ಹೊಸದಿಲ್ಲಿ: ಜಗತ್ತಿನ ಅತೀ ದೊಡ್ಡ, ಭಾರೀ ಗಾತ್ರದ ಹಾವು (big snake) ಭಾರತದಲ್ಲಿ ಬದುಕಿತ್ತು ಎಂಬುದು ಇದೀಗ ಸಂಶೋಧನೆಯಿಂದ ಗೊತ್ತಾಗಿದೆ. ಗುಜರಾತ್‌ನಲ್ಲಿ ಪತ್ತೆಯಾದ ಪ್ರಾಚೀನ ಹಾವೊಂದರ (Ancient snake) ಪಳೆಯುಳಿಕೆಗಳು (follisls) ಅದರ ಭಾರೀ ಗಾತ್ರ ಹಾಗೂ ತೂಕವನ್ನು ತಿಳಿಯಪಡಿಸಿವೆ. ಅದು ಸುಮಾರು 50 ಅಡಿ ಉದ್ದ ಹಾಗೂ 1,000 ಕೆಜಿ ತೂಕವಿತ್ತಂತೆ!

2005ರಲ್ಲಿ ಗುಜರಾತ್‌ನಲ್ಲಿ ಪತ್ತೆಯಾದ ಪಳೆಯುಳಿಕೆಗಳು, ಭೂಮಿಯ ಮೇಲೆ ಅಸ್ತಿತ್ವದಲ್ಲಿದ್ದ ಅತಿದೊಡ್ಡ ಹಾವಿನದ್ದು ಆಗಿವೆ. ಇದನ್ನು ಸಂಶೋಧಕರು “ವಾಸುಕಿ ಇಂಡಿಕಸ್” ಎಂದು ಹೆಸರಿಸಿದ್ದಾರೆ. ಇದು 4.7 ಕೋಟಿ ವರ್ಷಗಳ ಹಿಂದೆ ಕಚ್‌ನ ಜವುಗು ಪ್ರದೇಶಗಳಲ್ಲಿ ವಾಸಿಸಿತ್ತು. ನಿನ್ನೆ ವಿಜ್ಞಾನ ಪತ್ರಿಕೆಗಳಲ್ಲಿ ಇದು ವರದಿಯಾಗಿದೆ. ಈ ಜಾತಿಯ ಹಾವು 36ರಿಂದ ಸುಮಾರು 50 ಅಡಿ ಉದ್ದದವರೆಗೂ ಬೆಳೆಯುತ್ತಿತ್ತು.

ಗಾತ್ರದಲ್ಲಿ ʼವಾಸುಕಿʼಯ ಗಾತ್ರ ಹಾಗೂ ತೂಕ ಈಗ ಅಳಿವಿನಂಚಿನಲ್ಲಿರುವ ʼಟೈಟಾನೊಬೊವಾʼವನ್ನು ಮೀರಿರಬಹುದು. ಇದು 42 ಅಡಿ ಅಳತೆಯ ಅತಿದೊಡ್ಡ ಹಾವು. ಇದು 1 ಟನ್ ಅಥವಾ 1,000 ಕಿಲೋಗ್ರಾಂಗಳಷ್ಟು ತೂಕವನ್ನು ಹೊಂದಿರಬಹುದು ಎಂದು ಸಂಶೋಧಕರು ಹೇಳುತ್ತಾರೆ. ಇಂದು ಜೀವಂತವಾಗಿರುವ ಅತಿದೊಡ್ಡ ಹಾವೆಂದರೆ ಏಷ್ಯಾದ 33 ಅಡಿ ಉದ್ದದ ರೆಟಿಕ್ಯುಲೇಟೆಡ್ ಹೆಬ್ಬಾವು.

“ಅದರ ದೊಡ್ಡ ಗಾತ್ರವನ್ನು ಪರಿಗಣಿಸಿದರೆ, ವಾಸುಕಿಯು ನಿಧಾನವಾಗಿ ಚಲಿಸುವ ಹೊಂಚುದಾಳಿ ಪರಭಕ್ಷಕವಾಗಿತ್ತು. ಅದು ಅನಕೊಂಡಗಳು ಮತ್ತು ಹೆಬ್ಬಾವುಗಳಂತೆ ಸುತ್ತುವರಿದು ಬಿಗಿಯುವಿಕೆಯ ಮೂಲಕ ತನ್ನ ಬೇಟೆಯನ್ನು ಪಡೆಯುತ್ತಿತ್ತು” ಎಂದು ಐಐಟಿ-ರೂರ್ಕಿಯಲ್ಲಿ ಪ್ಯಾಲಿಯಂಟಾಲಜಿಯ ಪೋಸ್ಟ್‌ ಡಾಕ್ಟರಲ್ ಸಂಶೋಧಕ ಮತ್ತು ಅಧ್ಯಯನದ ಪ್ರಮುಖ ಲೇಖಕ ದೇಬಜಿತ್ ದತ್ತಾ ಹೇಳುತ್ತಾರೆ. “ಈ ಹಾವು ಕರಾವಳಿಯ ಸಮೀಪವಿರುವ ಜೌಗು ಪ್ರದೇಶದಲ್ಲಿ ಜಾಗತಿಕ ತಾಪಮಾನವು ಇಂದಿನಕ್ಕಿಂತ ಹೆಚ್ಚಿರುವ ಸಮಯದಲ್ಲಿ ವಾಸಿಸುತ್ತಿತ್ತು” ಎಂದಿದ್ದಾರೆ.

