್ಲಿ 75-90 ಎಂಜಿಗಳಷ್ಟು ವಿಟಮಿನ್‌ ಸಿ ಇರುವುದರಿಂದ ಹಲವು ಹಲವು ಸಮಸ್ಯೆಗಳನ್ನು ಇದರ ಸೇವನೆಯಿಂದಲೇ ದೂರ ಇರಿಸಬಹುದಾಗಿದೆ.

ಹಸಿರು ತರಕಾರಿಗಳು

ಹಸಿರು ಬಣ್ಣದ ತರಕಾರಿಗಳಲ್ಲಿ ಅತ್ಯಂತ ಹೆಚ್ಚು ಪೋಷಕಾಂಶಗಳಿರುತ್ತವೆ. ಪಾಲಕ್‌, ಬಸಳೆ, ನುಗ್ಗೆಸೊಪ್ಪು, ಕ್ಯಾಬೇಜ್‌ ಇತ್ಯಾದಿಗಳಲ್ಲಿ ಹೆಚ್ಚು ವಿಟಮಿನ್‌ ಇರುತ್ತದೆ. ವಿಟಮಿನ್‌ ಎ, ಕೆ, ಇ, ಸಿ, ಬೀಟಾ ಕೆರೋಟಿನ್‌, ಫೋಲೇಟ್‌, ವಿಟಮಿನ್‌ ಬಿ1, ಬಿ2, ಬಿ5, ಬಿ3 ಹಾಗೂ ಬಿ6ಗಳಿಗಾಗಿ ಈ ಹಸಿರು ಬಣ್ಣದ ತರಕಾರಿ ಸೊಪ್ಪುಗಳನ್ನು ಆಗಾಗ ಸೇವಿಸಿ.

ಮೀನು

ಒಮೆಗಾ 3 ಫ್ಯಾಟಿ ಆಸಿಡ್‌ಗಳಿಗಾಗಿ ಮೀನಿನ ಸೇವನೆ ಬಹಳ ಮುಖ್ಯ. ಮೀನಿನಲ್ಲಿ ವಿಟಮಿನ್‌ ಬಿ೨, ವಿಟಮಿನ್‌ ಡಿ, ಕ್ಯಾಲ್ಶಿಯಂ, ಕಬ್ಬಿಣಾಂಶ, ಝಿಂಕ್‌, ಪಾಸ್ಪರಸ್‌, ಮೆಗ್ನೀಶಿಯಂ, ಅಯೋಡಿನ್‌, ಪೊಟಾಶಿಯಂ ಇವೆಲ್ಲ ಖನಿಜಾಂಶಗಳೂ ಇರುವುದರಿಂದ ಇದು ಅತ್ಯಂತ ಆರೋಗ್ಯಕರ.

ಮೊಟ್ಟೆ

ಪ್ರೊಟೀನ್‌ಗಾಗಿ ರೆಡಿಮೇಡ್‌ ಡ್ರಿಂಕ್‌ಗಳನ್ನು ಕುಡಿಯುವ ಬದಲು ಮೊಟ್ಟೆ ಸೇವಿಸಿದರೆ ಸಾಕು. ಅತ್ಯಂತ ಸರಳ ಹಾಗೂ ಸುಲಭವಾದ ವಿಧಾನವಿದು. ಮೊಟ್ಟೆಯಲ್ಲಿ ಪ್ರೊಟೀನ್‌, ವಿಟಮಿನ್‌ ಎ, ಬಿ, ಬಿ೨, ಬಿ12 ಹಾಗೂ ವಿಟಮಿನ್‌ ಡಿ ಹೇರಳವಾಗಿದೆ. ಅಯೋಡಿನ್‌ ಹಾಗೂ ಸೆಲೆನಿಯಮ್‌ ಕೂಡಾ ಇವೆ.

