ಬೆಳಗ್ಗೆ ಎದ್ದ ಕೂಡಲೇ (Empty Stomach Foods) ಸಾಮಾನ್ಯವಾಗಿ ಒಂದು ಲೋಟ ಚಹಾ ಮಾಡಿಕೊಂಡು ಸೋಫಾದಲ್ಲಿ ಕೂತು ಪೇಪರು ಓದುತ್ತಲೋ, ಸುಮ್ಮನೆ ಬಾಲ್ಕನಿಯಲ್ಲಿ ಒಂದ್ಹತ್ತು ನಿಮಿಷ ಚಹಾ ಹಿಡಿದು ಕೂರುವ ಅಭ್ಯಾಸ ನಮ್ಮಲ್ಲಿ ಬಹುತೇಕರಿಗಿದೆ. ಬೆಳಗ್ಗೆ ಎದ್ದ ಕೂಡಲೇ ಚಹಾ ಬೇಕು, ಇಲ್ಲವಾದರೆ ಕಷ್ಟ ಎಂಬಂಥ ಅಭ್ಯಾಸವನ್ನು ಅನೇಕರು ರೂಢಿಸಿಕೊಂಡಿರುತ್ತಾರೆ. ಆದರೆ, ಇವು ಆರೋಗ್ಯಕ್ಕೆ ಒಳ್ಳೆಯದಲ್ಲ ಎಂಬುದು ನಮಗೆ ಗೊತ್ತಿದ್ದೂ ಇದನ್ನು ಬಿಡಲು ಸಾಧ್ಯವಾಗುವುದಿಲ್ಲ. ಇರಲಿ. ಇನ್ನೂ ಅನೇಕರು, ಈ ಅಭ್ಯಾಸವನ್ನು ತ್ಯಜಿಸಿ ಅನೇಕ ಹೊಸ ಅಭ್ಯಾಸಗಳನ್ನು ರೂಢಿಸಿಕೊಂಡಿರುತ್ತಾರೆ. ಖಾಲಿ ಹೊಟ್ಟೆಯಲ್ಲಿ ನಿಂಬೆ ಹಣ್ಣು ಹಿಂಡಿದ ಬಿಸಿ ನೀರು, ತರಕಾರಿ ಸೇವನೆ ಇತ್ಯಾದಿ ಇತ್ಯಾದಿ ಅನೇಕ ಅಭ್ಯಾಸಗಳನ್ನು ಹಲವೆಡೆ ಓದಿ ತಿಳಿದುಕೊಂಡು, ಹಲವರ ಸಲಹೆ ಕೇಳಿ, ಆರೋಗ್ಯಕ್ಕೆ ಒಳ್ಳೆಯದು ಎಂದು ತಿಳಿದು ಅಭ್ಯಾಸ ಶುರು ಮಾಡಿರುತ್ತಾರೆ. ಆದರೆ, ಎಲ್ಲವೂ ಇವು ಒಳ್ಳೆಯದೇ ಎಂದು ಹೇಳಲು ಸಾಧ್ಯವಾಗುವುದಿಲ್ಲ. ಅಥವಾ ಕೆಲವರಿಗೆ ಒಳ್ಳೆಯದು ಮಾಡಿದೆ ಎಂದಾಕ್ಷಣ ಎಲ್ಲರಿಗೂ ಒಳ್ಳೆಯದನ್ನ ಮಾಡುತ್ತದೆ ಎಂದೇನಿಲ್ಲ. ಕಾರಣ ಒಬ್ಬೊಬ್ಬರ ದೇಹ ಪ್ರಕೃತಿಯೂ ಒಂದೊಂದು ಬಗೆಯದು. ಹೀಗಾಗಿ, ಬೆಳಗ್ಗೆ ಎದ್ದ ಕೂಡಲೇ, ಕೆಲವು ಆಹಾರಗಳನ್ನು ನಾವು ಆದಷ್ಟು ದೂರವಿರಿಸಿದರೆ ಒಳ್ಳೆಯದು. ಬನ್ನಿ, ಯಾವೆಲ್ಲ ಆಹಾರವನ್ನು ನಾವು ಬೆಳಗ್ಗೆ ಎದ್ದ ಕೂಡಲೇ ಖಾಲಿ ಹೊಟ್ಟೆಯಲ್ಲಿ ತಿನ್ನುವುದು ಅಷ್ಟು ಯೋಗ್ಯವಲ್ಲ ಎಂಬುದನ್ನು ನೋಡೋಣ.

ಸ್ಪೈಸೀ ಆಹಾರಗಳು

ಬೆಳಗ್ಗೆ ಎದ್ದ ಕೂಡಲೇ ಸ್ಪೈಸೀ ಆಹಾರದ ಸೇವನೆ ಒಳ್ಳೆಯದಲ್ಲ. ಬೆಳಗ್ಗೆ ಕಾಲಿ ಹೊಟ್ಟೆಗೆ ಉತ್ತಮ ಆರೋಗ್ಯಕರವಾದ, ದಿನವಿಡೀ ದೇಹ ಉಲ್ಲಾಸ ಪಡೆಯುವ ಆಹಾರ ನೀಡಬೇಕೇ ಹೊರತು ಬೆಳ್ಳಂಬೆಳಗ್ಗೆಯೇ ಆಲಸ್ಯತನವನ್ನು ಆವಾಹಿಸುವ ಆಹಾರವನ್ನು ತಿನ್ನಬಾರದು. ಬೆಳಗ್ಗೆ ಖಾಲಿ ಹೊಟ್ಟೆಗೆ ಸ್ಪೈಸೀಯಾದ ಮಸಾಲೆಯುಕ್ತ ಆಹಾರವನ್ನು ನೀಡಿದರೆ, ಹೊಟ್ಟೆಯ ಒಳಪದರಕ್ಕೆ ಕಿರಿಕಿರಿಯಾದ ಭಾವ ಉಂಟಾಗುತ್ತದೆ. ಹೀಗಾಗಿ, ದೇಹವನ್ನು ತಂಪಾಗಿಡುವ ಪೋಷಕಾಂಶಯುಕ್ತ, ಮಸಾಲೆಯಿಲ್ಲದ ಆಹಾರ ಸೇವಿಸಿ. ದೇಹಕ್ಕೆ ಹಿತವಾದ ಅನುಭವ ನೀಡುವ ಆಹಾರ ಒಳ್ಳೆಯದು.

