ಆನೇಕಲ್: ಸೂರ್ಯಗ್ರಹಣ (Solar Eclipse 2022) ಸಂದರ್ಭದಲ್ಲಿ ಪೂಜೆ-ಪುನಸ್ಕಾರ, ಹೋಮ-ಹವನಗಳು ನಡೆಯುತ್ತಿದ್ದರೆ, ಇತ್ತ ಸೂರ್ಯಗ್ರಹಣದ ಸಂದರ್ಭದಲ್ಲಿ ಮಾಡುವ ಆಚರಣೆಗಳು ಮೂಢನಂಬಿಕೆ ಎಂದು ವಿರೋಧಿಸಿದ ಸಾಹಿತಿಗಳು ವಿನೂತನ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದರು.

“ವಿಜ್ಞಾನದ ಕಡೆಗೆ ನಮ್ಮ ನಡಿಗೆ” ಎಂದು ಘೋಷವಾಕ್ಯದೊಂದಿಗೆ ಆನೇಕಲ್ ತಾಲೂಕಿನ ಬಂಡಾಪುರದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸಾಹಿತಿಗಳು, ಹೋರಾಟಗಾರರು ಭಾಗಿಯಾಗಿದ್ದರು.

ಆನೇಕಲ್ ಮೌಢ್ಯ ವಿರೋಧಿ ವೇದಿಕೆಯಿಂದ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ಸೂರ್ಯಗ್ರಹಣದ ವೇಳೆಯೇ ಹಣ್ಣು, ಮೊಟ್ಟೆ, ಮಾಂಸ ಹಾಗೂ ವಿವಿಧ ರೀತಿಯ ಆಹಾರವನ್ನು ಸೇವನೆ ಮಾಡಲಾಯಿತು. ಆ ಮೂಲಕ ಸೂರ್ಯಗ್ರಹಣಕ್ಕೆ ಸ್ವಾಗತ ಕೋರಲಾಯಿತು.

ಮೂಢನಂಬಿಕೆ ಬಿಡಿ ವಿಜ್ಞಾನಕ್ಕೆ ಮಹತ್ವ ಕೊಡಿ‌. ಗ್ರಹಣದ ಬಗ್ಗೆ ಜ್ಯೋತಿಷಿಗಳ ಮಾತು ನಂಬಬೇಡಿ ಎಂದು ಹೇಳಿಕೆ ನೀಡುವ ಮೂಲಕ ಆಹಾರ ಸೇವಿಸಿ ವಿಜ್ಞಾನದ ಮಹತ್ವದ ಕುರಿತು ತಿಳಿಹೇಳಿದರು.

ಇದನ್ನೂ ಓದಿ | Solar Eclipse 2022 | ಗ್ರಹಣ ವೇಳೆ ಒನಕೆ ಪರೀಕ್ಷೆ ಯಶಸ್ವಿ; ಮೋಕ್ಷವಾಗುತ್ತಿದ್ದಂತೆ ನೆಲಕ್ಕುರುಳಿತು!

ಚಿಕ್ಕಮಗಳೂರು: ಸೂರ್ಯ ಗ್ರಹಣ ಜಗತ್ತಿಗೆಲ್ಲ ಒಂದೇ ಎನ್ನುವ ಸಂದೇಶ ರವಾನಿಸುವಂತೆ ಚಿಕ್ಕಮಗಳೂರಿನ ಮಸೀದಿಯೊಂದರಲ್ಲಿ ಕೇತುಗ್ರಸ್ತ ಸೂರ್ಯ ಗ್ರಹಣದ ಸಂದರ್ಭದಲ್ಲಿ ವಿಶೇಷ ಪ್ರಾರ್ಥನೆ ಸಲ್ಲಿಸಲಾಯಿತು.

