ತೂಕ ಇಳಿಸಿಕೊಳ್ಳುವುದೇನೂ ಸರಳವಲ್ಲ. ಹಾಗಂತ ಶಿಸ್ತಿನ ಜೀವನಶೈಲಿ, ಆಹಾರ ಪದ್ಧತಿ ಹಾಗೂ ವ್ಯಾಯಾಮದಿಂದ ಆರೋಗ್ಯಕರ ಶೈಲಿಯಲ್ಲಿಯೇ ತೂಕ ಇಳಿಸಿಕೊಳ್ಳಲು ಸಾದ್ಯವಿದೆ. ಆದರೆ ತೂಕ ಇಳಿಸಿಕೊಳ್ಳುವ, ಜಂಕ್‌ನಿಂದ ದೂರವಿರುವ ನಿಶ್ಚಯ ಮಾಡಿಕೊಂಡಮೇಳೆ ಬಹಳ ಜನರನ್ನು ಸೆಳೆಯುವುದು ಸ್ಟ್ರೀಟ್‌ ಫುಡ್‌. ಬೀದಿ ಬದಿಯ ಚಾಟ್‌ಗಳಿಂದ ದೂರವಿರಬೇಕೆಂದರೆ ಅದಕ್ಕೆ ಮನೋಬಲವೂ ಬೇಕು. ಯಾಕೆಂದರೆ ಬೀದಿಬದಿಯ ಚಾಟ್‌ಗಳು, ತಿಂಡಿಗಳು ಇಂದು ಬಹುತೇಕರ ಆಹಾರಸಂಸ್ಕೃತಿಯಲ್ಲಿ ಸೇರಿಹೋಗಿದೆ. ವಾರಕ್ಕೊಮ್ಮೆಯಾದರೂ ಗೋಲ್‌ಗಪ್ಪಾ, ಪಾನಿಪುರಿ, ಮಸಾಲೆಪುರಿಗಳಿಲ್ಲದೆ ಜೀವನ ಹೇಗೆ ಎಂಬ ಯೋಚನೆ ಬಹುತೇಕರಿಗೆ ಬಂದೀತು. ಹಾಗಾದರೆ, ಬಾಯಿಚಪಲಕ್ಕಾದರೂ ಪಾನಿಪುರಿ ತಿನ್ನಬೇಕು ಅನಿಸಿದವರು ಮನೆಯಲ್ಲಿ ಪಾನಿಪುರಿ ಮಾಡಲು ಹೊರಟವರು, ಆದಷ್ಟೂ ಆರೋಗ್ಯಕರ ರೀತಿಯಲ್ಲಿ, ತೂಕ ಇಳಿಸಿಕೊಳ್ಳುವ ಡಯಟ್‌ಗೆ ಸರಿಹೊಂದುವಂತೆ ಹೇಗೆ ಮಾಡಿ ತಿನ್ನಬಹುದೆಂಬ ಸರಳ ಸೂತ್ರಗಳು ಇಲ್ಲಿವೆ. ಈ ತಂತ್ರಗಳನ್ನು ಅನುಸರಿಸಿದರೆ, ನಿಶ್ಚಿಂತೆಯಿಂದ ಆರೋಗ್ಯಕರ ಪಾನಿಪುರಿ ತೂಕ ಹೆಚ್ಚಿಸಿಕೊಳ್ಳುವ ಭಯವಿಲ್ಲದೆ ನಿಮ್ಮ ಹೊಟ್ಟೆ ಸೇರುತ್ತದೆ.

೧. ಪುರಿ ಮನೆಯಲ್ಲೇ ಮಾಡಿ: ರಸ್ತೆಬದಿಯಲ್ಲಿ ದೊರೆಯುವ ಪಾನಿಪುರಿ ರುಚಿಯಾಗಿರುತ್ತದೆ ನಿಜ. ಅದನ್ನೇ ವಾರದಲ್ಲಿ ಎರಡು ಬಾರಿ ಹೊಟ್ಟೆ ತುಂಬಿಸಿದರೆ ಏನಾಗಬಹುದು ಹೇಳಿ! ರಸ್ತೆಬದಿಯ ಪುರಿ ಮಾಡಲು ಯಾವ ಎಣ್ಣೆಯನ್ನು ಬಳಸಿರಬಹುದು ಎಂಬ ಯೋಚನೆ ಬಂದರಂತೂ ಕಥೆ ಮುಗಿಯಿತು. ಅದಕ್ಕಾಗಿಯೇ ಪುರಿಯನ್ನು ಯಾಕೆ ನೀವು ಮನೆಯಲ್ಲೇ ಮಾಡಬಾರದು? ಮನೆಯಲ್ಲಿಯೇ ಎಣ್ಣೆಹಾಕದೆ ಏರ್‌ ಫ್ರೈಯರ್‌ನಲ್ಲೋ ಅಥವಾ ಒಳ್ಳೆ ಎಣ್ಣೆಯಲ್ಲೋ ನೀವೇ ಮಾಡಿದರೆ ಹೊರಗೆ ತಿನ್ನುವ ಪುರಿಗಳಿಗಿಂತ ಒಳ್ಳೆಯದೇ!