ಸಿಹಿತಿನಿಸುಗಳು

ಬೆಳಗ್ಗೆ ಸಿಹಿತಿನಿಸು ತಿನ್ನುವ ಕ್ರಮ ಹಲವರ ಪದ್ಧತಿಯಲ್ಲಿದೆ. ಆದರೆ ಇದು ಒಳ್ಳೆಯದಲ್ಲ. ಇನ್ನೂ ಕೆಲವರು ಈಗ ಆಧುನಿಕ ಪಾಶ್ಚಾತ್ಯ ಶೈಲಿಯ ಅನುಕರಣೆಯಲ್ಲಿ ಪ್ಯಾನ್‌ ಕೇಕ್‌, ವ್ಯಾಫಲ್‌ಗಳನ್ನು ಸೇವಿಸುವ ಅಭ್ಯಾಸವನ್ನೂ ಆರಂಭಿಸಿದ್ದಾರೆ. ಅಷ್ಟೇ ಅಲ್ಲ, ಮಕ್ಕಳಿಗೆ ಬ್ರೆಡ್‌ ಮೇಲೆ ಒಂದಿಷ್ಟು ಜ್ಯಾಮ್‌, ಚಾಕೋಲೇಟ್‌ ಸಿರಪ್‌ಗಳನ್ನು ಸುರಿದು ತಿನ್ನಿಸುವುದೂ ಉಂಟು. ಆದರೆ ಈ ಅಭ್ಯಾಸಗಳಾವುದೂ ಹೊಟ್ಟೆಗೆ ಒಳ್ಳೆಯದಲ್ಲ ನೆನಪಿಡಿ. ಇದು ತೂಕ ಹೆಚ್ಚಿಸುವ ಜೊತೆಗೆ, ಪಿತ್ತಕೋಶದ ಮೇಲೆ ಹೆಚ್ಚಿನ ಒತ್ತಡವನ್ನು ಹಾಕುತ್ತದೆ.

ಇದನ್ನೂ ಓದಿ: Mint Leaf Water: ಪುದಿನ ಎಲೆಗಳ ನೀರನ್ನು ನಿತ್ಯವೂ ಕುಡಿಯಿರಿ, ಈ ಲಾಭಗಳನ್ನು ಪಡೆಯಿರಿ!

ತಂಪು ಪಾನೀಯಗಳು

ಬೆಳಗ್ಗೆ ಎದ್ದು ಹಲವರು ತಂಪು ಪಾನೀಯಗಳನ್ನೂ ಸೇವಿಸುವುದೂ ಇದೆ. ಐಸ್ಡ್‌ ಟೀ, ಹಣ್ಣಿನ ಜ್ಯೂಸ್‌ಗಳು, ಪ್ಯೇಕೇಜ್ಡ್‌ ಡ್ರಿಂಕ್‌ಗಳು ಇತ್ಯಾದಿಗಳನ್ನು ಬೆಳಗ್ಗಿನ ಹೊತ್ತು ಕುಡಿಯುತ್ತಾರೆ. ತಣ್ಣಗಿನ ಇಂತಹ ಡ್ರಿಂಕ್‌ಗಳನ್ನು ಬೆಳಗ್ಗೆ ಕುಡಿಯುವುದರಿಂದ ಇದ್ದಕ್ಕಿದ್ದ ಹಾಗೆ ಶಕ್ತಿ ಬಂದಂಥ ಅನುಭವವಾದರೂ, ಇವು ಜೀರ್ಣಕ್ರಿಯೆಯನ್ನು ಕುಂಠಿತಗೊಳಿಸುತ್ತವೆ. ಅಷ್ಟೇ ಅಲ್ಲ, ಇದರಲ್ಲಿರುವ ಅಧಿಕ ಸಕ್ಕರೆಯೂ ದೇಹದ ಮೇಲೆ ಕೆಟ್ಟ ಪರಿಣಾಮವನ್ನೇ ಬೀರುತ್ತದೆ.

ಸಿಟ್ರಸ್‌ ಹಣ್ಣುಗಳು

ಬೆಳಗ್ಗೆ ಎದ್ದ ಕೂಡಲೇ ಸಿಟ್ರಸ್‌ ಹಣ್ಣುಗಳನ್ನು ಸೇವಿಸುವ ಅಭ್ಯಾಸವಿದ್ದರೆ ಬಿಡಿ. ಇವು ದೇಹದಲ್ಲಿ ಆಸಿಡ್‌ ಮಟ್ಟವನ್ನು ಏರಿಸುತ್ತದೆ. ಜೊತೆಗೆ ಜೀರ್ಣಕ್ರಿಯೆಯನ್ನೂ ಕುಂಠಿತಗೊಳಿಸುವ ಸಾಧ್ಯತೆ ಹೆಚ್ಚು.

ಹಸಿ ತರಕಾರಿಗಳು

ಹಸಿ ತರಕಾರಿಗಳು ದೇಹಾರೋಗ್ಯಕ್ಕೆ ಒಳ್ಳೆಯದು ನಿಜ. ಆದರೆ ಖಾಲಿ ಹೊಟ್ಟೆಯಲ್ಲಿ ಹಸಿ ತರಕಾರಿ ತಿನ್ನುವುದು ಅಷ್ಟು ಒಳ್ಳೆಯದಲ್ಲ. ಇವು ಕರಗಲು ಸ್ವಲ್ಪ ಹೆಚ್ಚೇ ಸಮಯ ಬೇಕು. ಅಷ್ಟೇ ಅಲ್ಲ, ಬೆಳಗಿನ ಹೊತ್ತು ಖಾಲಿ ಹೊಟ್ಟೆಯಲ್ಲಿರುವಾಗ, ಜೀರ್ಣಾಂಗಗಳಿಗೆ ಹೆಚ್ಚಿನ ಒತ್ತಡವನ್ನು ಕೊಟ್ಟು ಕೆಲಸವನ್ನು ಮಾಡಿಸುತ್ತವೆ. ಹಾಗಾಗಿ, ಜೀರ್ಣಕ್ರಿಯೆಗೆ ಹೆಚ್ಚು ಒತ್ತಡವಾಗದಂಥ ಆಹಾರವನ್ನು ಬೆಳಗ್ಗೆ ತಿನ್ನುವುದು ಒಳ್ಳೆಯದು.