ಹಿಂದೂ ಪುರಾಣಗಳಲ್ಲಿ ʼವಾಸುಕಿʼ ಎಂಬ ಭಾರೀ ನಾಗರಾಜನ ಕತೆಗಳು ಇವೆ. ಇದನ್ನು ಸಾಮಾನ್ಯವಾಗಿ ಶಿವನ ಕುತ್ತಿಗೆಗೆ ಸುತ್ತುವಂತೆ ಚಿತ್ರಿಸಲಾಗುತ್ತದೆ. ಸಮುದ್ರ ಮಥನಕ್ಕೆ ಈ ಹಾವನ್ನು ಬಳಸಿಕೊಳ್ಳಲಾಗಿತ್ತು ಎಂದು ಕತೆಯಿದೆ. ಈ ಹಿನ್ನೆಲೆಯಲ್ಲಿ ಸಂಶೋಧಕರು ಇದಕ್ಕೆ ʼವಾಸುಕಿ ಇಂಡಿಕಸ್ʼ ಎಂಬ ಹೆಸರನ್ನು ನೀಡಿದ್ದಾರೆ.

“ಇದು ಬಹಳ ಸಾಂಕೇತಿಕವಾಗಿದೆ” ಎಂದು ನಾಮಕರಣದ ನಂತರ ದತ್ತ ಹೇಳಿದ್ದಾರೆ. “ವಾಸುಕಿ ನಮ್ಮ ಸರ್ಪರಾಜ. ಹೀಗಾಗಿ ಇಲ್ಲಿರುವ ಅಸಾಧಾರಣವಾದ ದೊಡ್ಡ ಗಾತ್ರದ ಹಾವೂ ಅದೇ” ಎಂದು ಅವರು ವಿವರಿಸಿದರು.

ವಾಸುಕಿ ಇಂಡಿಕಸ್‌ನ ಪಳೆಯುಳಿಕೆಯನ್ನು IIT-ರೂರ್ಕಿಯ ಪ್ರಾಗ್ಜೀವಶಾಸ್ತ್ರದ ಪ್ರಾಧ್ಯಾಪಕ ಸುನಿಲ್ ಬಾಜಪೇಯಿ ಅವರು 2005ರಲ್ಲಿ ಕಂಡುಹಿಡಿದರು. ಅವರು ಕಚ್‌ನಲ್ಲಿರುವ ಕಲ್ಲಿದ್ದಲು ಗಣಿಯಲ್ಲಿ ಅವಶೇಷಗಳನ್ನು ಪತ್ತೆಹಚ್ಚಿದರು.

ಆ ಸಮಯದಲ್ಲಿ, ʼಸೈಂಟಿಫಿಕ್ ಅಮೇರಿಕನ್ʼ ಪ್ರಕಾರ, ಅವಶೇಷಗಳು ಈಗಾಗಲೇ ತಿಳಿದಿರುವ ಇತಿಹಾಸಪೂರ್ವ ಜಾತಿಯ ಮೊಸಳೆಗೆ ಸೇರಿವೆ ಎಂದು ಬಾಜಪೇಯಿ ನಂಬಿದ್ದರು. 2022ರವರೆಗೆ ಪಳೆಯುಳಿಕೆ ಅವರ ಪ್ರಯೋಗಾಲಯದಲ್ಲಿ ಇತ್ತು. ಅದೇ ವರ್ಷ ಪ್ರಯೋಗಾಲಯಕ್ಕೆ ಸೇರಿದ ದತ್ತಾ ಅವುಗಳನ್ನು ಪರೀಕ್ಷಿಸಲು ಪ್ರಾರಂಭಿಸಿದರು. ಆ ಚೂರುಗಳು ಬೇರೆ ಜಾತಿಗೆ ಸೇರಿದವು ಎಂದು ಇಬ್ಬರಿಗೂ ಅರಿವಾಯಿತು.

“ಪಳೆಯುಳಿಕೆಯು 2005ರಲ್ಲಿ ಕಂಡುಬಂದಿದೆ, ಆದರೆ ನಾನು ಬೇರೆ ಬೇರೆ ಪಳೆಯುಳಿಕೆಗಳ ಮೇಲೆ ಕೆಲಸ ಮಾಡುತ್ತಿರುವುದರಿಂದ, ಅದು ಹಾಗೇ ಉಳಿಯಿತು. 2022ರಲ್ಲಿ ನಾವು ಪಳೆಯುಳಿಕೆಯನ್ನು ಮರು-ಪರಿಶೀಲಿಸಲು ಪ್ರಾರಂಭಿಸಿದ್ದೇವೆ. ಆರಂಭದಲ್ಲಿ ಅದರ ಗಾತ್ರದಿಂದಾಗಿ, ಇದು ಮೊಸಳೆ ಎಂದು ನಾನು ಭಾವಿಸಿದೆ. ಆದರೆ ನಂತರ ಅದು ಹಾವಿನದ್ದಾಗಿದೆ ಎಂದು ಅರಿತುಕೊಂಡೆವು” ಎಂದು ಬಾಜಪೇಯಿ ತಿಳಿಸಿದರು.

ಇದನ್ನೂ ಓದಿ: Hottest Year: 1.25 ಲಕ್ಷ ವರ್ಷಗಳಲ್ಲೇ 2023 ಅತಿ ಬಿಸಿಯಾದ ವರ್ಷ, ಕಾರಣ ಏನು?

ಹೊಸದಿಲ್ಲಿ: ಚಂದ್ರಯಾನ-3 ಮಿಷನ್‌ನ (Chandrayaan-3 mission)‌ ಯಶಸ್ಸಿಗೆ ಕಾರಣವಾದ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO – ಇಸ್ರೋ) ತಂಡವನ್ನು ಸೋಮವಾರ ʼ2024ರ ಜಾನ್ ಎಲ್. ಜಾಕ್ ಸ್ವಿಗರ್ಟ್ ಜೂನಿಯರ್ʼ ಪ್ರಶಸ್ತಿಯನ್ನು (US Award) ಬಾಹ್ಯಾಕಾಶ ಪರಿಶೋಧನೆಗಾಗಿ (space exploration) ನೀಡಿ ಗೌರವಿಸಲಾಗಿದೆ. ಸ್ಪೇಸ್ ಫೌಂಡೇಶನ್ (Space Foundation) ಇದನ್ನು ನೀಡುತ್ತಿದೆ.