೨. ಆಲೂಗಡ್ಡೆ ಕಡಿಮೆ ಹಾಕಿ: ಪಾನಿಪುರಿಯ ಒಳಗೆ ಹಾಕುವ ಬೇಯಿಸಿದ ಆಲೂಗಡ್ಡೆಯ ಮಸಾಲೆ ಮಾಡುವಾಗ ಅದರ ಪ್ರಮಾಣವನ್ನು ಕಡಿಮೆ ಮಾಡಿ. ಅಥವಾ ಆಲೂಗಡ್ಡೆಯ ಬದಲಾಗಿ ಬೇಯಿಸಿದ ಚೆನ್ನಾ ಹಾಕಬಹುದು. ಅದಕ್ಕೆ ಮೊಳಕೆ ಕಾಳುಗಳನ್ನು ಸೇರಿಸಬಹುದು.

ಇದನ್ನೂ ಓದಿ: Food Tips: ಸೀದು ಕೆಂಪಾದ ಆಹಾರ ಸೇವನೆಗೆ ಯೋಗ್ಯವೇ?

೩. ಮಸಾಲೆಗಳನ್ನು ಧಾರಾಳವಾಗಿ ಬಳಸಿ: ಮನೆಯಲ್ಲೇ ಮಾಡುವ ಪಾನಿಪುರಿಯ ಪಾನಿಗೆ ಹಾಗೂ ಸಿಹಿ ಚಟ್ನಿಗೆ ಧಾರಾಳವಾಗಿ ಮಸಾಲೆಗಳನ್ನು ಹಾಕಿ. ಹುಣಸೆಹಣ್ಣು, ಖರ್ಜೂರ ಸೇರಿಸಿ ಮಾಡಿದ ಸಿಹಿ ಚಟ್ನಿ, ಚೆನ್ನಾಗಿ ಪುದಿನ ಕೊತ್ತಂಬರಿ ಸೊಪ್ಪು ಹಾಕಿದ ಹಸಿರು ಚಟ್ನಿ, ಇಂಗು, ಸೋಂಪು, ಜೀರಿಗೆ, ಸೈಂದವ ಲವಣ, ಜಲ್ಜೀರಾ ಇತ್ಯಾದಿಗಳನ್ನು ಹಾಕಿ ಮಾಡಿದ ಪಾನಿ ಎಲ್ಲವೂ ಉತ್ತಮ ಗುಣಮಟ್ಟದ್ದು, ನಿಮ್ಮದೇ ಮನೆಯದ್ದು ಎಂಬ ಭರವಸೆ, ನೆಮ್ಮದಿಯೂ ನಿಮ್ಮಲ್ಲಿರುತ್ತದೆ. ಈ ಎಲ್ಲ ಮಸಾಲೆಗಳು ದೇಹಕ್ಕೆ ಒಳ್ಳೆಯದೇ.

೪. ಕಡಿಮೆ ತಿನ್ನಿ: ಪಾನಿಪುರಿಯ ಒಂದು ವಿಶೇಷತೆಯೆಂದರೆ ಅದು ಹೆಚ್ಚು ಕ್ಯಾಲರಿಯ ತಿನಿಸಲ್ಲ. ಆದನ್ನು ಆರೋಗ್ಯಕರವಾದ ಶೈಲಿಯಲ್ಲಿ ಮಾಡಿದರೆ ಹೆಚ್ಚು ತಲೆಕೆಡಿಸಿಕೊಳ್ಳದೆ ತಿನ್ನಬಹುದು. ಬರ್ಗರ್‌, ಪಿಜ್ಜಾ, ಮಂಚೂರಿಯನ್‌, ಚೀಸ್‌ ಕಾರ್ನ್‌ ರೋಲ್‌ ಮತ್ತಿತರ ಜಂಕ್‌ಗಳಿಗೆ ಹೋಲಿಸಿದರೆ, ಇದು ಅಷ್ಟು ಕ್ಯಾಲರಿಯನ್ನು ಹೊಂದಿಲ್ಲ ನಿಜ. ಆದರೆ, ತಿನ್ನುವಾಗಿ ರುಚಿಯೆಂದು ಹೊಟ್ಟೆಯ ಮೇಲಿನ ಗಮನ ಬೇರೆಡೆಗೆ ಹೋಗದಿರಲಿ. ಹೊಟ್ಟೆಯ, ನಾಲಿಗೆಯ ಮಾತು ಕೇಳದೆ ನೀವು ಅಂದುಕೊಂಡದ್ದರ ಬಗ್ಗೆ ಯೋಚಿಸಿ.

ಇದನ್ನೂ ಓದಿ: Motivation: ಬಿ ಟೆಕ್‌ ಪಾನಿಪುರಿವಾಲಿ: ದೆಹಲಿಯ ರಸ್ತೆಗಳಲ್ಲಿ 21ರ ಹುಡುಗಿಯ ಯಶಸ್ವಿ ಉದ್ಯಮ!