ರಜೋನಿವೃತ್ತಿ ಪ್ರತಿಯೊಂದು ಮಹಿಳೆಯ ಬದುಕಿನ ಮಹತ್ವದ ಘಟ್ಟಗಳಲ್ಲಿ ಒಂದು. 40 ವರ್ಷದ ನಂತರ ಈ ಘಟ್ಟದ ಒಂದೊಂದೇ ಹಂತಗಳು ಪ್ರಾರಂಭವಾಗುತ್ತವೆ. ಈ ಘಟ್ಟದಲ್ಲಿ ದೈಹಿಕ, ಮಾನಸಿಕ ಮತ್ತು ಭಾವನಾತ್ಮಕ ಸ್ತರದಲ್ಲಿ ಬಹಳಷ್ಟು ಬದಲಾವಣೆಗಳನ್ನು ಕಾಣಬಹುದು. ಮೈಯೆಲ್ಲ ಬಿಸಿಯಾಗಿ ಬೆವರುವುದು, ನಿದ್ರಾಹೀನತೆ, ಚರ್ಮವೆಲ್ಲ ಶುಷ್ಕವಾಗುವುದು, ಮೂಡ್‌ ಬದಲಾವಣೆ ಮುಂತಾದ ಬಹಳಷ್ಟು ತೊಂದರೆಗಳು ಕಾಣಿಸಿಕೊಳ್ಳುತ್ತವೆ. ಇವುಗಳ ಜೊತೆಗೆ, ಶರೀರದ ಆಕಾರವೇ ಬದಲಾಗುವಂತೆ ತೂಕ ಹೆಚ್ಚುತ್ತದೆ. ಬದುಕಿನಲ್ಲಿ ಈವರೆಗೂ ತೂಕ ಇಳಿಸುವುದಕ್ಕೆ ಒದ್ದಾಡವರಿಗೂ ಕಷ್ಟವಾಗುವಂತೆ, ಏರಿದ ತೂಕ ಇಳಿಯುವುದೇ ಇಲ್ಲವೆಂದು ಗಪ್ಪನೆ ಕೂತು ಬಿಡುತ್ತದೆ. ತಳೋದರಿಯರೂ ಗುಂಡಮ್ಮಂದಿರಾಗುತ್ತಾರೆ. ಇರುವೆಲ್ಲ ಸಂಕಟಗಳ ಜೊತೆಗೆ ತೂಕವೂ ಏರಿಬಿಟ್ಟರೆ…! ಹೀಗೇಕಾಗುತ್ತದೆ ಮತ್ತು ಈ ಹಠಮಾರಿ (Menopausal Weight Gain) ತೂಕವನ್ನು ಇಳಿಸುವುದಕ್ಕೆ ಏನು ಮಾಡಬೇಕು?

ಏಕೆ ಹೀಗೆ?

ದೇಹದ ಚಯಾಪಚಯ ಮತ್ತು ಕೊಬ್ಬು ಶೇಖರವಾಗುವುದನ್ನು ಈಸ್ಟ್ರೋಜನ್‌ ಚೋದಕ ನಿರ್ವಹಿಸುತ್ತದೆ. ಋತುಬಂಧದ ನಂತರ ದೇಹದಲ್ಲಿ ಈಸ್ಟ್ರೋಜನ್‌ ಚೋದಕ ಗಣನೀಯವಾಗಿ ಕಡಿಮೆ ಆಗುವುದರಿಂದ, ಶರೀರದಲ್ಲಿ ಕೊಬ್ಬು ಶೇಖರವಾಗುವ ಪ್ರಮಾಣ ಹೆಚ್ಚುತ್ತದೆ. ಅದರಲ್ಲೂ ಹೊಟ್ಟೆಯ ಸುತ್ತಲಿನ ಭಾಗದಲ್ಲಿ ಕೊಬ್ಬು ಸಾಂದ್ರವಾಗಿ ಕೂತು ಸಿಂಹಕಟಿಯೆಂಬುದು ಕುಂಬಳಕಾಯಿಯಂತಾಗುತ್ತದೆ. ಹಾಗಾಗಿ ಹಾರ್ಮೋನಿನ ಏರುಪೇರು ಇದಕ್ಕೆ ಮುಖ್ಯ ಕಾರಣ. ಇದೊಂದೇ ಕಾರಣವಲ್ಲ, ನಮ್ಮ ಪ್ರಾಯ ಹೆಚ್ಚಿದಂತೆ ಶರೀರದಲ್ಲಿರುವ ಸ್ನಾಯುಗಳು ನೈಸರ್ಗಿಕವಾಗಿಯೇ ಕಡಿಮೆಯಾಗುತ್ತವೆ. ಇದರ ಬದಲಿಗೆ ಕೊಬ್ಬು ತುಂಬಿಕೊಳ್ಳಬಹುದು. ಆದರೆ ಕ್ಯಾಲರಿಗಳನ್ನು ಕರಗಿಸುವ ವಿಚಾರಕ್ಕೆ ಬಂದರೆ, ಕೊಬ್ಬಿಗಿಂತ ಸ್ನಾಯುಗಳು ಹೆಚ್ಚು ಶಕ್ತಿಯನ್ನು ವ್ಯಯಿಸುತ್ತವೆ. ಹಾಗಾಗಿ ಚಯಾಪಚಯ ನಿಧಾನವಾಗಬಹುದು. ಇದಕ್ಕೆ ಸರಿಯಾಗಿ, ವ್ಯಾಯಾಮ ಮಾಡುವುದಕ್ಕೆ ಸಮಯ ಇಲ್ಲದಿದ್ದರೆ ಅಥವಾ ಜೀವನಶೈಲಿಯಲ್ಲಿ ದೋಷವಿದ್ದರೆ ತೂಕ ಇರುತ್ತದೆ ಮತ್ತು ಇಳಿಯಲು ನಿರಾಕರಿಸುತ್ತದೆ!

