ಮುಂಬೈ: ಯಾರಾದರೂ ಸಂಕಷ್ಟದಲ್ಲಿದ್ದಾಗ ಕೆಲವರು ಕಂಡೂ ಕಾಣದಂತೆ ಹೋಗುತ್ತಿರುತ್ತಾರೆ. ಅಂತಹ ಘಟನೆಗಳನ್ನು ನಾವು ಹಲವಾರು ಕಡೆಗಳಲ್ಲಿ ಕಂಡಿರುತ್ತೇವೆ. ಅಲ್ಲಿ ಸಹಾಯಕ್ಕೆ ಬರುವವರು ಒಬ್ಬರು-ಇಬ್ಬರು ಮಾತ್ರ. ಉಳಿದವರು ನಮಗೇಕೆ ಪರರ ಚಿಂತೆ ಎಂದು ತಮ್ಮ ಪಾಡಿಗೆ ತಾವು ಹೋಗುತ್ತಿರುತ್ತಾರೆ. ಸಾಮಾನ್ಯ ಜನರೇ ಈ ರೀತಿ ವರ್ತಿಸುವಾಗ ಇನ್ನೂ ದೊಡ್ಡ ಮನುಷ್ಯರೆನಿಸಿಕೊಂಡರು ಅಲ್ಲಿ ಏನಾಗಿದೆ ಎಂದು ಕಣ್ಣೆತ್ತಿ ಕೂಡ ನೋಡುವುದಿಲ್ಲ. ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ್ ಶಿಂಧೆ (Eknath Shinde) ರಸ್ತೆಯಲ್ಲಿ ಸಂಕಷ್ಟಕ್ಕೀಡಾದ ಇಬ್ಬರು ವ್ಯಕ್ತಿಗಳ ಸಹಾಯಕ್ಕೆ ಧಾವಿಸಿ ಬಂದಿದ್ದಾರೆ. ಇದಕ್ಕೆ ಸಂಬಂಧಪಟ್ಟ ವಿಡಿಯೊ ವೈರಲ್ (Viral Video) ಆಗಿದೆ.

ಹೌದು. ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರು ಮಹಾರಾಷ್ಟ್ರ ವಿಧಾನಸಭೆಯ ಮುಂಗಾರು ಅಧಿವೇಶನಕ್ಕಾಗಿ ಥಾಣೆಯಿಂದ ವಿಧಾನಸಭಾ ಭವನಕ್ಕೆ ಹೋಗುತ್ತಿದ್ದಾಗ ಘಾಟ್ಕೋಪರ್‌ನ ರಮಾಬಾಯಿ ಅಂಬೇಡ್ಕರ್ ನಗರದ ಬಳಿ ಇಬ್ಬರು ಜೈನ ಸಾಧ್ವಿಗಳು (ಜೈನ ಮಹಿಳಾ ಸನ್ಯಾಸಿನಿಗಳು) ಸಂಕಷ್ಟದ ಸ್ಥಿತಿಯಲ್ಲಿರುವುದನ್ನು ಗಮನಿಸಿದ್ದಾರೆ. ತಕ್ಷಣವೇ ಅವರು ತಮ್ಮ ವಾಹನಗಳನ್ನು ನಿಲ್ಲಿಸಲು ಹೇಳಿ ವಾಹನದಿಂದ ಇಳಿದು ಇಬ್ಬರು ಜೈನ ಮಹಿಳಾ ಸನ್ಯಾಸಿಗಳಿಗೆ ಸಹಾಯ ಮಾಡಲು ಬಂದಿದ್ದಾರೆ.

Video | Maharashtra CM Eknath Shinde while traveling to Vidhan a bhavan from Thane this morning spotted 2 Jain Sadvis injured in an accident near Ramabai Colony on Eastern Express Highway. He enquired about their health & arranged ambulance for them. pic.twitter.com/NXIUGh2TFq

— MUMBAI NEWS (@Mumbaikhabar9) July 1, 2024

ಇಬ್ಬರು ಜೈನ ಮಹಿಳಾ ಸನ್ಯಾಸಿಗಳಿಗೆ ಘಾಟ್ಕೋಪರ್‌ನ ರಮಾಬಾಯಿ ಅಂಬೇಡ್ಕರ್ ನಗರದ ಬಳಿ ಅಪಘಾತವಾಗಿದ್ದು, ಅವರನ್ನು ಕಂಡು ಅವರ ಪರಿಸ್ಥಿತಿ ತಿಳಿದ ಸಿಎಂ ತಕ್ಷಣ ಗಾಯಗೊಂಡ ಮಹಿಳಾ ಸನ್ಯಾಸಿಗಳನ್ನು ಆಸ್ಪತ್ರೆಗೆ ಸಾಗಿಸಲು ತಮ್ಮ ಸೆಕ್ಯೂರಿಟಿ ಗಾರ್ಡ್‌ಗಳಿಗೆ ಆ್ಯಂಬುಲೆನ್ಸ್‌ಗೆ ಮಾಹಿತಿ ನೀಡುವಂತೆ ಸೂಚಿಸಿದ್ದಾರೆ. ಈ ವಿಡಿಯೊವನ್ನು ಸಿಎಂ ಏಕನಾಥ್ ಶಿಂಧೆ ಅವರ ಅಧಿಕೃತ ಹ್ಯಾಂಡಲ್ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ನಲ್ಲಿ ಹಂಚಿಕೊಳ್ಳಲಾಗಿದೆ. ಇದು ವೈರಲ್ ಆಗಿದೆ. ಸಿಎಂ ಮಹಾನ್ ಕಾರ್ಯಕ್ಕೆ ಜನರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಮೆಟ್ಟಿಲುಗಳ ಮೇಲೆ ಬೈಕ್‌ ಸವಾರಿ; ರೋಚಕ ವಿಡಿಯೊ ವೈರಲ್‌