ಮರ್ಯಾದಾ ಪುರುಷೋತ್ತಮ ರಾಮನ ಹುಟ್ಟುಹಬ್ಬ (Ram Navami 2023) ಎಂದರೆ, ಭಾರತದ ಪ್ರಮುಖ ಹಬ್ಬಗಳಲ್ಲೊಂದು. ರಾಮನಿಗೆ ಪ್ರಿಯವಾದ ಭಕ್ಷ್ಯಗಳನ್ನು ಮನೆಯಲ್ಲೇ ಮಾಡುವುದು ಹಬ್ಬದ ಖುಷಿಗಳಲ್ಲೊಂದು. ಹಬ್ಬದ ಹೆಸರಿನಲ್ಲಿ ಇಂದು ಪುರಾತನ, ತಲೆತಲಾಂತರಗಳಿಂದ ನಡೆದುಬಂದ ದೇಸೀ ತಿನಿಸುಗಳನ್ನು ಮಾಡಲು ಪ್ರಯತ್ನಿಸುವುದು ಹಾಗೂ ಸಂಪ್ರದಾಯ, ಆಚರಣೆ, ಸಂಸ್ಕೃತಿಯನ್ನು ಜೀವಂತವಾಗಿರುಸುವುದನ್ನು ನಮ್ಮ ಕಿರಿಯರಿಗೆ ದಾಟಿಸುವುದೂ ಕೂಡಾ ಅತ್ಯಂತ ಅಗತ್ಯ. ಹಾಗಾಗಿ ರಾಮನವಮಿಯ ಪ್ರಮುಖ ಭಕ್ಷ್ಯಗಳನ್ನು ಇಲ್ಲಿ ನೋಡೋಣ.

೧. ಕೋಸಂಬರಿ ಹಾಗೂ ಪಾನಕ: ಸಲಾಡ್‌ ಅಥವಾ ಕೋಸಂಬರಿ ಹಾಗೂ ತಂಪು ಪಾನೀಯ ಪಾನಕ ರಾಮನವಮಿಯ ವಿಶೇಷತೆಗಳಲ್ಲೊಂದು. ರಾಮನವಮಿಯ ದಿನ ಸಿಹಿತಿಂಡಿ ಮಾಡಲಾಗದಿದ್ದರೂ ಬಹುತೇಕರು ಪಾನಕ ಹಾಗೂ ಕೋಸಂಬರಿ ಮಾಡುವುದುಂಟು. ಸಣ್ಣಕ್ಕೆ ಹೆಚ್ಚಿದ ಸೌತೆಕಾಯಿ, ನೆನೆಸಿದ ಹೆಸರು ಬೇಳೆ, ಕಾಯಿತುರಿ, ತುರಿದ ಕ್ಯಾರೆಟ್‌, ಸಣ್ಣಕ್ಕೆ ಹೆಚ್ಚಿದ ಹಸಿಮೆಣಸು ಹಾಕಿ ಎಲ್ಲವನ್ನೂ ಮಿಕ್ಸ್‌ ಮಾಡಿ ಒಂದು ಒಗ್ಗರಣೆ ಹಾಕಿದರೆ ಈ ಕೋಸಂಬರಿ ರೆಡಿ. ಬೆಲ್ಲದ ತುರಿ, ಕರಿಮೆಣಸು ಏಲಕ್ಕಿ ಹಾಗೂ ಒಣ ಶುಂಠಿ ಪುಡಿ ಹಾಕಿ ಮಾಡಿದ ಸಿಹಿಯಾದ ತಂಪು ತಂಪು ಪಾನಕವೂ ರಾಮನಿಗೆ ಪ್ರಿಯ. ಇವೆರಡನ್ನಾದರೂ ರಾಮನ ಮುಂದಿಟ್ಟು ಪೂಜೆ ಮಾಡಿ ಸೇವಿಸದರೆ, ರಾಮನವಮಿ ಆಚರಿಸಿದ ಸಂತಸ.

೨. ಚಲಿಮಿಡಿ: ಆಂದ್ರಪ್ರದೇಶ, ತೆಲಂಗಾಣಗಳಲ್ಲಿ ರಾಮನವಮಿಯಂದು ಮಾಡುವ ಸಾಂಪ್ರದಾಯಿಕ ಸಿಹಿತಿಂಡಿ. ಇದು ರಾಂನಿಷ್ಟ ಎಂಬ ನಂಬಿಕೆ ರಾಮ ಭಕ್ತರದ್ದು. ಅಕ್ಕಿಯನ್ನು ನೆನೆಸಿ ರುಬ್ಬಿ ಕಾಯಿಸಿ ಅದಕ್ಕೆ ಬೆಲ್ಲ, ಕಾಯಿತುರಿ, ತುಬ್ಬ, ಏಲಕ್ಕಿ ಹಾಕಿ ಲಡ್ಡಿನ ಹಾಗೆ ಉಂಡೆ ಕಟ್ಟಿ ಹಬೆಯಲ್ಲಿ ಬೇಯಸಿಸುವ ಅಪರೂಪದ ಸಾಂಪ್ರದಾಯಿಕ ತಿನಿಸಿದು. ರಾಮನವಮಿಯ ದಿನ ಆಂದ್ರ ಪ್ರದೇಶದಲ್ಲಿ ಮಾಡುವ ವಿಶೇಷ ಭಕ್ಷ್ಯಗಳಲ್ಲಿ ಇದೂ ಒಂದು.