ಬಾಹ್ಯಾಕಾಶ ಪರಿಶೋಧನೆಯ ಸಾಧ್ಯತೆಯನ್ನು ಹೆಚ್ಚಿಸುವಲ್ಲಿ ಚಂದ್ರಯಾನದ ಕೊಡುಗೆಯನ್ನು ಗುರುತಿಸಿ ಪ್ರಶಸ್ತಿ ನೀಡಲಾಗುತ್ತಿದೆ. ಕಳೆದ ವರ್ಷ ಆಗಸ್ಟ್‌ನಲ್ಲಿ, ಚಂದ್ರಯಾನ-3 ಮಿಷನ್ ನಡೆಸಲಾಗಿತ್ತು. ಅದು ಚಂದ್ರನ ದಕ್ಷಿಣ ಧ್ರುವದಲ್ಲಿ ಯಶಸ್ವಿ ಲ್ಯಾಂಡಿಂಗ್ ಮಾಡಿತ್ತು. ಈ ಸಾಧನೆಯನ್ನು ಸಾಧಿಸಿದ ಮೊದಲ ದೇಶವಾಗಿ ಭಾರತ ಹೊರಹೊಮ್ಮಿತ್ತು. ನಂತರ ಚಂದ್ರಯಾನ 3ರ ಮೂನ್ ಲ್ಯಾಂಡರ್ ಲ್ಯಾಂಡಿಂಗ್ ಸೈಟ್ ಅನ್ನು ʼಶಿವಶಕ್ತಿʼ ಎಂದು ಹೆಸರಿಸಲಾಗುವುದು ಎಂದು ಪ್ರಧಾನಿ ಮೋದಿ ಘೋಷಿಸಿದ್ದರು.

ಕೊಲೊರಾಡೋದಲ್ಲಿ ವಾರ್ಷಿಕ ಬಾಹ್ಯಾಕಾಶ ವಿಚಾರ ಸಂಕಿರಣದ ಉದ್ಘಾಟನಾ ಸಮಾರಂಭದಲ್ಲಿ ನೀಡಲಾದ ಪ್ರಶಸ್ತಿಯನ್ನು ಇಸ್ರೋ ಪರವಾಗಿ ಹ್ಯೂಸ್ಟನ್‌ನಲ್ಲಿರುವ ಭಾರತದ ಕಾನ್ಸುಲ್ ಜನರಲ್ ಡಿಸಿ ಮಂಜುನಾಥ್ ಅವರು ಸ್ವೀಕರಿಸಿದರು.

“ಬಾಹ್ಯಾಕಾಶದಲ್ಲಿ ಭಾರತದ ನಾಯಕತ್ವವು ಜಗತ್ತಿಗೆ ಸ್ಫೂರ್ತಿಯಾಗಿದೆ” ಎಂದು ಸ್ಪೇಸ್ ಫೌಂಡೇಶನ್ ಸಿಇಒ ಹೀದರ್ ಪ್ರಿಂಗಲ್ ಜನವರಿಯಲ್ಲಿ ಪ್ರಶಸ್ತಿಯನ್ನು ಘೋಷಿಸಿದಾಗ ನೀಡಿದ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

“ಇಡೀ ಚಂದ್ರಯಾನ-3 ತಂಡದ ಪ್ರವರ್ತಕ ಕೆಲಸವು ಬಾಹ್ಯಾಕಾಶ ಪರಿಶೋಧನೆಯ ಸಾಧ್ಯತೆಯನ್ನು ಹೆಚ್ಚಿಸಿದೆ. ಅವರ ಗಮನಾರ್ಹವಾದ ಚಂದ್ರನ ಲ್ಯಾಂಡಿಂಗ್ ನಮಗೆಲ್ಲರಿಗೂ ಮಾದರಿಯಾಗಿದೆ. ಅಭಿನಂದನೆಗಳು. ನೀವು ಮುಂದೆ ಏನು ಮಾಡುತ್ತೀರಿ ಎಂದು ನೋಡಲು ನಾವು ಕಾಯುತ್ತಿದ್ದೇವೆ” ಎಂದು ಅವರು ಹೇಳಿದರು.

ಸ್ಪೇಸ್‌ ಫೌಂಡೇಶನ್, ಪತ್ರಿಕಾ ಪ್ರಕಟಣೆಯಲ್ಲಿ, ಇಸ್ರೋ ಅಭಿವೃದ್ಧಿಪಡಿಸಿದ ಚಂದ್ರಯಾನ-3 ಮಿಷನ್ ಚಂದ್ರನ ದಕ್ಷಿಣ ಧ್ರುವದಲ್ಲಿ ಇಳಿಯುವ ಮೂಲಕ ಮನುಕುಲದ ಬಾಹ್ಯಾಕಾಶ ಪರಿಶೋಧನೆಯ ಪರಿಧಿಯನ್ನು ವಿಸ್ತರಿಸಿದೆ ಎಂದು ಹೈಲೈಟ್ ಮಾಡಿದೆ.

ಜಾನ್ ಎಲ್. ʼಜ್ಯಾಕ್’ ಸ್ವಿಗರ್ಟ್ ಜೂನಿಯರ್ ಪ್ರಶಸ್ತಿ ಎಂದರೇನು?