ಕೊಪ್ಪ ತಾಲೂಕಿನ ಜಯಪುರದ ಬದ್ರಿಯಾ ಮಸೀದಿಯಲ್ಲಿ ಪ್ರಾರ್ಥನೆ ನಮಾಜ್‌ ಮಾಡಲಾಯಿತು ಮತ್ತು ಗ್ರಂಥ ಪಠನದೊಂದಿಗೆ ವಿಶೇಷ ಪ್ರಾರ್ಥನೆ ಸಲ್ಲಿಸಲಾಯಿತು. ಖತೀಬರಾದ ಅಬ್ದುಲ್ ರಶೀದ್ ಅವರು ಪ್ರಾರ್ಥನೆಯ ನೇತೃತ್ವ ವಹಿಸಿದ್ದರು. ಹತ್ತಾರು ಮುಸ್ಲಿಮರು. ವಿಶೇಷ ಪ್ರಾರ್ಥನೆಯಲ್ಲಿ ಪಾಲ್ಗೊಂಡರು.

ಇದನ್ನೂ ಓದಿ | Solar Eclipse 2022 | ಗ್ರಹಣ ವೇಳೆ ಒನಕೆ ಪರೀಕ್ಷೆ ಯಶಸ್ವಿ; ಮೋಕ್ಷವಾಗುತ್ತಿದ್ದಂತೆ ನೆಲಕ್ಕುರುಳಿತು!

ಧಾರವಾಡ/ಶಿವಮೊಗ್ಗ/ಹೊಸಪೇಟೆ: ಒಂದು ಕಡೆ ಗ್ರಹಣವನ್ನು ಧಾರ್ಮಿಕ ಮತ್ತು ಭಕ್ತಿಯ ನೆಲೆಯಲ್ಲಿ ನೋಡಿದರೆ ಇನ್ನು ಕೆಲವರು ಮೌಢ್ಯಾಚರಣೆ ಬೇಡ ಎಂಬ ಬಗ್ಗೆ ಜಾಗೃತಿ ಮೂಡಿಸಿದರು.

ಧಾರವಾಡದ ಕಲಾಭವನದ ಎದುರು ಸಮಾನ ಮನಸ್ಕರ ವೇದಿಕೆ ಸದಸ್ಯರು ಗ್ರಹಣದ ವೇಳೆ ಪಲಾವ್ ಮಾಡಿ ತಿಂದರು. ಶಂಕರ್ ಹಲಗತ್ತಿ ನೇತೃತ್ವದಲ್ಲಿ ಪಲಾವ್ ಸಿದ್ಧಪಡಿಸಿ ಅದನ್ನು ಅಲ್ಲಿದ್ದವರಿಗೆ ಹಂಚಲಾಯಿತು. ಗ್ರಹಣದ ವೇಳೆ ಉಪಹಾರ ಸೇರಿದಂತೆ ಭೋಜನ ನಿಷೇಧದ ಹಿನ್ನೆಲೆಯಲ್ಲಿ ಸಮಾನ ಮನಸ್ಕರರು ಗ್ರಹಣದ ವೇಳೆಯಲ್ಲೇ ಪಲಾವ್ ಸವಿದು ಮೌಢ್ಯ ಆಚರಣೆ ಮಾಡದಂತೆ ಕರೆ ನೀಡಿದರು.

ಶಿವಮೊಗ್ಗದಲ್ಲಿ
ಶಿವಮೊಗ್ಗದಲ್ಲಿ ಮೌಢ್ಯ ತೊರೆದು ಗ್ರಹಣ ವೀಕ್ಷಿಸಲು ವಿಜ್ಞಾನ ಪರಿಷತ್ ಮನವಿ ಮಾಡಿತ್ತು. ಹವ್ಯಾಸಿ ಖಗೋಳ ವೀಕ್ಷಕರಾದ ಹಾರೋನಹಳ್ಳಿ ಸ್ವಾಮಿ ನೇತೃತ್ವದಲ್ಲಿ ಗ್ರಹಣ ವೀಕ್ಷಣೆ ಮಾಡಲಾಯಿತು. ಗ್ರಹಣ ಸಮಯದಲ್ಲಿ ಖಾರ, ಮಂಡಕ್ಕಿ, ಸ್ವೀಟ್ ತಿಂದು ಮೌಢ್ಯ ಬಿಡಲು ಮನವಿ ಮಾಡಲಾಯಿತು.