ಮೊಸರು

ಕ್ಯಾಲ್ಶಿಯಂ ದೇಹಕ್ಕೆ ಬೇಕೆಂದರೆ, ಮೊಸರು ತಿನ್ನುವುದನ್ನು ಬಿಡಬೇಡಿ. ಕ್ಯಾಲ್ಶಿಯಂ, ವಿಟಮಿನ್‌ ಬಿ, ಬಿ12 ಇತ್ಯಾದಿಗಳ ಆಗರ ಮೊಸರು. ಹಾಗೂ ಹಾಲಿನ ಉತ್ಪನ್ನಗಳು. ಹಾಗಾಗಿ, ಹಾಲು, ಮೊಸರು, ಪನೀರ್‌ನಂತಹ ಆಹಾರಗಳನ್ನು ಆಗಾಗ ಸೇವಿಸಿ. ದೇಹಕ್ಕೆ ನಿತ್ಯವೂ ಕ್ಯಾಲ್ಶಿಯಂ ಕೊರತೆಯಾಗದಂತೆ ನೋಡಿಕೊಳ್ಳಿ. ನೆನಪಿಡಿ, ಇವಿಷ್ಟಲ್ಲದೆ, ಒಣಹಣ್ಣುಗಳು, ಒಣ ಬೀಜಗಳು, ಧಾನ್ಯ ಬೇಳೆ ಕಾಳುಗಳು, ತರಕಾರಿ ಹಣ್ಣುಗಳು ಇತ್ಯಾದಿಗಳಿಂದ ಸಮೃದ್ಧವಾದ ಊಟವನ್ನು ನೀವು ನಿತ್ಯವೂ ಮಾಡುತ್ತಿದ್ದರೆ, ಖಂಡಿತವಾಗಿಯೂ ಮಲ್ಟಿ ವಿಟಮಿನ್‌ಗಳ ಸೇವನೆಯ ಅಗತ್ಯವೂ ಬಾರದು.

ಇದನ್ನೂ ಓದಿ: Sleeping Tips: ದಿನಕ್ಕೆಷ್ಟು ತಾಸು ನಿದ್ದೆ ಮಾಡುತ್ತೀರಿ ನೀವು? ಇದು ಗಂಭೀರ ವಿಷಯ!

ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ನಟಿ ಶಿಲ್ಪಾ ಮಂಜುನಾಥ್‌ ಹಾಟ್‌ ಲುಕ್‌ನಲ್ಲಿ (Actress Summer Fashion) ಬಿಂದಾಸ್‌ ಆಗಿ ಕಾಣಿಸಿಕೊಂಡಿದ್ದಾರೆ. ಬೇಸಿಗೆಯ ಬಿಸಿಲಿನಲ್ಲಿ ಪೂಲ್‌ ಸೈಡ್‌ನಲ್ಲಿ ಕಾಣಿಸಿಕೊಂಡಿರುವ ಶಿಲ್ಪಾ, ವೈಟ್‌ ಸ್ಟ್ರಾಪ್‌ ಮಿನಿ ಕ್ರಾಪ್‌ ಟಾಪ್‌, ಜೀನ್ಸ್‌ ಶಾರ್ಟ್ಸ್‌ ಹಾಗೂ ಇದರ ಮೇಲೊಂದು ಶೀರ್‌ ಶಿಫಾನ್‌ ಪ್ರಿಂಟೆಡ್‌ ಟ್ರಾಪಿಕಲ್‌ ವಿನ್ಯಾಸದ ತೆಳುವಾದ ಜಾಕೆಟ್‌ನಲ್ಲಿ ಬಿಂದಾಸ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ.