೩. ರೋಟ್‌: ರಾಮ ಬಂಟ ಹನುಂತನಿಗೆ ಪ್ರಿಯವಾದ ತಿನಿಸು ಈ ರೋಟ್‌. ಈ ತಿನಿಸು ಇತ್ತೀಚೆಗಿನ ದಿನಗಳಲ್ಲಿ ಕಾಣಸಿಗುವುದೇ ಅಪರೂಪ. ಗೋಧಿ ಹಿಟ್ಟು, ತುಪ್ಪ, ಸಕ್ಕರೆ ಅಥವಾ ಬೆಲ್ಲ, ಏಲಕ್ಕಿ ಪುಡಿ, ಪುಡಿ ಮಾಡಿದ ಒಣಹಣ್ಣು ಹಾಗೂ ಬೀಜಗಳನ್ನು ಹಾಕಿ ವಡೆಯ ರೂಪದಲ್ಲಿ ಎಣ್ಣೆಯಲ್ಲಿ ಕರಿದು ಮಾಡುವ ತಿನಿಸಿದು.

೪. ನೀರು ಮಜ್ಜಿಗೆ: ಪಾನಕದಂತೆಯೇ ರಾಮನವಮಮಿಯ ದಿನದಂದು ವ್ಯಾಪಕವಾಗಿ ಮಾಡುವ ಇನ್ನೊಂದು ಪಾನೀಯ ನೀರು ಮಜ್ಜಿಗೆ. ಮೊಸರನ್ನು ಕಡೆದು ಮಜ್ಜಿಗೆ ಮಾಡಿ, ಮಜ್ಜಿಗೆಯನ್ನು ನೀರು ಮಾಡಿ ಅದಕ್ಕೆ, ಹಸಿಮೆಣಸು, ಶುಂಠಿ, ಚಾಟ್‌ ಮಸಾಲೆ, ಜೀರಿಗೆ ಪುಡಿ, ಇಂಗು, ಕೊತ್ತಂಬರಿ ಸೊಪ್ಪು ಅಥವಾ ಕರಿಬೇವಿನ ಒಗ್ಗರಣೆ, ರುಚಿಗೆ ಉಪ್ಪು ಇಷ್ಟಿದ್ದರೆ ಈ ಮಜ್ಜಿಗೆ ಲೋಟಗುಟ್ಟಲೆ ಸುರಿ ಸುರಿದು ಕುಡಿಯಬಹುದು.

೫. ಸಾಬುದಾನ ಪಾಯಸ: ಸಬ್ಬಕ್ಕಿ ಅಥವಾ ಸಾಬುದಾನ ಪಾಯಸ ರಾಮನಿಗೆ ಅತ್ಯಂತ ಪ್ರಿಯವಂತೆ! ಹಾಗಂತ ರಾಮನ ಭಕ್ತರ ನಂಬಿಕೆ. ಹೀಗಾಗಿ ರಾಮನವಮಿಯ ದಿನ ಸಬ್ಬಕ್ಕಿಯ ಪಾಯಸ ಖಂಡಿತವಾಗಿಯೂ ಎಲ್ಲರೂ ರಾಮನಿಗಾಗಿ ತಮ್ಮ ಮನೆಗಳಲ್ಲಿ ಮಾಡಿ ನೈವೇದ್ಯ ಇಡುತ್ತಾರೆ.

೬. ರಘುಪತಿ ಲಡ್ಡು: ರಾಮನಿಗೆ ಗೋಧಿಹಿಟ್ಟಿನ ಲಡ್ಡು ಬಹಳ ಪ್ರಿಯವಂತೆ. ಇದಕ್ಕೆ ರಘುಪತಿ ಲಡ್ಡು ಎಂಬ ಹೆಸರೂ ಇದೆ. ಬಾಣಲೆಯಲ್ಲಿ ಎರಡು ಚಮಚ ತುಪ್ಪ ಬಿಸಿ ಮಾಡಿ ಅದಕ್ಕೆ ಗೋಡಂಬಿ, ಬಾದಾಮಿ ಹಾಕಿ ಹುರಿದುಕೊಂಡು ಬದಿಯಲ್ಲಿಡಿ. ಬಾಣಲೆಯಲ್ಲಿ ಒಂದು ಕಪ್‌ ಗೋಧಿ ಹುಡಿ ಹುರಿದುಕೊಂಡು ಅದಕ್ಕೆ ಒಂದು ಕಪ್‌ ತುಪ್ಪ ಸೇರಿಸಿ ಚೆನ್ನಾಗಿ ಕಲಸಿಕೊಳ್ಳಿ. ಇದಕ್ಕೆ ಅರ್ಧ ಕಪ್‌ ತುರಿದ ಬೆಲ್ಲ ಸೇರಿಸಿ. ಏಲಕ್ಕಿ ಪುಡಿ, ಸ್ವಲ್ಪ ಒಣ ದ್ರಾಕ್ಷಿ, ಹುರಿದುಕೊಂಡ ಬಾದಾಮಿ ಹಾಗೂ ಗೋಡಂಬಿ ಸೇರಿಸಿ ಬಿಸಿಯಾಗಿರುವಾಗಲೇ ಲಡ್ಡಿನ ರೂಪದಲ್ಲಿ ಉಂಡೆ ಕಟ್ಟಿ. ಉಂಡೆ ಕಟ್ಟಲು ಬರದಿದ್ದರೆ ಬೇಕಾದಷ್ಟು ತುಪ್ಪ ಸೇರಿಸಿಕೊಳ್ಳಿ. ಇದಾಗ್ಯೂ ಉಂಡೆ ಕಟ್ಟಲು ಕಷ್ಟವಾದರೆ, ಒಂದೆರಡು ಹಾಲಿನ ಹನಿ ಹಾಕಿ ಉಂಡೆ ಕಟ್ಟಲು ಪ್ರಯತ್ನಿಸಬಹುದು. 