ಹೊಸಪೇಟೆಯಲ್ಲಿ ಒಗ್ಗರಣೆ ಮಿರ್ಚಿ!
ವಿಜಯ ನಗರ ಜಿಲ್ಲೆಯ ಹೊಸಪೇಟೆಯಲ್ಲಿ ಮಾನವ ಬಂಧುತ್ವ ವೇದಿಕೆ, ಅಂಬೇಡ್ಕರ್ ಸಂಘಟನೆ, ವಿಜ್ಞಾನ ಪರಿಷತ್ ವತಿಯಿಂದ ವಿಚಾರವಾದಿಗಳು ಸೂರ್ಯಗ್ರಹಣದ ಸಮಯದಲ್ಲಿ ಒಗ್ಗರಣೆ- ಮಿರ್ಚಿ ಸವಿದರು.

ನಾನಾ ಪ್ರಗತಿಪರ ಸಂಘಟನೆಗಳ ನಾಯಕರಿಂದ ಜಾಗೃತಿಯ ಮಾತುಗಳು ಕೇಳಿಬಂದವು. ʻʻಮೌಢ್ಯ ಬಿತ್ತುವ ಕೆಲಸ ಮಾಡಲಾಗುತ್ತಿದೆ, ಇದೊಂದು ವೈಜ್ಞಾನಿಕ ವಿಸ್ಮಯ. ಅದನ್ನ ನೋಡಬೇಕು, ಎಲ್ಲರೂ ಆನಂದಿಸಬೇಕು. ಮನುವಾದಿಗಳ ಕುತಂತ್ರದಿಂದ ಮೌಢ್ಯ ಬಿತ್ತಲಾಗುತ್ತಿದೆʼʼ ಎಂದು ಆರೋಪಿಸಲಾಯಿತು.

ದೀಪಾವಳಿಯ ದಿನವಾದ ಮಂಗಳವಾರ ಕೇತುಗ್ರಸ್ತ ಸೂರ್ಯಗ್ರಹಣವು (Solar Eclipse) ಆಕಾಶಕಾಯ ವೀಕ್ಷಕರನ್ನು ಚಕಿತಗೊಳಿಸಿದೆ. ಭಾರತದಲ್ಲಿ ಪೂರ್ಣ ಪ್ರಮಾಣದಲ್ಲಿ ಸೂರ್ಯಗ್ರಹಣ ಗೋಚರಿಸದಿದ್ದರೂ, ದೇಶದ ವಿವಿಧೆಡೆ ಅಲ್ಪ ಮಟ್ಟಿಗೆ ಕಂಡಿದೆ. ಈ ಹಿನ್ನೆಲೆಯಲ್ಲಿ ದೇಶಾದ್ಯಂತ ಪ್ರಮುಖ ದೇವಸ್ಥಾನಗಳಲ್ಲಿ ವಿಶೇಷ ಪೂಜೆಗಳನ್ನು ಏರ್ಪಡಿಸಲಾಗಿತ್ತು. ಭಕ್ತರು ನದಿ ಹಾಗೂ ಸಮುದ್ರ ಸ್ನಾನ ಮಾಡಿ, ಗ್ರಹಣ ಕಾಲದ ಸಮಯವನ್ನು ಕಳೆದರು. ಟರ್ಕಿಯಲ್ಲಿ ಪೂರ್ಣ ಪ್ರಮಾಣದ ಸೂರ್ಯಗ್ರಹಣ ಕಂಡಿದೆ. ನಮ್ಮ ದೇಶದ ವಿವಿಧ ಭಾಗಗಳಲ್ಲಿ ಗೋಚರಿಸಿದ ಸೂರ್ಯ ಗ್ರಹಣದ ಝಲಕ್‌ಗಳು ಇಲ್ಲಿವೆ.

ಇದನ್ನೂ ಓದಿ | Horoscope Today | ಸೂರ್ಯ ಗ್ರಹಣದ ಈ ದಿನ ದ್ವಾದಶ ರಾಶಿಗಳ ಭವಿಷ್ಯ ಹೇಗಿದೆ ನೋಡೋಣ