ಇದನ್ನು ತಡೆಯಬಹುದೇ?

ಋತುಬಂಧದ ಸಮಯದಲ್ಲಿ ಮಹಿಳೆಯರ ತೂಕ ಹೆಚ್ಚುವುದನ್ನು ತಡೆಯಬಹುದೇ? ಇದಕ್ಕೆ ಉತ್ತರವೆಂದರೆ, ತಡೆಯಬಹುದು. ಒಂದು ಅಂದಾಜಿನ ಪ್ರಕಾರ, ರಜೋನಿವೃತ್ತಿಯ ನಂತರ, ಮಹಿಳೆಯರು ವರ್ಷದಿಂದ ವರ್ಷಕ್ಕೆ 0.7 ಕೆ.ಜಿ.ಯಷ್ಟು ತೂಕ ಹೆಚ್ಚುತ್ತಾ ಹೋಗುತ್ತಾರೆ. ಇದಕ್ಕೆ ಕಡಿಮೆಯಾಗುವ ಸ್ನಾಯುಬಲ ಮತ್ತು ಹೆಚ್ಚುವ ಕೊಬ್ಬಿನಂಶಗಳೇ ಮುಖ್ಯ ಕಾರಣ. ಜೊತೆಗೆ ಹಾರ್ಮೋನಿನ ವ್ಯತ್ಯಾಸದಿಂದಾಗಿ ಸೊಂಟ, ಹೊಟ್ಟೆಗಳ ಸುತ್ತಳತೆ ಏರುತ್ತದೆ. ಆದರೆ ಸರಿಯಾದ ಆಹಾರ, ವ್ಯಾಯಾಮ ಮತ್ತು ಉಳಿದ ಜೀವನಶೈಲಿಯ ಬದಲಾವಣೆಗಳ ನೆರವಿನಿಂದ ಆರೋಗ್ಯಕರ ತೂಕದ ಮಟ್ಟದಲ್ಲೇ ಇರಬಹುದು ಎನ್ನುತ್ತಾರೆ ಸ್ತ್ರೀರೋಗ ತಜ್ಞರು.

ಇದನ್ನೂ ಓದಿ: Health Tips: ನೀವು ಕುಡಿಯುವ ಹಾಲಿನಲ್ಲಿ ಕಲಬೆರಕೆಯೇ? ಹೀಗೆ ಸುಲಭವಾಗಿ ಪತ್ತೆ ಹಚ್ಚಿ!

ಏನು ಮಾಡಬಹುದು?

ಎಲ್ಲಕ್ಕಿಂತ ಮೊದಲು, ತಿನ್ನುವ ಆಹಾರದತ್ತ ಗಮನಕೊಡಿ. ನಿಮ್ಮ ದೇಹಕ್ಕೆ 2000 ಕ್ಯಾಲರಿ ಬೇಕಿದ್ದರೆ, 1800 ಕ್ಯಾಲರಿಯ ಆಹಾರವನ್ನೇ ಸೇವಿಸಿ. ಅಂದರೆ ಕ್ಯಾಲರಿ ಖೋತಾ ಆಗುವಂತೆ ನೋಡಿಕೊಳ್ಳಿ. ಜೊತೆಗೆ, ಆರೋಗ್ಯಕರ ಕ್ಯಾಲರಿಗಳನ್ನು ಮಾತ್ರವೇ ದೇಹಕ್ಕೆ ನೀಡಿ. ಸಕ್ಕರೆ ಮತ್ತು ಜಿಡ್ಡು ಭರಿತ, ಸಂಸ್ಕರಿಸಿದ ಆಹಾರಗಳನ್ನು ದೇಹಕ್ಕೆ ನೀಡಿದಷ್ಟೂ ಸಮಸ್ಯೆ ಏರುತ್ತದೆ.

ವ್ಯಾಯಾಮ

ಇದಕ್ಕೂ ಇಷ್ಟೇ ಗಮನವನ್ನು ನೀಡಬೇಕು. ಜಿಮ್‌ಗೆ ಹೋಗಿ ಬಿಂದಿಗೆಗಟ್ಟಲೆ ಬೆವರಿಳಿಸಬೇಕು ಅಥವಾ ಹಿಮಾಲಯ ಹತ್ತುವುದಕ್ಕೆ ತರಬೇತಿ ಪಡೆಯಬೇಕು ಎಂದಲ್ಲ; ವಾರಕ್ಕೆ ೧೫೦ ನಿಮಿಷಗಳ ಮಧ್ಯಮ ಗತಿಯ ವ್ಯಾಯಾಮ ಸಾಕಾಗುತ್ತದೆ. ಇದರಲ್ಲಿ ವಾಕಿಂಗ್‌, ಜಾಗಿಂಗ್‌, ಸೈಕಲ್‌ ಹೊಡೆಯುವುದು, ಏರೋಬಿಕ್ಸ್‌, ಪಿಲಾಟೆ, ಯೋಗ, ಈಜು ಮುಂತಾದ ಯಾವುದೂ ಆಗುತ್ತದೆ. ಅಂತೂ ಪ್ರತಿ ದಿನ 30 ನಿಮಿಷ ಕಡ್ಡಾಯವಾಗಿ ದೈಹಿಕ ಚಟುವಟಿಕೆಯಲ್ಲಿ ತೊಡಗಿಸಿಕೊಳ್ಳುವುದು ಮುಖ್ಯ.

ನಿದ್ದೆ

ಪ್ರತಿ ದಿನ 7-8 ತಾಸಿನ ನಿದ್ದೆ ದೊರೆಯುವುದಕ್ಕೆ ಸಾಧ್ಯವೇ ನೋಡಿ. ನಿದ್ದೆಗೆಡುವುದರಿಂದ ಹಾರ್ಮೋನುಗಳ ಮಟ್ಟ ಇನ್ನಷ್ಟು ಏರುಪೇರು ಆಗುತ್ತದೆ. ಜೊತೆಗೆ ಹಸಿವನ್ನು ನಿಯಂತ್ರಿಸಿಕೊಳ್ಳುವುದಕ್ಕೂ ಕಣ್ತುಂಬ ನಿದ್ರಿಸುವುದಕ್ಕೂ ನೇರ ಸಂಬಂಧವಿದೆ. ಹಾಗಾಗಿ ತೂಕ ನಿಯಂತ್ರಿಸಬೇಕು ಎಂದರೆ ನಿದ್ದೆಗೆಡುವುದನ್ನೂ ನಿಯಂತ್ರಿಸಬೇಕು.