ಮಾಡೆಲ್‌/ನಟಿ ಶಿಲ್ಪಾ ಬಿಂದಾಸ್‌ ಲುಕ್‌

ಮಾಡೆಲ್‌ ಕಮ್‌ ನಟಿ ಶಿಲ್ಪಾ ಆಗಾಗ ಒಂದಲ್ಲ ಒಂದು ಲುಕ್‌ನಲ್ಲಿ ಕಾಣಿಸಿಕೊಳ್ಳುತ್ತಲೇ ಇರುತ್ತಾರೆ. ಇವರು ಕನ್ನಡದ ಹುಡುಗಿ ಮಾತ್ರವಲ್ಲ, ಮಾಜಿ ಮಿಸ್‌ ಕರ್ನಾಟಕ ಕೂಡ. ಕನ್ನಡ ಸಿನಿಮಾಗಳ ಮೂಲಕ ನಟನೆಗೆ ಕಾಲಿಟ್ಟ ಶಿಲ್ಪಾ, ತದನಂತರ ತಮಿಳು, ತೆಲುಗು ಸೇರಿದಂತೆ ಇತರೇ ಭಾಷೆಗಳಲ್ಲಿ ನಟಿಸಲಾರಂಭಿಸಿದರು. ಇದೀಗ ಸಾಕಷ್ಟು ತಮಿಳು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಸಾಕಷ್ಟು ಜಾಹೀರಾತುಗಳಲ್ಲೂ ಕಾಣಿಸಿಕೊಂಡಿದ್ದಾರೆ. ಈ ಮಧ್ಯೆ ಸೋಷಿಯಲ್‌ ಮೀಡಿಯಾದಲ್ಲೂ ಸಾಕಷ್ಟು ಫ್ಯಾನ್‌ ಫಾಲೋವಿಂಗ್‌ ಹೊಂದಿರುವ ಇವರು, ಆಗಾಗ್ಗೆ ಸಾಕಷ್ಟು ಫೋಟೋಶೂಟ್‌ಗಳ ಮೂಲಕ ಅಭಿಮಾನಿಗಳನ್ನು ಸೆಳೆಯುತ್ತಿರುತ್ತಾರೆ. ಇದರೊಂದಿಗೆ ಸೀಸನ್‌ಗೆ ತಕ್ಕಂತೆ ಸ್ಟೈಲಿಂಗ್‌ ಮೂಲಕ ಕಾಣಿಸಿಕೊಳ್ಳುತ್ತಿರುತ್ತಾರೆ. ಇದೇ ರೀತಿ ಇದೀಗ ಬಾಲಿವುಡ್‌ಗರನ್ನು ಹೋಲುವಂತಹ ಈ ಸೀಸನ್‌ನ ಹಾಟ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಶಿಲ್ಪಾ ತಮ್ಮ ಈ ಬಿಂದಾಸ್‌ ಔಟ್‌ಫಿಟ್‌ಗೆ ತಕ್ಕಂತೆ ಸನ್‌ಗ್ಲಾಸ್‌, ಕೈಗಳಿಗೆ ಫಂಕಿ ಬ್ರೇಸ್‌ಲೇಟ್ಸ್‌, ಪಾದಕ್ಕೆ ಫ್ಲಿಪ್‌ ಫ್ಲಾಪ್‌, ಆಂಕಲ್‌ ಸೈನ್‌, ಧರಿಸಿ, ಈ ಲುಕ್ಕನ್ನು ಹೈಲೈಟ್‌ ಮಾಡಿದ್ದಾರೆ. ಪೂಲ್‌ಸೈಟ್‌ನಲ್ಲಿ ಇವರ ಔಟ್‌ಲುಕ್‌ ಸಖತ್ತಾಗಿ ಮ್ಯಾಚ್‌ ಆಗಿದೆ ಎನ್ನುತ್ತಾರೆ ಫ್ಯಾಷನ್‌ ವಿಮರ್ಶಕರು.

ಅಲ್ಟ್ರಾ ಮಾಡರ್ನ್‌ ಹುಡುಗಿಯರ ಪೂಲ್‌ಸೈಡ್‌ ಲುಕ್‌

ಶಿಲ್ಪಾ ಕಾಣಿಸಿಕೊಂಡಿರುವ ಈ ಪೂಲ್‌ಸೈಡ್‌ ಪಾರ್ಟಿಯ ಬಿಂದಾಸ್‌ ಲುಕ್‌ ಎಂದು ಕೂಡ ಕರೆಯಬಹುದು. ಹಾಗೆಂದು ಇದು ನೈಟ್‌ ಪಾರ್ಟಿಯದ್ದಲ್ಲ! ಮಧ್ಯಾಹ್ನದ ಸಮಯದಲ್ಲಿ ನಡೆಯುವ ಬ್ರಂಚ್‌ ಅಥವಾ ಲಂಚ್‌ ಪಾರ್ಟಿಯ ಬಿಂದಾಸ್‌ ಲುಕ್‌ ಇದು ಎನ್ನುತ್ತಾರೆ ಸ್ಟೈಲಿಸ್ಟ್‌ಗಳು. ಇನ್‌ಡೋರ್‌ ಪಾರ್ಟಿಗಳಲ್ಲಿ ಈ ಔಟ್‌ಫಿಟ್‌ ಸಾಮಾನ್ಯ ಎನ್ನುತ್ತಾರೆ ಅವರು.