ಮಹಾರಾಷ್ಟ್ರ ಮುಖ್ಯಮಂತ್ರಿ ಏಕನಾಥ್ ಶಿಂಧೆ ಅವರು ಸಂಕಷ್ಟದಲ್ಲಿರುವ ಪ್ರಯಾಣಿಕರಿಗೆ ಸಹಾಯ ಮಾಡಲು ಮುಂದಾಗಿರುವುದು ಇದೇ ಮೊದಲಲ್ಲ. ಈ ಹಿಂದೆ ಮುಂಬೈ ಮತ್ತು ಥಾಣೆಯಲ್ಲಿ ಲೋಕಸಭಾ ಚುನಾವಣೆಯ ಮಧ್ಯೆ, ಆಟೋ ರಿಕ್ಷಾ ಅಪಘಾತಕ್ಕೀಡಾದ ಮಹಿಳೆಗೆ ಸಿಎಂ ಶಿಂಧೆ ಸಹಾಯ ಮಾಡುತ್ತಿರುವ ವಿಡಿಯೊ ವೈರಲ್ ಆಗಿತ್ತು.

#WATCH | Thane: Maharashtra CM Eknath Shinde helped a woman who got injured in an auto rickshaw accident in the Kalva area of Thane during his visits to different polling booths.

(Video Source: Shiv Sena) pic.twitter.com/5OxcWq8oJB

— ANI (@ANI) May 20, 2024

ಮಹಾರಾಷ್ಟ್ರ ಸಿಎಂ ತಮ್ಮ ಕಾರಿನಿಂದ ಇಳಿದು, ಮಹಿಳೆಗೆ ಮತ್ತೊಂದು ವಾಹನದಲ್ಲಿ ಆಸ್ಪತ್ರೆಗೆ ಹೋಗಲು ಸಹಾಯ ಮಾಡಿದ್ದರು ಮತ್ತು ಅವಳ ಗಾಯಗಳಿಗೆ ಚಿಕಿತ್ಸೆ ನೀಡುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದರು.

ಮಹಾರಾಷ್ಟ್ರದ ಲೋನವಾಲದ ಬುಶಿ ಅಣೆಕಟ್ಟಿನ ಬಳಿ ಮಳೆಗಾಲದ ಪ್ರವಾಹದಲ್ಲಿ (Rainy Season Tourism) ಕೊಚ್ಚಿಹೋದ ಕುಟುಂಬದ ಮನಮಿಡಿಯುವ ದೃಶ್ಯಗಳು ವೈರಲ್‌ ಆಗುವ ಮೂಲಕ, ಇದೀಗ ಮಳೆಗಾಲದಲ್ಲಿ ಪ್ರವಾಸದ ಸಂದರ್ಭ ನಾವು ವಹಿಸಬೇಕಾದ ಎಚ್ಚರಿಕೆಯ ಕರೆಗಂಟೆಯಾಗಿದೆ. ಪ್ರತಿ ಮಳೆಗಾಲದಲ್ಲೂ ಇಂತಹ ಒಂದಿಲ್ಲೊಂದು ಪ್ರಕರಣಗಳು, ಪದೇ ಪದೇ, ಪ್ರಕೃತಿಯ ಶಕ್ತಿಯ ಮುಂದೆ ನಾವು ಎಂದಿಗೂ ಹುಲು ಮಾನವರೇ ಎಂಬ ಸತ್ಯವನ್ನು ನಮಗೆ ನೆನಪಿಸುತ್ತಲೇ ಇರುತ್ತವೆ. ಮಳೆಗಾಲ ಎಂತಹ ಕಲ್ಲು ಹೃದಯಿಯನ್ನೂ ಕರಗಿಸುತ್ತದೆ. ಎಂತಹ ಅರಸಿಕನಲ್ಲೂ ರಸಿಕತೆಯನ್ನು ಚಿಗುರಿಸುತ್ತದೆ. ಮಳೆಯಲ್ಲಿ ಪ್ರಕೃತಿಯ ಸೊಬಗಿಗೆ ಮಾರು ಹೋಗದವರಾರಿಲ್ಲ ಹೇಳಿ! ಇನ್ನು ಪ್ರವಾಸ ಪ್ರಿಯರ ಮಾತೇಕೆ? ಪ್ರವಾಸವನ್ನು ಇಷ್ಟಪಡುವವರು ಮಳೆಗಾಲದಲ್ಲೊಮ್ಮೆ ಪ್ರಕೃತಿಯಲ್ಲಿ ಆಂದವಾಗಿ ಕಾಲ ಕಳೆಯಲು, ಮಳೆನೀರಲ್ಲಿ ಮನಸೋ ಇಚ್ಛೆ ಮೀಯಲು, ಮಳೆಯ ಸೊಬಗನ್ನು ಕಣ್ತುಂಬಿಕೊಳ್ಳಲು ಸದಾ ತುದಿಗಾಲಲ್ಲಿ ನಿಂತಿರುತ್ತಾರೆ. ಆದರೆ, ಈ ಪ್ರಕೃತಿಯ ಹಸಿರ ಸೆರಗಿನಲ್ಲಿ ಕಳೆದುಹೋಗುವ ಮುನ್ನ ಮೈಮರೆಯಬಾರದು ಎಂಬ ಎಚ್ಚರಿಕೆ ಸದಾ ನಮಗೆ ಇರಬೇಕು. ಕಾರಣ, ಮಳೆ ಭೋರ್ಗರೆದು ಸುರಿದರೆ, ಪ್ರವಾಹ, ನೆರೆ, ಭೂಕುಸಿತ ಇತ್ಯಾದಿ ಅವಘಡಗಳು ಸರ್ವೇಸಾಮಾನ್ಯ. ಕೊಂಚ ಎಡವಿದರೂ ಪ್ರಾಣಕ್ಕೇ ಕುತ್ತು. ಬನ್ನಿ, ಮಳೆಗಾಲದಲ್ಲಿ ಪ್ರವಾಸ ಮಾಡುವ ಮುನ್ನ ಈ ಎಚ್ಚರಿಕೆಯನ್ನು ಸದಾ ನೀವು ವಹಿಸಿ. ಮರೆಯದಿರಿ.