ಇದನ್ನೂ ಓದಿ: Ram Navami 2023 : ರಾಮನವಮಿಯಂದು ಶ್ರೀರಾಮನ ಪೂಜೆ ಎಷ್ಟು ಹೊತ್ತಿಗೆ? ಆಚರಣೆ ಹೇಗೆ?

ನವದೆಹಲಿ: ಭಾರತದ ಬಹುತೇಕ ರೆಸ್ಟೊರೆಂಟ್‌ಗಳಲ್ಲಿ ಚಿಕನ್ ಮಂಚೂರಿಯನ್ (Chicken Manchurian) ಅತ್ಯಂತ ಬೇಡಿಕೆಯ ಡಿಶ್. ಭಾರತ ಮಾತ್ರವಲ್ಲದೇ, ದಕ್ಷಿಣ ಏಷ್ಯಾದಲ್ಲೇ ಈ ಡಿಶ್‌ಗೆ ವ್ಯಾಪಕ ಬೇಡಿಕೆ ಇದೆ. ಆದರೆ, ದಿ ನ್ಯೂಯಾರ್ಕ್ ಟೈಮ್ಸ್ (The New York Times) ಈ ಚಿಕನ್ ಮಂಚೂರಿಯನ್ ಬಗ್ಗೆ ಮಾಡಿದ ಟ್ವೀಟ್‌ವೊಂದು, ಸೋಷಿಯಲ್ ಮೀಡಿಯಾದಲ್ಲಿ ಭಾರತ ಮತ್ತು ಪಾಕಿಸ್ತಾನ ನೆಟ್ಟಿಗರ ನಡುವಿನ ಕದನಕ್ಕೆ ಕಾರಣವಾಗಿದೆ.

ಅಮೆರಿಕದ ದಿ ನ್ಯೂಯಾರ್ಕ್ ಟೈಮ್ಸ್ ಪತ್ರಿಕೆಯು ಚಿಕನ್ ಮಂಚೂರಿಯನ್ ತಯಾರಿಸುವ ಮಾಹಿತಿಯನ್ನು ಒಳಗೊಂಡ ಲೇಖನವನ್ನು ಟ್ಯಾಗ್ ಮಾಡಿ, a stalwart of Pakistani Chinese cooking ಎಂದು ಟ್ವೀಟ್ ಮಾಡಿತ್ತು. ಈ ಟ್ವೀಟ್‌ನೊಂದಿಗೆ ಚಿಕನ್ ಮಂಚೂರಿಯನ್ ಮಾಲೀಕತ್ವದ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಫುಲ್ ಚರ್ಚೆಗಳು ಶುರುವಾಗಿವೆ.

ಚಿಕನ್ ಮಂಚೂರಿಯನ್ ರೆಸಿಪಿ ಕುರಿತು ದಿ ನ್ಯೂಯಾರ್ಕ್ ಟೈಮ್ಸ್ ಮಾಡಿರುವ ಟ್ವೀಟ್

ಭಾರತೀಯ ನೆಟ್ಟಿಗರು ನ್ಯೂಯಾರ್ಕ್ ಟೈಮ್ಸ್ ತಪ್ಪು ಮಾಹಿತಿಯನ್ನು ನೀಡಿದೆ ಎಂದು ತಮ್ಮ ವಾದವನ್ನು ಮುಂದಿಟ್ಟಿದ್ದಾರೆ. ಅಲ್ಲದೇ, ಚಿಕನ್ ಮಂಚೂರಿಯನ್ ಮೊದಲು ತಯಾರಿಸಿದ್ದೇ ಭಾರತದಲ್ಲಿ ಎಂದು ಹೇಳಿದ್ದಾರೆ. ಇನ್ನು ಪಾಕಿಸ್ತಾನದ ನೆಟ್ಟಿಗರು ಕೂಡ ಈ ವಿಷಯದಲ್ಲಿ ಹಿಂದೆ ಬಿದ್ದಿಲ್ಲ. ಚಿಕನ್ ಮಂಚೂರಿಯನ್ ಮೂಲ ಪಾಕಿಸ್ತಾನದ್ದು ಎಂದು ವಾದಿಸಿದ್ದಾರೆ.