ಮೊಸರನ್ನು ಮೆಚ್ಚದವರು (Yogurt vs Curd) ಅಪರೂಪ. ದ್ವಾಪರದ ಕೃಷ್ಣನಿಂದ ಹಿಡಿದು, ಕಲಿಯುಗದ ಚಿಣ್ಣರೆಲ್ಲರೂ ಗಟ್ಟಿ ಮೊಸರು ತಟ್ಟೆಗೆ ಬರುತ್ತಿದ್ದಂತೆ ಸಂಭ್ರಮಿಸುತ್ತಾರೆ. ಇದು ಮನೆಯಲ್ಲಿ ಮಾಡಿದ ಮೊಸರೇ ಇರಬಹುದು ಅಥವಾ ಅಂಗಡಿಯಿಂದ ತಂದ ʻಯೋಗರ್ಟ್‌ʼ ಎಂಬ ಹೆಸರಿನದ್ದೇ ಇರಬಹುದು. ಅಂತೂ ಮೊಸರು ಮೆಲ್ಲುವುದು ಬಹುಮಂದಿಗೆ ಮೆಚ್ಚಿನ ಕೆಲಸ. ಬೇರೆ ಬೇರೆ ಬ್ರ್ಯಾಂಡ್‌ಗಳಲ್ಲಿ ಹಲವು ರುಚಿಗಳ ಯೋಗರ್ಟ್‌ಗಳು ದೊರೆಯುತ್ತವೆ; ಸದಾ ಕಾಲ ಸಪ್ಪೆ ಮೊಸರನ್ನೇ ತಿನ್ನಬೇಕೆಂದಿಲ್ಲ. ಜೊತೆಗೆ ಗ್ರೀಕ್‌ ಯೋಗರ್ಟ್‌ ತಿನ್ನುವವರ ಸಂಖ್ಯೆಯೂ ಕಡಿಮೆ ಇಲ್ಲ. ಆದರೆ ಆಯ್ಕೆಯ ಪ್ರಶ್ನೆ ಬಂದಾಗ ಯಾವುದನ್ನು ಕೈಗೆತ್ತಿಕೊಳ್ಳಬೇಕು ಎಂಬ ಗೊಂದಲ ಬಂದರೆ, ಸಹಜ. ಹಾಗಾಗಿ ಮಾಮೂಲಿ ಮೊಸರಿಗೂ ಗ್ರೀಕ್‌ ಯೋಗರ್ಟ್‌ ಇರುವ ವ್ಯತ್ಯಾಸಗಳನ್ನು ತಿಳಿದುಕೊಂಡರೆ, ಯಾವುದನ್ನು ಆಯ್ದುಕೊಳ್ಳಬೇಕು ಎನ್ನುವ ಗೊಂದಲಕ್ಕೆ ಉತ್ತರ ದೊರೆಯುತ್ತದೆ. ಪ್ಲೇನ್‌ ಯೋಗರ್ಟ್‌ ಮತ್ತು ಗ್ರೀಕ್‌ ಯೋಗರ್ಟ್‌- ಈ ಎರಡೂ ರೀತಿಯ ಮೊಸರಿಗೆ ಅದರದ್ದೇ ಆದ ಪ್ರತ್ಯೇಕ ರುಚಿ, ಘಮ ಮತ್ತು ಸತ್ವಗಳಿವೆ. ಪ್ಲೇನ್‌ ಯೋಗರ್ಟ್‌ ನಮ್ಮ ಮನೆಗಳಲ್ಲಿ ನಿತ್ಯ ಉಪಯೋಗಿಸುವ ಮೊಸರಿನಂತೆಯೇ, ಹೆಚ್ಚಿನ ವ್ಯತ್ಯಾಸವಿಲ್ಲ. ಆದರೆ ಮಾರುಕಟ್ಟೆಯ ದೃಷ್ಟಿಯಿಂದ ಅದಕ್ಕೆ ಬಣ್ಣ, ರುಚಿ, ಘಮ ಇತ್ಯಾದಿಗಳನ್ನು ಸೇರಿಸಿದವು ಲಭ್ಯವಿವೆ. ಕೃತಕ ಬಣ್ಣ, ರುಚಿ, ಸಕ್ಕರೆಗಳು ಬೇಡ ಎನ್ನುವವರಿಗೆ ಮನೆಯಲ್ಲಿ ಮಾಡಿದ ಮೊಸರು ಎಲ್ಲ ದೃಷ್ಟಿಯಲ್ಲೂ ಶ್ರೇಷ್ಠ. ಇವುಗಳ ಬಗ್ಗೆ ಇನ್ನಷ್ಟು ಮಾಹಿತಿ ಇಲ್ಲಿದೆ.