ಬಾಲಿವುಡ್‌ನವರ ಫೆವರೇಟ್‌ ಲುಕ್‌

ಇನ್ನು, ಬಿಸಿಲು ಕಾಲದಲ್ಲಿ ಸೆಕೆ ಹೆಚ್ಚು, ಹಾಗಾಗಿ, ಈ ಲುಕ್‌ ಬಾಲಿವುಡ್‌ಗರ ಫೇವರೇಟ್‌ ಲುಕ್‌ ಎಂದರೂ ತಪ್ಪಲ್ಲ! ದಿನದ ಮಧ್ಯೆ ನಡೆಯುವ ಪಾರ್ಟಿ ಲುಕ್‌ಗಾಗಿ ಈ ಸ್ಟೈಲಿಂಗ್‌ನಲ್ಲಿ ಬಾಲಿವುಡ್‌ ತಾರೆಯರು ಆಗಾಗ್ಗೆ ಕಾಣಿಸಿಕೊಳ್ಳುತ್ತಲೇ ಇರುತ್ತಾರೆ. ಉದಾಹರಣೆಗೆ., ದಿಶಾ ಪಟಾನಿ, ಅನನ್ಯಾ, ಜಾನ್ಹವಿ, ಅಹನಾ, ಸುಹಾನಾ, ನೋರಾ, ಖುಷಿ ಕಪೂರ್‌ ಸೇರಿದಂತೆ ನಾನಾ ನಟಿಯರು ಈ ಲುಕ್‌ನ ದಾಸರು. ಈ ಲುಕ್‌ ಬಾಡಿ ಮಾಸ್‌ ಇಂಡೆಕ್ಸ್‌ ಹೈಲೈಟ್‌ ಮಾಡುವುದರೊಂದಿಗೆ, ಹಾಟ್‌ ಲುಕ್‌ ನೀಡುತ್ತದೆ. ಜೊತೆಗೆ ನೋಡುಗರನ್ನು ಸೆಳೆಯುತ್ತದೆ ಎನ್ನುತ್ತಾರೆ ಸ್ಟೈಲಿಂಗ್‌ ಎಕ್ಸ್‌ಫರ್ಟ್ಸ್‌.‌ ಬಹಳಷ್ಟು ಬಾರಿ ಈ ನಟಿಯರ ಡೈಲಿ ಲುಕ್‌ ಕೂಡ ಇದಾಗಿರುತ್ತದೆ. ಆದರೆ, ಇಲ್ಲಿನ ಸ್ಥಳೀಯ ನಟಿಯರು ಹಾಗೂ ಮಾಡೆಲ್‌ಗಳು ಮಾತ್ರ, ಈ ಬಗ್ಗೆ ಸಖತ್‌ ಕಾನ್ಶಿಯಸ್‌! ತಮ್ಮ ಔಟಿಂಗ್‌ ಹಾಗೂ ವೀಕೆಂಡ್‌ ಮತ್ತು ಪಾರ್ಟಿಗಳಲ್ಲಿ ಕಾಣಿಸಿಕೊಳ್ಳುವಾಗ ಮಾತ್ರ ಈ ಲುಕ್‌ಗೆ ಮೊರೆ ಹೋಗುತ್ತಾರೆ. ಅದು ಇನ್‌ಡೋರ್‌ ಪಾರ್ಟಿಗಳಲ್ಲಿ ಮಾತ್ರ ಹೀಗೆಲ್ಲಾ ಕಾಣಿಸಿಕೊಳ್ಳುತ್ತಾರೆ. ಪಬ್ಲಿಕ್‌ನಲ್ಲಿ ಈ ಲುಕ್‌ನಲ್ಲಿ ಕಾಣಿಸಿಕೊಳ್ಳಲು ಹಿಂಜರಿಯುತ್ತಾರೆ ಎನ್ನುತ್ತಾರೆ ಸ್ಟೈಲಿಸ್ಟ್‌ಗಳು.