ಹವಾಮಾನ ಚೆಕ್‌ ಮಾಡಿಕೊಳ್ಳಿ

ಮಳೆಗಾಲದ ಪ್ರವಾಸ ಖುಷಿ ಕೊಡುತ್ತದೆ ನಿಜ. ಆದರೆ, ನೀವು ಪ್ರವಾಸ ಮಾಡುವ ಮೊದಲು ನೀವು ಹೋಗುವ ಜಾಗದ ಸುತ್ತಮುತ್ತಲ ಹವಾಮಾನ ಹೇಗಿದೆ ಎಂದು ಚೆಕ್‌ ಮಾಡಿಕೊಳ್ಳಿ. ಈಗೆಲ್ಲ ಮುಂಚಿತವಾಗಿ ಹವಾಮಾನ ಚೆಕ್‌ ಮಾಡಿಕೊಳ್ಳುವುದು ಕಷ್ಟವೇನಲ್ಲ. ಬೆರಳ ತುದಿಗೇ ಎಲ್ಲ ಮಾಹಿತಿಗಳನ್ನೂ ನೀವು ನಿಮ್ಮ ಫೋನ್‌ ಮೂಲಕವೇ ಪಡೆಯಬಹುದು. ಹೋಗುವ ಜಾಗದ ಬಗೆಗಿನ ವರ್ತಮಾನದ ಮಾಹಿತಿ ತಿಳಿದಿರುವುದೂ ಕೂಡಾ ಅತ್ಯಂತ ಮುಖ್ಯ. ಅತಿಯಾದ ಮಳೆ ಸಂಭವ ಇದ್ದರೆ ಹೊರಡಲೇಬೇಡಿ. ಮನೆಯಲ್ಲೇ ಸೇಫ್‌ ಆಗಿರಿ.

ಸೂಕ್ತ ಬಟ್ಟೆ ಹಾಗೂ ಶೂ ಜೊತೆಗಿರಲಿ

ಮಳೆಗಾಲದ ಪ್ರವಾಸಕ್ಕೆ ಯಾವಾಗಲೂ ಸೂಕ್ತ ಬಟ್ಟೆ ಹಾಗೂ ಶೂ ನಿಮ್ಮ ಜೊತೆಗಿರಲಿ. ಸರಿಯಾದ ಶೂ ಇಲ್ಲದಿದ್ದರೆ ಜಾರುವ ಸಂಭವ ಹೆಚ್ಚು. ಬೇಗನೆ ಒಣಗಬಹುದಾದ ಬಟ್ಟೆ, ರೇನ್‌ಕೋಟ್‌ ಇತ್ಯಾದಿಗಳಿರಲಿ.

ಸೂಚನಾ ಫಲಕ ಗಮನಿಸಿ

ಪ್ರವಾಸಕ್ಕೆ ಹೋದ ಜಾಗದಲ್ಲಿ ಸೂಚನಾ ಫಲಕ, ಸೆಕ್ಯೂರಿಟಿಯವರು, ಪೊಲೀಸ್‌ ಹಾಗೂ ಸ್ಥಳೀಯರು ನೀಡುವ ಎಚ್ಚರಿಕೆಯನ್ನು ಪಾಲನೆ ಮಾಡಿ. ಅವರ ಎಚ್ಚರಿಕೆಯ ಮಾತುಗಳಿಗೆ ಗೌರವ ಕೊಡಿ.