ಬಾಹ್ಯಾಕಾಶ ಪರಿಶೋಧನೆಗಾಗಿ ಜಾನ್ L. “ಜ್ಯಾಕ್” ಸ್ವಿಗರ್ಟ್ ಜೂನಿಯರ್ ಪ್ರಶಸ್ತಿ ನೀಡಲಾಗುತ್ತದೆ. ಬಾಹ್ಯಾಕಾಶ ಸಂಸ್ಥೆ ಅಥವಾ ಸಂಸ್ಥೆಗಳ ಒಕ್ಕೂಟದಿಂದ ಬಾಹ್ಯಾಕಾಶ ಪರಿಶೋಧನೆ ಮತ್ತು ಅನ್ವೇಷಣೆಯಲ್ಲಿ ಆಗುವ ಗಮನಾರ್ಹ ಸಾಧನೆಗಳನ್ನು ಗುರುತಿಸುತ್ತದೆ.

ಈ ಪ್ರಶಸ್ತಿಯು ಗಗನಯಾತ್ರಿ ಜಾನ್ L. “ಜ್ಯಾಕ್” ಸ್ವಿಗರ್ಟ್ ಜೂನಿಯರ್ ಅವರ ಗೌರವಾರ್ಥ ಸ್ಥಾಪಿಸಲ್ಪಟ್ಟಿದೆ. ಅವರ ಕೊಡುಗೆಗಳು “ಸ್ಪೇಸ್ ಫೌಂಡೇಶನ್ʼʼ ಸ್ಥಾಪನೆಗೆ ಸ್ಫೂರ್ತಿ ನೀಡಿವೆ. ಕೊಲೊರಾಡೋ ಮೂಲದ ಸ್ವಿಗರ್ಟ್, ನಿವೃತ್ತ US ನೌಕಾಪಡೆಯ ಕ್ಯಾಪ್ಟನ್ ಜೇಮ್ಸ್ A. ಲೊವೆಲ್ ಜೂನಿಯರ್ ಮತ್ತು ಫ್ರೆಡ್ ಹೈಸ್ ಜೊತೆಗೆ ಅಪೊಲೊ 13 ಚಂದ್ರನ ಕಾರ್ಯಾಚರಣೆಯ ಭಾಗವಾಗಿದ್ದರು. ಈ ಕಾರ್ಯಾಚರಣೆಯು ಚಂದ್ರನ ಮಾರ್ಗದಲ್ಲಿ ನಿರ್ಣಾಯಕ ಆಮ್ಲಜನಕ ಟ್ಯಾಂಕ್ ವೈಫಲ್ಯವನ್ನು ಎದುರಿಸಿತ್ತು. ಪರಿಣಾಮವಾಗಿ ಭೂಮಿಗೆ ಸಾಹಸಪೂರ್ವಕವಾಗಿ, ನಾಟಕೀಯವಾಗಿ ಮರಳಿತ್ತು.

ಚಂದ್ರಯಾನ-3

ಭಾರತವು ತನ್ನ ಚಂದ್ರಯಾನ-3 ಮಿಷನ್‌ನೊಂದಿಗೆ ಚಂದ್ರನ ದಕ್ಷಿಣ ಧ್ರುವದಲ್ಲಿ ಮೊದಲ ಬಾರಿಗೆ ಇಳಿಯುವಿಕೆಯನ್ನು ಸಾಧಿಸುವ ಮೂಲಕ ಇತಿಹಾಸವನ್ನು ಬರೆದಿದೆ. ಈ ಮೈಲಿಗಲ್ಲನ್ನು ಚಂದ್ರಯಾನ-3 ರ ವಿಕ್ರಮ್ ಎಂಬ ಲ್ಯಾಂಡರ್, ಪ್ರಗ್ಯಾನ್ ರೋವರ್ ಮೂಲಕ ಕಳೆದ ಆಗಸ್ಟ್ 23ರಂದು ಸಂಜೆ 6.04ಕ್ಕೆ ಚಂದ್ರನ ಮೇಲ್ಮೈಯನ್ನು ಸ್ಪರ್ಶಿಸುವ ಮೂಲಕ ಸಾಧಿಸಲಾಯಿತು.

US, ಚೀನಾ ಮತ್ತು ಹಿಂದಿನ ಸೋವಿಯತ್ ಒಕ್ಕೂಟದ ನಂತರ ಚಂದ್ರನ ಮೇಲೆ “ಸಾಫ್ಟ್ ಲ್ಯಾಂಡಿಂಗ್” ಅನ್ನು ಯಶಸ್ವಿಯಾಗಿ ಕಾರ್ಯಗತಗೊಳಿಸಿದ ನಾಲ್ಕನೇ ದೇಶವಾಗಿ ಭಾರತ ಗುರುತಿಸಲ್ಪಟ್ಟಿದೆ. ಈ ಸಾಧನೆಯನ್ನು ಗುರುತಿಸಿ, ಪ್ರಧಾನಿ ನರೇಂದ್ರ ಮೋದಿ ಅವರು ಚಂದ್ರಯಾನ 3ರ ಚಂದ್ರನ ಲ್ಯಾಂಡಿಂಗ್ ಯಶಸ್ಸಿನ ಸ್ಮರಣಾರ್ಥ ಆಗಸ್ಟ್ 23 ಅನ್ನು ರಾಷ್ಟ್ರೀಯ ಬಾಹ್ಯಾಕಾಶ ದಿನ ಎಂದು ಘೋಷಿಸಿದರು.