ಈ ಎರಡೂ ವಾದಗಳ ಮಧ್ಯೆ ಅರ್ಥ ಸತ್ಯ ಮತ್ತು ಸುಳ್ಳು ಇದೆ. ಕೆಲವು ವರದಿಗಳ ಪ್ರಕಾರ, ಮುಂಬೈನಲ್ಲಿ ಈಗಲೂ ರೆಸ್ಟೆರೊಂಟ್‌ಗಳನ್ನು ಹೊಂದಿರುವ ಚೀನಾ ಮೂಲದ ಬಾಣಸಿಗ ನೆಲ್ಸನ್ ವಾಂಗ್ ಅವರು ಈ ಚಿಕನ್ ಮಂಚೂರಿಯನ್ ಮೊದಲಿಗೆ ಪರಿಚಯಿಸಿದ್ದಾರೆ. ಈ ಬಗ್ಗೆ ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ ಕೂಡ ವರದಿ ಮಾಡಿದೆ. ನೆಲ್ಸನ್ ವಾಂಗ್ ಅವರು ಭಾರತದಲ್ಲಿ ನೆಲಿಸಿದ್ದ ಚೀನಾ ಬಾಣಸಿಗರ ಮೂರನೇ ತಲೆಮಾರಿನ ವ್ಯಕ್ತಿಯಾಗಿದ್ದಾರೆ.

ಮತ್ತೆ ಕೆಲವು ವರದಿಗಳು, ಚಿಕನ್ ಮಂಚೂರಿಯನ್ ಪಾಕಿಸ್ತಾನದಲ್ಲಿ ಮೊದಲಿಗೆ ತಯಾರಿಸಲಾಯಿತು ಎಂದು ಹೇಳಿವೆ. 1970ರ ದಶಕದಲ್ಲಿ ಪಾಕ್ ಬಾಣಸಿಗ ಅಲಿ ಸಿಕಂದರ್ ತಾಹಿರ್ ಎಂಬಾತ, ಚೀನಿ ಶೈಲಿಯಲ್ಲಿ ಚಿಕನ್ ಮಂಚೂರಿಯನ್ ತಯಾರಿಸಿದನಂತೆ. ಈತ ಮೊದಲು ಕರಾಚಿಯ ಚೀನಿ ರೆಸ್ಟೋರೆಂಟ್‌ಗಳಲ್ಲಿ ಕೆಲಸ ಮಾಡುತ್ತಿದ್ದ. ಈತ ಪಾಕಿಸ್ತಾನದ ಖಾದ್ಯಗಳು, ಮಸಾಲೆಗಳನ್ನು ಬಳಸಿಕೊಂಡು ಸ್ಥಳೀಯವಾಗಿ ಚಿಕನ್ ಮಂಚೂರಿಯನ್ ಸಿದ್ಧಪಡಿಸಿದ. ಮುಂದೆ ಈ ಚಿಕನ್ ಮಂಚೂರಿಯನ್ ಭಾರತಕ್ಕೂ ಕಾಲಿಟ್ಟು ಪ್ರಸಿದ್ಧಿಯಾಯಿತು ಎಂದು ಹೇಳಲಾಗುತ್ತಿದೆ. ಆದರೆ, ನಿರ್ದಿಷ್ಟವಾಗಿ ಇದು ಪಾಕಿಸ್ತಾನ ಅಥವಾ ಭಾರತದ್ದೇ ಎಂದು ಹೇಳುವುದಕ್ಕೆ ದಾಖಲೆಗಳಿಲ್ಲ ಎನ್ನಲಾಗುತ್ತಿದೆ.

ಇದನ್ನೂ ಓದಿ: Fried Chicken: ಹೊಂಬಣ್ಣದ ಗರಿ ಗರಿ ಫ್ರೈಡ್‌ ಚಿಕನ್‌ ಮನೆಯಲ್ಲೇ ಮಾಡಲು ಐದು ಸೂತ್ರಗಳು!

ಚಿಕನ್ ಮಂಚೂರಿಯನ್ ಇತಿಹಾಸ ಏನೇ ಇರಲಿ. ಆದರೆ, ದಕ್ಷಿಣ ಏಷ್ಯಾದ ರಾಷ್ಟ್ರಗಳಲ್ಲಿ ಸಾಕಷ್ಟು ಬೇಡಿಕೆ ಇದೆ. ಹಾಗಾಗಿ, ಭಾರತ ಮತ್ತು ಪಾಕಿಸ್ತಾನಿ ನೆಟ್ಟಿಗರಿಬ್ಬರೂ ಚಿಕನ್ ಮಂಚೂರಿಯನ್ ಮೇಲೆ ತಮ್ಮ ಮಾಲೀಕತ್ವವನ್ನು ಪ್ರದರ್ಶಿಸುವ ಕೆಲಸ ಮಾಡುತ್ತಿದ್ದಾರೆ!