ಮೊಸರು

ಇದು ಗ್ರೀಕ್‌ ಯೋಗರ್ಟ್‌ನಷ್ಟು ಮಂದವಿರುವುದಿಲ್ಲ. ಮನೆಯಲ್ಲಿ ಮಾಡಿದ ಮೊಸರಿನಂತೆಯೇ ರುಚಿ, ಬಣ್ಣ ಎಲ್ಲವೂ ಇರುತ್ತದೆ. ಪ್ಲೇನ್‌ ಯೋಗರ್ಟ್‌ ಮತ್ತು ಮನೆ ಮೊಸರಿಗೆ ಹೆಚ್ಚಿನ ವ್ಯತ್ಯಾಸವೂ ಇಲ್ಲ. ಆರೋಗ್ಯಕ್ಕೆ ಅಗತ್ಯವಾದ ಬೇಕಾದ ಪ್ರೊಬಯಾಟಿಕ್‌ ಅಂಶಗಳನ್ನು ಹೇರಳವಾಗಿ ನೀಡುತ್ತದೆ. ಇದಲ್ಲದೆ, ಸಾಕಷ್ಟು ಪ್ರೊಟೀನ್‌ ಅಂಶಗಳನ್ನೂ ಒಳಗೊಂಡಿದ್ದು, ಸ್ನಾಯುಗಳ ದುರಸ್ತಿ ಮತ್ತು ಬೆಳವಣಿಗೆಗೆ ಸೂಕ್ತವಾಗಿದೆ.
ಕ್ಯಾಲ್ಶಿಯಂ ಸತ್ವ ಇದರಲ್ಲಿ ಭರಪೂರ ದೊರೆಯುತ್ತದೆ. ಮೂಳೆಗಳನ್ನು ಬಲಪಡಿಸುವುದಕ್ಕೆ ಇದು ಒಳ್ಳೆಯ ಆಯ್ಕೆ. ಜೀರ್ಣಾಂಗಗಳಿಗೆ ಬೇಕಾದ ಒಳ್ಳೆಯ ಬ್ಯಾಕ್ಟೀರಿಯಗಳನ್ನು ಇದು ಧಾರಾಳವಾಗಿ ನೀಡುತ್ತದೆ. ಜೊತೆಗೆ, ವಿಟಮಿನ್‌ ಡಿ, ವಿಟಮಿನ್‌ ಬಿ೧೨, ಪೊಟಾಶಿಯಂ ಮತ್ತು ಮೆಗ್ನೀಶಿಯಂ ಸತ್ವಗಳು ಇದರಲ್ಲಿವೆ. ನೈಸರ್ಗಿಕವಾಗಿ ಕೊಂಚ ಸಕ್ಕರೆಯಂಶವೂ ಇದರಲ್ಲಿದ್ದು, ಉತ್ತಮ ಪಿಷ್ಟ ದೇಹಕ್ಕೆ ಲಭಿಸುತ್ತದೆ.

ಗ್ರೀಕ್‌ ಯೋಗರ್ಟ್‌

ಹಾಲಿನಲ್ಲಿರುವ ನೀರಿನಂಶವನ್ನು ತೆಗೆದು ಸಂಸ್ಕರಿಸಿದ ನಂತರ ಈ ಮೊಸರನ್ನು ಮಾಡಲಾಗುವುದರಿಂದ, ಗ್ರೀಕ್‌ ಯೋಗರ್ಟ್‌ ಹೆಚ್ಚು ಮಂದವಾಗಿ ಕೆನೆಭರಿತವಾಗಿರುತ್ತದೆ. ಇದರ ರುಚಿಯೂ ಗಾಢವಾಗಿಯೇ ಇರುವುದರಿಂದ ಮಾಮೂಲಿ ಮೊಸರಿನ ಬದಲು, ಇದನ್ನು ಇಷ್ಟಪಟ್ಟು ತಿನ್ನುವವರ ಸಂಖ್ಯೆ ಸಾಕಷ್ಟು ದೊಡ್ಡದಿದೆ. ಇದರಲ್ಲೂ ಪ್ರೊಬಯಾಟಿಕ್‌ ಕಿಣ್ವಗಳು ಸಾಕಷ್ಟಿವೆ. ಆದರೆ ಮೊಸರಿನಲ್ಲಿರುವ ದೊರೆಯುವ ಬ್ಯಾಕ್ಟೀರಿಯಗಳಿಗೂ ಗ್ರೀಕ್‌ ಯೋಗರ್ಟ್‌ನಲ್ಲಿ ದೊರೆಯುವ ಬ್ಯಾಕ್ಟೀರಿಯಗಳಿಗೂ ವ್ಯತ್ಯಾಸವಿದೆ.
ಮಾಮೂಲಿ ಮೊಸರಿಗಿಂತ ಗ್ರೀಕ್‌ ಯೋಗರ್ಟ್‌ನಲ್ಲಿ ಪ್ರೊಟೀನ್‌ ಸಾಂದ್ರವಾಗಿದೆ. ಇದರಿಂದ ಸ್ನಾಯುಗಳನ್ನು ಬೆಳೆಸಲು, ದೇಹ ಹುರಿಗಟ್ಟಿಸಲು ಇದು ಯೋಗ್ಯವಾದ ಆಹಾರ. ಅದರಲ್ಲೂ ಸಸ್ಯಾಹಾರಿಗಳಿಗೆ ಪ್ರೊಟೀನ್‌ ಅಂಶವನ್ನು ಹೆಚ್ಚಿಸಿಕೊಳ್ಳಲು ಇದು ಉತ್ತಮ ಆಯ್ಕೆ. ಇದರಲ್ಲಿರುವ ನೀರಿನಂಶವನ್ನು ತೆಗೆಯಲಾದ್ದರಿಂದ, ಮಾಮೂಲಿ ಮೊಸರಿಗಿಂತ ಕೊಂಚ ಕಡಿಮೆ ಪ್ರಮಾಣದಲ್ಲಿ ಕ್ಯಾಲ್ಶಿಯಂ ಅಂಶ ಇರುತ್ತದೆ.
ಉಳಿದಂತೆ ವಿಟಮಿನ್‌ಗಳು, ಖನಿಜಗಳು ಇದರಲ್ಲೂ ಇವೆ. ಆದರೆ ಸಾಂದ್ರತೆ ಮಾಮೂಲಿ ಮೊಸರಿಗಿಂತ ಕೊಂಚ ಭಿನ್ನವಾಗಿರುತ್ತದೆ. ಇದರಲ್ಲಿ ಸಕ್ಕರೆಯಂಶ ಮತ್ತು ಪಿಷ್ಟವೂ ಕಡಿಮೆ. ಹಾಗಾಗಿ ತೂಕ ಇಳಿಸುವ ಉದ್ದೇಶ ಇರುವವರಿಗೆ ಇದು ಒಳ್ಳೆಯ ಆಯ್ಕೆ. ಲ್ಯಾಕ್ಟೋಸ್‌ ತಿಂದರೆ ಸಮಸ್ಯೆ ಆಗುತ್ತದೆ ಎನ್ನುವವರಿಗೆ ಮಾಮೂಲಿ ಮೊಸರಿಗಿಂತ ಗ್ರೀಕ್‌ ಯೋಗರ್ಟ್‌ ಒಳ್ಳೆಯದು.