ಇದನ್ನೂ ಓದಿ: ವಿಸ್ತಾರ ಸಂಪಾದಕೀಯ: ಚಂದ್ರಯಾನ 3 ಇಳಿದ ಜಾಗವೀಗ ‘ಶಿವಶಕ್ತಿ’;‌ ದೇಶದ ಸಾಧನೆ ಚಿರಾಯು

ಬೆಂಗಳೂರು: ಕುಡಿಯುವ ನೀರಿನ ಸಮಸ್ಯೆ ಈಗ ವಿಶ್ವವನ್ನೇ ಕಾಡುತ್ತಿದೆ. ಇದನ್ನು ಪರಿಹರಿಸುವ ನಿಟ್ಟಿನಲ್ಲಿ ಇದೀಗ ಒಂದು ಆಶಾಕಿರಣ ಗೋಚರಿಸಿದೆ. ಅದೂ ನಮ್ಮ ಬೆಂಗಳೂರಿನಲ್ಲಿ. ನದಿ ಅಥವಾ ನೆಲದೊಳಗಿನ ಜಲ ಸಂಪನ್ಮೂಲ ಬಳಸಿಕೊಳ್ಳದೆ ಗಾಳಿಯಿಂದ ಶುದ್ಧ ಕುಡಿಯುವ ನೀರನ್ನು (Water From Air) ಉತ್ಪಾದಿಸುವ ವಿಶೇಷ ಬಾಟಲಿಗಳನ್ನು (Bottles) ಬೆಂಗಳೂರು ಸ್ಟಾರ್ಟ್‌ಅಪ್ (Bengaluru Startup) ಕಂಪನಿಯೊಂದು ಪರಿಚಯಿಸಿದೆ. ಜಾಗತಿಕವಾಗಿ ಕುಡಿಯುವ ನೀರಿನ ಸಮಸ್ಯೆಗೆ ಇದು ಸೂಕ್ತ ಪರಿಹಾರವಾಗುವ ಭರವಸೆ ಮೂಡಿಸಿದೆ.

ಬೆಂಗಳೂರಿನ ಉರವು ಲ್ಯಾಬ್ (Uravu Labs) ಗಾಳಿಯಿಂದ ನೀರನ್ನು ಉತ್ಪಾದಿಸುವ ವಿಶೇಷ ಬಾಟಲಿಗಳನ್ನು ಪರಿಚಯಿಸಿದ್ದು, ಈ ಕುರಿತು ಲ್ಯಾಬ್ಸ್‌ನ ಸಿಇಒ ಮತ್ತು ಸಹ-ಸಂಸ್ಥಾಪಕರಾದ ಸ್ವಪ್ನಿಲ್ ಶ್ರೀವಾಸ್ತವ್ ಸಂದರ್ಶನವೊಂದರಲ್ಲಿ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ.

ಗಾಳಿಯಿಂದ ನೀರಿನ ಉತ್ಪಾದನೆ ಹೇಗೆ?

ಉರವುನ ಕೋರ್ ತಂತ್ರಜ್ಞಾನವು ಶುಷ್ಕ ವಸ್ತುಗಳಿಂದ ಪ್ರೇರಿತವಾದ ವಿಶಿಷ್ಟ ಪ್ರಕ್ರಿಯೆಯನ್ನು ಬಳಸಿಕೊಂಡು ಗಾಳಿಯಿಂದ ನೀರನ್ನು ಹೊರತೆಗೆಯುತ್ತದೆ.

ಸುತ್ತಲಿನ ಗಾಳಿಯಿಂದ ತೇವಾಂಶವನ್ನು ಹೀರಿಕೊಳ್ಳುವ ವಸ್ತುವನ್ನು ಬಳಸಿ ಅದರಲ್ಲಿ ಸಂಗ್ರಹಿಸಿ ಆವಿಯನ್ನು ಬಿಡುಗಡೆ ಮಾಡಲು ಬಿಸಿ ಮಾಡಲಾಗುತ್ತದೆ. ಈ ಆವಿಯನ್ನು ಘನೀಕರಿಸಿ ನಿಯಂತ್ರಿತ ತಾಪಮಾನದಲ್ಲಿ ತಂಪಾಗಿಸಿ ಶುದ್ಧ ಕುಡಿಯುವ ನೀರನ್ನು ಪಡೆಯಲಾಗುತ್ತದೆ.

ಇದನ್ನೂ ಓದಿ: karnataka Weather : ಬೆಂಗಳೂರು ಸೇರಿ ಹಲವೆಡೆ ಸುಡುತ್ತಿದೆ ಉರಿ ಬಿಸಿಲು; ಮತ್ಯಾವಾಗ ಮಳೆ

ಯಾಕಾಗಿ ಈ ಯೋಜನೆ?

ಜನಸಂಖ್ಯೆಯ ಬೆಳವಣಿಗೆ, ಅಂತರ್ಜಲದ ಕೊರತೆ ಮತ್ತು ಹವಾಮಾನ ಬದಲಾವಣೆಯಿಂದ ಉಲ್ಬಣಗೊಂಡಿರುವ ನೀರಿನ ಕೊರತೆಯನ್ನು ನಿವಾರಿಸುವುದು ಈಗ ವಿಶ್ವಾದ್ಯಂತ ಇರುವ ಬಹುದೊಡ್ಡ ಸವಾಲು. ಅದರಲ್ಲೂ ಭಾರತದಲ್ಲಿ ನೀರಿನ ಬೇಡಿಕೆ ದಿನೇದಿನೇ ಹೆಚ್ಚಾಗುತ್ತಲೇ ಇದೆ. ಈ ನಿಟ್ಟಿನಲ್ಲಿ ನೀರಿನ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಬೇಕಿದೆ. ಇದಕ್ಕಾಗಿ ಉರವು ತಂತ್ರಜ್ಞಾನ ಇದನ್ನು ಪ್ರಯೋಗ ಮಾಡಿದೆ.

ಹೇಗಿದೆ ಪ್ರಗತಿ?