(ಲೇಖಕಿ ಫ್ಯಾಷನ್‌ ಪತ್ರಕರ್ತೆ)

ಇದನ್ನೂ ಓದಿ: Season Hairstyle: ವೆಸ್ಟರ್ನ್‌ ಲುಕ್‌ಗೆ ಎಂಟ್ರಿ ಕೊಟ್ಟ ಟ್ರೆಡಿಷನಲ್‌ ಲುಕ್‌ನ ಎರಡು ಜಡೆಯ 3 ರೂಪ ಹೇಗಿದೆ ನೋಡಿ!

ಪ್ರಯಾಣ ಮಾಡುತ್ತಿದ್ದೀರಿ, ಬಸ್ಸು, ಕಾರು, ವಿಮಾನ… ಯಾವುದೋ ಒಂದರಲ್ಲಿ. ನಾಲ್ಕಾರು ತಾಸುಗಳ ದಾರಿಯಲ್ಲಿ ಕೂತಲ್ಲೇ ಕೂತಿರುತ್ತೀರಿ. ನಿಮ್ಮ ಗಮ್ಯ ತಲುಪಿದ ಮೇಲೆ ನೋಡಿದರೆ, ಕಾಲುಗಳು ಊದಿಕೊಂಡಂತಿವೆ. ʻಅರೆ! ಏನಾಯ್ತು… ಚೆನ್ನಾಗೇ ಇತ್ತಲ್ಲ ಹೊರಡುವಾಗʼ ಎಂದು ಗಾಬರಿ ಬೀಳುತ್ತೀರಿ. ಇದು ನಿಮಗಷ್ಟೇ ಅಲ್ಲ, ಬಹಳಷ್ಟು ಮಂದಿಗೆ ಅನುಭವಕ್ಕೆ ಬಂದಿರಬಹುದು. ಒಂದೆಡೆ ದೀರ್ಘಕಾಲ ಕುಳಿತಿದ್ದರೆ ಕಾಲುಗಳು ಊದಿಕೊಂಡಂತಾಗಿ, ʻಏನಾಯ್ತಪ್ಪ!ʼ ಎಂದು ಚಿಂತಿಸುವಂತಾಗುತ್ತದೆ. ಸಾಮಾನ್ಯವಾಗಿ ಇದಕ್ಕೆ ಸಿಕ್ಕಾಪಟ್ಟೆ ಚಿಂತೆ ಮಾಡುವ ಅಗತ್ಯವಿಲ್ಲದಿದ್ದರೂ, ಕೆಲವೊಮ್ಮೆ ಕಾಲು ಊದಿಕೊಳ್ಳುವುದರಲ್ಲಿ ಅಪಾಯದ ಮುನ್ಸೂಚನೆಗಳನ್ನು ಕಾಣಬಹುದು. ಏನದು? ಒಂದೆಡೆ ಹೆಚ್ಚು ಸಮಯ ಕೂತಿದ್ದರೆ ಕಾಲುಗಳು (Leg Swelling) ಊದಿಕೊಳ್ಳುವುದೇಕೆ?

ಹೀಗೇಕಾಗುತ್ತದೆ?