ಇದನ್ನೂ ಓದಿ: Health Tips: ನಮ್ಮ ದೇಹಕ್ಕೆ ಪ್ರೊಟೀನ್‌ ಪುಷ್ಟಿ ನೀಡಲು ಯಾವ ಮೊಳಕೆ ಕಾಳುಗಳು ಸೂಕ್ತ?

ನೀವು ತೂಕ ಇಳಿಸುವೆಡೆ ಗಮನ ಹರಿಸುತ್ತಾ ನಿಮ್ಮ ಆಹಾರಾಭ್ಯಾಸಗಳಲ್ಲಿ ಆರೋಗ್ಯಕರ ಬದಲಾವಣೆಗಳನ್ನು ಮಾಡಿಕೊಳ್ಳುತ್ತಿದ್ದರೆ ಖಂಡಿತವಾಗಿ ನೀವು ನಿಮ್ಮ ನಿತ್ಯಾಹಾರದಲ್ಲಿ ಮೊಳಕೆ ಕಾಳುಗಳನ್ನೂ ಸೇರಿಸಿರುತ್ತೀರಿ. ಮೊಳಕೆ ಕಾಳುಗಳಲ್ಲಿ ಸಾಕಷ್ಟು ಪ್ರೊಟೀನ್‌ಗಳೂ ಸೇರಿದಂತೆ ಎಲ್ಲ ಬಗೆಯ ಪೋಷಕಾಂಶಗಳಿರುವುದರಿಂದಲೇ ಇದನ್ನು ಪೋಷಕಾಂಶಗಳ ವಿಚಾರದಲ್ಲಿ ಪವರ್‌ ಹೌಸ್‌ ಎಂದೂ ಕರೆಯುತ್ತಾರೆ. ಕಾಳುಗಳನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದುಕೊಂಡು, ಅದನ್ನು ನೀರಿನಲ್ಲಿ ನೆನೆಹಾಕಿ, ನಂತರ ಒಂದೆರಡು ದಿನ ಮೊಳಕೆ ಬರಿಸಿಕೊಳ್ಳುವುದು ಕೊಂಚ ತಾಳ್ಮೆ ಬೇಡುವ ಕೆಲಸವಾದರೂ, ಇದು ಆರೋಗ್ಯಕ್ಕೆ ಬಹಳ ಒಳ್ಳೆಯದು ಎಂಬ ಸತ್ಯವು ಇಷ್ಟು ತಾಳ್ಮೆಯನ್ನು ಕಾಯುವಂತೆ ಮಾಡುತ್ತದೆ. ಹಾಗಾದರೆ, ಮೊಳಕೆ ಕಾಳುಗಳು ನಿಜವಾಗಿಯೂ ಬೇಕಾದಷ್ಟು ಪ್ರೊಟೀನನ್ನು ಹೊಂದಿವೆಯೇ? ಇದು ಪ್ರೊಟೀನ್‌ನಿಂದ ಸಮೃದ್ಧವಾಗಿರುವ ಆಹಾರವೇ? ನಿಮಗೆ ಈ ಸಂದೇಹ ಇನ್ನೂ ಇದ್ದರೆ, ಗೊಂದಲಗಳಿದ್ದರೆ ಇಲ್ಲಿದೆ (Health Tips) ಉತ್ತರ.

ಮೊಳಕೆ ಹೆಸರುಕಾಳಿನಲ್ಲಿ ಪ್ರೊಟೀನ್‌ ಎಷ್ಟಿದೆ?

ಪೋಷಕಾಂಶ ತಜ್ಞರು ಹೇಳುವ ಪ್ರಕಾರ, ಸಾಮಾನ್ಯವಾಗಿ ಹೆಸರು ಬೇಳೆಯಲ್ಲಿರುವ ಪ್ರೊಟೀನ್‌ಗಿಂತಲೂ ಮೊಳಕೆ ಬಂದ ಹೆಸರುಕಾಳಿನಲ್ಲಿ ಕಡಿಮೆ ಇರುತ್ತದೆ. ಇದಕ್ಕೆ ಕಾರಣವನ್ನೂ ಅವರೇ ಹೇಳುತ್ತಾರೆ. ಹೆಸರು ಕಾಳನ್ನು ನೀರಿನಲ್ಲಿ ನೆನೆಸಿ ಅದನ್ನು ಮೊಳಕೆ ಬರಿಸುವ ಪ್ರಕ್ರಿಯೆಯಲ್ಲಿ, ಅದರಲ್ಲಿರುವ ಕಾರ್ಬೋಹೈಡ್ರೇಟ್‌, ಪ್ರೊಟೀನ್‌ ಕೊಬ್ಬು ಮತ್ತಿತರ ಎಲ್ಲ ಬಗೆಯ ಪೋಷಕಾಂಶಗಳನ್ನೂ ಬಳಸಿಕೊಂಡೇ ಅದು ಮೊಳಕೆಯೊಡೆಯುತ್ತದೆ. ಈ ಪ್ರಕ್ರಿಯೆಯಲ್ಲಿ ಕಾಳಿನಲ್ಲಿರುವ ಒಂದಿಷ್ಟು ಪೋಷಕಾಂಶವು ಬಳಕೆಯಾಗಿಬಿಡುತ್ತದೆ. ಅಲ್ಲದೆ, ನೂರು ಗ್ರಾಂನಷ್ಟು ಕಾಳು ಮೊಳಕೆ ಬಂದ ಮೇಲೆ ೩೦೦ ಗ್ರಾಂನಷ್ಟು ತೂಕ ಪಡೆದುಕೊಳ್ಳುತ್ತದೆ. ಕಾರಣ ಅದರಲ್ಲಿರುವ ನೀರಿನ ಅಂಶ. ಹೀಗಾಗಿ 300 ಗ್ರಾಂ ಮೊಳಕೆ ಕಾಳನ್ನು ಒಮ್ಮೆಲೇ ತಿನ್ನಲು ಸಾಧ್ಯವಾಗುವುದಿಲ್ಲ. ಬದಲಾಗಿ ನೂರು ಗ್ರಾಂ ಕಾಳನ್ನು ನಾವು ಸುಲಭವಾಗಿ ಒಂದು ದಿನದಲ್ಲಿ ತಿನ್ನಬಹುದು. ಆದರೆ ನೂರು ಗ್ರಾಂ ಮೊಳಕೆ ಕಾಳು ನಮಗೆ 8 ಗ್ರಾಂನಷ್ಟೇ ಪ್ರೊಟೀನ್‌ ಅನ್ನು ನೀಡಬಹುದು ಎಂಬುದು ಪೋಷಕಾಂಶ ತಜ್ಞರುಗಳ ಲೆಕ್ಕಾಚಾರ. ಮೊಳಕೆ ಕಾಳಿಗೆ ಹೋಲಿಸಿದರೆ ಹೆಸರು ಬೇಳೆ ಅಥವಾ ಹೆಸರು ಕಾಳಿನಲ್ಲಿ 350 ಕ್ಯಾಲರಿಗಳಿದ್ದು ಇದರಲ್ಲಿ 24 ಗ್ರಾಂ ಪ್ರೊಟೀನ್‌ ಲಭ್ಯವಾಗುತ್ತದೆ. ಆದರೆ, ಮೊಳಕೆ ಕಾಳಿನಲ್ಲಿ ಪ್ರೊಟೀನ್‌ ಹೆಚ್ಚಿರುತ್ತದೆ ಎಂಬುದು ಹಲವು ವರ್ಷಗಳಿಂದ ತಪ್ಪು ತಿಳಿಯಲಾಗಿದೆ. ಆದರೆ, ಮೊಳಕೆ ಕಾಳಿನಲ್ಲಿರುವ ಒಳ್ಳೆಯ ಗುಣ ಎಂದರೆ ಇದು ಪ್ರೊಟೀನನ್ನು ದೇಹಕ್ಕೆ ಸೇರುವ ಸಾಧ್ಯತೆಯನ್ನು ಹಿಗ್ಗಿಸುತ್ತದೆ ಹಾಗೂ ದೇಹದಲ್ಲಿ ಪ್ರೊಟೀನ್‌ ಕರಗುವುದಿಕೆ ಸಾಧ್ಯತೆಯನ್ನು ಹೆಚ್ಚಿಸುತ್ತದೆ. ದೇಹಕ್ಕೆ ಪ್ರೊಟೀನ್‌ ಸುಲಭವಾಗಿ ಸೇರುತ್ತದೆ.