ಉರವು ಲ್ಯಾಬ್ಸ್ ನಲ್ಲಿ ತಯಾರಿಸಲಾದ ಈ ಬಾಟಲುಗಳು ಗಾಜಿನದ್ದಾಗಿದೆ. ಇದರಲ್ಲಿರುವ ನವೀನ ರಿವರ್ಸ್ ಲಾಜಿಸ್ಟಿಕ್ಸ್ ಮಾದರಿಯು ಗಾಜಿನ ಬಾಟಲಿಗಳನ್ನು ಸ್ವಚ್ಛಗೊಳಿಸಲು, ಮರುಪೂರಣಗೊಳಿಸಲು ಮತ್ತು ಮರುಬಳಕೆಗಾಗಿ ಉಪಯುಕ್ತವಾಗಿದೆ. ಈ ಮಾದರಿಯ ಬಾಟಲಿಗಳನ್ನು ಕೋಕ್ ಅಥವಾ ಪೆಪ್ಸಿಯಂತಹ ಪಾನೀಯ ಕಂಪನಿಗಳು ಮಾತ್ರ ಬಳಸುತ್ತವೆ ಎಂದು ಶ್ರೀವಾಸ್ತವ್ ತಿಳಿಸಿದ್ದಾರೆ.

ಮಾರುಕಟ್ಟೆಯಲ್ಲಿ ಲಭ್ಯ

ಉತ್ತಮ ರುಚಿ ಮತ್ತು ಪರಿಸರ ಸ್ನೇಹಿ ಕಾಳಜಿಯನ್ನು ಹೊಂದಿರುವ ಉರವು ಈ ಬಾಟಲುಗಳಲ್ಲಿ ಗ್ರಾಹಕರಿಗೆ ಅವರ ಆಯ್ಕೆಯ ಭರವಸೆ ನೀಡುತ್ತಿದೆ. ಕಳೆದ 8 ತಿಂಗಳಿನಿಂದ ಬೆಂಗಳೂರಿನಲ್ಲಿ ಸುಮಾರು 3.5 ಲಕ್ಷ ಬಾಟಲಿಗಳನ್ನು ಮಾರಾಟ ಮಾಡಲಾಗಿದೆ. ಮಾರುಕಟ್ಟೆಗೆ ಇದನ್ನು ತರುವಾಗ, ವಿತರಣಾ ಜಾಲಗಳೊಂದಿಗೆ ಪಾಲುದಾರಿಕೆ ಮಾಡುವಾಗ ನೀರಿನ ಹೊರತೆಗೆಯುವಿಕೆ ಮತ್ತು ಪ್ಯಾಕೇಜಿಂಗ್‌ನ ಬ್ಯಾಕೆಂಡ್ ಕಾರ್ಯಾಚರಣೆಗಳ ಬಗ್ಗೆಯೂ ಸಂಪೂರ್ಣವಾಗಿ ವಿವರಿಸಲಾಗುತ್ತದೆ ಎಂದು ಹೇಳಿರುವ ಶ್ರೀವಾಸ್ತವ್, ಗ್ರಾಹಕರ ನಂಬಿಕೆಯನ್ನು ಗಳಿಸುವುದು ಮುಖ್ಯ ಎಂದಿದ್ದಾರೆ.

ಔಜಸ್ಯ ಎಂಬ ಲೇಬಲ್‌ನೊಂದಿಗೆ ‘ಫ್ರಮ್ ಏರ್’ ಟ್ರೇಡ್‌ಮಾರ್ಕ್ ಆಗಿ ಬರುವ ಬಾಟಲ್ ಗಳಲ್ಲಿ ಉರವು ಕಂಪನಿ ರಚಿಸಿದ್ದು ಎಂಬ ಉಲ್ಲೇಖವಿದೆ. ಈ ತಂತ್ರವು ಇಂಟೆಲ್‌ನಂತಹ ಪ್ರಸಿದ್ಧ ಬ್ರ್ಯಾಂಡ್‌ಗಳ ವಿಧಾನವನ್ನು ಹೋಲುತ್ತದೆ ಎಂದು ಅವರು ಹೇಳಿದರು.

ಉದ್ಯೋಗ ಭರವಸೆ

ಪ್ರಸ್ತುತ 70 ಮಂದಿ ಇದರಲ್ಲಿ ತೊಡಗಿಕೊಂಡಿದ್ದು, ಮುಂದೆ ಉರವು ಲ್ಯಾಬ್ಸ್, ವಿಸ್ತರಣೆ ಮತ್ತು ನಾವೀನ್ಯತೆಗಾಗಿ ಹೊಸ ಯೋಜನೆಗಳನ್ನು ಹಾಕಲಾಗುತ್ತಿದೆ. ಪ್ರಸ್ತುತ ಅಬುಧಾಬಿಯಲ್ಲಿ ಹೈಡ್ರೋಪೋನಿಕ್ಸ್ ಯೋಜನೆಯಲ್ಲಿ ತೊಡಗಿಸಿಕೊಂಡಿರುವ ಉರವು, ಅಲ್ಲಿ ದೊಡ್ಡ ದೊಡ್ಡ ಫಾರ್ಮ್‌ಗಳಿಂದ ನೀರನ್ನು ಹೊರತೆಗೆಯುವ ತಂತ್ರಜ್ಞಾನವನ್ನು ತಮ್ಮ ದೈನಂದಿನ ಅಗತ್ಯಗಳಿಗಾಗಿ ಬಳಸಿಕೊಳ್ಳುವುದನ್ನು ಪರಿಚಯಿಸಲಾಗುತ್ತಿದೆ ಎಂದು ಶ್ರೀವಾಸ್ತವ್ ತಿಳಿಸಿದ್ದಾರೆ.

ಮುಂದೇನು?