ಇದಕ್ಕೆ ಹಲವು ಕಾರಣಗಳು ಇರಬಹುದು. ಆದರೆ ಕಾಲುಗಳಲ್ಲಿ ನೀರು ತುಂಬಿಕೊಳ್ಳುವುದು ಎಲ್ಲಕ್ಕಿಂತ ಪ್ರಮುಖ ಕಾರಣ. ಕುಳಿತಲ್ಲಿಂದ ಕದಲದಿದ್ದಾಗ, ರಕ್ತ ಪರಿಚಲನೆಗೆ ಅಗತ್ಯವಾದ ದೈಹಿಕ ಚಲನೆಗಳು ಶರೀರದಲ್ಲಿ ಇರುವುದಿಲ್ಲ. ಇದರಿಂದ ನೀರಿನಂಶ ಕಾಲಿನ ಭಾಗದಲ್ಲಿ ತುಂಬಿಕೊಳ್ಳುತ್ತದೆ. ಇದರಿಂದ ಕಾಲುಗಳು ದಪ್ಪವಾದಂತೆ, ಕೆಲವೊಮ್ಮೆ ಕೈಗಳು ಸಹ ಊದಿಕೊಂಡಂತೆ ಕಾಣಬಹುದು. ಇದಲ್ಲದೆ ಇನ್ನೂ ಕೆಲವು ಕಾರಣಗಳು ಈ ತೊಂದರೆಯ ಹಿಂದಿರುವುದಕ್ಕೆ ಸಾಧ್ಯವಿದೆ.

ಎತ್ತರದ ಜಾಗದಲ್ಲಿ ಪ್ರಯಾಣ ಮಾಡುತ್ತಿರುವಾಗ ಅಲ್ಲಿನ ಗಾಳಿಯ ಒತ್ತಡ ಮತ್ತು ಆಮ್ಲಜನಕದ ಲಭ್ಯತೆ ವ್ಯತ್ಯಾಸವಾದಾಗಲೂ ಅದು ದೇಹದ ಮೇಲೆ ಪರಿಣಾಮ ಬೀರುತ್ತದೆ. ಆಗಲೂ ಕಾಲುಗಳಲ್ಲಿ ನೀರು ತುಂಬಿಕೊಳ್ಳುವ ಸಾಧ್ಯತೆಯಿದೆ. ಅದಕ್ಕೆ ಸರಿಯಾಗಿ, ಹೆಚ್ಚು ಚಲನೆಯಿಲ್ಲದಂತೆ ಕುಳಿತಿದ್ದಾಗಲೂ ಇದರ ಪರಿಣಾಮ ಇನ್ನೂ ಹೆಚ್ಚಾದಂತೆ, ಪಾದ, ಕಾಲುಗಳಲ್ಲಿ ನೀರು ತುಂಬಿದಂತೆ ಕಾಣುತ್ತದೆ.

ಪ್ರಯಾಣದಲ್ಲಿ ಹೆಚ್ಚು ನೀರು ಕುಡಿಯದಿರುವುದು ಇದಕ್ಕೆ ಮತ್ತೊಂದು ಕಾರಣವಾಗಿರಬಹುದು. ಹೆಚ್ಚು ನೀರು ಕುಡಿದರೆ ಪದೇಪದೆ ಬಾತ್‌ರೂಂಗಳನ್ನು ಹುಡುಕಬೇಕು ಎನ್ನುವ ಕಾರಣಕ್ಕಾಗಿ ಬಹಳಷ್ಟು ಮಂದಿ ಪ್ರಯಾಣದ ಸಮಯದಲ್ಲಿ ನೀರು ಕುಡಿಯುವುದನ್ನು ಕಡಿಮೆ ಮಾಡುತ್ತಾರೆ. ಇದರಿಂದ ನೀರಿನ ಲಭ್ಯತೆ ಕಡಿಮೆಯಿದೆ ಎಂಬ ಭಾವ ದೇಹಕ್ಕೆ ಬರುತ್ತಿದ್ದಂತೆ, ಇರುವ ನೀರನ್ನು ಹಿಡಿದಿಟ್ಟುಕೊಳ್ಳಲು ಶರೀರ ಪ್ರಯತ್ನಿಸುತ್ತದೆ. ಆಗಲೂ ಕಾಲುಗಳಲ್ಲಿ ನೀರು ತುಂಬಿಕೊಂಡಂತಾಗುತ್ತದೆ. ಬಿಗಿಯಾದ ಉಡುಪುಗಳು, ಶೂಗಳನ್ನು ಧರಿಸಿ ಪ್ರಯಾಣಿಸುವುದು ಕೆಲವೊಮ್ಮೆ ಇದಕ್ಕೆ ಕಾರಣವಾಗುತ್ತದೆ. ಮೊದಲೇ ಚಲನೆಯಿಲ್ಲದೆ ಕುಳಿತಂಥ ಸ್ಥಿತಿಯಲ್ಲಿ ರಕ್ತಪರಿಚಲನೆ ಕಡಿಮೆಯೇ. ಅದರಲ್ಲಿ ಬಿಗಿಯಾದ ಧಿರಿಸುಗಳನ್ನು ತೊಟ್ಟರೆ, ಇನ್ನಷ್ಟು ತೊಂದರೆಯಾಗುತ್ತದೆ.