ಬಂಡೆ ಹತ್ತುವಾಗ ಎಚ್ಚರ

ಹರಿಯುತ್ತಿರುವ ಹೊಳೆ, ತೊರೆ, ನದಿ, ಜಲಪಾತ ಇತ್ಯಾದಿಗಳಲ್ಲಿ ಮಳೆಗಾಲದಲ್ಲಿ ಇಳಿಯುವುದು, ಫೋಟೋಗಾಗಿ ನೀರಲ್ಲೇ ನಿಂತು ಪೋಸ್‌ ಕೊಡುವುದು, ಜಾರುವ ಬಂಡೆಗಳ ಮೇಲೆ ಹತ್ತಿ ಫೋಟೋ ತೆಗೆಯುವುದು ಹಾಗೂ ತೆಗೆಸಿಕೊಳ್ಳುವುದು, ಈಜುವ ವಿಡಿಯೋ, ರೀಲ್‌ ಮಾಡುವುದು, ಡೈವ್‌ ಮಾಡುವುದು ಇತ್ಯಾದಿಗಳನ್ನು ಮಾಡಬೇಡಿ. ಮಳೆಗಾಲದಲ್ಲಿ ಇವೆಲ್ಲ ಖಂಡಿತವಾಗಿಯೂ ಸೇಫ್‌ ಅಲ್ಲ.

ಚಾರಣ ಮಾಡುವಾಗ ಎಚ್ಚರ ವಹಿಸಿ

ಮಳೆಗಾಲದಲ್ಲಿ ಚಾರಣ ಮಾಡುತ್ತಿದ್ದರೂ ಎಚ್ಚರ ವಹಿಸಿ. ಹವಾಮಾನ ಪರೀಕ್ಷೆ ಮಾಡಿಕೊಳ್ಳಿ. ಮಳೆಯಿದ್ದರೆ, ಸೂಕ್ತ ಸಾಧನ ಸಲಕರಣೆಗಳು ನಿಮ್ಮ ಬಳಿ ಇರಲಿ. ಗೈಡ್‌ ಹೇಳಿದ ನಿಯಮಗಳನ್ನು ಪಾಲಿಸಿ. ಭೂಕುಸಿತ, ನೆರೆ ಇತ್ಯಾದಿಗಳ ಮುನ್ಸೂಚನೆಯಿದ್ದರೆ ಅಂತಹ ಸಂದರ್ಭ ಸುರಕ್ಷಿತ ಜಾಗಕ್ಕೆ ತೆರಳಿ. ಪರ್ವತ ಪ್ರದೇಶದಲ್ಲಿ ಕೆಲವೊಮ್ಮೆ ಯಾವ ಸುಳಿವೂ ಇಲ್ಲದೆ ಥಟ್ಟನೆ ಏನು ಬೇಕಾದರೂ ಸಂಭವಿಸಬಹುದು. ಅನವಶ್ಯಕ ಪರಿಸ್ಥಿತಿಗಳನ್ನು ನೀವೇ ಸೃಷ್ಟಿಸಬೇಡಿ.

ಸುರಕ್ಷಿತ ಜಾಗಕ್ಕೆ ತೆರಳಿ

ಜಲಪಾತಗಳು, ನದಿ ತೊರೆಯ ಸಮೀಪ ಹೋಗಿದ್ದರೆ, ಮಳೆ ಬರಲು ಆರಂಭವಾದರೆ, ಬರುವ ಸೂಚನೆಯಿದ್ದರೆ, ಅಲ್ಲೇ ನಿಂತಿರಬೇಡಿ. ಸುರಕ್ಷಿತ ಜಾಗಕ್ಕೆ ತೆರಳಿ. ನೀವು ನಿಂತ ಜಾಗದಲ್ಲಿ ಆಗಷ್ಟೇ ಮಳೆ ಬರಲು ಆರಂಭವಾದರೂ ಕೂಡಾ, ನದಿಯ ಹರಿವಿರುವ ಬೇರೆ ಜಾಗದಲ್ಲಿ ಅಗಾಧ ಮಳೆಯಾಗಿರಬಹುದು. ಒಡನೆಯೇ ನೆರೆ ಉಕ್ಕಿ ಹರಿದು ಬರಬಹುದು. ಮಿಂಚಿನ ವೇಗದಲ್ಲಿ ಇವು ಸಂಭವಿಸಬಹುದು. ಹಾಗಾಗಿ ಜಾಗರೂಕರಾಗಿ ಇರುವುದು ಅತ್ಯಂತ ಮುಖ್ಯ. ಫ್ಲ್ಯಾಶ್‌ ಫ್ಲಡ್‌ ಯಾವಾಗಲೂ ಮಿಂಚಿನ ವೇಗದಲ್ಲಿ ಸಂಭವಿಸುತ್ತದೆ.