ಉರವು ಡೇಟಾ ಸೆಂಟರ್‌ಗಳಿಗಾಗಿ ಅಪ್ಲಿಕೇಶನ್‌ಗಳನ್ನು ಅನ್ವೇಷಿಸುತ್ತಿದ್ದು, ಒಂದು ಮೆಗಾವ್ಯಾಟ್ ಡೇಟಾ ಸೆಂಟರ್‌ಗೆ ಸಾಮಾನ್ಯವಾಗಿ ದಿನಕ್ಕೆ ಸುಮಾರು 80,000 ಲೀಟರ್ ನೀರು ಬೇಕಾಗುತ್ತದೆ. ಉರವು ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳುವ ಮೂಲಕ ಡೇಟಾ ಕೇಂದ್ರಗಳು ತಮ್ಮ ನೀರಿನ ಬಳಕೆಯನ್ನು ಕಡಿಮೆ ಮಾಡಬಹುದು. ಇದರಿಂದ ಶೇ. 90ರಷ್ಟು, ಸಮುದಾಯದ ನೀರಿನ ಮೂಲಗಳು ಮತ್ತು ಅಂತರ್ಜಲ ಜಲಾಶಯಗಳ ಮೇಲಿನ ಒತ್ತಡವನ್ನು ಇದು ಕಡಿಮೆ ಮಾಡುತ್ತದೆ ಎಂದು ಹೇಳಿದರು.

ಗಾಳಿಯಿಂದ ನೀರಿನ ತಂತ್ರಜ್ಞಾನವನ್ನು ಕೈಗೆಟುಕುವಂತೆ ಮಾಡುವುದು ಉರವು ಕಂಪನಿಯ ಅಂತಿಮ ಉದ್ದೇಶವಾಗಿದೆ ಎಂದು ಹೇಳಿರುವ ಶ್ರೀವಾಸ್ತವ್, ನೀರು ಭೂಮಿಯ ಮೇಲೆ ಹೆಚ್ಚು ಬಳಸುವ ವಸ್ತು. ಇದು ಭೌತಿಕ ಪ್ರಮಾಣದಲ್ಲಿ ಮತ್ತು ಗುಣಮಟ್ಟದ ಅಂಶಗಳಲ್ಲಿ ವೇಗವಾಗಿ ಕಡಿಮೆಯಾಗುತ್ತಿದೆ ಎಂದು ಕಾಳಜಿ ವ್ಯಕ್ತಪಡಿಸಿದ್ದಾರೆ.

ಎಷ್ಟು ವೆಚ್ಚ?

ಸಾಮಾನ್ಯವಾಗಿ ಶುದ್ಧೀಕರಣ ಪ್ರಕ್ರಿಯೆಗಳು ಮತ್ತು ಮೂಲದ ಗುಣಮಟ್ಟವನ್ನು ಅವಲಂಬಿಸಿ ನೀರಿನ ವೆಚ್ಚವು ಲೀಟರ್‌ಗೆ 20ರಿಂದ 60 ಪೈಸೆಗಳವರೆಗೆ ಇರುತ್ತದೆ. ಉರವು ಲ್ಯಾಬ್‌ಗಳಲ್ಲಿ ನೀರಿನ ಉತ್ಪಾದನೆಯ ವೆಚ್ಚ ಪ್ರತಿ ಲೀಟರ್‌ಗೆ ಸುಮಾರು 4 ರಿಂದ 5 ರೂಪಾಯಿಗಳು ಎಂದು
ಶ್ರೀವಾಸ್ತವ್ ಮಾಹಿತಿ ನೀಡಿದ್ದಾರೆ.

ನೀರಿನ ಕೊರತೆ ಇದ್ದಾಗ ಜನರು ನೀರಿಗಾಗಿ ಹೆಚ್ಚು ಬೆಲೆ ಕೊಡುತ್ತಾರೆ. ಆದರೆ ಗಾಳಿಯಿಂದ ನೀರಿನಂತಹ ಸ್ಥಿರ ತಂತ್ರಜ್ಞಾನದಲ್ಲಿ ಪ್ರತಿ ಲೀಟರ್‌ ನೀರಿಗೆ ಆರಂಭದಲ್ಲಿ ದುಬಾರಿಯಂತೆ ಕಂಡರೂ ನೀರಿನ ಬಿಕ್ಕಟ್ಟಿನ ಸಮಯದಲ್ಲಿ ದುಬಾರಿಯಾಗುವ ನೀರಿನ ಮೌಲ್ಯವನ್ನು ಗಮನಿಸಿದರೆ ಇದು ದುಬಾರಿಯಲ್ಲ. ಈ ತಂತ್ರಜ್ಞಾನ ಸರಳವಾದಂತೆ ಈ ಮಾದರಿಯ ನೀರು ಉತ್ಪಾದನೆ ವೆಚ್ಚವೂ ಕಡಿಮೆಯಾಗಲಿದೆ ಎಂದು ಅವರು ತಿಳಿಸಿದ್ದಾರೆ.

ಹೊಸದಿಲ್ಲಿ: ಯುಗಾದಿಯ (Ugadi 2024) ಹಿಂದಿನ ದಿನ (ಏಪ್ರಿಲ್ 8) ಸಂಭವಿಸಿದ ಸೂರ್ಯಗ್ರಹಣವು (Solar Eclipse 2024) ಪ್ರಪಂಚದಾದ್ಯಂತದ ಬಾಹ್ಯಾಕಾಶ (Space) ಪ್ರೇಮಿಗಳನ್ನು ತನ್ನ ಸುಂದರ ದೃಶ್ಯದಿಂದ ಮೂಕವಿಸ್ಮಿತರನ್ನಾಗಿಸಿತು. ಅನೇಕ ಜನರು ತಮ್ಮ ಮನೆಗಳಿಂದಲೇ ಗ್ರಹಣವನ್ನು ನೋಡಿದರೆ, ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (international space station – ಐಎಸ್ಎಸ್) ಕೂಡ ಬಾಹ್ಯಾಕಾಶದಿಂದ ಕಂಡ ಗ್ರಹಣದ ನೋಟವನ್ನು ಹಂಚಿಕೊಂಡಿದೆ. ಚಂದಿರನ (moon) ನೆರಳಿನ ಪರಿಣಾಮ ಭೂಮಿಯ ಒಂದು ಭಾಗವು ಹೇಗೆ ಕಪ್ಪಾಗಿ ಕಾಣುತ್ತದೆ ಎಂಬ ಈ ಬೆರಗುಗೊಳಿಸುವ ವೀಡಿಯೊ (viral video) ನೆಟಿಜನ್‌ಗಳನ್ನು ಮಂತ್ರಮುಗ್ಧರನ್ನಾಗಿಸಿದೆ.