ಭಾರತೀಯ ಅಡುಗೆಯಲ್ಲಿ ನಾವು ಸಾಕಷ್ಟು ಮಸಾಲೆ ಪದಾರ್ಥಗಳನ್ನು ನಿತ್ಯವೂ ಬಳಸುತ್ತೇವೆ. ಹಿಂದಿನಿಂದಲೂ ನಮ್ಮ ಹಿರಿಯರು ಅಡುಗೆಮನೆಯಲ್ಲಿ ಧಾರಾಳವಾಗಿ ಗರಂ ಮಸಾಲಾ, ಅರಿಶಿನ, ಚಾಟ್‌ ಮಸಾಲಾ ಹೀಗೆ ಬಗೆಬಗೆಯ ಮಸಾಲೆಗಳನ್ನು ನಮ್ಮ ಆಹಾರದಲ್ಲಿ ಸೇರಿಸುತ್ತಲೇ ಬಂದಿದ್ದಾರೆ. ಇದು ಭಾರತೀಯ ಅಡುಗೆಯ ಸ್ವಾದವನ್ನೂ ರಂಗನ್ನೂ ಘಮವನ್ನೂ ಹೆಚ್ಚಿಸಿದೆಎಂಬುದರಲ್ಲಿ ಯಾವ ಅನುಮಾನವೂ ಇಲ್ಲ.

ಆದರೆ, ನಿತ್ಯವೂ ಇಂತಹ ಅಡುಗೆಯನ್ನು ಡಬ್ಬಿಯಲ್ಲಿ ಹಾಕಿ ಆಫೀಸಿಗೆ ಕೊಂಡೊಯ್ಯುತ್ತೇವೆ. ಅಲ್ಲೇ ತೊಳೆದು ತಂದರೂ, ಸರಿಯಾಗಿ ಮನೆಯಲ್ಲಿ ತೊಳೆಯಲು ಮತ್ತೆ ಡಬ್ಬಿ ಬಿಚ್ಚುತ್ತೇವೆ. ನಿತ್ಯವೂ ಬಗೆಬಗೆಯ ಆಹಾರ ಹೊತ್ತುಕೊಂಡು ಹೋದ ಡಬ್ಬಿ ಮಾತ್ರ ಘಮ್ಮೆಂದು ನಾರಲು ಶುರುವಾಗಿರುತ್ತದೆ. ಎಷ್ಟೇ ಚೆನ್ನಾಗಿ ತೊಳೆದರೂ, ನಿತ್ಯವೂ ಊಟ ತೆಗೆದುಕೊಂಡು ಹೋಗುವ ಡಬ್ಬಿಯಲ್ಲಿ ಅಳಿಸಲಾಗದ ವಾಸನೆಯೊಂದು ಉಳಿದುಕೊಂಡ ಹಾಗೆ ಅನಿಸತೊಡಗುತ್ತದೆ. ಕೆಲವೊಮ್ಮೆ ಒಂದು ಅಡುಗೆಯನ್ನು ತೆಗೆದುಕೊಂಡು ಹೋದ ಡಬ್ಬಿಯಲ್ಲಿ ತೊಳೆದು ಮತ್ತೊಂದನ್ನು ಹಾಕಿ ತೆಗೆದುಕೊಂಡು ಹೋದರೂ ಹಳೆಯ ಆಹಾರದ ವಾಸನೆ ಹೊಸ ತಿಂಡಿಯೊಂದಿಗೆ ಸೇರಿಕೊಂಡು ಹೊಸ ತಿಂಡಿಯ ನಿಜವಾದ ಘಮ ಸವಿಯಲು ಸಿಗುವುದಿಲ್ಲ. ಇನ್ನೂ ಕೆಲವೊಮ್ಮೆ ಮಸಾಲೆ ಪದಾರ್ಥಗಳನ್ನು ಹಾಕಿಟ್ಟ ಡಬ್ಬಿಯಲ್ಲಿ ಬೇರೇನನ್ನೂ ಹಾಕಲು ಸಾಧ್ಯವಾಗದ ಪರಿಸ್ಥಿತಿ ಉಂಟಾಗುತ್ತದೆ. ಹೀಗೆ ಊಟದ ಡಬ್ಬಿಯ ಕೆಟ್ಟ ವಾಸನೆಯನ್ನು ಹೋಗುವಂತೆ ಮಾಡುವ ಉಪಾಯಗಳೇನು ಎಂಬುದನ್ನು ನೋಡೋಣ.

1. ಬೇಕಿಂಗ್‌ ಸೋಡಾ: ಕೆಟ್ಟ ವಾಸನೆಯನ್ನು ತೆಗೆಯುವಲ್ಲಿ ಬೇಕಿಂಗ್‌ ಸೋಡಾ ಪರಿಣಾಮಕಾರಿ ಕೆಲಸ ಮಾಡುತ್ತದೆ. ಒಂದು ಚಮಚ ಬೇಕಿಂಗ್‌ ಸೋಡಾವನ್ನು ನೀರಿನಲ್ಲಿ ಕಲಸಿ ಪೇಸ್ಟ್‌ ಮಾಡಿಕೊಂಡು ಊಟದ ಡಬ್ಬಿಯೊಳಗೆ ಹಚ್ಚಿ ಒಂದೆರಡು ಗಂಟೆ ಬಿಡಿ. ನಂತರ ಬಿಸಿನೀರಿನಲ್ಲಿ ತೊಳೆಯಿರಿ. ಡಬ್ಬಿಯಲ್ಲಿರುವ ಹಳೆಯ ಕೆಟ್ಟ ವಾಸನೆ ಮಾಯವಾಗುತ್ತದೆ.