ಡಿವಿಟಿ

ಇವೆಲ್ಲಕ್ಕಿಂತ ಹೊರತಾಗಿ ಇನ್ನೊಂದು ಮುಖ್ಯ ಕಾರಣ ಕಾಲಿನ ಊತಕ್ಕೆ ಕಾರಣವಾಗಬಹುದು. ಡೀಪ್‌ ವೈಯ್ನ್‌ ಥ್ರೊಂಬೊಸಿಸ್‌ ಅಥವಾ ಡಿವಿಟಿ ಎಂದೇ ಕರೆಯಲಾಗುತ್ತದೆ ಈ ಕಾರಣವನ್ನು. ಕಾಲಿನ ರಕ್ತನಾಳಗಳಲ್ಲಿ ರಕ್ತ ಹೆಪ್ಪುಗಟ್ಟಿದಂತಾಗುತ್ತದೆ. ಇದರಿಂದ ಕಾಲು ದಪ್ಪವಾಗುತ್ತದೆ. ಹೀಗೆ ರಕ್ತ ಹೆಪ್ಪುಗಟ್ಟುವಂಥ ದೇಹಸ್ಥಿತಿ ಇದ್ದವರು ಪ್ರಯಾಣದಲ್ಲಿ ಹೆಚ್ಚಿನ ಎಚ್ಚರಿಕೆ ವಹಿಸಬೇಕು. ಈ ಸ್ಥಿತಿಯನ್ನು ತ್ವರಿತವಾಗಿ ಗ್ರಹಿಸಿ, ವೈದ್ಯರಲ್ಲಿ ಚಿಕಿತ್ಸೆಯನ್ನೂ ಪಡೆಯಬೇಕು. ಡಿವಿಟಿ ಇದ್ದರೇನಾಗುತ್ತದೆ? ಯಾವ ಲಕ್ಷಣಗಳನ್ನು ಗ್ರಹಿಸಬೇಕು?

ಲಕ್ಷಣಗಳು

ಊತ ಒಂದೇ ಕಾಲಿನಲ್ಲಿ ಕಾಣಬಹುದು. ಸಮಸ್ಯೆ ಇರುವ ಕಾಲು, ಇನ್ನೊಂದು ಕಾಲಿಗಿಂತ, ಭಾರವಾದ ಅನುಭವ ಆಗಬಹುದು. ಹೆಪ್ಪುಗಟ್ಟಿದ ಭಾಗದಲ್ಲಿ ನೋವು, ಉರಿ ಉಂಟಾದೀತು. ನಡೆದಾಡುವಾಗ, ನಿಂತಾಗ ಈ ನೋವು ಇನ್ನೂ ಹೆಚ್ಚು ಅನುಭವಕ್ಕೆ ಬರುತ್ತದೆ. ರಕ್ತ ಗರಣೆಯಾದಲ್ಲಿ ಚರ್ಮ ಕೆಂಪು, ನೀಲಿಯಂಥ ಗಾಢ ಬಣ್ಣದಲ್ಲಿ ಇರಬಹುದು, ಜೊತೆಗೆ ಚರ್ಮ ಬಿಸಿಯೂ ಅನಿಸಬಹುದು. ಆದರೆ ದೇಹದ ಉಳಿದೆಲ್ಲ ಭಾಗಗಳಲ್ಲಿ ಚರ್ಮ ಮಾಮೂಲಿ ಉಷ್ಣತೆಯಲ್ಲೇ ಇರುತ್ತದೆ. ರಕ್ತ ಹೆಪ್ಪುಗಟ್ಟಿದ ರಕ್ತನಾಳಗಳು ಉಬ್ಬಿದಂತೆ, ಎದ್ದುಬಂದಂತೆ ಕಾಣಬಹುದು. ಕಾಲಿನಲ್ಲಿ ಈ ಲಕ್ಷಣಗಳು ಕಂಡರೆ, ಉದಾಸೀನ ಮಾಡದೆ ವೈದ್ಯರನ್ನು ಸಂಪರ್ಕಿಸಬೇಕು. ಉಸಿರಾಟಕ್ಕೆ ತೊಂದರೆಯಾದರೆ ಶೀಘ್ರ ವೈದ್ಯಕೀಯ ನೆರವು ಪಡೆಯಬೇಕಾಗುತ್ತದೆ.