ಈಜಲು ಹೋಗಬೇಡಿ

ಮಳೆಗಾಲದಲ್ಲಿ ತೆರೆದ ನದಿ, ತೊರೆ, ಕೆರೆ, ಹೊಳೆಗಳಲ್ಲಿ ಈಜುವ ಸಾಹಸಕ್ಕೆ ಕೈ ಹಾಕಲೇಬೇಡಿ. ನಿಮಗೆಷ್ಟೇ ಈಜು ಗೊತ್ತಿದೆ ಎಂಬ ಧೈರ್ಯವಿದ್ದರೂ, ಮಳೆಗಾಲದಲ್ಲಿ ಇಂತ ನೀರಿನಲ್ಲಿ, ಶಕ್ತಿಯುತವಾದ ಸೆಳೆತ ಇರುವ ಸಂಭವವಿದ್ದು, ನಿಮ್ಮ ಯಾವ ನೈಪುಣ್ಯವೂ ಅದರ ಜೊತೆ ಸೋಲಬಹುದು. ಪ್ರಕೃತಿಗೆ ಸವಾಲೆಸೆಯುವುದು, ಅತಿಯಾದ ಆತ್ಮವಿಶ್ವಾಸ ಒಳ್ಳೆಯದಲ್ಲ. ಸಮುದ್ರ ತೀರದ ವಿಚಾರದಲ್ಲಿಯೂ ಇದೇ ಮಾತನ್ನು ನೆನಪಿಡಿ.

ಅನುಭವಿಗಳ ಸಲಹೆ ಅಗತ್ಯ

ಮಳೆಗಾಲದಲ್ಲಿ, ನಮಗೆ ಈ ಜಾಗ ಗೊತ್ತಿದೆ ಎಂಬ ಭಂಡಧೈರ್ಯದಿಂದ ಯಾರೂ ಅಷ್ಟಾಗಿ ಹೋಗದ, ಕಾಡಿನ ನಡುವಿನ ಜಲಪಾತಕ್ಕೆ ಚಾರಣ ಹೋಗುವುದು, ಬೆಟ್ಟ ಹತ್ತುವುದು ಮಾಡಬೇಡಿ. ಅನುಭವಿಗಳ ಸಲಹೆ ಅತ್ಯಂತ ಅಗತ್ಯ. ದಾರಿ ಗೊತ್ತಿದೆ ಎಂದು ನಿಮ್ಮಷ್ಟಕ್ಕೆ ಈ ಸಾಹಸಕ್ಕೆ ಇಳಿಯಬೇಡಿ. ಮಳೆಗಾಲದಲ್ಲಿ ಏನು ಬೇಕಾದರೂ ಸಂಭವಿಸಬಹುದು.

ಹುಚ್ಚು ಸಾಹಸ ಮಾಡಬೇಡಿ

ಯುವಕರು ದಯವಿಟ್ಟು ಬಿಸಿರಕ್ತದ ಉತ್ಸಾಹದಲ್ಲಿ ಹುಚ್ಚು ಸಾಹಸ ಮಾಡಬೇಡಿ. ಮನೆಯವರ ಮಾತಿಗೆ ಬೆಲೆಕೊಡಿ. ಇಂತಹ ಪ್ರವಾಸಗಳಿಗೆ ಮನೆಯವರಿಗೆ ತಿಳಿಸದೆ ಗೆಳೆಯರ ಜೊತೆಗೆ ಹೋಗುವುದು, ಹುಚ್ಚುಗಟ್ಟುವುದು ಇತ್ಯಾದಿಗಳನ್ನು ಮಾಡಬೇಡಿ. ನಿಮ್ಮನ್ನು ಬೆಟ್ಟದಷ್ಟು ಪ್ರೀತಿಸುವ ಹೆತ್ತವರಿದ್ದಾರೆ, ಅವರಿಗೆ ನಿಮ್ಮ ಭವಿಷ್ಯದ ಬಗ್ಗೆ ಕನಸು ಕಂಗಳಿವೆ, ಅದರ ಹಿಂದೆ ಅವರ ಅಪಾರ ಶ್ರಮವೂ ಇದೆ ಎಂಬುದನನ್ನು ಸದಾ ನೆನೆಪಿಡಿ.

ಇದನ್ನೂ ಓದಿ: Travel Tips: ಪ್ರವಾಸಪ್ರಿಯರೇ, ನಿಮ್ಮ ವಿಮಾನ ಪ್ರಯಾಣ ಆರಾಮದಾಯಕವಾಗಬೇಕಿದ್ದರೆ ಈ ಟಿಪ್ಸ್‌‌ ಪಾಲಿಸಿ!