2. ಆಲೂಗಡ್ಡೆ: ಹಸಿ ಆಲೂಗಡ್ಡೆಯೂ ಊಟದ ಡಬ್ಬಿಯ ಕೆಟ್ಟ ವಾಸನೆ ಹೋಗಲಾಡಿಸುತ್ತದೆ ಎಂದರೆ ನಂಬುತ್ತೀರಾ? ಹೌದು. ಹಸಿ ಆಲೂಗಡ್ಡೆಯನ್ನು ಉರುಟಾದ ಹೋಳುಗಳನ್ನಾಗಿ ಮಾಡಿ ಆ ಹೋಳಿನಿಂದ ಊಟದ ಡಬ್ಬಿಯ ಒಳಮೈಯನ್ನು ಉಜ್ಜಿ. ಹೋಳನ್ನು ಹಾಗೆಯೇ ೧೫-೨೦ ನಿಮಿಷಗಳ ಕಾಲ ಒಳಗೆ ಬಿಡಿ.

ಇದನ್ನೂ ಓದಿ: smart kitchen: ಜಾಣ ಅಡುಗೆಗೆ ಒಂದಿಷ್ಟು ಕಿವಿಮಾತುಗಳು

3. ವೈಟ್‌ ವಿನೆಗರ್:‌ ವೈಟ್‌ ವಿನೆಗರ್‌ಗೆ ಬ್ಯಾಕ್ಟೀರಿಯಾವನ್ನು ಸಾಯಿಸುವ ಶಕ್ತಿಯಿದ್ದು, ಅದರ ಜೊತೆಗೆ, ಆಲ್ಕಲೈನ್‌ ವಾಸನೆಯನ್ನು ಹೊಡೆದೋಡಿಸುವ ತಾಕತ್ತಿದೆ. ವಿನೆಗರ್‌ ಹಾಗೂ ನೀರು ಎರಡನ್ನೂ ಸಮ ಪ್ರಮಾಣದಲ್ಲಿ ತೆಗೆದುಕೊಂಡು ಕೆಲ ಗಂಟೆಗಳ ಕಾಲ ಡಬ್ಬಿಯಲ್ಲಿ ತುಂಬಿಸಿಡಿ. ನಂತರ ಬಿಸಿನೀರಿನಲ್ಲಿ ತೊಳೆದು ಒಣಗಿಸಿದರೆ, ಎಂಥ ವಾಸನೆಯಿದ್ದರೂ ವಾಸನೆ ಮಾಯವಾಗುತ್ತದೆ.

4. ನಿಂಬೆಹಣ್ಣಿನ ಸಿಪ್ಪೆ: ನಿಂಬೆಹಣ್ಣನ್ನು ಬಳಸಿದ ಮೇಲೆ ಅದರ ಸಿಪ್ಪೆಯನ್ನು ಎಸೆಯುವ ಬದಲು ತೆಗೆದಿಡಿ. ಅದನ್ನು ವಾಸನೆಯುಕ್ತ ಡಬ್ಬಿಯೊಳಗೆ ಹಾಕಿ ತಿಕ್ಕಿ ಒಂದೆರಡು ಗಂಟೆ ಹಾಗೇ ಬಿಡಿ. ಆಮೇಲೆ ತೊಳೆದು ಒಣಗಿಸಿ. ಡಬ್ಬಿಯ ಕಲೆ, ವಾಸನೆ ಎಲ್ಲವೂ ಹೋಗುತ್ತದೆ.

೫. ಚೆಕ್ಕೆ: ಚೆಕ್ಕೆಯೂ ಕೂಡಾ ವಾಸನೆಯನ್ನು ಹೊಡೆದೋಡಿಸುವಲ್ಲಿ ಸಹಾಯ ಮಾಡುತ್ತದೆ. ಇದರಲ್ಲಿ ಆಂಟಿ ಬ್ಯಾಕ್ಟೀರಿಯಲ್‌ ಗುಣಗಳಿರುವುದರಿಂದ ಇದು ಊಟದ ಡಬ್ಬಿಯಲ್ಲಿನ ಕೆಟ್ಟ ವಾಸನೆ ತೆಗೆಯುತ್ತದೆ. ಚೆಕ್ಕೆಯನ್ನು ನೀರಿನಲ್ಲಿ ಹಾಕಿ ಕುದಿಸಿ ಅದನ್ನು ಊಟದ ಡಬ್ಬಿಗೆ ಹಾಕಿಡಿ. ನಂತರ ತೊಳೆಯಿರಿ. ವಾಸನೆ ಹೋಗುತ್ತದೆ.

ಇದನ್ನೂ ಓದಿ: Lifestyle Tips: ಆರೋಗ್ಯಕರ ಒತ್ತಡರಹಿತ ಜೀವನಕ್ಕೆ ಸರಳ ಸಪ್ತಸೂತ್ರಗಳು!