ಇದನ್ನೂ ಓದಿ: Cardamom Benefits: ಏಲಕ್ಕಿ ಕೇವಲ ಘಮದಲ್ಲಷ್ಟೇ ಅಲ್ಲ, ಇದರ ಪ್ರಯೋಜನಗಳು ಎಷ್ಟೊಂದು!

ಮೊಳಕೆ ಛೋಲೆ ಒಳ್ಳೆಯದು

ಇನ್ನೂ ಒಂದು ತಪ್ಪು ತಿಳುವಳಿಕೆ ಎಂದರೆ, ಎಲ್ಲ ಬಗೆಯ ಮೊಳಕೆ ಕಾಳಿನಲ್ಲಿ ಹೆಚ್ಚು ಪ್ರೊಟೀನ್‌ ಇದೆ ಎಂದು ತಿಳಿದಿರುವುದು. ಆದರೆ ಎಲ್ಲ ಕಾಳುಗಳೂ ಕೂಡಾ ಮೊಳಕೆಯೊಡೆವ ಸಂದರ್ಭ ಹೆಚ್ಚು ಪ್ರೊಟೀನ್‌ ಹೊಂದಿರುವುದಿಲ್ಲ. ಬಹುಮುಖ್ಯವಾಗಿ, ಮೊಳಕೆಯೊಡೆದ ಮೇಲೆ ಹೆಚ್ಚು ಪ್ರೊಟೀನ್‌ ಹೊಂದಿರುವ ಕಾಳು ಎಂದರೆ ಕಡಲೆ ಕಾಳು. ಅಧರೆ, ಛೋಲೆ ಅಥವಾ ಕಾಬೂಲಿ ಕಡಲೆ. ಅಷ್ಟೇ ಅಲ್ಲ, ಇದರಲ್ಲಿರುವ ವಿಟಮಿನ್‌ ಬಿ ಹಾಗೂ ಸಿಯ ಪ್ರಮಾಣವೂ ಹೆಚ್ಚಾಗುತ್ತದೆ. ಜೊತೆಗೆ ಅವುಗಳು ದೇಹಕ್ಕೆ ಹೀರಲ್ಪಡುವ ಪ್ರಮಾಣವೂ ಹೆಚ್ಚಾಗುತ್ತದೆ. ಇದು ಆಹಾರದ ಗಾತ್ರವನ್ನೂ ಹಿಗ್ಗಿಸುತ್ತದೆ. ಹೀಗಾಗಿ, ಹೆಚ್ಚು ಹೊತ್ತು ಹೊಟ್ಟೆ ತುಂಬಿರುವ ಅನುಭವವನ್ನೂ ಇದು ನೀಡುತ್ತದೆ. ಇದೇ ಕಾರಣಕ್ಕೆ ಇವನ್ನು ತೂಕ ಇಳಿಸುವ ಸಂದರ್ಭ ತಿಂದರೆ ಹೆಚ್ಚಿನ ಪ್ರಯೋಜನ ಪಡೆಯಬಹುದು. ಆದರೆ ಹೆಸರು ಕಾಳನ್ನು ಮಾತ್ರ ಮೊಳಕೆಯೊಡೆವಷ್ಟು ಸಮಯ ನೀಡದೇ, ಅದನ್ನು ನೀರಲ್ಲಿ ನೆನೆ ಹಾಕಿ ಮೆತ್ತಗಾದ ತಕ್ಷಣ, ಚೀಲಾ, ದೋಸೆ, ಚಾಟ್‌, ಟಿಕ್ಕಿಯಂತಹ ತಿನಿಸುಗಳನ್ನು ಮಾಡಿ ಅಥವಾ ಹದವಾಗಿ ಹಬೆಯಲ್ಲಿ ಬೇಯಿಸಿ ತಿನ್ನುವುದು ಒಳ್ಳೆಯದು ಎನ್ನುತ್ತಾರೆ ಪೋಷಕಾಂಶ ತಜ್ಞರು.