ತುರ್ತು ಕರೆಯ ಫೋನ್‌ ನಂಬರ್‌ ಗೊತ್ತಿರಲಿ

ಸದಾ ಸ್ಥಳೀಯ ತುರ್ತು ಕರೆಯ ಫೋನ್‌ ನಂಬರ್‌ ನಿಮಗೆ ಗೊತ್ತಿರಲಿ. ಯಾವುದೇ ಸಮಸ್ಯೆ ಬಂದಾಗಲೂ ತುರ್ತುಕರೆಯ ಮೊರೆ ಹೋಗಿ. ನಿಮ್ಮಷ್ಟಕ್ಕೆ ಏನೇನೋ ಊಹನೆಯಲ್ಲಿ ಕಷ್ಟದಲ್ಲಿರುವಾಗ ತಪ್ಪು ಹಾದಿ ಹಿಡಿದು ನಿಮ್ಮ ಪ್ರಾಣವನ್ನು ಅಪಾಯಕ್ಕೆ ಒಡ್ಡಿಕೊಳ್ಳಬೇಡಿ.

ಸಾಮಾನ್ಯವಾಗಿ ಮಹಿಳೆಯರು ತನ್ನ ಗಂಡ ಇನ್ನೊಬ್ಬ ಮಹಿಳೆಯನ್ನು ನೋಡಿದರೆ ಸಾಕು ಕೆಂಡಮಂಡಲರಾಗುತ್ತಾರೆ. ಅಂತಹದರಲ್ಲಿ ಇಲ್ಲೊಬ್ಬ ವ್ಯಕ್ತಿ ಈಗಾಗಲೇ ಎರಡು ಮದುವೆಯಾಗಿದ್ದರೂ ಕೂಡ ಮೂರನೇ ಬಾರಿಗೆ ಮದುವೆಯಾಗಲು ಆತನ ಪತ್ನಿಯರು ಒಪ್ಪಿಗೆ ನೀಡಿದ್ದಾರಂತೆ. ಹಾಗಾಗಿ ಆತನ ಮದುವೆ ಆಮಂತ್ರಣ ಪತ್ರಿಕೆ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ (Viral News ) ಆಗಿದೆ.

ವ್ಯಕ್ತಿಯ ಹೆಸರು ಪಂಡನಾ ಎಂಬುದಾಗಿ ತಿಳಿದುಬಂದಿದೆ. ಮೊದಲ ಪತ್ನಿ ಪಾರ್ವತಮ್ಮ ಗರ್ಭಧರಿಸಲು ಸಾಧ್ಯವಾಗದಿದ್ದಾಗ ಪಂಡನಾ ಎರಡನೇ ಬಾರಿಗೆ ವಿವಾಹವಾಗಿದ್ದಾನೆ. 2007ರಲ್ಲಿ, ಎರಡನೇ ಪತ್ನಿ ಅಪ್ಪಲಮ್ಮನಿಂದ ಮಗು ಪಡೆದ ಬಳಿಕ ಮತ್ತೊಂದು ಮಗು ಪಡೆಯುವ ಆಸೆ ಆಗಿದೆ. ಗಂಡನ ಆಸೆಗೆ ಹೆಂಡತಿಯರಿಬ್ಬರೂ ಒಪ್ಪಿ ಮತ್ತೊಂದು ಮದುವೆಯಾಗಲು ಹೇಳಿದ್ದಾರೆ. ಹಾಗಾಗಿ ಆತ ಜೂನ್ 25, 2024ರಂದು ಅಲ್ಲೂರಿ ಸೀತಾರಾಮರಾಜು ಜಿಲ್ಲೆಯ ಪೆಡಬಯಾಲು ಮಂಡಲದಲ್ಲಿ ಲವ್ಯ ಎಂಬಾಕೆಯನ್ನು ವಿವಾಹವಾಗಿದ್ದಾನೆ.

ಕೆಲವು ಬುಡಕಟ್ಟು ಜನಾಂಗಗಳಲ್ಲಿ ಎರಡು ಬಾರಿ ಮದುವೆಯಾಗುವುದು ಸಾಮಾನ್ಯವಾಗಿದೆ. ಆದರೆ ಮೂರನೇ ಮದುವೆ ಅಪರೂಪ ಎಂದು ಅಲ್ಲಿನ ಸ್ಥಳೀಯರು ತಿಳಿಸಿದ್ದಾರೆ. ಮದುವೆಯ ಆಮಂತ್ರಣ ಪತ್ರಿಕೆ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಜನರ ಗಮನ ಸೆಳೆದಿದೆ. ಇದಕ್ಕೆ ಅನೇಕರು ಕಾಮೆಂಟ್ ಮಾಡಿದ್ದು, ಮತ್ತೊಂದು ಮಗುವನ್ನು ಬಯಸಿದರೆ, ನಾಲ್ಕನೇ ಬಾರಿಗೆ ಮದುವೆಯಾಗುತ್ತಾನಾ ಎಂದು ಹಲವರು ಪ್ರಶ್ನಿಸಿದ್ದಾರೆ.