View this post on Instagram

A post shared by International Space Station (@iss)

ವೀಡಿಯೊವನ್ನು ಹಂಚಿಕೊಂಡಿರುವ ISS, ಪೋಸ್ಟ್‌ನ ಶೀರ್ಷಿಕೆಯಲ್ಲಿ ಹೀಗೆ ಮಾಹಿತಿ ನೀಡಿದೆ: “ಸೋಮವಾರ ಮಧ್ಯಾಹ್ನ ಸೂರ್ಯಗ್ರಹಣದ ಸಮಯದಲ್ಲಿ ಎಕ್ಸ್‌ಪೆಡಿಶನ್ 71 ಸಿಬ್ಬಂದಿಯು ಚಂದ್ರನ ನೆರಳು (ಅಥವಾ ಅಂಬ್ರಾ- Umbra) ಅನ್ನು ಸೆರೆಹಿಡಿದರು. ಸಿಬ್ಬಂದಿ ಇಲ್ಲಿ ಸರಕು ವರ್ಗಾವಣೆ, ಬಾಹ್ಯಾಕಾಶ ಸೂಟ್‌ಗಳು ಮತ್ತು ವಿಜ್ಞಾನದ ಕೆಲಸದಲ್ಲಿ ತೊಡಗಿದ್ದರು. ಆಗ್ನೇಯ ಕೆನಡಾದ ಮೇಲೆ ಚಾಚಿದ್ದ ಸೂರ್ಯಗ್ರಹಣದ ನೆರಳಿನ ಹಾದಿಯಲ್ಲಿ ಬಾಹ್ಯಾಕಾಶ ನಿಲ್ದಾಣ ಸುತ್ತುತ್ತಿರುವಾಗ ಇದು ಭೂಮಿಯ ಮೇಲೆ ಗೋಚರಿಸಿತು.”

ಈ ವೀಡಿಯೊ ಭೂಮಿಯ ಮೇಲಿನ ಗ್ರಹಣದ ನೆರಳನ್ನು ತೋರಿಸಿದೆ. ಆಕಾಶದ ಘಟನೆ ನಡೆಯುವಾಗ ನಮ್ಮ ನೀಲಿ ಗ್ರಹ ಭೂಮಿಯ ಒಂದು ಭಾಗ ಕಪ್ಪು ಬಣ್ಣಕ್ಕೆ ತಿರುಗಿದೆ. ಈ ವೀಡಿಯೊವನ್ನು ಕೆಲವು ಗಂಟೆಗಳ ಹಿಂದೆ ಪೋಸ್ಟ್ ಮಾಡಲಾಗಿದೆ. ಹಂಚಿಕೊಂಡ ನಂತರ ಇದು ಸುಮಾರು ಇಪ್ಪತ್ತು ಲಕ್ಷ ವೀಕ್ಷಣೆಗಳನ್ನು ಗಳಿಸಿದೆ. ಸಾವಿರಾರು ಲೈಕ್ಸ್‌ಗಳು ಮತ್ತು ಕಾಮೆಂಟ್‌ಗಳನ್ನು ಗಳಿಸಿದೆ. ಅನೇಕ ಜನರು ತಮ್ಮ ಪ್ರತಿಕ್ರಿಯೆಗಳನ್ನು ಹಂಚಿಕೊಂಡಿದ್ದಾರೆ.

“ಅದ್ಭುತ!” “ಬಾಹ್ಯಾಕಾಶದಿಂದ ಬಂದ ನೋಟ ಅದ್ಭುತವಾಗಿದೆ” “ಸೂರ್ಯನ ಕರೋನಾವನ್ನು ನೋಡುವುದು ಅದ್ಭುತ ದೃಶ್ಯ” “ಚಂದ್ರನ ನೆರಳು ಎಷ್ಟು ವೇಗವಾಗಿ ಚಲಿಸುತ್ತಿದೆ ಎಂದು ನೋಡಲು ಅದ್ಭುತವಾಗಿದೆ!” ಎಂದೆಲ್ಲ ವೀವರ್ಸ್‌ ಕಾಮೆಂಟ್‌ ಮಾಡಿದ್ದಾರೆ.

ಸೋಮವಾರ ಉತ್ತರ ಅಮೆರಿಕಾದಲ್ಲಿ ಸಂಪೂರ್ಣ ಸೂರ್ಯಗ್ರಹಣ ಕಾಣಿಸಿಕೊಂಡಿದ್ದು, ಮೆಕ್ಸಿಕೋ, ಯುನೈಟೆಡ್ ಸ್ಟೇಟ್ಸ್ ಮತ್ತು ಕೆನಡಾದಲ್ಲಿ ಲಕ್ಷಾಂತರ ಜನರನ್ನು ಆಕರ್ಷಿಸಿತು. ಈ ಇವೆಂಟ್ ಈ ಖಂಡಗಳ ಹೆಚ್ಚಿನ ವೀಕ್ಷಕರನ್ನು ಸೆಳೆಯಿತು. ಪ್ರಪಂಚದಾದ್ಯಂತದ ನಕ್ಷತ್ರ ವೀಕ್ಷಕರು ಈ ಬಾನಿನ ಚಮತ್ಕಾರವನ್ನು ನೋಡಲು ಜಮಾಯಿಸಿದರು.

ಇದನ್ನೂ ನೋಡಿ: Aditya L1: ಇಂದು ಸೂರ್ಯಗ್ರಹಣ; ಇಸ್ರೋದ ಆದಿತ್ಯ ಎಲ್‌ 1 ಮಿಷನ್‌ ಏನು ಮಾಡಲಿದೆ?