ಮುನ್ನೆಚ್ಚರಿಕೆ

ಡಿವಿಟಿ ಇರುವವರು ದೀರ್ಘ ಪ್ರಯಾಣಕ್ಕೆ ಮುಂಚಿತವಾಗಿ ವೈದ್ಯರಲ್ಲಿ ಸಲಹೆ ಕೇಳುವುದು ಸೂಕ್ತ. ಅಂಥ ತೊಂದರೆಗಳಿಲ್ಲದೆ, ನೀರು ತುಂಬಿದಂತಾಗಿ ಕಾಲು ಊದಿಕೊಳ್ಳುವವರು ಕೆಲವು ಮುನ್ನೆಚ್ಚರಿಕೆಗಳನ್ನು ತೆಗದುಕೊಳ್ಳುವುದು ಒಳ್ಳೆಯದು. ಮೊದಲಿಗೆ, ದೀರ್ಘ ಪ್ರಯಾಣಕ್ಕೆ ಹಗುರವಾದ, ಸೆಡಿಲವಾದ, ಆರಾಮದಾಯಕ ವಸ್ತ್ರಗಳಿರಲಿ. ಬಿಗಿಯಾದ ಪಾದರಕ್ಷೆಗಳು ಬೇಡ, ಬೇಕೆಂದಾಗ ತೆಗೆಯುವಂಥ ಪಾದರಕ್ಷೆಗಳಲ್ಲಿ ಧರಿಸಿ. ಒಂದೇ ರೀತಿಯಲ್ಲಿ ಕಾಲುಗಳನ್ನು ನೇತಾಡಿಸುವ ಬದಲು, ಎತ್ತಿಟ್ಟುಕೊಳ್ಳಲು ಸಾಧ್ಯವೇ ಪರಿಶೀಲಿಸಿ. ಪ್ರಯಾಣದ ಸಂದರ್ಭದಲ್ಲಿ ಸಾಕಷ್ಟು ನೀರು ಕುಡಿಯಿರಿ. ಆಲ್ಕೊಹಾಲ್‌ ಮತ್ತು ಕೆಫೇನ್‌ ಸಮಸ್ಯೆಯನ್ನು ಹೆಚ್ಚಿಸುತ್ತವೆ, ಜೋಕೆ. ದೀರ್ಘ ಪ್ರಯಾಣದ ನಡುವೆ ಸಾಕಷ್ಟು ವಿರಾಮ ತೆಗೆದುಕೊಳ್ಳಿ. ಪ್ರತಿ ತಾಸಿಗೊಮ್ಮೆ ನಾಲ್ಕಾರು ನಿಮಿಷ ಓಡಾಡಿ. ಚೆನ್ನಾಗಿ ನೀರು ಕುಡಿದು, ಬಾತ್‌ರೂಮ್‌ ವಿರಾಮ ತೆಗೆದುಕೊಳ್ಳುವುದು ಹೆಚ್ಚು ಸೂಕ್ತ.

ಇದನ್ನೂ ಓದಿ: Stress can cause neck pain: ಕುತ್ತಿಗೆ ನೋವೇ?‌ ಮಾನಸಿಕ ಒತ್ತಡವೂ ಕಾರಣವಾಗಿರಬಹುದು!