ಇದನ್ನೂ ಓದಿ:  ಮೆಟ್ಟಿಲುಗಳ ಮೇಲೆ ಬೈಕ್‌ ಸವಾರಿ; ರೋಚಕ ವಿಡಿಯೊ ವೈರಲ್‌

ಈ ಹಿಂದೆ ಯೂಟ್ಯೂಬರ್ ಅರ್ಮಾನ್ ಮಲಿಕ್ ಕೂಡ ಎರಡು ಬಾರಿ ಮದುವೆಯಾಗಿದ್ದರು. ಇವರು ತನ್ನ ಇಬ್ಬರು ಹೆಂಡತಿಯರೊಂದಿಗೆ ಒಟ್ಟಿಗೆ ವಾಸಿಸುತ್ತಿದ್ದಾರೆ. ಪಾಯಲ್ ಅವರನ್ನು ಪ್ರೀತಿಸಿದ ಮಲಿಕ್ ಅವರನ್ನು ವಿವಾಹವಾದರು. ಅವರಿಗೆ ಮೂವರು ಮಕ್ಕಳಿದ್ದಾರೆ, ಇಬ್ಬರು ಗಂಡು ಮಕ್ಕಳು ಮತ್ತು ಒಬ್ಬ ಮಗಳು. ನಂತರ, ಅವರ ಹಿರಿಯ ಮಗನ ಹುಟ್ಟುಹಬ್ಬದ ಸಮಾರಂಭಕ್ಕೆ ಆಗಮಿಸಿದ ಪಾಯಲ್ ಅವರ ಸ್ನೇಹಿತೆ ಕೃತಿಕಾ ಅವರನ್ನು ಪ್ರೀತಿಸಿ ವಿವಾಹವಾದರು. ಅವರಿಗೆ ಒಬ್ಬ ಮಗ ಇದ್ದಾನೆ. ಬಹುಪತ್ನಿತ್ವವನ್ನು ಉತ್ತೇಜಿಸಿದ್ದಕ್ಕಾಗಿ ಅವರ ಬಗ್ಗೆ ಸೋಶಿಯಲ್ ಮೀಡಿಯಾದಲ್ಲಿ ಹಲವು ಟೀಕೆಗಳು ಕೇಳಿಬಂದಿದ್ದವು. ಅಲ್ಲದೇ ಇತ್ತೀಚೆಗೆ, ಅರ್ಮಾನ್ ಮಲಿಕ್ ತನ್ನ ಇಬ್ಬರು ಹೆಂಡತಿಯರೊಂದಿಗೆ ಬಿಗ್‌ಬಾಸ್ ಒಟಿಟಿ 3 ಮನೆಗೆ ಪ್ರವೇಶಿಸಿ ಸುದ್ದಿ ಮಾಡಿದ್ದರು.

ಹಾಸನ: ಮದುವೆ ಮನೆಗೆ ನುಗ್ಗಿದ ಕೋತಿಯೊಂದು ರಂಪಾಟ (Wild Animals Attack) ನಡೆಸಿದೆ. ವರನ ಪಕ್ಕ ಕುಳಿತು ಮದುವೆಗೆ ಅಡ್ಡಿಪಡಿಸಿದ್ದಲ್ಲದೇ, ಊಟ ಮಾಡಲು ಹೋದವರಿಗೂ ತೊಂದರೆ ಕೊಟ್ಟಿದೆ. ಇಷ್ಟು ಮಾತ್ರವಲ್ಲದೇ ಮದುವೆಗೆ ಬಂದವರಿಗೆ ಮಂಗ (Monkey Attack) ಕಚ್ಚಿದೆ. ಹಾಸನ ಜಿಲ್ಲೆಯ ಚನ್ನರಾಯಪಟ್ಟಣ ತಾಲೂಕಿನ ಹಿರಿಸಾವೆಯಲ್ಲಿ ಘಟನೆ ನಡೆದಿದೆ.

ಹಿರಿಸಾವೆಯ ನುಗ್ಗೆಹಳ್ಳಿ ರಸ್ತೆಯಲ್ಲಿ ನಡೆಯುತ್ತಿದ್ದ ಮದುವೆಗೆ ಕರೆಯದೇ ಬಂದ ಕೋತಿ ಕಾಟಕ್ಕೆ ಜನರು ಹೈರಣಾದರು. ಡೈನಿಂಗ್ ಹಾಲ್‌ನಲ್ಲಿ ಊಟ ಮಾಡುತ್ತಿದ್ದವರಿಗೂ ಕಿರಿಕಿರಿ ಮಾಡಿ, ಊಟ ಕಸಿದುಕೊಂಡಿದೆ. 8-10 ಮಂದಿ ಮೇಲೆ ದಾಳಿ ಮಾಡಿ ಕಚ್ಚಿದೆ. ಸುಶೀಲಮ್ಮ, ಲೀಲಾವತಿ, ನಿಂಗೇಗೌಡ, ಗೌರಮ್ಮ, ಗಿರಿಜಮ್ಮ , ತಿಮ್ಮೇಗೌಡ, ಗಿರಿಗೌಡ ಎಂಬುವವರಿಗೆ ಕೋತಿ ಕಚ್ಚಿದ್ದು, ಗಾಯಾಳುಗಳಿಗೆ ಸ್ಥಳೀಯ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಚಿಕಿತ್ಸೆ ಪಡೆದಿದ್ದಾರೆ. ಸುತ್ತಮುತ್ತಲಿನ ಹಳ್ಳಿಯಲ್ಲಿ ಓಡಾಡುತ್ತಿರುವ ಕೋತಿ ಹಿಡಿದು ಸ್ಥಳಾಂತರ ಮಾಡಲು ಆಗ್ರಹಿಸಿದ್ದಾರೆ.

ಇದನ್ನೂ ಓದಿ: Leopard attack : ರಸ್ತೆ ಮೇಲೆ ಸತ್ತಂತೆ ಬಿದ್ದಿದ್ದ ಚಿರತೆ; ಮುಟ್ಟಲು ಹೋದ ಬೈಕ್‌ ಸವಾರ, ಕ್ಯಾಬ್‌ ಚಾಲಕನ ಮೇಲೆ ದಾಳಿ

ವಿಜಯನಗರದ ಎಪಿಎಂಸಿ ಆವರಣಕ್ಕೆ ಎಂಟ್ರಿ ಕೊಟ್ಟ ಕರಡಿ

ಇತ್ತೀಚೆಗೆ ಕರಡಿಗಳ ಹಾವಳಿ ಹೆಚ್ಚಾಗಿದೆ. ವಿಜಯನಗರದ ಹಗರಿಬೊಮ್ಮನ ಹಳ್ಳಿಯಲ್ಲಿರುವ ಎಪಿಎಂಸಿ (APMC) ಆವರಣದಲ್ಲಿ ಕರಡಿಯೊಂದು ಪತ್ತೆಯಾಗಿದೆ. ಮಂಗಳವಾರ ಬೆಳಗಿನ ಜಾವ ಕರಡಿ ಓಡಾಟ ಕಂಡು ರೈತರು ಹೌಹಾರಿದ್ದಾರೆ. ಕರಡಿ ಓಡಾಟವು ಸಿಸಿ ಟಿವಿಯಲ್ಲಿ ಸೆರೆಯಾಗಿದೆ. ಈ ಹಿಂದೆಯೂ ನಾನಾ ಕಡೆ ಕರಡಿ ಪ್ರತ್ಯಕ್ಷವಾಗಿತ್ತು.

ಕೊಡಗಿನಲ್ಲಿ ಆಟೋ ಜಖಂ ಮಾಡಿದ ಕಾಡಾನೆ

ಕೊಡಗಿನಲ್ಲಿ ಆನೆ -ಮಾನವ ಸಂಘರ್ಷ ಮುಂದುವರಿದಿದೆ. ಮನೆ ಸಮೀಪ ನಿಲ್ಲಿಸಿದ್ದ ಆಟೋ ಮೇಲೆ ಕಾಡಾನೆ ದಾಳಿ ಮಾಡಿದೆ. ನಾಪೋಕ್ಲು ಸಮೀಪದ ಕಕ್ಕಬ್ಬೆಯ ಗ್ರಾಮದ ನಾಲಡಿ ವಾಟೆಕಾಡು ಎಂಬಲ್ಲಿ ಘಟನೆ ನಡೆದಿದೆ. ವಾಟೆಕಾಡು ನಿವಾಸಿ ದೇವಯ್ಯ ಎಂಬುವರ ಆಟೋವನ್ನು ಜಖಂಗೊಳಿಸಿ, ಸಮೀಪದ ತೋಟದಲ್ಲೂ ದಾಂಧಲೆ ನಡೆಸಿ ಕಾಲ್ಕಿತ್ತಿದೆ. ಆನೆ ಹಾವಳಿಯಿಂದ ಮುಕ್ತಿ ನೀಡುವಂತೆ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.

ಕೊಪ್ಪಳದಲ್ಲಿ ನಿಲ್ಲದ ಕರಡಿ ಆತಂಕ

ಕಳೆದ ಒಂದು ವಾರದಿಂದ ಕೊಪ್ಪಳ ಸುತ್ತಮುತ್ತ ಕರಡಿ ಪ್ರತ್ಯಕ್ಷಗೊಳ್ಳುತ್ತಿದೆ. ಇದೀಗ ಬಸ್‌ನಲ್ಲಿ ಹೋಗುತ್ತಿರುವವರಿಗೆ ಕರಡಿಯೊಂದು ದರ್ಶನ ಕೊಟ್ಟಿದೆ. ಕೊಪ್ಪಳ ಜಿಲ್ಲೆಯ ಯಲಬುರ್ಗಾ ತಾಲೂಕಿನ ಹಿರೇವಂಕಲಕುಂಟಿ – ಮಾಟಲದಿನ್ನಿ ಮಧ್ಯೆ ಕರಡಿ ಕಾಣಿಸಿಕೊಂಡಿದೆ. ಮಂಗಳವಾರ ಮುಂಜಾನೆ ಬಸ್‌ವೊಂದಕ್ಕೆ ಕರಡಿಯು ಅಡ್ಡಬಂದಿದೆ. ಇದನ್ನೂ ಪ್ರಯಾಣಿಕರು ತಮ್ಮ ಮೊಬೈಲ್‌ನಲ್ಲಿ ಸೆರೆಹಿಡಿದಿದ್ದಾರೆ.

ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